Sapta 36
Bikpela Taun i Kisim Bagarap
Driman 12—Kamapim Tok Hait 18:1–19:10
Stori: Bikpela Babilon i pundaun na i bagarap; ol i tokaut long Pikinini Sipsip bai marit
Taim bilong truim: Kirap long 1919 na i pinis bihain long bikpela hevi tru
1. Wanem samting bai kirapim taim bilong “bikpela hevi tru”?
WANTU tasol bagarap bai painim Bikpela Babilon! Em wanpela bikpela bagarap tru, na kirap “long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.”—Matyu 24:21.
2. Planti bikpela gavman i bin kamap, na bihain ol i bagarap, tasol wanem samting i stap yet?
2 Lotu giaman i bilong bipo bipo. Em i kirap long taim bilong Nimrot, em wanpela kilman na em i bikhet long Jehova na em i givim wok long ol man long wokim wanpela taua long Babel. Jehova i paulim tok ples bilong ol dispela bikhetman na em i rausim ol i go nabaut long olgeta hap na ol i karim lotu giaman bilong Babilon i go wantaim. (Stat 10:8-10; 11:4-9) Long dispela taim na i kam inap nau, planti bikpela gavman i bin kamap, na bihain gen ol i lus, tasol lotu bilong Babilon i stap yet. I gat kain kain pasin na bilip bilong en, na em i kamap wanpela bikpela lain lotu giaman i stap long olgeta hap, em dispela Bikpela Babilon em Baibel i bin tok profet long en. Bikpela hap bilong en em ol dispela lotu o misin giaman i gat nem Kristen; dispela i bin kirap long taim sampela man i paulim bilip Kristen na ol i putim sampela bilip bilong Babilon wantaim dispela bilip ol i kolim Kristen. Bikpela Babilon i bin stap longpela taim tru, olsem na planti man i ting em i no inap bagarap.
3. Olsem wanem Kamapim Tok Hait i helpim yumi long save, lotu giaman bai pinis tru?
3 Olsem na i stret tru long Kamapim Tok Hait i mekim tupela tok piksa long ol lotu giaman, olsem Bikpela Babilon, bai pundaun, na ol samting bai kamap i go inap long taim em i bagarap olgeta. Yumi stori pinis long wanpela tok piksa, em i tok, Bikpela Babilon i olsem bikpela “pamukmeri,” na ol gavman i bin prenim em, tasol bihain ol bai bagarapim em. (KTH 17:1, 15, 16) Orait, nau yumi stori long narapela driman, em i tok piksa long Bikpela Babilon i olsem wanpela biktaun, na taun Babilon bilong bipo i bin makim.
Bikpela Babilon i Pundaun
4. (a) Jon i lukim wanem samting long driman? (b) Olsem wanem yumi ken save long dispela ensel? Olsem wanem i stret long em i tokaut long Bikpela Babilon i pundaun?
4 Jon i stori moa long samting em i lukim, na em i tok: “Bihain long dispela, mi lukim narapela ensel i lusim heven na i kam daun. Em i gat bikpela strong tru, na bilas bilong en i mekim graun i lait moa. Em i singaut strong tru olsem, ‘Bikpela taun Babilon em i bagarap [pundaun] pinis!’ ” (KTH 18:1, 2a) Em namba 2 taim Jon i harim ensel i tok olsem. (Lukim Kamapim Tok Hait 14:8.) Tasol long dispela taim gutpela “bilas” bilong dispela bikpela ensel na lait bilong em i mekim graun olgeta i lait! Dispela ensel i husat? Sampela handet yia bipo em profet Esekiel i stori long wanpela driman na i tok: “Mi lukim bikpela lait bilong God . . . i mekim graun i lait moa yet.” (Esekiel 43:2) Olsem na dispela ensel Jon i lukim, em i mas Bikpela Jisas, long wanem, i no gat narapela ensel inap lait olsem Jehova. Jisas tasol “em i soim bikpela lait bilong God na em i lait moa yet long yumi, na em i wankain tru olsem God.” (Hibru 1:3) Long 1914, Jisas i kamap King long heven, na kirap long dispela taim em i bin bosim ol samting long graun, em i stap olsem King na Jas wantaim Jehova. Olsem na i stret em i tokaut long Bikpela Babilon i pundaun.
5. (a) Ensel i givim wok long husat bilong tokim ol man olsem Bikpela Babilon i pundaun? (b) Taim kot i painim ol lain i tok ol i lain bilong God, olsem wanem long ol lotu giaman i gat nem Kristen?
5 Dispela bikpela ensel i givim wok long husat long autim dispela tok long ol man? Em i givim long dispela hap lain ol i stap yet long graun na Jon i piksa bilong ol. Bikpela Babilon i bin daunim ol na ol i bin stap olsem kalabus, tasol nau nogat. Long 1914 na i kam inap 1918 Bikpela Babilon i bin putim bikpela hevi long ol, tasol long 1918 Bikpela Jehova na Krais Jisas, em “dispela ensel bilong autim tok bilong kontrak” bilong Abraham, tupela i kirap long skelim “lain bilong [God],” em ol lotu i tok ol i Kristen. Olsem na ol dispela lotu giaman i gat nem Kristen ol i sanap long kot. (Malakai 3:1; 1 Pita 4:17) Ol i gat bikpela asua long blut bilong planti man i bin kapsait long Namba Wan Pait, na ol i bin helpim ol lain bilong graun long mekim nogut long ol Witnes Bilong Jehova i stap gut long wok bilong em; na ol bilip giaman bilong Babilon i no helpim ol dispela lotu giaman long dispela taim ol i kot. Na God i no orait tu long ol narapela hap bilong Bikpela Babilon.—Lukim Aisaia 13:1-9.
