Ol Tok Piksa i Stap Long Baibel Yu Kliagut Long Ol?

TAIM yu lukim wanpela piksa, em inap tokim yu long planti samting, tasol sampela taim, wanpela o tupela tok tasol inap kamapim wanpela piksa long tingting bilong yu. Baibel i save mekim wok long planti tok piksa, em ol i helpim man long piksaim samting long tingting. Long Bikpela Tok Long Maunten, Jisas i mekim planti tok piksa, winim 50.

Bilong wanem i gutpela long yu tingim ol dispela tok piksa? Wanpela samting i olsem: Sapos yu kliagut long ol, dispela bai helpim yu long pilim tru ol tok yu ritim long Baibel, na yu bai laikim moa Tok Bilong God. Na tu, sapos yu luksave olsem samting yu ritim em tok piksa, dispela bai helpim yu long kliagut moa yet long ol tok bilong Baibel. Tasol sapos yu no luksave olsem samting yu ritim em wanpela tok piksa, dispela inap paulim yu na yu kisim sampela tingting kranki.

Kliagut Long Ol Tok Piksa

Ol tok piksa i gat 3-pela hap bilong en: astingting, na piksa, na samting i wankain long dispela tupela samting. Bilong kisimgut mining bilong wanpela tok piksa, yu mas kliagut long dispela 3-pela samting.

Sampela taim, ating i no hatwok tumas long luksave long astingting na piksa bilong en. Tasol sampela taim, i luk olsem astingting na piksa bilong en i gat 2-pela o 3-pela samting bilong en i wankain. Wanem samting bai helpim yu long makim stret samting i wankain? Ating ol ves o ol tok i stap klostu long dispela tok piksa inap helpim yu.a

Olsem: Jisas i tokim kongrigesen long Sardis: “Sapos yu no kirap na lusim slip, orait wantu bai mi kam long yu olsem ol stilman i save kam.” Jisas i tok taim em i kam (astingting), dispela bai kain olsem stilman i kam (piksa). Orait wanem samting bilong dispela tupela samting i wankain? Tok i stap klostu i helpim yumi. Jisas i tok moa: “Yu bai i no inap save long taim mi laik i kam.” (KTH 3:3) Jisas i no kam bilong stilim samting olsem stilman i mekim, nogat. Samting i wankain long stilman i kam na Jisas i kam, i olsem: Em bai kam long wanpela taim yumi no ting em bai kam.

Tasol sampela taim, tok piksa i stap long wanpela hap bilong Baibel inap helpim yu long kliagut long tok piksa i wankain liklik na i stap long narapela hap bilong Baibel. Olsem: Aposel Pol i bin mekim wankain tok piksa em Jisas i bin mekim, olsem: “Yupela yet i save pinis, De bilong Bikpela bai i kamap wantu tasol olsem stilman i kam long nait.” (1 Tesalonaika 5:2) Ol ves klostu long dispela tok bilong Pol i no kamapim klia olsem wanem dispela De i wankain olsem stilman. Tasol taim yu skelim dispela tok piksa wantaim tok piksa Jisas i mekim long Kamapim Tok Hait 3:​3, dispela bai helpim yu long save olsem wanem dispela tupela samting i wankain. Dispela tok piksa i helpim yumi long tingim olsem olgeta trupela Kristen i mas was i stap!

Ol Tok Piksa i Skulim Yumi Long God

I no gat wanpela man inap save olgeta long God Jehova em i wanem kain God na ol samting em inap mekim. Long bipo, King Devit i tok long Jehova olsem: “Em i antap tru na yumi no inap save olgeta long biknem bilong en. Tingting bilong yumi i sot.” (Song 145:3) Jop i tingim ol samting God i bin wokim, na em i tok: “Dispela olgeta samting God i mekim ol i kamap, na yumi save lukim na pilim long en, em i soim yumi liklik hap tasol bilong bikpela strong bilong God. Na dispela i winim save bilong yumi. Olsem na sapos God i kamapim olgeta strong bilong en long yumi, bai yumi no inap tru long mekim wanpela tok. Nogat tru.”​​—Jop 26:14.

Maski yumi no inap save olgeta long God em i wanem kain, Baibel i save mekim wok long ol tok piksa bilong helpim yumi long save long ol gutpela gutpela pasin bilong em. Baibel i tok God em i wanpela King, Man Bilong Kamapim Ol Lo, Jas, na Soldia​—kain man olsem yumi mas rispektim. Na tu, Baibel i tok em i olsem wanpela Wasman Bilong Sipsip, Man Bilong Skulim Yumi, Tisa, Papa, Man Bilong Oraitim Sik, na Man Bilong Kisim Bek Yumi​​—kain man olsem yumi inap laikim tru. (Song 16:7; 23:1; 32:8; 71:17; 89:26; 103:3; 106:21; Aisaia 33:22; 42:13; Jon 6:​45) Ol dispela tok piksa ol i winim pasin bilong mekim planti tok long helpim yu long piksaim long tingting Jehova i wanem kain man.

Baibel i kolim sampela samting moa bilong makim Jehova. Baibel i tok em i olsem wanpela “bikpela ston” na “strongpela banis.” (2 Samuel 23:3; Song 18:2; Lo 32:4) Wanem samting i wankain? Olsem wanpela bikpela ston i stap strong long ples bilong en na i no save senis, God Jehova i no save senis na em inap stap olsem strongpela ples hait bilong yu.

