Pasin Bilong Sanap Strong na Karim Hevi i Litimapim Nem Bilong Jehova

“Sapos yupela i mekim gutpela pasin na ol i paitim yupela, na yupela i karim dispela pen, orait God i laikim dispela pasin.”​​—⁠1 PITA 2:​20.

 1. Ol Kristen tru i laik truim dediket bilong ol, olsem na ol i mas skelim wanem askim?

OL Kristen i dediket long Jehova na ol i laik bihainim laik bilong em. Bilong truim dediket bilong ol, ol i wok strong tru long bihainim pasin bilong Man i stap olsem gutpela piksa, Jisas Krais, na ol i autim tok i tru. (Matyu 16:24; Jon 18:37; 1 Pita 2:​21) Tasol Jisas na sampela narapela man i stap gut long God ol i givim laip bilong ol na ol i dai olsem man i holimpas bilip. Olsem wanem? Dispela i makim olsem olgeta Kristen i mas i dai bilong holimpas bilip bilong ol?

 2. Ol Kristen i ting olsem wanem long pen na hevi?

² Baibel i kirapim yumi ol Kristen long i stap gut long God i go inap long taim yumi dai, tasol dispela i no makim olsem yumi mas i dai bilong holimpas bilip bilong yumi. (2 Timoti 4:7; KTH 2:​10) Tru, yumi redi long karim pen na hevi bilong holimpas bilip bilong yumi​​—⁠na redi long i dai sapos yumi mas mekim​​—⁠tasol yumi no amamas long kisim ol dispela hevi. Yumi no amamas long kisim pen na hevi na yumi no kisim amamas long pasin bilong ol man long daunim yumi. Yumi save ol hevi bai painim yumi na ol man bai mekim nogut long yumi, olsem na yumi mas skelim gut samting yumi bai mekim taim ol hevi i painim yumi.

Stap Gut Long God Long Taim Bilong Traim

 3. Yu inap kamapim wanem stori bilong Baibel long ol man i bin mekim nogut long wanpela wokman bilong God? (Lukim blok “Samting Ol i Bin Mekim Taim Ol Man i Mekim Nogut Long Ol,” i stap long neks pes.)

³ Long Baibel, yumi inap painim planti stori i kamapim ol pasin ol wokman bilong God bilong bipo i bin mekim taim ol bikpela hevi i painim ol na klostu ol i dai. Ol narapela narapela samting ol i bin mekim inap stiaim ol Kristen long nau sapos ol wankain hevi i painim ol. Lukim ol stori long blok “Samting Ol i Bin Mekim Taim Ol Man i Mekim Nogut Long Ol,” na tingim ol samting ol dispela stori inap skulim yu long en.

 4. Yumi ken tok wanem long ol samting Jisas na ol narapela gutpela wokman i bin mekim taim ol hevi i painim ol?

⁴ Tru, Jisas na ol narapela gutpela wokman bilong God i mekim narapela narapela pasin taim ol man i mekim nogut long ol, tasol yumi save olsem ol i no gat laik long mekim samting bilong bagarapim laip bilong ol. Taim bagarap i laik painim ol, ol i strongim bel, tasol tu ol i was gut na bihainim gutpela tingting. (Matyu 10:​16, 23) Ol i laik helpim wok bilong autim tok i go bikpela na mekim ol samting bilong i stap gut long Jehova. Ol samting ol i mekim taim kain kain hevi i painim ol i stap olsem gutpela piksa long ol Kristen long nau em ol hevi i painim ol na ol man i mekim nogut long ol.

 5. Wanem bikpela hevi i kamap long Malawi bihain long 1960? Na ol Witnes i mekim wanem?

⁵ Long nau, planti taim lain bilong Jehova i kisim ol bikpela hevi tru na ol i sot long ol samting, long wanem, i gat ol pait, ol i tambuim wok bilong ol, o ol birua i mekim nogut long ol. Olsem: Bihain long 1960 ol man i mekim nogut tru long ol Witnes Bilong Jehova long Malawi. Ol i bagarapim klostu olgeta samting bilong ol Witnes, olsem ol Haus Kingdom, ol haus, gaden, na bisnis bilong ol. Ol i paitim ol na mekim ol narapela samting nogut tru long ol. Ol brata i mekim wanem? Planti tausen i ranawe lusim ples bilong ol. Planti i hait long bus, na planti i ranawe i go long Mosambik, em kantri i stap klostu. Planti Witnes i stap gut long God ol i dai, na planti ol i ranawe na lusim dispela ples ol inap kisim bagarap long en, na ating dispela i gutpela tingting sapos yumi tingim ol samting nogut i bin kamap. Taim ol i mekim olsem, ol brata i bihainim pasin em Jisas na Pol i bin mekim.

