Baptais Long Nem Bilong Husat na Long Nem Bilong Wanem Samting?
“Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit.”—MT. 28:19.
1, 2. (a) Wanem samting i kamap long Jerusalem long Pentikos 33 C.E.? (b) Wanem samting i kirapim planti manmeri long kisim baptais?
JERUSALEM i pulap long ol manmeri i kam long planti narapela narapela hap. Long de Pentikos 33 C.E., wanpela bikpela bung i kamap na planti manmeri i insait long en. Tasol wanpela narakain samting i kamap, na bihain long en aposel Pita i mekim wanpela tok we i kirapim tru bel bilong planti manmeri. Inap olsem 3,000 Juda na ol man i bihainim lotu Juda ol i pilim tru tok bilong em, na ol i tanim bel na kisim baptais long wara. Na long dispela rot ol tu i kam insait long nupela kongrigesen Kristen. (Ap. 2:41) Planti manmeri i wok long kisim baptais long ol wara i stap long hap bilong Jerusalem, na ating dispela i mekim na ol man i go i kam na mekim bikpela nois!
2 Wanem samting i kirapim planti manmeri long kisim baptais? Long dispela de, “wanpela nois i kam long heven, em i olsem krai bilong strongpela win.” Inap olsem 120 disaipel bilong Jisas ol i bung long wanpela rum antap long haus, na holi spirit i kam daun long ol. Bihain long dispela, ol lotu manmeri ol i kam bung na ol i kirap nogut long harim ol disaipel i “mekim tok long ol kain kain tok ples.” Taim ol i harim pinis tok bilong Pita, na tok bilong em long indai bilong Jisas, “dispela tok i sutim tru bel bilong ol.” Ol i mas mekim wanem? Pita i tok: “Yupela olgeta wan wan i mas tanim bel na kisim baptais long nem bilong Jisas Krais, . . . na bai God i givim Holi Spirit long yupela.”—Ap. 2:1-4, 36-38.
3. Long de Pentikos, ol lain i tanim bel, em ol Juda na ol man husat i bihainim lotu Juda, ol i mas mekim wanem?
3 Ol Juda na ol man i bihainim lotu Juda, em ol i bin harim tok bilong Pita, olsem wanem long pasin bilong ol long lotu? Ol i bin orait long lotuim Jehova olsem God bilong ol. Na long rot bilong Ol Skripsa Hibru, ol i save long wok bilong holi spirit—em strong bilong God, na em i bin yusim dispela strong long taim em i wokim ol samting na bihain long en. (Stt. 1:2; Het. 14:5, 6; 1 Sml. 10:6) Tasol ol dispela samting tasol i no inap. Ol i mas kliagut na bilip long rot bilong God long kisim bek ol manmeri—dispela rot em Mesaia, Jisas. Olsem na Pita i kamapim klia olsem ol i mas “kisim baptais long nem bilong Jisas Krais.” Sampela de paslain, Jisas husat i kirap bek pinis, em i tokim Pita na ol arapela long baptaisim ol man “long nem bilong Papa na bilong Pikinini na bilong Holi Spirit.” (Mt. 28:19, 20) Dispela tok i gat bikpela mining long taim bilong ol aposel, na i wankain long nau tu. Wanem mining bilong en?
Long Nem Bilong Papa
4. Wanem senis i kamap long ol manmeri em ol i bin pas gut wantaim Jehova?
4 Ol manmeri husat i bihainim tok bilong Pita, ol i lotuim Jehova long pastaim yet na ol i pas gut wantaim em. Ol i bin wok strong long bihainim Lo bilong em, olsem na ol i lusim ol longwe ples na kam long Jerusalem. (Ap. 2:5-11) Tasol long dispela taim stret God i kamapim wanpela bikpela senis. Em i sakim ol Juda na ol i no stap moa olsem lain stret bilong em; pasin bilong bihainim Lo i no stap moa olsem rot bilong God i ken orait long ol. (Mt. 21:43; Kl. 2:14) Sapos ol i laik pas gut yet wantaim Jehova, orait i gat narapela samting em ol i mas mekim.
