Yu Kisim “Spirit Bilong Tok Tru”?
“Papa . . . bai i givim yupela narapela Helpim bilong strongim yupela. Na em bai i stap wantaim yupela oltaim oltaim. Dispela Helpim em i Spirit bilong tok tru.”—JON 14:16, 17.
1. Long ol laspela aua Jisas i stap wantaim ol disaipel long rum antap, em i givim wanem bikpela tok long ol?
“BIKPELA, yu bai go we?” Em wanpela askim ol aposel i givim long Jisas long ol laspela aua em i stap wantaim ol long wanpela rum antap long Jerusalem. (Jon 13:36) Dispela miting i go yet na Jisas i tok taim i kamap pinis long em i mas lusim ol na go bek long Papa bilong em. (Jon 14:28; 16:28) Em i no ken stap moa wantaim ol long skin na skulim ol na bekim ol askim bilong ol. Tasol em i tokim ol: “Bai mi askim Papa, na em bai i givim yupela narapela Helpim bilong strongim yupela. Na em bai i stap wantaim yupela oltaim oltaim.”—Jon 14:16.
2. Jisas i tok promis long ol disaipel olsem taim em i lusim ol, em bai salim wanem samting i kam long ol?
2 Jisas i kamapim klia dispela helpim em i wanem samting na em bai helpim ol disaipel olsem wanem. Em i tokim ol: “Bipo mi yet mi stap wantaim yupela, olsem na mi no tokim yupela long ol dispela samting. Tasol nau mi go long Papa, em i bin salim mi na mi kam. . . . Mi tok tru long yupela, mi lusim yupela na mi go, em i bilong helpim yupela. Sapos mi no i go, orait Spirit bilong strongim yupela em bai i no inap i kam long yupela. Tasol sapos mi go, orait bai mi salim em i kam long yupela. . . . Taim Spirit bilong tok tru i kam, em bai i stiaim tingting bilong yupela na bai yupela i save long olgeta tok i tru.”—Jon 16:4, 5, 7, 13.
3. (a) Wanem taim Jisas i salim “Spirit bilong tok tru” i go long ol Kristen bilong pastaim? (b) Wanem wanpela bikpela samting spirit i bin “helpim” ol long en?
3 Dispela tok promis i kamap tru long Pentikos 33 C.E., olsem aposel Pita i kamapim klia: “Dispela man Jisas, God i kirapim em pinis long matmat. . . . Na Jisas i go antap pinis na i stap long han sut bilong God. Em i kisim Holi Spirit pinis long han bilong Papa, olsem bipo Papa i bin tok long givim em. Na nau em i kapsaitim pinis, olsem yupela i lukim na i harim.” (Aposel 2:32, 33) Dispela spirit holi i kapsait long de Pentikos i bin helpim ol Kristen bilong pastaim long planti samting, em bihain bai yumi stori long en. Jisas i bin tok promis olsem “Spirit bilong tok tru” bai ‘kirapim tingting bilong ol na bai ol i tingim gen olgeta tok em i bin givim long ol.’ (Jon 14:26) Spirit holi bai helpim ol long tingim bek na raitim stori bilong ol samting Jisas i bin mekim na ol tok em i bin skulim ol long en, na tu, olgeta tok em i mekim. Dispela wok bilong spirit holi bai helpim moa yet lapun aposel Jon klostu long yia 100 C.E. taim em i raitim Gutnius bilong em. Dispela Gutnius i stori long ol gutpela tok Jisas i bin givim long ol disaipel taim em i kamapim bung bilong Memorial bilong tingim i dai bilong em.—Jon, sapta 13-17.
4. “Spirit bilong tok tru” i bin helpim ol Kristen bilong pastaim olsem wanem?
