Laip Stori

Mi Amamas Mi Insait Long Wok Bilong Skulim Ol Man Long Baibel

Stori bilong Anna Matheakis

Sip i paia. Sapos em i go daun long solwara, dispela traipela sip bai pulim mi na mi inap dai insait long solwara. Mi tromoi han nabaut na traim long winim ol biksi. Wanpela rot tasol long stap antap long wara, em long holim strong wanpela laip saket narapela meri i pasim. Mi beten long God i ken strongim mi. Em dispela samting tasol mi inap mekim.

EM YIA 1971, na mi bin go bek long namba tri asainmen long wok misineri bilong mi, long Itali. Long dispela taim, sip i bagarap na klostu mi lusim olgeta samting bilong mi. Tasol mi no bin lusim ol nambawan gutpela samting​​—⁠laip bilong mi, ol gutpela lain brata Kristen, na gutpela wok bilong mi long mekim laik bilong Jehova. Dispela wok i kisim mi i go long tripela hap bilong graun, na dispela bagarap i kamap long sip em wanpela samting i bin painim mi long laip bilong mi.

Mama i karim mi long 1922. Famili bilong mi i stap long Rām Allāh, klostu 16 kilomita long hap not bilong Jerusalem. Papamama bilong mi i bilong ailan Krit, tasol papa i bin go bikpela long Palestain. Namel long mipela faipela pikinini, mi kamap las long famili. Bikpela bel hevi i kamap long famili taim namba tu bikpela brata i dai long wara Jordan taim klas bilong em i go raun long dispela hap. Bihain long dispela hevi mama i no laik moa long stap long Rām Allāh, olsem na mipela i go long Atens, long kantri Grik, taim mi gat 3-pela krismas.

Taim Famili i Harim Tok i Tru

Bihain liklik long mipela i go kamap long kantri Grik, bikpela brata bilong mi, Nikos, em i gat 22 krismas, i kirap stadi wantaim ol Sumatin Bilong Baibel, em nem bilong ol Witnes Bilong Jehova long bipo. Taim em i lain na kisim save long Baibel, em i kisim bikpela amamas na em i gat strongpela laik long mekim wok Kristen bilong autim tok. Papa i belhat long dispela, na em i rausim Nikos long haus. Tasol taim papa i go long Palestain, mi, mama, na susa bilong mi i save go wantaim Nikos long ol miting Kristen. Mi inap tingim yet mama i save amamas tru long stori long ol samting em i harim long ol dispela miting. Tasol i no longtaim, em i kisim sik kensa na dai long taim em i gat 42 krismas. Long dispela taim bilong hevi, susa bilong mi, Ariadne, i lukautim gut famili bilong mipela. Maski em i yangpela yet, em i olsem wanpela mama bilong mi inap planti yia.

Olgeta taim papa i save kisim mi i go long Misin Otodoks taim em i stap long Atens, na bihain long em i dai, mi save go yet long dispela misin, tasol i no long olgeta taim. Mi no lukim wanpela samting i makim olsem ol manmeri long dispela lotu i givim bel long wok bilong God, olsem na mi no go moa long lotu.

Taim papa i dai pinis, mi kisim wanpela wok mani long dipatmen bilong fainens. Tasol brata bilong mi i givim laip bilong em olgeta long wok bilong autim tok bilong Kingdom, na inap planti yia em i mekim dispela wok long kantri Grik. Long 1934 em i go long Saiprus. Long dispela taim, i no gat ol Witnes Bilong Jehova ol i baptais pinis long ailan, olsem na em i go pas long kirapim wok autim tok long dispela hap. Bihain long em i marit, meri bilong em, Galatia, em tu i mekim wok autim tok fultaim inap planti yia.a Long olgeta taim Nikos i save salim ol buk na ol magasin em Baibel i as long en long mipela, tasol mipela i no save ritim. Em i stap long Saiprus inap long taim em i dai.

Mi Pilim Tru Tok Bilong Baibel

Long 1940, George Douras, wanpela strongpela Witnes long Atens na wanpela pren bilong Nikos, i visitim mipela na singautim mipela long bung wantaim wanpela liklik lain long stadi long Baibel long haus bilong em. Mipela i amamas long em i singautim mipela. I no longtaim mipela i kirap toktok wantaim ol narapela long ol samting mipela i lainim. Save mipela i kisim long Baibel i kirapim mi na susa bilong mi long dediketim laip bilong mipela long Jehova. Ariadne i kisim baptais long 1942, na mi long 1943.

Taim Wol Woa 2 i pinis, Nikos i singautim mipela long go daun long Saiprus, olsem na long 1945 mipela i go long Nicosia. Long Saiprus, wok bilong autim tok i nogat tambu long en olsem long kantri Grik. Mipela i no autim tok long ol haus tasol, nogat, mipela i autim tok long rot tu.

