Dispela Bilip i Stret Wantaim Pasin Sori Bilong God?

‘MIPELA i bilip olsem God i bin makim wanem wanem samting em i laik mekim long olgeta wan wan man. Em i no bin wokim olgeta bilong i stap wankain tasol; em i makim sampela bilong kisim laip i stap oltaim oltaim na sampela bilong kisim strafe bilong i stap oltaim oltaim.’

Em tok bilong Jon Kalvin, em wanpela man i bin go pas long kamapim lotu Talatala; em i mekim dispela tok long buk Institutes of the Christian Religion. As bilong dispela bilip bilong em, em dispela tingting olsem God i save long olgeta samting, na ol man em i bin wokim ol, ol i no inap skelim laik bilong em o subim em long senisim laik bilong em.

Tasol yumi laik save: Tru Baibel i tok olsem long God? Na bikpela samting moa em olsem: Dispela bilip i stret wantaim pasin sori bilong God na ol narapela gutpela pasin bilong em?

God Inap Tokaut Long Ol Samting Bai Kamap Bihain

God inap tokaut long ol samting bai kamap bihain. Em yet i tok: “Taim wanpela samting i no kamap yet, mi save tokaut long dispela samting bai i kamap na bai i go pinis olsem wanem. . . . Sapos mi laik mekim wanpela samting, orait mi save mekim tasol. Na i no gat wanpela samting inap pasim mi long mekim.” (Aisaia 46:10) Kirap long bipo yet, God i bin putim ol tok profet bilong em long Baibel bilong kamapim klia olsem em i save long olgeta samting bai kamap bihain; olsem na em inap mekim wok long dispela save na taim wanpela samting i no kamap yet em inap tokaut long dispela samting bai kamap.

Olsem na long taim bilong Belsasar, em king bilong Babilon, profet Daniel i driman na i lukim tupela wel animal, em narapela i daunim na senisim narapela. Jehova i kamapim insait bilong dispela driman olsem: “Yu bin lukim wanpela sipsip man i gat tupela kom. Em i makim kantri Midia na kantri Persia. Na dispela meme yu bin lukim, em i makim kantri Grik.” (Daniel 8:​20, 21) Em nau, God i tokaut long ol bikpela gavman bilong graun bai kamap bihain, em narapela bai kamap bihain long narapela. Taim Daniel i kisim dispela driman, gavman bilong Babilon i stap, na gavman bilong Midia na Persia bai kamap bihain long en, na bihain gavman bilong kantri Grik bai kamap.

Sampela tok profet i tok long wanpela man tasol, olsem: Profet Maika i tokaut long Mesaia bai kamap na mama bai karim em long Betlehem. (Maika 5:⁠2) Long dispela taim tu God i mekim wok long dispela save bilong em long ol samting bai kamap bihain. Tru, long dispela taim God i makim stret wanpela man. Tasol yumi no ken ting dispela i strongim bilip olsem God i makim pinis samting i mas painim olgeta wan wan man long bihain.

Baibel i kamapim klia olsem sampela taim God i no laik mekim wok long save bilong em long ol samting bai kamap bihain. Klostu long taim em i bagarapim Sodom na Gomora, em i tokaut olsem: “Bai mi go daun na lukim pasin ol dispela manmeri i mekim. Na bai mi ken save, ol dispela tok mi harim pinis, em i tru o nogat.” (Stat 18:21) Dispela tok bilong Baibel i kamapim klia olsem God i no save long pasin nogut tru ol man bilong tupela taun i mekim; em i mas i go lukim pastaim.

Tru, God inap save long ol samting bai kamap bihain, tasol planti taim em i no laik mekim wok long dispela save bilong em. God i gat olgeta strong, olsem na em yet inap makim wanem wok em i laik mekim long dispela save bilong em; em i no ken bihainim laik bilong ol man bilong graun i gat sin.

God Inap Stretim Ol Tok

Sampela man i bihainim tingting bilong Kalvin na ol i tok, taim God i no wokim yet namba wan man na meri, em i makim pinis olsem tupela bai mekim sin, na taim tupela i no mekim sin yet, em i makim pinis sampela man bilong em yet. Tasol sapos dispela tok i tru, yu ting God i mekim pasin i stret taim em i tokim Adam tupela Iv long rot bilong kisim laip i stap oltaim, tasol em i save pinis tupela i no inap i stap oltaim? Dispela pasin i no stret, a? Bai God i olsem man bilong tupela maus. Baibel i kamapim klia olsem God i makim tupela rot bilong ol​—⁠ol i ken bihainim tok bilong God na i stap oltaim oltaim, o ol i ken sakim tok bilong God na dai.​—⁠Stat, sapta 2.