4 Na Jisas i tok promis long ol dispela disaipel olsem spirit bai ‘skulim ol long olgeta samting’ na ‘stiaim tingting bilong ol na bai ol i save long olgeta tok i tru.’ Spirit bai helpim ol long save long ol strongpela tok bilong Baibel na helpim ol long stap wanbel long tingting na save na wok. (1 Korin 2:10; Efesus 4:3) Olsem na spirit holi i givim strong long ol dispela Kristen bilong pastaim, bambai olgeta wantaim i ken mekim wok olsem wanpela “wokboi i gat gutpela tingting” na givim “kaikai” bilong spirit long ol Kristen wan wan God i bin makim, long taim stret bilong en.—Matyu 24:45.
Spirit i Tokaut Ples Klia
5. (a) Long nait bilong Nisan 14, 33 C.E., Jisas i kamapim wanem nupela tingting long ol disaipel bilong em? (b) Spirit holi bai mekim wanem wok bilong truim tok promis bilong Jisas?
5 Long nait bilong Nisan 14, 33 C.E., Jisas i tokim ol disaipel olsem bihain em bai kisim ol i go stap wantaim em na Papa bilong em long heven. Em i tokim ol: “Long haus bilong Papa bilong mi i gat planti rum i stap, na mi go bilong redim ples bilong yupela. . . . Bai mi kam bek na kisim yupela i go i stap wantaim mi. Na ples mi stap long en, yupela tu bai i stap long en wantaim mi.” (Jon 13:36; 14:2, 3) Bai ol i mekim wok king wantaim em long Kingdom bilong em. (Luk 22:28-30) Bilong ol i ken tingting long go long heven, pastaim ol i mas ‘kamap nupela long holi spirit,’ olsem ol pikinini bilong God long spirit, na God i mas makim ol long spirit holi bilong mekim wok olsem king na pris wantaim Krais long heven.—Jon 3:5-8; 2 Korin 1:21, 22; Taitus 3:5-7; 1 Pita 1:3, 4; KTH 20:6.
6. (a) Wok bilong singautim ol man bilong i go long heven i bin kirap long wanem taim? Dispela singaut i bin go long hamas man? (b) Dispela lain i kisim baptais bilong mekim wanem?
6 Wok bilong “singautim” ol man bilong i go long heven i kirap long Pentikos 33 C.E. na i luk olsem em i pinis long 1935 samting. (Hibru 3:1) Ol man spirit holi i makim bilong insait long lain Israel bilong spirit, namba bilong ol em 144,000, em God i bin “baim bek ol . . . namel long olgeta manmeri bilong graun.” (KTH 7:4; 14:1-4) Ol i kisim baptais bilong kamap hap bilong bodi bilong Krais, olsem lain bilong em, na bilong i dai olsem em. (Rom 6:3; 1 Korin 12:12, 13, 27; Efesus 1:22, 23) Taim ol i baptais pinis long wara, na spirit holi i makim ol, ol i go insait long wanpela rot bilong holimpas ol lo bilong God i go inap long taim ol i dai.—Rom 6:4, 5.
7. I gat wanem as na ol Kristen God i bin makim, ol tasol i gat wok long kisim bret na wain long Memorial?
7 Ol dispela Kristen God i bin makim, ol i Israel bilong spirit na ol i insait long nupela kontrak Jehova i bin mekim wantaim “Israel tru bilong God.” (Galesia 6:16; Jeremaia 31:31-34) Blut bilong Jisas i bin kapsait, em i bin strongim dispela nupela kontrak. Jisas i toktok long dispela samting taim em i kamapim Memorial bilong tingim i dai bilong em. Luk i tok: “Em i kisim wanpela bret, na i tenkyu long God, na i brukim, na i givim long ol disaipel. Na em i tok, ‘Dispela em i bodi bilong mi, mi givim bilong helpim yupela. Yupela i mas mekim olsem bilong tingim mi.’ Taim ol i kaikai pinis, orait em i kisim kap wain na i mekim wankain pasin long en. Em i tok olsem, ‘Dispela kap wain em i nupela kontrak mi mekim long blut bilong mi, em mi kapsaitim bilong helpim yupela.’ ” (Luk 22:19, 20) Lain remnan, olsem liklik hap lain bilong 144,000 ol i stap yet long graun, ol tasol i gat wok long kisim bret na wain long Memorial bilong tingim i dai bilong Krais.
