Rot Bilong Kamapim Gutaim Long Graun

WANPELA nius (Time) i tok: “Strongpela man tru i winim olgeta man i bin i stap long graun kirap long bipo yet i kam inap long nau em Jisas bilong Nasaret.” Taim Jisas i stap long graun, planti tausen man i gat gutpela bel ol i bin luksave long bikpela strong bilong em na pasin bilong em long tingim ol narapela. Olsem na yumi no kirap nogut long ol i laik mekim em i kamap king. (Jon 6:​10, 14, 15) Tasol olsem yumi stori pinis long stori i kamap paslain long dispela, Jisas i no laik insait long ol wok politik.

I GAT tripela samting i mekim na Jisas i no laik insait long dispela wok, olsem: tingting bilong Papa bilong em long wok bilong ol man long bosim graun; Jisas i save olsem i gat ol strongpela spirit i wok hait long bagarapim wok bilong ol man long bosim graun​—⁠maski ol man i wok strong tru; na laik bilong God long kamapim wanpela gavman long heven bilong bosim olgeta hap bilong graun. Taim yumi skelim gut ol dispela tripela samting, yumi bai kisim save long as na wok bilong ol man long mekim graun i kamap gutpela ples i lus nating. Na tu, yumi bai kisim save long rot bilong kamapim gutaim long graun.

Yu Ting Ol Man Inap Bosim Ol Yet?

Taim God i bin wokim ol man, em i givim wok long ol bilong bosim ol animal samting. (Stat 1:​26) Tasol ol man i stap aninit long wok bos bilong God. Namba wan man na meri i mas kamapim olsem ol i daun long God, na bilong mekim olsem ol i mas abrusim pikinini kaikai bilong wanpela diwai, em “diwai bilong givim gutpela save long wanem samting i gutpela na wanem samting i nogut.” (Stat 2:​17) Adam na Iv inap long makim wanem rot ol i laik bihainim tasol sori tru, ol i makim rot nogut na ol i sakim tok bilong God. Taim ol i kisim pikinini bilong diwai tambu, ol i no mekim pasin stil tasol, nogat. Ol i bikhet long wok bos bilong God. Long Stat 2:​17 long The New Jerusalem Bible, i gat wanpela tok long sta daunbilo i stori olsem Adam na Iv “i laik bosim wokabaut bilong ol yet na long dispela rot ol i no laik tingim olsem God yet i bin wokim ol na ol i kamap. . . . Dispela namba wan sin i kamapim olsem ol i sakim wok bos bilong God.”

I gat ol bikpela tok bilong stretim, olsem na God i larim Adam na Iv na ol tumbuna pikinini bilong ol i makim wanem rot ol i laik bihainim, na ol yet i makim wanem samting i stret na wanem samting i no stret. (Song 147:​19, 20; Rom 2:​14) Em nau, kirap long dispela taim, ol man i traim kain kain rot bilong bosim wokabaut bilong ol. Olsem wanem? Wok bos bilong ol i bin kamapim gutpela samting? Taim yumi skelim ol samting i bin kamap insait long planti tausen yia i go pinis, yumi ken tok nogat! Saveman 8:9 i tok: “Sampela bikman i wok long daunim ol arapela manmeri na mekim nogut long ol.” Ol samting nogut i kamap long wok bos bilong ol man i truim tok bilong Jeremaia 10:23: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” Ol samting i bin kamap long graun i kamapim klia tru olsem ol man i no inap long bosim gut wokabaut bilong ol yet sapos ol i sakim Man bilong wokim ol.

