Wara Bilong Givim Laip i Go Long Andes

Ol maunten Andes i stap namel long Peru, kirap long antap na i go daun. Ol i brukim dispela kantri i go long hap bilong nambis i drai long hap wes, na long hap is i gat gutpela bikbus i hat tumas. I gat 27 milion manmeri long Peru na winim 9 milion bilong ol i stap long ol dispela maunten. Ol i sindaun long ol stretpela graun i stap antap na long ol kil bilong ol maunten Andes, o long ol baret bilong maunten i go daun tru, o long ol ples daun i gat gutpela gris.

ANDES i gat ol ston samting long en, olsem na i hatwok long go long ol dispela maunten. Dispela i mekim na planti milion manmeri bilong dispela hap ol i stap longwe long ol narapela man, na ol samting i kamap long ol narapela hap i no mekim sampela samting long sindaun bilong ol.

Ol i kamapim ol liklik ples arere long wara bambai ol i ken givim wara long ol gaden na bilong ol animal olsem lama, alpaka, vikuna, na sipsip inap dring. Tasol i gat narapela kain gutpela wara tu i ran long Andes​—⁠em wara bilong spirit i kam long Jehova, em as bilong “wara bilong givim laip.” (Jeremaia 2:13) God i save mekim wok long ol Witnes bilong helpim ol man i wokim haus antap long ol maunten Andes, bilong ol i ken kisim save long stretpela save bilong em na ol samting em i laik mekim.​—⁠Aisaia 12:3; Jon 17:⁠3.

Em laik bilong God long “kisim bek olgeta manmeri, bai ol i ken save long as bilong tok tru,” olsem na ol dispela wokman bilong God i wok strong tru long i go long ol dispela ples i hatwok long i go long en, na autim tok bilong Baibel i save givim laip. (1 Timoti 2:⁠4) Dispela tok i kam long Baibel i givim save long ol man na i gutpela samting tru. Em i bin helpim ol man i gat gutpela bel long lusim ol bilip bilong ol tumbuna, ol kastam, na ol tingting i kirapim ol long pret long ol man i dai pinis, ol spirit nogut, na strong bilong ol samting bilong graun. Na bikpela samting moa, dispela tok i mekim na ol man inap wet long kisim laip oltaim long Paradais long graun.

Taitim Bun

Ol man bilong autim tok bilong Kingdom i go long ol dispela longwe ples, ol i mas redi long mekim planti senis. Bilong ol man i ken pilim tok long bel, ol tisa bilong Baibel i mas save liklik long tok ples Kesua o Aimara, em tupela tok ples bilong dispela hap.

I hatwok long go long ol ples i stap long ol maunten Andes. I no gat planti rot bilong tren long dispela hap. Dispela hap i no gutpela bilong ka o bas samting i raun long en, em ples maunten na taim ples i kol i hatwok moa long raun long dispela hap. Orait olsem wanem ol Witnes inap painim ol man bilong autim tok bilong Kingdom long ol?

Ol strongpela man bilong autim gutnius ol i redi long mekim dispela wok, na ol i bihainim pasin bilong profet Aisaia: “Mi stap! Salim mi.” (Aisaia 6:​8, NW ) Ol i yusim 3-pela haus-ka bilong raun long hap not, sentral, na saut. Ol i gat ol Baibel na nius bilong Baibel i pulap long planti katon, na ol painia​—⁠em ol man i mekim wok bilong God fultaim​—⁠ol i planim pikinini kaikai, em tok i tru bilong Baibel, namel long ol man i gat gutpela pasin pren na gutpela bel.

Ol baut bilong ol rot bilong maunten i nogut moa. Bilong ol ka inap raun long ol dispela baut, ol ka i mas rives i go bek na draiv i go liklik na rives gen na mekim olsem i go. Taim wanpela bas i mekim olsem, misineri i sindaun long baksait bilong bas i lukluk i go ausait long windo na em i lukim olsem wanpela taia long baksait i stap long arere stret bilong baret i go daun inap 190 mita! Em i pasim ai i go inap long taim bas i draiv i go.

Sampela rot i nogut na ol i no braitpela. Taim wanpela haus-ka i ran i go daun long kain liklik rot olsem, wanpela trak i kam antap long dispela rot. Haus-ka i mas rives i go antap long wanpela hap i gat spes bilong narapela ka inap abrusim narapela.

Tasol ol painia i no les, na hatwok bilong ol i karim gutpela kaikai. Olsem wanem? Yu laik kisim sampela save moa long wok ol i mekim?

Givim Wara Long Raunwara Titicaca

Raunwara Titicaca i stap long ol maunten Andes inap 3,800 mita antap long mak bilong solwara. Dispela raunwara i stap antap tru, winim olgeta narapela bikpela raunwara i stap long graun. Inap 25 wara i ran i go long raunwara Titicaca, planti wara i kam long ol maunten em ais i karamapim, na sampela maunten i go antap inap 6,400 mita. Ples i kol tru long ol maunten i go antap, na ol man i no bilong dispela hap ol i save sik taim ol i raun long ples i antap tru.

