Ol Yangpela—Jehova Bai i No Lusim Tingting Long Wok Bilong Yupela!
“God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet.”—HIBRU 6:10.
1. Olsem wanem Buk Hibru na Buk Malakai i kamapim klia Jehova i save tingim tru wok yu mekim bilong lotuim em?
OLSEM WANEM? Wanpela taim yu bin mekim sampela samting bilong helpim pren bilong yu na bihain em i no tok tenkyu long yu? Bel inap bagarap tru taim narapela i no tingim gutpela pasin yu mekim, o samting i nogut moa, em i lusim tingting olgeta long dispela samting. Tasol samting i kamap taim yu givim bel long mekim wok bilong Jehova i narapela kain tru! Baibel i tok: “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet.” (Hibru 6:10) Tingim samting tok hia i makim. Jehova bai ting em i mekim pasin nogut olsem sin sapos em i lusim tingting long wok yu mekim pinis na long samting yu wok yet long mekim bilong lotuim em. Em i God bilong tingim tru ol samting man i mekim!—Malakai 3:10.
2. Wanem samting i mekim na pasin bilong lotuim Jehova i olsem bikpela samting tru?
2 Gutpela rot tru i op bilong yu long lotuim na mekim wok bilong dispela God bilong tok tenkyu. I gat 6 milion samting ol wanbilip bilong yu i stap, na i gat 6 bilion samting ol manmeri long graun olgeta, olsem na i no planti man i holim gutpela wok olsem yu holim. Na tu, yu wok long putim yau na bihainim tok bilong gutnius, dispela em i kamapim klia olsem Jehova i save tingim yu. Long wanem, Jisas i bin tok: “No gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jon 6:44) Yes, Jehova i save helpim ol man wan wan long kisim ol gutpela samting ofa bilong Krais i kamapim.
Amamas Long Gutpela Wok Yu Holim
3. Ol pikinini man bilong Kora i bin tok wanem bilong soim olsem ol i pilim tru gutpela wok bilong Jehova ol i holim?
3 Olsem stori paslain long dispela i kamapim, i stap bilong yu i narapela kain, long wanem, rot i op bilong yu long mekim Jehova i belgut. (Sindaun 27:11) No ken ting dispela i olsem samting nating. Long wanpela singsing bilong ol i stap long Buk Song, ol pikinini man bilong Kora i kamapim olsem ol i pilim tru gutpela wok bilong Jehova ol i holim. Singsing i olsem: “Sapos mi stap wanpela de tasol long haus bilong yu, em i winim tru 1,000 de long narapela ples. Mi laikim tumas long sanap long dua bilong haus bilong God bilong mi. Tasol mi no laik i stap long haus bilong ol man nogut.”—Song 84:10.
4. (a) Wanem samting inap mekim na sampela bai ting pasin bilong lotuim Jehova i pasim ol tumas? (b) Olsem wanem Jehova i kamapim klia em i amamas long tingim na mekim gut long ol wokboi bilong em?
4 Yu gat wankain tingting long gutpela wok yu mekim bilong lotuim Papa bilong yu long heven? Sampela taim bai i luk olsem pasin bilong lotuim Jehova i pasim yu long mekim sampela samting. Na i tru, man i mas daunim sampela laik bilong em na bai em inap bihainim ol stiatok bilong Baibel. Tasol samting Jehova i laik bai yu mekim em bilong helpim yu tasol. (Song 1:1-3) Na tu, Jehova i save lukim hatwok bilong yu na kamapim olsem em i amamas long pasin bilong yu long stap gut long em. Pol i tok Jehova “i save mekim gut tru long ol man i wok long painim em.” (Hibru 11:6) Jehova i laik painim rot bilong mekim olsem long man. Wanpela gutpela profet bilong Israel long bipo i bin tok: “Oltaim Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”—2 Stori 16:9.
5. (a) Wanem wanpela gutpela rot tru bilong soim olsem yu givim bel olgeta long Jehova? (b) I gat wanem as na yu inap ting em i hatwok long toktok wantaim ol narapela long bilip bilong yu?