Tupela yia bihain, Ariadne i mas go bek long kantri Grik. Long hap em i bungim man em bihain em bai maritim, em i wanpela wanbilip i lotuim Jehova, olsem na em i stap long Atens. I no longtaim, tambu man na susa bilong mi i askim mi long kam bek long kantri Grik na mekim wok autim tok fultaim long Atens. Wok painia em wanpela mak mi bin putim, olsem na mi go bek long Atens we ol i sot long ol man bilong autim tok.

Planti Rot i Op Pinis Long Mi

Long Novemba 1, 1947, mi kirap mekim wok painia, na mi save lusim 150 aua long olgeta mun long wok autim tok. Teritori bilong kongrigesen bilong mipela i bikpela tru, na mi mas wokabaut planti. Maski i gat planti hatwok, mi amamas long planti blesing mi kisim. Ol polis i save holim ol Witnes taim ol i lukim ol i mekim wok autim tok o i go long ol miting Kristen, olsem na i no longtaim na ol i holim mi.

Ol i kotim mi na tok mi traim pulim ol man long lusim bilip bilong ol, em wanpela bikpela rong long ai bilong ol man long dispela taim. Ol i makim mi bilong i stap kalabus inap tupela mun long Averof Haus Kalabus Bilong Ol Meri long Atens. Narapela meri Witnes i stap pinis long dispela haus kalabus, na maski mitupela i stap kalabus mitupela i save amamas na toktok wantaim bilong strongim narapela narapela. Taim mi pinisim tupela mun long kalabus, mi amamas long mekim yet wok painia. Planti man mi bin stadi wantaim ol long Baibel i stap gut yet olsem wokman bilong Jehova, na dispela i givim bikpela amamas moa long mi.

Long 1949, ol i singautim mi i go long namba 16 klas bilong Wastaua Baibel Skul Bilong Gileat long Amerika, we ol man i mekim wok autim tok fultaim i skul long mekim wok misineri. Mi na ol famili bilong mi i amamas tru. Mi tingting pinis long go long wanpela intenesenel kibung long taim bilong san long Amerika long 1950 na bihain go long Gileat.

Bihain long mi kamap long Amerika, mi amamas long mekim wok bilong klinim ol rum inap sampela mun long hetkota bilong ol Witnes Bilong Jehova long New York City. Ples i klin, i gat gutpela pasin, na mi stap namel long ol bratasista i save amamas long mekim ol gutpela wok Kristen. Oltaim mi bai tingim dispela 6-pela mun mi bin stap long hap. Nau em taim bilong i go long Skul Gileat, na dispela 5-pela mun bilong skul we mi mas stadi strong na kisim planti save i pinis hariap tru. Mipela ol sumatin i luksave olsem save mipela i kisim long Baibel em i gutpela samting tru, na em i mekim mipela i amamas moa na em i strongim laik bilong mipela long toktok wantaim ol man long tok i tru i givim laip long ol man.

Namba Wan Asainmen Bilong Mi Long Wok Misineri

Long Skul Gileat, ol i tok orait long mipela i makim husat mipela i laik poroman wantaim paslain long mipela i kisim ol asainmen bilong mipela. Ruth Hemmig (nau Bosshard), wanpela gutpela sista em poroman bilong mi. Mi na Ruth i amamas tru taim mipela i kisim asainmen bilong i go long Istanbul, long Teki​​—⁠wanpela hap i stap namel long Esia na Yurop! Mipela i save olsem gavman bilong dispela kantri i no orait yet long wok autim tok, tasol mipela i save olsem Jehova bai helpim mipela.

Istanbul em wanpela gutpela taun i pulap long kain kain man, na pasin bilong ol arapela kantri. Long dispela hap, mipela i lukim ol kain kain liklik stua, pasin bilong kukim kaikai, ol gutpela haus tumbuna, ol naispela komiuniti, na wanpela hap bilong taun i stap long nambis i narapela kain. Tasol nambawan samting, mipela i painim ol gutpela man i gat laik long kisim save long God. Insait long dispela liklik grup bilong ol Witnes long Istanbul, planti bilong ol em ol Amenia, ol Grik, na ol Juda. Tasol, i gat planti ol arapela lain bilong ol narapela kantri, na i gutpela moa long save long ol narapela tok ples, na long tok ples Teki tu. Mipela i bin amamas tru long bungim ol kain kain man bilong ol narapela kantri husat i dai tru long wara bilong tok i tru. Planti bilong ol dispela brata i mekim yet wok bilong Jehova.

