Mi Laik Dai—Baibel Inap Helpim Mi Taim Mi Tingting Long Suasaid?
Bekim bilong Baibel
Yes! Baibel i kam long “God husat i save mekim isi bel bilong ol man em bel hevi i daunim ol.” (2 Korin 7:6) Baibel i no wanpela buk bilong helt i stori long sik bilong tingting, tasol em i bin helpim planti man long daunim tingting bilong suasaid. Ol gutpela edvais bilong Baibel inap helpim yu tu.
Baibel i givim wanem ol gutpela edvais?
● Autim filings bilong yu.
Baibel i tok: “Trupela pren i save soim pasin laikim long olgeta taim na em i kamap olsem brata bilong yu long taim bilong hevi.”—Provep 17:17.
Wanem mining bilong skripsa?: Yumi nidim helpim bilong ol narapela taim yumi bel hevi tru.
Sapos yu no autim filings bilong yu, bel hevi bilong yu bai kamap bikpela moa na daunim yu. Tasol sapos yu autim filings bilong yu, dispela inap daunim bel hevi bilong yu liklik na helpim yu long kisim stretpela tingting long hevi bilong yu.
Traim dispela: Toktok wantaim wanpela long famili o wanpela pren em yu trastim. Na tu, wanem filings yu gat, i gutpela long raitim long wanpela buk.
● Kisim helpim long dokta.
Baibel i tok: “Ol man i no gat sik ol i no save go lukim dokta, tasol ol sikman ol i save go lukim dokta.”—Matyu 9:12.
Wanem mining bilong skripsa?: Yumi mas go lukim dokta taim yumi sik.
Tingting bilong suasaid em mak i soim olsem man i gat sik bilong tingting o sik bilong bel hevi. Olsem ol sik bilong bodi, em i no samting bilong sem long en. I gat rot bilong stretim sik bilong tingting na bel hevi.
Traim dispela: Kisim kwik helpim long dokta bilong tingting.
● Tingim olsem God i save tingim yu.
Baibel i tok: “Ol man i save salim 5-pela liklik pisin long 2-pela koin i gat liklik pe. Tasol God i no save lusim tingting long wanpela bilong ol dispela pisin. . . . Yupela i no ken pret; yupela i winim tru ol dispela liklik pisin.”—Luk 12:6, 7.
Wanem mining bilong skripsa?: Yu dia tumas long ai bilong God.
Ating yu pilim olsem yu stap wanpis, tasol God i lukim hevi yu wok long karim. Em i tingim yu maski yu pilim olsem yu no laik stap laip. Buk Song 51:17 i tok, “O God, yu no save givim baksait long man em bel bilong em i bagarap na em i pilim nogut tru.” God i laik bai yu stap laip bikos em i laikim yu.
Traim dispela: Skelim ol tok long Baibel i soim olsem God i laikim yu. Olsem, lukim sapta 24 bilong buk Go Klostu Long Jehova.
● Beten long God.
Baibel i tok: “God i save wari long yupela, olsem na yupela i mas putim olgeta hevi bilong yupela long han bilong em.”—1 Pita 5:7.
Wanem mining bilong skripsa?: God i laik bai yu tokim em long filings bilong yu na ol samting yu tingting planti long en.
God inap givim yu bel isi na strong long karim hevi bilong yu. (Filipai 4:6, 7, 13) Long dispela rot, em i save strongim ol man i askim em long helpim ol.—Buk Song 55:22.
Traim dispela: Yu mas beten long God long nau. Yusim nem bilong em, Jehova, na tokim em long tingting bilong yu. (Buk Song 83:18) Askim em long helpim yu na bai yu no ken givap.
● Tingim tingim long bel ol tok bilong Baibel long gutpela samting bai kamap bihain.
Baibel i tok: “Dispela samting yumi bilip na wet long en i stap olsem anka bilong laip bilong yumi. Em i stap strong na i no inap surik liklik.”—Hibru 6:19.
Wanem mining bilong skripsa?: Filings bilong yu inap senis senis, yu inap pilim amamas na bihain pilim bel hevi wankain olsem wanpela sip i stap long solwara long taim bilong bikpela win na ren. Tasol ol gutpela tok bilong Baibel long ol samting bai kamap bihain inap mekim bel bilong yu i stap isi.
Ol dispela gutpela tok bilong Baibel i no tok nating, nogat. Em ol tok promis bilong God long rausim olgeta samting i save givim pen na hevi long yumi.—Revelesen 21:4.
Traim dispela: Kisim sampela save moa long ol gutpela tok promis bilong Baibel long lesen 5 bilong buklet Gutpela Nius i Kam Long God!
● Mekim ol samting em yu save amamas long mekim.
