Helpim Ol Narapela Long Wokabaut Long Pasin Jehova i Laikim

“Oltaim mitupela i save prea na askim God long helpim yupela, bai yupela i ken . . . wokabaut long pasin bilong ol manmeri tru bilong Bikpela, na bai em i laikim olgeta pasin bilong yupela. Na bai yupela i mekim planti kain gutpela wok.”​—⁠KOLOSI 1:​9, 10.

1, 2. Wanem samting inap mekim bel bilong yumi i amamas?

“MIPELA i save sindaun long wanpela liklik haus i gat wil i stap long wanpela fam. Mipela i no wok long painim planti samting bilong skin, olsem na mipela i gat bikpela hap taim moa long autim gutnius long ol man. Olsem na mipela i kisim ol gutpela blesing tru. Mipela i bin helpim planti man long dediketim laip bilong ol long Jehova.”​​—⁠Em tok bilong tupela marit i save mekim wok bilong God long olgeta de long Saut Afrika.

² Em nau, taim yumi helpim ol man, yumi save amamas, a? Sampela ol i save wok strong long helpim ol sikman, ol man i sot long ol samting, o ol man i bel hevi long i stap wanpis, na ol i kisim amamas long mekim olsem. Ol Kristen tru i save gut olsem taim ol i skulim ol man long God Jehova na Jisas Krais, dispela i save helpim tru ol man, winim ol narapela samting ol inap mekim. Dispela wok tasol inap kirapim ol man long bilip long ofa bilong Jisas, na pas gut wantaim God, na long dispela rot ol inap kisim laip i stap oltaim.​​—⁠Aposel 3:​19-​21; 13:⁠48.

 3. Wanem kain pasin bilong helpim ol narapela em yumi mas tingim?

³ Tasol olsem wanem long wok bilong helpim ol man i kirap pinis long mekim wok bilong God, olsem ol i bihainim “Rot bilong Bikpela”? (Aposel 19:⁠9) Ating yu save tingim yet ol olsem pastaim yu bin mekim, tasol yu no save long sampela samting moa yu ken mekim, o olsem wanem yu ken helpim yet ol dispela lain. O sampela samting long sindaun bilong yu i mekim na yu ting yu no inap helpim ol tumas, olsem na yu kisim liklik amamas tasol long dispela wok. (Aposel 20:35) Long dispela tupela samting, Buk Kolosi inap givim sampela save long yumi.

 4. (a) Pol i stap olsem wanem na em i raitim pas long ol Kolosi? (b) Olsem wanem long Epafras?

⁴ Taim Pol i raitim pas long ol Kristen long Kolosi, em i stap long haus bilong em long Rom olsem wanpela kalabus, na wanpela soldia i was long em, tasol ol man inap i kam lukim em. Dispela i givim rot long em long autim tok bilong Kingdom. (Aposel 28:​16-31) Ol wanbilip inap i kam lukim Pol, na ating sampela i bin stap kalabus wantaim em long sampela taim. (Kolosi 1:​7, 8; 4:10) Wanpela man olsem, em Epafras, em strongpela man bilong autim tok. Em i bilong taun Kolosi long Frigia, i stap long hap is bilong Efesus long Esia Maina (nau ol i kolim Turki). Epafras i bin helpim wok bilong kamapim wanpela kongrigesen long Kolosi, na em i bin wok strong long helpim ol kongrigesen long Laodisia na Hierapolis, ol i stap klostu long Kolosi. (Kolosi 4:​12, 13) Bilong wanem Epafras i go long Rom bilong lukim Pol? Na yumi ken kisim wanem save long tok Pol i mekim taim em i harim pinis ol tok bilong Epafras?