8. Olsem wanem ol Kristen God i makim ol i save God i bin singautim ol bilong i go long heven?
8 Olsem wanem ol i save God i bin singautim ol bilong i go long heven? Spirit holi i tokaut klia tru long ol. Aposel Pol i tokim kain man olsem: “Olgeta manmeri i larim Spirit bilong God i stiaim wokabaut bilong ol, dispela ol manmeri i stap pikinini bilong God. . . . Holi Spirit yet i save helpim spirit bilong yumi na yumi save tokaut ples klia olsem yumi stap pikinini bilong God. Orait yumi stap pikinini bilong God, na bihain bai yumi kisim ol gutpela samting God Papa i bin promis long givim yumi, em ol samting Krais, brata bilong yumi, i kisim pinis.” (Rom 8:14-17) Spirit i tokaut klia tru long ol, olsem na sapos man i gat tupela tingting long i go long heven, em i ken ting dispela singaut i no bin i go long em, na em i no ken kisim bret na wain long Memorial.
Spirit Holi na Ol Arapela Sipsip
9. Gutnius bilong Luk na Jon, na Buk Kamapim Tok Hait, i stori long wanem tupela lain?
9 God i singautim sampela Kristen tasol bilong i go insait long lain Israel bilong spirit, olsem na Jisas i kolim ol olsem “liklik lain sipsip.” Dispela lain i go insait long “banis” bilong nupela kontrak, em i narapela kain long lain “arapela sipsip” i no gat namba bilong en, em Jisas i tok em i mas bungim ol tu. (Luk 12:32; Jon 10:16) Ol arapela sipsip em i bungim nau long taim bilong las de, ol i dispela “planti manmeri tru” bilong winim taim bilong “bikpela hevi,” na ol i tingting long kisim laip oltaim long Paradais long graun. Long driman Jon i kisim klostu long yia 100 C.E., dispela bikpela lain manmeri i stap narapela kain long ol 144,000 Israel bilong spirit. (KTH 7:4, 9, 14) Olsem wanem? Lain arapela sipsip tu i kisim spirit holi? Sapos olsem, orait dispela i save mekim wanem long i stap bilong ol?
10. Ol arapela sipsip i kisim baptais “long nem bilong Papa na bilong Pikinini na bilong Holi Spirit” na dispela i makim wanem samting?
10 Tru tumas, spirit holi i save mekim bikpela wok long i stap bilong ol arapela sipsip. Ol i kisim baptais “long nem bilong Papa na bilong Pikinini na bilong Holi Spirit” bilong makim olsem ol i dediket pinis long Jehova. (Matyu 28:19) Ol i save Jehova i stap Nambawan Bos, na ol i daun long Krais, em i King na Man bilong baim bek ol, na ol i larim spirit bilong God, olsem strong bilong em, i stiaim ol, na ol i wok long kisim “ol gutpela pasin” spirit i kamapim, olsem ‘laikim tru narapela, amamas, stap bel isi, no belhat kwik, helpim ol man, mekim gutpela pasin long ol, wokabaut stret oltaim, stap isi, daunim laik bilong olpela bel.’—Galesia 5:22, 23.
11, 12. (a) Ol Kristen God i bin makim, ol i stap holi long wanem rot i narapela kain? (b) Long wanem rot ol arapela sipsip i stap holi?
11 Na ol arapela sipsip i mas larim Tok Bilong God na spirit holi bilong em i mekim ol i kamap klin, o holi. Ol Kristen God i bin makim, ol i kamap klin long wanpela rot i narapela kain—God i tokaut olsem ol i stretpela man na ol i stap holi olsem meri bilong Krais. (Jon 17:17; 1 Korin 6:11; Efesus 5:23-27) Profet Daniel i tok ol i “manmeri bilong God Antap,” em ol i kisim Kingdom aninit long “pikinini bilong man,” em Krais Jisas. (Daniel 7:13, sta daunbilo, 14, 18, 27) Bipo, long maus bilong Moses na Aron, Jehova i tokim lain Israel: “Mi Bikpela, mi God bilong yupela. Olsem na yupela i mas givim yupela yet long mi na lusim pasin i no stret na bihainim stretpela pasin na i stap holi. Long wanem, mi yet mi holi na mi save mekim pasin i gutpela na stretpela olgeta.”—Wok Pris 11:44.