Tasol sori tru, gavman i no laik givim nupela gavman pepa i tok orait long Ruth i ken stap long kantri, olsem na em i mas lusim kantri Teki. Em i mekim yet wok autim tok fultaim long Swiselan. Maski planti yia i lus pinis, mi tingim yet gutpela pasin bilong em, na pasin pren bilong em long strongim mi.

Mi Go Long Narapela Hap Bilong Graun

Long 1963 gavman i no laik givim mi nupela gavman pepa i tok orait long mi i ken stap long kantri Teki. I hatwok tru long lusim ol brata Kristen em mi bin lukim ol i wok long kamap strong long ol samting bilong spirit maski ol i mas wok strong long winim planti hevi. Bilong strongim mi, famili bilong mi i baim tiket bilong mi long i go long New York City bambai mi ken go long kibung long hap. Long dispela taim mi no bin kisim yet nupela asainmen bilong mi.

Taim kibung i pinis, ol i makim mi long go long Lima, Peru. Mi wantaim wanpela yangpela sista husat bai kamap poroman bilong mi long dispela hap, i lusim New York na mitupela i go stret long asainmen bilong mipela. Mi mas lainim tok ples Spen na mi stap long wanpela haus misineri i stap antap long brens ofis bilong ol Witnes Bilong Jehova. Em i gutpela tru long mekim wok autim tok long hap na lain long kisim save long ol bratasista bilong dispela ples.

Narapela Asainmen, Narapela Tok Ples

Bihain, sik na hevi bilong i go lapun i painim ol famili bilong mi long kantri Grik. I no gat wanpela taim ol i bin subim mi long lusim wok misineri na mi ken sindaun gut olsem ol narapela man na wok long lukautim ol, nogat. Tasol, bihain long mi tingting gut na beten, mi pilim olsem mi mas stap klostu long ol na mekim wok bilong mi. Ol brata i lukautim wok i wanbel na ol i salim mi i go long Itali, na famili bilong mi i amamas long baim rot bilong mi long i go long Itali. Na tru tru, ol i sot long ol man bilong autim tok long Itali.

Na long dispela hap, mi mas lain gen long nupela tok ples​​—⁠tok ples Itali. Namba wan asainmen bilong mi em long taun Foggia. Bihain, ol i salim mi i go long Naples, we i no gat planti man bilong autim tok. Teritori bilong mi em Posilipo, em i wanpela naispela hap tru bilong Naples. Em i bikpela hap tru, na i gat wanpela pablisa tasol bilong Kingdom. Mi amamas tru long mekim wok long hap, na Jehova i bin helpim mi long kirapim planti Baibel stadi. Bihain, wanpela bikpela kongrigesen i kamap long dispela hap.

Namel long ol manmeri mi bin stadi wantaim ol pastaim, i gat wanpela mama na 4-pela pikinini bilong em. Em na tupela pikinini meri bilong em i stap yet olsem ol Witnes Bilong Jehova. Mi bin stadi tu wantaim tupela marit i gat pikinini meri. Famili olgeta i kamap strong long tok i tru na dediketim laip bilong ol long Jehova na kisim baptais long wara. Nau pikinini meri i marit long wanpela gutpela wokman bilong Jehova na tupela i givim bel long lotuim God. Taim mi stadi wantaim wanpela bikpela famili long Baibel, mi pilim tru strong bilong Tok Bilong God. Taim mipela i ritim sampela skripsa i soim olsem God i no orait long pasin bilong lotuim ol imis, mama bilong haus i no inap wet long stadi i ken pinis pastaim, nogat. Kwiktaim em kirap na rausim olgeta imis i stap long haus bilong em!

Klostu Mi Lus Long Solwara

Taim mi go kam long Itali na Grik, planti taim mi save kalap long sip. Mi save amamas long raun long sip. Tasol long wanpela raun, long taim bilong san long 1971, em i narapela kain stret. Mi kalap long sip Heleanna bilong i go bek long Itali. Long moningtaim bilong Ogas 28, wanpela paia i kirap long haus kuk bilong sip. Paia i go bikpela na ol pasindia i pret nogut tru. Ol meri i ai raun na pundaun nabaut, ol pikinini i krai, na ol man i bikmaus na singaut strong long samting i kamap. Ol manmeri i ran i go long ol liklik bot i stap long dek bilong sip. Tasol sori tru, masin bilong daunim ol dispela liklik bot i no wok gut tumas, na i no gat planti laip saket. Mi no gat laip saket, tasol hat bilong paia i go bikpela moa, olsem na i gat wanpela rot tasol, em long kalap i go daun long solwara.

