Yu Save Bilip Strong Long God?
“Yupela i mas wok pastaim long painim kingdom bilong God.”—MATYU 6:33, Nupela Testamen na Ol Sam.
1, 2. Wanpela yangpela man i bin mekim wanem long wok mani bilong em? Bilong wanem em i mekim olsem?
WANPELA yangpela man i gat laik long mekim sampela wok moa insait long kongrigesen bilong em. Tasol wok mani i pasim em long go oltaim long ol miting. Em i mekim wanem bilong stretim dispela samting? Em i lusim sampela samting long sindaun bilong em, lusim wok mani bilong em, na bihain em i painim wanpela wok i no pasim em long mekim ol wok Kristen bilong em. Long nau em i no save kisim bikpela pe olsem bipo, tasol em i save lukautim yet famili bilong em, na em inap helpim gut kongrigesen.
2 Yu save long as na dispela yangpela man i bin mekim olsem? Yu ting yu inap mekim wankain samting sapos yu gat wankain hevi olsem em? Planti Kristen i bin mekim olsem, na dispela i kamapim klia olsem ol i bilip long tok promis bilong Jisas, em i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:33, Nupela Testamen na Ol Sam) Ol i bilip strong olsem Jehova bai lukautim ol, na i no ol wok samting bilong dispela graun.—Sindaun 3:23, 25.
3. Bilong wanem sampela inap tingting olsem nau i gutpela long painim Kingdom pastaim o nogat?
3 Long nau yumi stap long taim bilong planti hevi, olsem na sampela inap tingting: Dispela yangpela man i bihainim gutpela tingting o nogat? Long nau, winim olgeta taim bipo, sampela lain i stap rabis nogut tru, tasol sampela i gat gutpela sindaun tru. Planti manmeri long ol kantri i stap rabis ol bai amamas tru long painim rot bilong mekim sindaun bilong ol i kamap gutpela liklik. Tasol planti long ol kantri i gat planti mani samting ol i hatwok long holim strong gutpela sindaun bilong ol, long wanem, sampela taim strong bilong mani i go daun o ol i mas senisim wok mani bilong ol, na ol bos i strong long ol i mas mekim bikpela wok moa o wok ovataim. Tru tumas, wok bilong painim mani bilong lukautim famili i gat ol hevi bilong en, so sampela inap tingting: ‘Long nau i gutpela taim long painim Kingdom pastaim o nogat?’ Bilong helpim yu long painim bekim bilong dispela askim, tingim ol man Jisas i bin givim dispela tok long ol.
“Yupela i No Ken Tingting Planti”
4, 5. Jisas i mekim wanem tok piksa bilong soim olsem i stret lain bilong God i no ken tingting planti tumas long ol samting bilong wan wan de?
4 Jisas i stap long Galili na i toktok long bikpela lain manmeri i kam long planti hap. (Matyu 4:25) Ating klostu olgeta dispela man i stap rabis, tasol Jisas i tokim ol long ol i no ken tingting pastaim long kisim planti mani kago—ol i mas tingting long bungim ol samting i gat bikpela pe moa, em ol gutpela samting bilong spirit. (Matyu 6:19-21, 24) Em i tok: “Yupela i no ken tingting planti long laip bilong yupela na tok, ‘Bai yumi kaikai wanem samting? Bai yumi dring wanem samting?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ Ating laip em i winim kaikai, na bodi em i winim ol laplap samting.”—Matyu 6:25.
5 Ating planti man i harim tok bilong Jisas ol inap ting i no gutpela long bihainim dispela tok. Ol i save olsem sapos ol i no wok strong, famili bilong ol bai kisim hevi. Tasol Jisas i tokim ol long tingim ol pisin. Ol pisin i mas painim kaikai long olgeta wan wan de, tasol Jehova i save lukautim ol. Na Jisas i tok Jehova i save lukautim ol plaua, ol i naispela tru, winim ol gutpela bilas bilong Solomon. Orait sapos Jehova i lukautim ol pisin na plaua, em bai lukautim yumi moa yet, a? (Matyu 6:26-30) Olsem Jisas i tok, laip na bodi bilong yumi i bikpela samting moa, winim kaikai yumi save baim bilong strongim bodi, na winim klos yumi save kisim bilong karamapim bodi. Sapos yumi lusim olgeta strong bilong yumi long kisim kaikai na klos, na yumi no gat strong moa long mekim wok bilong Jehova, i olsem laip bilong yumi i no gat as bilong en.—Saveman 12:13.
