Sapta 11

Tokaut Long Taim Mesaia Bai Kamap

 1. Jehova em i Bikpela Man bilong makim taim bilong ol samting, olsem na yumi ken save tru long wanem samting?

JEHOVA em i Bikpela Man bilong makim taim bilong ol samting. Em i save bosim ol taim na ol de bilong ol samting em i laik mekim. (Aposel 1:7) Olgeta samting em i makim bilong kamap long ol dispela taim, ol bai kamap tru. I no ken lus nating.

2, 3. Daniel i wok long skelim wanem tok profet? Wanem gavman i bosim Babilon long dispela taim?

² Profet Daniel i save givim bel long stadi long Baibel na em i bilip long pasin bilong Jehova long makim taim bilong ol samting i mas kamap na mekim ol i kamap tru. Daniel i gat laik tru long save long ol tok profet i stori long Jerusalem bai bagarap. Jeremaia i bin raitim tok God i kamapim na i stori long taun holi bai bagarap i stap inap hamas yia, na Daniel i wok long skelim gut dispela tok profet. Em i tok: “Darius, pikinini bilong Serksis, em i man bilong kantri Midia, na em i kamap king bilong kantri Babilon. Long namba wan yia bilong em i stap king, mi Daniel, mi wok long ritim ol buk bilong God. Na mi tingting long tok Bikpela i bin givim long profet Jeremaia. Em i tok Jerusalem i mas bagarap i stap inap 70 yia.”​—Daniel 9:​1, 2; Jeremaia 25:11.

³ Darius bilong Midia i stap “king bilong kantri Babilon.” Tok profet Daniel i bin mekim pastaim taim em i kamapim insait bilong hanrait i stap long banis i bin kamap tru kwiktaim. Gavman Babilon i no stap moa. God i bin “tilim hap i go long ol Midia na hap i go long ol Persia” long 539 B.C.E.​—Daniel 5:​24-28, 30, 31.

LONG PASIN DAUN DANIEL I PREA LONG JEHOVA

 4. (a) Bilong God i ken kisim bek ol, ol i mas mekim wanem? (b) Daniel i laik beten long God na em i mekim wanem?

⁴ Daniel i save olsem 70 yia bilong Jerusalem long bagarap i stap, em i laik pinis. Nau em bai mekim wanem? Em i tok: “Orait mi prea long God, Bikpela. Mi bel sori tru, olsem na mi no moa kaikai na mi pasim klos bilong sori na putim sit bilong paia long skin bilong mi. Mi stap olsem, na mi beten strong long Bikpela. Na mi autim sin bilong ol manmeri bilong Israel long God, Bikpela bilong mi.” (Daniel 9:​3, 4) Bilong God i ken marimari na kisim bek ol, bel bilong ol i mas i stap stret. (Wok Pris 26:​31-46; 1 King 8:​46-53) Ol i mas bilip, na i gat pasin daun, na tanim bel olgeta long ol sin ol i bin mekim, em ol dispela sin i as na ol i kalabus na stap wokboi nating. Daniel i laik helpim lain bilong em, em ol manmeri bilong mekim sin, na em i beten long God. Em i mekim olsem wanem? Em i lusim kaikai, na bel sori, na pasim klos bilong sori bilong makim pasin bilong tanim bel tru.

 5. Bilong wanem Daniel inap bilip strong olsem ol Juda bai go bek long ples?

⁵ Tok profet bilong Jeremaia i helpim Daniel na em inap bilip na wetim gutpela samting i kamap, long wanem, dispela tok profet i makim olsem i no longtaim na ol Juda bai go bek long ples. (Jeremaia 25:12; 29:10) Daniel i bilip strong olsem ol gutpela samting bai painim ol Juda i kalabus i stap, long wanem, wanpela man nem bilong em Sairus, i stap pinis olsem king bilong Persia. Aisaia i bin tok profet olsem Sairus bai larim ol Juda i go na wokim gen Jerusalem na tempel. (Aisaia 44:28–45:3) Tasol Daniel i no save liklik long olsem wanem dispela samting bai kamap. Olsem na em i wok long beten long Jehova.

 6. Long beten Daniel i mekim wanem tokaut?

⁶ Daniel i kamapim marimari na pasin sori bilong God. Long pasin daun, em i tokaut olsem ol Juda i bin mekim sin taim ol i bikhet, na ol i no bihainim ol lo bilong Jehova, na ol i no harim tok bilong ol profet bilong em. I stret God i bin rausim ol i go nabaut na lusim ples, long wanem, ol i no stap gut long em. Daniel i prea olsem: “Bikpela, ol king na ol hetman bilong mipela na ol tumbuna bilong mipela i mekim ol pasin nogut na mekim sin long yu. Mipela i save sakim tok bilong yu, tasol yu God bilong marimari na yu save lusim sin bilong mipela. God, Bikpela, mipela i no harim tok bilong yu, na mipela i no bihainim pasin yu laik bai mipela i bihainim, olsem yu bin tokim mipela long maus bilong ol profet, em ol wokman bilong yu. Long ol lo Moses, wokman bilong yu, i bin givim long mipela, yu bin mekim strongpela tok olsem, bai yu mekim nogut long mipela sapos mipela i no bihainim gut dispela lo. Tasol mipela olgeta Israel i bin brukim ol lo bilong yu na mipela i no laik harim tok bilong yu. Mipela i mekim sin long yu, olsem na yu bin mekim save long mipela olsem yu bin tok.”​—Daniel 9:​5-11; Kisim Bek 19:​5-8; 24:​3, 7, 8.