6. Olsem wanem na i stret yumi tok, Bikpela Babilon i pundaun pinis long 1919?
6 Bikpela Babilon i pundaun pinis, na long 1919 rot i op na bai lain bilong God i ken lusim kalabus, na olsem insait “long wanpela de tasol” ol i kamap strong gen long ol samting bilong spirit, i olsem ol i sindaun gen long “kantri” bilong ol. (Aisaia 66:8) Long dispela yia 1919 God Jehova, olsem Bikpela Darius, na Krais Jisas, olsem Bikpela Sairus, tupela i stiaim ol samting i bin kamap na bai lotu giaman i no inap daunim moa lain bilong Jehova. Lotu giaman i no inap pasim ol moa, olsem na ol i kirap mekim wok bilong Jehova na tokim olgeta man em dispela Bikpela Babilon i olsem meri pamuk na em bai bagarap, na klostu nau bai i no gat tok moa long Jehova i stap King tru bilong heven na graun!—Aisaia 45:1-4; Daniel 5:30, 31.
7. (a) Tru, Bikpela Babilon i no kisim bagarap long 1919, tasol em i stap olsem wanem long ai bilong Jehova? (b) Taim Bikpela Babilon i pundaun long 1919, olsem wanem long lain bilong Jehova?
7 Tru, Bikpela Babilon i no kisim bagarap long 1919, olsem taun Babilon bilong bipo i no bin bagarap taim ol ami bilong Sairus bilong Persia i daunim long yia 539 paslain long Krais. Tasol long ai bilong Jehova i olsem Bikpela Babilon i pundaun pinis long 1919, long wanem, Jehova i mekim kot pinis long ol lotu giaman, na ol i lus long kot; Jehova i makim ol bilong kisim bagarap, na nau ol i wetim strafe bilong ol. Olsem na bihain long 1919 ol lotu giaman i no inap pasim moa lain bilong God. (Lukim Luk 9:59, 60.) Jehova i helpim lain bilong em long lusim Bikpela Babilon na bai ol i ken stap olsem gutpela wokboi i gat gutpela tingting na ol i ken mekim wok bilong Bikman na givim kaikai bilong spirit long ol man long taim stret bilong en. Jisas i tokim ol: “Yu gutpela wokboi, yu bin mekim gutpela wok tumas,” na Jisas i tokim ol long kirap gen long mekim wok bilong Jehova.—Matyu 24:45-47; 25:21, 23; Aposel 1:8.
8. Aisaia 21:8, 9 i stori long wasman i tokaut long wanem samting? Dispela wasman i makim husat long nau?
8 Bipo yet, long rot bilong ol narapela profet, Jehova i tokaut long dispela bikpela samting. Aisaia i tok, wanpela wasman i sanap antap long ples bilong was long ol birua na em “i singaut strong olsem laion na i tok olsem, ‘Bikpela, mi bin sanap long ples bilong was long ol birua na mi bin was gut long san na long nait.’ ” Na dispela wasman i lukim wanpela samting, na em i tokaut strong olsem: “Babilon i bagarap [pundaun] pinis. Em i bagarap pinis. Na olgeta piksa bilong ol giaman god bilong ol i pundaun long graun na i bruk olgeta.” (Aisaia 21:8, 9) Dispela wasman hia i makim wanpela lain bilong nau, em Jon i piksa bilong ol, na ol i was i stap, na long rot bilong nius Wastaua na sampela ol buk bilong Baibel ol i tokaut olsem Babilon i pundaun pinis.
Bikpela Babilon i Lusim Strong
9, 10. (a) Olsem wanem long ol lotu bilong Bikpela Babilon bihain long Namba Wan Pait? (b) Bikpela ensel i tok wanem long Bikpela Babilon i pundaun?
9 Taun Babilon bilong bipo i pundaun long yia 539 paslain long Krais, na bihain isi isi em i wok long bagarap, na bihain moa em i bagarap olgeta. Na i olsem tu long ol lotu bilong Bikpela Babilon bihain long Namba Wan Pait—ol i no gat strong olsem bilong bipo long bosim ol gavman na ol man i stap long olgeta hap. Bihain long Namba 2 Pait, gavman bilong Japan i tambuim lotu Sinto na pasin bilong lotuim empera bilong Japan. Gavman Komyunis bilong Saina i bosim olgeta samting bilong lotu. Long hap bilong ol Talatala long not Yurop, planti man i no tingim tumas lotu. Na long nau lain bilong Lotu Katolik i bruk bruk na ol i no stap wanbel.—Lukim Mak 3:24-26.