Stretpela Tingting
6. (a) Ol Kristen i gat wanem wok? (b) Ol Kristen i bilip strong long husat?
6 Tru, Jisas i no kirapim ol man long lusim wok na wetim God i givim kaikai na klos samting long famili bilong ol, nogat. Ol pisin tu i mas painim kaikai bilong ol yet wantaim ol pikinini bilong ol. Olsem na ol Kristen i mas mekim wok sapos ol i laik kaikai. Ol i gat wok long lukautim famili bilong ol. Ol Kristen husat i mekim wok olsem ol wokman o wokboi nating, ol i mas mekim gut wok bilong bosman bilong ol. (2 Tesalonaika 3:10-12; 1 Timoti 5:8; 1 Pita 2:18) Planti taim aposel Pol i bin samapim ol haus sel bilong lukautim em yet. (Aposel 18:1-4; 1 Tesalonaika 2:9) Tasol ol dispela Kristen i no ting wok mani bai helpim ol long i stap gut. Ol i bilip long Jehova. Olsem na bel bilong ol i stap isi, em kain bel isi ol narapela i no save long en. Man bilong raitim song i tok: “Ol manmeri i save bilip long Bikpela, ol i olsem maunten Saion. Dispela maunten i no inap guria, na em i stap strong olgeta.”—Song 125:1.
7. Man i no bilip strong long Jehova em inap ting olsem wanem?
7 Man i no bilip strong long Jehova, ating em i gat narapela kain tingting. Planti man i ting bikpela mani em i namba wan samting bilong helpim ol long i stap gut. Olsem na sampela papamama i save kirapim ol pikinini long kisim bikpela skul taim ol i go bikpela na bai ol i ken kisim wok i gat bikpela pe. Sori tru, sampela famili Kristen i kisim pinis bikpela hevi long dispela, long wanem, ol pikinini i no tingim moa ol samting bilong spirit na ol i kirap painim ol samting bilong skin tasol.
8. Ol Kristen i holim wanem stretpela tingting?
8 Olsem na ol Kristen i gat gutpela tingting ol i save olsem tok bilong Jisas i stret long nau, wankain olsem long taim bilong ol aposel, na ol i wok strong long holim stretpela tingting. Maski ol i mas lusim planti aua long mekim wok mani bilong lukautim famili olsem Baibel i tok ol i mas mekim, ol i no larim dispela i mekim na ol i givim baksait long ol bikpela samting moa, em ol samting bilong spirit.—Saveman 7:12.
“Yupela i No Ken Tingting Planti”
9. Jisas i givim wanem gutpela tok long ol man i bilip tru long Jehova?
9 Taim Jisas i mekim Bikpela Tok Long Maunten, em i tokim ol man: “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. Ol haiden i save wari long painim olgeta dispela samting. Tasol Papa bilong yupela i stap long heven em i save pinis, yupela i mas kisim dispela olgeta kain samting.” (Matyu 6:31, 32) Em gutpela tok tru bilong strongim bel, a? Sapos yumi bilip tru long Jehova, oltaim em bai i stap bilong helpim yumi. Tasol tok bilong Jisas i kirapim yumi long tingting gut, olsem: Sapos yumi “wari” long painim ol samting bilong skin, tingting bilong yumi bai i wankain olsem bilong “ol haiden,” em ol i no Kristen tru.
10. Taim yangpela man i kam long Jisas bilong kisim sampela gutpela tok, olsem wanem Jisas i kamapim long ples klia samting yangpela man i laikim moa yet?
