Kisim Bikpela Helpim Long Ritim Baibel

1-3. Olsem wanem pasin bilong ritim Baibel na bihainim tok yumi lainim inap helpim yumi?

WANPELA sista Kristen husat i gat bikpela krismas pinis, em i tok: “Long olgeta moning, mi save tok tenkyu long Jehova long em i helpim mi long save gut long Baibel.” Maski em i bin ritim Baibel winim 40 taim pinis, em i save ritim yet. Wanpela yangpela sista i tok, pasin bilong ritim Baibel i bin helpim em long save olsem Jehova i stap tru, na tu, dispela i helpim em long pas gut moa wantaim Jehova. Em i tok, “Long bipo, i no gat wanpela taim mi bin amamas tru olsem long nau!”

² Aposel Pita i tokim yumi olsem yumi mas laikim tok i tru i stap long Tok Bilong God. (1 Pita 2:2) Taim yumi stadi long Baibel na bihainim ol tok bilong en, bel bilong yumi bai i no gat tok na laip bilong yumi bai i gat as bilong en. Tok bilong Baibel inap helpim yumi long pas gut wantaim ol arapela husat i laikim God na lotuim em. Dispela em ol gutpela samting, olsem na yumi mas “laikim tumas lo bilong God.” (Rom 7:22) Orait, wanem sampela samting moa em pasin bilong stadi long Baibel inap helpim yumi long en?

³ Taim yu kisim sampela save moa long Jehova na Pikinini bilong em, pasin bilong yu long laikim tupela na ol arapela man bai i kamap bikpela moa. Na tu, Baibel bai skulim yu long olsem wanem God bai lukautim ol stretpela man taim em i pinisim ol man nogut. Taim yu mekim wok autim tok, yu gat gutpela tok bilong autim long ol man. Na yu ken bilip olsem Jehova bai helpim yu taim yu skulim ol narapela long samting yu yet i bin lainim.

 4. Taim yumi ritim Baibel, yumi ken mekim wanem bilong “ritim isi”?

⁴ Jehova i laik bai yumi lusim sampela haptaim long tingim na kliagut long ol tok yumi ritim long Baibel. Em i tokim Josua: “Dispela buk bilong lo i no ken lusim maus bilong yu, na yu mas ritim isi long san na long nait.” (Jos. 1:8, NW; Sng. 1:2) Yu ting dispela i makim olsem yumi mas ritim Baibel olgeta long maus na kolim strong o kolim isi tasol? Nogat. Dispela i makim olsem yu mas ritim isi long pasin we yu inap tingim ol tok yu ritim. Long dispela rot, yu inap tingim gut ol ves we inap helpim na strongim yu. Taim yu ritim wanpela tok o stori i strongim yu, orait ritim isi isi, na ating yu ken kolim isi taim yu ritim. Dispela bai mekim na ol tok yu ritim inap i go daun long bel bilong yu. Bilong wanem em i bikpela samting? Long wanem, taim yu kliagut long tok kaunsel bilong God, yu bai amamas long bihainim long laip bilong yu.

5-7. Stori long olsem wanem pasin bilong ritim Baibel isi isi inap helpim yu long (a) bihainim ol lo bilong God; (b) toktok gut long ol narapela; (c) trastim Jehova long taim bilong bikpela hevi tu.

⁵ Taim yumi ritim sampela buk bilong Baibel em yumi ting i hatwok long kliagut long en, yumi ken ritim isi isi na tingim gut ol samting yumi ritim. Yumi ken skelim sampela eksampel. Namba 1, tingim olsem wanpela yangpela brata i ritim gut Buk Hosea. Long sapta 4, em i malolo long tingim ol tok em i ritim pinis long ves 11 i go ves 13. (Ritim Hosea 4:11-13.) Bilong wanem em i tingim gen ol tok em i ritim? Long skul, traim i painim em long mekim pasin pamuk. Tasol taim em i tingim ol dispela ves, em i tokim em yet olsem: ‘Jehova i save lukim ol pasin nogut ol man i mekim maski ol yet i stap. Mi no laik mekim em i bel hevi.’ Dispela brata i wokim disisen olsem em bai bihainim ol lo bilong Jehova long stretpela pasin.

