Naispela Presen Bilong Japan

SPESEL miting i kamap long Nagoya, Japan, long Epril 28, 2013, na Anthony Morris bilong Gavening Bodi i mekim toksave em odiens i amamas tru long harim​—wanpela nupela buk i kamap long tok Japan, Baibel—Gutnius Bilong Matyu. Winim 210,000 manmeri i harim ol tok i kamap long dispela miting—​sampela i stap long ples bung na sampela i harim long rot bilong Intenet. Taim ol i harim dispela toksave, ol i paitim han inap longpela taim.

Ol i kisim Gutnius Bilong Matyu long New World Translation long tok Japan na prinim gen, na buk i gat 128 pes. Brata Morris i tok, dispela buk i bilong “helpim ol manmeri bilong Japan.” Dispela buk i gat wanem ol gutpela samting? Wai na ol i wokim dispela buk? Ol man i pilim olsem wanem taim ol i kisim dispela buk?

Ol man i kirap nogut long stail bilong raitim ol tok. Ol manmeri long Japan i save raitim tok kirap long antap bilong pes na i go daun, o kirap long left sait na i go long rait sait. Long planti buk na nius​—na litresa bilong yumi long nau—​ol i raitim ol tok kirap long left sait na i go long rait sait. Tasol ol rait long nupela buk i kirap long antap na i go daun, na ol i bihainim stail bilong planti niuspepa na buk bilong Japan. Planti man i pilim olsem dispela stail em isi long ritim. Na tu, ol bikpela het tok i stap olsem ol liklik het tok namel long ol pes na bai ol man inap lukim kwik ol bikpela tok.

Ol bratasista long Japan i amamas tru. Wanpela sista i winim 80 krismas i tok: “Planti taim mi ritim Buk Matyu, tasol pasin bilong raitim tok kirap long antap na i go daun, na ol liklik het tok namel long pes i helpim mi long kliagut long mining bilong ol tok Jisas i mekim long Bikpela Tok Long Maunten.” Wanpela yangpela sista i tok: “Mi ritim buk Matyu na pinisim long dispela taim stret. Mi lain long ritim ol tok kirap long left sait i go long rait sait, tasol planti man long Japan i laikim stail bilong rait i kirap long antap na i go daun.”

Hau bai dispela buk inap helpim gut ol manmeri long Japan? Planti man long Japan i no save long Baibel, tasol ol i amamas long ritim dispela buk. Sampela man i no bin lukim Baibel, olsem na dispela buk i opim rot long ol yet inap holim na ritim wanpela buk bilong Baibel.

Wai na ol i makim buk Matyu? Planti man long Japan i save tingim Jisas Krais taim ol i harim dispela tok, “Baibel.” Ol i makim buk Matyu bikos em i kamapim stori bilong ol tumbuna bilong Jisas na de mama i karim em, na Bikpela Tok Long Maunten, na tok profet bilong ol samting bai kamap long haptaim bilong las de. Planti man long Japan bai i gat laik long save long ol dispela samting.

Ol pablisa long Japan i givim bel tru long tilim dispela buk taim ol i autim tok na mekim ol gobek. Wanpela sista i tok: “Nau mi gat planti rot long tilim Baibel long ol man long teritori. Mi tilim 1-pela kopi bilong buk Matyu long apinun bihain stret long spesel miting!”

Olsem wanem ol pablisa i tilim buk Matyu? Planti manmeri long Japan i save long ol kain tok olsem “liklik geit,” na tromoi ‘ol gutpela bis i go long ol pik,’ na “no ken tingting planti long ol samting bilong de antap.” (Mat. 6:34; 7:6, 13) Ol i kirap nogut taim ol i kisim save olsem Jisas Krais yet i bin mekim ol dispela tok. Taim ol i lukim ol dispela tok long Gutnius Bilong Matyu, planti bilong ol i tok: “Long bipo yet na i kam inap long nau, mi laik tru long wanpela taim mi mas ritim Baibel.”

Taim ol pablisa i go bek lukim ol manmeri i bin kisim buk Matyu, planti man i save tok olsem taim ol i kisim dispela buk, kwiktaim ol i bin kirap long ritim sampela hap o olgeta hap bilong en. Wanpela man husat i gat 65 krismas samting, em i tokim wanpela pablisa olsem: “Mi ritim dispela buk planti taim na ol tok bilong en i mekim gut bel bilong mi. Plis skulim mi long sampela moa tok bilong Baibel.”

Taim ol pablisa i autim tok long ol pablik ples, ol i save soim buk Matyu long ol man. Wanpela sista i autim tok na em i givim E-meil atres bilong em long wanpela yangpela meri husat i kisim buk Matyu. Inap 1-pela aua bihain, dispela meri i salim E-meil long sista na tokim em olsem em i ritim pinis wanpela hap bilong dispela buk na em i laik kisim sampela save moa. Wanpela wik bihain, em i kirap long stadi long Baibel, na i no longtaim em i stat long i go long ol miting.

Ol i sipim 1,600,000 kopi bilong buk Gutnius Bilong Matyu i go long ol kongrigesen long Japan, na long olgeta wan wan mun ol Witnes i save tilim planti tausen kopi bilong dispela buk. Tok i go pas long dispela buk i kamapim tingting bilong lain i bin wokim dispela buk, na ol i tok: “Mipela i laik tru olsem taim yu ritim dispela buk, dispela bai kirapim tru laik bilong yu long kisim save long ol tok bilong Baibel.”