 6. Maski ol birua i mekim nogut tru long ol brata bilong Malawi, ol i no lusim wanem samting?

⁶ Maski ol brata bilong Malawi i mas ranawe i go sindaun long narapela ples o ranawe i go long ples hait, ol i bin wok yet long kisim save long laik bilong God na ol i bihainim na ol i mekim yet wok Kristen bilong ol long pasin hait. Orait, dispela i mekim wanem? Paslain liklik long tambu i kamap long 1967 i gat inap 18,519 pablisa bilong Kingdom. Maski wok i tambu yet na planti i ranawe i go long Mosambik, long 1972 i gat 23,398 pablisa. Long averes ol i autim tok inap 16 aua long olgeta wan wan mun. Yumi ken save, pasin bilong ol i litimapim tru nem bilong Jehova, na Jehova i blesim ol dispela gutpela brata long dispela taim bilong planti hevi.a

7, 8. Bilong wanem sampela i no ranawe lusim ples bilong ol, maski ol birua i givim hevi long ol?

⁷ Tasol long sampela kantri we ol birua i givim hevi long ol Witnes, sampela brata i no lusim ples bilong ol, maski ol inap mekim olsem. Tru, sapos ol i go sindaun long narapela hap ol inap abrusim sampela hevi, tasol ating sampela narapela hevi inap painim ol. Olsem: Bai ol inap bung wantaim ol brata sista Kristen na i no stap wanpis long ol samting bilong spirit? Ol inap mekim yet ol wok bilong spirit taim ol i hatwok long stretim nupela sindaun bilong ol, em planti taim long wanpela kantri i gat planti mani samting na i isi moa long kisim planti samting bilong skin?​​—⁠1 Timoti 6:⁠9.

⁸ Sampela i no lusim ples bilong ol, long wanem, ol i tingim i stap bilong ol brata bilong ol long ol samting bilong spirit. Ol i redi long i stap na karim ol hevi bambai ol i ken autim tok long ples bilong ol na ol i ken strongim ol wanlotu. (Filipai 1:​14) Taim ol i mekim olsem, sampela i bin helpim wok bilong winim sampela kot long kantri bilong ol.b

 9. Ol man i mas tingim wanem samting bilong makim olsem ol bai stap o ol bai lusim ples bilong ol, long wanem, ol birua i mekim nogut long ol?

⁹ Bilong i stap o bilong lusim ples​​—⁠em samting olgeta wan wan Kristen yet i mas makim. Bilong makim wanem samting long mekim, pastaim yumi mas beten askim Jehova long soim rot long yumi. Tasol maski yumi bai mekim wanem samting, yumi mas tingim tok bilong aposel Pol: “Yumi olgeta wan wan bai yumi mas tokim God long as bilong olgeta pasin yumi bin mekim.” (Rom 14:12) Olsem yumi tok pinis, Jehova i laik yumi olgeta wokman bilong em i mas i stap gut long em maski wanem samting i kamap. Sampela wokman bilong em i karim hevi na ol man i mekim nogut long ol long nau, na ating sampela narapela bai kisim kain hevi olsem bihain. Kain kain traim bai painim yumi olgeta, na yumi no ken ting ol traim i no inap painim yumi. (Jon 15:​19, 20) Olsem wokman bilong Jehova i dediket pinis, yumi insait long dispela bikpela tok i bin kamap bilong mekim holi nem bilong Jehova na kamapim klia olsem i stret Jehova i stap nambawan bos.​​—⁠Esekiel 38:23; Matyu 6:​9, 10.