I gat planti tok piksa long Buk Song i stori long ol narapela narapela pasin bilong Jehova. Olsem: Song 84:11 (NW) i stori long Jehova olsem em i “san na hap plang,” long wanem, em i As bilong lait na laip, na i lukautim gut yumi. Song 121:5 (NW) i tok, “Jehova i olsem ples kol long han sut bilong yu.” Olsem wanpela gutpela ples kol inap haitim yu long strongpela san, Jehova inap lukautim ol manmeri bilong em na bai ol hevi i no ken bagarapim ol, olsem kukim ol. Em inap haitim ol gut aninit long “han” o “wing” bilong em.​​—Aisaia 51:16; Song 17:8; 36:7.

Ol Tok Piksa i Stori Long Jisas

Planti taim Baibel i tok Jisas em i “Pikinini Bilong God.” (Jon 1:​34; 3:​16-​18) Sampela man i no Kristen ol i hatwok long kisim dispela tok, long wanem, God i no gat wanpela meri olsem meri bilong em, na em i no wankain olsem yumi ol man bilong graun. Olsem na God i no save kamapim pikinini olsem ol man bilong graun i save kamapim. Dispela tok “Pikinini Bilong God” em i wanpela tok piksa tasol. Em i bilong helpim yumi long save olsem Jisas i pas gut wantaim God olsem wanpela pikinini bilong graun i pas gut wantaim papa bilong em. Na i helpim yumi long save olsem Jisas i bin kisim laip bilong em long Jehova, em Man i bin wokim em. Na olsem tasol, Baibel i tok namba wan man, Adam, em tu i “pikinini bilong God.”​​—Luk 3:​38.

Jisas i yusim ol tok piksa bilong makim ol wok em i mekim bilong karimaut laik bilong God. Em i tok: “Mi yet mi diwai wain tru. Na Papa bilong mi em i papa bilong gaden wain.” Na em i tok ol disaipel bilong em ol i olsem han bilong diwai wain. (Jon 15:​1, 4) Yumi kisim wanem skul long dispela tok piksa? Bilong stap laip na karim kaikai, ol han bilong diwai wain i mas pas long diwai bilong en. Na olsem tasol, ol disaipel bilong Krais i mas pas long em. Jisas i tok: “Sapos yupela i lusim mi, yupela i no inap mekim wanpela samting.” (Jon 15:5) Na olsem papa bilong gaden wain i laik bai diwai wain i mas karim kaikai, Jehova i laik bai ol man i pas wantaim Krais ol i mas karim kaikai.​​—Jon 15:8.

Save Gut Long Wanem Samting i Wankain

Yumi inap kisim tingting kranki sapos yumi ritim wanpela tok piksa na yumi no luksave long wanem samting bilong tupela narapela narapela samting em tok piksa i stori long en, i wankain. Olsem: Rom 12:20 (King Jems Nupela Testamen) i tok: “Sapos birua bilong yu em i hangre, orait yu givim kaikai long em. Sapos nek bilong em i drai, orait yu givim wara long em. Na sapos yu mekim olsem, yu hipim hatpela sit bilong paia antap long het bilong em.” Yu ting pasin bilong hipim hatpela sit bilong paia antap long het bilong wanpela man i makim pasin bilong bekim pe nogut? Nogat. Tingim samting i wankain. Dispela tok piksa i kam long pasin bilong ol man long bipo long kukim ain. Ol i putim hatpela sit bilong paia aninit long hap ain na antap long en. Hap ain i kamap olsem wara na ol pipia i stap long en i lus. Na olsem tasol, taim yumi mekim gutpela pasin long narapela, dispela inap mekim na ol hatpela pasin bilong em i lus, na i kirapim em long kamapim ol gutpela pasin bilong em.

Taim yumi kliagut long ol tok piksa, dispela i givim save long yumi, na tu, yumi pilim samting long bel. Olsem: Taim Baibel i tok Jehova i “rausim” ol sin bilong yumi​—olsem man i rausim rait long blakbot bambai em i ken mekim wok gen long en​—yumi ken save olsem bai God i no tingim ol dispela sin long bihain na givim strafe long yumi, nogat. (Song 32:​1, 2; Aposel 3:​19) Na yumi amamas long save olsem Jehova i ken kisim ol sin i stap ples klia olsem retpela mak, na mekim ol i kamap waitpela olsem ais!​​—Aisaia 1:​18.

Em sampela tasol bilong planti handet tok piksa i stap long Tok Bilong God, em Baibel. Olsem na taim yu ritim Baibel, tingim gut ol tok piksa. Lusim haptaim long skelim wanem samting bilong tupela narapela narapela samting i wankain, na tingim gut. Taim yu mekim olsem, dispela bai helpim yu long kliagut moa na pilim tru ol tok bilong Baibel.

[Ol Futnot]

[Blok long pes 13]

Ol Tok Piksa i Helpim Yumi Olsem Wanem?

Ol tok piksa i save helpim yumi long kain kain rot. Tok i hatwok long kisimgut inap kamap klia long rot bilong skelim wantaim samting i no hatwok long kisimgut. Tok i gat ol narapela narapela hap bilong en inap kamap klia long rot bilong narapela narapela tok piksa. Ol tok piksa inap strongim ol bikpela tok na helpim yumi long pilim tru.

[Blok long pes 14]

Luksave Long Tok Piksa

TOK PIKSA: “Yupela i olsem sol bilong graun.” (Matyu 5:​13)

ASTINGTING: Yupela (Ol disaipel bilong Jisas)

PIKSA: Sol

SAMTING I WANKAIN: Samting i pasim bagarap

SKUL: Tok ol disaipel i autim inap helpim planti man na bai bagarap i no painim ol

[Rait long pes 15]

“Bikpela em i wasman bilong mi. Olsem na mi no inap sot long wanpela samting.”​​—SONG 23:1