“SPIRIT BILONG GOD YET I BIN KAMAPIM OLGETA TOK I STAP LONG BUK BILONG GOD. NA DISPELA TOK EM I GUTPELA SAMTING TRU.”
Stadi Namba 2—Ol Hap Taim Baibel i Stori Long En
Em i stori long ol hap taim Baibel i kolim, na ol kalenda ol man i bin mekim wok long en, na ol bikpela yia i makim taim stret ol bikpela samting i bin kamap olsem Baibel i stori long en, na sampela tok moa long ol hap taim.
Janueri 27: Ol De na Mun i Save Pinis Kwiktaim
OL MAN i save makim ol hap taim, olsem ol de na wik na mun na yia samting, na ol i save tingim tru ol dispela hap taim i save kamap na i go pinis. Ol hap taim i olsem wanpela rot ol i wokabaut long en na long olgeta liklik hap minit ol i wokabaut i go moa long dispela rot. Olsem na sapos man i bihainim gutpela tingting, em bai mekim gutpela wok long en. Olsem King Solomon i tok: “Olgeta samting i kamap long dispela graun, i save kamap long taim bilong em yet . . . taim bilong yumi man i kamap long graun na taim bilong yumi i dai . . . taim bilong planim kaikai na taim bilong kamautim kaikai . . . taim bilong kilim man i dai na taim bilong oraitim sikman . . . taim bilong brukim ol samting na taim bilong wokim ol samting . . . taim bilong krai na taim bilong lap.” (Sav. 3:1-4) Ol de na yia samting bilong yumi i save kamap i go pinis kwiktaim! Yumi save stap inap olsem 70 yia, tasol long dispela liklik hap taim yumi no inap kisim save na amamas long olgeta gutpela samting Jehova i bin putim long dispela graun bilong helpim yumi—70 yia em i liklik hap taim tumas. “God i makim taim bilong olgeta samting i kamap, na ol i kamap long gutpela taim tru bilong ol. Na tu em i kirapim tingting bilong yumi na yumi laik save long ol samting i bin kamap bipo na long olgeta samting i laik kamap bihain. Tasol God i no larim yumi i save tru long olgeta samting em yet i mekim long bipo yet i go inap long bihain tru.”—Sav. 3:11; Sng. 90:10.
2 Jehova yet em i save stap oltaim oltaim. Insait long dispela taim em i bin wokim ol samting i gat laip. Ol i bin kamap nupela long wanpela taim, olsem na ol i save tingim ol hap taim i save kam na i go pinis. Ol ensel long heven, na bikhetman Satan tu, ol i save tingim ol hap taim, olsem hamas de o yia i kamap i go pinis. (Dan. 10:13; KTH 12:12) Baibel i stori long ol man bilong graun na i tok: “Taim nogut i save painim yumi olgeta.” (Sav. 9:11) Husat man i save tingting long God long olgeta taim, na em i tingim gut ol kaikai bilong spirit God i givim long yumi ‘long taim em i makim,’ dispela man i ken amamas!—Mt. 24:45.
3 Taim i Save Go Tasol. Long olgeta hap, long graun na long antap, taim i save bosim olgeta samting. I no gat wanpela man long graun inap save, taim em i wanem samting tru. Ol hap taim i olsem wanpela bikpela wara i ran i go, na i kain olsem ples antap—i no gat wanpela man i save em i kirap we o i go we. Jehova tasol i save long ol dispela samting, long wanem, olsem Baibel i tok, “oltaim oltaim [em i] stap God, long bipo na long bihain tu.”—Sng. 90:2.
4 Tasol i gat sampela samting bilong ol hap taim em yumi inap save long en. Yumi save hamas aua o de o yia i kamap i go pinis. Na yumi save ol hap taim i olsem ol ka i stap long wanpela rot bilong i go tasol—maski ol i isi isi o ol i hariap, ol i mas i go tasol na ol i no inap kam bek long dispela rot. Hap taim nau yumi stap long en, yumi kolim “nau,” tasol ol liklik hap minit bilong dispela hap taim i wok long kamap na i go pinis wantu tasol na i go olgeta. Yumi no inap pasim.
5 Taim Bipo. Taim bipo, em i go pinis na yumi no inap kamapim bek. Em i wankain olsem wara i kapsait i go daun long maunten—yumi no inap mekim na bai dispela wara i ran i go bek antap long maunten. Na i olsem tu long wanpela spia, em man i taitim banara na sutim i go—yumi no inap mekim na bai dispela spia i sut i kam bek long banara. Ol popaia yumi bin mekim bipo, mak bilong en i stap long dispela hap taim i go pinis, na Jehova tasol inap rausim. (Ais. 43:25) Na olsem tasol, ol gutpela pasin man i bin mekim bipo, mak bilong en i stap na ‘dispela bai i helpim em’ na Jehova bai mekim gut long dispela man. (Snd. 12:14; 13:22) Maski yumi bin mekim gutpela pasin o pasin nogut long bipo, yumi no inap senisim ol samting yumi bin mekim insait long dispela hap taim, long wanem dispela taim bipo i go pinis. Baibel i stori long ol man nogut na i tok: “Liklik taim tasol na bai ol man nogut i bagarap, olsem gras i save drai, na olsem lip bilong diwai i drai.”—Sng. 37:2.
6 Taim Bihain. Taim bihain i no olsem taim bipo. Taim bihain i wok long i kam long yumi olsem wanpela wara i ran i kam long yumi. Tok bilong Baibel i helpim yumi na yumi inap save long ol hevi i laik painim yumi, na yumi ken redi i stap bilong winim ol dispela hevi. Yumi inap “bungim ol gutpela samting bilong [yumi] long heven.” (Mt. 6:20) Ol hap taim i wok long ron i go olsem wanpela wara, i no inap karim ol dispela gutpela samting i go. Ol bai i stap oltaim long yumi, na inap long olgeta taim bihain bai ol i wok long helpim yumi. Yumi laik mekim gutpela wok long dispela hap taim yumi stap long en, long wanem yumi save, dispela bai helpim yumi long taim bihain.—Ef. 5:15, 16.
