Yu Helpim Ol Miting Long Kamap Samting Bilong Strongim Ol Narapela?

“Taim yupela i bung bilong lotu, . . . olgeta samting yupela i mekim, yupela i mas mekim bilong strongim sios.”​—1 KO. 14:26.

 1. Olsem 1 Korin sapta 14 i kamapim, wanem bikpela samting bilong ol miting Kristen?

‘MAN! Dispela miting i strongim mi tru!’ Sampela taim yu bin mekim kain tok olsem bihain long wanpela miting long Haus Kingdom? Ating yu bin mekim. Yumi no kirap nogut olsem ol miting bilong kongrigesen i save strongim yumi. Olsem long taim bilong ol Kristen long bipo, bikpela samting bilong ol miting bilong yumi long nau, em bilong strongim olgeta long odiens long ol samting bilong spirit. Lukim tok aposel Pol i mekim bilong kamapim klia dispela bikpela samting bilong ol miting Kristen long namba wan pas em i raitim long ol Korin. Long sapta 14, planti taim em i tok olsem olgeta tok i kamap long ol miting bilong kongrigesen i bilong mekim wanpela samting​—em bilong “strongim sios.”​—Ritim 1 Korin 14:​3, 12, 26.a

 2. (a) Wanem samting i mekim na ol miting i strongim yumi? (b) Bai yumi skelim wanem askim?

² Yumi save olsem namba wan samting i mekim na ol miting i save strongim na skulim yumi, em spirit bilong God. Olsem na yumi save kirapim olgeta miting bilong kongrigesen long rot bilong beten long Jehova, na askim Papa bilong yumi long heven long blesim bung bilong yumi long rot bilong holi spirit bilong em. Tasol yumi save olsem olgeta insait long kongrigesen inap helpim ol miting long kamap samting bilong strongim ol narapela. Olsem na yumi wan wan inap mekim wanem na bai oltaim ol miting i kamap long Haus Kingdom i givim nupela strong long olgeta?

 3. Ol miting Kristen i bikpela samting olsem wanem?

³ Bilong bekim dispela askim, bai yumi skelim sampela samting bilong ol miting bilong yumi em ol brata i go pas long lukautim miting, ol i mas tingim. Bai yumi skelim tu olsem wanem kongrigesen olgeta inap helpim ol miting long kamap samting bilong strongim olgeta husat i kam bung. Dispela em i bikpela samting long yumi, long wanem, ol miting bilong yumi em ol bung holi. Tru tumas, pasin bilong go long ol miting na insait long en, em ol bikpela samting bilong lotu yumi mekim long Jehova.​—Sng. 26:12; 111:1; Ais. 66:​22, 23.

Miting Bilong Stadi Long Baibel

4, 5. Stadi Wastaua i bilong mekim wanem?

⁴ Yumi olgeta i laik kisim helpim long Stadi Wastaua i save kamap long olgeta wik. Bilong kliagut long wok bilong dispela miting, yumi ken skelim sampela senis ol i bin mekim long nius Wastaua na ol stadi i stap long en.

⁵ Stat long namba wan Wastaua bilong stadi, em Janueri 15, 2008, ol i putim nupela samting long fran pes. Yu lukim tu? Lukim gut fran pes bilong magasin yu holim nau. Em ya, long as bilong taua, yu lukim wanpela Baibel i op i stap. Dispela nupela samting i kamapim klia as na yumi mekim Stadi Wastaua. Em bilong stadi long Baibel long rot bilong dispela magasin. Yes, long Stadi Wastaua, yumi stadi long Baibel bilong “save gut” long tok bilong en na “autim as” bilong tok bilong Baibel, olsem ol i bin mekim long taim bilong Nehemia.​—Neh. 8:8; Ais. 54:13.

 6. (a) Ol i mekim wanem senis long Stadi Wastaua? (b) Yumi mas tingim wanem taim yumi lukim ol skripsa i gat tok “ritim” long en?

⁶ Nambawan skulbuk yumi yusim em Baibel, olsem na ol i mekim wanpela senis long Stadi Wastaua. Long ol stadi, i gat sampela skripsa em ol i no raitim tok bilong en, em ol i makim olsem “ritim.” Yumi olgeta i mas opim Baibel bilong yumi yet na bihainim taim ol i ritim ol dispela skripsa long taim bilong miting. (Ap. 17:11) Bilong wanem yumi mas mekim olsem? Long wanem, taim yumi lukim tok bilong God long Baibel bilong yumi yet, yumi pilim moa yet dispela tok. (Hi. 4:12) Olsem na paslain long ol i ritim ol dispela skripsa, brata i lukautim Stadi Wastaua i mas givim taim long odiens long painim ol dispela skripsa na bai ol i ken bihainim taim wanpela i ritim.