5, 6. Planti Juda na ol man i bihainim lotu Juda long bipo, ol i bin mekim wanem bambai ol i ken pas gut wantaim God?
5 I no olsem ol dispela lain i mas lusim Jehova, em Man husat i bin givim laip long ol, nogat. (Ap. 4:24) Ol manmeri em ol i harim tok bilong Pita, ol inap luksave klia moa olsem Jehova em i gutpela Papa na em i gat pasin bilong mekim gut long ol man. Em i bin salim Mesaia i kam bilong kisim bek ol na em i redi long lusim rong bilong ol lain em Pita i tok long ol olsem: “Yupela olgeta lain Israel, yupela i mas save gut olsem, dispela Jisas yupela i nilim em long diwai . . . God i makim em i stap Bikpela, na man bilong kisim bek ol manmeri bilong en.” Ol manmeri i bihainim tok bilong Pita, ol i tenkyu tru long ol samting em Papa i bin mekim bilong helpim ol man i laik pas gut wantaim Em!—Ritim Aposel 2:30-36.
6 Ol Juda na ol man i bihainim lotu Juda, ol i kisim save olsem sapos man i laik pas gut wantaim Jehova, orait em i mas tingim Jehova olsem Man bilong kisim bek ol manmeri long rot bilong Jisas. Olsem na yu inap kliagut long as na ol i tanim bel long ol rong ol i bin mekim. Wanpela bilong ol dispela rong em olsem ol i bin insait long wok bilong kilim i dai Jisas, maski ol i bin save long dispela o nogat. Na insait long ol de bihain, “ol manmeri i strong long harim tok bilong ol aposel.” (Ap. 2:42) Ol inap ‘i go klostu long God, na no ken pret, em i man bilong marimari.’—Hi. 4:16.
7. Olsem wanem planti manmeri long nau ol i senisim tingting bilong ol long God na ol i kisim baptais long nem bilong Papa?
7 Long nau, planti milion manmeri long olgeta hap bilong graun, ol i bin kisim stretpela save long Jehova long rot bilong Baibel. (Ais. 2:2, 3) Sampela ol i bilip olsem i no gat God, na sampela ol i bilip long God, tasol ol i tok em i no save tingim ol man. Tasol bihain ol i bilip olsem i gat wanpela Man i bin wokim olgeta samting na ol inap pas gut wantaim em. Sampela man i bin lotuim ol god triwan o kain kain imis. Nau ol i kisim save olsem Jehova wanpela tasol em i God i Gat Olgeta Strong, na ol i kolim em long nem stret bilong em. Dispela i stret wantaim tok bilong Jisas olsem ol disaipel bilong em i mas kisim baptais long nem bilong Papa.
8. Ol man em ol i no gat save long sin bilong Adam, ol i mas kisim wanem save long Papa?
8 Ol i kisim save tu olsem ol i kisim sin long rot bilong Adam. (Ro. 5:12) Dispela i olsem nupela save em ol i mas bilip long en olsem tok i tru. Ol dispela kain man i olsem man i gat sik, tasol em i no save long sik bilong em. Ating sampela taim em i save pilim pen. Tasol ol dokta i no save stret long sik bilong em, olsem na ating em i ting olsem em i gat gutpela helt. Tasol tru tru i no olsem. (Skelim 1 Korin 4:4.) Olsem wanem sapos dokta i painimaut stret long em i gat wanem sik? Yu ting em savetingting long em i painim wanpela kain marasin we inap helpim em, em marasin planti man i save long en na i save wok gut? Olsem tasol, taim ol man i kisim stretpela save olsem yumi bin kisim sin long Adam na Iv, ol i bilip long tok bilong Baibel na ol i kliagut olsem God bai pinisim sin i stap long skin bilong yumi. Yes, olgeta man husat i stap longwe long Papa, ol i mas i go klostu long Man husat inap “oraitim” ol long sik bilong ol—em sin.—Ef. 4:17-19.