5 Wanpela gutpela rot tru bilong soim olsem yu givim bel olgeta long Jehova em long skulim ol narapela long em. Olsem wanem? Wanpela taim yu bin i gat rot long toktok wantaim sampela wanskul long bilip bilong yu? Pastaim bai i luk olsem samting i hatwok long mekim, na tingting tasol long mekim dispela samting inap mekim yu pret. Ating bai yu gat askim olsem: ‘Olsem wanem sapos ol i lap long mi?’ ‘Olsem wanem sapos ol i ting lotu bilong mi i narapela kain?’ Jisas i bin toksave olsem i no olgeta man bai amamas long harim tok bilong Kingdom. (Jon 15:20) Tasol dispela i no makim olsem olgeta taim bai yu karim hevi long ol man i sakim tok bilong yu o tok bilas long yu, nogat. Planti yangpela Witnes i bin bungim ol man i amamas long harim tok bilong ol, na tu, pasin bilong ol long strong long holimpas bilip i bin kirapim ol wankrismas long rispek moa long ol.
“Jehova Bai Helpim Yu”
6, 7. (a) Wanem samting i helpim wanpela meri i gat 17 krismas long autim tok long ol wanklas? (b) Ekspiriens bilong Jennifer i lainim yu long wanem samting?
6 Tasol olsem wanem bai yu kisim strong long tokaut long bilip bilong yu? I gutpela long pasim tok long bel olsem yu bai tokaut stret taim ol man i gat askim long samting bilong lotu bilong yu. Tingim ekspiriens bilong Jennifer, em i gat 17 krismas. Em i tok: “Mi lans i stap long skul. Ol meri i sindaun long tebol bilong mi i wok long stori long lotu, na wanpela bilong ol dispela meri i givim askim long mi olsem mi yet i bilong wanem lotu.” Yu ting Jennifer i pret long bekim dispela askim? Em i tok: “Yes, mi pret, long wanem, mi no save ol bai i tok wanem long bekim bilong mi.” Olsem na Jennifer i mekim wanem? Em i tok moa: “Mi tokim ol meri olsem mi wanpela Witnes Bilong Jehova. Pastaim ol i kirap nogut. I luk olsem ol i bin i gat tingting olsem ol Witnes Bilong Jehova i narapela kain. Dispela i kirapim ol long givim ol askim long mi, na long dispela rot mi inap stretim sampela tingting kranki bilong ol. Bihain long dispela de tu, sampela taim wan wan bilong ol dispela meri i kam na givim askim long mi.”
7 Yu ting Jennifer i bel hevi long em i bin kamapim bilip bilong em taim rot i op? Nogat tru! Em i tok: “Hap taim bilong kisim lans i pinis na mi pilim amamas long samting mi bin mekim. Nau ol dispela meri i save gut moa long ol Witnes Bilong Jehova i husat tru.” Tok bilong Jennifer i no hatwok long bihainim, em i tok: “Sapos yu pilim olsem i hatwok long autim tok long ol wanklas o long ol tisa, mekim sotpela beten. Jehova bai helpim yu. Bai yu amamas long yu bin mekim wok long rot i op bilong yu long autim tok.”—1 Pita 3:15.
8. (a) Olsem wanem beten i bin helpim Nehemia taim samting em i no tingim i kamap wantu tasol? (b) Wanem sampela samting i save kamap long skul na ating bai yu gat wok long mekim sotpela beten long tingting?
8 Tingim tok bilong Jennifer olsem i gutpela long “mekim sotpela beten” long Jehova taim samting i kamap na rot i op bilong yu long autim tok long bilip bilong yu. Nehemia i bin mekim olsem taim samting em i no bin tingim i painim em. Nehemia em i man bilong bringim wain i go long King Artaserksis bilong Persia. Nehemia i bel hevi, long wanem, em i kisim toksave long bikpela hevi ol Juda i karim na em i lain olsem banis na get bilong Jerusalem i bagarap i stap. King i luksave olsem Nehemia i tingting planti, olsem na em i askim Nehemia long kamapim hevi bilong em. Paslain long Nehemia i bekim tok, em i beten long God i ken stiaim em. Bihain em i strongim bel na askim King long orait long em i go bek long Jerusalem na helpim ol long wokim gen dispela taun i bagarap i stap. Artaserksis i tok orait long askim bilong Nehemia. (Nehemia 2:1-8) Dispela i givim wanem save long yu? Sapos yu pilim pret taim rot i op long yu long autim tok long bilip bilong yu, no ken lusim tingting long beten long tingting. Pita i tok: “God i save wari long yupela. Olsem na olgeta hevi yupela i karim, yupela i mas putim long han bilong en.”—1 Pita 5:7; Song 55:22.
