Yu Save Askim, “Jehova i Stap We?”
“Ol i stap longwe long mi . . . Na ol i no bin askim olsem, ‘Jehova i stap we?’ ”—JEREMAIA 2:5, 6, NW.
1. Taim ol man i kamapim dispela askim, “God i stap we?,” ol i gat wanem tingting?
“GOD i stap we?” Planti man i bin kamapim dispela askim. Sampela i laik save olsem Man bilong wokim yumi i stap long wanem hap? Sampela i bin mekim dispela askim bihain long wanpela bikpela bagarap o taim ol yet i karim bikpela hevi na ol i no save i gat wanem as na God i no bin helpim ol. Tasol sampela i no save kamapim dispela askim , long wanem, ol i no bilip olsem i gat wanpela God i stap.—Song 14:1.
2. Husat inap painim God?
2 Tasol i gat planti man ol i luksave long ol samting i kamapim klia olsem God i stap. (Song 19:1; 104:24) Sampela bilong ol i amamas tasol long mekim sampela samting bilong tingim lotu. Tasol pasin bilong laikim tru tok i tru i save kirapim planti milion manmeri bilong olgeta hap long wok long painim God tru. Hatwok bilong ol i no lus nating, long wanem, “em i no i stap longwe long yumi olgeta wan wan.”—Aposel 17:26-28.
3. (a) Jehova i save stap we? (b) Wanem mining bilong dispela askim i stap long Baibel olsem, “Jehova i stap we?”
3 Taim wanpela man i painim pinis Jehova, em i save olsem “God em i Spirit,” na ol man i no inap lukim em. (Jon 4:24) Jisas i kolim God tru olsem “Papa bilong mi i stap long heven.” Wanem mining bilong dispela tok? Mining i olsem: Long samting bilong spirit, hap Papa bilong yumi i stap long en, em i antap tru olsem gutpela tru, olsem skai tru i antap moa long graun. (Matyu 12:50; Aisaia 63:15) Yumi no inap lukim God, tasol em i wokim rot na bai yumi ken save long em na lain long ol samting em i tingting pinis long mekim. (Kisim Bek 33:20; 34:6, 7) Em i save bekim ol askim bilong ol man i gat gutpela bel na i laik save long as bilong i stap bilong ol. Long ol samting bilong laip bilong yumi, Em i save helpim yumi long save “Jehova i stap we.” Long Baibel mining bilong dispela tok “Jehova i stap we,” inap makim tingting bilong Jehova long ol samting bilong laip bilong yumi na em inap helpim yumi long skelim olsem ol laik bilong yumi i stret wantaim ol samting em i tingting pinis long mekim. Em i laik bai yumi mekim ol askim long ol kain samting olsem na yumi wok strong long painim bekim. Long rot bilong profet Jeremaia, Jehova i bin stretim lain Israel, long wanem, ol i no bin mekim olsem. Ol i save long nem bilong God, tasol ol i no askim olsem, “Jehova i stap we?” (Jeremaia 2:6, NW ) Ol i no bisi long ol samting Jehova i tingting pinis long mekim. Ol i no laik Jehova i stiaim ol. Taim yu mas makim ol samting yu mas mekim, maski em i bikpela o liklik samting, yu save askim yu yet olsem, “Jehova i stap we?”
Ol Man Husat i Bin Askim God Long Helpim Ol
4. Olsem wanem pasin bilong Devit long toktok wantaim Jehova inap helpim yumi?
4 Taim em i yangpela yet, Devit, pikinini bilong Jesi, i kisim strongpela bilip long Jehova. Em i save olsem Jehova em i “God i stap oltaim.” Devit yet i save olsem Jehova i bin lukautim em. Em i bilip long nem bilong Jehova na em i laikim tru dispela nem, na dispela i kirapim em long kilim i dai traipela man Filistia i gat planti samting bilong pait, em Goliat. (1 Samuel 17:26, 34-51) Tasol maski Devit i winim pait, dispela i no mekim na em i bilip long strong bilong em yet. Em i no kisim tingting olsem maski em i mekim wanem, Jehova bai blesim em. Planti taim long ol yia i kamap bihain, Devit i save toktok wantaim Jehova taim em i mas makim samting em i laik mekim. (1 Samuel 23:2; 30:8; 2 Samuel 2:1; 5:19) Em i wok long beten olsem: “God, yu mas skulim mi long gutpela pasin bilong yu, na soim mi long rot bilong yu. Lainim mi long bihainim tok tru bilong yu, long wanem, yu save kisim bek mi. Long olgeta de mi save wet long yu i helpim mi.” (Song 25:4, 5) Em i wanpela gutpela piksa tru yumi ken bihainim!
