“Ol Manmeri i Save Ol i Mas Kisim Ol Samting Bilong Spirit Ol i Ken Amamas”
TAIM ol pisin i kirap long moningtaim, ol i save krai krai na bihain ol i flai i go bilong painim kaikai. Long apinun, ol i save kam bek, krai liklik moa, na slip. Long sampela mun insait long yia, ol i save putim kiau, na mekim bikpela long ol liklik pisin. Ol animal tu i save kaikai, slip, na kamapim pikinini.
Tasol yumi ol man i narapela kain. Tru, yumi save kaikai, slip, na kamapim pikinini, tasol ol dispela samting tasol i no mekim yumi stap belgut. Yumi laik save i gat wanem as na yumi stap. Yumi laik save yumi stap bilong mekim wanem. Na tu, yumi gat laik long i stap long bihain. Ol dispela laik i makim olsem yumi ol man i narapela kain long ol animal—yumi gat laik long save long ol samting bilong spirit.
God i Bin Wokim Yumi i Kamap Olsem Em
Baibel i kamapim as na yumi ol man i save tingim ol samting bilong spirit: “God i wokim ol manmeri na ol i kamap olsem God yet.” (Stat 1:27) God i wokim yumi ‘i kamap olsem em,’ olsem na maski yumi gat sin na yumi no gutpela olgeta, yumi inap kamapim sampela pasin bilong God. (Rom 5:12) Olsem: Yumi inap tingim na wokim sampela nupela samting, yumi gat savetingting inap long mak, yumi laikim stretpela pasin, na yumi inap laikim tru ol arapela na daunim sampela laik bilong yumi yet. Na tu, yumi inap tingim bek ol samting i bin kamap bipo na tingim ol samting yumi laik mekim long bihain.—Sindaun 4:7; Saveman 3:1, 11; Maika 6:8; Jon 13:34; 1 Jon 4:8.
Samting i kamapim long ples klia olsem yumi inap tingim ol samting bilong spirit, i olsem: Yumi gat laik long lotu long God. Sapos yumi no inapim dispela laik na pas gut wantaim Man Bilong Wokim yumi, yumi no inap i stap amamas tru. Jisas i tok: “Ol manmeri i save ol i mas kisim ol samting bilong spirit ol i ken amamas.” (Matyu 5:3, NW ) Bilong inapim laik bilong yumi long ol samting bilong spirit, yumi mas kisim save long ol tok i tru—yumi mas kisim save long God na ol lo bilong em, na long samting em i tingting pinis long mekim long ol manmeri. Yumi inap painim we ol dispela tok i tru? Yumi inap painim long Baibel.
“Tok Bilong Yu i Tru Olgeta”
Aposel Pol i tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong stretim ol manmeri tingting bilong ol i no stret na bilong stretim wokabaut bilong yumi.” (2 Timoti 3:16) Dispela tok bilong Pol i stret wantaim tok bilong Jisas, em i beten long God olsem: “Tok bilong yu i tru olgeta.” Long nau, yumi save olsem dispela Tok em Baibel, na i gutpela yumi skelim ol bilip na pasin bilong yumi na bai yumi ken save ol i stret wantaim ol tok bilong Baibel o nogat.—Jon 17:17.
Taim yumi skelim ol bilip bilong yumi wantaim Tok Bilong God, yumi bihainim pasin bilong ol man bilong Beria bilong bipo, ol i skelim tok bilong Pol na bai ol i ken save em i stret wantaim buk bilong God. Luk i no tok kros long ol i mekim olsem, nogat; em i mekim gutpela tok amamas long ol. Em i tok: “Ol i harim tok bilong Pol, na ol i laikim tru. Na long olgeta de ol i save ritim na skelim tok i stap long buk bilong God, bilong ol i ken save, tok bilong Pol em i tru, o nogat.” (Aposel 17:11) Long nau, i gat planti bilip na pasin i pait wantaim, olsem na em i bikpela samting long yumi bihainim pasin ol Beria i bin mekim.
Narapela rot bilong save long tok i tru, em long rot bilong lukim samting dispela i mekim long laip bilong man. (Matyu 7:17) Olsem: Pasin bilong bihainim tok i tru bilong Baibel i mas mekim na man i kamap gutpela papa, na meri i kamap gutpela meri marit, o gutpela mama, na long dispela rot famili bai kisim amamas na stap belgut. Jisas i tok: “Ol man i harim tok bilong God na i bihainim, em ol i ken amamas.”—Luk 11:28.
