Pasin Wanbel Kristen i Givim Biknem Long God
‘Yumi mas hatwok long holimpas pasin bilong i stap wanbel.’—EF. 4:3.
1. Olsem wanem ol Kristen long Efesus i bin givim biknem long God?
PASIN wanbel bilong kongrigesen Kristen long Efesus bilong bipo i bin givim biknem long trupela God, Jehova. Long dispela taun we i gat planti wok bisnis, sampela brata Kristen ol i maniman na ol i gat ol wokboi, tasol sampela narapela ol i wokboi nating na ol i stap rabis. (Ef. 6:5, 9) Na sampela ol i lain Juda em ol i bin kisim save long tok i tru taim aposel Pol i autim tok inap 3-pela mun long haus lotu bilong ol. Sampela arapela bipo ol i bin lotu long Artemis na ol i bin wokim ol kain kain marila samting. (Ap. 19:8, 19, 26) I klia tru olsem, lotu Kristen tru i bin mekim ol man bilong kain kain sindaun i pas gut wantaim. Pol i luksave olsem long rot bilong pasin wanbel bilong kongrigesen, Jehova i save kisim biknem. Pol i tok: “Em i mas kisim glori long rot bilong kongrigesen.”—Ef. 3:21, NW.
2. Wanem samting inap bagarapim pasin wanbel bilong ol Kristen long Efesus?
2 Tasol i gat samting inap bagarapim gutpela pasin wanbel bilong kongrigesen Efesus. Pol i givim tok lukaut long ol elda: “Sampela man bilong yupela yet bai i kirap na mekim tok giaman nabaut, bilong pulim ol manmeri bilong God i go bihainim ol.” (Ap. 20:30) Na tu, sampela brata i holim yet pasin bilong brukim lain, em pasin Pol i tok i “wok . . . insait long bel bilong ol man i save sakim tok bilong God.”—Ef. 2:2; 4:22.
Wanpela Pas i Stori Long Pasin Wanbel
3, 4. Pas Pol i raitim i go long ol Efesus i stori olsem wanem long pasin wanbel?
3 Pol i luksave olsem, bilong ol Kristen i ken stap wanbel yet na wok bung wantaim, olgeta wan wan i mas wok strong long kamapim pasin wanbel. Spirit bilong God i kirapim Pol long raitim wanpela pas long ol Efesus na bikpela tok bilong dispela pas em pasin wanbel. Olsem: Pol i tok em laik bilong God long “bungim olgeta samting long Krais.” (Ef. 1:10) Em i tok ol Kristen i olsem ol pos bilong wanpela haus. “Olgeta bun bilong dispela haus . . . i pas gut wantaim. Na God i wokim yet dispela haus, na haus i laik kamap bikpela moa na i stap haus bilong Bikpela yet.” (Ef. 2:20, 21) Na tu, Pol i stori long pasin wanbel i stap namel long ol Kristen Juda na ol Kristen bilong ol arapela lain, na em i kirapim ol brata long tingim olsem olgeta i bin kamap long wanpela rot tasol. Em i tok Jehova i “Papa bilong olgeta lain i stap long heven na long graun.”—Ef. 3:5, 6, 14, 15.
4 Taim yumi skelim sapta 4 bilong buk Efesus, yumi bai luksave olsem yumi mas wok strong bambai yumi inap stap wanbel, na yumi bai luksave tu long olsem wanem Jehova i save helpim yumi long stap wanbel, na wanem ol pasin bai helpim yumi long stap wanbel. Gutpela yu ritim sapta olgeta bambai yu inap kisim gutpela helpim long dispela stadi.
As na Yumi Mas Wok Strong Long Kamapim Pasin Wanbel
5. Bilong wanem ol ensel bilong God inap mekim wok bilong em long pasin wanbel? Wanem samting i mekim na i hatwok moa long yumi ol Kristen long stap wanbel?