⁶ Namba 2, tingim olsem wanpela sista i ritim gut Buk Joel na em i kamap long sapta 2, ves 13. (Ritim Joel 2:13.) Dispela ves i kirapim em long tingim olsem em i mas bihainim pasin bilong Jehova, em i gat ‘pasin bilong sori na marimari, i no save belhat kwik, na i save laikim yumi tumas.’ Em i tingting long senisim sampela pasin, long wanem, sampela taim em i save kros na mekim tok i bagarapim bel bilong man bilong em na ol narapela.

⁷ Namba 3, tingim olsem wanpela brata i gat meri na ol pikinini. Ol i pinisim em long wok mani, olsem na em i wari long olsem wanem em bai lukautim famili bilong em. Em i ritim gut Buk Nahum. Long Nahum 1:7, em i ritim olsem Jehova i save long ol man i trastim em na em bai lukautim ol “long taim bilong hevi.” Dispela i helpim brata long luksave olsem Jehova i laikim em na famili bilong em, olsem na nau em i no wari tumas. Orait nau em i ritim gut ves 15. (Ritim Nahum 1:15.) Em i luksave olsem em inap soim klia olsem em i trastim Jehova taim em i autim gutnius, na em inap mekim olsem tu long taim bilong bikpela hevi. Olsem na taim em i wok long painim wanpela nupela wok, em bai yusim bikpela haptaim moa namel long wik long autim tok.

 8. Stori long wanpela gutpela samting yu kisim save long en taim yu ritim Baibel.

⁸ Ol dispela stori yumi skelim pinis i kam long ol buk bilong Baibel em sampela i ting i hatwok long kliagut long en. Tasol taim yu ritim ol dispela buk na painim ol ves i strongim yu, dispela bai mekim na yu amamas long ritim yet ol dispela buk. Ol dispela tok inap mekim gut bel bilong yumi na helpim yumi long kisim savetingting. Olgeta buk i stap long Baibel inap helpim yumi long wankain rot. Tok Bilong God i olsem wanpela main we i gat planti daimon i stap aninit tru long graun. Taim yu ritim Baibel olgeta, wok yet long painim ol “daimon,” o ol gutpela stiatok na ol tok bilong strongim yumi!

 9. Yumi ken mekim wanem bilong kliagut moa long ol tok bilong Baibel?

⁹ Em i bikpela samting long ritim Baibel long olgeta de. Tasol yu mas kliagut long ol tok yu ritim. Olsem na yu mas skelim ol buk na nius bilong yumi long kisim sampela save moa long ol manmeri, ol ples, na ol samting yu ritim. Sapos yu no kliagut long olsem wanem yu inap bihainim tok yu ritim long Baibel, yu ken askim wanpela elda o wanpela strongpela brata o sista long helpim yu. Wanpela Kristen long taim bilong raitim Baibel i nidim ol narapela long helpim em long kisim stretpela save na kliagut long tok i tru. Nem bilong em Apolos.

10, 11. (a) Olsem wanem Apolos i kisim helpim long mekim gutpela wok moa long autim gutnius? (b) Yumi inap kisim wanem skul long stori bilong Apolos? (Lukim blok “Wok Tisa Bilong Yu i Stret Wantaim Ol Nupela Save?”)

¹⁰ Apolos em i bilong lain Juda, na em i wanpela Kristen husat i save gut long ol tok i stap long buk bilong God, na em i save givim bel tru long autim tok. Buk Aposel i stori olsem em i save autim tok bilong Jisas. Tasol Apolos i no luksave olsem Jisas i givim nupela save long ol disaipel long sait bilong baptais. Tupela marit Kristen, Prisila na Akwila, ol i harim tok Apolos i autim long Efesus, na ol i “kliaim gut tingting bilong en long ol tok i stori long rot bilong God.” (Apo. 18:24-26) Olsem wanem dispela i helpim Apolos?