10 Ol dispela samting i makim olsem ‘wara Yufretis i laik drai’ na bai rot i op na ol birua i ken kam na bagarapim Bikpela Babilon. Dispela samting i bin kamap ples klia long Oktoba 1986, em pop i tok, misin i mas singaut long ol man i helpim misin gen long mani, long wanem, em i gat bikpela dinau. (KTH 16:12) Bihain long 1919 sampela ol samting i kamap ples klia long ai bilong ol man na nau ol i ken save Bikpela Babilon i sot olgeta long ol kaikai bilong spirit na em i olsem wanpela ples em graun bilong en i nogut pinis na i stap nating, olsem bikpela ensel i tok: “Nau em i kamap ples bilong ol spirit nogut i stap long en. Ol spirit nogut, na ol pisin i doti, na ol pisin nogut tru, ol tu i stap long en.” (KTH 18:2b) Liklik taim Bikpela Babilon bai bagarap olgeta na i kamap wankain olsem ol pipia bilong ples Babilon bilong bipo, em i stap long hap nau ol i kolim Irak.—Lukim tu Jeremaia 50:25-28.
11. Olsem wanem Bikpela Babilon em i kamap ples bilong “ol spirit nogut, na ol pisin i doti, na ol pisin nogut tru”?
11 Ating dispela tok “spirit nogut” i makim wankain samting em Aisaia i kolim olsem “wel meme” (se‘i·rimʹ) taim em i stori long Babilon i pundaun: “Dispela ples bai i kamap ples nating na ol wel abus tasol bai i kam i stap long en. Ol pisin bilong nait bai i stap long ol haus. Ol muruk tu bai i stap, na ol wel meme bai i kalap kalap na ran i go i kam nabaut.” (Aisaia 13:21) Ating em i no toktok tru long ol spirit nogut, tasol em i toktok long ol animal i gat longpela gras na ol i stap long ples wesan i no gat planti gras o diwai samting, na taim ol man i lukim, ol i tingting long ol spirit nogut. Na taim Bikpela Babilon i pundaun na ensel i tok, ol dispela kain animal i stap insait long ol pipia bilong en, olsem “ol spirit nogut,” na “pisin i doti,” na “pisin nogut tru,” dispela i makim olsem Bikpela Babilon i dai pinis long ol samting bilong spirit na em i no inap helpim ol man long i stap laip.—Lukim Efesus 2:1, 2.
12. Olsem wanem Bikpela Babilon i stap olsem Jeremaia i tok long Jeremaia sapta 50?
12 Jeremaia tu i mekim kain tok profet olsem long dispela samting bai painim Bikpela Babilon. Em i tok: “Bikpela i tok olsem, ‘Kantri Babilon i mas bagarap. Na ol manmeri bilong Babilon i mas bagarap wantaim ol hetman na ol saveman bilong ol. . . . Taim bilong san i mas i stap longpela taim long Babilon na olgeta wara bilong en i mas drai. Long wanem, ol piksa bilong giaman god i pulap long dispela kantri. Ol Babilon i bihainim ol dispela giaman god na ol i kamap olsem ol longlong man. Olsem na bai i no gat man i stap moa long Babilon inap olgeta taim bihain. Ol wel pusi na ol weldok na ol muruk tasol bai i stap.’ ” Maski Bikpela Babilon i lotuim planti god giaman na mekim planti singsing na beten, dispela i no inap helpim em long abrusim strafe kain olsem God i bin givim long Sodom na Gomora.—Jeremaia 50:35-40.
Wain i Kirapim Pasin Pamuk
13. (a) Strongpela ensel i tok wanem long bikpela pasin pamuk bilong Bikpela Babilon? (b) Wanem kain pasin sem ol i bin mekim long Babilon long bipo na ol i mekim long Bikpela Babilon tu?
13 Na strongpela ensel i toktok long planti pasin pamuk Bikpela Babilon i mekim, na i tok: “Long wanem, olgeta lain manmeri i bin mekim planti pasin pamuk wantaim em. I olsem ol i bin dringim strongpela wain bilong em. Na ol king bilong graun tu i bin mekim pasin pamuk wantaim em. Na ol man bilong graun i save wok bisnis, ol i bin wokim bisnis na kisim planti mani long ol kain kain pasin nogut em i no save sem long mekim.” (KTH 18:3) Ol lotu giaman i bin lainim olgeta lain man long ol pasin nogut bilong lotu. Wanpela saveman bilong Grik, em Herodotas, em i tok, long Babilon bilong bipo, wanpela taim long laip bilong ol, olgeta meri i mas mekim pasin pamuk long haus lotu, em samting bilong lotu. Na i gat ol piksa nogut bilong pasin pamuk na sem i stap long haus lotu ol i kolim Angko Wat long Kampusia na long ol haus lotu long Kajuraho long India, em piksa bilong god Visnu bilong lotu Hindu em i stap namel long ol piksa nogut i gat sem. Long Amerika long 1987 na 1988 pasin nogut bilong pamuk em sampela pasto bilong televisen i bin mekim, i kamap ples klia. Na planti pris pasto i save mekim pasin sodom tu, na stori bilong dispela i kamap ples klia. Olsem na yumi save, ol lotu i gat nem Kristen ol i no gat tok long bikpela pasin sem i stap long lotu bilong ol. Tasol i gat narapela kain pasin pamuk nogut, na olgeta kantri i gat asua long dispela.