 7. Bilong wanem yumi ken tok olsem Jehova i mekim pasin i stret taim em i larim ol Juda i go kalabus?

⁷ God i bin givim tok lukaut long ol Israel long ol samting bai painim ol sapos ol i no bihainim tok bilong em, na sakim kontrak em i bin mekim wantaim ol. (Wok Pris 26:​31-33; Lo 28:15; 31:17) Daniel i tokaut olsem pasin God i mekim long ol em i stret, olsem: “Yu mekim dispela samting olsem yu bin tok long mekim long mipela na long ol hetman bilong mipela. Yu bin mekim save tru long Jerusalem na bagarapim nogut tru. I no gat wanpela taun yu bin bagarapim olsem yu bin bagarapim Jerusalem. Mipela i kisim olgeta hevi olsem yu bin tok insait long lo bilong Moses. Tasol nau tu mipela i no lusim pasin bilong mekim sin na mipela i no askim yu long belgut long mipela, na mipela i no bihainim tok tru bilong yu. God, Bikpela bilong mipela, yu bin i stap redi long bekim pasin nogut bilong mipela. Na nau yu mekim pinis, long wanem, yu God bilong mekim stretpela pasin tasol. Tasol mipela i no harim tok bilong yu.”​—Daniel 9:​12-14.

 8. Daniel i tingim wanem samting na em i mekim dispela tokaut long Jehova?

⁸ Daniel i no tok olsem i gat as na lain bilong em i mekim ol dispela pasin. Nogat. Wok kalabus ol i kisim em i stret, olsem Daniel i tokaut: “Tru tumas, mipela i bin mekim sin na mipela i bin mekim planti rong.” (Daniel 9:15) Na em i no tingting tasol long em i no laik kisim hevi moa. Nogat. Em i tokaut, long wanem, em i tingim biknem na namba bilong Jehova. Taim God i lusim rong bilong ol Juda na larim ol i go bek long asples, em bai truim tok promis em i bin mekim long rot bilong Jeremaia, na em bai mekim nem bilong em i stap holi. Daniel i tok: “Yu bin lukim ol sin na pasin nogut bilong mipela na bilong ol tumbuna bilong mipela, na yu bin mekim save long mipela na bagarapim taun Jerusalem. Na olgeta manmeri bilong ol kantri i stap klostu long Jerusalem, ol i save tok bilas long Jerusalem na long mipela ol manmeri bilong yu. Tasol nau mipela i laik bai yu no ken kros moa long Jerusalem, long wanem, em i taun bilong yu na em i stap antap long maunten bilong yu yet. Long bipo yu bin mekim planti gutpela wok bilong helpim mipela, na mipela i laik bai yu mekim olsem gen.”​—Daniel 9:16.

 9. (a) Daniel i mekim wanem tok bilong pinisim prea bilong em? (b) Wanem samting i bagarapim bel bilong Daniel? Tasol em i mekim wanem bilong soim olsem em i tingim nem bilong God?

⁹ Daniel i prea strong i stap na i tok: “God, harim prea na askim bilong mi. Mi laik bai yu tingim biknem bilong yu na yu stretim bek dispela haus bilong yu ol i bin bagarapim. God, harim krai bilong mipela, na lukim mipela. Lukim dispela hevi i stap long mipela na hevi i stap long dispela taun bilong yu. Mipela i no stretpela manmeri, na mipela i askim yu. Nogat. Mipela i save yu God bilong marimari, olsem na mipela i askim yu. Bikpela, harim prea bilong mipela, na lusim sin bilong mipela. Bikpela, harim mipela na helpim mipela. Dispela taun Jerusalem wantaim ol manmeri bilong en i bilong yu tasol. Olsem na yu no ken wet. Tingim biknem bilong yu na helpim mipela kwiktaim.” (Daniel 9:​17-19) Sapos God i no lusim rong bilong ol na em i larim ol manmeri bilong em i kalabus i stap, na larim taun holi bilong em, Jerusalem, i bagarap i stap oltaim, ol narapela kantri i no inap tingim em olsem King bilong heven na graun, a? Ating ol inap kisim tingting olsem strong bilong ol god bilong Babilon i winim strong bilong Jehova. Em nau, dispela inap bagarapim nem bilong Jehova. Daniel i tingim dispela na bel bilong em i bagarap stret. Long Buk Daniel ol i bin raitim long tok ples bilong pastaim, nem bilong God, Jehova, i stap 19 taim, na inap 18 taim dispela nem i kamap insait long dispela beten tasol!

