Mak “Bilong Jehukal”
LONG yia 607 B.C.E., Nebukatnesar, king bilong Kaldia, i go insait long Jerusalem na kukim taun olgeta na bagarapim banis bilong en. Em i holimpas Sedekaia, king bilong Juda, na bagarapim tupela ai bilong em. Na tu, “ol i kilim ol hetman bilong Juda.”—Jeremaia 39:1-8.
Wanpela hetman bilong Juda ating ol Babilon i bin kilim em i dai, em Jehukal, pikinini bilong Selemia. I gat hap stori moa bilong Jehukal, tasol pastaim yumi ken skelim sampela tok Baibel i mekim long Jehukal na ol samting i kamap long taim bilong em.
“Ol Bai i No Inap Daunim Yu”
Jehova i givim wok long profet Jeremaia long autim strongpela tok bilong kot long Juda na Jerusalem. God i tokim Jeremaia olsem ol king bilong Juda wantaim ol pris, hetman, na ol manmeri bilong en bai i “birua long” em. Tasol Jehova i tok: “Ol bai i no inap daunim yu. Long wanem, mi yet mi stap wantaim yu.”—Jeremaia 1:17-19.
Taim ol ami bilong Babilon i banisim Jerusalem, em biktaun bilong Juda, tupela taim King Sedekaia i salim ol man i go long Jeremaia bilong kisim save olsem Nebukatnesar bai lusim Jerusalem o nogat, na long askim profet long beten long dispela samting i mas kamap. Wanpela man king i salim, em Jehukal. Tok bilong God em Jeremaia i givim long ol i olsem: Ol Babilon, olsem ol Kaldia, bai bagarapim Jerusalem olgeta. Ol manmeri i stap yet long Jerusalem ol bai i dai long hangre, bikpela sik, na long bainat. Tasol ol manmeri i lusim taun na i givim ol yet long han bilong ol Babilon, bai ol i abrusim bagarap. Ol hetman bilong Juda i belhat nogut tru long tok bilong Jeremaia!—Jeremaia 21:1-10; 37:3-10; 38:1-3.
Jehukal em wanpela bilong ol hetman i bin tok strong long Sedekaia olsem: “ ‘Jeremaia i mas i dai. Long wanem, em i save daunim strong bilong ol soldia i stap yet long dispela taun.’ Na dispela man nogut Jehukal em wanpela bilong ol man i bin tromoi Jeremaia i go daun long wanpela hul wara i drai pinis na i gat graun malumalum long en, tasol bihain sampela i kam helpim em na pulim em i kam antap. (Jeremaia 37:15; 38:4-6) Jeremaia i bihainim tok bilong Jehova, olsem na em i abrusim bagarap, tasol ating Jehukal i dai taim dispela taun em i bin bilip tru long en i kisim bagarap.
Hap Stori Moa Bilong Em
Ol i painim pinis wanpela hap stori moa bilong Jehukal long Jerusalem long yia 2005. Ol saveman bilong painim ol samting bilong bipo ol i digim graun long hap ol i ting ol bai painim haus bilong King Devit. Tasol ol i painim wanpela samting olsem bikpela haus ol i bin wokim long ston, ol i ting ol Babilon i bin bagarapim taim ol i kisim Jerusalem long taim bilong Jeremaia.
Ol i no save dispela em i haus king bilong Devit o nogat. Tasol dispela lain i save long wanpela samting ol i bin painim—em wanpela liklik samting tru ol i bin wokim long graun na i gat nem bilong man long en, olsem mak bilong em na i stap long pes 14. Dispela mak i bin stap pastaim long wanpela pepa em longtaim tru i bagarap pinis. Dispela mak i gat rait olsem: “Bilong Jehukal, pikinini bilong Selemiahu, em pikinini bilong Sovi.” Yumi ken ting ol i bin wokim dispela mak long wanpela ring o hap ston samting bilong dispela birua bilong Jeremaia, em Jehukal, pikinini man bilong Selemia.
Savemeri bilong painim ol samting bilong bipo, Eilat Mazar, em i bin kamapim mining bilong dispela rait, na em i tok ol i painim pinis nem bilong tupela bikman bilong king, em Jehukal na Gemaria, pikinini man bilong Safan, na nem bilong em i stap long wanpela liklik samting ol i wokim long graun na ol i bin painim long Taun Bilong Devit.a
Tasol i no olsem ol i mas painim wanpela hap ston samting i gat rait long en na bai yumi ken bilip long tok bilong Baibel. Truim bilong ol tok profet bilong God em i as tru na yumi ken bilip long tok bilong Baibel. Ol samting i kamap pinis i kamapim klia olsem tok profet bilong Jeremaia long Jerusalem bai bagarap, em i stret olgeta. Na bagarap i bin painim ol birua bilong Jeremaia i mas strongim bilip bilong yumi, olsem sapos yumi stap gut long God olsem Jeremaia i bin mekim, ol birua bilong yumi ‘bai no inap daunim yumi, long wanem, Bikpela yet i stap wantaim yumi.’
[Futnot]
a Bilong kisim sampela save moa long Gemaria na Safan, lukim stori “Yu Save Long Safan na Famili Bilong Em?” long Wastaua bilong Disemba 15, 2002, pes 19-22.
[Piksa long pes 15]
Jeremaia i no larim ol man i subim em long senisim tok God i bin givim long em
[Piksa Kredit Lain long pes 14]
Gabi Laron/Institute of Archaeology/Hebrew University ©Eilat Mazar