Yu Mas Givim Wanem Samting Long Ol Pikinini?

PAVLOS i bilong hap saut bilong Yurop. Em i no save stap long haus na bai em i ken lusim sampela haptaim wantaim meri na ol pikinini​—⁠tupela pikinini meri, wanpela i gat 13 krismas na narapela 11 krismas, na wanpela pikinini man i gat 7 krismas. Pavlos i save wok 7-pela de long olgeta wik inap planti aua, em i laik kisim planti mani bilong helpim ol pikinini bilong em long bihain. Em i laik baim flet bilong wan wan pikinini meri bilong em, na em i laik kirapim wanpela liklik bisnis bilong pikinini man. Meri bilong em, Sofia, i wok strong long bungim ol laplap, ol plet kap, spun na fok samting bilong helpim ol pikinini taim ol yet i gat famili bilong ol. Taim mipela i askim tupela long as na tupela i wok strong olsem, tupela i tok: “Mipela i laik helpim ol pikinini bilong mipela!”

Olsem Pavlos na Sofia, planti papamama long olgeta hap ol i wok strong long helpim ol pikinini na bai ol i stap gut long bihain. Sampela i save putim mani i stap bilong ol pikinini long bihain. Na sampela i stretim rot na bai ol pikinini i ken kisim gutpela skul na lain long wanpela wok em ol i ken mekim long i stap bilong ol long bihain. Tru, planti papamama i ting olsem ol dispela samting i soim olsem ol i laikim pikinini bilong ol, tasol planti taim kain samting olsem i save putim bikpela hevi long papamama yet, long wanem, ol i laik inapim laik bilong ol famili na ol pren na komiuniti ol i stap long en. Olsem na i stret ol papamama i kamapim dispela askim, ‘Mipela i mas givim wanem samting long ol pikinini?’

Bungim Ol Samting Bilong Bihain

I stret papamama Kristen i mekim ol samting bilong helpim ol pikinini na Baibel tu i tok olsem. Aposel Pol i tokim ol Kristen: “Ol pikinini i no gat wok bilong painim na bungim ol kaikai samting bilong helpim ol papamama bilong ol. Nogat. Ol papamama tasol i gat wok bilong bungim ol samting bilong helpim ol pikinini.” (2 Korin 12:14) Pol i tok moa olsem wok bilong lukautim ol pikinini em i bikpela samting. Em i tok: “Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.” (1 Timoti 5:⁠8) Planti stori long Baibel i soim olsem pasin bilong givim ol samting long ol pikinini dispela i bikpela samting long ol wokman bilong God long taim bilong ol man i bin raitim Baibel.​—⁠Rut 2:​19, 20; 3:​9-13; 4:​1-22; Jop 42:⁠15.

Tasol sampela taim ol papamama i tingting tumas long bungim planti samting. Bilong wanem ol i mekim olsem? Manolis, em wanpela papa i bin lusim hap saut bilong Yurop na i go long Amerika, i kamapim wanpela as olsem: “Ol papamama i bin kisim hevi long taim bilong Wol Woa 2​—⁠hevi bilong stap hangre na stap rabis​—⁠ol i wok strong long mekim ol samting na bai pikinini bilong ol i ken kisim gutpela sindaun.” Na em i tok moa: “Tingting bilong ol papamama long ol i mas wok strong na ol i laik bai pikinini bilong ol i kisim gutpela sindaun, sampela taim dispela i givim hevi long ol yet.” Sampela papamama i no save kisim sampela samting em ol yet i mas kisim, long wanem, ol i wok strong long bungim mani kago bilong givim long ol pikinini. Tasol yu ting i gutpela long ol papamama i mekim olsem?

‘Pasin i Nogut na i No Gat As Bilong En’

King Solomon bilong Israel i mekim wanpela tok lukaut long pasin bilong bungim ol samting bilong givim long ol pikinini. Em i tok: “Mi save pinis, mi bai lusim ol dispela samting mi bin hatwok long kamapim, na man i senisim mi bai i kisim. . . . Mi no save bai em i saveman o longlong man. Tasol em bai i bosim olgeta samting mi bin hatwok long kamapim long gutpela save bilong mi. . . . Mi tingting olsem, i gat sampela man i bin skul gut long wok na i gat gutpela save na tingting, na ol i bin wok hat na kisim planti samting. Na bihain ol i dai na ol arapela man i kisim nating ol dispela samting bilong ol. Dispela pasin i nogut tru, na i no gat as bilong en.”​—⁠Saveman 2:​18-21.

Olsem Solomon i tok, ol lain i kisim ol samting em narapela i bungim, ating ol i no luksave olsem em i bikpela samting, long wanem, ol yet i no bin wok strong long kisim. Olsem na sampela pikinini i save mekim nabaut long ol samting em papamama i bin wok strong long bungim. O ating ol i pinisim nating mani em papamama i bin taitim bun long kisim. (Luk 15:​11-16) Man! “Dispela pasin i nogut tru na i no gat as bilong en!”