Februeri 17: Ol Samting Bilong Makim Taim Long Baibel
7 Ol Samting Bilong Makim Taim. Long nau yumi gat ol klok na hanwas samting i save makim taim, olsem ol minit na aua samting. Olsem tasol Jehova, em Man bilong wokim olgeta samting, em i bin putim sampela traipela samting bilong makim taim—em i putim graun i save tanim tanim, na mun i save raunim graun, na em i putim san. Ol man i stap long graun ol inap lukim ol dispela samting na ol inap save, em wanem taim stret. “Bihain God i tok olsem, ‘Ol lait i mas kamap long skai bilong makim tulait na nait, na bilong makim ol de na ol yia na ol kain kain taim bilong yia.’ ” (Stt. 1:14) Ol dispela planti samting bilong antap ol i gat wok bilong ol na ol i save wok gut wantaim, na ol i wokabaut long rot stret bilong ol na long olgeta taim ol i makim stret ol hap taim i save go tasol.
8 De. Long Baibel dispela tok “de” i gat narapela narapela insait bilong en, na i wankain long nau tu. Hap taim bilong graun i tanim wanpela taim em inap olsem wanpela de i gat 24 aua long en. Dispela kain de i gat taim bilong tulait na taim bilong tudak na em inap olsem 24 aua olgeta. (Jo. 20:19) Tasol Baibel i kolim taim bilong tulait yet olsem wanpela de, em inap olsem 12-pela aua. Baibel i tok: “Tulait [God] i kolim ‘De,’ na tudak em i kolim ‘Nait.’ ” (Stt. 1:5) God i kolim taim bilong tudak olsem “Nait,” na dispela hap taim tu em inap olsem 12-pela aua. (Kis. 10:13) Na long tok Hibru dispela tok “de” em inap makim wanpela hap taim em wanpela man i gat nem em i bin i stap long en. Olsem: Aisaia i bin lukim piksa olsem driman “long taim [tok Hibru olsem “de”] Usia na Jotam na Ahas na Hesekia i stap king bilong kantri Juda” (Ais. 1:1), na Baibel i tok taim (tok Hibru, de) bilong Noa na Lot i makim samting bai kamap bihain. (Lu. 17:26-30) Na sampela taim Baibel i kolim dispela tok “de” olsem tok piksa. Pita i tok: “Long tingting bilong Bikpela wanpela de i olsem 1,000 yia.” (2 Pi. 3:8) Na long stori bilong God i bin wokim ol samting, em i stap long Buk Stat long Baibel, dispela tok “de” i makim bikpela hap taim inap olsem sampela tausen yia. (Stt. 2:2, 3; Kis. 20:11) Taim Baibel i kolim dispela tok “de,” ol tok i stap klostu long dispela ves i makim olsem em i wanpela de i gat 24 aua long en o i makim wanpela hap taim.
9 Aua. Pasin bilong makim de i gat 24 aua i kirap long hap bilong Isip. Na pasin bilong makim olsem wanpela aua i gat 60 minit i kirap long hap bilong Babilon. Tasol dispela tok “aua” i no i stap long Ol Skripsa Hibru; em i kolim ol bikpela hap taim bilong wanpela de, olsem “moningtaim,” “apinun tru,” “belo,” “biksan.” (Stt. 24:11; 43:16; Lo 28:29; 1 Kin. 18:26) Taim bilong tudak, ol i brukim i go 3-pela hap, na Baibel i kolim tupela, em “biknait” na “tulait.”—Het. 7:19; Kis. 14:24; 1 Sml. 11:11.
10 Tasol Ol Skripsa Grik i kolim dispela tok “aua” planti taim. (Mt. 20:2-6) Ol i bin kaunim ol aua kirap long 6 klok long moningtaim, olsem long taim san i kamap. Long Baibel, namba 3 aua em i olsem 9 klok. Taim ol i nilim Jisas long pos diwai na tudak i karamapim Jerusalem, em i olsem 12 klok o namba 6 aua, em yumi kolim belo. Na Baibel i tok Jisas i dai long 3 klok long apinun, em i olsem namba 9 aua.—Mk. 15:25; Lu. 23:44; Mt. 27:45, 46.
11 Wik. Long bipo yet ol man i kirap makim ol hap taim i gat 7-pela 7-pela de long en. Taim ol i mekim olsem, ol i bihainim pasin bilong Man i bin wokim ol. Inap 6-pela “de” God i wok long kamapim ol samting, na long namba 7 hap taim, em Baibel i kolim olsem “de namba 7,” God i malolo. Noa tu i makim ol hap taim i gat 7-pela 7-pela de long en. Long tok Hibru, dispela tok “wik” i makim wanpela hap taim i gat 7-pela hap bilong en.—Stt. 2:2, 3; 8:10, 12; 29:27.
12 Luna Mun. Baibel i stori long ol “luna mun.” (Kis. 2:2; Lo 21:13, NW; 33:14; Esr. 6:15) Taim nupela mun i kamap long skai antap, olsem em i liklik tru, na i go inap long taim nupela mun gen i kamap long skai antap, em olsem 29 de na 12-pela aua na 44 minit. Dispela hap taim em Baibel i kolim olsem wanpela luna mun. Ol man i lukim mak bilong mun antap long skai, olsem mun i liklik o bikpela, na ol inap save em wanem de bilong mun. Tasol long nau ol man i no makim ol mun olsem. Ol i tingim hap taim bilong graun i raunim san wanpela taim, em olsem wanpela yia, na ol i brukim dispela hap taim long 12-pela hap na kolim olsem ol mun.