Tasol yu ting sin bilong Adam na Iv i pasim God long kamapim laik bilong em? Nogat. Taim tupela i mekim rong pinis, kwiktaim God i tokaut olsem em bai kamapim wanpela ‘pikinini’ em bai bagarapim Satan wantaim lain bilong em na God bai stretim bek ol samting long graun. Sampela liklik binatang i no inap pasim man long kamapim planti kaikai long gaden bilong em, na olsem tasol pasin bikhet bilong Adam na Iv i no inap pasim God long mekim dispela graun i kamap paradais.​—⁠Stat, sapta 3.

Bihain God i tokaut olsem bai i gat wanpela gavman, olsem Kingdom, em bai givim long wanpela tumbuna pikinini bilong King Devit, na sampela moa bai insait long dispela Kingdom. Baibel i kolim ol dispela narapela olsem “ol manmeri bilong God Antap Tru.”​—⁠Daniel 7:18; 2 Samuel 7:12; 1 Stori 17:11.a

Tokaut Long Samting Bai Kamap Bihain

God i no laik save wanem rot ol man bai bihainim, tasol dispela i no pasim em long mekim tok profet long ol samting bai kamap long gutpela pasin o pasin nogut ol man i mekim. Sapos wanpela mekenik i tokaut long draiva olsem planti samting long ka bilong em i no gutpela, orait sapos bihain wanpela bagarap i painim dispela ka, draiva i no ken tok, em asua bilong mekenik, o mekenik i makim pinis olsem bagarap i mas painim ka long bihain. Olsem tasol sapos wanpela man i mekim sampela pasin na dispela i kamapim bikpela hevi long em, em i no inap tok, em asua bilong God.

Na i wankain tu long ol tumbuna pikinini bilong namba wan man na meri. Taim Kein i no kilim i dai yet brata bilong em, God i soim tupela rot long Kein, olsem: Bai em i bosim sin, o bai em i larim sin i bosim em? I no gat wanpela tok long Baibel olsem Jehova i makim pinis olsem Kein bai bihainim rot nogut na kilim i dai brata bilong em.​—⁠Stat 4:​3-7.

Bihain Lo Bilong Moses i toksave long ol Israel long ol samting bai painim ol sapos ol i lusim Jehova, olsem maritim meri bilong ol lain haiden i stap nabaut. Na samting Baibel i tok profet long en i kamap tru. Yumi ken tingim King Solomon: Taim em i go lapun, ol meri haiden bilong em i pulim em long lotuim ol god giaman. (1 King 11:​7, 8) Em nau, God i givim toksave long lain bilong em, tasol em i no makim ol samting olgeta wan wan bai mekim bihain, nogat.

Ol Kristen God i makim bilong em yet, ol i mas sanap strong bambai ol i no ken lus long kisim gutpela prais i wetim ol, olsem mekim wok king wantaim Krais long heven. (2 Pita 1:10; KTH 2:​5, 10, 16; 3:11) Olsem sampela tisa bilong lotu i bin askim bipo: Ol dispela Kristen God i bin singautim ol, bilong wanem em i givim ol dispela toksave long ol long sanap strong sapos em i no gat wok long putim mak long ol bihain?

Dispela Bilip na Sori Bilong God

God i bin wokim man bambai em yet i ken tingim wanem rot em bai bihainim, long wanem, God i bin wokim em i ‘wankain olsem God yet.’ (Stat 1:27) God i mas wokim man olsem bambai bel bilong man yet i ken kirapim em long litimapim nem bilong God na mekim wok bilong em, long wanem, em i laikim tumas God. God i no laik bai man i olsem wanpela masin na em i mas mekim olgeta samting olsem God i makim pinis. Taim ol man yet i ken tingim na skelim ol samting ol i laik mekim na long laik bilong ol yet ol i givim bel long God, dispela i helpim God long bekim tok long ol man i sutim nating tok long em. Em i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”​—⁠Sindaun 27:⁠11.