‘No Ken Bekim Pasin Nogut Long Narapela’

10. Jisas na ol aposel i makim wanem pasin i stret long bihainim taim ol hevi i painim ol na ol man i birua long ol?

¹⁰ Yumi ken lain long narapela bikpela stiatok long pasin Jisas na ol aposel i bin mekim taim ol hevi i painim ol, olsem: Yumi no ken bekim pasin nogut long ol man i mekim nogut long yumi. I no gat wanpela tok long Baibel i kamapim olsem Jisas na ol disaipel bilong em i bin pait long ol man i mekim nogut long ol, o ol i bin kamapim wanpela lain bilong pait long ol birua bilong ol. Aposel Pol i tokim ol Kristen: “Yupela i no ken bekim pasin nogut long ol. Nogat. . . . Ol pren tru bilong mi, yupela yet i no ken bekim rong ol i mekim long yupela. Yupela i mas larim God i belhat long ol. Yupela i save, buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol na mekim save long ol.’ ” Na tu, “Yu no ken larim pasin nogut i winim yu. Nogat. Yu mas mekim gutpela pasin na bai yu daunim pasin nogut.”​​—⁠Rom 12:​17-​21; Song 37:​1-4; Sindaun 20:⁠22.

11. Wanpela saveman i tok wanem long tingting bilong ol Kristen bilong bipo long ol samting bilong gavman?

¹¹ Ol Kristen bilong bipo i pilim tru dispela tok. Long buk bilong em (The Early Church and the World), saveman Cecil J. Cadoux i stori long tingting bilong ol Kristen long yia 30 i go 70 C.E. long ol samting bilong gavman. Em i tok: “Mipela i no gat wanpela ripot i kamapim olsem ol Kristen long dispela taim ol i pait bilong sakim ol man i mekim nogut long ol. Wanpela samting tasol ol i mekim em ol i strong long kamapim rong bilong ol bikman bilong gavman o mekim ol bikman i kros, long wanem, ol i ranawe. Tasol bilong sakim ol birua i mekim nogut long ol planti taim ol Kristen i tokaut stret long gavman olsem ol bai i no bihainim tok bilong gavman long mekim sampela samting i no stret wantaim lo bilong Krais.”

12. Bilong wanem em i gutpela moa long yumi karim hevi na yumi no bekim rong?

¹² Olsem wanem? Dispela pasin bilong no ken pait em i gutpela long bihainim? Sapos wanpela man i mekim dispela pasin ating em i isi long ol birua long pinisim em, a? Ating i gutpela sapos man i pait bilong sakim ol birua, a? Long tingting bilong ol man ating i gutpela long mekim olsem. Tasol olsem wokman bilong Jehova, yumi bilip tru olsem pasin bilong bihainim olgeta tok bilong Jehova long stiaim yumi em i nambawan gutpela pasin long mekim. Yumi tingim tok bilong Pita: “Sapos yupela i mekim gutpela pasin na ol i paitim yupela, na yupela i karim dispela pen, orait God i laikim dispela pasin.” (1 Pita 2:​20) Yumi bilip tru olsem Jehova i save long ol samting i kamap na em bai i no larim ol hevi i stap inap olgeta taim. Bilong wanem yumi ken bilip olsem? Long lain bilong em i stap kalabus long Babilon, Jehova i bin tok: “Man i holim yupela em i holim kiau bilong ai bilong mi.” (Sekaraia 2:​8, NW ) I no gat wanpela man bai larim narapela i holim kiau bilong ai bilong em inap longtaim, a? Long taim stret Jehova bai helpim lain bilong em. Yumi ken bilip tru long em bai mekim olsem.​​—⁠2 Tesalonaika 1:​5-8.

13. Bilong wanem Jisas i larim ol birua i holim em?

¹³ Long dispela samting yumi ken tingim pasin bilong Jisas. Taim em i larim ol birua i holim em long gaden Getsemani, i no olsem em i no inap sakim ol. Em i bin tokim ol disaipel bilong em: “Yu no save, mi inap askim Papa bilong mi, na em bai i salim planti ensel moa, i winim 12-pela lain ami, na ol bai i kam helpim mi? Tasol sapos mi mekim olsem, orait tok i stap long buk bilong God em bai i no inap kamap tru. Buk bilong God i tok, ol dispela samting i mas kamap long mi.” (Matyu 26:​53, 54) Laik bilong Jehova i mas kamap, dispela em i nambawan bikpela samting long Jisas, maski dispela i makim olsem em bai kisim hevi. Em i bilip tru long tok profet bilong song em Devit i bin raitim, olsem: “Bai yu no larim mi i go i stap long ples bilong ol man i dai pinis. Na bai yu no larim man bilong yu yet i sting long matmat, long wanem, yu laikim mi tumas.” (Song 16:10) Planti yia bihain aposel Pol i tok long Jisas: “Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai . . . Ol manmeri i ting, sapos man i dai long diwai . . . em i man nogut tru, na em i kisim bikpela sem long dispela. Tasol Jisas i no wari long sem em bai i kisim, na em i dai. Na nau em i sindaun long han sut bilong sia king bilong God.”​​—⁠Hibru 12:⁠2.