13 Tasol Noa i no lukim mun na makim hamas de i stap insait long wanpela mun. Em i makim ol hap taim olsem ol mun i gat 30 de 30 de long en. Noa i raitim stori bilong ol samting i bin kamap taim em i stap insait long sip, na long dispela yumi kisim save olsem wara i bin karamapim graun olgeta inap 5-pela mun, olsem “150 de.” Twelpela mun na 10-pela de i pinis na nau graun i drai na ol lain i stap insait long sip inap lusim na i kam ausait. Em nau, Noa i raitim stret ol mun na de bilong ol bikpela samting i bin kamap long taim bilong bikpela Tait Wara.—Stt. 7:11, 24; 8:3, 4, 14-19.
Epril 21: Kain Kain Taim Bilong Yia—Gutpela Samting Jehova i Givim i Kamapim Gutpela Tingting na Save Bilong Em
14 Kain Kain Taim Bilong Yia. Taim Jehova i wok long redim graun bilong ol man na animal i ken i stap long en, em i wokim ol samting bambai i gat kain kain taim bilong yia. (Stt. 1:14) Dispela ol kain kain taim i save kamap long graun, long wanem, graun i no sindaun stret, em i slip liklik (23.5°), na graun i save tanim tanim na i raunim san. Graun i save tanim tanim, olsem na inap 6-pela mun san i holim graun long hap bilong saut, na inap 6-pela mun em i holim graun long hap bilong not. Olsem na i gat kain kain taim bilong yia, olsem taim bilong kol na taim bilong ren na taim bilong san, na i gat taim bilong planim kaikai na taim bilong kamautim kaikai. Baibel i tok dispela kain kain taim bilong yia i no ken pinis; dispela pasin bai stap oltaim oltaim. “Bai i gat taim bilong planim kaikai na taim bilong kamautim kaikai. Bai i gat taim bilong kol na taim bilong ples i hat. Bai i gat taim bilong san na taim bilong ren. Bai i gat san na nait. Dispela olgeta kain taim bai i no ken pinis long taim graun i stap yet.”—Stt. 8:22.
15 Long hap bilong Graun Bilong Promis i gat tupela kain taim bilong yia, em taim bilong ren na taim bilong san. Kirap long namel bilong mun Epril na i go inap long namel bilong mun Oktoba, liklik ren tasol i save kam daun. Taim bilong ren i gat olsem 3-pela hap bilong en, olsem “namba wan taim bilong ren” (Oktoba–Novemba), na taim bilong kol na bikpela ren (Disemba–Februeri), na i gat narapela taim bilong ren ol i kolim “namba 2 taim bilong ren” (Mas–Epril). (Lo 11:14; Jol. 2:23) Long namba wan taim bilong ren, ren i wasim graun na graun i kamap malumalum liklik, olsem na mun Oktoba na Novemba i gutpela taim bilong “brukim graun” na “planim pikinini wit samting.” (Kis. 34:21; Wkp. 26:5) Long taim bilong bikpela kol na ren, kirap long mun Disemba i go inap long Februeri, ren ais i save kam daun. Na long mun Janueri na Februeri, long ol ples maunten, ples i kol nogut tru. Baibel i stori long wanpela strongpela soldia bilong Devit, nem bilong em Benaia, em i bin kilim i dai wanpela laion long “taim ren ais i pundaun long graun.”—2 Sml. 23:20.
16 Mun Mas na Epril (em olsem mun Nisan na Iyar long kalenda bilong ol Hibru) em i taim bilong “ren.” (Sek. 10:1) Dispela em i namba 2 taim bilong ren, na long dispela taim ren i mas kam daun bambai ol wit samting i ken karim gut kaikai, em ol i bin planim long mun Septemba i go inap Disemba. (Hos. 6:3; Jems 5:7) Em taim tu bilong kisim ol namba wan kaikai i mau long gaden. God i tok, ol Israel i mas kisim ol namba wan mekpas wit samting na givim long em olsem ofa, long Nisan 16. (Wkp. 23:10; Rut 1:22) Dispela taim bilong ren em gutpela taim tru, long wanem, olgeta diwai i putim plaua na i naispela bilong lukim. “Nau ol plaua i kamap pinis long olgeta hap, na em i taim bilong singsing. Ol pisin i wok long singsing nabaut long bus. Ol diwai fik i stat long karim kaikai. Na olgeta rop bilong bus i putim plaua, na ol plaua i gat gutpela smel.”—Sol. 2:12, 13.
17 Taim bilong san i kirap namel long mun Epril. Tasol long taim bilong san, wara bilong nait i save kam daun na wasim graun, na i kam daun moa yet long ol ples stret klostu long nambis na long arere bilong ol maunten long hap wes. Long taim bilong san dispela wara bilong nait i save helpim ol kaikai long kamap gut. (Lo 33:28) Long mun Me, wit na bali i orait pinis na ol man i wok long kisim long gaden bilong ol. Long pinis bilong mun Me ol i save mekim wanpela bikpela bung, em Bikpela De Bilong Amamas Long Kisim Kaikai Long Gaden (de Pentikos). (Wkp. 23:15-21) Taim san i kamap strong liklik na graun i go drai, em taim bilong ol pikinini bilong diwai wain i mau na ol man i kisim, na bihain liklik ol narapela kaikai bilong taim bilong san i mau, olsem pikinini bilong diwai oliv na diwai det na diwai fik. (2 Sml. 16:1) Taim bilong san i pinis na namba wan taim bilong ren i kirap, na long dispela taim (olsem long kirap bilong mun Oktoba) ol i kisim pinis olgeta kaikai i stap long gaden na em i taim bilong mekim bung bilong lotu ol i kolim olsem Ol Bikpela De Bilong i Stap Long Haus Win.—Kis. 23:16; Wkp. 23:39-43.