Dispela tok bilong Jisas i kirapim yumi long tingim ol tok Papa bilong em long heven i bin tokim ol Israel bilong bipo long en, olsem: “Mi God, Bikpela bilong yupela. Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas, olsem wara i ran oltaim na i no save pinis. Na stretpela pasin bilong yupela bai i kamap strong oltaim olsem solwara i save bruk long nambis.” (Aisaia 48:17, 18) Olgeta man husat i laikim gutpela na stretpela pasin ol bai pilim tru dispela gutpela tok!
Ol Tok Em ‘Yau i Skrap Long Harim’
God i bin givim dispela tok long ol Israel, long wanem, ol bilip giaman i wok long pulim ol. (Song 106:35-40) Yumi tu i mas was gut, nogut ol bilip giaman i pulim yumi. Pol i tok long ol man i tok ol i Kristen, olsem: “Bihain ol man bai i no laik harim moa ol stretpela tok. Nogat. Yau bilong ol bai i skrap long harim ol narakain narakain tok, na ol bai i kisim planti man bilong skulim ol long kain tok ol i save laik long harim. Olsem na ol bai i givim baksait long tok tru.”—2 Timoti 4:3, 4.
Ol hetman bilong lotu i save autim ol tok em yau bilong ol man i skrap long harim; ol i orait long ol pasin i inapim ol laik nogut bilong bel, olsem pasin bilong man o meri i slip wantaim narapela i no poroman marit bilong em, pasin sodom, na dring spak. Baibel i tokaut klia olsem ol man i orait long kain pasin olsem, na ol man i mekim ol dispela pasin, “ol bai i no inap i go insait long kingdom bilong God.”—1 Korin 6:9, 10; Rom 1:24-32.
Tru, man i mas strongim bel bambai em inap bihainim ol lo bilong Baibel, na moa yet long taim ol man i tok bilas long em, tasol maski i hatwok, em inap mekim. Namel long ol Witnes Bilong Jehova i gat planti man bipo ol i man bilong spak, pamuk, pait, stil, kisim drak, na tok giaman. Tasol ol i bin pilim tru Tok Bilong God, na holi spirit i helpim ol long mekim sampela senis long i stap bilong ol bambai ol inap “wokabaut long pasin” Jehova i laikim. (Kolosi 1:9, 10; 1 Korin 6:11) Orait nau ol inap stap wanbel wantaim God na stap bel isi, na olsem yumi bai stori long en, ol i gat wanpela gutpela samting tru ol i tingim na wetim i kamap bihain.
Kingdom
Gutaim tru em Baibel i stori long en na i bilong ol manmeri i bihainim tok, em bai kamap long rot bilong Kingdom Bilong God. Jisas i beten olsem: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:10) Yes, Kingdom Bilong God tasol inap kamapim laik bilong God long graun. Bilong wanem? Long wanem, dispela Kingdom long heven—wanpela gavman long han bilong Jisas Krais—em rot God bai mekim wok long en bilong bosim graun.—Song 2:7-12; Daniel 7:13, 14.
Jisas Krais, King bilong dispela Kingdom long heven, bai helpim ol man i bihainim tok long lusim olgeta kain kalabus, na sin tu ol i bin kisim long Adam wantaim sik na dai em sin i bin kamapim. Kamapim Tok Hait 21:3, 4 i tok: “Harim. Nau haus bilong God i stap wantaim ol manmeri. . . . Em [God Jehova] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”
Gutaim tru bai stap long olgeta hap bilong graun. Olsem wanem yumi inap bilip tru long dispela samting? Aisaia 11:9 i bekim dispela askim, olsem: “Long olgeta ples antap long maunten bilong Bikpela, olgeta samting [ol man i stap aninit long Kingdom] bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” Yes, olgeta manmeri long graun bai i gat stretpela save long God na bihainim tok bilong em. Olsem wanem? Dispela samting i mekim gut bel bilong yu? Sapos olsem, orait nau em taim bilong kirap na kisim “save tru” long God Jehova.
Bai Yu Putim Yau Long Tok Bilong Kingdom?