5, 6. Long ol narapela narapela taim long laip bilong em, Jehosafat i bin mekim wanem bilong painimaut laik bilong Jehova?
5 Long taim bilong King Jehosafat, em i namba faiv king bihain long Devit, i gat 3-pela kantri i bungim ami wantaim bilong pait long Juda. Taim dispela bikpela hevi i bungim em, Jehosafat “i gat strongpela tingting bilong painimaut laik bilong Bikpela.” (2 Stori 20:1-3) Dispela i no namba wan taim Jehosafat i bin wok long painimaut laik bilong Jehova. Maski kantri Israel i tromoi lotu i tru na lotu long Bal, Jehosafat i bin sakim lotu Bal na em i bihainim ol pasin bilong Jehova. (2 Stori 17:3, 4) Olsem na taim bikpela hevi i bungim Jehosafat, olsem wanem em i bin “painimaut laik bilong Bikpela”?
6 Long wanpela beten em i mekim long ai bilong ol man long Jerusalem long dispela taim bilong hevi, Jehosafat i tokaut olsem em i tingim bikpela strong bilong Jehova. Em i bin tingim tingim samting Jehova i tingting pinis long mekim taim Em i rausim ol narapela lain man na givim hap graun long lain Israel olsem graun bilong ol. King i tokaut olsem em i mas kisim helpim long Jehova. (2 Stori 20:6-12) Olsem wanem? Jehova i helpim Jehosafat long dispela taim? Yes, em i mekim olsem. Long rot bilong Jahasiel, wanpela Livai, Jehova i tokaut long ol samting ol i mas mekim, na long de bihain Em i helpim lain bilong em long winim pait. (2 Stori 20:14-28) Olsem wanem yu ken save olsem Jehova bai helpim yu taim yu askim em long stiaim yu?
7. God i save harim beten bilong husat?
7 Jehova i save mekim wankain pasin long olgeta man. Em i singautim ol manmeri bilong olgeta kantri long beten long em. (Song 65:2; Aposel 10:34, 35) Em i save lukim tingting bilong bel bilong ol man i beten long em. Em i tokaut olsem em i save harim beten bilong ol stretpela man. (Sindaun 15:29) Em i save harim beten bilong ol man husat pastaim ol i no tingim em, tasol nau long pasin daun ol i askim em long helpim ol. (Aisaia 65:1) Em i save harim beten bilong ol man husat pastaim ol i no bihainim lo bilong em, tasol nau long pasin daun ol i tanim bel. (Song 32:5, 6; Aposel 3:19) Tasol sapos long bel man i no bihainim ol tok bilong God, orait God i no inap harim beten bilong em. (Mak 7:6, 7) Orait, nau yumi ken skelim sampela man i bin mekim olsem.
Ol i Bin Askim Tasol Ol i No Bin Kisim
8. Wanem samting i mekim na Jehova i no harim ol beten bilong King Sol?
8 Taim profet Samuel i tokim King Sol pinis olsem God i rausim em long wok king, long wanem, em i sakim tok, Sol i lotu long Jehova. (1 Samuel 15:30, 31) Tasol em i lotu long skin tasol. Sol i no laik bihainim tok bilong God, nogat, em i laik bai ol manmeri i litimapim nem bilong em. Bihain, taim ol Filistia i pait long Israel, Sol i mekim nating pasin bilong beten askim Jehova long helpim em. Tasol taim em i no kisim bekim, em i go lukim wanpela glasmeri, maski em i save em samting Jehova i no laik tru long en. (Lo 18:10-12; 1 Samuel 28:6, 7) Stori i stap long 1 Stori 10:14 i tok long Sol olsem: “Em i no askim Bikpela long soim em.” Bilong wanem skripsa i tok olsem? Long wanem, taim Sol i beten em i no beten wantaim bilip. Olsem na, i olsem em i no bin beten.