Jisas i wanbel long dispela tok. Pasin bilong ol man long bosim ol yet na sakim wok bos bilong God i olsem wanpela samting nogut tru long tingting bilong Jisas. Em i tok: “Mi no mekim wanpela samting long tingting bilong mi yet. Nogat. . . . Oltaim mi save mekim ol samting [God] i laikim.” (Jon 4:​34; 8:​28, 29) God i no tokim ol man long mekim Jisas i kamap king, olsem na Jisas i no tingting liklik long mekim olsem. Tasol dispela i no makim olsem em i no laik helpim ol man, nogat. Em i bin wok strong tru long helpim ol man long i stap amamas long dispela taim yet na long bihain tu. Na tu, em i givim laip bilong em bilong helpim ol man. (Matyu 5:​3-11; 7:​24-​27; Jon 3:​16) Tasol Jisas i save olsem “olgeta samting . . . i save kamap long taim bilong em yet,” na i gat taim bilong God long kirap bosim olgeta lain man. (Saveman 3:1; Matyu 24:​14, 21, 22, 36-​39) Tasol tingim dispela samting: Long Iden tupela tumbuna bilong yumi bilong pastaim ol i bin bihainim laik bilong wanpela spirit nogut​—⁠dispela spirit nogut i bin mekim tok long rot bilong wanpela snek. Dispela em i namba tu as na Jisas i no laik insait long ol wok politik.

Hetman i Stap Hait na i Bosim Graun

Baibel i stori olsem, Satan i tok long givim “olgeta strongpela kantri bilong dispela graun wantaim ol gutpela samting bilong ol” long Jisas sapos Jisas i brukim skru na lotuim em. (Matyu 4:​8-​10) Em nau, Satan i laik givim wok bos long Jisas bilong bosim dispela graun olgeta​​—⁠tasol em i laik bai Jisas i mas lotuim em pastaim. Jisas i no pundaun long dispela traim. Tasol yu ting dispela em i wanpela traim tru tru? Yu ting Satan inap tok long givim kain bikpela samting olsem long Jisas? Yes, em inap long mekim olsem, long wanem, Jisas yet i kolim Satan olsem “hetman i save bosim dispela graun,” na aposel Pol i kolim em olsem “god bilong dispela graun.”​​—⁠Jon 14:30; 2 Korin 4:4; Efesus 6:​12.

Jisas i save olsem Satan i no tingim tru ol man. Jisas i kolim Satan olsem “man bilong kilim ol man i dai” na “papa tru bilong ol tok giaman na bilong olgeta samting i giaman.” (Jon 8:​44, The Amplified Bible) Dispela graun “i stap aninit long strong” bilong dispela spirit nogut, olsem na gutaim tru i no inap kamap long graun. (1 Jon 5:​19) Tasol dispela wok bos bilong Satan bai i no inap i stap oltaim. Long nau, Jisas em i wanpela strongpela spirit na klostu nau bai em i rausim Satan na pinisim strong bilong em long bosim ol man.​​—⁠Hibru 2:​14; KTH 20:​1-3.

Satan yet i save olsem klostu nau bai hap taim bilong em long bosim graun i pinis. Olsem na em i wok strong tru long paulim ol man olgeta, olsem em i bin mekim paslain long bikpela tait long taim bilong Noa. (Stat 6:​1-5; Jut 6) Kamapim Tok Hait 12:12 i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” Ol tok profet bilong Baibel na ol samting i kamap long graun i kamapim klia olsem yumi stap klostu long pinis bilong dispela “sotpela taim.” (2 Timoti 3:​1-5) Gutaim i kam klostu.

Gavman Bilong Kamapim Amamas

Namba tri as na Jisas i no laik insait long ol wok politik i olsem: Em i save olsem long wanpela taim bihain em God i makim pinis, God bai kamapim wanpela gavman long heven bilong bosim graun. Baibel i kolim dispela gavman olsem Kingdom bilong God, na dispela i as tok Jisas i bin skulim ol man long en. (Luk 4:​43; KTH 11:15) Jisas i bin skulim ol disaipel bilong em long beten long dispela Kingdom i mas i kam, long wanem, long rot bilong dispela Kingdom tasol, laik bilong God bai kamap long graun olsem i stap long heven. (Matyu 6:​9, 10) Ating yu laik save olsem, ‘Sapos dispela Kingdom bai bosim olgeta hap bilong graun, orait wanem samting bai kamap long ol gavman ol man yet i bin kamapim?’