GEBRIEL I KAM HARIAP

10. (a) Husat i kam lukim Daniel? Bilong wanem em i kam? (b) Bilong wanem Daniel i kolim Gebriel olsem wanpela “man”?

¹⁰ Daniel i beten i stap, na ensel Gebriel i kam kamap. Em i tok: “Daniel, mi kam bilong kliaim tingting bilong yu, bai yu gat planti gutpela save. Daniel, God i laikim yu tumas. Olsem na taim yu stat long beten, em i bin autim wanpela tok, na mi kam bilong givim long yu. Nau yu mas putim yau gut na bai mi autim as bilong dispela tok yu bin ritim.” Tasol bilong wanem Daniel i kolim Gebriel olsem “dispela man Gebriel” (NW )? (Daniel 9:​20-23) Taim Daniel i laik painimaut as bilong dispela driman bilong meme na sipsip man, em i “lukim wanpela man” i sanap klostu long em. Em ensel Gebriel, God i bin salim em bilong givim save long Daniel. (Daniel 8:​15-17) Long wankain pasin, taim Daniel i beten pinis, dispela ensel i kam sanap klostu long Daniel na em i luk olsem wanpela man na em i toktok wantaim em olsem wanpela man i save toktok wantaim narapela.

11, 12. (a) Maski i no gat tempel o alta bilong Jehova long Babilon, olsem wanem ol Juda i strong long lotuim God ol i soim olsem ol i tingim ol ofa Lo i tok ol i mas mekim? (b) Bilong wanem ensel i tokim Daniel olsem “God i laikim yu tru”?

¹¹ Gebriel i kam kamap long “taim bilong mekim ofa bilong apinun.” Alta bilong Jehova i bagarap wantaim tempel long Jerusalem, na ol haiden bilong Babilon i kalabusim ol Juda. Olsem na ol Juda long Babilon ol i no mekim ol ofa long God. Tasol ol Juda i stap strong long lotuim God long Babilon, i stret ol i beten na litimapim nem bilong Jehova long ol taim Lo Bilong Moses i makim bilong mekim ofa. Daniel i givim bel tru long God, olsem na ensel i tok, “God i laikim yu tru.” Jehova, em man bilong “harim beten,” i amamas long Daniel, na wantu em i salim Gebriel long helpim Daniel olsem em i bin beten long en.​—Song 65:2.

¹² Maski ol inap kilim Daniel i dai taim em i beten long Jehova, long dispela taim tu em i beten yet 3-pela taim long olgeta de. (Daniel 6:​10, 11) Olsem na Jehova i laikim em tru! Em i save beten na tingim tingim long bel Tok Bilong God na dispela i helpim em long save long laik bilong Jehova. Daniel i save prea oltaim na em i save long stretpela pasin bilong beten long Jehova bambai Jehova i ken harim beten bilong em. Daniel i save kamapim stretpela pasin bilong God. (Daniel 9:​7, 14, 16) Na maski ol birua i no inap painim wanpela rong long em, Daniel i save em i wanpela sinman long ai bilong God na em i autim sin bilong em.​—Daniel 6:4; Rom 3:23.

“SEVENTI WIK” BILONG PINISIM SIN

13, 14. (a) Wanem bikpela tok Gebriel i kamapim long Daniel? (b) Dispela “70 wik” i longpela olsem wanem? Yumi save olsem wanem?

¹³ Man! Daniel i kisim narakain bekim long dispela beten bilong em! Jehova i no tokaut tasol olsem ol Juda bai go bek long as ples, nogat, em i tokim Daniel long samting i bikpela samting moa​—em i stori long taim bilong Mesaia i mas kamap. (Stat 22:​17, 18; Aisaia 9:​6, 7) Gebriel i tokim Daniel: “God i makim pinis 70 wik bilong em i laik mekim gut gen long ol manmeri bilong yu na long Jerusalem, em taun bilong em yet. Em bai i lusim olgeta sin bilong ol manmeri na pinisim olgeta pasin nogut bilong ol, na oltaim oltaim ol manmeri bai i bihainim stretpela pasin tasol. Na em bai i makim wanpela ples tambu tru bilong em yet. God bai i mekim ol dispela samting bilong inapim ol driman na tok bilong ol profet. Yu mas harim na save olsem, stat long taim dispela tok i kamap bilong wokim gen Jerusalem, 7-pela wik na 62 wik i mas pinis pastaim, orait na dispela bikman God i bin makim, em bai i kamap. Insait long dispela taim bai ol i wokim Jerusalem gen wantaim ol rot insait long taun na bikpela baret i raunim banis bilong taun. Tasol ol dispela yia bai i stap olsem taim bilong hevi.”​—Daniel 9:​24, 25, lukim sta daunbilo.

