Sapta 14
Olsem Wanem Jehova i Bosim Oganaisesen Bilong Em?
1. Baibel i givim wanem save long oganaisesen bilong Jehova? Bilong wanem dispela i bikpela samting long yumi?
OLSEM WANEM? God i gat oganaisesen bilong em? Tok bilong Baibel i soim olsem em i gat oganaisesen. Long Baibel, em i stori liklik long gutpela oganaisesen bilong em long heven. (Esekiel 1:1, 4-14; Daniel 7:9, 10, 13, 14) Maski yumi no inap lukim dispela hap bilong oganaisesen, em i mekim bikpela samting long ol man i lotu tru long nau. (2 King 6:15-17) Oganaisesen bilong Jehova i gat hap bilong en hia long graun tu. Baibel i helpim yumi long kisim save long dispela oganaisesen na olsem wanem Jehova i bosim em.
Luksave Long Oganaisesen Long Graun
2. God i kamapim wanem nupela kongrigesen?
2 Inap 1,545 yia lain Israel i stap kongrigesen bilong God. (Aposel 7:38) Tasol lain Israel i no bihainim ol lo bilong God na ol i sakim Pikinini bilong God yet. Olsem na Jehova i sakim na givim baksait long dispela kongrigesen. Jisas i tokim ol Juda: “Harim. Nau ples bilong yupela bai i bagarap na i stap nating.” (Matyu 23:38) God i kamapim nupela kongrigesen, na em i wokim nupela kontrak wantaim ol. Insait long dispela kongrigesen i gat 144,000 manmeri em God i makim bilong i stap wantaim Pikinini bilong em long heven.—KTH 14:1-4.
3. Wanem samting i kamap long Pentikos 33 C.E. na dispela i kamapim klia olsem God i kirap pinis long mekim wok long nupela kongrigesen?
3 Holi spirit bilong Jehova i makim namba wan lain bilong dispela kongrigesen long Pentikos 33 C.E. Long dispela bikpela samting Baibel i tok: “Bikpela De Bilong Pentikos i kam pinis, na ol manmeri i bilip long Jisas ol i bung wantaim long wanpela haus. Na wantu wanpela nois i kam long heven, em i olsem krai bilong strongpela win, na i pulapim tru dispela haus ol i sindaun i stap long en. Na ol i lukim samting olsem paia i kamap, na i luk olsem planti tang bilong man. Na ol dispela tang i go nabaut na i stap long olgeta bilong ol. Na Holi Spirit i pulap long olgeta dispela manmeri.” (Aposel 2:1-4) Olsem na spirit bilong God i kamapim klia olsem God bai mekim wok long dispela lain bilong kamapim ol samting em i tingting pinis long mekim aninit long wok bos bilong Jisas Krais i stap long heven.
4. Husat long nau i oganaisesen bilong Jehova long graun?
4 Long nau, liklik hap lain bilong ol 144,000 i stap yet long graun, olsem lain remnan. Tasol olsem tok profet bilong Baibel i tok, bikpela lain bilong ol “arapela sipsip,” planti milion bilong ol, ol i kam bung wantaim lain remnan. Jisas, em i Gutpela Wasman bilong ol sipsip, i bin bungim ol dispela arapela sipsip wantaim lain remnan na ol i kamap wanpela lain sipsip i stap aninit long em olsem Wasman bilong ol. (KTH 7:9; Jon 10:11, 16) Dispela tupela lain i kamap wanpela kongrigesen i stap wanbel, olsem oganaisesen bilong Jehova long graun.
Oganaisesen i Bihainim Pasin Tiokratik
5. Husat i bosim oganaisesen bilong God? Olsem wanem em i bosim?
5 Baibel i kolim dispela lain olsem sios o kongrigesen bilong God, olsem na yumi inap save husat i bosim dispela lain. Dispela oganaisesen i bihainim pasin tiokratik, olsem God i bosim. Jehova i stiaim lain bilong em long rot bilong Tok bilong em, Baibel, na long rot bilong Jisas, Em i bin makim em bilong i stap Het bilong kongrigesen.—1 Timoti 3:14, 15; Efesus 1:22, 23; 2 Timoti 3:16, 17.
6. (a) Wanem samting i kamap long taim bilong ol aposel bilong soim olsem God i bosim kongrigesen? (b) Wanem samting i kamapim klia olsem Jisas i stap yet olsem het bilong kongrigesen?
6 Wok bilong God long bosim dispela lain i kamap klia long Pentikos. (Aposel 2:14-18, 32, 33) Em i kamap klia taim ensel bilong Jehova i stiaim wok bilong autim gutnius long Afrika, na taim Jisas i givim tok long Sol bilong Tarsus long taim em i tanim bel, na taim Pita i kirap long autim tok long ol man bilong ol arapela lain. (Aposel 8:26, 27; 9:3-7; 10:9-16, 19-22) Tasol bihain ol i no harim moa maus i kamap long heven, ol i no lukim moa ol ensel, na ol i no kisim moa strong bilong spirit bilong wokim ol mirakel. Tasol Jisas i bin tok promis olsem: “Harim. Mi stap wantaim yupela olgeta de, i go inap long dispela taim i pinis.” (Matyu 28:20; 1 Korin 13:8) Long nau, Ol Witnes Bilong Jehova i save Jisas i stiaim wok. Sapos em i no mekim olsem, pasin bilong ol man long birua nogut tru long ol bai mekim na ol i no inap autim tok bilong Kingdom.
