Ol Pasin Em Yumi Mas Wok Long Kisim

“Wok long kisim stretpela pasin na pasin tru bilong God na pasin bilong bilip tru na pasin bilong laikim tru ol arapela na pasin bilong sanap strong na karim olgeta hevi na pasin bilong isi long ol manmeri.”​​—⁠1 TI. 6:11.

 1. Wanem sampela samting em planti man i wok strong long kisim?

WANEM sampela samting em planti man long nau i wok long kisim? Olsem Baibel i tok, planti man i wok long kisim ol samting i no inap helpim tru ol. Sampela i “laikim tumas long kisim mani,” ol i ting planti mani kago em i rot bilong stap amamas. Na sampela i “laikim tumas ol kain kain pasin bilong amamas bilong dispela graun” na dispela i kamap nambawan samting long laip bilong ol. (2 Ti. 3:​2, 4) Ol i wok strong long kisim ol dispela samting, tasol i olsem ol i wok long “holimpas win.”​—⁠Sav. 1:⁠14.

 2. (a) Wanem prais em God i bin singautim sampela Kristen long wok long kisim? (b) Jehova i givim rot long ol narapela Kristen long nau long kisim wanem samting?

² Orait nau yumi ken tingim samting aposel Pol i wok strong long kisim: “Mi save ran strong bilong kamap long mak na kisim prais. Dispela prais em i olsem. Long wok bilong Krais Jisas, God i singautim mi bilong i go antap na i stap gut tru wantaim em.” (Fl. 3:​14) Baibel i tok 144,000 Kristen, wanpela bilong ol em Pol, bai kisim dispela prais, em laip long heven. Ol bai wok wantaim Jisas Krais long bosim graun long Taim Bilong Wan Tausen Yia. Em wanpela gutpela prais tru God i bin singautim ol long wok strong long kisim! Tasol ol narapela trupela Kristen long nau, ol i wet long kisim narapela kain prais. Jehova i givim rot long ol long kisim samting em Adam na Iv i bin lusim, em laip i stap gut oltaim oltaim long wanpela paradais hia long graun.​​—⁠KTH 7:​4, 9; 21:​1-4.

 3. Yumi ken mekim wanem bilong soim olsem yumi tenkyu tru long marimari bilong God?

³ Maski ol sinman i wok long mekim ol samting i stret, ol i no inap kisim laip oltaim long dispela rot. (Ais. 64:⁠6) Bilong kisim laip oltaim, ol i mas bilip long samting God i bin mekim bilong kisim bek ol long rot bilong Jisas Krais. Yumi ken mekim wanem bilong soim olsem yumi tenkyu tru long dispela marimari bilong God? Wanpela samting yumi ken mekim i olsem: “Wok long kisim stretpela pasin na pasin tru bilong [“givim bel long,” NW ] God na pasin bilong bilip tru na pasin bilong laikim tru ol arapela na pasin bilong sanap strong na karim olgeta hevi na pasin bilong isi long ol manmeri.” (1 Ti. 6:​11) Taim yumi skelim ol dispela pasin, dispela bai helpim yumi olgeta wan wan long bihainim “moa moa yet” ol dispela pasin.​​—⁠1 Te. 4:⁠1.

“Wok Long Kisim Stretpela Pasin”

 4. Olsem wanem yumi ken save olsem wok bilong kisim “stretpela pasin” em i bikpela samting? Wanem sampela samting ol man i mas mekim pastaim?

⁴ Long tupela pas aposel Pol i raitim long Timoti, em i kamapim lista bilong ol pasin ol Kristen i mas wok long kisim, na long tupela lista, em i kolim “stretpela pasin” pastaim. (1 Ti. 6:​11; 2 Ti. 2:​22) I gat sampela narapela skripsa tu i kirapim yumi long bihainim stretpela pasin. (Snd. 15:9; 21:21; Ais. 51:⁠1) Bilong mekim olsem, pastaim ol man i mas kisim “save long . . . God tru . . . [na] Jisas Krais.” (Jo. 17:⁠3) Na taim ol i wok long kisim stretpela pasin, dispela bai kirapim ol long hevi long ol rong ol i bin mekim bipo, na baut, na bai ol i ken mekim laik bilong God.​​—⁠Ap. 3:​19.