Ol Kolosi i Kisim Gutpela Helpim

 5. Long pas Pol i raitim long ol Kolosi, bilong wanem em i raitim ol kain tok olsem?

⁵ Epafras i laik tokim Pol long ol samting bilong kongrigesen Kolosi, olsem na em i mas raun long rot i gat hatwok long en, na bihain em i kamap long Rom. Em i tokim Pol long strongpela bilip bilong ol dispela Kristen na long pasin bilong ol long laikim tru ol brata, na wok ol i mekim bilong autim gutnius. (Kolosi 1:​4-8) Tasol yumi ken ting em i bin toktok tu long sampela pasin i kamap insait long kongrigesen na i laik bagarapim ol Kolosi long ol samting bilong spirit. Olsem na Pol i kirap raitim pas em spirit holi i stiaim em long raitim, na em i daunim sampela tingting ol tisa giaman i wok long kamapim insait long kongrigesen. Em i mekim planti tok long bikpela wok bilong Jisas insait long bilip bilong ol.a Tasol bilong helpim kongrigesen, yu ting em i toktok tasol long ol as tok i tru bilong Baibel? Em inap mekim wanem samting moa bilong helpim ol Kolosi? Na dispela inap lainim yumi olsem wanem long pasin bilong helpim ol narapela?

 6. Long pas Pol i raitim long ol Kolosi, em i mekim bikpela tok long wanem samting?

⁶ Long kirap bilong pas, Pol i givim tingting long yumi long wanpela kain pasin bilong helpim ol brata. Em wanpela pasin i bin helpim ol brata long Kolosi, maski Pol na Epafras i stap longwe tru long ol. Pol i tokim ol: “Taim mitupela i mekim prea, oltaim mitupela i save tingting long yupela na tenkyu long God.” Em nau, ol dispela beten i bilong helpim ol Kristen long Kolosi. Pol i tok moa olsem: “Stat long namba wan de mitupela i bin harim long gutpela pasin bilong yupela, oltaim mitupela i save prea na askim God long helpim yupela, bai yupela i ken save gut tru long laik bilong em. Na bai Holi Spirit i ken givim yupela olkain gutpela save na tingting, na dispela i ken pulap tru long yupela.”​—⁠Kolosi 1:​3, 9.

7, 8. Long ol beten bilong yumi yet o bilong kongrigesen, planti taim yumi save beten long wanem samting?

⁷ Yumi save Jehova em i Man bilong harim beten, olsem na yumi ken bilip olsem em bai harim ol beten bilong yumi em ol i stret wantaim laik bilong em. (Song 65:2; 86:6; Sindaun 15:​8, 29; 1 Jon 5:14) Tasol taim yumi beten long helpim ol narapela, yumi save mekim wanem kain beten?

⁸ Ating planti taim yumi save tingting na beten long helpim ol “manmeri bilong God, ol i stap long olgeta hap.” (1 Pita 5:⁠9) O yumi save beten askim Jehova long helpim ol Kristen na ol narapela i stap long hap i gat bikpela bagarap o hevi. Long taim bilong ol aposel, ol disaipel bilong ol narapela hap i bin harim olsem bikpela hangre i kamap long Judia, na taim ol i no salim yet mani na kaikai samting bilong helpim ol brata, ating ol i bin mekim planti beten bilong helpim ol. (Aposel 11:​27-30) Long taim bilong yumi, long ol miting Kristen yumi save harim planti beten bilong helpim ol brata i stap long olgeta hap, o ol brata i stap long wanpela hap. Long ol dispela miting, i gat planti ol i bung na ol i mas kisim gut ol dispela beten na bai ol inap tok, Amen, olsem “I tru.”​​—⁠1 Korin 14:⁠16.

Kolim Stret Samting Yu Beten Long En

9, 10. (a) Wanem sampela beten long Baibel i soim yumi olsem i stret yumi ken beten long helpim wanpela man stret? (b) Olsem wanem nem bilong Pol i kamap insait long sampela beten?

⁹ Tasol Baibel i kamapim sampela beten em ol i bilong helpim wanpela man stret. Yumi ken tingim tok bilong Jisas long Luk 22:​31, 32. I gat 11-pela gutpela aposel i stap wantaim em, na olgeta i mas kisim helpim long God bambai ol i ken sanap strong long taim bilong hevi bihain bai kamap, na Jisas i beten long helpim ol. (Jon 17:​9-​14) Tasol Jisas i kolim stret nem bilong Pita, na em i beten long helpim dispela wanpela disaipel. I gat sampela beten moa olsem: Elisa i bin beten askim God long helpim wanpela man stret, em wokman bilong em. (2 King 6:​15-​17) Aposel Jon i beten bambai Gaius i ken stap strong long skin na long spirit. (3 Jon 1, 2) Sampela ol i beten long helpim wanpela liklik lain.​​—⁠Jop 42:​7, 8; Luk 6:​28; Aposel 7:60; 1 Timoti 2:​1, 2.