9. Wanem samting i no stret long askim Sedekaia i mekim bilong kisim helpim long Jehova?
9 Na olsem tasol, taim pinis bilong kantri Juda i kam klostu, ol man i mekim ol beten na ol i toktok wantaim ol profet bilong Jehova. Ol man i tok ol i rispektim Jehova, tasol long wankain taim ol i wok long lotuim ol god giaman. (Sefanaia 1:4-6) Ol i mekim ol samting i olsem ol i beten long God, tasol ol i no redim bel bilong ol long mekim laik bilong em. King Sedekaia i askim askim Jeremaia long beten long Jehova bilong helpim em. Jehova i bin tokim king pinis long ol samting king i mas mekim. Tasol king i no gat bilip na em i pret long ol man, olsem na king i no bihainim tok bilong Jehova, na Jehova i no senisim tok bilong em na givim king wanpela bekim em i gat laik long harim.—Jeremaia 21:1-12; 38:14-19.
10. Wanem samting i no stret long pasin bilong Johanan long kisim helpim long Jehova? Dispela i lainim yumi long wanem samting?
10 Jerusalem i bagarap pinis na ami bilong Babilon i kisim ol Juda i go kalabus. Long dispela taim Johanan i redi long kisim ol wan wan Juda i stap yet long Judia i go long Isip. Ol i redi long go, tasol paslain long ol i go ol i askim Jeremaia long beten askim Jehova long ol samting em i laik bai ol i mas mekim. Tasol taim ol i no kisim bekim ol i laikim, ol i kirap mekim samting ol i gat laik long mekim. (Jeremaia 41:16–43:7) Olsem wanem? Taim yu skelim ol samting i bin painim ol dispela lain, yu kisim sampela skul i ken helpim yu na taim yu laik beten long Jehova, em bai harim beten bilong yu?
‘Trai Yet Long Kisim Save’
11. I gat wanem as na yumi mas bihainim tok bilong Efesus 5:10?
11 Bilong mekim lotu i tru, yumi dediket, baptais long wara, go long ol miting bilong kongrigesen, na mekim wok autim tok. Tasol i no ol dispela samting tasol. Olgeta samting yumi mekim i insait long pasin bilong mekim lotu i tru. Long olgeta de ol samting i kamap bilong traim o putim hevi long yumi—sampela i hat long luksave long ol, sampela i stap ples klia—na ol inap pulim yumi long lusim pasin bilong givim bel long God. Bai yumi mekim wanem? Taim aposel Pol i raitim pas long ol gutpela Kristen long Efesus, em i kirapim ol olsem: “Yupela i mas [“wok yet long,” NW ] trai long kisim save long ol pasin Bikpela i save laikim.” (Efesus 5:10) Ol kain kain samting i bin kamap em Baibel i stori long en, i soim olsem em i savepasin long mekim olsem.
12. Bilong wanem Jehova i no amamas taim Devit i bin bringim Bokis Kontrak i kam long Jerusalem?
12 Ol Israel i kisim bek Bokis Kontrak na inap planti yia em i bin stap long taun Kiriat Jearim, orait nau Devit i laik bringim Bokis Kontrak i kam long Jerusalem. Devit i toktok wantaim ol ofisa na ol hetman na em i tok ol bai kisim Bokis Kontrak i kam ‘sapos ol i orait long dispela tingting, na sapos God i laik bai ol i mekim olsem.’ Tasol em i no skelim gut laik bilong Jehova long dispela samting. Sapos em i bin mekim olsem, orait ol i no inap putim Bokis Kontrak antap long wanpela karis. Ol Livai bilong lain Kohat bai karim Bokis Kontrak long sol bilong ol, olsem God i bin tokaut klia long en. Maski Devit i save beten planti taim bilong kisim tingting long Jehova, em i no mekim gut long dispela taim na samting nogut tasol i bin kamap. Bihain Devit i tok: “God, Bikpela, i bin mekim save long mipela, long wanem, mipela i no bin bihainim stretpela pasin na askim God pastaim long wanem pasin mipela i mas mekim.”—1 Stori 13:1-3; 15:11-13; Namba 4:4-6, 15; 7:1-9.
13. Long singsing ol i singim taim ol i bringim pinis Bokis Kontrak long Jerusalem, wanem tok bilong tingim i stap insait long singsing?
13 Taim ol Livai i kisim Bokis Kontrak long haus bilong Obetidom na bringim i kam long Jerusalem, ol manmeri i singim wanpela singsing Devit i bin raitim. Insait long dispela singsing i gat dispela tok bilong tingim: “Oltaim yumi mas i go klostu long [“wok long painim,” NW ] Bikpela na askim em long helpim na strongim yumi. . . . Tingim gen ol strongpela wok bilong Bikpela na ol mirakel em i bin wokim. Na yupela i mas tingim ol samting em i bin mekim bilong mekim save long ol man nogut.”—1 Stori 16:11, 12.