Bipo liklik, wanpela lain painia i save long tok Kesua na Aimara ol i go long Amantani na Taquile, em ol ailan long raunwara Titicaca. Ol i kisim ol piksa slait, nem bilong en “Skelim Gut Pasin Bilong Ol Lotu,” ol dispela piksa i kamapim klia ol giaman bilong lain Kristendom. Ol man i amamas long lukim ol dispela piksa. Wanpela man i amamas long ol brata i kam, na em i givim wanpela bikpela rum long haus bilong em bilong ol brata i ken stap na lainim ol man long Baibel.

Inap 100 manmeri i kam long namba wan miting long Amantani; 140 manmeri i kam long miting i kamap long Taquile. Ol i mekim miting long tok Kesua. Tupela marit em bipo ol i bin stap long bikples, ol i tok: “Em taim bilong yupela ol Witnes Bilong Jehova i tingim mipela. Mipela i bin beten bilong yupela i ken kam.”

Ol i autim gutnius long dispela tupela ailan, na tu, long 40 ailan “i drip” long raunwara Titicaca. Bilong wanem mipela i tok ol ailan i drip? Ol i wokim ol dispela ailan long wanpela kain pitpit ol i kolim totoras, em dispela pitpit i save kamap long hap bilong raunwara i no daun tumas. Totoras i save kamap insait long wara na i kam antap long mak bilong en. Bilong wokim wanpela ailan, ol asples i save mekim krungut ol pitpit i pas yet long as bilong raunwara, na ol i pasim ol wantaim na wokim plua long en. Antap long plua ol i putim graun malumalum na sampela pitpit moa bilong strongim plua. Ol manmeri i save sindaun long ol haus ol i wokim long pitpit antap long ol dispela plua.

Ol Witnes Bilong Jehova i kisim wanpela bot bilong autim tok long ol man i stap long ol ailan bilong raunwara Titicaca. Bot inap karim 16 manmeri. Taim ol i kamap long ol ailan i drip, ol Witnes i wokabaut antap long ol dispela plua ol i wokim long pitpit, na go long ol haus. Ol i tok, ol inap pilim ol plua i meknais liklik taim ol i wokabaut. Dispela ples i no bilong man i save kisim sik bilong bel i tanim tanim taim em i raun long bot samting!

Ol man i save long tok Aimara ol i save sindaun long ol ples i stap long arere na ol poin bilong raunwara. I isi moa long go long bot long ol dispela ples. Ol i ting inap 400 tausen manmeri i sindaun long dispela hap em ol bot i save kisim ol man bilong autim tok bilong Kingdom long en. Ol dispela bot i gat planti wok yet bilong mekim.

Inapim Laik Bilong Ol Man i Laik Kisim Ol Samting Bilong Spirit

Flavio i sindaun long ples Santa Lucía, klostu long Juliaca, long ol maunten Andes. Long Misin Evanjelikal em i save go long en, ol i bin lainim em long tok bilong helpaia. Inap planti yia em i pret long dispela ples paia bilong kisim strafe inap oltaim. Planti taim em i bin tingting long olsem wanem God bilong pasin sori em inap givim bikpela pen long ol man inap oltaim. Taim Tito, em wanpela Witnes i save autim tok fultaim, i go long dispela ples, em i bungim Flavio.

Pastaim Flavio i kamapim dispela askim: “Lotu bilong yupela i skulim ol man olsem man bai kisim pen long bikpaia?” Tito i tok kain tingting olsem i samting nogut tru long God, na i save bagarapim gutnem bilong Jehova, em God bilong pasin sori. Tito i yusim Baibel bilong Flavio bilong soim olsem ol man i dai pinis ol i no save long wanpela samting, ol i wet long taim ol i kirap bek long graun taim Kingdom bilong God i bosim graun. (Saveman 9:5; Jon 5:​28, 29) Flavio i kirap nogut. Wantu em i redi long stadi long Baibel, na kwiktaim em i kisim baptais olsem wanpela Kristen.

Wanpela Ples i Amamas Long Harim Tok

Tingim bikpela amamas bilong ol brata i bringim tok bilong Baibel i go long ol man i no bin lukim wanpela Baibel bipo, o autim tok long ol ples em ol manmeri i no save long ol Witnes Bilong Jehova o gutnius ol i autim! Tripela sista painia i kisim dispela kain amamas​—⁠em Rosa, Alicia, na Cecilia​—⁠ol i autim tok long ples Izcuchaca na Conayaca, ol dispela ples i stap antap inap 3,600 mita long sentral Peru.