Orait taim mi stap insait long solwara, mi lukim wanpela meri i trip klostu long mi i werim wanpela laip saket. I luk olsem em i no save long swim, olsem na mi holim em long han na pulim em i go longwe long dispela sip. Win i strong na biksi i kirap na mi mas taitim bun bilong mi ken trip antap long solwara, dispela i mekim na skin bilong mi i taiet tru. Maski ol samting i go nogut moa, mi beten strong long Jehova i ken strongim mi, na dispela i givim strong long mi. Ol samting i painim mi i kirapim mi long tingim stori bilong aposel Pol taim sip em i kalap long en i bin bagarap.​​—⁠Aposel, sapta 27.

Mi holim yet han bilong meri, na mi mas taitim bun insait long biksi inap 4-pela aua, taim mi gat strong mi swim na singaut long Jehova long helpim mi. Bihain, mi lukim wanpela dingi i kam. Dingi i kam bilong kisim mipela, tasol meri mi swim wantaim em i dai pinis. Taim mipela ol lain i stap laip yet i go kamap long taun Bari, long Itali, ol i kisim mi i go long haus sik, we mi kisim sampela marasin. Mi mas stap long haus sik inap sampela de na planti Witnes i kam lukim mi, ol givim mi ol samting mi mas i gat. Gutpela pasin Kristen bilong ol i kirapim tru ol narapela i stap long wod.b

Taim mi kamap orait, ol i makim mi long go long Rom. Ol i bin askim mi long mekim wok autim tok long ol bisnis teritori namel long taun, na mi mekim inap 5-pela yia, wantaim helpim i kam long Jehova. Inap 20 yia olgeta, mi bin amamas long mekim wok autim tok long Itali, na mi kisim pasin bilong laikim ol manmeri bilong Itali.

Mi Go Bek Long Hap Mi Bin Kirap Long En

Bihain, helt bilong Ariadne na man bilong em i go nogut moa. Mi luksave olsem sapos mi stap klostu long ol, bai mi inap mekim gut long ol olsem ol i bin mekim gut long mi. Mi mas tokaut olsem mi bel hevi stret taim mi lusim Itali. Tasol ol brata i lukautim wok i tok orait, na kirap long taim bilong san long 1985 i kam inap long nau, mi mekim wok painia long Atens, em hap we mi bin kirap mekim wok autim tok fultaim long 1947.

Mi mekim wok autim tok long teritori bilong kongrigesen mi stap long en, na mi bin askim ol brata long brens ofis olsem ol i orait long mi long autim tok long bisnis teritori namel long taun. Mi bin mekim olsem inap 3-pela yia wantaim wanpela painia sista. Mipela i bin autim gut tok i tru long ol manmeri em yumi hatwok long painim ol long haus bilong ol.

Taim ol yia i kam na i go, laik bilong mi long mekim wok i go bikpela moa, tasol mi nogat strong moa. Nau tambu man bilong mi i dai pinis. Ariadne, i stap olsem mama bilong mi, em i kamap aipas. Na long mi yet, helt bilong mi i bin gutpela long ol yia mi mekim wok autim tok fultaim. Tasol i no longtaim i go pinis, mi bin pundaun long wanpela lata ston na brukim han sut bilong mi. Bihain mi pundaun gen na brukim bun long hip bilong mi. Ol dokta i mas katim mi na mi bin slip long bet longpela taim. Nau mi no inap wokabaut gut. Mi save yusim stik na bilong mi ken raun i mas i gat wanpela i helpim mi. Maski i olsem, mi wok strong yet, na mi tingting strong olsem helt bilong mi bai kamap gutpela liklik. Wok bilong skulim ol man long Baibel, maski mi inap mekim liklik tasol, em i stap olsem nambawan rot bilong mi long kisim amamas.

Taim mi tingting bek long ol gutpela yia mi bin mekim wok autim tok fultaim, bel i pulap tru long amamas na mi tok tenkyu long Jehova. Long olgeta taim Jehova na oganaisesen bilong em hia long graun i bin givim ol gutpela tok long mi na i helpim mi gut tru, olsem na mi inap mekim olgeta samting inap tru long skel bilong mi taim mi mekim wok bilong em long laip olgeta bilong mi. Long bel mi gat laik tru long Jehova i ken strongim mi long mekim yet wok bilong em. Mi amamas long liklik hap wok mi mekim insait long dispela wok Em i bosim bilong skulim ol man long Baibel long olgeta hap bilong graun.​​—⁠Malakai 3:​10.

[Ol Futnot]

[Piksa long pes 9]

Mi wantaim susa bilong mi, Ariadne, na man bilong em, Michalis, taim mi lusim ol bilong i go long Gileat

[Piksa long pes 10]

Ol i makim mi na Ruth Hemmig bilong i go long Istanbul, Teki

[Piksa long pes 11]

Long Itali, 1972 samting

[Piksa long pes 12]

Mi wantaim susa bilong mi, Ariadne, long nau