Amamas Long Mekim Holi Nem Bilong Jehova

14. Wanem dispela amamas i bin strongim Jisas long winim olgeta traim bilong em?

¹⁴ Wanem dispela amamas i helpim Jisas long winim ol bikpela traim? Long olgeta wokman bilong Jehova, Jisas, em Pikinini God i laikim tumas, em i nambawan man em Satan i laik pundaunim. Olsem na pasin bilong Jisas long stap gut long God maski ol traim i painim em, dispela i olsem nambawan bikpela samting bilong bekim dispela tok Satan i bin sutim long Jehova. (Sindaun 27:11) Tingim bikpela amamas Jisas i bin kisim taim God i kirapim em bek. Em i mas amamas nogut tru taim em i luksave olsem em i bin inapim wok em i mas mekim olsem man i gutpela olgeta bilong kamapim olsem i stret Jehova i stap nambawan bos na mekim nem bilong Em i stap holi! Na tu, pasin bilong “sindaun long han sut bilong sia king bilong God” em i gutpela samting tru na em i givim bikpela amamas long Jisas.​​—⁠Song 110:​1, 2; 1 Timoti 6:​15, 16.

15, 16. Ol Witnes long Sachsenhausen i mas karim hevi long wanem ol pasin nogut tru ol man i mekim long ol? Na wanem samting i givim strong long ol long mekim olsem?

¹⁵ Ol Kristen tu i kisim bikpela amamas long mekim holi nem bilong Jehova long rot bilong winim ol traim na sanap strong taim ol man i mekim nogut long ol, na long dispela rot ol i bihainim pasin bilong Jisas. Olsem: Ol Witnes i bin kisim pen na hevi long banis kalabus nogut long Sachsenhausen na ol i abrusim bagarap long wanpela mats nogut bilong i dai long pinis bilong Namba Tu Pait. Long taim bilong dispela mats, planti tausen kalabusman i dai, long wanem, sik, hangre, strongpela win ren samting i bagarapim ol, o lain polis bilong Hitler ol i kolim SS i kilim ol i dai long rot. Ol Witnes, olgeta 230 bilong ol, ol i abrusim bagarap, long wanem, ol i pas gut wantaim na ol i redi long dai bilong helpim narapela.

¹⁶ Wanem samting i helpim ol dispela Witnes long sanap strong taim ol man i mekim nogut tru long ol? Taim ol i abrusim pinis bagarap, ol i kamapim amamas na tenkyu bilong ol long Jehova long wanpela tokaut i gat nem “Tokaut bilong 230 Witnes Bilong Jehova long 6-pela kantri, em ol i bung long ples bus klostu long Schwerin long Mecklenburg.” Long dispela pepa ol i tok: “Inap longpela taim tru ol traim i painim mipela, nau ol dispela traim i pinis, na ol man i abrusim bagarap, i olsem God i kisim ol long paia, na ol i no gat smel bilong paia i stap long ol. Nogat tru. (Lukim Daniel 3:​27.) Jehova i givim bikpela strong long ol na ol i amamas long wetim ol nupela tok King i givim ol bilong helpim wok Tiokratik.”c

17. Wanem ol traim i painim lain bilong God long nau?

¹⁷ Wankain olsem ol samting i bin traim bilip bilong ol dispela 230 manmeri i stap gut long God, ating ol samting inap traim tu bilip bilong yumi, maski inap long nau “blut bilong [yumi] i no kapsait.” (Hibru 12:⁠4) Tasol i gat kain kain traim. Ol wanklas inap tok bilas long yumi, o ol wanlain inap subim yumi long mekim pasin pamuk o sampela narapela rong. Na tu, strongpela tingting long yumi no ken kisim blut, na yumi mas maritim wanbilip tasol, na wok bilong lainim ol pikinini long tok i tru maski papamama i no wanbel long lotu, ol dispela samting inap givim bikpela hevi na traim long yumi.​​—⁠Aposel 15:29; 1 Korin 7:​39; Efesus 6:4; 1 Pita 3:​1, 2.