Sampela Hap Taim Moa Bilong Kamapim Bilip Bilong Yumi

 7. Long taim bilong Stadi Wastaua, yumi gat rot long mekim wanem?

⁷ Na tu, i gat narapela senis ol i bin mekim long stadi Wastaua. Inap sampela yia nau, ol i bin sotim ol stadi. Long taim bilong Stadi Wastaua, ol i no lusim bikpela hap taim long ritim ol paragraf, olsem na i gat sampela hap taim moa bilong bekim tok. Rot i op nau long planti moa insait long kongrigesen i ken kamapim bilip bilong ol long rot bilong bekim askim i stap long Wastaua, kamapim mining bilong skripsa, stori long wanpela sotpela ekspiriens i kamapim klia olsem em i savetingting long bihainim ol stiatok bilong Baibel, o kain samting olsem. Lusim tu sampela hap taim long stori long ol piksa.​—Ritim Song 22:22; 35:18; 40:9.

8, 9. Wanem wok bilong brata i lukautim Stadi Wastaua?

⁸ Sapos ol bratasista i mekim ol sotpela bekim na brata i lukautim Stadi Wastaua i no pulim stori tumas, orait bai i gat taim long planti moa inap givim ol bekim. Orait wanem samting bai helpim brata i lukautim Stadi Wastaua long mekim ol tok inap long skel na bai ol bratasista inap bekim gut tok na long dispela rot miting i ken strongim olgeta?

⁹ Bilong bekim dispela askim, tingim wanpela tok piksa. Stadi Wastaua em brata i lukautim gut, i kain olsem planti plaua em ol i bungim wantaim na putim long wanpela glas botol na i luk nais tru. I gat planti narapela narapela plaua long glas botol, na olsem tasol i gat planti narapela narapela bekim insait long Stadi Wastaua. Olsem ol plaua long glas botol i gat kain kain sais na kala, pasin bilong givim ol bekim na longpela bilong ol bekim long taim bilong miting i narapela narapela. Orait wanem wok bilong brata i lukautim stadi? Ol tok em i mekim wan wan taim i olsem ol wan wan grinpela lip em ol i putim wantaim ol plaua long glas botol. Ol grinpela lip i no planti tumas, tasol ol i mekim na ol plaua i sanap gut wantaim. Na olsem tasol, brata i lukautim stadi i mas tingim olsem wok bilong em i no bilong mekim planti tok, nogat, em bilong strongim ol bekim ol bratasista i mekim. Em nau, taim ol bratasista i givim planti narapela narapela bekim na brata i lukautim stadi i mekim sampela tok bilong helpim ol bekim, orait dispela bai kamapim ol gutpela tok ol bratasista i amamas long harim.

“Oltaim Yumi Mas Givim Biknem Long God”

10. Ol Kristen bilong bipo i gat wanem tingting long ol miting bilong kongrigesen?

¹⁰ Tok Pol i mekim long ol miting Kristen long 1 Korin 14:​26-33, i helpim yumi long save olsem wanem ol i bin mekim ol dispela bung long taim bilong ol aposel. Wanpela saveman bilong Baibel i stori long ol dispela ves na i tok: “Wanpela bikpela samting bilong ol bung bilong Sios bilong bipo em olsem klostu olgeta husat i kam, ol i pilim olsem ol i gat wok long mekim sampela samting bilong helpim ol dispela bung. Ol i no kam tasol bilong harim tok na bilong kisim samting, nogat, ol i kam bilong givim samting tu.” Tru tumas, ol Kristen bilong bipo i ting ol miting bilong kongrigesen i olsem rot bilong autim bilip bilong ol.​—Ro. 10:10.

11. (a) Wanem samting i helpim ol miting long kamap samting bilong strongim ol narapela? Bilong wanem i olsem? (b) Pasin bilong bihainim wanem ol tok inap helpim yumi long mekim ol bekim bilong yumi i kamap gutpela moa long ol miting? (Lukim futnot.)

¹¹ Taim yumi autim bilip bilong yumi long ol miting, dispela “i save strongim sios.” Bai yu wanbel long tok olsem maski yumi bin go long ol miting inap planti yia pinis, yumi save amamas tru long harim bekim bilong ol brata na sista bilong yumi. Yumi pilim tru bekim bilong wanpela lapun i kamapim bel bilong em, bekim bilong wanbilip husat i stap gut long God; yumi kisim strong taim yumi harim wanpela elda i kamapim bekim i gat savetingting long en; na yumi save smail taim liklik pikinini i bekim tok i kamapim pasin bilong em long laikim tru Jehova. Tru tumas, taim yumi givim ol bekim, yumi olgeta i insait long helpim ol miting Kristen long kamap samting bilong strongim ol narapela.b

12. (a) Yumi lainim wanem samting long stori bilong Moses na Jeremaia? (b) Olsem wanem beten i helpim yumi long bekim tok?