Me 26: Yia na Ol Tok Bilong Baibel Holi
18 Yia. Yumi wok long stadi long ol hap taim olsem Baibel i kolim, na nau yumi laik stori long dispela tok “yia.” Long pastaim tru, taim God i laik wokim man, em i bin makim “ol yia.” (Stt. 1:14) Long tok Hibru, insait bilong dispela tok “yia” (sha·nahʹ ) i olsem “mekim gen,” na i makim olsem ol hap taim i wok long kamap i go pinis na i kamap gen, mekim mekim olsem tasol long olgeta taim. Na dispela i stret, long wanem, ol kain kain taim bilong yia i save kamap i go pinis na i kamap gen long yia bihain, mekim mekim olsem. Wanpela yia ol i kolim yia bilong graun, em hap taim bilong graun i raunim san wanpela taim. Tasol yia ol i kolim yia bilong san, em i save kirap long Mas 21 bilong wanpela yia na i go inap long Mas 21 bilong narapela yia. Em i gat olsem 365 de na 5-pela aua na 48 minit na 46 sekon, o 365 de na liklik hap (1/4) bilong wanpela de.
19 Yia Bilong Baibel. Long taim bilong Baibel, yia bilong ol man i kirap long taim bilong nupela ren i go inap long taim nupela ren i kamap gen. Dispela pasin bilong makim kirap na pinis bilong yia i gutpela long ol man i save wok gaden, long wanem, yia i kirap long taim bilong brukim graun na planim kaikai, em long kirap bilong mun Oktoba long kalenda bilong yumi, na yia i pinis long taim bilong kisim kaikai i redi pinis long gaden. Yumi save Noa i makim ol yia olsem, long wanem, em i tok Tait Wara i kirap long “namba 2 mun,” em klostu long pinis bilong mun Oktoba na kirap bilong mun Novemba. (Stt. 7:11) Long nau tu nupela yia bilong planti man i kirap long mun Oktoba samting. Taim ol Israel i lusim Isip, long yia 1513 B.C.E., Jehova i tok mun Abip (Nisan) i mas i stap “namba wan mun bilong kalenda” bilong ol, olsem na yia bilong lotu bilong ol i kirap long mun Mas samting na i go inap long dispela taim i kamap gen long yia bihain. (Kis. 12:2) Tasol ol Juda long nau i bihainim narapela kain yia, em yia bilong wok, na dispela yia i kirap long “namba wan taim bilong ren,” long mun Tisri, em namba wan mun bilong ol.
20 Yia Bilong San na Mun. I kam inap long taim bilong Krais, planti lain man ol i bihainim yia bilong mun bilong kaunim ol hap taim, na ol i gat kain kain rot bilong stretim dispela kain yia bambai i wankain olsem yia bilong san. Ol i save makim yia bilong mun olsem: Ol i save lukim nupela mun i kamap long antap na i go bikpela insait long 29 o 30 de na nau nupela mun gen i kamap long antap, em olsem wanpela mun, na i gat 12-pela mun olsem long wanpela yia bilong mun. Ol i save lukim mun na makim dispela yia, olsem na ol i kolim olsem yia bilong mun. Dispela kain yia i gat 354 de, olsem na i sotpela liklik long yia bilong san (em 365 1/4 de) inap olsem 11-pela de na liklik hap (1/4) bilong wanpela de. Ol Hibru i save bihainim yia bilong mun. Tasol Baibel i no stori long olsem wanem ol i stretim bambai yia bilong ol i stret wantaim yia bilong san na ol kain kain taim bilong yia. Ating sampela taim ol i mas skruim wanpela mun moa long yia bilong ol bilong inapim ol dispela de i sot. Long yia 450 B.C.E. samting, ol i makim taim stret bilong skruim dispela narapela mun long kalenda bilong ol—ol i mas mekim 7-pela taim insait long olgeta 19 yia 19 yia. Long kalenda bilong ol Juda, ol i skruim dispela mun i kam bihain long namba 12 mun, em mun Adar, na ol i kolim dispela narapela mun olsem mun Veadar, olsem “namba 2 mun Adar.” Long dispela rot, long kalenda bilong ol, ol i stretim yia bilong mun i kamap wankain olsem yia bilong san, na dispela kain yia i gat 12 o 13 mun bilong en ol i kolim olsem yia bilong san na mun.
21 Kalenda Bilong Julius na Kalenda Bilong Gregori. Kalenda i save makim kirap na pinis bilong yia, na i gat hamas mun long wanpela yia, na wanem mun i kam pastaim na wanem mun i kam bihain. Julius Sisar i bin kamapim wanpela kalenda long yia 46 B.C.E. bambai ol man bilong Rom i no ken bihainim moa yia bilong mun—ol i mas bihainim yia bilong san. Kalenda bilong Julius i gat 365 de, na long olgeta namba 4 yia, ol i skruim wanpela de moa, olsem na namba 4 yia i gat 366 de. Tasol bihain ol i kisim save olsem ol yia long kalenda bilong Julius i longpela liklik, winim yia tru bilong san inap olsem 11-pela minit. Olsem na namel long yia 1500 na 1590 ol dispela 11-pela minit 11-pela minit i kamap olsem 10-pela de. Bilong stretim dispela samting, long yia 1582 Pop Gregori Namba 13 i senisim liklik dispela kalenda bilong Julius na em i kamapim nupela kalenda ol i kolim kalenda bilong Gregori. Pop i tok na ol i rausim 10-pela de long yia 1582, olsem na de bihain long Oktoba 4 i kamap olsem Oktoba 15. Long kalenda bilong Gregori ol i save skruim wanpela de moa long olgeta namba 4 yia, tasol long sampela namba 4 yia ol i no mekim olsem. Nau long taim bilong yumi, long planti hap bilong graun ol man i bihainim dispela kalenda bilong Gregori.