10 Wanpela taim, wanpela yangpela maniman i askim Jisas long em i mas mekim wanem bilong kisim laip i stap gut oltaim oltaim. Jisas i kirapim em long tingim ol tok bilong Lo i stap yet long dispela taim. Yangpela man i tokim Jisas: “Mi save bihainim tasol dispela olgeta lo. Tasol mi sot yet long wanem samting?” Ating long tingting bilong planti man, tok Jisas i mekim i no gutpela long bihainim. Em i tok: “Sapos yu laik kamap stretpela olgeta, orait yu go salim olgeta samting bilong yu na dispela mani yu kisim yu mas givim long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.” (Matyu 19:16-21) Yangpela man i bel hevi na em i go, long wanem, em i no laik lusim planti mani samting bilong em. Maski em i laikim tru Jehova, em i laikim moa yet mani kago bilong em.
11, 12. (a) Jisas i mekim wanem tok long mani kago? (b) Olsem wanem mani kago inap pasim rot bilong man long mekim wok bilong Jehova?
11 Dispela i kirapim Jisas long mekim wanpela tok, olsem: “Ol maniman bai i hatwok tru long i go insait long kingdom bilong heven. . . . Kamel i laik i go insait long hul bilong nil bilong samap, em i no gat hatwok olsem maniman i laik i go insait long kingdom bilong God.” (Matyu 19:23, 24) Yu ting Jisas i laik tok, i no gat wanpela maniman inap i go insait long Kingdom? Nogat, long wanem, em i tok moa olsem: “God em inap long mekim olgeta samting.” (Matyu 19:25, 26) Tru tumas, Jehova i bin helpim sampela maniman long dispela taim bipo long kamap Kristen God i bin makim ol long holi spirit. (1 Timoti 6:17) Tasol i gat as na Jisas i mekim dispela tok. Em i laik givim tok lukaut long ol Kristen.
12 Sapos man i laikim tumas ol samting bilong em olsem dispela yangpela maniman i mekim, dispela inap pasim rot bilong em long givim bel olgeta long mekim wok bilong Jehova. Dispela inap painim maniman wantaim man “i laikim tumas long kisim planti mani samting.” (1 Timoti 6:9, 10) Sapos man i bilip tumas long mani kago, dispela inap mekim na em i no tingting moa olsem em i mas kisim ol samting bilong spirit. (Matyu 5:3) Olsem na ating em i no pilim moa olsem Jehova i mas helpim em. (Lo 6:10-12) Na ating em bai ting kongrigesen i mas mekim gut tru long em. (Jems 2:1-4) Na em inap lusim bikpela haptaim long kisim amamas long mani bilong em na em i no mekim wok bilong Jehova.
Kisim Stretpela Tingting
13. Ol Laodisia i gat wanem tingting kranki?
13 Wanpela lain i gat tingting kranki long mani kago, em kongrigesen Laodisia long taim bilong ol aposel. Jisas i tokim ol: “Yu save tok olsem, ‘Mi gat planti mani, na mi gat planti samting i stap. Mi no sot long wanpela samting.’ Tasol nogat. Yu stap nogut tru, inap long ol man i ken sori tru long yu. Yu stap rabis tru na yu aipas na yu stap as nating. Na yu yet yu no save long dispela.” I no bikpela mani bilong ol Laodisia i mekim na ol i stap nogut long ol samting bilong spirit, nogat. Ol i bilip long mani bilong ol na ol i no bilip strong long Jehova. Olsem na long ol samting bilong spirit ol i no hat na ol i no kol, na klostu Jisas i ‘trautim ol long maus bilong em.’—KTH 3:14-17.