Sapos God i bin makim ol wokman bilong em taim ol i no bin kamap yet, ating ol i no givim bel tru long God na ol i mekim wok bilong em, a? Na sapos long bipo yet God i bin makim husat husat ol man bai kisim biknem na amamas long heven, i olsem em i no save mekim wankain pasin tasol long olgeta man. Na sapos God i makim sampela bilong kisim biknem na sampela bilong kisim strafe bilong i stap oltaim oltaim, ol dispela manmeri God i makim ol bilong em yet, ol i no ken amamas long God na tenkyu tru long em, a?​—⁠Stat 1:27; Jop 1:8; Aposel 10:​34, 35.

Na tingim dispela samting: Krais i bin tokim ol disaipel long autim gutnius long olgeta lain bilong graun. Orait, sapos God i makim pinis ol man em bai kisim bek ol, ating ol Kristen i no ken givim bel long mekim dispela wok, a? Na tu, i no gat wok long autim gutnius long ol man.

God i save laikim tru olgeta lain, na dispela i strongpela samting bilong kirapim ol man long laikim em tumas. Nambawan bikpela samting God i bin mekim bilong kamapim sori bilong em, i olsem: Em i givim Pikinini bilong em olsem ofa bilong helpim ol man i gat sin. God i save pinis long ol samting Pikinini bilong em bai mekim. Tru, i no planti taim Jehova i bin glasim man olsem, tasol em i mekim na bai yumi ken bilip tru olsem olgeta samting God i tok promis long Jisas bai mekim bilong stretim bek ol samting, Jisas bai inapim tru ol dispela promis. Olsem na yumi mas bilip tru long dispela Pikinini na go klostu long God long bel bilong yumi. God i singautim yumi long kamap wanbel wantaim em, na yumi mas mekim olsem bilong soim olsem yumi tenkyu long em. Long nau God i givim dispela singaut long olgeta man em long laik bilong ol yet ol i givim bel long em.

[Ol Futnot]

[Blok long pes 7]

GOD I MAKIM OL OLSEM WANPELA LAIN

“Ol man bipo tru God i tok pinis long kisim bek ol, em i makim ol tu, bilong kamap wankain olsem Pikinini bilong em. Olsem bai planti pikinini i ken i stap, na Krais i ken i stap namba wan brata bilong ol. Na dispela ol man bipo em i makim ol, . . . em i kolim ol stretpela man. . . . Em i givim gutpela laip na biknem bilong em yet long ol.” (Rom 8:​29, 30) Orait, olsem wanem long dispela tok bilong Pol, olsem God i “makim ol”?

Pol i no mekim dispela tok bilong helpim dispela bilip olsem God i makim pinis ol samting i mas painim ol man long bihain. Wanpela buk dikseneri bilong bipo liklik (Dictionnaire de théologie catholique) i stori long dispela tok bilong Pol (Rom, sapta 9-11) olsem: “Ol saveman bilong misin Katolik i ting dispela tok i no kamapim tingting olsem God i makim pinis sampela man bilong kisim laip i stap oltaim oltaim.” Na dispela buk i kamapim tok bilong M. Lagrange, em i tok: ‘Dispela tok bilong Pol i no makim olsem long bipo yet God i makim pinis sampela bilong kisim laip i stap oltaim oltaim na sampela bilong kisim strafe. Pol i laik tok olsem God i singautim ol man bilong ol narapela lain bilong kamap Kristen na kisim gutpela samting, long wanem, ol Juda i no bilip. . . . God i makim pinis ol lain, olsem ol lain i no Juda, na ol Juda​—⁠i no ol wan wan manmeri bilong ol dispela lain, nogat.’

Long nau, wanpela Baibel (The Jerusalem Bible) i kamapim wankain tingting long ol dispela sapta (9-11), na i tok: ‘Ol dispela sapta i no toktok long husat ol wan wan manmeri God i bin makim long bipo yet long kisim biknem long heven, na i no toktok long bilip tu; ol dispela sapta i toktok long wok bilong lain Israel insait long ol samting God i laik mekim bilong kisim bek ol man, na Olpela Testamen tu i toktok long dispela samting.’

Ol laspela ves bilong Rom sapta 8 i stori yet long dispela wankain samting. Olsem na i stret yumi ken kisim tingting long ol dispela ves olsem: Long bipo yet God i save pinis bai i gat wanpela lain namel long ol man bilong graun na em bai singautim ol bilong mekim wok king wantaim Krais, na em i save pinis long ol mak ol i mas winim​—⁠tasol long dispela taim bipo yet em i no bin makim husat husat em bai singautim ol, long wanem, dispela pasin i no stret wantaim pasin sori na stretpela pasin bilong em.