22 “Yia” Long Tok Profet. Long ol tok profet bilong Baibel, dispela tok “yia” i makim 12-pela mun i gat 30 de 30 de, em olsem 360 de olgeta. Wanpela buk i stori long Esekiel 4:5, 6 na i tok: “Yumi mas ting olsem taim Esekiel i tok long yia em i tok long yia i gat 360 de. Dispela kain yia i no yia tru bilong san o yia bilong mun. Long dispela kain yia olgeta wan wan mun bilong en i gat 30 de.”a
23 Long tok profet bilong Kamapim Tok Hait 11:2, 3 na 12:6, 14, wanpela yia i olsem 360 de. Na sampela taim long ol tok profet wanpela “de” i makim wanpela yia.—Ese. 4:5, 6.
Julai 28: No Gat Yia 0
24 No Gat Yia 0. Ol lain bilong bipo, olsem ol saveman bilong lain Grik, na ol Rom, na ol Juda, ol i no save long namba 0. Ol i save kaunim ol namba kirap long 1. Ol Rom i no save mekim wok long namba 0, olsem na i no gat yia 0. Bilong kaunim ol yia kirap long taim bilong Krais na i kam inap long nau, ol i kirap kaunim long yia 1. Na dispela pasin i kamapim tu pasin bilong kolim namba long ol yia bilong makim yia i kamap paslain na yia i bihain long en, olsem namba wan yia, o namba 2 yia, o namba 3 yia, olsem. Ating ol Hindu i kamapim pasin bilong kaunim ol namba kirap long 0.
25 Sapos yumi kolim namba bilong wanpela samting na yumi tok em i namba wan o namba 2 o namba 3, dispela namba i makim tasol olsem dispela samting i paslain o bihain long narapela samting; em i no makim hamas samting olgeta i stap. Olsem na sapos yumi stori long namba 4 yia bilong man i stap king, bilong save hamas yia olgeta em i bin i stap king, yumi mas tekewe wanpela long dispela namba. Sapos yumi tekewe wanpela long 4, dispela i mekim 3, olsem na taim yumi tok long namba 4 yia bilong man i stap king, dispela i makim olsem em i bin i stap king inap 3-pela yia olgeta na nau em i namba 4 yia bilong em i stap king. Sapos yumi stori long sampela samting na yumi laik makim hamas samting olgeta i stap, orait yumi no ken kolim namba olsem namba 3 o namba 4 o namba 5; yumi mas kolim namba olsem 3-pela o 4-pela o 5-pela, olsem.
26 No gat yia 0, olsem na namba wan yia kirap long taim bilong Krais na i kam inap long nau em yumi save kolim yia 1 C.E. Na namba wan yia long kalenda bilong ol yia i go bek inap long taim bilong Adam, em tu yumi kolim olsem yia 1 B.C.E. Namba bilong yia i makim tasol olsem em i wanem yia long kalenda. Olsem na taim yumi tok long yia 1990, dispela i makim olsem kirap long yia 1 long kalenda bilong taim bilong yumi na i kam inap long yia 1990, inap olsem 1,989 yia olgeta i bin kamap i go pinis. Na long Julai 1, 1990, inap olsem 1,989 yia na 6-pela mun i bin kamap i go pinis. Na i wankain tu long kalenda bilong ol yia paslain long taim bilong Krais. Olsem na sapos yu laik save hamas yia i kamap i go pinis namel long Oktoba 1, long yia 607 B.C.E. na Oktoba 1, long yia 1914 C.E., yu mas bungim 3-pela mun long pinis bilong yia 607 (Oktoba-Disemba) wantaim 606 yia (namel long yia 607 na yia 1) na bungim dispela 606 yia na 3-pela mun wantaim 1,913 yia (namel long yia 1 C.E. na yia 1914 C.E.) na 9-pela mun (Janueri-Septemba long yia 1914) na em inap olsem 2,519 yia (na 12-pela mun), o 2,520 yia. O sapos yu laik save wanem de bilong kalenda bai kamap 2,520 yia bihain long Oktoba 1 long yia 607 B.C.E., orait yu mas save namba 607 em i namba bilong yia tasol—dispela namba i makim olsem 606 yia olgeta i bin kamap i go pinis namel long yia 607 na yia 1. Orait, Oktoba 1 long yia 607 na i go inap long pinis bilong yia 607 em inap olsem 3-pela mun, olsem na yu mas skruim dispela 3-pela mun long dispela 606 yia. Nau yu mas rausim dispela 606 yia na 3-pela mun long 2,520 yia, na i gat 1,913 yia na 9-pela mun i stap yet. Yu mas kaunim dispela 1,913 yia na 9-pela mun kirap long yia 1 C.E. long kalenda bilong taim bilong yumi. Orait, 1,913 yia olgeta bihain long yia 1 em yia 1914, na sapos yu skruim 9-pela mun moa long dispela, yu kamap long de 1 bilong mun Oktoba long yia 1914 C.E. Olsem na kirap long Oktoba 1 long yia 607 B.C.E. na i kam inap long Oktoba 1, 1914 C.E. em inap olsem 2,520 yia.b
Septemba 29: Ol Bikpela Yia
27 Ol Bikpela Yia. Sapos yumi laik save long wanem yia sampela samting Baibel i stori long en i bin kamap, orait i gat sampela bikpela yia inap helpim yumi long kisim dispela save. I gat sampela samting i bin kamap long bipo na Baibel tu i stori long en na i gat as tru na ol man i save wanem yia stret dispela samting i bin kamap. Kain yia olsem em yumi ken kolim “bikpela” yia, long wanem, dispela yia inap helpim yumi long save wanem yia sampela narapela samting Baibel i stori long en i bin kamap, olsem paslain o bihain long dispela yia. Baibel i save stori stret long ol samting, olsem na taim yumi save pinis long wanpela bikpela yia, orait nau yumi ken skelim stori bilong Baibel yet long hamas yia wanpela man i bin i stap o hamas yia wanpela king i mekim wok king, na yumi ken save hamas yia paslain o bihain long dispela bikpela yia wanpela samting Baibel i stori long en i bin kamap.