14-16. (a) Long Itali, wanem pasin nogut ol i bin mekim bilong bungim wok lotu na wok politik wantaim? (b) Taim ol Itali i daunim ol Abisinia, ol bisop Katolik i tok wanem?
14 Yumi bin stori long ol bikman bilong lotu na politik i wok wantaim na helpim Hitler long kamap bos bilong Jemani. Sampela ol narapela kantri tu i bin kisim hevi, long wanem, lotu i go insait long wok politik bilong ol. Long Itali long Februeri 11, 1929, Mussolini wantaim Kadinal Gasparri i sainim wanpela tok promis, o kontrak, ol i kolim Lateran Triti, na dispela i makim Biktaun Vatiken i kamap olsem wanpela kantri. Pop Pius Namba 11 i bin tok, em i ‘givim Itali i go bek long God, na em i givim God i go bek long Itali.’ Em i tok stret, o nogat? Orait, yumi tingim samting i bin kamap 6-pela yia bihain: Long Oktoba 3, 1935, Itali i daunim na kisim kantri Abisinia, na Itali i tok, ‘ol Abisinia i man nogut na ol i mekim ol man i wok kalabus.’ Tasol husat tru i man nogut? Misin Katolik i tok wanem long dispela pasin nogut Mussolini i bin mekim? Ol i kamapim rong bilong em, o nogat? Pop i mekim sampela tok i no klia tumas, tasol ol bisop bilong em i litimapim nem bilong ol ami bilong Itali. Long wanpela buk (The Vatican in the Age of the Dictators) Anthony Rhodes i tok:
15 “Bisop bilong Udine [Itali] i raitim pas long Oktoba 19 [1935], na i tok, ‘Yumi no ken tok, dispela samting i stret o nogat. Yumi ol man bilong Itali yumi Kristen, na yumi mas helpim ami bilong yumi long win.’ Na long Oktoba 21 Bisop bilong Padua i tok, ‘Nau hevi i painim yumi, tasol yumi mas bilip long gavman bilong yumi na ami bilong yumi na givim bel long ol.’ Na long Oktoba 24 Bisop bilong Kremona i blesim ol plak bilong ami na i tok: ‘God i mas blesim ol dispela soldia, ol i stap long Afrika na ol bai pait na daunim sampela lain na kisim gutpela graun bilong ol na bai ol Itali i gat sampela nupela kantri, na ol bai bringim pasin bilong ol Rom na bilong Kristen i go long ol dispela hap. Ol Itali i mas kamap strong gen na i stap olsem nambawan lain Kristen na saveman bilong graun.’ ”
16 Ol Itali i bagarapim tru ol Abisinia, na ol bikman bilong Misin Katolik i orait long dispela na ol i blesim dispela samting. Yu ting ol dispela bikman bilong misin inap tok, ol i kain olsem aposel Pol. Pol i tok: “Sapos wanpela [man] em i lus, dispela em i no asua bilong mi.”—Aposel 20:26.
17. Ol bikman bilong misin i no bin helpim ol Spen long senisim samting bilong pait i kamap samting bilong wokim gaden, olsem na wanem hevi i bin kamap long Spen?
17 Pasin pamuk bilong Bikpela Babilon i bin nogutim ol Jeman na Itali na Abisinia, na wanpela lain moa em ol Spen. Bikpela pait i bin kamap long Spen long 1936 na i go inap 1939, na wanpela as bilong pait em olsem: Gavman demokratik i laik daunim bikpela strong em Misin Katolik i bin holim bilong bosim ol samting. Wanpela bikman Katolik, em Franco, em i bosim wanpela lain bilong pait, na em i tok, em i ‘Kepten Kristen Bilong Bosim Pait Holi Bilong Misin.’ Bihain em i lusim dispela nem. Planti handet tausen Spen i dai long pait. Lain soldia bilong Franco i kilim i dai 40,000 man bilong narapela lain politik (Popular Front), na dispela narapela lain i kilim i dai 8,000 manmeri bilong misin, em ol bruder na pris na sister na ol meri i laik long kamap sister—em wok nogut bilong pait. I gutpela sapos ol i bin bihainim tok bilong Jisas, em i tok: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.” (Matyu 26:52) Ol dispela misin i gat nem Kristen ol i insait long ol pait i bin kapsaitim blut bilong planti man. Em pasin nogut tru! Ol pris pasto bilong ol i no bihainim tok bilong God long senisim “ol bainat bilong ol i kamap olsem ol ain bilong brukim graun.”—Aisaia 2:4.
Ol Man Bilong Wok Bisnis
18. Husat dispela “ol man bilong graun i save wok bisnis”?
18 Husat “ol man bilong graun i save wok bisnis”? Em ol bikpela kampani. Tasol i no gat rong long wok bisnis sapos em i stret. Baibel i givim ol gutpela tok long ol man i mekim wok bisnis. Baibel i tok, no ken giaman o mangal o mekim pasin i no stret. (Sindaun 11:1; Sekaraia 7:9, 10; Jems 5:1-5) Baibel i tok, “yumi bihainim pasin bilong God [na] yumi kisim planti gutpela samting, em sapos yumi amamas long ol samting God i save givim yumi.” (1 Timoti 6:6, 17-19) Tasol Satan i bosim dispela graun, olsem na ol man i no bihainim stretpela pasin. Pasin bilong giaman na paulim mani samting i pulap long graun. Ol misin i save mekim, na ol gavman tu, na ol bikpela kampani tu. Planti taim yumi harim tok long sampela bikman bilong politik i paulim o stilim mani na ol i wok hait long baim ol samting bilong pait i go long sampela lain bilong ol narapela kantri.