¹⁰ Planti taim ol pas bilong Pol i kamapim pasin bilong beten long helpim wanpela man o wanpela lain stret. Em i askim ol brata long beten bilong helpim em yet o bilong helpim em wantaim ol brata i stap wantaim em. Kolosi 4:​2, 3 i tok: “Yupela i mas holim strong pasin bilong prea. . . .  Yupela i mas prea long God i ken helpim mipela tu. Yupela i mas askim em long opim rot bilong mipela i ken autim tok bilong Krais. Dispela tok bipo em i bin i stap hait, na nau em i kamap ples klia pinis. Tasol ol man i no laik harim dispela tok, na ol i bin putim mi long kalabus.” Na yumi ken skelim tu ol narapela tok olsem, i stap long ol dispela skripsa: Rom 15:30; 1 Tesalonaika 5:25; 2 Tesalonaika 3:1; Hibru 13:⁠18.

11. Taim Epafras i stap long Rom, em i beten long helpim husat?

¹¹ I wankain tu long poroman bilong Pol i stap long Rom. “Epafras em i tok gude long yupela. . . . Oltaim em i save strong long prea na askim God long helpim yupela long sanap strong.” (Kolosi 4:12) Dispela tok “strong” i olsem “taitim bun tru,” olsem ol lain bilong pilai spot i bin mekim bipo. Olsem wanem? Epafras i bin beten strong long helpim tasol ol wanbilip i stap long olgeta hap o ol lain i save lotu tru long God long Esia Maina? Pol i makim olsem Epafras i beten long helpim ol brata long Kolosi stret. Epafras i save long ol hevi bilong ol. Tru, yumi no save long nem bilong olgeta wan wan, na yumi no save wanem kain hevi i bin painim ol, tasol yumi ken tingim sampela hevi inap kamap. Ating yangpela man Linus i gat pait long sakim tingting bilong ol saveman bilong graun, na Rufus i mas kisim strong bambai em i ken sakim pasin bilong lotu Juda em pastaim em i bin stap insait long en na i laik pulim em. Na yumi ken tingim Persis. Man bilong em i no bilip, olsem na ating em i mas sanap strong long karim hevi na kisim gutpela tingting na save bambai em inap skulim ol pikinini bilong em long bilip long Bikpela. Na Asinkritus i gat wanpela bikpela sik bilong i dai, na ating em i mas kisim sampela tok bilong mekim gut bel bilong em. Tru tumas, Epafras i save long ol brata sista i stap long kongrigesen bilong em, na em i beten strong long helpim ol, long wanem, em wantaim Pol i laik bai ol dispela gutpela bilipman i ken wokabaut long pasin Jehova i laikim.

12. Taim yumi mekim beten bilong yumi yet, yumi ken mekim wanem?

¹² Em nau, dispela i mas i stap olsem piksa bilong yumi ken bihainim​—⁠em wanpela rot bilong yumi ken helpim ol narapela. Olsem yumi tok pinis, taim ol i mekim beten long ol miting Kristen ol i save tingim bikpela lain brata, long wanem, i gat kain kain manmeri i stap long miting. Tasol taim yumi tasol i stap na yumi beten, o yumi beten wantaim famili, yumi ken kolim stret nem bilong wanpela man o meri. Sampela taim yumi save beten askim God long soim rot na mekim gut long olgeta wasman bilong raun o ol narapela wasman, tasol sampela taim yumi ken kolim stret nem bilong wanpela, a? Olsem: Yu ken beten na kolim nem bilong wasman sekit em i kam lukim kongrigesen bilong yu, o brata bilong lukautim Buk-Stadi bilong yu. Filipai 2:​25-28 na 1 Timoti 5:23 i kamapim olsem Pol i tingim tru Timoti na Epafroditus, em tupela i gat sik. Orait taim yumi beten yumi ken mekim wankain pasin long ol brata sista i gat sik em yumi save long nem bilong ol, a?