9. Jehova i mekim wanem na em i opim rot long ol man inap pas gut wantaim em?
9 Sapos yu bin dediketim pinis laip bilong yu long God Jehova na yu kisim baptais pinis olsem wanpela Kristen, orait yu save olsem em i gutpela samting tru long pas gut wantaim Jehova. Nau yu inap pilim tru pasin laikim bilong Papa bilong yu, em Jehova. (Ritim Rom 5:8.) Maski Adam na Iv i mekim sin, God i go pas long mekim samting bambai ol tumbuna pikinini bilong Adam na Iv—dispela i makim yumi tu—inap pas gut wantaim em. Taim God i mekim olsem, em i mas lukim Pikinini bilong em i karim hevi na i dai. Taim yumi kisim save long dispela samting, dispela i kirapim yumi long laikim God na yumi daun long wok bos bilong em na bihainim ol lo bilong em. Sapos yu no bin mekim yet dispela samting, orait i gat as na yu mas dediketim yu yet long God na kisim baptais.
Long Nem Bilong Pikinini
10, 11. (a) Yu pilim olsem wanem long pasin em Jisas i bin mekim bilong helpim yu? (b) Yu pilim olsem wanem long Jisas i dai na givim laip bilong em olsem ofa bilong baim bek ol man?
10 Tingim gen tok em Pita i bin mekim long ol manmeri. Em i kamapim klia olsem ol man i mas bilip long Jisas, na dispela i poroman wantaim pasin bilong kisim baptais “long nem . . . bilong Pikinini.” Bilong wanem em i bikpela samting long mekim olsem long dispela taim bipo, na long nau tu? Taim yumi bilip long Jisas na kisim baptais long nem bilong em, dispela i makim olsem yumi luksave long wok em i mekim bilong yumi inap pas gut wantaim Man Bilong Wokim yumi. Ol birua i mas hangamapim Jisas long pos bambai ol Juda i no gat asua moa long rot bilong Lo; tasol indai bilong em i givim bikpela helpim moa long ol man. (Ga. 3:13) Em i givim laip bilong em olsem pe bilong baim bek olgeta man, em samting we olgeta lain man i nidim tru. (Ef. 2:15, 16; Kl. 1:20; 1 Jo. 2:1, 2) Bilong givim dispela pe, Jisas i karim hevi long rot bilong ol man i mekim pasin i no stret, na ol i tok nogut long em, na givim bikpela pen long em, na kilim em i dai. Olsem wanem? Yu pilim tru na tenkyu long ofa bilong em? Tingim olsem yu wanpela yangpela mangi i gat 12-pela krismas husat i bin kalap long sip Titanic, em dispela sip i bin bamim bikpela hap ais na i sink i go daun long solwara long 1912. Yu traim long kalap i go insait long wanpela bot bambai yu ken abrusim bagarap, tasol bot i pulap. Long dispela taim stret, wanpela man long bot i givim kis long meri bilong em, na kalap i go bek antap long sip, na em i putim yu i go insait long bot. Yu bai pilim olsem wanem? Ating bai yu pilim tru pasin bilong em na tenkyu tru long em, laka? Ating nau bai yu kliagut long tingting bilong wanpela yangpela mangi em tru tru dispela samting i bin painim em.a Tasol Jisas i bin mekim bikpela samting moa bilong helpim yu. Em i dai bambai yu inap kisim laip bilong i stap oltaim oltaim.
11 Yu bin pilim olsem wanem taim yu kisim save long ol samting em Pikinini Bilong God i bin mekim bilong helpim yu? (Ritim 2 Korin 5:14, 15.) Ating yu pilim tru na yu tenkyu long dispela samting. Dispela i kirapim yu long dediketim laip bilong yu long God na ‘yu no tingting moa long yu yet na wokabaut, nogat, yu tingting long dispela man i kisim ples bilong yu na i dai, yu tingting long em na wokabaut.’ Taim yu kisim baptais long nem bilong Pikinini, dispela i makim olsem yu luksave long ol samting em Jisas i bin mekim bilong helpim yu, na yu bilip long namba bilong em olsem “namba wan man bilong bringim yumi long rot bilong laip.” (Ap. 3:15; 5:31) Pastaim yu no bin pas gut wantaim Man Bilong Wokim yumi, na yu no bin i gat samting tru em yu inap bilip na wet long en. Tasol taim yu bilip long blut bilong Jisas Krais na yu kisim baptais, long dispela taim yu kirap long pas gut wantaim Papa. (Ef. 2:12, 13) Aposel Pol i tok: “Bipo yupela i stap longwe long Krais. Long tingting bilong yupela, yupela i birua long em, na yupela i bin wok long mekim ol pasin nogut. Tasol Krais i dai pinis . . . na long dispela pasin God i mekim yupela i kamap wanbel wantaim em . . . na yupela i ken i stap holi na klin na i no gat asua long ai bilong em.”—Kl. 1:21, 22.