14. Olsem wanem ol gutpela pasin Solomon i bin mekim na ol rong em i bin mekim taim em i go lapun i ken helpim yumi?
14 Paslain long em i dai, Devit i givim tok long pikinini bilong em Solomon olsem: “Sapos yu wok strong long kisim save long laik bilong em [Jehova], orait bai em i larim yu i save gut long em.” (1 Stori 28:9) Taim Solomon i kisim pinis wok king, em i go long taun Gibeon, em ples we haus lotu sel i stap long en, na em i givim ofa long Jehova. Long dispela hap Jehova i tokim Solomon: “Yu ken askim mi long wanem samting yu laikim, na bai mi givim yu.” Bilong bekim askim bilong Solomon, Jehova i givim em gutpela tingting na save bilong em inap bosim gut lain Israel, na tu, Em i givim Solomon planti mani samting na biknem tru. (2 Stori 1:3-12) Solomon i bihainim piksa bilong tempel Jehova i bin givim long Devit, na em i wokim wanpela tempel i nambawan tru. Tasol long ol samting bilong marit bilong em, Solomon i no bin kisim tingting bilong Jehova. Solomon i maritim ol meri ol i no lotuim Jehova. Taim em i go lapun, ol dispela meri i pulim Solomon long lusim Jehova. (1 King 11:1-10) Maski i luk olsem yumi gat biknem, o gutpela tingting na save, em i bikpela samting long wok yet long “trai long kisim save long ol pasin Bikpela i save laikim”!
15. Taim Sera bilong Sudan i kam pait long Juda, wanem samting i mekim na Asa i ken beten long Jehova na save olsem Em bai helpim ol Juda?
15 Wok king bilong tumbuna pikinini bilong Solomon, em Asa, i strongim dispela tok bilong wok yet long trai long kisim save long ol pasin Jehova i laikim. Elevenpela yia bihain long taim Asa i kamap king, Sera bilong Sudan i bringim wan milion soldia bilong pait long Juda. Olsem wanem? Jehova bai helpim Juda? Winim 500 yia bipo, Jehova i bin tokaut klia long wanem samting bai painim ol manmeri bilong em sapos ol i harim tok bilong em na ol i bihainim ol lo bilong em, na wanem samting bai painim ol sapos ol i no mekim olsem. (Lo 28:1, 7, 15, 25) Taim Asa i kirap mekim wok king, em i bin rausim olgeta alta na pos ston ol man i save yusim bilong lotuim ol god giaman. Em i bin kirapim ol man long “ol i mas strong long bihainim laik bilong God.” Asa i no bin wet i go inap em i bungim wanpela bikpela hevi pastaim na bihain em i kirap bihainim Jehova. Nogat. Em i bilip long Jehova na em i beten askim em long helpim ol. Wanem samting i bin kamap? Ol Juda i winim tru dispela pait.—2 Stori 14:2-12.
16, 17. (a) Maski Asa i winim pait, Jehova i givim wanem tok long em? (b) Taim Asa i no bihainim gutpela tingting em i kisim wanem helpim? Tasol em i mekim wanem? (c) Olsem wanem ol samting Asa i bin mekim i ken helpim yumi?
16 Tasol taim Asa i winim pait pinis na i kam bek, Jehova i salim Asaria i kam tokim king olsem: “King Asa na yupela olgeta Juda na Benjamin, harim. Sapos yupela i stap klostu long Bikpela, orait bai em i stap wantaim yupela. Na sapos yupela i wok long painim em, orait bai yupela inap i kam klostu long em. Tasol sapos yupela i givim baksait long em, orait bai em i givim baksait long yupela.” (2 Stori 15:2) Long dispela taim Asa i givim bel moa yet long strongim lotu i tru. Tasol 24 yia bihain, taim narapela lain i laik pait wantaim em, Asa i no wok long painim Jehova. Em i no lukluk long Tok Bilong God, na em i no tingim samting Jehova i bin mekim taim ami bilong Sudan i bin kam pait long Juda. Em i no bihainim gutpela tingting na em i wokim wanpela kontrak wantaim Siria.—2 Stori 16:1-6.