Bekim bilong dispela askim i stap long Daniel 2:​44: “Taim ol dispela king i stap yet [em ol gavman i mekim wok bos long nau, taim pasin nogut bilong nau i laik pinis] God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king [gavman bilong ol man] na kingdom bilong en bai i stap oltaim.” I gat wanem as na Kingdom bilong God i mas “daunim” ol gavman bilong graun? Long wanem, ol i strong long bihainim pasin em Satan i bin kamapim long gaden Iden, em pasin bilong sakim God na bosim wokabaut bilong ol yet. Ol i no tingim long helpim tru ol man, na taim ol i strong long bosim ol man, ol i mekim ol yet i kamap birua bilong Man bilong wokim olgeta samting. (Song 2:​6-​12; KTH 16:​14, 16) Olsem na yumi mas askim skin bilong yumi yet olsem, ‘Yumi aninit long wok bos bilong God o yumi sakim?’

Bai Yu Daun Long Wok Bos Bilong Husat?

Bilong helpim ol man long kisim stretpela save long wanem wok bos ol i mas daun long en, Jisas i givim wok long ol disaipel bilong em long autim “gutnius bilong kingdom bilong God long olgeta hap bilong graun, bai olgeta lain manmeri i ken harim” paslain long pasin nogut bilong nau i pinis. (Matyu 24:14) Long nau, wanem lain i save autim tok bilong Kingdom bilong God long olgeta hap bilong graun? Em ol Witnes Bilong Jehova. Inap longpela taim pinis, namba wan pes bilong dispela nius i gat dispela tok, “I Tokaut Long Kingdom Bilong Jehova.” Long nau, inap olsem 6 milion Witnes long 230 kantri ol i helpim ol man long kisim stretpela save long dispela Kingdom.a

Ol Gutpela Samting Bilong Ol Man i Aninit Long Kingdom

Jisas i save bihainim laik bilong God long olgeta samting em i mekim. Olsem na em i no laik bihainim laik bilong em yet na traim long stretim sindaun bilong ol man long rot bilong wok politik, nogat; em i wok strong long skulim ol man long ol samting bilong Kingdom bilong God, em wanpela rot tasol bilong pinisim ol hevi bilong ol man. Em i bin stap gut long God, olsem na em i kisim gutpela pe bilong stap King bilong dispela Kingdom long heven. Em i daun tru long God, olsem na em i kisim gutpela pe tru!​​—⁠Daniel 7:​13, 14.

Planti milion man long nau em ol i bihainim pasin bilong Jisas na putim Kingdom bilong God i stap namba wan na ol i bihainim laik bilong God, ol tu bai kisim gutpela pe tru​​—⁠ol bai stap long graun olsem lain manmeri i aninit long Kingdom bilong God. (Matyu 6:​33) Taim Kingdom bilong God i bosim ol, skin bilong ol bai kamap gutpela olgeta na bai ol i gat rot long i stap laip oltaim oltaim. (KTH 21:​3, 4) Long 1 Jon 2:​17, Baibel i tok: “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.” Satan na ol lain bilong em bai pinis olgeta na dispela graun bai kamap wanpela ples paradais na bai i no gat pasin birua namel long narapela narapela lain, na pasin bilong ol bikpela kampani long paulim mani, na ol lotu giaman, olsem na ol man bai amamas tru long i stap laip oltaim long graun!​​—⁠Song 37:29; 72:⁠16.

Yes, Kingdom bilong God em i rot tru bilong kamapim gutaim na amamas long graun, na i stret tru long kolim ol tok i stori long en olsem gutnius. Sapos yu no bin mekim yet, yu laik harim ol tok bilong dispela gutnius taim ol Witnes Bilong Jehova i kam long haus bilong yu? I gutpela yu ken mekim olsem, a?

[Futnot]

[Ol Piksa long pes 5]

Ol samting i kamap long graun i kamapim klia olsem ol man yet i no inap long bosim wokabaut bilong ol taim ol i sakim God

[Piksa long pes 5]

Satan i bosim “dispela graun,” olsem na em inap givim “olgeta strongpela kantri bilong dispela graun” long Jisas

[Ol Piksa long pes 7]

Jisas i skulim ol man olsem gutaim tru bai kamap taim Kingdom bilong God i bosim graun