“Em i Save Bringim Mi Long Ol Gutpela Rot”

Stori bilong Olga Campbell

“Wanpela i stap olsem gutpela piksa em i olsem belo i krai bilong ol narapela i ken bihainim em. Yu olsem belo i krai na mi bihainim yu.” Em tok i stap long pas em susa bilong mi Emily i bin raitim bilong tok amamas long mi bin mekim wok bilong God fultaim inap 60 yia. Orait nau mi laik stori long laip bilong mi long taim mi pikinini yet na olsem wanem mi kisim dispela wok mi mekim long laip olgeta bilong mi.

MAMA i karim mi long Janueri 19, 1927. Famili bilong mi i bilong Yukren na ol i sindaun long wanpela fam klostu long Wakaw, Saskatchewan, long hap midwes bilong Kanada. Mi wantaim twin brata bilong mi, Bill, mitupela i namba 6 na 7 pikinini bilong famili i gat 8-pela pikinini. Mipela ol liklik i save helpim papa bilong mipela long mekim wok long fam. Insait long liklik haus bilong mipela, Mama i save lukautim gut mipela maski em i kisim bikpela pen long sik atraitis, em bihain dispela sik i bin kilim em i dai. Em i gat 37 krismas tasol taim em i dai, na mi gat 4-pela krismas tasol.

Sikspela mun bihain long Mama i dai, Papa i marit gen. Papa na nupela mama i kamapim 5-pela pikinini meri, na i no longtaim na pasin bilong kros i kamap insait long famili! Mi traim long soim rispek long dispela nupela mama, tasol bikbrata bilong mi John i hatwok long mekim olsem.

Long 1938 samting, mitupela Bill i stap long komiuniti skul, na long dispela rot mipela inap abrusim planti hevi i kamap long famili. Klostu tru Wol Woa 2 i laik kirap na pasin bilong litimapim kantri i go bikpela tru. Nupela tisa bilong mipela i kamapim pasin bilong salut long fleg, na wanpela gel i no laik mekim olsem. Ol sumatin i sutim planti kain kain tok nogut long em. Tasol mi laikim pasin bilong em long sanap strong na mi askim em long as na em i no salut long fleg. Em i tok em i wanpela Sumatin Bilong Baibel, em nem bilong ol Witnes Bilong Jehova long dispela taim, na em i save aninit long God wanpela tasol.​—Kisim Bek 20:​2, 3; Aposel 5:29.

Mi Lusim Famili

Long 1943, mi kisim wok long biktaun Prince Albert, em wok bilong putim ol samting i go antap long ol trak na karim ol katon bilong dring. Mi gat laik tru long kisim ol stiatok i kam long God na mi baim wanpela Baibel, tasol mi hatwok tru long kisimgut ol tok bilong en na dispela i mekim mi bel hevi na mi krai. Mi no gat save tru long Baibel, mi save long Beten Bilong Bikpela tasol.​—Matyu 6:​9-​13.

Mama bilong haus mi stap long en, em meri bilong lotu na long wanpela Sande em i amamas tru long stori olsem em i bin rausim wanpela “Baibel meri” long haus. Mi tingting ‘Olsem wanem em i mekim dispela pasin i no stret?’ Sampela Sande bihain, mi sik so mi no go lotu na mi stap long haus. Long dispela de, dispela “Baibel meri” i kam bek.

Em i askim mi: “Yu save beten?”

Mi tok: “Mi save mekim dispela Beten Bilong Bikpela.”

Em i kamapim gut insait bilong ol tok bilong Jisas, na mi harim gut tru. Em i tok em bai i kam bek long Trinde long wik bihain.

Taim mama bilong haus i kam bek long haus, mi amamas na stori long em long dispela “Baibel meri,” em wanpela Witnes Bilong Jehova. Mi bel hevi tru taim mama bilong haus i tok: “Sapos em i kam bek long Trinde, bai mi rausim yutupela wantaim long haus!”

Mi go raun long hap mipela i stap long en na wok long painim dispela Witnes, na mi kisim save olsem dispela meri em Misis Rampel. Taim mi painim em pinis, mi stori long hevi bilong mi na mi askim em long stori long olgeta samting bilong Baibel. I olsem mipela i stori long Baibel olgeta, kirap long Stat i go long Kamapim Tok Hait! Em i stori long taim nau yumi stap long en i olsem taim bilong Noa, taim God i pinisim tru ol man nogut na kisim bek Noa na famili bilong em na bringim ol i go insait long klinpela graun.​—Matyu 24:​37-​39; 2 Pita 2:5; 3:​5-7, 12.

Mipela i stori inap longpela taim na bihain Misis Rampel i tok: “Mi inap lukim olsem yu kisim ol dispela tok bilong Baibel olsem tok i tru. Bihain long tupela wik bai i gat wanpela kibung bilong ol Witnes Bilong Jehova na ating i gutpela yu kisim baptais.” Long dispela nait mi no slip na mi wok long tingting long dispela olgeta samting mi bin lainim. Baptais em wanpela bikpela samting tru. Tasol mi laik mekim wok bilong God! Maski save bilong mi long Baibel i no bikpela tumas, mi kisim baptais long Oktoba 15, 1943, taim mi gat 16 krismas.