¹⁴ Dispela em i gutpela tok tru! Ol bai wokim gen Jerusalem na ol bai lotu gen long nupela tempel, na tu, “bikman God i bin makim,” olsem Mesaia, bai kamap long wanpela taim stret. Dispela bai kamap insait long “70 wik.” Gebriel i no stori long ol de, olsem na ol dispela wik i no makim ol wik i gat 7-pela de long en, olsem 490 de​—em wanpela yia na sampela mun tasol. Bilong wokim gen Jerusalem “wantaim ol rot insait long taun na bikpela baret i raunim banis,” olsem tok profet i tok, dispela bai kisim bikpela hap taim moa. Ol dispela wan wan wik i makim 7-pela yia. Planti Baibel i kamapim dispela. Olsem: Long rait daunbilo bilong Baibel Tanakh​—The Holy Scriptures, (em The Jewish Publication Society i wokim) i tok “70 wik na ol wan wan wik i olsem 7-pela yia.” Baibel An American Translation i tok: “Seventi wik na ol wan wan wik i olsem 7-pela yia bai kamap long ol pipel bilong yu na long taun holi bilong yu.” Ol Baibel em Moffatt na Rotherham i tanim, ol i tanim long wankain tok.

15. Ol i brukim dispela “70 wik” long wanem 3-pela hap? Dispela “70 wik” i kirap long wanem taim?

¹⁵ Olsem ensel i tok, dispela “70 wik” bai bruk long 3-pela hap: (1) “7-pela wik,” (2) “62 wik,” na (3) wanpela wik. Em i olsem 49 yia, 434 yia, na 7-pela yia​—bungim olgeta em 490 yia. Narapela Baibel, The Revised English Bible, i tok: “Ol i makim 70 taims 7-pela yia bai kamap long ol pipel bilong yu na long taun holi bilong yu.” Ol i bin kalabus na kisim pen long Babilon inap 70 yia, na bihain God bai mekim gut long ol Juda inap 490 yia, o 70 yia taims 7. Dispela taim bai kirap “stat long taim dispela tok i kamap bilong wokim gen Jerusalem.” Em long wanem taim?

DISPELA “70 WIK” I KIRAP

16. Olsem tokaut bilong em i kamapim, wanem as na Sairus i larim ol Juda i go bek long ples?

¹⁶ I gat tripela samting i bin kamap klostu long stat bilong dispela “70 wik” na yumi mas tingim. Namba wan samting i kamap long 537 B.C.E. taim Sairus i tokaut long larim ol Juda i go bek long ples. Dispela tokaut i tok: “Dispela tok bilong King Sairus i olsem, ‘God, Bikpela, i bosim olgeta samting long heven, na em i bin makim mi, Sairus, long kamap bosman bilong olgeta hap graun. Nau em i tokim mi long wokim wanpela haus bilong em long taun Jerusalem long distrik Juda. God i ken i stap wantaim yupela Israel, yupela ol manmeri bilong en. Bipo ol birua i bin kisim yupela long as ples na bringim yupela i go longwe na nau yupela i stap yet long ol dispela provins bilong mi. Tasol nau yupela Israel i mas i go bek long Jerusalem, taun bilong God, Bikpela bilong yupela, na wokim gen haus bilong en. Na yupela ol arapela manmeri bilong ol taun ol Israel i stap nau long en, yupela i mas helpim ol na givim planti gutpela samting long ol. Na ol i ken karim i go long Jerusalem bilong wokim gen haus bilong God. Yupela i mas givim ol Israel sampela silva na gol na ol kaikai samting. Na givim ol animal long ol bilong karim ol dispela samting. Na tu givim ol Israel ol abus samting bilong mekim ol ofa long God long dispela haus bilong en.’ ” (Esra 1:​2-4) I klia tru olsem as bilong dispela tokaut em bilong wokim gen tempel​—em haus bilong Jehova​—long hap graun bipo em i stap long en.

17. Pas king i givim long Esra i kamapim wanem as na Esra i go long Jerusalem?

¹⁷ Namba tu samting i kamap long namba 7 yia bilong Artaserksis (Artaserksis Longimanus, pikinini bilong Serksis 1) i stap king bilong Persia. Long dispela taim Esra, em man bilong raitim raitim ol tok bilong Lo, i lusim Babilon na 4-pela mun bihain em i kamap long Jerusalem. Em i holim wanpela pas king i bin raitim, tasol pas i no tok long wokim gen Jerusalem. Nogat. Pas i tokim Esra long stretim gut haus bilong Jehova. Olsem na pas i stori long gol na silva, ol dis holi, na wit, wain, wel bilong oliv, na sol bilong helpim lotu bilong tempel, na ol man i wok long tempel i no ken baim takis.​—Esra 7:​6-27.