14. Bilong wanem i stret Pol i givim tok amamas long ol Kristen Hibru?
14 Tasol Pol i givim tok amamas long ol Kristen Hibru long tingting ol i holim taim ol man i bin mekim nogut long ol. Em i tok: “Taim ol i putim sampela bilong yupela long kalabus, yupela i bin sori long ol dispela kalabusman na mekim gut long ol. Na taim ol man i bin pulim ol samting bilong yupela, yupela i amamas i stap na larim ol, long wanem, yupela i save olsem, samting tru bilong yupela i stap yet, na dispela bai i stap oltaim.” (Hibru 10:34) Bel bilong ol i no bagarap taim ol man i kisim ol samting bilong ol. Ol i stap amamas, long wanem, ol i holim strong nambawan gutpela samting bilong ol, em “samting tru . . . na dispela bai i stap oltaim.” Olsem tok piksa bilong Jisas long bisnisman i lusim olgeta samting bilong em bilong baim wanpela bis i gat bikpela pe tru, ol dispela Kristen tu i strong long holimpas bilip bilong ol long Kingdom, maski ol i mas lusim ol samting bilong ol. (Matyu 13:45, 46) Ol i gat gutpela tingting tru!
15. Olsem wanem wanpela meri Kristen long Laibiria i putim ol samting bilong Kingdom i go pas?
15 Planti long nau i kisim wankain gutpela tingting. Olsem: Long Laibiria wanpela yangpela meri Kristen i gat rot bilong stadi long yunivesiti. Long dispela kantri ol man i ting dispela em i rot bilong kisim gutpela sindaun long bihain. Tasol dispela meri i save autim gutnius fultaim, olsem wanpela painia, na ol i bin singautim em long mekim wok painia salim inap liklik taim. Em i laik painim Kingdom pastaim na mekim yet wok bilong God fultaim. Em i go long ples ol i bin makim long em na em i kirapim 21 Baibel stadi insait long 3-pela mun. Dispela yangpela sista na planti tausen moa olsem em, ol i painim Kingdom pastaim, maski ol i lus long kisim sampela gutpela samting bilong skin. Olsem wanem ol inap holim kain gutpela tingting olsem long dispela taim we ol man i strong long painim mani kago? Ol i bin wok strong long kisim ol gutpela pasin. Orait nau yumi ken stori long sampela bilong ol dispela pasin.
16, 17. (a) Bilong wanem yumi mas i gat pasin daun bambai yumi ken bilip strong long Jehova? (b) Bilong wanem yumi mas kisim pasin bilong bilip long ol tok promis bilong God?
16 Pasin Daun: Baibel i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim. Nogut yu ting, save bilong yu yet em i samting tru.” (Sindaun 3:5-7) Taim yumi tingim wok bilong lukautim yumi yet long skin, sampela taim i luk olsem wanpela rot i gutpela moa long bihainim. (Jeremaia 17:9) Tasol Kristen tru i save wetim Jehova i soim rot long em. (Song 48:14) ‘Long olgeta samting em i mekim’—long ol samting bilong kongrigesen, ediukesen o wok mani, malolo, o ol narapela samting—em i mekim pasin daun na i laik kisim tok bilong Jehova long stiaim em.—Song 73:24.
17 Bilip long ol tok promis bilong Jehova: Pol i tok: “Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Sapos yumi no bilip tumas olsem Jehova bai truim ol tok promis bilong em, ating bai yumi ting i stret long givim bel tru long “mekim wok long samting bilong graun.” (1 Korin 7:31) Tasol sapos yumi gat strongpela bilip, bai yumi strong long painim Kingdom pastaim. Olsem wanem yumi ken kisim strongpela bilip? Yumi mas i go klostu long Jehova long rot bilong beten oltaim na stadi. (Song 1:1-3; Filipai 4:6, 7; Jems 4:8) Olsem King Devit, yumi ken beten olsem: “Bikpela, mi save bilip long yu. Mi tok olsem, yu God bilong mi. Yu save mekim gutpela wok tru bilong helpim ol man.”—Song 31:14, 19.
18, 19. (a) Olsem wanem pasin bilong wok strong i helpim yumi long bilip strong moa long Jehova? (b) Bilong wanem Kristen i mas amamas long lusim sampela samting bilong em yet?