¹² Tasol ol lain husat i save sem, ol i hatwok tru long bekim tok. Sapos yu gat dispela hevi, em gutpela long yu tingim olsem i no yu wanpela tasol i gat dispela hevi. Ol gutpela wokboi bilong God olsem Moses na Jeremaia, ol tu i bin tok ol i no inap toktok gut long ai bilong ol man. (Kis. 4:10; Jer. 1:6) Jehova i bin helpim ol dispela wokboi bilong bipo long givim biknem long em, na olsem tasol God bai helpim yu long mekim ol tok i givim biknem long em. (Ritim Hibru 13:15.) Olsem wanem yu inap kisim helpim long Jehova bilong daunim pasin bilong pret long bekim tok? Namba wan, redim gut ol miting, na paslain long yu go long Haus Kingdom, beten long Jehova na askim em long strongim bel bilong yu long bekim tok. (Fl. 4:6) Samting yu askim i stret wantaim “laik bilong God,” olsem na yu ken bilip tru olsem Jehova bai harim beten bilong yu.​—1 Jo. 5:14; Snd. 15:29.

Ol Miting Bilong ‘Strongim Bilip, Kirapim Man, na Mekim Orait Bel’

13. (a) Ol miting bilong yumi i mas mekim wanem long ol man i kam bung? (b) Wanem askim i bikpela samting long ol elda?

¹³ Pol i tok wanpela bikpela wok bilong ol miting bilong kongrigesen em bilong ‘strongim bilip, kirapim man, na mekim orait bel’ bilong ol man i kam bung.c (1 Ko. 14:3) Ol elda Kristen long nau i ken mekim wanem na bai ol tok ol i mekim long miting i strongim ol bratasista na mekim gut bel bilong ol? Bilong bekim dispela askim, yumi ken tingim wanpela miting Jisas i bin mekim bihain liklik long em i kirap bek.

14. (a) Wanem samting i kamap paslain long miting Jisas i bin mekim? (b) Bilong wanem ol aposel i bel isi taim ‘Jisas i kam klostu na i toktok long ol’?

¹⁴ Pastaim, tingim ol samting i bin kamap paslain long dispela miting. Paslain liklik long ol man i kilim i dai Jisas, ol aposel i “lusim Jisas na ol i ranawe,” na olsem Baibel i bin tok profet, ‘olgeta wan wan i go nabaut long ples bilong ol.’ (Mk. 14:50; Jo. 16:32) Bihain long em i kirap bek, Jisas i singautim ol aposel husat i bel hevi, long kam long wanpela spesel miting.d Orait “ol 11-pela disaipel i wokabaut i go long Galili, na ol i kamap long dispela maunten Jisas i bin tok bai ol i mas i go long en.” Taim ol i kamap, ‘Jisas i kam klostu na i toktok long ol.’ (Mt. 28:​10, 16, 18) Tingim bel isi ol aposel i bin pilim taim Jisas i go pas long toktok wantaim ol! Jisas i toktok long wanem samting?

15. (a) Jisas i mekim wanem ol tok? Tasol em i no toktok long wanem ol samting? (b) Dispela miting i mekim wanem long ol aposel?

¹⁵ Bilong kirapim miting, em i mekim wanpela toksave, olsem: “God i givim mi bikpela namba na strong.” Bihain long dispela, em i givim wanpela wok long ol: “Yupela i mas i go mekim olgeta lain manmeri i kamap disaipel.” Bilong pinisim tok, em i mekim dispela gutpela tok: “Mi save stap wantaim yupela olgeta de.” (Mt. 28:​18-20) Yu luksave long samting Jisas i no bin mekim? Em i no bin krosim ol aposel bilong em, na em i no mekim wok long dispela miting bilong sutim tok long pasin ol i bin mekim, o mekim ol i pilim nogut moa yet na toktok long bilip bilong ol i no bin strong. Nogat. Jisas i strongim bel bilong ol olsem em na Papa bilong em i laikim ol tru na em i givim wanpela bikpela wok long ol. Pasin bilong Jisas i mekim wanem long ol aposel? Dispela i strongim ol tru na mekim gut bel bilong ol, olsem na bihain liklik long dispela miting, ol i kirap gen long ‘skulim ol manmeri na autim gutnius.’​—Ap. 5:42.