19. Olsem wanem long ol bikpela kampani na wok bisnis na kago, olsem na Kamapim Tok Hait i no mekim gutpela tok long “ol man bilong graun i save wok bisnis”?
19 Ol kantri i tromoi bikpela mani long baim ol samting bilong pait; long olgeta yia ol i tromoi 1,000,000,000,000 dola long kisim ol samting bilong pait, tasol i gat planti handet milion man meri pikinini ol i sot long ol samting bilong skin. Dispela em i no stret, tasol i gat narapela samting i no stret tru, em i olsem: Ol kampani i wok bisnis long wokim ol samting bilong pait ol i helpim ol kantri bilong ol long kisim planti mani. Wanpela nius bilong Landon (Spectator) bilong Epril 11, 1987, i tok: ‘Long Amerika 400,000 man i gat wok long wokim ol samting bilong pait, na long Yurop i gat 750,000 i mekim dispela wok. Dispela wok bisnis i go bikpela long ol kantri, na ol i baim ol dispela samting bilong pait i go long ol narapela kantri, olsem wok bisnis long en. Tasol olsem wanem sapos dispela narapela kantri i mekim wok long ol dispela samting long pait long kantri i bin wokim ol dispela samting? Ol i no tingim dispela samting.’ Ol kantri i kisim bikpela winmani long ol samting bilong pait ol i wokim na salim i go long ol narapela kantri, na ol i salim long ol lain ol inap kamap birua tu, na sapos olsem, ating ol dispela birua bai tromoi ol dispela bom samting long kantri i bin wokim, na kilim i dai ol man. Na planti man i wok bisnis long ol dispela samting ol i save giaman na paulim mani na bai ol yet i kisim bikpela mani. Dispela nius (Spectator) i tok, long olgeta yia gavman bilong Amerika i lus long 900 milion dola, em pe bilong ol samting bilong pait em ol man i bin paulim. Olsem na Kamapim Tok Hait i no mekim gutpela tok long ol dispela “man bilong graun i save wok bisnis.”
20. Wanem samting i bin kamap na yumi save, ol misin i insait long ol wok bisnis i no stret?
20 Olsem bikpela ensel i bin tok, ol lotu i insait long ol wok bisnis i no stret. Wanpela beng long Itali (Banco Ambrosiano) i bagarap long 1982, na Misin Katolik long Vatiken i insait long dispela samting. Bikpela kot i bin kamap na ol i kot inap sampela yia, na kot i laik save, husat i bin kisim ol mani bilong dispela beng? Long Februeri 1987 ol majistret bilong biktaun Milan i tokim polis long holim 3-pela bikman bilong lotu Katolik, ol i gat kot long pasin i no stret ol i bin mekim long paulim mani bilong dispela beng; wanpela bilong ol em wanpela asbisop bilong Amerika. Tasol Misin Katolik long Vatiken i sakim tok bilong ol polis i laik kisim dispela 3-pela man, na misin i no larim polis i holim 3-pela. Olsem na long Julai 1987 nambawan Kot Bilong Apil long Itali i senisim tok bilong kot bilong pastaim na em i tok, Misin Katolik long Vatiken i no gat kot moa long dispela, olsem na ol man i kirap nogut na toktok planti; ol i save dispela pasin i no stret. As bilong kot i mekim olsem, em bipo bipo Misin Katolik long Vatiken wantaim gavman bilong Itali i bin wokim kontrak na bai tupela i mas i stap wanbel long ol samting.
21. Olsem wanem yumi save, Jisas i no bin insait long sampela wok mani i no stret? Tasol sampela misin i mekim wanem?
21 Taim Jisas i stap long graun, yu ting em i bin insait long sampela wok mani i no stret, olsem wanpela bisnis o kampani samting? Nogat. Em i no papa bilong wanpela hap graun o haus samting, na “em i no gat ples bilong slip.” Em i bin tokim wanpela yangpela hetman i gat planti mani kago: “Yu mas salim olgeta samting bilong yu, na dispela mani yu kisim yu mas tilim i go long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.” Dispela tok i gutpela bilong helpim man hia na bai em i no gat ol hevi samting bilong wok bisnis. (Luk 9:58; 18:22) Tasol planti taim ol misin i insait long ol wok bisnis i no stret. Long 1987 wanpela nius (Albany Times Union) i tok, wanpela bikman bilong bosim ol mani na wok bisnis bilong Misin Katolik long Maiami long hap bilong Florida long Amerika em i tok, Misin Katolik i insait long sampela kampani i save wokim ol bom nuklia, na ol piksa wokabaut nogut i kamapim pasin sem, na ol smok.
“Yupela i Mas Lusim Dispela Ples”
22. (a) Wanpela maus bilong heven i tok wanem? (b) Long yia 537 paslain long Krais na long yia 1919 wanem samting i mekim na lain bilong God i amamas?