17 Long dispela as Jehova i kirapim profet Hanani long mekim tok bilong stretim Asa. Long dispela taim stret tok Hanani i mekim bilong kamapim tingting bilong Jehova inap helpim Asa. Tasol nogat. Asa i kros na em i tokim ol long putim Hanani long kalabus. (2 Stori 16:7-10) Tarangu! Olsem wanem long yumi? Yumi save wok long painim God, tasol bihain yumi no laik bihainim tok bilong stretim yumi? Taim wanpela elda, husat i tingim na laikim yumi, i yusim tok bilong Baibel bilong givim tok kaunsel long yumi, long wanem, yumi pas tumas long pasin bilong graun, yumi save amamas long helpim em i givim yumi na bai yumi ken save long “ol pasin Bikpela i save laikim”?
No Ken Lusim Tingting Long Askim
18. Ol tok Elihu i mekim long Jop inap helpim yumi olsem wanem?
18 Maski man i bin stap gut long wok bilong Jehova, taim bikpela hevi i bungim em, em inap pundaun. Jop i kisim sik nogut, olgeta pikinini bilong em i dai, mani kago bilong em i lus, na ol poroman i giaman na tok em i bin mekim rong, long dispela taim Jop i tingting long em yet tasol. Elihu i kirapim em long tingim olsem: “I no gat wanpela man i save singaut olsem, ‘Dispela God i bin wokim mi, em i stap we?’ ” (Jop 35:10) Jop i mas kirap na tingting long Jehova na kisim tingting bilong Em long ol samting i bin kamap. Long pasin daun Jop i kisim tok bilong kirapim tingting bilong em, na pasin bilong em inap helpim yumi long mekim wankain.
19. Planti taim ol manmeri bilong Israel ol i no bin mekim wanem?
19 Ol manmeri bilong Israel i save long ol samting God i bin mekim long lain bilong ol. Tasol planti taim ol i no tingim ol dispela samting taim samting i kamap long laip bilong ol yet. (Jeremaia 2:5, 6, 8) Taim ol i mas mekim samting, ol i bihainim laik bilong ol yet na ol i no askim, “Jehova i stap we?”—Aisaia 5:11, 12.
Wok Yet Long Askim, “Jehova i Stap We?”
20, 21. (a) Husat long nau i wok long askim Jehova long stiaim ol, wankain olsem Elisa i bin mekim? (b) Olsem wanem yumi ken bihainim pasin bilong bilip bilong ol? Dispela inap helpim yumi olsem wanem?
20 Taim wok autim tok bilong Elaija i pinis, wokboi bilong em Elisa i kisim klos bilong Elaija i bin pundaun, na em i go long wara Jordan na em i paitim wara na i askim olsem: “God, Bikpela bilong Elaija, em i stap we?” (2 King 2:14) Bilong bekim dispela askim, Jehova i soim olsem spirit bilong em i stap nau long Elisa. Dispela inap lainim yumi long wanem samting?
21 Wankain samting i bin kamap long taim bilong yumi. Sampela Kristen God i bin makim long holi spirit na ol i bin go pas long mekim wok autim tok ol i dai. Ol brata husat i kisim wok bilong lukautim ol samting i bin skelim tok bilong Baibel na beten askim Jehova long stiaim ol. Ol i no lusim tingting long mekim askim olsem, “Jehova i stap we?” Olsem na Jehova i wok yet long stiaim ol manmeri bilong em na mekim wok bilong ol i karim kaikai. Olsem wanem? Yumi save bihainim pasin bilong bilip bilong ol? (Hibru 13:7) Sapos olsem, bai yumi stap klostu long oganaisesen bilong Jehova, bihainim tok bilong en, na insait tru long wok Jisas Krais i stiaim dispela oganaisesen long mekim.—Sekaraia 8:23.
Bai Yu Bekim Olsem Wanem?
• I gat wanem as na yumi askim olsem, “Jehova i stap we?”
• Olsem wanem long nau yumi ken painim bekim bilong askim, “Jehova i stap we?”
• Bilong wanem God i no bekim sampela beten ol man i mekim bilong God i ken stiaim ol?
• Wanem ol stori bilong Baibel i kamapim klia olsem yumi mas wok yet long “trai long kisim save long ol pasin Bikpela i save laikim”?
[Piksa long pes 9]
Olsem wanem King Jehosafat i bin wok long painim Jehova?
[Piksa long pes 10]
Bilong wanem Sol i bin go lukim wanpela glasmeri?
[Ol Piksa long pes 12]
Beten, stadi, na tingim tingim long bel bilong kisim save long ‘Jehova i stap we’