Samting Papa i Givim na Pasin Mangal

I gat narapela samting em papamama i mas tingim. Long ol ples we ol i save tingim tumas pasin bilong kisim mani kago taim papa o mama i dai, o kisim mani samting long papamama taim ol i marit, ol pikinini inap mangal, olsem strong long kisim haus o graun o mani samting, winim mak bilong ol samting papamama inap givim ol. Loukas, em wanpela papa i stap long Grik i tok: “Sori tru long papa i gat tupela o tripela pikinini meri.” Em i tok: “Sampela pikinini meri i save skelim ol samting papa bai givim ol na ol samting ol narapela papa i save bungim bilong ol pikinini bilong ol. Ating ol bai tokim papa olsem bihain ol bai i no gat rot long marit sapos ol i no gat mani samting.”a

Manolis, em pastaim yumi stori long em, i tok: “Ating wanpela man bai prenim wanpela meri longtaim i go inap long papa bilong meri i tokim dispela man olsem em bai givim sampela samting long meri, ating haus o bikpela mani. Dispela kain pasin i kain olsem em i subim papa bilong meri long mekim samting.”

Baibel i tok yumi mas abrusim olgeta kain pasin mangal. Solomon i tok: “Sapos man i hariap long kisim ol samting bilong papamama long taim tupela i stap yet, orait ol dispela samting bai i no inap i stap gut.” (Sindaun 20:21) Na aposel Pol i tok: “Pasin bilong laikim tumas mani em i as bilong olgeta pasin nogut.”​—⁠1 Timoti 6:10; Efesus 5:⁠5.

‘Savetingting na Samting Papa i Givim’

Tru, ol samting papa o mama i givim ol pikinini i bikpela samting, tasol gutpela tingting na save i bikpela samting moa winim ol samting bilong skin. King Solomon i tok: “Gutpela tingting . . . i gutpela tru, olsem ol gutpela samting ol papa i save givim yumi long taim ol i laik i dai. Gutpela tingting i olsem mani, na i save helpim yumi long taim nogut. Tasol gutpela tingting na save i winim mani, na i helpim yumi moa yet na yumi stap gut olgeta.” (Saveman 7:​11, 12; Sindaun 2:7; 3:21) Tru, mani inap helpim man long taim nogut, na papa bilong mani inap mekim wok long mani long baim ol samting em i mas kisim, tasol mani inap lus tu. Tasol gutpela tingting na save​—⁠em samting i helpim man long mekim gutpela wok long save bilong em na bai em inap stretim ol hevi o winim ol mak em i putim​—⁠bai lukautim man na bai em i no mekim sampela samting em inap kisim bagarap long en. Taim pasin bilong pret long God i as bilong gutpela tingting na save, dispela inap helpim man long kisim laip oltaim long nupela taim God bai kamapim klostu nau​—⁠em wanpela gutpela samting tru, a?​—⁠2 Pita 3:⁠13.

Ol papamama Kristen i bihainim savetingting taim ol i makim stret ol samting ol yet na ol pikinini bilong ol bai mekim. (Filipai 1:10) Ol samting bilong skin em papamama i bungim bilong ol pikinini i no ken i stap nambawan samting winim ol samting bilong spirit. Jisas i tokim ol disaipel: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:​33, Nupela Testamen na Ol Sam) Ol papamama i putim sampela mak bilong famili Kristen bilong ol i ken winim, ol i ken bilip tru olsem ol bai kisim gutpela pe. Saveman King Solomon i tok: “Sapos man i gat gutpela tingting na i bihainim stretpela pasin, orait papa bilong en i save amamas tru. Yu mas bihainim ol dispela gutpela pasin, na bai papamama bilong yu i belgut tru na i amamas.”​—⁠Sindaun 23:​24, 25.

Samting Bilong Oltaim

Long ol Israel bilong bipo, ol samting em papamama i givim ol pikinini i bikpela samting. (1 King 21:​2-6) Tasol Jehova i tokim ol: “Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.” (Lo 6:​6, 7) Ol papamama Kristen tu i kisim dispela tok: “Stretim gut ol pikinini bilong yupela na skulim ol long tok bilong Bikpela.”​—⁠Efesus 6:⁠4.

Ol papamama i save tingim ol samting bilong spirit i luksave olsem ol i gat wok tu long skulim famili bilong ol long tok bilong Baibel. Andreas em papa bilong tripela pikinini i tok: “Sapos ol pikinini i lain long bihainim ol stiatok bilong Baibel long i stap bilong ol, dispela inap helpim ol bihain.” Kain samting papamama i givim long pikinini i helpim ol long kisim pasin bilong pas gut wantaim Man Bilong Wokim ol.​—⁠1 Timoti 6:⁠19.

Olsem wanem? Yu bin tingting long bungim sampela samting bilong helpim ol pikinini bilong yu long ol samting bilong spirit long bihain? Olsem: Papamama i ken mekim wanem sapos pikinini bilong ol i mekim wok autim tok fultaim? Tru, man bilong autim tok fultaim i no ken ting ol narapela i mas helpim em long mani samting o askim ol long mekim olsem, nogat, tasol ating ol papamama i gat pasin sori ol i laik helpim ol pikinini “i sot long ol samting” bambai ol i ken stap insait long fultaim sevis. (Rom 12:13; 1 Samuel 2:​18, 19; Filipai 4:​14-18) Kain pasin olsem bai amamasim Jehova.

Olsem na ol papamama i mas givim wanem samting long pikinini bilong ol? Ol papamama Kristen i mas lukautim ol pikinini long ol samting bilong skin, na ol i mas givim ol samting bilong spirit tu long ol, em samting bilong helpim ol inap oltaim oltaim. Long dispela rot, tok bilong Song 37:18 bai kamap tru: “Bikpela i save was gut long ol manmeri i bihainim tok bilong em. Na ol samting God i givim ol, em ol bai i holim oltaim.”

[Futnot]

[Ol Piksa long pes 26, 27]

Yu laik bai pikinini bilong yu i kisim wanem kain sindaun long bihain?