7. (a) Husat i “wokboi i gat gutpela tingting”? Bilong wanem i olsem? (b) Jisas i givim wanem wok long dispela “wokboi”?
7 Paslain liklik long taim Jisas i dai, em i tokim ol disaipel long wanpela “wokboi i gat gutpela tingting.” Bikman bilong en, em Jisas, bai givim bikpela wok long en. Dispela “wokboi” bai stap taim Jisas i go bek long heven na em bai wok strong yet taim Krais i kam bek na kisim bikpela namba long Kingdom. Dispela i no inap makim wanpela man, em i makim kongrigesen bilong Krais, em ol Kristen God i bin makim. Jisas i baim bek ol long blut bilong em, na em i kolim dispela lain olsem “wokboi” bilong em. Em i givim wok long ol bilong kamapim ol disaipel na lukautim ol, na givim “kaikai [bilong spirit] long ol long taim bikman i makim.”—Matyu 24:45-47; 28:19; Aisaia 43:10; Luk 12:42; 1 Pita 4:10.
8. (a) Long nau wokboi i gat wanem bikpela wok? (b) Bilong wanem i bikpela samting long yumi mas harim ol tok yumi kisim long rot bilong dispela lain?
8 Lain wokboi i stap gut long wok bilong Bikman taim em i kam bek long 1914, olsem na Bikman i givim bikpela wok moa long en long 1919. Kirap long dispela taim ol i bin autim tok bilong Kingdom long olgeta hap, na ol i bungim bikpela lain manmeri i lotuim Jehova em ol inap winim taim bilong bikpela hevi tru. (Matyu 24:14, 21, 22; KTH 7:9, 10) Ol tu i mas kisim kaikai bilong spirit, na lain gutpela wokboi i givim dispela kaikai long ol. Yumi mas harim na bihainim ol tok Jehova i givim long yumi long rot bilong dispela lain na bai Jehova i ken orait long yumi.
9, 10. (a) Long taim bilong ol aposel, olsem wanem ol i stretim ol askim i kamap long bilip na stiaim wok bilong autim gutnius? (b) Olsem wanem ol i stiaim wok bilong lain bilong Jehova long nau?
9 Sampela taim ol askim i kamap long bilip na long pasin bilong mekim ol samting. Long dispela taim yumi mas mekim wanem? Aposel sapta 15 i stori long askim i kamap long pasin ol man bilong arapela lain i kamap Kristen ol i mas bihainim. Ol i givim dispela askim long ol aposel na ol hetman long Jerusalem, ol i lain bilong bosim ol Kristen long bipo. Ol dispela hetman i save popaia, tasol God i givim wok long ol. Ol i skelim ol tok Baibel i mekim long dispela samting, na ol i tingim tu wok spirit bilong God i mekim na rot i op long ol i ken autim tok long ol man bilong ol arapela lain. Bihain ol i pasim tok long dispela samting. God i blesim dispela pasin bilong stretim tok. (Aposel 15:1-29; 16:4, 5) Dispela lain long Jerusalem i salim sampela man i go bilong helpim wok bilong autim tok long Kingdom.
10 Long taim bilong yumi i gat ol brata Kristen God i bin makim em ol i insait long lain Gavening Bodi bilong oganaisesen bilong Jehova hia long graun na ol i bilong narapela narapela kantri na ol i stap long hetkota bilong ol Witnes Bilong Jehova. Aninit long wok bos bilong Jisas Krais, Gavening Bodi i helpim lotu i tru long olgeta kantri, em i stiaim wok autim tok bilong ol Witnes Bilong Jehova long planti tausen kongrigesen bilong ol. Ol brata bilong Gavening Bodi i gat wankain tingting olsem aposel Pol, em i salim sampela tok long ol brata Kristen: “Mi no tok olsem mipela i bosim bilip bilong yupela. Nogat. Long bilip yupela i sanap strong pinis. Mipela i save wok wantaim bilong kamapim amamas bilong yupela.”—2 Korin 1:24.
11. (a) Olsem wanem ol i makim ol elda na kongrigesen sevent? (b) Bilong wanem yumi mas wok gut wantaim ol dispela brata?
