Yu Ting God i Makim Pinis Ol Samting Bai Painim Yumi?
KRISTEN, Muslim, Juda, Hindu, o man i bilip long narapela lotu—bikpela hevi na krai sori i painim man bilong olgeta lotu.
Olsem: Long Disemba 6, 1997, wanpela bikpela bagarap i kamap long biktaun Irkustisk, Saibiria. Wanpela traipela balus (AN-124) i kirap long go antap na tupela ensin bilong en i bagarap. Balus, em bensin i pulap pinis long teng bilong en, em i pundaun namel long ol haus. Paia i karamapim na kukim planti haus, na planti manmeri long ol dispela haus, ol pikinini tu, ol i dai o kisim hap bagarap—ol i no gat rot long abrusim.
Long hap bilong Saibiria dispela bagarap i bin kamap long en, tingting bilong ol man long ol samting bilong lotu em i narapela narapela. Sampela, maski ol i tok ol i bihainim lotu Kristen, ating ol i bilip olsem God i makim pinis dispela bagarap bai kamap. Ating ol i pilim olsem, ‘Em laik bilong God, na sapos ol i no bin i dai long dispela bagarap, orait i gat narapela rot ol bai i dai long en—em samting God i makim pinis.’
Kain tingting olsem, maski ol i tokaut long en o nogat, i kamapim wanpela bilip bilong planti lotu long olgeta hap—olsem God i makim pinis ol samting i mas kamap. Planti man i bilip olsem, olgeta samting i painim yumi kirap long taim mama i karim yumi i go inap long taim yumi dai, God i makim pinis olgeta dispela samting i mas kamap.
Dispela bilip em i kain kain, tasol planti man i bilip olsem olgeta samting i kamap, na olgeta samting yumi mekim—maski em gutpela samting o samting nogut—i no gat rot long abrusim, long wanem, wanpela bikpela strong, winim strong bilong ol man, i makim pinis ol dispela samting i mas kamap. Ol man i save lukluk long ol sta bilong kisim save long ol samting i laik kamap, na ol Hindu na Buda, na sampela misin tu, ol i bilip olsem God i makim pinis ol samting bai painim yumi. Long Babilon bilong bipo ol man i bilip olsem, ol god i holim strong bilong makim ol samting bai kamap, na ol i kisim dispela strong long rot bilong wanpela rait. Olsem na wanem wanem god i holim ol dispela “rait,” em inap makim wanem samting bai painim ol man, na ol gavman, na ol god yet.
Planti man i ting olsem taim mama i no karim yet pikinini, God i makim olgeta samting bai painim em, olsem em bai stap laip hamas yia, em i man o meri, maniman o rabisman, bel hevi o amamas. Ol i tok, taim ol dispela samting i no kamap yet, olgeta dispela samting i stap long tingting bilong God o long wanpela buk. Olsem na taim wanpela bagarap i kamap, planti ol i save tok, “mektoub,”—buk bilong God i tok olsem! Ol i ting sapos tru God i save long olgeta samting bai kamap, orait em i mas makim tu husat bai bihainim tok bilong em na husat bai sakim tok. Olsem na planti man i bilip olsem taim mama i no karim yet pikinini, God i makim pinis em bai kisim laip oltaim long Paradais o kisim strafe bilong i stap oltaim.
Ating yu pilim olsem dispela tingting em i wankain olsem bilip bilong sampela misin, ol tu i tok God i makim pinis ol samting i mas painim yumi. Nambawan man bilong strongim tru dispela bilip em wanpela man bilong Frans i bin stap 400 yia samting i go pinis; em wanpela Talatala i go pas long senisim sampela lo bilong lotu, nem bilong em Jon Kalvin. Em i tok, “God i bin makim wanem wanem samting em i laik mekim long olgeta wan wan man. Em i no bin wokim olgeta bilong i stap wankain tasol; em i makim sampela bilong kisim laip bilong i stap oltaim oltaim na sampela bilong kisim strafe bilong i stap oltaim oltaim.” Na Kalvin i tok: “God i save pinis namba wan man bai pundaun, na long rot bilong em ol lain tumbuna pikinini bilong em bai kisim bagarap, tasol i no dispela samting tasol; long laik bilong em yet God i makim pinis ol dispela samting i mas kamap.”
Tasol sampela man, em ol i bihainim ol lotu i lainim ol man olsem God i makim pinis ol samting bai painim yumi bihain, ol yet i no bilip long dispela samting. Sampela i tok, ol rait holi i tokaut olsem ol man inap bihainim wanem rot ol yet i makim. Bikpela tok pait i bin kamap long dispela tok—ol samting ol man i bin mekim, ol i mekim long laik bilong ol yet o God yet i bin makim ol dispela samting i mas kamap na ol i mekim olsem. Sampela i tok, God i gat stretpela pasin na em i save skelim na kotim ol man long ol samting ol i mekim, olsem na ol i mas i stap fri long tingim na bihainim wanem rot ol yet i makim. Tasol sampela i tok, God yet i makim samting ol man bai mekim, tasol long wanpela rot yumi no save long en ol i save “kisim” dispela pasin bilong ol, na God bai skelim ol long ol dispela samting ol i mekim. Tasol planti man i bilip olsem, olgeta samting i kamap long i stap bilong yumi, ol bikpela samting na ol liklik samting, God yet i bin makim ol dispela samting i mas kamap.
Wanem tingting bilong yu yet? Yu ting God i makim pinis ol samting bai painim yu long bihain? Yu ting ol man yet inap makim wanem rot ol i laik bihainim na ol samting bai painim ol long bihain? Ol samting yumi yet i mekim, dispela bai mekim wanem long ol samting i painim yumi long bihain? Stori i kamap bihain long dispela bai bekim ol dispela askim.
[Piksa Kredit Lain long pes 3]
SEL/Sipa Press