 5. Yumi mas mekim wanem na bai yumi ken stap gut long ai bilong God?

⁵ Planti milion manmeri i wok long kisim stretpela pasin ol i bin dediketim laip bilong ol long Jehova na kisim baptais long wara bilong makim dispela samting. Sapos nau yu wanpela Kristen i baptais pinis, yu ting wokabaut bilong yu i kamapim klia olsem yu wok yet long kisim stretpela pasin? Wanpela samting yu mas mekim bilong wok yet long kisim stretpela pasin i olsem: Taim yu mekim ol bikpela disisen, yu mas skelim Baibel bilong save “wanem ol pasin i gutpela na wanem ol pasin i nogut.” (Ritim Hibru 5:​14.) Olsem: Sapos yu wanpela Kristen singel na yu inap marit, orait olsem wanem? Yu gat strongpela tingting long yu no ken prenim wanpela husat i no Kristen i baptais pinis? Sapos yu wok long kisim stretpela pasin, bai yu bihainim tingting olsem.​​—⁠1 Ko. 7:​39.

 6. Bilong bihainim tru stretpela pasin, yumi mas mekim wanem?

⁶ Bilong stap olsem man i mekim stretpela pasin, man i no ken tingim em yet i stretpela man o “strong tumas long bihainim stretpela pasin,” nogat. (Sav. 7:​16) Jisas i tok yumi mas was gut, nogut yumi kamapim stretpela pasin bilong yumi bilong pulim ai bilong ol narapela na bai ol i ken ting yumi gutpela man, winim ol narapela. (Mt. 6:⁠1) Bilong bihainim tru stretpela pasin, yumi mas lusim ol tingting na laik nogut. Sapos yumi wok long mekim olsem, ating bai yumi no mekim ol bikpela rong. (Ritim Sindaun 4:​23; skelim Jems 1:​14, 15.) Na tu, Jehova bai orait long yumi na helpim yumi long kisim ol narapela bikpela pasin Kristen.

‘Wok Long Kisim Pasin Tru Bilong Givim Bel Long God’

 7. ‘Pasin tru bilong givim bel long God’ i makim wanem samting?

⁷ Pasin bilong givim bel tru long God em pasin we man i dediket tru long God na i stap gut long em. Wanpela dikseneri bilong Baibel i stori olsem, tok Grik ol i tanim “givim bel tru long God” em i makim “pasin bilong pret long God.” Planti taim ol Israel i no kamapim pasin bilong givim bel tru long God​—⁠ol i save bikhet long em, maski em i bin kisim bek ol long Isip.

 8. (a) Sin bilong Adam i mekim na wanem askim i kamap? (b) Bekim bilong dispela “tok hait” i kamap ples klia olsem wanem?

⁸ Inap planti tausen yia bihain long gutpela man Adam i bin mekim sin, i no gat bekim bilong dispela askim, “I gat wanpela man bilong graun inap bihainim tru pasin bilong givim bel long God?” Insait long dispela haptaim, i no gat wanpela sinman inap bihainim tru pasin bilong givim bel long God. Tasol long taim Jehova i makim, em i kamapim bekim bilong dispela “tok hait.” Em i kisim laip bilong Pikinini bilong em long heven na putim long bel bilong Maria na em i kamap man bilong graun i gutpela olgeta. Long ol samting Jisas i mekim hia long graun, na dai bilong em tu olsem wanpela man nogut, Jisas i kamapim long ples klia pasin bilong dediket tru long God na stap gut long em. Ol beten bilong em i kamapim klia olsem em i daun tru long gutpela Papa bilong em long heven. (Mt. 11:25; Jo. 12:​27, 28) Long dispela as, Jehova i kirapim Pol long stori long “pasin bilong givim bel tru long God” long taim em i stori long i stap bilong Jisas long graun.​​—⁠Ritim 1 Timoti 3:​16.a