11 Ol Witnes Bilong Jehova long olgeta hap ol i wetim Gavening Bodi long makim ol brata i gat gutpela save na ol i givim namba long ol dispela brata long makim ol elda na kongrigesen sevent bilong lukautim ol kongrigesen. Baibel i kolim ol mak ol brata i mas winim na bai ol i ken kamap elda o kongrigesen sevent, na ol man i winim ol dispela mak ol i no gutpela olgeta na ol i save popaia. Ol elda husat i tok ol brata i winim mak na ol brata i gat namba long makim ol brata, ol i gat bikpela wok long ai bilong God long mekim stret wok bilong ol. (1 Timoti 3:1-10, 12, 13; Taitus 1:5-9) Olsem na ol i beten askim God long givim spirit bilong em long ol, na ol i skelim gut tok bilong Baibel bilong soim rot long ol. (Aposel 6:2-4, 6; 14:23) Yumi mas soim olsem yumi pilim tru gutpela wok bilong ol dispela man i olsem “presen,” em ol i save helpim yumi long ‘i stap wanbel tru long bilip.’—Efesus 4:8, 11-16.
12. Jehova i givim wanem gutpela wok long ol meri insait long lain bilong em?
12 Baibel i tok ol man tasol i ken holim wok bilong lukautim kongrigesen. Dispela tok i no daunim ol meri. Nogat. Sampela meri bai mekim wok king wantaim Krais long Kingdom bilong heven, na ol meri i mekim bikpela wok bilong autim tok. (Song 68:11) Na tu, taim ol meri i lukautim gut famili bilong ol, dispela i helpim gutnem bilong kongrigesen i kamap gutpela moa. (Taitus 2:3-5) Tasol wok tisa insait long kongrigesen em wok bilong ol man tasol ol i bin makim bilong mekim dispela wok.—1 Timoti 2:12, 13.
13. (a) Baibel i tok ol elda i mas ting olsem wanem long wok o namba ol i kisim? (b) Yumi olgeta i ken insait long wanem gutpela wok?
13 Taim wanpela man i gat bikpela namba, ol narapela i save ting em i bikman, tasol insait long oganaisesen bilong Jehova i no olsem. Baibel i tok: “Man i no gat nem na i stap liklik tru namel long yupela olgeta, em i stap namba wan.” (Luk 9:46-48; 22:24-26) Baibel i tok, ol elda i mas was gut, nogut ol i stap olsem bikman na daunim ol manmeri bilong God. Ol i mas i stap olsem gutpela piksa bilong ol sipsip i ken bihainim. (1 Pita 5:2, 3) Olgeta Witnes Bilong Jehova, ol man na meri wantaim, ol i gat gutpela wok long i stap olsem maus bilong Nambawan King bilong heven na graun. Long pasin daun ol i autim tok long nem bilong em na Kingdom bilong em long ol man long olgeta hap.
14. Mekim wok long ol skripsa hia bilong skelim ol askim i stap long pinis bilong paragraf.
14 Gutpela sapos yumi askim yumi yet, olsem: ‘Mi pilim tru rot bilong Jehova long bosim oganaisesen bilong em? Tingting na toktok na pasin bilong mi i kamapim klia dispela samting?’ Taim yumi skelim ol askim i stap hia, dispela inap helpim yumi long skelim tingting na pasin bilong yumi.
Sapos mi daun tru long Krais, em Het bilong kongrigesen, bai mi mekim wanem olsem ol dispela skripsa i tok? (Matyu 24:14; 28:19, 20; Jon 13:34, 35)
Taim mi amamas long kaikai bilong spirit i kam long gutpela wokboi na Gavening Bodi bilong en, dispela i makim olsem mi rispek long husat? (Luk 10:16)
Olgeta insait long kongrigesen, na moa yet ol elda, i mas mekim wanem kain pasin long narapela? (Rom 12:10)
15. (a) Tingting bilong yumi long oganaisesen bilong Jehova long graun i kamapim klia wanem samting? (b) Yumi inap mekim wanem bilong mekim Jehova i belgut na kamapim klia olsem Satan em i giaman?
15 Long nau Jehova i stiaim yumi long rot bilong oganaisesen bilong em long graun i stap aninit long Krais. Tingting bilong yumi long dispela oganaisesen i kamapim bel bilong yumi, olsem yumi laikim husat i mas i stap nambawan king. (Hibru 13:17) Satan i tok yumi tingting long yumi yet tasol. Tasol sapos yumi givim yumi yet bilong mekim wok bilong God na yumi no mekim sampela tok o pasin bilong litimapim nem bilong yumi yet, orait yumi kamapim klia olsem Satan em i man bilong giaman. Yumi mekim Jehova i belgut sapos yumi laikim tru na rispek long ol man i go pas, tasol yumi no ‘grisim ol man, bilong mekim ol i bihainim laik bilong yumi.’ ( Jut 16; Hibru 13:7) Taim yumi stap gut long oganaisesen bilong Jehova, yumi soim olsem Jehova em i God bilong yumi na yumi wanbel long lotuim em.—1 Korin 15:58.
Stori Gen Long Ol Dispela Tok
• Husat i oganaisesen bilong Jehova long graun long nau? Em i stap bilong mekim wanem?
• God i makim husat i stap het bilong kongrigesen? Em i tingim tru yumi na em i putim wanem ol samting long graun bilong soim rot long yumi?
• Yumi mas kisim wanem ol stretpela tingting long ol man insait long oganaisesen bilong Jehova?
[Ol Piksa long pes 133]
Jehova i soim rot long yumi long rot bilong oganaisesen bilong em long graun i stap aninit long Krais