16. Olsem Jisas, ol elda Kristen long nau i mekim wanem na bai ol miting i givim nupela strong long ol lain i kam bung?

¹⁶ Olsem Jisas, ol elda long nau i tingim ol miting i olsem rot bilong ol long strongim ol wanbilip long tingim olsem Jehova i laikim tru lain bilong em. (Ro. 8:​38, 39) Olsem na long taim ol i mekim ol tok, ol elda i toktok long ol gutpela pasin bilong ol brata, na ol i no stori long ol samting ol brata i no strong long en. Ol i no sutim tok long pasin ol brata i mekim. Nogat. Ol tok ol i mekim i soim olsem ol i tingim ol wanbilip i olsem ol man husat i laikim tru Jehova na i laik mekim ol samting i stret. (1 Te. 4:​1, 9-12) Tru, sampela taim ol elda i mas givim tok kaunsel long kongrigesen olgeta, tasol sapos i gat wok long stretim sampela tasol, orait mobeta ol i toktok long ol dispela lain tasol na givim tok kaunsel long ol. (Ga. 6:1; 2 Ti. 2:​24-26) Taim ol elda i givim tok long kongrigesen olgeta, ol i laik givim tok amamas long kongrigesen long taim i stret long mekim. (Ais. 32:2) Ol i wok strong long toktok long pasin i givim nupela strong long olgeta husat i kam long miting.​—Mt. 11:28; Ap. 15:32.

Ol Miting i Mekim Gut Bel

17. (a) Bilong wanem em i bikpela samting moa yet long nau long ol miting i stap ples we olgeta inap kisim bel isi long en? (b) Yu yet inap mekim wanem na bai ol miting i strongim ol narapela? (Lukim blok “Tenpela Rot Bilong Helpim Ol Miting Long Strongim Yu Yet na Ol Narapela.”)

¹⁷ Graun bilong Satan i wok long putim planti hevi moa long ol man, olsem na yumi mas wok strong long mekim ol bung Kristen bilong yumi i kamap ples we olgeta inap kisim bel isi long en. (1 Te. 5:11) Inap sampela yia i go pinis, wanpela sista na man bilong em i bin karim bikpela hevi tru, na sista i tok: “Taim mipela i stap long Haus Kingdom, i olsem mipela i stap long gutpela han bilong Jehova. Long taim mipela i stap namel long ol brata na sista Kristen bilong mipela, mipela pilim olsem mipela inap putim hevi bilong mipela long han bilong Jehova, na mipela i kisim bel isi.” (Sng. 55:22) Gutpela sapos olgeta husat i kam long ol miting bilong yumi i kisim wankain strong na bel isi. Bilong dispela samting i ken kamap, yumi olgeta wan wan i mas mekim wok bilong yumi long helpim ol miting Kristen i kamap samting bilong strongim ol narapela.

[Ol Futnot]

Bai Yu Bekim Olsem Wanem?

• Ol miting Kristen i bikpela samting olsem wanem?

• Bilong wanem ol bekim yumi givim long ol miting “i save strongim sios”?

• Yumi inap kisim wanem skul long miting Jisas i bin mekim wantaim ol disaipel bilong em?

[Blok/​Ol Piksa long pes 22, 23]

TENPELA ROT BILONG HELPIM OL MITING LONG STRONGIM YU YET NA OL NARAPELA

Redi gut pastaim. Taim yu stadi pastaim long ol buk na nius ol bai skelim long Haus Kingdom, bai yu amamas moa long putim yau long ol tok na bai yu pilim moa ol tok.

Go oltaim. Taim planti i bung dispela i save strongim olgeta, olsem na taim yu go long ol miting, dispela i helpim ol narapela.

No ken kam leit. Sapos yu sindaun pinis paslain long miting i kirap, orait yu inap insait long namba wan singsing na beten, em ol hap bilong wok lotu yumi mekim long Jehova.

Bringim i kam ol samting bilong miting. Bringim Baibel na ol buk na nius em ol bai yusim long taim bilong miting bambai yu inap insait long miting na kliagut long ol tok.

Abrusim ol samting i pulim tingting. No ken ritim ol teks mesis long taim bilong miting, yu ken mekim olsem bihain long miting. Long dispela rot, yu no mekim ol samting bilong yu yet long taim bilong miting.

Insait long ol miting. Taim planti bratasista i bekim tok, planti moa bai kisim strong long ol narapela narapela bekim i kamapim bilip.

Mekim ol sotpela bekim. Dispela i opim rot long planti moa i ken bekim tok.

Inapim ol asainmen. Sapos yu insait long Skul Tiokratik Bilong Autim Tok o yu insait long hap bilong Miting Bilong Wok, orait redi gut, mekim traim pastaim, na wok strong long yu no ken kenselim ol asainmen bilong yu.

Mekim tok amamas. Tokim ol lain husat i bin insait long ol hap bilong miting o i bin bekim tok, long yu amamas tru long gutpela tok ol i mekim.

Toktok gut wantaim. Pasin bilong givim tok gude na mekim tok bilong strongim ol narapela paslain na bihain long miting, i mekim na ol man i kam, ol i kisim amamas na helpim.