5 Pol i tokim ol brata long Efesus long wok strong ‘long holimpas pasin bilong i stap wanbel.’ (Ef. 4:3) Bilong helpim yumi long save long as na yumi mas wok strong, tingim ol ensel bilong God. I no gat tupela samting i stap laip hia long graun ol i wankain stret. Olsem na yumi ken save olsem namel long ol planti milion ensel, i no gat tupela ensel i wankain stret. (Dan. 7:10) Tasol ol inap mekim wok bilong Jehova long pasin wanbel, long wanem, olgeta i save bihainim tok bilong em na mekim laik bilong em. (Ritim Song 103:20, 21.) Ol ensel i gat ol kain kain pasin, tasol samting i mekim na i hatwok moa long ol Kristen long stap wanbel, em ol i gat kain kain pasin kranki.
6. Wanem ol pasin bai helpim yumi long wok gut wantaim ol brata em pasin kranki bilong ol i narapela long pasin kranki bilong yumi?
6 Taim ol sinman i laik wok bung wantaim, sampela taim hevi inap kamap. Olsem: Wanpela brata i gat pasin isi na em i save kam leit, na narapela brata i gat pasin bilong kamap long taim stret tasol em i save belhat kwik, na tupela i wok wantaim long mekim wok bilong Jehova. Wanpela inap ting olsem pasin bilong narapela i no stret, tasol em i no tingim olsem sampela pasin bilong em yet tu i no stret. Wanem samting bai helpim dispela tupela brata long wok wantaim long pasin wanbel? Skelim olsem wanem ol pasin em Pol i tokaut long en bai helpim ol. Na tingim olsem wanem yumi ken strongim pasin wanbel taim yumi kisim ol dispela pasin. Pol i tok: “Mi laik kirapim yupela long wokabaut stret . . . Yupela i mas i stap aninit tru long ol arapela Kristen na mekim pasin isi long ol. Yupela i no ken belhat kwik long ol long taim ol i rongim yupela. Yupela wan wan i mas givim bel bilong yupela long ol na karim hevi ol i givim yupela. Holi Spirit em i givim yumi pasin bilong i stap wanbel, na dispela pasin em i olsem rop i pasim yumi na yumi stap wanlain. Olsem na yupela i mas hatwok long holimpas dispela pasin.”—Ef. 4:1-3.
7. Bilong wanem em i bikpela samting long yumi wok strong long stap wanbel wantaim ol arapela Kristen em ol tu ol i sinman?
7 Yumi mas lain long mekim wok bilong Jehova long pasin wanbel wantaim ol arapela sinman, long wanem, i gat wanpela lain tasol i lotu tru long God. “I gat wanpela bodi tasol, na i gat wanpela Holi Spirit tasol. Olsem tasol God i singautim yupela bilong wetim wanpela samting tasol, em long God i ken inapim tru ol gutpela samting em i laik mekim long yumi. I gat wanpela Bikpela tasol, na wanpela pasin bilong bilip, na wanpela baptais tasol. I gat wanpela God, em i Papa bilong yumi olgeta.” (Ef. 4:4-6) Spirit bilong Jehova na ol blesing i stap long dispela wanpela lain brata tasol em God i save mekim wok long en. Maski sapos wanpela long kongrigesen i mekim yumi bel hevi, bai yumi go we? I no gat narapela hap we yumi inap i go long en bilong harim ol tok bilong givim laip oltaim oltaim.—Jo. 6:68.
Ol Man i Stap Olsem “Ol Presen” Ol i Helpim Pasin Wanbel
8. Krais i mekim wok long wanem samting bilong strongim yumi long sakim ol samting we inap kirapim yumi long brukim lain?
