Buk Song
Tok i go long dairekta; singim long nek ol i kolim “Pisin Balus i Stap Isi na i Stap Longwe.” Singsing bilong Devit. Miktaim.* Em i raitim dispela song taim ol Filistia i holimpas em long Get.+
56 Ol man i wok long pait long mi, olsem na God, yu mas tingim mi.
Olgeta de ol i pait long mi na mekim nogut long mi.
2 Long olgeta de, ol birua bilong mi i wok long pait long mi;
Ol i ting olsem ol bai winim mi, olsem na ol i pait long mi.
3 Taim mi pret,+ mi bilip strong long yu.+
4 Mi bilip tru long God. Na mi save givim biknem long ol tok bilong em;
Mi bilip tru long God; na mi no pret long wanpela samting.
Olsem na ol man nating inap mekim wanem samting long mi?+
5 Long olgeta de ol samting mi laik mekim, ol i save bagarapim;
Ol i tingting tasol long bagarapim mi.+
6 Ol i save hait i stap bilong bagarapim mi;
Ol i save putim was long olgeta wokabaut bilong mi,+
Na ol i laik pinisim laip bilong mi.+
7 God, ol i save mekim pasin nogut tru, olsem na yu mas sakim ol.
Long belhat bilong yu, mekim save long ol.+
8 Yu save long ol wokabaut bilong mi.+
Yu mas pulapim aiwara bilong mi long beg wara* bilong yu.+
Na raitim dispela long buk bilong yu.+
9 Long de mi singaut long yu helpim mi, ol birua bilong mi bai i lusim mi na ranawe.+
Mi save olsem God i stap wantaim mi.+
10 Mi trastim tru God, na mi save givim biknem long ol tok bilong em;
Mi trastim tru Jehova, na mi save givim biknem long ol tok bilong em;
11 Mi bilip tru long God; na mi no pret long wanpela samting.+
Olsem na ol man nating inap mekim wanem samting long mi?+