Long rot bilong Kingdom, God bai pinisim olgeta wok bilong Satan na skulim ol manmeri long ol stretpela lo bilong Em. Olsem na yumi no kirap nogut olsem Kingdom em nambawan bikpela tok Jisas i bin autim. Em i tok: “Mi mas autim gutnius bilong kingdom bilong God . . . God i salim mi na mi kam bilong mekim dispela wok.” (Luk 4:43) Krais i tokim ol disaipel long autim dispela wankain tok long ol narapela. (Matyu 28:19, 20) Em i tok profet: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Pinis i kam klostu. Olsem na em i bikpela samting olsem ol man i gat gutpela bel ol i mas harim dispela gutnius i bilong helpim man long abrusim bagarap na i stap laip.
Albert, em yumi bin stori long em long stori i kamap paslain long dispela, em i harim tok bilong Kingdom taim meri na pikinini man bilong em i kirap stadi long Baibel wantaim ol Witnes Bilong Jehova. Pastaim Albert i gat tupela tingting. Em i askim wanpela pasto long i kam lukim meri pikinini bilong em bilong kamapim long ples klia olsem ol tok bilong ol Witnes i no stret. Tasol pasto i no laik mekim. Olsem na Albert i tingting long sindaun wantaim tupela taim ol i toktok long Baibel wantaim ol Witnes, na taim em i harim wanpela tok i no stret, em i ken kamapim. Tasol narapela taim ol Witnes i kam, em tu i insait long stadi—em i gat bikpela laik long kisim sampela save moa. Bihain em i toksave long samting i bin senisim tingting bilong em. Em i tok: “Ol tok mi harim, em dispela samting stret mi bin wok long painim.”
Em nau, Albert i kirap long inapim laik bilong em long ol samting bilong spirit, na i no gat wanpela taim em i bel hevi long em i bin mekim olsem. Tok i tru bilong Baibel i bin helpim em long save long samting em longtaim tru em i bin wok long painim—nau em i save olsem wanem pasin i no stret na korapsen bai pinis, na em i gat wanpela gutpela samting em inap wetim i kamap bihain. Tok i tru bilong Baibel i bin givim bel isi long em. Olsem wanem? Ol save yu kisim i inapim yu long ol samting bilong spirit? Orait plis lukim ol askim long blok long pes 6. Sapos yu laik kisim sampela save moa, ol Witnes Bilong Jehova bai amamas long helpim yu.
[Blok/Ol Piksa long pes 6]
OL SAVE YU KISIM I INAPIM YU LONG OL SAMTING BILONG SPIRIT?
Olsem wanem? Ol save yu kisim i inapim yu long ol samting bilong spirit? Mipela i laik bai yu ritim ol askim daunbilo na putim mak long ol askim yu save long bekim bilong en.
□ God em i husat? Wanem nem bilong em?
□ Jisas Krais em i husat? Bilong wanem em i dai? Olsem wanem dai bilong em inap helpim yu?
□ Satan i stap o nogat? Sapos em i stap, orait em i bin kamap olsem wanem?
□ Wanem samting i painim yumi ol man taim yumi dai?
□ Wanem laik bilong God long dispela graun na ol man?
□ Kingdom Bilong God em i wanem samting?
□ Wanem ol lo bilong God long stretpela pasin?
□ Insait long famili, God i bin makim wanem wok bilong man marit na meri marit? Wanem sampela tok bilong Baibel, olsem stiatok, i save helpim famili long i stap amamas?
Sapos yu no kliagut long bekim bilong ol dispela askim, yu ken raitim pas bilong kisim buklet God i Laik Yumi Mas Mekim Wanem? Dispela buklet, em ol Witnes Bilong Jehova i wokim long klostu 300 tok ples, em i stori long 16 bikpela tok bilong Baibel na i bekim olgeta dispela askim yu lukim long lista antap.
[Ol Piksa long pes 4]
Yumi narapela kain long ol animal, yumi gat laik long kisim ol samting bilong spirit
[Piksa long pes 5]
‘Ol bai kisim planti man bilong skulim ol long ol tok em yau bilong ol i skrap long harim.’—2 Timoti 4:3
[Piksa long pes 7]
Gutaim tru na bel isi bai kamap long rot bilong Kingdom Bilong God long han bilong Mesaia