18. Nehemia i kisim wanem toksave i mekim em i bel hevi? Olsem wanem King Artaserksis i kisim save long dispela samting?

¹⁸ Namba tri samting i kamap 13 yia bihain, long namba 20 yia bilong Artaserksis i stap king bilong Persia. Nehemia em i man bilong lukautim wain bilong king long haus king i stap long Susa. Liklik lain Juda i bin lusim Babilon na i go long Jerusalem na ol i bin wokim gen hap bilong Jerusalem. Tasol ol samting i no stap gut. Nehemia i kisim save olsem “banis bilong Jerusalem i bagarap i stap olsem yet. Na ol dua bilong banis bipo paia i kukim, ol tu i stap olsem tasol.” Dispela i mekim na Nehemia i bel hevi tru. King i askim em long as bilong dispela bel hevi, na Nehemia i tok: “King, yu ken i stap gut longpela taim. Yes, mi bel hevi tru, long wanem, dispela taun ol i bin planim ol tumbuna bilong mi long en i bagarap i stap na paia i bin kukim dua bilong banis bilong en.”​—Nehemia 1:​1-3; 2:​1-3.

19. (a) Nehemia i mekim wanem samting pastaim, taim King Artaserksis i givim askim long em? (b) Nehemia i askim king long mekim wanem? Olsem wanem em i tokaut olsem God i bin stiaim ol dispela samting?

¹⁹ Nehemia i tok moa olsem: “King i harim dispela tok na i askim mi olsem, ‘Nau yu laik bai mi mekim wanpela samting, a?’ Orait mi prea kwik long God bilong heven na mi tokim king olsem, ‘King, sapos yu belgut long mi, orait mi laik askim yu long wanpela samting. I olsem. Sapos yu laik, yu ken larim mi i go long taun bilong ol tumbuna bilong mi long graun bilong Juda na bai mi ken helpim ol wantok bilong mi long wokim gen dispela taun.’ ” Artaserksis i amamas long tok bilong Nehemia na em i mekim ol samting Nehemia i askim em, olsem: “Mi askim king long givim mi sampela pas bilong givim long ol gavman bilong provins long hapsait bilong wara Yufretis. Dispela ol pas i ken tokim ol long larim mi i wokabaut long provins bilong ol na i go long distrik Juda. Na tu mi askim king long raitim wanpela pas long Asap, dispela man i save bosim bus bilong king. Dispela pas i ken tokim em long givim mi sampela diwai bilong brukim plang. Ol dispela plang i bilong wokim ol dua long banis bilong Jerusalem na bilong wokim dua bilong haus i gat strongpela banis ol soldia bai i stap long en bilong lukautim haus bilong God, na bilong wokim haus bilong mi yet.” Nehemia i tokaut olsem Jehova i bin stiaim ol dispela samting, em i tok: “God i stap wantaim mi na helpim mi, olsem na king i orait long ol dispela samting mi askim em long en.”​—Nehemia 2:​4-8.

20. (a) Tok bilong “wokim gen Jerusalem” i kirap long kamap tru long wanem taim? (b) Dispela “70 wik” i kirap long wanem taim na i pinis long wanem taim? (c) Wanem samting i makim olsem ol det bilong kirap na pinis bilong dispela “70 wik” i stret?

²⁰ Artaserksis i bin tok orait long em long mun Nisan, long kirap bilong namba 20 yia bilong Artaserksis i stap king, tasol “dispela tok i kamap bilong wokim gen Jerusalem” em i kirap long kamap tru inap sampela mun bihain. Dispela i kamap taim Nehemia i kam kamap pinis long Jerusalem na kirapim wok bilong em long stretim ol samting. Bilong kamap long Jerusalem, Esra i bin lusim 4-pela mun long rot, tasol Susa i stap 322 kilomita longwe long hap is bilong Babilon, olsem na em i longwe moa long Jerusalem. Olsem na ating Nehemia i kamap long Jerusalem klostu long pinis bilong namba 20 yia bilong Artaserksis i stap king, o long yia 455 B.C.E. Long dispela taim dispela “70 wik,” o 490 yia, i kirap. Dispela “70 wik” bai pinis klostu long pinis bilong yia 36 C.E.​—Lukim “Artaserksis i Kamap King Long Wanem Yia?” long pes 197.

“MAN GOD I BIN MAKIM” I KAMAP

21. (a) Wanem samting i mas kamap insait long “7-pela wik”? Wanem ol hevi i bin kamap long dispela taim? (b) Mesaia bai kamap long wanem yia? Gutnius Luk i Raitim i tok wanem samting i kamap long dispela taim?