22 Jon i kolim narapela samting moa bilong dispela ol tok profet, na em i tok: “Na mi harim maus bilong narapela man i kamap long heven olsem, ‘Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin.’ ” (KTH 18:4) Jehova i bin tok profet long taun Babilon bilong bipo bai bagarap, na em i tokim lain bilong em: “Yupela lusim Babilon na ranawe i go.” (Jeremaia 50:8, 13) Na i olsem tu long nau. Liklik taim bai Bikpela Babilon i kisim bagarap, olsem na God i tokim lain bilong em long lusim ol dispela lotu giaman. Long yia 537 paslain long Krais, rot i op na nau ol Israel i stap gut long Jehova ol inap ranawe lusim taun Babilon, na ol i amamas. Olsem tasol long 1919 lain bilong God i lusim kalabus bilong Bikpela Babilon na ol i amamas. (KTH 11:11, 12) Na bihain long dispela taim sampela milion man moa i bihainim dispela tok na ol i lusim ol lotu giaman bilong Bikpela Babilon.
23. Dispela maus long heven i tok wanem na yumi save, ol man i mas lusim hariap Bikpela Babilon?
23 Olsem wanem? Yumi mas hariap lusim Bikpela Babilon na klia long ol lotu giaman bilong graun? Yes, yumi mas mekim hariap, long wanem, yumi mas i gat wankain tingting olsem bilong God long dispela Bikpela Babilon nogut. God i bin tok stret taim em i tok Bikpela Babilon i olsem wanpela bikpela pamukmeri. Olsem na wanpela maus long heven i tokim Jon long dispela pamukmeri, i tok: “Em i hipim ol sin bilong en i kam antap inap long heven. Na God i tingim gut olgeta pasin nogut em i bin mekim. Yupela i mas ting long kain pasin dispela pamukmeri i mekim, na yupela i mas bekim wankain pasin long em. Em i bin dabolim ol pasin nogut bilong en na ol i kamap planti tru. Olsem tasol yupela i mas dabolim pe nogut bilong em inap long olgeta pasin nogut em i bin mekim. Em i bin tanim strongpela dring long kap. Orait yupela i mas dabolim strong bilong strongpela dring na mekim em i dring. Em i bin litimapim nem bilong em yet na mekim planti kain pasin pamuk na ol arapela kain pasin nogut. Olsem na yupela i mas givim planti pen long em, inap long skel bilong ol dispela pasin nogut. Na yupela i mas mekim em i krai planti. Em i save tok long em yet olsem, ‘Mi stap kwin, na mi sindaun long sia kwin. Mi no olsem meri man bilong en i dai pinis na em i stap nating. Ol hevi i no inap i kamap long mi, na bai mi krai. Nogat tru.’ Olsem na ol kain kain samting nogut tru bai i kamap long em long wanpela de tasol. Planti sik bai i kamap, na planti man bai i krai nogut, na bikpela hangre bai i kamap. Na paia bai i kukim Babilon olgeta. God, Bikpela em i gat bikpela strong na em i skelim pinis pasin bilong Babilon na em tok long em i mas bagarap.”—KTH 18:5-8.
24. (a) Bilong wanem lain bilong God i mas klia long Bikpela Babilon? (b) Ol man i no lusim Bikpela Babilon ol i mas kisim strafe long wanem ol rong bilong en?
24 Em strongpela tok tru! Olsem na lain bilong God i mas kirap mekim sampela samting. Bipo, Jeremaia i tokim ol Israel long kirap mekim sampela samting, em i tok: “Yupela i mas lusim Babilon na ranawe i go . . . long wanem, nau em i taim bilong Bikpela i bekim pe nogut long Babilon long ol pasin nogut bilong en. . . . Mi Bikpela, mi belhat nogut tru long ol Babilon, na nogut mi bagarapim yupela wantaim ol.” (Jeremaia 51:6, 45) Na olsem tasol dispela maus long heven i toksave long lain bilong God long nau long ol i mas lusim kwik Bikpela Babilon na bai ol strafe bilong en i no ken kisim ol tu. Long nau Jehova i wok long kolim ol strafe bai painim ol lain bilong dispela graun na Bikpela Babilon wantaim. (KTH 8:1–9:21; 16:1-21) Lain bilong God i mas klia olgeta long ol lotu giaman na bai dispela strafe i no ken kisim ol tu na ol i bagarap wantaim ol dispela lotu giaman. Ol man i stap yet insait long Bikpela Babilon, rong bilong en bai i pas long ol, na i olsem ol tu bai i gat asua long pasin pamuk bilong en na long ol bikpela blut em i bin kapsaitim, em blut bilong “olgeta man bilong graun ol birua i bin kilim ol i dai.”—KTH 18:24; skelim wantaim Efesus 5:11; 1 Timoti 5:22.