“Redi Oltaim Long Bekim Tok”
9. Olsem wanem Leah, yangpela meri i gat 13 krismas, i bin tilim 23 buk Askim Bilong Ol Yangpela?
9 Tingim narapela ekspiriens. Leah i gat 13 krismas, na em i wok long ritim buk Sampela Askim Bilong Ol Yangpela—Ol Gutpela Bekima long lans brek bilong em long skul. Em i tok: “Sampela ol i wok long lukluk long mi, na i no longtaim na bikpela lain liklik i sanap baksait long mi. Ol i kirap askim mi long buk i stori long wanem ol samting.” Insait long dispela de, i bin i gat 4-pela meri i toksave long Leah olsem ol i laikim wanpela kopi bilong dispela buk Askim Bilong Ol Yangpela. I no longtaim na ol meri hia i kirap stori long ol narapela long dispela buk, na ol tu i laik kisim kopi bilong buk. Insait long 3-pela wik samting, Leah i tilim 23 buk Askim Bilong Ol Yangpela long ol wanklas na long ol pren bilong ol. Yu ting em i isi tasol long Leah i kirap na toktok long namba wan taim ol yangpela i givim askim long em long buk em i ritim? Nogat tru! Em i tok: “Pastaim mi pret, tasol mi beten, na mi save olsem Jehova i stap wantaim mi.”
10, 11. Olsem wanem wanpela yangpela meri Israel i bin helpim wanpela ofisa bilong ami bilong Siria long kisim save long Jehova? Dispela ofisa i mekim wanem ol senis?
10 Ekspiriens bilong Leah inap kirapim yu long tingim wankain samting olsem i bin painim yangpela meri Israel i kalabus long Siria. Naman, em wanpela ofisa bilong ami bilong Siria, na i gat sik lepra. Ating meri bilong em i bin mekim sampela tok pastaim i kirapim dispela liklik meri long kamapim bilip bilong em. Liklik meri i mekim tok olsem: “I gutpela sapos man bilong yu i go long dispela profet i stap long Samaria. Dispela profet inap long mekim sik bilong en i orait gen.”—2 King 5:1-3.
11 Pasin bilong dispela liklik meri long no ken pret i bin helpim Naman long save olsem ‘God bilong Israel tasol i God bilong olgeta hap.’ Na Naman i strong olsem em bai “mekim ol ofa bilong paia i kukim olgeta na ol arapela ofa long Bikpela [“Jehova,” NW ] wanpela tasol.” (2 King 5:15, 17) Jehova i blesim tru pasin bilong dispela liklik meri long no ken pret. Na em bai mekim wankain samting long ol yangpela long nau tu. Truim bilong dispela tok i painim Leah. Bihain, sampela wanskul i kam tokim em olsem buk Askim Bilong Ol Yangpela i wok long helpim ol long ol pasin ol i save bihainim. Leah i tok: “Mi amamas, long wanem, mi save olsem mi helpim ol narapela long kisim save moa long Jehova na long senisim pasin bilong ol.”
12. Olsem wanem yu ken kisim strong na bai yu inap bekim tok long man i gat askim long bilip bilong yu?
12 Samting i painim Jennifer na Leah inap painim yu tu. Bihainim tok bilong Pita, em i givim tok long ol Kristen olsem: “Sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol. Tasol yupela i mas bekim tok bilong ol long tok isi na long gutpela pasin.” (1 Pita 3:15, 16) Bai yu mekim olsem wanem? Bihainim pasin bilong ol Kristen long taim bilong ol aposel, ol i beten long Jehova long helpim ol long autim tok na “no ken pret.” (Aposel 4:29) Bihain kamapim pasin bilong no ken pret taim yu toktok wantaim ol narapela long bilip bilong yu. Ating bai yu kirap nogut long ol samting i kamap. Na tu, bai yu mekim Jehova i belgut.
Ol Video na Projek Long Skul
13. Wanem sampela rot ol yangpela i bin mekim wok long en bilong ol i ken autim tok long ol narapela? (Lukim ol blok i stap long pes 20 na 21.)