Mi Go Long Hap Is Bilong Kanada

Long Novemba, bikbrata bilong mi Fred i askim mi long mekim wok hausmeri long wanpela haus i gat 3-pela plua we em i stap long en, long biktaun Toronto long hap is bilong Kanada. Mi orait long dispela, long wanem, mi ting long dispela hap bai mi stap fri long lotuim Jehova. Paslain long mi lusim ples mi stap long en, mi go lukim bikpela susa bilong mi Ann, husat i sindaun yet long Saskatchewan, long wanpela ples i stap klostu. Em i gat wanpela samting bilong tokim mi​—em wantaim bikpela susa bilong mipela Doris, tupela wantaim i kirap stadi long Baibel wantaim ol Witnes Bilong Jehova na em i kirapim mi long mekim olsem tu. Mi tokim em long samting mi bin mekim​—mi wanpela Witnes i baptais pinis!

Mi wantaim liklik susa bilong mi Emily i kisim tren i go long Toronto. Bill i bungim mipela long tren stesin na kisim mipela i go long haus we em yet, Fred, na John, i save stap long en. Mi askim Fred long husat moa i stap long dispela haus. Em i tok: “Yu no inap bilipim dispela tok, yu tingim Alex Reed, dispela man long ples bilong yumi? Em i stap long plua antap, na tingim, man ya i laik harim tok bilong ol Sumatin Bilong Baibel!” Mi amamas tru.

Mi wokabaut isi isi tru i go antap na pasim tok wantaim Alex long go wantaim em long miting long dispela nait. Mi laik go wantu long miting na bai ol brata bilong mi i no ken traim long pasim mi. I no longtaim bihain, mi kirap autim tok long namba wan taim, maski mi no bin kirap yet long stadi gut long Baibel. Mi amamas long toktok wantaim planti manmeri bilong Yukren long tok ples bilong ol, em mi bin lainim taim mi liklik.

Bill i save amamas long ritim Wastaua, em planti taim mi save putim long rum bilong em. Bihain long em i go sindaun long British Columbia long hap wes bilong Kanada, mi salim sabskripsen bilong Wastaua long em olsem presen. Maski em i no man bilong toktok tumas, em i raitim wanpela pas i gat 10-pela pes long mi na em i kamapim tok tenkyu bilong em. Bihain, em i dediketim laip bilong em long Jehova na kamap wanpela wasman Kristen i givim bel long mekim wok. Olsem na mi amamas tru long 5-pela bratasusa bilong mi​—Bill, Ann, Fred, Doris, na Emily​—ol i wokman bilong Jehova i dediket pinis!

Long Me 22, 1945, gavman bilong Kanada i pinisim tambu long wok bilong ol Witnes Bilong Jehova.a Mi no bin save olsem gavman i bin tambuim wok bilong mipela inap long taim mi harim dispela toksave. Mi na pren bilong mi, Judy Lukus, i pasim tok long mekim wok painia long hap is bilong Quebec we ol i save mekim tok Frans. Taim tupela susa bilong mi Doris na Emily i harim samting mipela i laik mekim, ol tu i pasim tok long mekim wok painia long Vancouver, long British Columbia, em long hap wes bilong kantri.

Ol i Birua Long Ol Witnes Long Quebec

Taim mi go sindaun long Quebec, i no olsem mi senisim ples tasol, nogat. Ol man i birua tru long wok autim tok bilong ol Witnes long dispela hap.b Mipela i amamas long insait long wok bilong tilim liklik nius Quebec’s Burning Hate for God and Christ and Freedom Is the Shame of All Canada. Dispela strongpela tok i kamapim ples klia pasin birua ol misin i mekim long ol Witnes.

Inap 16 de, mipela i kirap bikmoning long 2 klok na isi tasol mipela i putim ol liklik nius aninit long dua bilong ol haus. Long wanpela haus mipela i kisim save olsem polis i wok long kam bilong holim mipela. Mipela i hait long wanpela liklik rot namel long ol haus na polis i no lukim mipela. Long de bihain, mipela i go bek gen long ol rot na tilim ol Wastaua na Kirap! Long ol mun i kam i go, polis i arestim mipela planti taim tru. Bilong redi long stap long kalabus sapos polis i holim mi, long olgeta taim mi karim wantaim mi tit bras na pensil bilong penim ai.

Long Novemba 1946, Nathan Knorr, em man i go pas long lukautim wok bilong ol Witnes long olgeta hap bilong graun, em i kam long Brooklyn, New York. Em i singautim 64 bilong mipela ol painia long Quebec long insait long namba 9 klas bilong Wastaua Baibel Skul Bilong Gileat long South Lansing, New York. Long dispela skul, inap 5-pela mun mipela i kisim ol gutpela save tru bilong Baibel. Taim mipela i grediuet long Ogas 1947, ol i salim mipela i go long ol taun bilong Quebec bilong kirapim ol nupela kongrigesen.