²¹ Hamas yia i lus pastaim na bihain ol i wokim gen Jerusalem? Wok bilong wokim gen taun bai kamap long “taim bilong hevi,” long wanem, ol Juda i gat sampela hevi namel long ol yet na ol Samaria na sampela lain moa i birua long ol. Tasol ol i pinisim dispela wok long 406 B.C.E. samting​—insait long dispela “7-pela wik,” o 49 yia. (Daniel 9:​25, lukim sta daunbilo.) Bihain long en i gat 62 wik, o 434 yia, bai kamap. Taim dispela hap taim i pinis, Mesaia bai kamap. Sapos yumi kirap long 455 B.C.E. na kaunim 483 yia (bungim 49 wantaim 434) bai yumi kamap long 29 C.E. Wanem samting i kamap long dispela taim? Luk i tok: “Long namba 15 yia bilong Sisar Taiberius i stap king bilong Rom, Pontius Pailat em i stap namba wan gavman bilong distrik Judia. Long dispela taim Herot i bosim distrik Galili. . . . Jon, pikinini bilong Sekaraia, em i stap long ples i no gat man, na God i givim tok bilong em long Jon. Olsem na Jon i go long olgeta hap i stap klostu long wara Jordan, na em i autim tok long ol manmeri i mas tanim bel na kisim baptais, na bai God i tekewe sin bilong ol.” Long dispela taim ol manmeri i tingting planti na wetim Mesaia i kamap.​—Luk 3:​1-3, 15.

22. Jisas i kamap Mesaia long wanem taim na long wanem rot?

²² Jon i no Mesaia em Baibel i tok promis long en. Tasol Jon i tokaut long samting em i lukim long laspela hap bilong 29 C.E. taim Jisas bilong Nasaret i kisim baptais, na em i tok: “Mi lukim pinis Holi Spirit i lusim heven na i kam daun olsem wanpela bilong ol dispela pisin ol i kolim balus, na em i go i stap antap long em. Mi yet mi no bin save long em. Tasol God i bin salim mi na mi kam bilong baptaisim ol manmeri long wara, bipo em i bin tokim mi olsem, ‘Taim yu lukim Holi Spirit i kam daun na i stap long wanpela man, orait em dispela man tasol i kam bilong baptaisim ol manmeri long Holi Spirit.’ Na mi yet mi lukim na mi autim tok pinis olsem, dispela em i Pikinini Bilong God.” (Jon 1:​32-34) Taim Jisas i kisim baptais em i kamap Man God i bin makim​—olsem Mesaia, o Krais. Bihain liklik, Andru, em disaipel bilong Jon, i bungim Jisas na bihain em i tokim Saimon Pita: “Mipela i lukim pinis Mesaia.” (Jon 1:41) Olsem na “bikman God i bin makim” i kamap long taim stret​—long pinis bilong 69 wik!

OL SAMTING BILONG LASPELA WIK

23. Bilong wanem “bikman God i bin makim” i mas i dai? Em i mas i dai long wanem taim?

²³ Wanem samting i mas kamap long namba 70 wik? Gebriel i tok “God i makim pinis 70 wik” na “em bai i lusim olgeta sin bilong ol manmeri na pinisim olgeta pasin nogut bilong ol, na oltaim oltaim ol manmeri bai i bihainim stretpela pasin tasol. Na em bai i makim wanpela ples tambu tru bilong em yet. God bai i mekim ol dispela samting bilong inapim ol driman na tok bilong ol profet.” Bilong dispela samting i ken kamap, “bikman God i bin makim” i mas i dai. Long wanem taim? Gebriel i tok: “Dispela 62 wik i pinis na bai ol i kilim bikman God i bin makim, na bai i no gat wanpela samting bilong en i stap.” (Daniel 9:26a, lukim sta daunbilo long ves 24.) “Na em i mas larim dispela kontrak i stap bilong helpim planti manmeri i go inap wanpela wik; na long namel bilong wik em bai mekim na ol ofa bai pinis.” (Daniel 9:27a, NW ) Bikpela samting bai kamap long “namel bilong wik,” olsem namel long dispela 7-pela yia i makim laspela wik.

24, 25. (a) Olsem tok profet i tok, Krais i bin i dai long wanem taim? Indai na kirap bek bilong em i pinisim wanem samting? (b) Wanem samting inap kamap long rot bilong indai bilong Jisas?

²⁴ Wok autim tok bilong Jisas Krais i kirap long laspela hap bilong 29 C.E. na em i mekim dispela wok inap 3 na hap yia. Olsem tok profet i makim, long kirap bilong yia 33 C.E., ol i kilim Krais i dai long wanpela pos diwai, na em i givim laip bilong em olsem pe bilong baim bek olgeta man. (Aisaia 53:8; Matyu 20:28) Taim Jisas i kirap bek na givim pe bilong ofa bilong em long God long heven, pasin bilong kilim ol animal na mekim ol kain kain ofa olsem Lo i makim i pinis. Maski ol pris Juda i wok yet long mekim ol ofa i go inap long taim tempel long Jerusalem i kisim bagarap long 70 C.E., God i no orait moa long ol dispela ofa. Wanpela ofa i gutpela moa i kisim ples bilong ol dispela ofa, na i no gat wok long mekim dispela ofa gen long olgeta taim. Aposel Pol i tok: “Krais em i mekim wanpela ofa tasol bilong rausim sin, na dispela ofa em inap long i stap olgeta taim. . . . Ol dispela manmeri em i mekim ol i kamap ol lain manmeri bilong God stret, em i mekim ol i kamap gutpela olgeta long wanpela ofa tasol, na ol bai i stap olsem inap oltaim oltaim.”​—Hibru 10:​12, 14.