13. Wanem sampela samting i stret yumi ken kamapim taim yumi mekim beten bilong yumi yet?

¹³ Tru, yumi no ken toktok nabaut long ol samting bilong narapela man, tasol long beten bilong yumi, i stret yumi ken kamapim olsem yumi tingim tru ol manmeri yumi save long ol na yumi laikim ol tru. (1 Timoti 5:13; 1 Pita 4:15) Ating ol i bin pinisim wanpela brata long wok, na yumi no inap painim narapela wok bilong em. Tasol long beten bilong yumi yet, yumi ken kolim nem bilong em na kamapim dispela hevi bilong em. (Song 37:25; Sindaun 10:⁠3) Olsem wanem? Yumi save long wanpela sista em i wok long go lapun na em i no gat man na ol pikinini, long wanem, em i strong long maritim man “i bilip long Bikpela” na em i no laikim narapela man? (1 Korin 7:39) Orait taim yu mekim beten bilong yu yet, yu ken askim Jehova long mekim gut long em na helpim em long stap gut long wok bilong God. Na yumi ken tingim narapela samting, olsem: Ating wanpela brata i bin mekim rong na tupela elda i givim tok long em bilong stretim em. Orait taim tupela i mekim beten bilong ol yet, sampela taim ol i ken tingim em na kolim nem bilong em, a?

14. Taim yumi mekim beten bilong yumi yet, olsem wanem yumi ken helpim ol narapela?

¹⁴ Em nau, taim yu mekim beten bilong yu yet, yu gat planti rot long kamapim nem bilong ol man ol i mas kisim helpim long Jehova bilong strongim ol, na mekim gut bel bilong ol, na givim gutpela tingting na spirit holi long ol, o sampela gutpela pasin em spirit holi i save kamapim. Tru, sapos ol i stap longwe o i gat narapela samting i pasim yu, ating yu no inap helpim ol tumas long sampela samting bilong skin o go lukim ol. Tasol yu no ken lusim tingting long mekim beten bilong helpim ol brata sista. Yu save ol i gat laik long wokabaut long pasin Jehova i laikim, tasol ating ol i mas i gat helpim bambai ol i ken mekim olsem inap long olgeta taim. Wanpela bikpela samting bilong helpim ol, em ol beten bilong yu.​​—⁠Song 18:2; 20:​1, 2; 34:15; 46:1; 121:​1-3.

Wok Long Strongim Ol Narapela

15. Bilong wanem yumi mas tingim gut ol tok i stap long laspela hap bilong Buk Kolosi?

¹⁵ Tru, pasin bilong beten strong na kolim nem bilong man insait long beten, i no dispela rot tasol bilong helpim ol narapela. I gat sampela rot moa, na i gat planti rot bilong helpim ol lain yumi laikim tumas ol, olsem famili samting. Buk Kolosi i kamapim klia dispela samting. Planti saveman i tok, taim Pol i givim tok long ol Kolosi long ol samting bilong bilip na ol tok bilong helpim ol, orait nau em i givim gude bilong sampela brata i go long ol na em tasol. (Kolosi 4:​7-18) Tasol dispela tok i no stret. Yumi lukim pinis olsem laspela hap bilong dispela buk i gat sampela bikpela tok bilong helpim ol, na ol dispela tok inap lainim yumi long sampela samting moa.

16, 17. Yumi ken tok wanem long ol brata em Pol i bin kolim nem bilong ol long Kolosi 4:​10, 11?

¹⁶ Pol i tok olsem: “Aristarkus, em i kalabus wantaim mi, em i tok gude long yupela. Na Mak . . . , em tu i tok gude long yupela. Sapos em i kam long yupela, orait yupela i mas amamas long kisim em, olsem mi bin salim tok na tokim yupela pinis. Na Jisas, ol i kolim Jastus, em tu i tok gude long yupela. Long lain bilong ol Juda, dispela ol man tasol i save wok wantaim mi long kirapim kingdom bilong God, na ol i helpim mi gut tru.”​—⁠Kolosi 4:​10, 11.