Wok Autim Tok i Karim Kaikai

Ol i salim mipela 4-pela yangpela meri i go long biktaun Sherbrooke. Mipela i givim bel tru long lain long mekim tok ples Frans, na lainim na kolim kolim planti taim ol tok taim mipela i wokabaut i go i kam long ol hap bilong autim tok. Sampela taim long belo mipela i no gat mani bilong baim kaikai, olsem na mipela i go long haus na stadi. Poroman bilong mi, Kay Lindhorst i save gut long ol lo bilong tok ples. Em i lainim mi pastaim long lo bilong tok Inglis na bai mi ken kliagut long ol lo bilong tok Frans.

Wanpela gutpela samting tru i kamap long wok painia bilong mi long Victoriaville, em wanpela taun i gat olsem 15,000 manmeri. Wan wan man tasol i save mekim tok Inglis, olsem na em i gutpela ples tru bilong mipela i ken lain gut long mekim tok Frans. Namba wan wik bilong mipela long dispela hap i gutpela tru. Olgeta hap mipela i go long en, ol man i kisim ol buk na nius bilong mipela. Taim mipela i kam bek, ol i pasim olgeta dua na ol keten bilong windo. Wanem samting i bin kamap?

Wanpela pris i save stap long dispela hap i tokim ol manmeri long ol i no ken harim tok bilong mipela. Olsem na taim mipela i go long haus bilong ol man long autim tok, ol pikinini i wok long bihainim mipela na tromoi ston na ais long mipela. Tasol maski i olsem, planti manmeri i hangre tru long harim tok bilong Baibel. Pastaim ol i larim mipela i go visitim ol long nait, tasol taim ol i wok long lain gut long ol tok bilong Baibel, ol i stadi long ai bilong ol narapela maski ol neiba bilong ol i no amamas long ol i mekim olsem.

Long 1955 samting, mi wantaim susa bilong mi i go bek raun long Wakaw. Mipela i kamapim ekspiriens bilong wok autim tok bilong mipela long wanpela miting bilong kongrigesen. Bihain brata i lukautim miting i tokim mipela: “Mama bilong yutupela bai i amamas tru taim em i kirap bek na kisim save olsem ol pikinini bilong em i kamap Witnes Bilong Jehova!” Em i tok Mama i bin stadi long Baibel wantaim ol Witnes paslain long em i dai. Aiwara bilong mipela i pundaun taim mipela i kisim save olsem Mama i bin kisim save long ol tok i tru bilong Baibel, na em bai stori long mipela long ol dispela tok sapos em i no bin dai.

Marit na Mekim Wok Wantaim

Long 1956, mi bungim Merton Campbell, wanpela Witnes husat i bin stap 27 mun long kalabus long taim bilong Wol Woa 2, long wanem, em i no laik insait long pait. Klostu 10-pela yia em i bin mekim wok long hetkota bilong ol Witnes Bilong Jehova long Brooklyn. Merton i gat planti gutpela pasin em i bin kisim taim em i bin stadi long Baibel, na mi luksave olsem em inap stap gutpela man marit. Mipela i raitim pas i go i kam inap sampela mun, na pasin bilong mitupela long rispek na tingim tru narapela i kamapim pasin laikim namel long mitupela.

Mi na Merton i marit long Septemba 24, 1960. Man! Em wanpela gutpela blesing tru long stap 47 yia wantaim wanpela man i save bihainim tru ol tok bilong Baibel! Merton i bin mekim wok long Dipatmen Bilong Wok Autim Tok inap 58 yia​—dispela dipatmen i save helpim na stiaim ol wok bilong ol kongrigesen long olgeta hap bilong Amerika. Winim 30 yia, mi mekim wok bilong bilasim ol rum bilong ol visita long Brooklyn, na bihain mi kisim wok bilong bilasim ol bikpela Haus Kibung long hap bilong New York. Long 1995, ol i salim mi na Merton i go sindaun long Wastaua Ediukesen Senta long Patterson, em i stap longwe long New York inap 110 kilomita long hap not.

Taim mi gat 12-pela krismas na mi bin lusim famili, mi no ting bai mi stap namel long kain bikpela famili em ol bratasista bilong kongrigesen, na ol brata na susa bilong mi tu i insait long en. Mi wetim tru nupela taim God i bin promis long kamapim, we mipela i ken bung wantaim Mama na stori wantaim em long ol samting i bin kamap taim em i slip​—na moa yet long ol samting God Jehova i bin mekim bilong helpim mipela ol pikinini long kisim save long Em. Mipela i amamas tru olsem Jehova i bin bringim mipela long “ol gutpela rot.”​—Song 23:3.

[Ol Futnot]

[Piksa long pes 27]

Papamama na haus mipela i bin stap long en wantaim 7-pela bratasusa bilong mi

[Piksa long pes 29]

Mi wantaim ol poroman bilong mi long wok autim tok long Ottawa, 1952

[Piksa long pes 29]

Mi wantaim ol bratasusa bilong mi (han kais i go han sut) Ann, Mary, Fred, Doris, John, mi, Bill, na Emily

[Piksa long pes 29]

Mi wantaim Merton long nau