12 Dispela tok “mekim i kamap holi” i makim “pasin bilong mekim i kamap narapela kain, o i stap narapela bilong mekim wok bilong God Jehova, o i stap klin.” Long 1938, Wastaua (tok Inglis) i tok sapos lain Jonadap, olsem lain arapela sipsip, ‘i laik insait long bikpela lain manmeri bilong kisim laip long graun, orait ol i mas dediket na stap holi.’ Long driman Jon i kisim long bikpela lain manmeri, em Buk Kamapim Tok Hait i stori long en, ol i “wasim ol klos bilong ol long blut bilong Pikinini Sipsip, na ol klos i kamap waitpela,” na “long san na long nait ol i save stap long haus bilong [God] na mekim wok bilong en.” (KTH 7:9, 14, 15) Spirit holi i helpim ol arapela sipsip na ol i wok strong long winim ol mak Jehova i putim bilong i stap holi.—2 Korin 7:1.
Ol i Helpim Ol Brata Bilong Krais
13, 14. (a) Tok piksa bilong Jisas long ol sipsip na meme i soim olsem ol arapela sipsip i mas mekim wanem sapos ol i laik kisim laip? (b) Long dispela taim bilong las de, ol arapela sipsip i bin mekim wanem bilong helpim gut ol brata bilong Krais?
13 Taim Jisas i tok profet long pasin bilong “dispela graun i laik pinis,” em i mekim wanpela tok piksa long ol sipsip na meme, na dispela tok piksa i soim olsem lain arapela sipsip na liklik lain ol i pas gut wantaim. Long dispela tok piksa Krais i kamapim klia olsem, bilong kisim laip, ol arapela sipsip i mas helpim ol Kristen God i bin makim, em Krais i kolim ol olsem ‘ol brata bilong mi.’ Em i tok: “King bai i tokim ol manmeri i stap long han sut bilong en olsem, ‘Yupela i gat blesing bilong Papa bilong mi. Em i laik mekim gut long yupela. Yupela kam kisim kingdom Papa i bin redim na makim bilong yupela pinis, long taim graun i kamap nupela yet. . . . Mi tok tru long yupela, olgeta samting yupela i bin mekim long wanpela bilong ol dispela brata bilong mi i no gat nem liklik, ol dispela samting yupela i bin mekim long mi.’ ”—Matyu 24:3; 25:31-34, 40.
14 Dispela tok, “olgeta samting yupela i bin mekim,” em i makim ol wok ol i bin mekim bilong helpim ol brata bilong Krais, em ol lain bilong Satan i no bin mekim gut long ol na ol i bin putim sampela long kalabus. Ol i bin sot long kaikai, na laplap, na man bilong lukautim ol taim ol i gat sik. (Matyu 25:35, 36) Nau long dispela taim bilong las de, kirap long 1914, kain samting olsem i bin painim planti Kristen God i bin makim. Ol samting i bin kamap long lain Witnes Bilong Jehova long nau i kamapim klia olsem spirit holi i bin kirapim ol gutpela poroman bilong ol, em ol arapela sipsip, long mekim gut long ol.
15, 16. (a) Ol arapela sipsip i bin insait long wanem bikpela wok bilong helpim ol brata bilong Krais ol i stap long graun? (b) Ol Kristen God i bin makim ol i tok wanem bilong kamapim tenkyu bilong ol long ol arapela sipsip?