25. Lain bilong God i bin mekim wanem bilong lusim taun Babilon?
25 Olsem wanem lain bilong God i lusim Bikpela Babilon? Taim ol Juda i bin lusim taun Babilon long bipo, ol i mas wokabaut i go bek long Graun Bilong Promis. Tasol ol i mas mekim sampela samting moa tu. Aisaia i mekim tok profet na i tokim ol: “Yupela olgeta i mas lusim Babilon na i kam. Na lukaut gut, nogut yupela i pas long ol samting i no klin long ai bilong God. Na yupela ol lain bai i karim ol dis na plet samting bilong haus bilong Bikpela, yupela i mas bihainim pasin bilong mekim yupela yet i kamap klin long ai bilong God. Yupela olgeta i mas i stap klin na i kam.” (Aisaia 52:11) Ol i mas lusim olgeta pasin nogut bilong lotu bilong Babilon, long wanem dispela inap bagarapim lotu bilong ol na bai ol i no lotuim Jehova long pasin i stret.
26. Ol Kristen long Korin i bin mekim wanem na ol i bihainim tok bilong Jehova long ‘lusim Bikpela Babilon na no ken pas long samting i no klin long ai bilong God’?
26 Taim aposel Pol i raitim pas long ol Korin em i kolim tok bilong Aisaia na i tok: “Ol haiden ol i narakain, olsem na yupela i no ken pas wantaim ol na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak? . . . Olsem na Bikpela i tok moa olsem, ‘Yupela mas lusim ol, na i go i stap long narapela hap. Na yupela i mas lukaut gut, nogut yupela i pas long ol samting i no klin long ai bilong God.’ ” Tasol i no olsem ol Kristen long Korin i mas lusim taun Korin bambai ol i ken bihainim dispela tok, nogat. Tasol ol i mas klia long haus lotu bilong ol lotu giaman, na ol i no ken insait long ol pasin nogut bilong dispela ol haiden. Long 1919 lain bilong God i kirap long lusim Bikpela Babilon na lusim ol lotu giaman na pasin i no stret bilong ol lotu giaman, olsem bai ol i ken stap stret long ai bilong God na mekim wok bilong em.—2 Korin 6:14-17; 1 Jon 3:3.
27. Olsem wanem strafe i bin painim olpela Babilon i wankain olsem strafe bai painim Bikpela Babilon?
27 Babilon bilong bipo i gat planti rong, olsem na em i pundaun, na bihain em i bagarap, “long wanem, asua bilong Babilon i bikpela tru, na i go antap inap long skai.” (Jeremaia 51:9) Na i olsem tasol long Bikpela Babilon, em “sin bilong en i kam antap inap long heven” na Jehova yet i lukim. Bikpela Babilon i no bihainim pasin i stret, na em i lotuim ol god giaman, na mekim pasin pamuk, na givim hevi long ol man, na stil, na kilim man i dai. Na ol Babilon bilong bipo i bin mekim nogut long haus lotu bilong Jehova na long lain bilong em ol i bin bihainim lotu i tru, olsem na taun Babilon i pundaun, em strafe Jehova i givim long ol. (Jeremaia 50:8, 14; 51:11, 35, 36) Na Jehova bai mekim olsem tasol long Bikpela Babilon. Inap planti handet yia Bikpela Babilon i bin mekim nogut long lain tru bilong Jehova, olsem na Jehova bai bagarapim ol lotu giaman. Taim dispela bagarap i painim Bikpela Babilon, em nau, taim i kamap pinis bilong Jehova i “mekim save long ol birua.”—Aisaia 34:8-10; 61:2; Jeremaia 50:28.
28. Jehova bai givim strafe long Bikpela Babilon inap long wanem skel? Bilong wanem Jehova bai mekim olsem?
28 Lo Bilong Moses i tok, sapos wanpela Israel i stilim wanpela samting long narapela Israel, em i mas bekim tupela long em. (Kisim Bek 22:1, 4, 7, 9) Olsem tasol long Bikpela Babilon—Jehova bai bekim wankain pe long em; ol pen na hevi na rong em i bin mekim long ol man, Jehova bai dabolim long taim em i givim strafe long Bikpela Babilon. Na Jehova i no ken marimari long em, long wanem, Bikpela Babilon i no bin sori liklik long ol man em i bin rongim ol. Em i bin pulim planti samting bilong ol na bai em i ken kisim planti mani kago na “litimapim nem bilong em yet na mekim planti kain pasin pamuk,” tasol nau em bai kisim pen na hevi. Olpela Babilon i bin ting em i stap strong na i no inap kisim bagarap, na em i tok: “Bai mi no inap kamap olsem meri, man bilong en i dai pinis na ol pikinini bilong en tu i dai.” (Aisaia 47:8, 9, 11) Bikpela Babilon tu i ting em i stap strong, tasol Jehova “em i gat bikpela strong,” na em i tok pinis, Bikpela Babilon i mas kisim bagarap, na dispela samting bai painim em wantu, olsem “long wanpela de tasol”!
[Blok long pes 263]
“Ol King . . . i Bin Mekim Pasin Pamuk Wantaim Em”
Bihain liklik long yia 1800 sampela ol bisnisman bilong Yurop i wok hait long bringim planti drak opiam i kam long Saina. Long Mas 1839 gavman bilong Saina i laik pasim ol na gavman i kalabusim 20,000 bokis em drak opiam i pulap long en, em bilong ol bisnisman bilong Inglan. Olsem na kros i kamap namel long Inglan na Saina. Dispela kros i wok long i go bikpela na sampela misineri Talatala i tokim gavman bilong Inglan long kirapim pait long Saina. Ol misineri i mekim sampela tok olsem:
‘Mi amamas long dispela bikpela hevi i kamap, long wanem, mi ting gavman bilong Inglan bai kros, na God bai mekim wanpela samting na opim rot bambai gutnius bilong Krais i ken i go insait long Saina.’—Henrietta Shuck, misineri bilong lotu Baptis.