¹⁷ Long ol dispela ves Pol i kolim nem bilong sampela brata ol i bin helpim em gut tru. Em i tok ol i bilong lain Juda. I gat planti Juda long Rom, na sampela ol i kamap Kristen pinis. Tasol ol brata em Pol i kolim nem bilong ol, ol i bin helpim em. Yumi ken ting ol i no bin surik long bung wantaim ol Kristen em ol i bilong ol narapela lain, na ating ol i bin amamas tru long wok wantaim Pol long autim tok long ol manmeri bilong ol narapela lain.​​—⁠Rom 11:13; Galesia 1:16; 2:​11-​14.

18. Pol i mekim wanem gutpela tok long sampela brata ol i stap wantaim em?

¹⁸ Tingim dispela tok bilong Pol: “Ol dispela man tasol . . . ol i helpim mi gut tru.” Em i kolim wanpela tok Grik i kamap long dispela wanpela taim tasol long Baibel. Planti man bilong tanim Baibel ol i tanim dispela tok olsem “mekim gut bel bilong man.” Tasol i gat narapela tok Grik (pa·ra·ka·le’o), na planti taim ol i save tanim olsem “mekim gut bel bilong man.” Pol i kolim dispela tok long ol narapela hap bilong dispela pas, tasol long Kolosi 4:​11, nogat.​​—⁠Matyu 5:4; Aposel 4:36; 9:31; 2 Korin 1:4; Kolosi 2:2; 4:⁠8.

19, 20. (a) Wanem insait bilong tok Pol i mekim long ol brata i stap long Rom na ol i helpim em? (b) Ating ol dispela brata i bin mekim wanem bilong helpim Pol?

¹⁹ Ol brata em Pol i kolim nem bilong ol, ating ol i no bin givim tok tasol long em bilong mekim gut bel bilong em. Dispela tok Grik ol i tanim long Kolosi 4:11 olsem ‘helpim gut tru,’ sampela taim ol buk bilong graun i bin kolim bilong makim wanpela marasin bilong daunim bel hevi. Wanpela Baibel (New Life Version) i tok: “Man! Ol i bin helpim mi gut tru!” Na narapela Baibel (Today’s English Version), em tu i tok: “Ol i bin helpim mi gut tru.” Ol brata Kristen i stap klostu long Pol, ating ol i bin mekim wanem bilong helpim em?

²⁰ Ol man inap i kam lukim Pol, tasol i gat planti samting em i no inap mekim, olsem baim ol samting em i mas kisim, olsem kaikai o klos bilong taim bilong kol. Na olsem wanem em bai kisim ol buk bilong stadi, o baim ol pepa samting bilong raitim ol pas? (2 Timoti 4:13) Yumi ken ting ol dispela brata i bin helpim Pol long ol samting em i mas kisim, olsem go long stua bilong baim ol samting, o mekim ol narapela wok olsem. Ating em i gat laik long go lukim na strongim wanpela kongrigesen, tasol em i stap olsem kalabus na em i no inap mekim. Olsem na bilong helpim Pol, ating ol dispela brata i go lukim ol kongrigesen, na bringim tok bilong em i go long ol, na kisim sampela tok i kam bek. Man! Dispela i strongim tru bel bilong em!

21, 22. (a) Bilong wanem yumi mas tingim tok i stap long Kolosi 4:​11? (b) Wanem sampela samting yumi ken mekim bilong bihainim pasin bilong ol brata i stap wantaim Pol?

²¹ Dispela tok Pol i mekim, olsem “ol i helpim mi gut tru,” dispela inap givim sampela tingting long yumi long olsem wanem yumi ken helpim ol brata. Ating ol i save bihainim ol lo bilong Jehova na wokabaut long pasin Jehova i laikim, na ol i go long ol miting Kristen, na autim tok. Yumi mas givim gutpela tok amamas long ol long dispela samting. Tasol olsem wanem? Yumi inap mekim sampela samting moa bilong strongim ol na ‘helpim ol gut tru’ olsem ol brata i stap wantaim Pol ol i bin mekim?