28 Ol Bikpela Yia Long Ol Skripsa Hibru. Wanpela bikpela samting i bin kamap long bipo na Baibel i stori long en na ol buk bilong graun tu i stori long en, em taim ol Midia na Persia aninit long Sairus i daunim biktaun Babilon. Baibel i stori long dispela samting long Daniel 5:30. Sampela man bilong stori long ol samting i bin kamap bipo (olsem Diodorus, Afrikanas, Yusibias, Tolemi, na sampela rait bilong ol Babilon) i tok Sairus i bin daunim Babilon long yia 539 B.C.E. Wanpela hap ston i gat rait long en, ol i kolim Stori Bilong Nabonaidas, i makim mun na de Babilon i bin bagarap (tasol ol i no makim yia). Ol man bilong skelim de na yia ol samting bilong bipo i bin kamap, ol i tok Babilon i bin bagarap long Oktoba 11 (kalenda bilong Julius) o Oktoba 5 (kalenda bilong Gregori) long yia 539 B.C.E.c
29 Sairus i daunim Babilon, na long namba wan yia bilong em i stap king long Babilon, em i putim tok bilong larim ol Juda i go bek long Jerusalem. Sapos yumi skelim tok bilong Baibel, yumi ken save em i bin putim dispela tok long pinis bilong yia 538 paslain long Krais, o kirap bilong yia 537 paslain long Krais. Olsem na bai ol i gat bikpela hap taim inap long i go sindaun gen long ol taun bilong ol na ol i kam bung long Jerusalem bilong kirapim gen lotu bilong Jehova long “namba 7 mun,” em mun Tisri, olsem long Oktoba 1 samting long yia 537 paslain long Krais.—Esr. 1:1-4; 3:1-6.d
30 Bikpela Yia Long Ol Skripsa Grik. Bikpela yia bilong helpim yumi long save long ol yia na de bilong ol samting bilong Ol Skripsa Grik, em yia bilong Sisar Taiberius i senisim Ogastus na em i kamap namba wan gavman bilong Rom. Ogastus i dai long Ogas 17, long yia 14 C.E. (long kalenda bilong Gregori); ol hetman bilong Rom i makim Taiberius i kamap namba wan gavman bilong Rom long Septemba 15, long yia 14 C.E. Long Luk 3:1, 3, Baibel i tok Jon Bilong Baptais i kirap autim tok long namba 15 yia bilong Sisar Taiberius. Sapos yumi kaunim ol yia kirap long taim Ogastus i dai, orait namba 15 yia bilong Taiberius i kirap long mun Ogas long yia 28 C.E. na i go inap long mun Ogas long yia 29 C.E. Tasol sapos yumi kaunim ol yia kirap long taim ol hetman bilong Rom i makim Taiberius i kamap namba wan gavman, orait namba 15 yia bilong Taiberius i kirap long mun Septemba long yia 28 C.E. na i go inap long mun Septemba long yia 29 C.E. Bihain liklik long dispela, Jisas i kam bilong kisim baptais long Jon, taim em i gat “samting olsem 30 krismas.” Em i yangpela long Jon inap 6-pela mun. (Lu. 3:2, 21-23; 1:34-38) Dispela i stret wantaim tok profet i stap long Daniel 9:25, em i stori long 69 taims “7-pela yia,” olsem 483 yia i mas kamap kirap long taim ol i harim “tok i kamap bilong wokim gen Jerusalem” wantaim banis bilong en na i go inap long taim “bikman God i bin makim” em i kam. (Dan. 9:24) Long yia 455 B.C.E. dispela “tok” i kamap—Artaserksis (Longimanus) i putim tok long wokim gen Jerusalem, na long pinis bilong yia 455 B.C.E. Nehemia i go kirapim dispela wok long Jerusalem. Na inap olsem 483 yia bihain long dispela, olsem long pinis bilong yia 29 C.E., Jon i givim baptais long Jisas na God i kapsaitim spirit holi long Jisas na em i kamap “bikman God i bin makim.” Jisas i kisim baptais na em i kirap autim tok long pinis bilong yia 29 C.E. Dispela i stret wantaim tok profet bilong Daniel i tok, ol bai i kilim em i dai “bihain long 3 na hap yia i go pinis.” (Dan. 9:27) Ol i kilim Jisas i dai long Mas o Epril samting, olsem na wok bilong em long autim tok inap 3 na hap yia i bin kirap long mun Oktoba samting long yia 29 C.E.e Dispela tupela samting i kamapim klia olsem mama i bin karim Jisas long yia 2 B.C.E., long wanem, Luk 3:23 i tok taim Jisas i kirap autim tok, em i gat olsem 30 krismas.f
Oktoba 20: Tingting Bilong Jehova Long Ol Yia na De Samting
31 Ol Aua na De i Save Kamap i Go Pinis Hariap. Taim yumi wet long wanpela samting i kamap, i olsem ol aua i save kamap i go pinis isi isi tru. Tasol sapos yumi gat planti wok na yumi amamas long mekim ol dispela wok, i olsem ol aua i kamap i go pinis hariap. Na ol lapun i pilim olsem ol de na mun na yia i save kamap i go pinis hariap tru, tasol ol liklik pikinini i pilim olsem ol de na mun na yia i save isi isi tumas. Bilong wanem i olsem? Sapos pikinini i gat wanpela krismas na em i winim wanpela krismas moa, hap taim bilong em i stap laip i go bikpela inap 100 pesen na planti nupela samting i painim em na em i lain long planti nupela samting. Tasol sapos wanpela man i gat 50 krismas na em i winim wanpela krismas moa, dispela wanpela yia em i liklik hap taim tasol (inap 2 pesen) bilong olgeta yia em i bin i stap laip. Olsem na long pikinini, wanpela yia i olsem longpela hap taim tru. Tasol long lapun, sapos em i gat planti wok na em i no gat sik, wanpela yia i olsem liklik hap taim tru. Lapun i pilim tru as bilong tok bilong Solomon, em i tok: “I no gat wanpela nupela samting i stap long dispela graun.” Tasol ol yangpela i gat bikpela hap taim yet bilong lain na kisim save. Nogut ol i wok long “holimpas win” olsem ol man bilong dispela graun i mekim, em ol i wok strong long kisim planti samting bilong skin. Gutpela sapos ol i mekim wok long dispela hap taim bilong ol bilong kisim planti save long God. Solomon i givim gutpela tok long ol yangpela, olsem: “God i bin wokim yumi olgeta. Olsem na long taim yupela i yangpela yet, yupela i mas tingim em. Nogut yupela i lusim tingting long em, na bihain yupela i kamap lapun na taim nogut i painim yupela, na bai yupela wan wan i tok olsem, ‘Mi no amamas long laip bilong mi.’ ”—Sav. 1:9, 14; 12:1.