²⁵ Sin na indai i wok yet long painim ol manmeri, tasol taim ol i kilim i dai Jisas na em i kirap bek na kisim laip long heven, dispela i truim tok profet. Dispela i mekim na God i ‘lusim olgeta sin na pinisim olgeta pasin nogut, na oltaim oltaim ol manmeri bai i bihainim stretpela pasin tasol.’ God i rausim kontrak bilong Lo em i bin kamapim klia olsem ol Juda ol i sinman na ol i mas i dai. (Rom 5:​12, 19, 20; Galesia 3:​13, 19; Efesus 2:15; Kolosi 2:​13, 14) Nau God inap lusim rong bilong ol sinman i tanim bel, na tekewe strafe bilong ol. Long rot bilong ofa bilong Mesaia, ol man i bilip long Krais ol inap kamap wanbel wantaim God. Ol i wet long kisim presen God i save givim, em “laip i stap oltaim . . . yumi kisim long wok bilong Jisas Krais.”​—Rom 3:​21-26; 6:​22, 23; 1 Jon 2:​1, 2.

26. (a) Kontrak bilong Lo i pinis, tasol wanem kontrak “i stap bilong helpim planti manmeri i go inap wanpela wik”? (b) Wanem samting i kamap long pinis bilong namba 70 wik?

²⁶ Olsem na Jehova i rausim kontrak bilong Lo long rot bilong indai bilong Krais long 33 C.E. Tasol olsem wanem “dispela kontrak [bai] i stap bilong helpim planti manmeri i go inap wanpela wik”? Long wanem, kontrak em i bin mekim wantaim Abraham i stap yet. I go inap long pinis bilong namba 70 wik, God i mekim gut long ol tumbuna pikinini Hibru bilong Abraham long rot bilong dispela kontrak. Tasol long pinis bilong namba 70 wik, long 36 C.E., aposel Pita i bin autim tok long wanpela man bilong Itali i save givim bel long God, em Kornilius, wantaim ol wanhaus bilong em, na sampela manmeri moa bilong ol narapela kantri. Kirap long dispela taim ol i stat long autim gutnius long ol manmeri bilong ol narapela kantri.​—Aposel 3:​25, 26; 10:​1-48; Galesia 3:​8, 9, 14.

27. Wanem “ples tambu tru” God i makim? Em i makim olsem wanem?

²⁷ Na tu, tok profet i tok “em bai makim wanpela ples tambu tru bilong em yet.” Dispela i no stori long makim Rum Tambu Tru, em dispela rum i stap insait tru long tempel long Jerusalem. Dispela tok “ples tambu tru” i stori long hap bilong heven God yet i save stap long en. Long dispela hap Jisas i bin givim pe bilong ofa bilong em long Papa. Long taim Jisas i kisim baptais long 29 C.E., God i makim ples bilong Em yet long heven olsem “ples tambu tru,” na piksa bilong dispela, em Rum Tambu Tru bilong haus lotu sel na bilong tempel ol i bin wokim bihain, em ol i bin stap long graun.​—Hibru 9:​11, 12.

GOD I STRONGIM DISPELA TOK PROFET

28. Wanem insait bilong dispela tok “God bai i mekim ol dispela samting bilong inapim ol driman na tok bilong ol profet”?

²⁸ Dispela tok profet bilong Mesaia em ensel Gebriel i autim, i tok “God bai i mekim ol dispela samting bilong inapim ol driman na tok bilong ol profet.” Insait bilong dispela tok i olsem, olgeta tok profet bilong Mesaia​—olsem olgeta samting em i mekim long rot bilong ofa bilong em, na em i kirap bek na kamap long ai bilong God long heven, na olgeta narapela samting i kamap long namba 70 wik​—bai God i orait long en, na ol dispela samting bai kamap tru na ol man inap bilipim. Dispela driman bai kamapim ol samting bilong Mesaia tasol. Ol samting bilong dispela driman bai kamap tru long rot bilong em na long wok God i mekim long rot bilong em. Yumi inap painim stretpela mining bilong dispela driman long rot bilong ol samting bilong dispela Mesaia tasol, em Baibel i tok profet long em. I no gat narapela rot bilong save long mining bilong en.

29. Wanem samting bai painim Jerusalem ol i bin wokim gen? Bilong wanem dispela samting i mas kamap?

²⁹ Pastaim Gebriel i bin tok profet olsem ol bai wokim gen Jerusalem. Nau em i tok profet olsem dispela taun ol i wokim gen wantaim tempel bilong en bai kisim bagarap. Em i tok: “Na bikpela lain ami bilong wanpela strongpela king bai i kam na bagarapim Jerusalem wantaim haus bilong God. Dispela pait na bagarap bai i kamap olsem bikpela wara i tait na i karim ol samting i go. Na bikpela pait bai i stap i go inap long las de, na olgeta samting bai i bagarap olsem God i bin tok. . . . Na ol bai i putim wanpela samting nogut tru antap long het bilong haus bilong God, na man bilong bagarapim ol samting bai i stap long dispela hap inap long taim em i kisim dispela bagarap God i makim pinis bilong en.” (Daniel 9:26b, 27b) Dispela bagarap bai kamap bihain long taim “70 wik” i pinis, tasol as na em i kamap em ol samting i bin kamap long dispela laspela “wik,” taim ol Juda i sakim Krais na kilim em i dai.​—Matyu 23:​37, 38.