 9. Olsem wanem yumi inap wok long kisim pasin bilong givim bel tru long God?

⁹ Yumi gat sin, olsem na yumi no inap bihainim tru pasin bilong givim bel long God. Tasol yumi inap wok long bihainim dispela pasin. Bilong mekim olsem, yumi mas bihainim pasin bilong Krais inap tru long skel bilong yumi. (1 Pi. 2:​21) Long dispela rot bai yumi no wankain olsem ol man bilong tupela maus em ol i “bihainim pasin bilong God long skin tasol.” (2 Ti. 3:⁠5) Tasol dispela i no makim olsem yumi no ken tingim lukluk bilong yumi long ai bilong ol man, nogat. Bilong givim bel tru long God, yumi mas tingim tu lukluk bilong yumi. Olsem: Taim yumi laik makim klos bilong werim, olsem weding dres o klos bilong werim taim yumi raun long ol stua, oltaim lukluk bilong yumi i mas stret olsem man o meri i “bihainim tok bilong God.” (1 Ti. 2:​9, 10) Yes, bilong givim bel tru long God, yumi mas bihainim ol stretpela lo bilong God long olgeta samting yumi mekim.

“Wok Long Kisim . . . Pasin Bilong Bilip Tru”

10. Yumi mas mekim wanem bilong holimpas strongpela bilip?

¹⁰ Ritim Rom 10:17. Bilong kisim na holimpas strongpela bilip, Kristen i mas wok long tingim tingim ol gutpela tok i tru i stap long Tok Bilong God. “Wokboi i gat gutpela tingting” i bin kamapim planti gutpela buk. Tripela gutpela buk em Nambawan Man Tru i Winim Olgeta Narapela Man, Kisim Skul Long Bikpela Tisa, na “Come Be My Follower,” em ol buk bilong helpim yumi long save gut moa long Krais na bihainim pasin bilong em. (Mt. 24:​45-​47) Na tu, dispela lain wokboi i save stretim rot bilong mekim ol miting na kibung, em planti ol i kamapim ‘tok bilong Krais.’ Olsem wanem? Yu luksave long sampela samting moa yu ken mekim bilong “holim strong long tingting” ol gutpela samting i kam long God?​​—⁠Hi. 2:⁠1.

11. Olsem wanem pasin bilong beten na bihainim tok inap helpim yumi long kisim strongpela bilip?

¹¹ Beten em i narapela samting bilong strongim bilip. Wanpela taim ol disaipel i askim Jisas: “Yu mas mekim bilip bilong mipela i kamap bikpela moa.” Long pasin daun, yumi ken askim God long wankain samting. (Lu. 17:⁠5) Bilong bilip bilong yumi i ken kamap bikpela moa, yumi mas beten askim God long givim holi spirit long yumi​—⁠bilip em wanpela pasin holi spirit i ‘save kirapim ol man long mekim.’ (Ga. 5:​22) Pasin bilong bihainim tok bilong God, dispela tu i save strongim bilip bilong yumi. Olsem: Ating yumi laik mekim bikpela wok moa bilong autim tok. Sapos yumi mekim olsem, dispela bai givim bikpela amamas long yumi. Na taim yumi tingim ol gutpela samting i kamap long rot bilong “painim kingdom bilong God [pastaim] wantaim stretpela pasin bilong em,” bilip bilong yumi bai kamap strong moa.​​—⁠Mt. 6:​33, Nupela Testamen na Ol Sam.

“Wok Long Kisim . . . Pasin Bilong Laikim Tru Ol Arapela”

12, 13. (a) Wanem nupela lo Jisas i givim long yumi? (b) Wanem sampela bikpela samting i makim olsem yumi bihainim pasin bilong Krais na laikim tru ol arapela?