32 Wanpela Taim Bai Ol Manmeri i Stap Oltaim. Tasol i no longtaim na bai gutpela taim i kamap na bai ol man i no i go lapun. Ol man i laikim tumas stretpela pasin na ol i ‘stap long han bilong Jehova,’ ol inap tingting long i stap oltaim long graun aninit long Kingdom bilong God. (Sng. 31:14-16; Mt. 25:34, 46) Taim Kingdom i bosim graun, bai ol man i no i dai moa. (KTH 21:4) Bai ol man i no ken i stap nating, no gat wok, na bai ol i no gat sik, na ol i no les; bai i gat as bilong i stap bilong ol. Bai i gat planti wok bilong mekim, em ol gutpela wok ol man i gutpela olgeta bai amamas long mekim. Olgeta wok ol i mekim bai kamap gutpela, na bai ol i stap belgut na amamas. Bai i olsem ol yia i kamap i go pinis hariap, tasol ol manmeri bai tingim ol gutpela gutpela samting i painim ol long ol dispela yia. Ol planti tausen tausen yia bai kamap i go pinis na taim ol man i stap longtaim olsem, bai ol i kisim tingting wankain olsem bilong Jehova long ol yia na de samting. Long tingting bilong Jehova, “1000 yia i olsem wanpela de tasol, na dispela taim i go pinis kwiktaim tumas, olsem asde tasol.”—Sng. 90:4.
33 Sapos yumi tingim ol hap taim i wok long kamap na yumi tingim tok promis bilong God long kamapim nupela taim i gat stretpela pasin tasol i stap long en, orait yumi ken amamas tru na wetim ol gutpela blesing bai kamap long dispela taim bihain. Long dispela taim bai Jehova i “mekim gut tru long ol man i stap wanbel”—bai em i givim “laip bilong i stap gut oltaim oltaim” long ol.—Sng. 133:3.
[Ol Futnot]
a Buk Biblical Calendars, 1961, bilong J. Van Goudoever, pes 75.
b Buk Insight on the Scriptures, Vol. 1, pes 458.
c Buk Insight on the Scriptures, Vol. 1, pes 453-454, 458; Vol. 2, pes 459.
d Buk Insight on the Scriptures, Vol. 1, pes 568.
e Buk Insight on the Scriptures, Vol. 2, pes 899-902.
f Buk Insight on the Scriptures, Vol. 2, pes 56-58.
[Askim Bilong Stadi]
1, 2. Solomon i tok wanem long taim bilong ol samting? Ol de i save kamap i go pinis kwiktaim, olsem na yumi mas mekim wanem long hap taim bilong yumi?
3. Olsem wanem yumi ken tok, ol hap taim i kain olsem ples antap?
4. Yumi ken stori olsem wanem long ol hap taim i save go tasol?
5. Maski yumi bin mekim gutpela pasin o pasin nogut long bipo, bilong wanem yumi no inap senisim dispela?
6. Olsem wanem taim bihain i narapela kain long taim bipo? Olsem na bilong wanem yumi mas tingim gut taim bihain?
7. Jehova i putim wanem ol samting bilong makim taim?
8. Baibel i kolim dispela tok “de” bilong makim wanem ol samting?
9. (a) Pasin bilong makim de i gat 24 aua na aua i gat 60 minit, dispela pasin i kirap we? (b) Ol Skripsa Hibru i kolim wanem ol bikpela hap taim bilong wanpela de?
10. Long taim bilong Jisas, ol Juda i save kaunim ol aua olsem wanem? Olsem wanem dispela inap helpim yumi long save wanem aua Jisas i dai?
11. Long wanem taim ol man i bin kirap mekim wok long ol “wik” bilong makim ol hap taim?
12. Stori long dispela hap taim em Baibel i kolim olsem wanpela luna mun. Tasol ol man bilong nau i save makim ol mun olsem wanem?
13. Olsem wanem yumi inap save stret long ol mun na de bilong ol bikpela samting i bin kamap long taim bilong bikpela Tait Wara?
14. (a) Jehova i mekim wanem na i gat ol kain kain taim bilong yia? (b) Dispela pasin bai stap inap long wanem taim?
15, 16. (a) Taim bilong ren long Graun Bilong Promis i gat olsem hamas hap bilong en? (b) Stori long ol dispela taim bilong ren na wok bilong gaden ol man i mekim long ol dispela wan wan hap taim.
17. (a) Long taim bilong san, wanem samting i save helpim ol kaikai long kamap gut? (b) Lukim lista bilong “Yia Bilong Ol Israel” na makim wanem ol mun ol narapela narapela kain taim bilong yia i save kamap long en, olsem paragraf 15-17 i stori long en. (c) Long wanem mun ol i kisim ol namba wan kaikai i mau? Long wanem mun ol i kisim wit na bali long gaden? Na long wanem mun ol i kisim pinis olgeta kaikai i stap long gaden? Ol i mekim wanem ol bikpela bung bilong lotu long ol dispela wan wan taim bilong kisim kaikai?
18. (a) Long tok Hibru, olsem wanem insait bilong tok “yia” i stret? (b) Stori long wanpela yia bilong san.