Taim ol i kamap long namba wan ples, ol i no gat ples bilong slip. Ol i toktok wantaim polis komanda na tokim em long as na ol i kam long dispela hap. Wanem samting i kamap? Em i larim ol i slip long polis-stesin. Long de bihain, ol painia i painim wanpela haus samting ol inap stap long en na mekim wok.

I no longtaim na taim bilong mekim Memorial bilong tingim indai bilong Krais i kamap. Ol painia i go long olgeta haus long ples Izcuchaca, na ol i tilim planti Baibel na kirapim planti Baibel-stadi. Paslain long Memorial, ol i bin salim ol pepa bilong singautim ol man long en, ol i stori long as bilong dispela bung na bilong wanem ol i yusim wain na bret long dispela bung. Ol i bin askim sampela brata long kam bilong helpim ol long stretim ol samting bilong Memorial, na wanpela i mekim tok. Ol i amamas tru long lukim 50 manmeri bilong dispela liklik ples i kam long dispela bikpela bung! Em namba wan taim ol i kisim save long as tru bilong Kaikai Bilong Bikpela. Na tu, ol i amamas tru long holim Baibel long han bilong ol yet!

Pinisim Ol Samting i Putim Hevi Long Man

Em i wanpela wok bilong amamas long bringim gutpela wara bilong tok i tru bilong Baibel long ol man i kalabus long lotu giaman. Pisac em i bikples bilong Gavman Inka. Klostu olgeta man i stap long dispela hap ol i bin lain long tok bilong bikpaia em Baibel i no as bilong en. Ol pris i tok, ol man inap go long heven long rot bilong ol beten ol pris i mekim, i no gat narapela rot.

Olsem na ol kain man olsem i laik kisim gutpela wara bilong tok i tru bilong Baibel. Santiago, em wanpela Witnes i save autim tok fultaim, na taim ol i autim tok long ol haus, rot i op na em inap tokim wanpela man olsem ol stretpela man bai kisim laip long paradais long graun. (Song 37:11) Santiago i soim long Baibel olsem ol man i dai pinis ol bai kirap bek, na ol man bai kisim save long stretpela rot bilong Jehova na tingting long kisim laip oltaim. (Aisaia 11:⁠9) I kam inap long dispela taim, man ya i bin givim bel tru long lotu Katolik, mekim wok bilong ol spirit nogut, na dring spak. Nau em i wet long kisim gutpela samting em Baibel i as bilong en​—⁠em laip long Paradais. Em i kukim olgeta samting bilong wok bilong ol spirit nogut na lusim pasin bilong dring. Em i bungim famili bilong em na stadi long Baibel. Bihain, olgeta bilong dispela famili i dediketim ol yet long God Jehova na kisim baptais.

Ol i Mekim Gutpela Pasin

Ol man i stap long ol maunten ol i save mekim gut long ol narapela man. Maski haus bilong ol i no gat planti gutpela bilas samting long en na ol i no gat planti samting bilong skin, ol i laik givim ol samting long man i kam long haus bilong ol. Taim man bilong haus i no save yet long ol gutpela lo bilong Baibel, em inap givim ol lip koka long man i kam long haus, bilong em i ken kaikai lip taim ol i toktok. Tasol taim em i kamap Witnes, em inap givim wanpela spun suga long man, em bikpela samting olsem ol lip koka long ol dispela provins i stap longwe.

Wanpela brata i askim misineri long go wantaim em long lukim wanpela gobek. Ol i hatwok na wokabaut i go antap long maunten, na taim ol i go antap pinis ol i paitim han bilong toksave long man bilong haus olsem ol i kam pinis. Man bilong haus i singautim ol i go insait long haus kunai, na ol i mas daunim het bilong go insait long liklik dua. Ol i wokabaut isi klostu long namel bilong plua, em long dispela hap i gat hul em mama i bin digim na putim blanket insait long en, na putim bebi long en. Bebi i no inap lusim dispela hap, na em i amamas long mekim toktok bilong ol bebi taim ol man i bikpela pinis i toktok i go i kam. Taim ol i toktok pinis long ol gutpela samting Kingdom bai kamapim, meri ya i bringim bikpela botol i gat dring bilong dispela ples long en. Bihain liklik ol brata i go daun long maunten bilong lukim sampela narapela man.

Planti Kaikai i Kamap

Nau long dispela hap i gat inap olsem 100 grup, na winim wan tausen manmeri i stadi long Baibel wantaim ol Witnes Bilong Jehova. Ol i salim ol brata i bin go long Ministerial Trening Skul long Lima, long go long dispela hap bilong helpim ol grup long kamap kongrigesen. Ol man i gat gutpela bel em lotu giaman na bilip bilong tumbuna i bin kalabusim ol, ol i kamap fri long rot bilong gutnius bilong Kingdom! (Jon 8:32) Ol inapim laik bilong ol long kisim save long tok i tru.

[Piksa long pes 10]

Autim tok long ol ailan “i drip” long raunwara Titicaca