13 Planti yangpela i bin yusim ol video bilong helpim ol long stori long bilip bilong ol long ol wanskul na ol tisa. Sampela taim ol projek long skul i bin opim rot bilong givim biknem long Jehova. Olsem: Tupela mangi i gat 15 krismas, ol i Witnes Bilong Jehova, ol i kisim asainmen long wanpela klas we ol i mas raitim ripot i stori long wanpela lotu. Tupela i pasim tok long wok wantaim na wokim ripot i stori long ol Witnes Bilong Jehova, na ol i yusim buk Jehovah’s Witnesses—Proclaimers of God’s Kingdom bilong kisim ol tok.b Na tu, ol i gat wok long sanap na mekim tok long klas inap long 5-pela minit. Bihain, tisa wantaim ol sumatin i gat planti askim tru na tupela mangi hia i mas stori i go inap 20 minit moa. Inap sampela wik bihain, ol wanklas i wok yet long kamapim sampela askim long ol samting bilong ol Witnes Bilong Jehova!
14, 15. (a) Bilong wanem pasin bilong pret long man i olsem wanpela umben? (b) Bilong wanem yu mas bilip tru olsem ol narapela bai amamas long yu autim bilip bilong yu long ol?
14 Olsem ol ekspiriens i kamapim, yu inap kisim ol gutpela blesing taim yu tokim ol narapela long bilip bilong yu olsem wanpela Witnes Bilong Jehova. No ken larim pasin bilong pret long man i pasim rot bilong yu long insait long wanpela gutpela wok na amamas bilong helpim ol narapela long kisim save long Jehova. Baibel i tok: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet. Tasol sapos man i bilip strong long Bikpela, bai em i stap gut.”—Sindaun 29:25.
15 No ken lusim tingting olsem yu wanpela yangpela Kristen i holim samting ol wankrismas bilong yu i mas i gat—em gutpela sindaun tru long nau na gutpela sindaun bilong kisim laip oltaim long bihain. (1 Timoti 4:8) Tingim samting ol i skelim long Amerika—em hap we yu inap ting ol man i les tasol long samting bilong lotu o ol i givim bel long ol samting bilong graun tasol. Wanpela ripot i kamapim olsem 50 pesen bilong ol yangpela i tingim lotu i olsem bikpela samting, na planti i tok bilip bilong lotu em i “nambawan bikpela samting” i bosim wokabaut bilong ol. Ating i wankain long planti ol narapela hap bilong graun. Olsem na ating ol wankrismas samting bilong yu long skul bai amamas long harim tok bilong yu long Baibel.
Go Klostu Long Jehova Taim Yu Yangpela
16. Wanem sampela samting moa yu mas mekim bilong amamasim Jehova antap long pasin bilong skulim ol narapela long em?
16 Bilong mekim Jehova i stap belgut i gat sampela samting moa yu mas mekim antap long pasin bilong skulim ol narapela long em. Yu mas wok tu long stretim wokabaut bilong yu na bai i stret wantaim ol lo bilong em. Aposel Jon i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” (1 Jon 5:3) Truim bilong dispela tok bai painim yu sapos yu go klostu long Jehova. Bai yu mekim olsem wanem?
17. Olsem wanem bai yu go klostu long Jehova?
17 Lusim hap taim bilong ritim Baibel na ol buk na nius bilong Baibel. Bikpela save moa yu kisim long Jehova, dispela bai mekim isi moa long yu long harim tok bilong em na long skulim ol narapela long em. Jisas i tok: “Gutpela man i gat planti gutpela tingting i stap long bel bilong en. Olsem na em i save mekim gutpela pasin. . . . Kain tingting i pulap long bel, em maus i save autim.” (Luk 6:45) Olsem na pulimapim bel bilong yu long ol gutpela samting. Bilong mekim olsem i gutpela long putim sampela mak bilong winim. Ating yu inap kamap gutpela moa long redim ol tok bai kamap long miting long wik i kam. Bihain putim mak long insait long ol miting long rot bilong mekim sotpela bekim i kamapim samting yu pilim tru long bel. Na tu, em i bikpela samting long yu mas bihainim ol samting yu lainim.—Filipai 4:9.