Bihain pait i kirap, ol i kolim Pait Bilong Drak Opiam. Ol misineri i strongim Inglan long pait na ol i mekim sampela tok olsem:
‘Taim mi tingim dispela samting mi no ting em i samting bilong drak opiam o Inglan, nogat; mi ting em i samting bilong God na i bilong daunim pasin bikhet bilong ol man na bilong opim rot bambai God i ken marimari long ol Saina.’—Peter Parker, misineri bilong lotu Kongrigesenel.
Narapela misineri bilong lotu Kongrigesenel, em Samuel W. Williams, em i tok: ‘Ol samting i kamap i makim klia tru olsem God i stiaim ol dispela samting. Dispela Man i bin tok, Em i kam long graun bilong bringim pait, Em i kam pinis, na Em bai bagarapim hariap ol birua bilong Em na kirapim kingdom bilong Em. Em bai daunim ol i go inap long King Bilong Gutaim i kamap pinis.’
Narapela misineri, em J. Lewis Shuck, em i stori long ol i bin kilim i dai planti planti manmeri bilong Saina, na em i tok: ‘Mi ting Bikpela i bin mekim dispela samting na bai em i ken rausim ol pipia i pasim rot long Tok i Tru Bilong God i go insait long Saina.’
Na narapela misineri bilong lotu Kongrigesenel, em Elijah C. Bridgman, em i tok: ‘Planti taim God i bin givim wok long ol gavman bilong graun long opim rot long kingdom bilong em i ken kamap. Ol gavman bilong graun em rot bilong God long mekim dispela samting. God i bos bilong ol lain man, na em i givim wok long Inglan long givim strafe long ol Saina na daunim ol.’—Stuart Creighton Miller i bin tok olsem long wanpela stori bilong 1974 (“Ends and Means”) i stap long wanpela buk (The Missionary Enterprise in China and America) em John K. Fairbank i bin redim na i stap long Yunivesiti Havat.
[Blok long pes 264]
‘Ol Man i Save Wok Bisnis Ol i Bin Kisim Planti Mani’
‘Bihain long 1929 na taim Namba 2 Pait i no kirap yet, [Bernadino] Nogara [em i bosim ol mani na wok bisnis bilong Misin Katolik long Vatiken] em i makim bikpela hap mani bilong Vatiken na sampela ol lain bilong Vatiken bilong baim sampela kampani ol i save wok bisnis long Itali, olsem ol samting bilong paua, na telefon, na beng, na ol rot bilong tren, na haus faktori bilong wokim ol samting bilong gaden na fam, na bilong wokim simen, na tret bilong wokim ol kain kain laplap samting. Planti bilong ol dispela bisnis i kamap bikpela.
‘Nogara i kisim planti kampani, na sampela em olsem: La Società Italiana della Viscosa, La Supertessile, La Società Meridionale Industrie Tessili, na La Cisaraion. Nogara i bungim ol dispela kampani wantaim na em i kolim CISA-Viscosa, na em i putim wanpela man bilong Misin Katolik long bosim dispela bikpela kampani, nem bilong em Baron Francesco Maria Oddasso, em i gat gutpela nem tru long misin. Nau Nogara i mekim ol samting na bai wanpela bikpela kampani bilong wokim laplap, em SNIA-Viscosa, em i bung wantaim CISA-Viscosa. Misin Katolik long Vatiken i wok long i go insait moa long ol dispela kampani, na bihain em i bosim olgeta na Baron Oddasso i kamap namba 2 presiden bilong ol.
‘Olsem na Nogara i kam insait long ol bisnis bilong wokim laplap. Na em i kisim ol narapela kampani, na em i mekim long kain kain rot na pasin. Em i bin strongim ol wok bisnis long Itali, winim ol narapela bisnisman. Benito Mussolini i bin wok long mekim gavman bilong em i kamap bikpela tru, tasol em i no inap. Tasol em i helpim Misin Katolik long Vatiken na Bernadino Nogara long kamapim narapela kain gavman, olsem bikpela bisnis.’—The Vatican Empire, pes 71-73, Nino Lo Bello i raitim.
Em wanpela samting i makim olsem ol bikpela bisnis o kampani i poroman wantaim Bikpela Babilon; olsem na tru tumas, taim Bikpela Babilon i kisim bagarap na ol dispela bisnisman i no gat poroman moa, ol bai krai nogut tru!
[Piksa long pes 259]
Taim ol man i go nabaut long olgeta hap, ol i karim lotu bilong Babilon i go
[Ol Piksa long pes 261]
Lain em Jon i piksa bilong ol, ol i olsem wasman na ol i tokaut olsem Babilon i pundaun
[Piksa long pes 266]
Ol pipia bilong olpela Babilon i makim bagarap bai painim Bikpela Babilon