8 Pol i stori long pasin bilong ol soldia bilong bipo bilong helpim yumi long save olsem, Jisas i bin givim ol man olsem “ol presen” bilong helpim kongrigesen long stap wanbel. Taim soldia i daunim wanpela man long pait, soldia inap kisim em i kam olsem wokboi nating bilong helpim meri bilong em long mekim ol wok long haus. (Sng. 68:1, 12, 18) Na olsem tasol, Jisas i bin winim strong bilong dispela graun na em i kisim planti wokboi em ol i amamas long mekim wok bilong em. (Ritim Efesus 4:7, 8.) Em i givim wanem wok long ol? “Long sampela man em i givim wok aposel. Na long sampela em i givim wok profet. Na long sampela em i givim wok bilong autim gutnius long ol manmeri. Na long sampela em i givim wok pasto [“wasman,” NW ] na wok bilong skulim ol manmeri long ol pasin God i laikim. Krais i givim ol dispela presen bilong helpim yumi manmeri bilong God bai yumi inap long mekim gutpela wok bilong em. Olsem na bai bodi bilong Krais i ken kamap strong na i stap gut. Na dispela wok bai i go i go inap long yumi bilip tru na dispela i mekim yumi i stap wanbel tru.”—Ef. 4:11-13.
9. (a) Olsem wanem ol man i olsem “ol presen” ol i helpim yumi long holimpas pasin wanbel bilong yumi? (b) Bilong wanem olgeta insait long kongrigesen i mas helpim pasin wanbel bilong en?
9 Wok wasman bilong ol dispela man i stap olsem “ol presen” i helpim yumi long holimpas pasin wanbel bilong yumi. Olsem: Sapos wanpela elda long kongrigesen i lukim olsem tupela brata i “kirapim pasin bilong resis” namel long tupela yet, em bai “stretim” ol long “pasin isi” na long dispela rot em i helpim kongrigesen long stap wanbel. (Ga. 5:26–6:1, NW ) Wok tisa bilong ol dispela man i stap olsem “ol presen” i helpim yumi long kisim strongpela bilip em ol tok bilong Baibel i as bilong en. Long dispela rot ol dispela man i strongim pasin wanbel na helpim yumi long kamap strongpela Kristen. Pol i tok dispela bai mekim na yumi “no inap i stap moa olsem ol liklik pikinini, na ol dispela tok bilong ol grisman i save tumas long olgeta pasin bilong trik na giaman, em bai i no inap sakim yumi nabaut olsem win na si i save sakim kanu long solwara, na kanu i trip nabaut na i no i go stret long ples em i makim.” (Ef. 4:13, 14) Olgeta Kristen i mas helpim lain brata long stap wanbel, wankain olsem olgeta hap bilong bodi bilong yumi i helpim narapela narapela hap long wok gut.—Ritim Efesus 4:15, 16.
Kisim Ol Nupela Pasin
10. Olsem wanem pasin doti inap nogutim pasin bilong yumi long stap wanbel?
10 Namba 4 sapta bilong pas Pol i raitim long ol Efesus i bin kamapim olsem pasin bilong mekim pasin laikim em rot bilong kamap strongpela Kristen na stap wanbel. Orait nau dispela sapta i stori moa long pasin laikim. Man i bihainim pasin laikim em bai i no mekim pasin pamuk o pasin bikhet na i no sem. Pol i tokim ol brata long ol i “no ken wokabaut moa long pasin bilong ol haiden.” Ol dispela lain “i no save sem moa long pasin ol i save mekim,” na “ol i go insait tru long pasin nogut.” (Ef. 4:17-19) Pasin doti bilong ol manmeri bilong dispela graun inap nogutim pasin bilong yumi long i stap wanbel. Ol i mekim ol tok pilai na ol singsing i stori long pasin pamuk, na lukim dispela pasin long TV samting, na ol i mekim dispela pasin long pasin hait o long ples klia. Taim man i tok gris na mekim olsem em i laikim narapela, tasol tru tru em i no gat tingting long maritim em, dispela inap pulim dispela man long lusim Jehova na kongrigesen. Bilong wanem? Long wanem pasin bilong tok gris inap kirapim man long mekim pasin pamuk. Na tu, pasin bilong tok gris inap kirapim man marit long mekim pasin adaltri na dispela inap brukim marit na nau ol pikinini i no stap moa wantaim papamama, na poroman i no gat asua i no stap moa wantaim poroman i mekim rong. Tru tumas, pasin bilong tok gris inap brukim famili! Olsem na i gat as na Pol i tok: “Yupela i no bin kisim skul olsem Krais em i kain man olsem”!—Ef. 4:20, 21, NW.