¹¹ Taim Apolos i go long Akaia, em i wok yet long autim tok. Em i helpim ol man husat i bilipim gutnius na em i yusim ol skripsa long kamapim klia olsem Jisas em i Krais, na tok bilong ol Juda i no stret. (Apo. 18:27, 28) Taim Apolos i kisim stretpela save long mining bilong baptais Kristen, em i “helpim tru” ol nupela man long kamap strong long tok i tru. Dispela inap skulim yumi long wanem samting? Yumi inap bihainim pasin bilong Apolos taim yumi wok strong long kliagut long ol tok yumi ritim long Baibel. Tasol yumi mas mekim pasin daun na amamas long ol tok ol narapela i givim bilong helpim yumi long kamap gutpela tisa moa.

12, 13. Olsem wanem yumi inap yusim ol skripsa long helpim wanpela sumatin bilong Baibel long kamap strong?

¹² Olsem Prisila, Akwila, na Apolos, yumi inap helpim ol narapela. Yu save pilim olsem wanem taim yu helpim wanpela man long mekim senis long laip bilong em bambai em inap kamap strong long tok i tru? O olsem wanpela elda, yu save pilim olsem wanem taim wanpela i tok tenkyu long tok kaunsel bilong Baibel em yu bin givim long em taim dispela man o meri i gat sampela hevi? Yumi save amamas tru taim yumi mekim wok long Baibel long helpim ol narapela long mekim sampela senis long laip bilong ol.a Olsem wanem yu inap mekim olsem?

¹³ Long taim bilong Elaija, planti lain Israel i no bin mekim disisen olsem ol bai bihainim lotu i tru o lotu giaman. Tok em Elaija i givim long lain Israel inap helpim Baibel sumatin husat i no mekim yet disisen long lotuim Jehova. (Ritim 1 King 18:21.) O ating wanpela man i laik stadi long Baibel, tasol em i pret olsem ol pren na famili bilong em bai sutim tok long em. Yu inap helpim em long mekim disisen long lotuim Jehova taim yu yusim tok bilong Aisaia 51:12, 13.—Ritim.

14. Wanem samting inap helpim yu long tingim ol tok bilong Baibel bambai yu inap helpim ol narapela?

¹⁴ I gat planti tok long Baibel we inap strongim na stretim yumi. Tasol ating yu laik save long olsem wanem yu inap painim ol skripsa em yu laik mekim wok long en. Ritim Baibel long olgeta de, na tingim tingim ol samting yu ritim. Yu bai save gut long ol tok bilong Baibel, na Jehova inap yusim holi spirit long helpim yu long tingim yet ol dispela tok.—Mak 13:11; ritim Jon 14:26.b

15. Wanem samting bai helpim yu long kliagut moa long Tok Bilong God?

¹⁵ Olsem King Solomon, beten askim Jehova long givim savetingting long yu. Yu mas i gat savetingting bilong mekim wok autim tok na long mekim wok insait long kongrigesen. (2 Sto. 1:7-10) Bihainim pasin bilong ol profet na skelim gut Tok Bilong God. Dispela bai helpim yu long kisim stretpela save long Jehova na laik bilong em. (1 Pita 1:10-12) Aposel Pol i tokim Timoti long stadi “long ol tok bilong bilip na long ol tok bilong gutpela skul.” (1 Tim. 4:6) Sapos yu wok yet long stadi long ol tok bilong Baibel, yu bai kliagut long en na yu bai lain long olsem wanem yu inap yusim long helpim ol narapela. Na tu, bilip bilong yu bai kamap strong moa.

16. (a) Pasin bilong ol Beria long ritim buk bilong God long olgeta de i bin helpim ol olsem wanem? (b) Bilong wanem em i bikpela samting long yumi mas ritim Baibel long olgeta de?