19. (a) Yia bilong Baibel i kirap long wanem taim na i go inap long wanem taim? (b) Bihain Jehova i tok “yia bilong lotu” i mas kirap long wanem taim?
20. Ol i mekim wanem bilong stretim yia bilong mun bambai i wankain olsem yia bilong san? Stori long dispela kain yia ol i kolim olsem yia bilong san na mun.
21. (a) Stori long kalenda bilong Julius. (b) Bilong wanem kalenda bilong Gregori i stret moa, winim kalenda bilong Julius?
22, 23. Long tok profet wanpela yia em inap hamas de?
24. Ol lain bilong bipo ol i save kaunim ol namba kirap long wanem namba?
25. Sapos yumi kolim namba bilong wanpela samting, olsem yumi tok em i namba wan o namba 2, dispela namba i makim wanem samting? Tasol taim yumi laik kolim hamas samting olgeta i stap, yumi mas kolim namba olsem wanem?
26. (a) Sapos yu laik save hamas yia i kamap i go pinis namel long Oktoba 1, 607 B.C.E., na Oktoba 1, 1914 C.E., yu mas mekim wanem? (b) Sapos yu laik save wanem de long kalenda bai kamap 2,520 yia bihain long Oktoba 1, 607 B.C.E., orait yu mas mekim wanem?
27. Wanem dispela kain yia yumi ken kolim olsem “bikpela” yia? Ol dispela yia i helpim yumi olsem wanem?
28. I gat wanem bikpela yia inap helpim yumi long save long yia bilong ol samting Ol Skripsa Hibru i stori long en?
29. Long wanem yia Sairus i putim tok long ol Juda i ken i go bek long Jerusalem? Olsem na rot i op bilong ol Juda i mekim wanem?
30. Olsem wanem yumi ken save, yia 29 C.E. em i wanpela bikpela yia long Ol Skripsa Grik?
31. (a) Olsem wanem na sampela taim i olsem ol yia i kamap i go pinis hariap na sampela taim i olsem ol i isi isi tumas? (b) Ol yangpela i gat bikpela hap taim bilong mekim wanem, na ol lapun nogat?
32. Olsem wanem na bai ol man inap kisim tingting wankain olsem bilong Jehova long ol yia na de samting?
33. Jehova bai mekim gut tru long ol man na givim wanem samting long ol?
[Sat long pes 4]
YIA BILONG OL ISRAEL
Nem Bilong Mun Nisan (Abip)
Em Olsem Mas - Epril
Yia Bilong Lotu Namba 1 mun
Yia Bilong Wok Namba 7 mun
Ol Ves Bilong Baibel Kis. 13:4; Neh. 2:1
Ol Bikpela De Bilong Lotu Nisan 14 Pasova
Nisan 15-21 Bret i No Gat Yis
Nisan 16 Ofa bilong namba wan
kaikai i mau
Nem Bilong Mun Iyar (Siv)
Em Olsem Epril - Me
Yia Bilong Lotu Namba 2 mun
Yia Bilong Wok Namba 8 mun
Ol Ves Bilong Baibel 1 Kin. 6:1
Nem Bilong Mun Sivan
Em Olsem Me - Jun
Yia Bilong Lotu Namba 3 mun
Yia Bilong Wok Namba 9 mun
Ol Ves Bilong Baibel Est. 8:9
Ol Bikpela De Bilong Lotu Sivan 6 Amamas Long Kisim
Kaikai Long Gaden
(de Pentikos)
Nem Bilong Mun Tamus
Em Olsem Jun - Julai
Yia Bilong Lotu Namba 4 mun
Yia Bilong Wok Namba 10 mun
Ol Ves Bilong Baibel Jer. 52:6
Nem Bilong Mun Ap
Em Olsem Julai - Ogas
Yia Bilong Lotu Namba 5 mun
Yia Bilong Wok Namba 11 mun
Ol Ves Bilong Baibel Esr. 7:8
Nem Bilong Mun Elul
Em Olsem Ogas - Septemba
Yia Bilong Lotu Namba 6 mun
Yia Bilong Wok Namba 12 mun
Ol Ves Bilong Baibel Neh. 6:15
Nem Bilong Mun Tisri (Etanim)
Em Olsem Septemba - Oktoba
Yia Bilong Lotu Namba 7 mun
Yia Bilong Wok Namba 1 mun
Ol Ves Bilong Baibel 1 Kin. 8:2
Ol Bikpela De Bilong Lotu Tisri 1 Winim Ol Biugel
Tisri 10 God i Tekewe Sin Bilong
Ol Manmeri
Tisri 15-21 I Stap Long Haus Win
Tisri 22 Bung na Mekim Lotu
Nem Bilong Mun Markesvan (Bul)
Em Olsem Oktoba - Novemba
Yia Bilong Lotu Namba 8 mun
Yia Bilong Wok Namba 2 mun
Ol Ves Bilong Baibel 1 Kin. 6:38
Nem Bilong Mun Kislev
Em Olsem Novemba - Disemba
Yia Bilong Lotu Namba 9 mun
Yia Bilong Wok Namba 3 mun
Ol Ves Bilong Baibel Neh. 1:1
Nem Bilong Mun Tebet
Em Olsem Disemba - Janueri
Yia Bilong Lotu Namba 10 mun
Yia Bilong Wok Namba 4 mun
Ol Ves Bilong Baibel Est. 2:16
Nem Bilong Mun Sebat
Em Olsem Janueri - Februeri
Yia Bilong Lotu Namba 11 mun
Yia Bilong Wok Namba 5 mun
Ol Ves Bilong Baibel Sek. 1:7
Nem Bilong Mun Adar
Em Olsem Februeri - Mas
Yia Bilong Lotu Namba 12 mun
Yia Bilong Wok Namba 6 mun
Ol Ves Bilong Baibel Est. 3:7
Nem Bilong Mun Veadar
Em Olsem (Narapela mun ol i skruim)
Yia Bilong Lotu Namba 13 mun