18. Wanem samting i strongim bel bilong yumi olsem yumi inap karim ol bikpela hevi tru?

¹⁸ Tasol maski wanem ol traim i painim yumi, yumi save yumi kisim ol hevi, long wanem, yumi putim Jehova na Kingdom bilong em i go pas, na yumi pilim olsem dispela em i gutpela samting tru na yumi amamas long mekim olsem. Yumi kisim strong long gutpela tok bilong Pita: “Yupela i holim nem bilong Krais, na sapos long dispela ol i tok nogut long yupela, orait yupela i ken amamas. Long wanem, yupela i save, Spirit bilong God, em Spirit i gat biknem na strong, em i stap long yupela.” (1 Pita 4:​14) Long strong bilong holi spirit bilong Jehova, yumi gat strong long karim ol bikpela hevi tru, na dispela bai givim biknem long Jehova na litimapim nem bilong em.​​—⁠2 Korin 4:7; Efesus 3:​16; Filipai 4:​13.

[Ol Futnot]

Yu Inap Stori Long Dispela?

• Ol Kristen i ting olsem wanem long pasin bilong karim hevi na ol man i mekim nogut long ol?

• Samting Jisas na ol narapela manmeri i stap gut long God i bin mekim long taim bilong hevi, dispela inap skulim yumi long wanem samting?

• Bilong wanem em i gutpela tingting long yumi no bekim nogut long ol man i mekim nogut long yumi?

• Wanem amamas i bin strongim Jisas taim ol hevi i painim em? Dispela inap skulim yumi long wanem samting?

[Blok/Ol Piksa long pes 15]

Samting Ol i Bin Mekim Taim Ol Man i Mekim Nogut Long Ol

• Paslain long ol soldia bilong Herot i kam long Betlehem bilong kilim i dai ol pikinini man i no winim yet 2-pela krismas, ol ensel i stiaim Josep na Maria na ol i kisim liklik pikinini Jisas na ranawe i go long Isip.​​—⁠Matyu 2:​13-​16.

• Taim Jisas i mekim wok bilong em, planti taim ol birua i laik kilim em i dai, long wanem, em i autim strongpela tok. Long olgeta taim Jisas i abrusim ol.​​—⁠Matyu 21:​45, 46; Luk 4:​28-​30; Jon 8:​57-​59.

• Taim ol soldia na plisman i kam long gaden Getsemani bilong holim Jisas, em i tokaut ples klia em i husat, na tupela taim em i tokim ol: “Em mi tasol.” Na tu, em i pasim ol disaipel bilong em long pait na em i larim ol birua i kisim em i go.​​—⁠Jon 18:​3-​12.

• Long Jerusalem, ol i holimpas Pita na ol narapela, na wipim ol, na tambuim ol long autim tok long Jisas. Tasol taim ol i lusim ol i go “ol i save go long tempel na long ol haus bilong ol manmeri, na ol i wok long skulim ol manmeri. Ol i no lusim wok bilong autim gutnius. Nogat. Ol i tokaut klia olsem, Jisas em i dispela man God i bin promis long salim i kam bilong kisim bek ol manmeri bilong en.”​​—⁠Aposel 5:​40-​42.

• Taim Sol, bihain em i kamap aposel Pol, i kisim save olsem ol Juda long Damaskus i laik kilim em i dai, long nait ol brata i putim em long wanpela basket na slekim basket i go daun long wanpela hul long banis bilong taun, na em i abrusim bagarap.​​—⁠Aposel 9:​22-​25.

• Sampela yia bihain, Pol i tok em i laik Sisar yet i harim kot bilong em, maski Gavena Festus na King Agripa i save em i “no bin mekim wanpela rong inap long em i dai o em i stap kalabus.”​​—⁠Aposel 25:​10-​12, 24-​27; 26:​30-​32.

[Ol Piksa long pes 16, 17]

Maski ol birua i mekim nogut tru long ol na ol i mas ranawe, planti tausen Witnes long Malawi i stap gut long God na ol i amamas long mekim yet wok bilong Kingdom

[Ol Piksa long pes 17]

Amamas bilong mekim holi nem bilong Jehova i helpim ol dispela man long stap gut long God long taim bilong mats nogut bilong i dai na taim ol i stap long banis kalabus nogut

[Kredit Lain]

Death march: KZ-Gedenkstätte Dachau, courtesy of the USHMM Photo Archives

[Ol Piksa long pes 18]

I gat kain kain traim na hevi