Baibel i tok: “Bel i save stap amamas, em i gutpela marasin.”—Provep 17:22.
Wanem mining bilong skripsa?: Taim yumi mekim ol samting i save givim amamas long yumi, dispela inap helpim tingting na bel bilong yumi long stap gut.
Traim dispela: Mekim samting em yu save amamas long mekim. Olsem, harim ol musik i mekim yu amamas, ritim ol tok we inap strongim yu, o lain long mekim wanpela samting. Amamas bilong yu bai kamap bikpela tu sapos yu mekim ol samting bilong helpim ol narapela, maski em ol liklik samting.—Aposel 20:35.
● Lukautim gut helt bilong yu.
Baibel i tok: “Pasin bilong kisim trening long bodi inap helpim yu.”—1 Timoti 4:8.
Wanem mining bilong skripsa?: Taim yumi eksasais, slip gut, na kisim gutpela kaikai, dispela bai helpim yumi.
Traim dispela: Go wokabaut liklik, ating inap 15 minit samting.
● Tingim olsem filings bilong yu na ol narapela samting tu long laip i save senis.
Baibel i tok: “Yupela i no save wanem samting bai kamap long yupela tumora.”—Jems 4:14.
Wanem mining bilong skripsa?: Ol hevi i painim yu—maski em wanpela hevi yu pilim olsem i no gat rot bilong stretim—ating em bilong sotpela taim tasol.
Maski i luk olsem hevi bilong yu i go bikpela tru long nau, sindaun bilong yu inap senis long bihain. So painim ol rot long karim dispela hevi. (2 Korin 4:8) Ating hevi bilong yu inap pinis long bihain, tasol sapos yu suasaid, yu no inap kisim bek laip bilong yu.
Traim dispela: Ritim ol stori bilong Baibel long ol man em ol i pilim bel hevi tru na ol i laik dai, na lukim olsem wanem sindaun bilong ol i senis na kamap gutpela moa long bihain—long rot we ol yet i no bin tingim. Skelim sampela bilong ol.
Yu ting Baibel i gat stori bilong ol manmeri em ol i pilim olsem ol i laik dai?
Yes. Baibel i stori long sampela em ol i bin tok, “Mi laik dai.” God i no krosim ol, nogat, em i givim helpim long ol. Em inap helpim yu tu.
Elaija
● Em i husat? Elaija em wanpela profet i no save pret. Tasol em i bin bel hevi. Jems 5:17 i tok, “Elaija i wanpela man wankain olsem yumi.”
● Wai na em i laik dai? Wanpela taim, Elaija i pilim olsem em i stap wanpis, em i pret, na em i pilim olsem em i samting nating. So em i beten askim God olsem: “Jehova, plis tekewe laip bilong mi.”—1 King 19:4.
Wanem samting i helpim em?: Elaija i autim filings bilong em long God. Olsem wanem God i strongim em? God i soim olsem em i tingim tru Elaija na em i soim Elaija olsem em i gat bikpela strong. Na tu, God i mekim isi bel bilong Elaija, na givim wanpela wokman bilong helpim Elaija.
▸ Ritim stori bilong Elaija: 1 King 19:2-18.
Jop
● Em i husat? Jop em wanpela maniman na em i gat meri na ol pikinini, na em i save lotuim God tru.
● Wai na em i laik dai? Wantu tasol bikpela hevi i bungim Jop. Olgeta mani kago bilong em i lus. Olgeta pikinini bilong em i dai long disasta. Em i kisim wanpela sik we i givim bikpela pen tru long em. Na ol man i sutim tok giaman long em olsem em yet i gat asua long ol hevi i painim em. Jop i tok: “Mi les tru long laip bilong mi; mi no laik i stap laip moa.”—Jop 7:16.
● Wanem samting i helpim em? Jop i beten long God na toktok wantaim ol narapela. (Jop 10:1-3) Pren bilong em Elihu i strongim em na helpim em long holim stretpela tingting long hevi i painim em. Jop i redi long kisim helpim na tok bilong stretim em i kam long God.
▸ Ritim stori bilong Jop: Jop 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moses
● Em i husat? Moses em lida bilong lain Israel long bipo na em i bin mekim wok olsem profet.
● Wai na em i laik dai? Moses i gat planti wok long mekim, na planti taim ol manmeri i kros na sutim tok long em na dispela i mekim na em i pilim olsem em i no gat strong moa. So em i singaut long God olsem: “Mobeta yu kilim mi i dai nau tasol.”—Namba 11:11, 15.
● Wanem samting i helpim em? Moses i autim filings bilong em long God. God i helpim Moses long tilim sampela wok i go long ol narapela, na dispela i daunim presa bilong wok na Moses inap stap bel isi.
▸ Ritim stori bilong Moses: Namba 11:4-6, 10-17.