12, 13. (a) Taim yu kisim baptais long nem bilong Pikinini, yu mas mekim wanem pasin taim wanpela i bagarapim bel bilong yu? (b) Yu wanpela Kristen husat i baptais pinis long nem bilong Jisas, olsem na yu gat wok long mekim wanem?
12 Maski yu bin kisim baptais long nem bilong Pikinini, yu save olsem yu gat ol laik nogut i stap long skin. Dispela save i helpim yu long olgeta de. Olsem, sapos wanpela man i mekim samting i bagarapim bel bilong yu, yu save tingim tu olsem yutupela wantaim i sinman? Yutupela wantaim i save mekim rong na yupela i laik bai God i lusim rong bilong yutupela, olsem na yutupela tu i mas i gat pasin bilong lusim rong. (Mk. 11:25, 26) Bilong kamapim klia dispela samting, Jisas i tok piksa olsem: Wanpela wokboi i gat dinau long king, inap olsem 10 milion kina, tasol king i lusim dispela dinau bilong wokboi. Bihain, dispela wokboi i no laik lusim dinau bilong narapela wokboi husat i gat dinau long em inap 10 kina tasol. Jisas i kamapim klia dispela bikpela tok: Jehova bai i no inap lusim rong bilong man husat i no laik lusim rong bilong brata bilong em. (Mt. 18:23-35) Yes, taim man i kisim baptais long nem bilong Pikinini, dispela i makim olsem em i luksave long namba em Jisas i holim na em i wok strong long bihainim ol pasin na ol tok bilong em; wanpela pasin bilong Jisas em olsem, em i save redi long lusim rong bilong ol arapela.—1 Pi. 2:21; 1 Jo. 2:6.
13 Yu gat sin, olsem na yu no inap bihainim stret olgeta tok na pasin bilong Jisas. Tasol yu bin dediket long God long bel olgeta, na yu laik tru long bihainim stret ol tok na pasin bilong Jisas. Dispela i makim tu olsem yu mas wok strong yet long rausim olpela pasin na kisim ol nupela pasin. (Ritim Efesus 4:20-24.) Taim yu rispektim wanpela pren, ating bai yu traim long kisim skul long ol gutpela tok na pasin bilong em. Olsem tasol, ating yu laik kisim skul tu long ol tok na pasin bilong Krais na bihainim long i stap bilong yu.
14. Yu ken mekim wanem bilong soim olsem yu luksave long namba bilong Jisas olsem King long heven?
14 I gat narapela rot tu bilong soim olsem yu kliagut long ol samting i insait long pasin bilong kisim baptais long nem bilong Pikinini. Baibel i tok: “God i bin putim olgeta samting i stap aninit long Krais, na i mekim em i stap het tru bilong olgeta samting, na long dispela pasin em i stap het bilong sios.” (Ef. 1:22) Olsem na yu mas soim rispek long ol samting em Jisas i mekim bilong stiaim ol lain husat i dediket long Jehova. Krais i yusim ol sinman long mekim wok insait long kongrigesen, na moa yet ol man i strong pinis long ol samting bilong spirit—em ol elda. Ol dispela man i gat wok long “helpim yumi manmeri . . . na bai bodi bilong Krais i ken kamap strong na i stap gut.” (Ef. 4:11, 12) Maski sapos wanpela sinman i mekim popaia, Jisas i stap olsem King long Kingdom bilong heven na em inap long stretim ol samting long taim bilong em yet na long rot em yet i makim. Yu bilip long dispela samting?