¹² Ritim 1 Timoti 5:​1, 2. Pol i stori long ol samting ol Kristen i ken mekim bilong soim olsem ol i laikim tru ol wanbilip. Bilong givim bel tru long God, yumi mas bihainim tu nupela lo Jisas i givim long ol disaipel long “laikim tru ol arapela” olsem em i bin laikim tru yumi. (Jo. 13:34) Aposel Jon i tok: “Sapos wanpela man i gat ol samting bilong dispela graun, na em i lukim narapela brata i sot long ol samting, na sapos em i no sori long dispela brata, orait yumi save, pasin bilong God bilong laikim tru ol arapela, em i no i stap long dispela man.” (1 Jo. 3:​17) Olsem wanem? Yu inap tingim sampela taim we yu bin kamapim pasin laikim na helpim brata bilong yu?

¹³ Na tu, yumi wok long kisim pasin bilong laikim tru ol arapela taim yumi fogivim ol brata bilong yumi​—⁠yumi no bel nogut long ol na tingim tingim rong bilong ol, nogat. (Ritim 1 Jon 4:​20.) Yumi bihainim dispela tok: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.” (Kl. 3:​13) Olsem wanem? I gat wanpela long kongrigesen em yu inap mekim dispela pasin long em? Bai yu fogivim em?

“Wok Long Kisim . . . Pasin Bilong Sanap Strong na Karim Hevi”

14. Yumi kisim wanem skul long kongrigesen long Filadelfia?

¹⁴ Ating i no hatwok tumas long taitim bun inap sotpela taim bilong winim wanpela mak. Tasol taim i gat hatwok long winim wanpela mak o dispela mak i stap longwe tru, dispela i hatwok moa. Olsem na bilong kamap long mak bilong kisim laip oltaim, yumi mas i gat pasin bilong sanap strong na karim hevi. Bikpela Jisas i tokim kongrigesen long Filadelfia: “Yu bin bihainim tok bilong mi, na yu bin sanap strong long olgeta hevi i kamap long yu. Olsem na bai mi lukautim yu, na dispela traim i laik kamap . . . em i no ken kamap long yu.” (KTH 3:​10) Yes, Jisas i lainim yumi olsem yumi mas sanap strong​—⁠em wanpela pasin bilong helpim yumi long no ken givap taim ol hevi na traim i painim yumi. Ol brata long kongrigesen bilong Filadelfia ol i bin sanap strong na winim ol hevi i traim bilip bilong ol. Olsem na Jisas i tok promis long em bai helpim ol long winim wanpela bikpela traim i laik painim ol bihain.​​—⁠Lu. 16:⁠10.

15. Jisas i tok wanem long pasin bilong sanap strong na karim hevi?

¹⁵ Jisas i save olsem ol wanblut na ol narapela i no bilip ol bai birua long ol disaipel bilong em, olsem na inap tupela taim em i strongim bel bilong ol olsem: “Ol manmeri i stap strong inap long las de, God bai i kisim bek ol.” (Mt. 10:22; 24:13) Na tu, Jisas i tokim ol disaipel long samting ol i mas mekim bilong sanap strong long kain taim olsem. Long wanpela tok piksa, Jisas i tok graun i gat ston i olsem ol man i ‘harim tok bilong God na amamas long en,’ tasol taim ol samting i kamap bilong traim bilip bilong ol, ol i surik na lusim God. Tasol ol gutpela disaipel ol i olsem gutpela graun, ol i “holimpas” tok bilong God na ‘stap strong na karim kaikai i stap.’​​—⁠Lu. 8:​13, 15.

16. Wanem gutpela samting i bin helpim planti milion manmeri long sanap strong?

¹⁶ Yu lukim samting Jisas i tok yumi mas mekim bilong sanap strong? Yumi mas “holimpas” tok bilong God, dispela tok i mas stap strong long bel na tingting bilong yumi. Sapos yumi tingim tingim wanpela hap bilong Tok Bilong God long olgeta de, dispela bai helpim yumi long “stap strong” na karim kaikai i stap.​​—⁠Sng. 1:​1, 2.