¹⁶ Ol Juda i stap long Beria i save ritim gut ol tok i stap long buk bilong God long olgeta de. Taim Pol i autim tok long ol, ol i save skelim tok bilong em wantaim save ol i gat pinis long buk bilong God. Ol i luksave olsem tok em i skulim ol long en i tru na “planti bilong ol i bilip.” (Apo. 17:10-12) Dispela inap skulim yumi olsem pasin bilong ritim Baibel long olgeta de inap helpim yumi long kisim strongpela bilip long Jehova. Yumi mas i gat strongpela bilip sapos yumi laik abrusim bagarap na kisim laip long nupela taim em God bai kamapim.—Hib. 11:1.

17, 18. (a) Olsem wanem strongpela bilip na pasin laikim inap lukautim tingting i stap long bel? (b) Olsem wanem pasin bilong bilip na wet inap lukautim yumi?

¹⁷ Pol i tok yumi mas i gat bilip, pasin laikim, na pasin bilong wet. Em i tok: “Yumi ol lain bilong san, yumi mas holim stretpela tingting na pasim bilip na pasin laikim olsem siot kapa. Na pasin bilong bilip na wetim God i kisim bek yumi, dispela i mas i stap olsem hat kapa bilong yumi.” (1 Tes. 5:8) Siot kapa em wanpela kain klos pait em soldia i save werim antap long bros bilong lukautim lewa, o bel bilong em. Olsem tasol, yumi tu i mas lukautim tingting i stap long bel. Taim wanpela Kristen i kisim strongpela bilip long ol tok promis bilong God na em i laikim tru Jehova na ol narapela, ol dispela samting i helpim em long lukautim tingting i stap long bel. Em bai mekim olgeta samting em inap mekim bambai God i ken orait long em.

¹⁸ Pol i kolim tu narapela samting yumi mas werim olsem hat kapa. Dispela i makim “pasin bilong bilip na wetim God i kisim bek yumi.” Ol soldia long taim bilong raitim Baibel i save werim hat kapa bilong lukautim het bilong ol. Taim yumi strongim pasin bilong yumi long bilip na wet long Jehova i kisim bek yumi, dispela inap lukautim tingting bilong yumi. Strongpela bilip yumi holim pinis bai helpim yumi long sakim ol apostet na ol tok giaman bilong ol we inap kam insait long kongrigesen olsem wanpela sik nogut. (2 Tim. 2:16-19) Samting yumi bilip na wet long en bai strongim yumi na helpim yumi long abrusim ol pasin i no stret.

19, 20. Bilong wanem yumi amamas tru long Tok Bilong God? Yumi mekim wanem bilong soim olsem yumi amamas long en? (Lukim blok “Jehova i Givim Mi Samting Mi Nidim.”)

¹⁹ Yumi wok long i go klostu moa long pinis bilong dispela haptaim bilong nau, olsem na yumi mas bilip strong moa long Tok Bilong Jehova. Tok Bilong Jehova inap helpim yumi long lusim ol pasin nogut na daunim olgeta kain laik bilong mekim sin. Taim yumi mekim olsem, dispela bai mekim gut bel bilong yumi na strongim yumi long sanap strong maski Satan na lain bilong em i putim kain kain hevi long yumi. Ol skultok i kam long Tok Bilong Jehova bai helpim yumi long stap yet long rot i go long laip.

²⁰ Laik bilong God em olsem, “em i laik kisim bek olgeta kain man.” Em i laik kisim bek ol wokman bilong em, na ol manmeri husat i save amamas long putim yau taim yumi autim tok na skulim ol long gutnius. Tasol olgeta man husat i laik abrusim bagarap taim dispela haptaim bilong nau i pinis, ol i mas gat “stretpela save long tok i tru.” (1 Tim. 2:4) Yumi mas ritim Baibel na bihainim ol tok bilong en sapos yumi laik abrusim bagarap. Pasin bilong yumi long ritim Baibel long olgeta de i soim olsem yumi laikim tru Tok Bilong Jehova.—Jon 17:17.