²² Sapos yu save long wanpela sista i bin bihainim tok bilong 1 Korin 7:​37 tasol nau em i no gat famili bilong em i stap klostu, yu ken singautim em i kam kaikai wantaim famili bilong yu, o kam long wanpela bung yu mekim wantaim ol pren o famili bilong yu, a? O yu ken singautim em i go wantaim famili bilong yu long wanpela kibung o go limlimbur wantaim yupela. O yu ken singautim em i go wantaim yu taim yu laik baim kaikai, na em i ken makim taim i stret long em. Na yu ken mekim wankain pasin long ol meri, man bilong ol i dai pinis, na ol man, meri bilong ol i dai pinis, o ol brata sista nau ol i no inap draivim ka. Yu inap kisim amamas long harim ol stori bilong ol, o kisim sampela save long ol long pasin bilong baim gutpela kaikai o baim ol klos bilong ol pikinini. (Wok Pris 19:32; Sindaun 16:31) Ating dispela pasin bai mekim na yupela bai pas gut wantaim. Olsem na bai ol i no ken surik long askim yu long helpim ol sapos ol i mas kisim sampela marasin long haus marasin o mekim ol kain samting olsem. Yumi ken ting ol brata i stap wantaim Pol long Rom ol i bin mekim ol samting bilong helpim em gut tru, na yu tu inap mekim olsem. Long bipo na long nau tu, bai yumi kisim ol gutpela blesing long en, olsem: Pasin bilong laikim tru ol narapela bai kamap strong moa, na bai yumi tingting strong moa long wok wantaim long mekim wok bilong Jehova na stap gut long em.

23. I gutpela sapos yumi olgeta wan wan i ken lusim hap taim long mekim wanem?

²³ Yumi olgeta wan wan i ken tingim ol hevi i save kamap olsem yumi bin toktok long en. Tru, yumi kolim sampela hevi tasol. Tasol em inap kirapim yumi long tingim ol samting yumi ken mekim bilong ‘helpim gut tru’ ol brata sista i gat sampela hevi long sindaun bilong ol. Tasol mipela i no tok yumi mas kisim wankain tingting olsem ol man i laik kirapim pasin bilong helpim sindaun bilong ol man, nogat. Dispela i no tingting bilong ol brata em Pol i stori long ol long Kolosi 4:​10, 11. Pol i tok ol i “wok wantaim mi long kirapim kingdom bilong God.” Dispela em i wanpela bikpela samting i bin strongim Pol, na em i mas wankain tu long yumi.

24. Wanem as na yumi save beten long helpim ol narapela na painim rot bilong strongim ol?

²⁴ Yumi save kamapim nem bilong ol brata sista insait long ol beten bilong yumi yet na yumi wok strong long mekim ol samting bilong strongim ol, na as bilong dispela i olsem: Yumi bilip olsem ol brata sista bilong yumi ol i gat laik long wokabaut long pasin Jehova i laikim. (Kolosi 1:10) Dispela i insait long narapela samting Pol i toktok long en taim em i stori long beten bilong Epafras long helpim ol Kolosi, olsem em i laik bai ol i “sanap strong olsem ol Kristen i kisim pinis pasin bilong God na i save gut tru long olgeta laik bilong God.” (Kolosi 4:12) Olsem wanem yumi yet inap mekim olsem? Bai yumi stori long dispela samting.

[Futnot]

Yu Tingim?

• Taim yumi mekim beten bilong yumi yet, yumi ken mekim wanem bilong helpim gut ol narapela?

• Olsem wanem sampela Kristen ol i bin ‘helpim gut’ Pol?

• Wanem taim yumi ken ‘helpim gut tru’ ol narapela?

• Taim yumi beten long helpim ol brata sista na yumi laik painim rot bilong strongim ol, yumi gat wanem tingting na yumi mekim olsem?

[Piksa long pes 18]

Taim yu laik raun liklik wantaim famili bilong kisim amamas, yu inap singautim narapela Kristen i go wantaim yupela?

[Kredit Lain]

Courtesy of Green Chimney’s Farm