11. Baibel i kirapim ol Kristen long mekim wanem senis?
11 Pol i tok yumi mas lusim ol tingting i save brukim lain na kisim ol pasin we bai helpim yumi long stap wanbel wantaim ol arapela. Em i tok: “Bipo yupela tu i bin wokabaut long pasin bilong olpela man, em pasin bilong giaman na bel i kirap long mekim ol samting nogut, na em pasin i bringim man i go long rot bilong bagarap. Tasol nau yupela i mas rausim dispela olpela pasin na tingting bilong yupela i mas kamap nupela. Yupela i mas kamap ol nupela manmeri, em ol manmeri God i mekim ol i kamap nupela.” (Ef. 4:22-24) Olsem wanem ‘tingting bilong yumi inap kamap nupela’? Sapos yumi tingim gut ol samting yumi lainim long Baibel na long ol strongpela Kristen, dispela bai kirapim yumi long wok strong long bihainim ol tok yumi lainim. Taim yumi mekim olsem, dispela bai helpim yumi long kamap nupela man.
Kisim Ol Gutpela Pasin Bilong Toktok
12. Olsem wanem pasin bilong mekim tok tru i helpim pasin wanbel? Bilong wanem i hatwok long sampela i mekim tok tru?
12 Pasin bilong mekim tok tru i bikpela samting long ol lain i stap insait long wanpela famili o insait long kongrigesen. Pasin bilong toktok gut na tokaut stret dispela inap helpim ol manmeri long pas gut wantaim. (Jo. 15:15) Tasol olsem wanem sapos wanpela man i giamanim brata bilong em? Taim dispela brata i luksave long dispela, bai em i no trastim moa brata bilong em. Olsem na yu inap save long as na Pol i tok: “Yupela olgeta i mas mekim tok tru tasol long ol arapela Kristen, long wanem, yumi olgeta i stap hap bilong wanpela bodi.” (Ef. 4:25) Man husat i save mekim tok giaman—ating em i stat long mekim dispela pasin taim em i pikinini yet—ating em bai hatwok long kirap long mekim tok tru. Tasol sapos em i wok strong long senisim pasin bilong em, Jehova bai amamas long dispela na Em bai helpim em.
13. Yumi mas mekim wanem bilong abrusim pasin bilong mekim tok nogut?
13 Jehova i putim sampela mak long pasin bilong yumi long toktok na long dispela rot em i skulim yumi long kamapim pasin rispek na pasin wanbel insait long kongrigesen na famili. “Yupela i no ken larim ol kain kain tok nogut i kamap long maus bilong yupela. Nogat. . . . Yupela i mas rausim olgeta pasin bilong bel nogut na kros na belhat na bikmaus na tok bilas, na olgeta kain pasin nogut.” (Ef. 4:29, 31) Bilong abrusim pasin bilong mekim tok nogut, wanpela rot em long rispektim tru ol arapela. Olsem: Man husat i save mekim hatpela tok long meri bilong em, em i mas wok long senisim pasin em i mekim long meri, na bai i stret wantaim save em i kisim long pasin Jehova yet i mekim bilong givim biknem long ol meri. God i makim sampela meri tu long holi spirit bilong ol i ken wok king wantaim Krais. (Ga. 3:28; 1 Pi. 3:7) Na meri husat i save bikmaus long man bilong em, em i mas wok long senisim pasin bilong em na bai i stret wantaim save em i kisim long pasin bilong Jisas long bosim gut em yet taim narapela i mekim tok nogut long em.—1 Pi. 2:21-23.