18. Maski sapos sampela i birua long yu, yu ken bilip tru long wanem samting?
18 Ol gutpela blesing i kamap long rot bilong mekim wok bilong Jehova i bilong stap longpela taim tru—yes, inap oltaim oltaim. Tru, ating sampela taim bai i gat sampela i birua long yu o tok bilas long yu, long wanem, yu wanpela Witnes Bilong Jehova. Tasol tingim Moses. Baibel i tok “em i ting long dispela gutpela pe God i laik givim em, na em i sanap strong.” (Hibru 11:24-26) Yu tu inap bilip tru olsem Jehova bai givim gutpela pe long yu long wok yu mekim bilong kisim save long em na toktok wantaim ol narapela long em. Tru tumas, bai em i no “lusim tingting long ol gutpela wok [yu] bin mekim.”—Hibru 6:10.
[Ol Futnot]
a Ol Witnes Bilong Jehova i wokim.
b Ol Witnes Bilong Jehova i wokim.
Yu Inap Tingim?
• I gat wanem as na yu ken save olsem Jehova i tingim tru wok yu mekim bilong lotuim em?
• Wanem ol rot long autim tok long skul em sampela yangpela i bihainim na i kamapim gutpela samting?
• Olsem wanem yu inap kisim strong na bai yu inap autim tok long ol wanklas?
• Olsem wanem bai yu go klostu long Jehova?
[Blok/Ol Piksa long pes 20]
Maski Ol i Yangpela Tru Ol i Litimapim Nem Bilong Jehova!
Ol yangpela i no winim yet 13 krismas ol i bin mekim wok autim tok long skul. Tingim ol ekspiriens hia.
Amber i gat 10-pela krismas na i stap long gret 5, na klas bilong em i wok long ritim wanpela buk i stori long ol Natsi i mekim nogut long ol Juda long taim bilong Namba Tu Pait. Amber i karim video Purple Triangles i kam long tisa bilong em. Tisa i kirap nogut olsem ol Natsi i bin mekim nogut long ol Witnes Bilong Jehova tu. Tisa i soim dispela video long klas olgeta.
Taim em i gat 8-pela krismas Alexa i raitim pas i go long klas bilong em na stori long as na bai em i no insait long pati ol i wokim bilong Krismas. Tisa bilong em i laikim tru dispela pas, em i askim Alexa long ritim long klas bilong em yet na long tupela narapela klas! Alexa i pinisim tok olsem: “Papamama i lainim mi long rispek long bilip bilong ol narapela i no wankain long bilip bilong mi, na mi laik tok tenkyu long yupela i rispek long tingting bilong mi long no ken insait long Krismas.”
Sotpela taim bihain long em i kirap mekim gret 1, Eric i kisim Baibel Stori Buk Bilong Mi i go long skul na askim tisa long larim em long soim long ol wanklas. Tisa i tok: “Mi ting i gutpela moa sapos yu ritim wanpela stori long klas.” Eric i mekim olsem. Bihain em i tokim ol yangpela husat i laikim kopi bilong wanpela buk long putim han i go antap. Tisa wantaim 17 narapela i putim han! Nau Eric i pilim olsem em i gat teritori bilong em yet long skul.
Whitney i gat 9-pela krismas na em i amamas long em i gat dispela buklet Jehovah’s Witnesses and Education.c Em i tok: “Mama bilong mi i save givim dispela buklet long ol tisa bilong mi long olgeta yia. Tasol long dispela yia mi yet i bin mekim. Dispela buklet i mekim na tisa i praisim mi na tok pasin bilong mi i gutpela.”
[Futnot]
c Olgeta buk na nius mipela kolim em ol Witnes Bilong Jehova i wokim.
[Blok/Ol Piksa long pes 21]
Kain Kain Taim Sampela i Bin Mekim Wok Long En Bilong Kamapim Bilip
Taim ol i gat wanpela ripot o projek long mekim long skul, sampela i bin makim wanpela het-tok i opim rot bilong ol long autim tok
Planti liklik i bin givim wanpela video o buk long tisa bilong ol i stret long samting klas i wok long stori long en
Sampela yangpela i wok long ritim Baibel o sampela nius bilong Baibel long taim i gat malolo long skul, na sampela yangpela i kam na givim sampela askim long ol
[Piksa long pes 18]
Ol lain i gat save inap skulim ol yangpela long mekim wok bilong Jehova