18 Wok strong long mekim wok bilong Jehova: Pol i bungim pasin bilong bilip long ol tok promis bilong Jehova wantaim pasin bilong wok strong. Em i tok: “Mipela i laikim tumas bai yupela olgeta i mas wok strong olsem tasol, na holimpas bilip bilong yupela, na wetim dispela taim God i makim bilong mekim gut long yumi.” (Hibru 6:11) Sapos yumi wok strong long mekim wok bilong Jehova, em bai helpim yumi. Taim yumi lukim olsem em i helpim yumi, yumi bilip strong moa long em, na yumi ‘stap strong na i no surik liklik.’ (1 Korin 15:58) Bilip bilong yumi i kisim nupela strong, na yumi bilip strong moa long ol gutpela samting yumi wetim i kamap bihain.—Efesus 3:16-19.
19 Amamas long lusim sampela samting bilong yumi yet: Pol i lusim gutpela wok mani em inap kisim bambai em i ken bihainim Jisas. Samting em i mekim i stret tru, maski sampela taim em i karim hevi long em i sot long samting bilong skin. (1 Korin 4:11-13) Jehova i no bin promis long givim planti samting bilong skin long yumi, na sampela taim ol wokman bilong em i save painim taim nogut. Sapos yumi amamas long lusim sampela samting bilong skin, dispela i kamapim klia olsem yumi tingting strong tru long mekim wok bilong Jehova.—1 Timoti 6:6-8.
20. Man i putim ol wok bilong Kingdom i go pas, bilong wanem em i bikpela samting long em i mas i gat pasin bilong isi na i no ken les kwik?
20 Pasin bilong isi na no ken les kwik: Disaipel Jems i tokim ol wanlain Kristen: “Ol brata, yupela i mas strongim bel bilong yupela na karim ol hevi, na wetim Bikpela i kam bek.” (Jems 5:7) Nau long dispela taim bilong ol man i hariap hariap long mekim ol samting, i hatwok long i stap isi na no ken les kwik. Yumi laik bai ol samting i mas kamap hariap. Tasol Pol i tokim yumi long bihainim pasin bilong ol man “i bilip tru na i no les kwik, na ol i kisim olgeta samting bipo God i tok long givim long ol pikinini bilong em.” (Hibru 6:12) Yumi mas amamas long wetim Jehova. Laip i stap gut oltaim oltaim long Paradais long graun—em wanpela gutpela samting tru bilong wetim!
21. (a) Taim yumi putim ol wok bilong Kingdom i go pas, yumi kamapim klia wanem samting? (b) Long stadi i kamap bihain long dispela, bai yumi toktok long wanem samting?
21 Tru tumas, tok bilong Jisas long yumi mas painim Kingdom pastaim em i gutpela tru long bihainim. Taim yumi mekim olsem, yumi kamapim klia olsem yumi bilip tru long Jehova, na makim dispela rot i gutpela long Kristen i ken bihainim na i stap gut. Tasol Jisas i tok tu olsem yumi mas “wok pastaim long painim . . . stretpela pasin bilong [God].” Long stadi i kamap bihain long dispela, bai yumi stori long as na long nau yumi mas kisim dispela gutpela tok bilong strongim yumi.
Yu Inap Stori Long Dispela?
• Jisas i laik kirapim yumi long kisim wanem stretpela tingting long ol samting bilong skin?
• Tok piksa bilong Jisas long kamel na hul bilong nil bilong samap i givim wanem save long yumi?
• Wanem ol pasin Kristen i helpim yumi long painim pastaim Kingdom Bilong God?
[Piksa long pes 21]
Planti man husat i harim tok bilong Jisas ol i rabisman
[Piksa long pes 23]
Yangpela maniman i laikim God, tasol em i laikim moa yet ol mani kago bilong em
[Piksa long pes 23]
Bisnisman long tok piksa bilong Jisas i lusim olgeta samting bilong em bilong baim wanpela bis i gat bikpela pe tru
[Piksa long pes 24]
Sapos yumi wok strong long mekim wok bilong Jehova, em bai helpim yumi