“Wok Long Kisim . . . Pasin Bilong Isi Long Ol Manmeri” na Pasin Bilong Bel Isi

17. (a) Bilong wanem “pasin bilong isi long ol manmeri” i bikpela samting? (b) Jisas i mekim wanem bilong soim olsem em i gat pasin isi?

¹⁷ Yumi no amamas long narapela i sutim tok long yumi olsem yumi bin mekim wanpela tok o pasin em yumi no bin mekim. Planti man, taim narapela i sutim tok giaman long ol, ol i save belhat na bekim tok strong olsem ol i no bin mekim dispela samting. Tasol mobeta ol i mekim “pasin bilong isi”! (Ritim Sindaun 15:⁠1.) Man i mas bosim gut bel na bai em inap bekim tok isi long narapela i sutim tok giaman long em. Jisas i stap gutpela piksa tru long dispela samting. “Ol i bin tok nogut long em, tasol em i no bekim tok nogut bilong ol. Em i karim pen, tasol em i no tok long bagarapim ol. Nogat. Em i putim em yet long han bilong God, em dispela Jas i save skelim stret olgeta samting.” (1 Pi. 2:​23) Tru, yumi no inap bihainim tru pasin bilong isi long narapela olsem Jisas i bin mekim, tasol olsem wanem? Yumi inap kamapim moa yet dispela pasin?

18. (a) Pasin bilong isi long narapela inap kamapim wanem gutpela samting? (b) Wanem narapela pasin Baibel i kirapim yumi long kisim?

¹⁸ Sapos ‘ol i askim yumi long as’ bilong ol samting yumi bilip long en, orait olsem Jisas, yumi mas “redi oltaim long bekim tok long ol long tok isi na long gutpela pasin.” (1 Pi. 3:​15, 16) Yes, sapos yumi gat pasin bilong isi long narapela, dispela inap mekim na taim yumi no wanbel long tingting bilong narapela, olsem ol wanlotu o ol man yumi bungim long wok autim tok, bai yumi no kros na tok pait. (2 Ti. 2:​24, 25) Pasin bilong isi long narapela i save helpim yumi long stap bel isi. Ating long dispela as, taim Pol i raitim namba 2 pas long Timoti na kolim ol pasin yumi mas wok long kisim, em i kolim tu “pasin bilong bel isi.” (2 Ti. 2:​22; skelim 1 Timoti 6:​11.) Yes, “bel isi” em i narapela pasin Baibel i kirapim yumi long wok long kisim.​​—⁠Hi. 12:14; Sng. 34:⁠14.

19. Yumi stori pinis long 7-pela pasin Kristen, na nau yu tingting strong long mekim wanem? Bilong wanem yu laik mekim olsem?

¹⁹ Yumi bin stori long 7-pela pasin Kristen em Baibel i kirapim yumi long kisim​​—⁠stretpela pasin, givim bel tru long God, bilip tru, laikim tru narapela, sanap strong na karim hevi, isi long narapela, na bel isi. Em i gutpela samting tru taim ol bratasista long olgeta kongrigesen i wok long kamapim moa yet ol dispela gutpela pasin! Dispela bai givim biknem long Jehova na larim em i stretim pasin bilong yumi long litimapim nem bilong em.

[Futnot]

Sampela Tok Bilong Tingim Gut

• Olsem wanem yumi inap wok long kisim stretpela pasin na pasin bilong givim bel tru long God?

• Wanem samting bai helpim yumi long kisim pasin bilong bilip tru na pasin bilong sanap strong na karim hevi?

• Pasin laikim i mas kirapim yumi long mekim wanem long narapela?

• Bilong wanem yumi mas wok long kisim pasin bilong isi long narapela na bel isi?

[Piksa long pes 12]

Jisas i tok yumi no ken mekim stretpela pasin bilong pulim ai bilong ol narapela tasol

[Piksa long pes 13]

Long rot bilong tingim tingim ol tok i tru i stap long Tok Bilong God, yumi inap wok long kisim pasin bilong bilip tru

[Piksa long pes 15]

Yumi inap wok long kisim pasin bilong laikim tru ol narapela na isi long ol