30. Olsem wanem tokaut bilong Bikpela Man bilong makim taim i bin kamap tru, olsem ol samting i bin kamap bipo i kamapim?

³⁰ Ol stori ol man i raitim bilong ol samting i bin kamap long bipo i soim olsem long 66 C.E. ami bilong Rom, em Gavena Sestius Galus bilong Siria i bosim, i banisim Jerusalem. Maski ol Juda i bekim pait, ami bilong Rom i kam insait long taun wantaim ol plak o mak samting bilong ol, em samting ol Rom i save lotuim, na ol i kirap brukim as bilong banis bilong tempel long hap not bilong en. Taim ol i sanap long dispela hap, ol i stap olsem “dispela samting nogut tru” na ol inap bagarapim taun olgeta. (Matyu 24:​15, 16) Long 70 C.E., ami bilong Rom em Jeneral Taitus i bosim, i kam olsem “bikpela wara i tait” na em i bagarapim taun wantaim tempel. I no gat wanpela samting inap pasim ol, long wanem, “God i bin tok” long mekim olsem. Bikpela Man bilong makim taim, em Jehova, i truim tok bilong em!

YU BIN KISIM WANEM SAVE?

• God i bin makim 70 yia bilong Jerusalem i mas bagarap i stap, na klostu long pinis bilong dispela taim, Daniel i beten olsem wanem long Jehova?

• Dispela “70 wik” i makim hamas yia? Ol i kirap na pinis long wanem taim?

• “Bikman God i bin makim” i kamap long wanem taim? Ol i “kilim” em i dai long wanem taim?

• Wanem kontrak “i stap bilong helpim planti manmeri i go inap wanpela wik”?

• Wanem samting i kamap bihain, taim “70 wik” i pinis?

[Blok/Piksa long pes 197]

Artaserksis i Kamap King Long Wanem Yia?

OL MAN i no wanbel long yia King Artaserksis bilong Persia i kamap king. Sampela i tok em i kamap king long 465 B.C.E., long wanem, papa bilong em, Serksis, i bin kamap king long 486 B.C.E. na em i dai long namba 21 yia bilong wok king bilong em. Tasol i gat sampela samting i makim olsem Artaserksis i kamap king long 475 B.C.E. na 474 B.C.E. em i namba wan yia bilong em i stap king.

Ol rait na piksa samting ol i painim long graun long Pesepolis, em nambawan biktaun bilong Persia long bipo, i makim olsem Serksis na papa bilong em Darius 1 i bin wok king wantaim. Sapos ol i bin wok king wantaim inap 10-pela yia na Serksis yet i wok king 11-pela yia bihain long indai bilong Darius long 486 B.C.E., orait, namba wan yia bilong Artaserksis i stap king em 474 B.C.E.

Narapela samting i strongim dispela tingting em stori bilong Jeneral Tamistaklis bilong Atens, em i bin daunim ami bilong Serksis long 480 B.C.E. Bihain, ol Grik i no laikim em moa na ol i tok em i biruaim kantri. Tamistaklis i ranawe i go long Persia na ol bikman bilong Persia i lukautim em. Wanpela saveman Grik, em Tusididis, i tok dispela samting i kamap taim Artaserksis “i nupela long wok king.” Saveman Diodorus Sikulus i tok Tamistaklis i dai long 471 B.C.E. Tamistaklis i askim ol Persia long larim em i skul inap wanpela yia bilong lainim tok ples Persia pastaim, na bihain em i laik toktok wantaim King Artaserksis, olsem na ating em i kamap long Esia Maina long yia 473 B.C.E. Buk Chronicle of Eusebius i strongim dispela tingting. Taim Tamistaklis i kamap long Esia long 473 B.C.E., Artaserksis “i nupela long wok king,” olsem na saveman Ernst Hengstenberg i tok long buk bilong em (Christology of the Old Testament) olsem, yia 474 B.C.E. em i namba wan yia bilong Artaserksis i stap king, olsem sampela moa i tok. Na em i tok: “Namba 20 yia bilong Artaserksis em yia 455 paslain long Krais.”

[Piksa]

Piksa bilong Tamistaklis

[Sat/Ol Piksa long pes 188, 189]

(Bilong save ol dispela rait i stap we long pes, lukim buk o magasin)

“70 WIK”

7-pela wik 62 wik 1-pela wik

49 yia 434 yia 7-pela yia

[Piksa i karamapim pes olgeta long pes 180]

[Piksa i karamapim pes olgeta long pes 193]