15. Sapos yu no kisim baptais yet, orait yu inap tingim wanem ol blesing yu bai kisim bihain long yu baptais?
15 Sampela ol i no bin dediket yet long Jehova na kisim baptais. Sapos yu no mekim olsem yet, orait nau yu luksave pinis olsem em i stretpela pasin long yu mekim olsem. Taim yu kisim baptais long nem bilong Pikinini, dispela bai opim rot long yu inap kisim ol gutpela blesing.—Ritim Jon 10:9-11.
Long Nem Bilong Holi Spirit
16, 17. Stori long mining bilong dispela tok olsem, kisim baptais long nem bilong holi spirit.
16 Wanem mining bilong dispela tok long kisim baptais long nem bilong holi spirit? Olsem yumi stori pinis, ol lain husat i harim tok bilong Pita long de bilong Pentikos, ol i luksave long wok bilong holi spirit. Long ai bilong ol stret ol i luksave olsem God i wok yet long yusim holi spirit. Pita em wanpela bilong ol lain em “Holi Spirit i pulap long [ol] . . . na ol i stat long mekim tok long ol kain kain tok ples.” (Aposel 2:4, 8) Dispela hap tok “long nem bilong” i no makim tasol nem bilong man, nogat. Long nau, ol man i save mekim planti wok “long nem bilong gavman,” na dispela i no makim wanpela man, nogat. Ol i mekim wok long namba bilong gavman. Olsem tasol, man husat i kisim baptais long nem bilong holi spirit, em i luksave olsem holi spirit i no wanpela man, nogat, em strong bilong Jehova. Na dispela baptais i makim olsem man i luksave long wok em holi spirit i mekim long kamapim ol samting em God i tingting pinis long mekim.
17 Olsem wanem? Yu kisim save pinis long wok bilong holi spirit long rot bilong stadi long Baibel? Nau yu kliagut olsem holi spirit i bin kirapim ol man long raitim ol tok bilong Baibel. (2 Ti. 3:16) Taim yu wok long kamap strong long ol samting bilong spirit, ating yu kliagut moa olsem ‘Papa long heven i save amamas long givim Holi Spirit long ol man i askim em,’ na long yu tu. (Lu. 11:13) Ating yu bin luksave long ol wok em holi spirit i mekim long laip bilong yu. Tasol sapos yu no baptais yet long nem bilong holi spirit, tok bilong Jisas olsem Papa bai givim holi spirit i makim olsem yu bai kisim ol gutpela blesing taim yu kisim dispela spirit.
18. Ol man husat i kisim baptais long nem bilong holi spirit, ol i kisim wanem ol blesing?
18 Ol samting i kamapim klia olsem long nau tu Jehova i save stiaim na bosim kongrigesen Kristen long rot bilong spirit bilong em. Dispela spirit i save helpim tu yumi olgeta wan wan long ol wok bilong yumi long olgeta de. Taim yumi kisim baptais long nem bilong holi spirit, dispela i makim olsem yumi luksave long wok bilong en long laip bilong yumi, na yumi amamas long wok gut wantaim dispela spirit. Tasol ating sampela i laik save long olsem wanem yumi ken inapim dediket bilong yumi long Jehova, na olsem wanem holi spirit i helpim yumi long mekim olsem. Yumi bai skelim dispela long stadi i kamap bihain long dispela.
[Futnot]
a Lukim Kirap! bilong Me 8, 1982, pes 3-9.
Yu Inap Tingim?
• Bilong kisim baptais long nem bilong Papa, yu mas mekim wanem?
• Wanem mining bilong dispela tok, kisim baptais long nem bilong Pikinini?
• Yu ken mekim wanem bilong soim olsem em i bikpela samting long kisim baptais long nem bilong Papa na Pikinini?
• Wanem mining bilong dispela tok, kisim baptais long nem bilong holi spirit?
[Ol Piksa long pes 10]
Olsem wanem long pasin bilong ol nupela disaipel long pas gut wantaim Jehova bihain long Pentikos 33 C.E.?
[Kredit Lain]
By permission of the Israel Museum, Jerusalem