14. Wanem hevi inap kamap sapos yumi kamapim belhat bilong yumi?
14 Pasin bilong mekim ol kain kain tok nogut inap kamap taim wanpela i no bosim gut belhat bilong em. Dispela inap brukim pasin wanbel bilong ol Kristen em ol i hap bilong wanpela bodi. Pasin bilong belhat i olsem paia. Sapos man i no bosim gut belhat bilong em, dispela pasin inap go bikpela na kamapim hevi. (Snd. 29:22) Sapos i gat as long man i kamapim bel hevi bilong em, orait em i mas bosim em yet na bai em i no bagarapim gutpela pasin pren bilong em wantaim ol narapela. Ol Kristen i mas mekim ol samting bilong lusim rong, ol i no ken bel nogut na ol i no ken toktok gen long dispela hevi. (Sng. 37:8; 103:8, 9; Snd. 17:9) Pol i tokim ol Efesus: “Sapos bel bilong yupela i hat, orait yupela lukaut. Nogut yupela i mekim sin. Nogut yupela i belhat yet i stap na san i go daun. Nogut yupela i opim dua long Satan.” (Ef. 4:26, 27) Sapos wanpela i no bosim gut belhat bilong em, dispela inap opim rot long Satan long bagarapim pasin wanbel bilong kongrigesen na tok pait inap kamap tu.
15. Sapos yumi kisim samting i no bilong yumi, dispela inap mekim wanem?
15 Pasin bilong soim rispek long ol samting bilong narapela, dispela i helpim pasin wanbel bilong kongrigesen. Baibel i tok: “Ol stilman i no ken stil moa.” (Ef. 4:28) Insait long lain bilong Jehova, i gat pasin we narapela i save trastim narapela. Tasol sapos wanpela Kristen i kisim samting i no bilong em, em bai bagarapim dispela gutpela pasin wanbel.
Pasin Bilong Laikim God i Save Mekim Yumi Stap Wanbel
16. Olsem wanem pasin bilong mekim gutpela tok long ol narapela inap strongim pasin wanbel bilong yumi?
16 Taim olgeta insait long kongrigesen i larim pasin bilong laikim God i kirapim ol long laikim tru narapela narapela, dispela i save mekim na kongrigesen Kristen i stap wanbel. Taim yumi pilim tru gutpela pasin Jehova i mekim long yumi, dispela i save kirapim yumi long bihainim dispela tok: “Gutpela tok tasol i mas kamap, inap long strongim ol man i slek. Dispela kain tok i save bringim marimari bilong God i kam long ol man i harim. Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.” (Ef. 4:29, 32) Jehova i save lusim rong bilong yumi ol sinman. Na olsem tasol, taim yumi lukim ol popaia bilong ol narapela, yumi tu i mas lusim rong bilong ol.
17. Bilong wanem yumi mas wok strong long kamapim pasin wanbel?
17 Pasin wanbel bilong ol manmeri bilong God i save givim biknem long em. Spirit bilong em i stiaim yumi long kain kain rot long kamapim pasin wanbel. Yumi no laik sakim ol wok em spirit bilong God i mekim bilong stiaim yumi. Pol i tok: “Yupela i no ken givim bel hevi long Holi Spirit bilong God.” (Ef. 4:30) Pasin wanbel em wanpela gutpela samting tru yumi mas lukautim gut. Em i save givim amamas long ol man husat i gat dispela pasin wanbel na i save givim biknem long Jehova. “God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim.”—Ef. 5:1, 2.
Bai Yu Bekim Olsem Wanem?
• Wanem kain ol pasin i save kamapim pasin wanbel namel long ol Kristen?
• Olsem wanem ol pasin bilong yumi inap kamapim pasin wanbel insait long kongrigesen?
• Olsem wanem toktok bilong yumi inap helpim yumi long wok gut wantaim ol arapela?
[Piksa long pes 17]
Ol man bilong kain kain sindaun ol i stap wanbel
[Piksa long pes 18]
Yu save long ol hevi pasin bilong tok gris inap kamapim?