15 Ol brata bilong Krais ol i stap long graun nau long dispela taim bilong las de ol i bin kisim gutpela helpim long ol arapela sipsip long mekim wok bilong God long ‘autim gutnius bilong kingdom long olgeta hap bilong graun, bai olgeta lain manmeri i ken harim.’ (Matyu 24:14; Jon 14:12) Inap planti yia pinis, namba bilong ol Kristen God i bin makim i wok long go liklik, tasol namba bilong ol arapela sipsip i wok long go bikpela, inap olsem planti milion. Planti tausen bilong ol i bin wok fultaim long autim tok—olsem painia o misineri—na autim gutnius bilong Kingdom “i go inap long olgeta hap bilong graun.” (Aposel 1:8) Planti moa i save autim tok inap long skel bilong ol na ol i amamas long givim mani samting bilong helpim dispela bikpela wok.
16 Ol brata bilong Krais ol i tenkyu tru long dispela gutpela helpim ol i bin kisim long ol arapela sipsip! Buk Worldwide Security Under the “Prince of Peace,” em lain wokboi i kamapim long 1986, em i kamapim tingting bilong ol olsem: ‘Kirap long taim bilong Namba Tu Pait, bikpela lain bilong “ol arapela sipsip” i bin mekim bikpela wok bilong truim tok profet em Jisas i tok bai kamap long taim bilong “pinis.” Olsem na mipela laik tok tenkyu tru long dispela bikpela lain bilong ol narapela narapela kantri na tok ples long bikpela wok ol i bin mekim long inapim tok profet bilong Jisas long Matyu 24:14!’
‘Ol i No Ken Kamap Gutpela Tru Paslain Long Yumi’
17. Ol manmeri bilong bipo i bin stap gut long God na ol i kirap bek na kisim laip long graun, olsem wanem ol i no ken “kamap gutpela tru paslain long” ol Kristen God i bin makim?
17 Aposel Pol em wanpela Kristen God i bin makim, na em i stori long ol man na meri i bin stap gut long God paslain long taim bilong Krais olsem: “Dispela olgeta manmeri i bilip long God, na ol i kisim gutpela nem tru long ai bilong God. Tasol long taim ol i stap long graun ol i no kisim gutpela samting God i bin promis long givim ol, long wanem, bipo yet God i redim wanpela gutpela samting moa yet bilong yumi olgeta [ol Kristen God i makim]. Na em i no laik bai ol dispela manmeri bilong bipo i kamap gutpela tru paslain long yumi. Nogat. Em i laik bai yumi mas kamap gutpela tru wantaim ol.” (Hibru 11:35, 39, 40) Long taim bilong Wan Tausen Yia, Krais wantaim ol 144,000 brata bilong em long heven bai mekim wok king na pris na mekim wok long ofa bilong Krais bilong helpim ol man long graun. Long dispela rot ol arapela sipsip bai “kamap gutpela tru” long skin na long tingting.—KTH 22:1, 2.
18. (a) Ol tok bilong Baibel i helpim ol arapela sipsip long save long wanem samting? (b) Ol arapela sipsip i wet long ‘ol pikinini bilong God i kamap ples klia,’ na ol i tingting na wet long wanem taim?
18 Olgeta dispela samting i mas helpim ol arapela sipsip long save long as na Ol Skripsa Grik i mekim bikpela tok long Krais na ol brata bilong em, na long wok bilong ol insait long ol samting bilong kamapim laik bilong Jehova. Olsem na ol arapela sipsip i amamas tru long helpim lain wokboi God i bin makim, na ol i wet long ‘ol pikinini bilong God i kamap ples klia’ long taim bilong Armagedon na Wan Tausen Yia. Ol i wetim taim ol i ken lusim ‘kalabus bilong bagarap nau olgeta samting i stap long en, na stap gutpela tru olsem ol pikinini bilong God.’—Rom 8:19-21.
Ol i Stap Wanbel Wantaim Long Memorial
19. “Spirit bilong tok tru” i bin mekim wanem bilong helpim ol man God i bin makim, wantaim ol poroman bilong ol? Long nait bilong Mas 28, olsem wanem ol bai pas gut tru wantaim?
19 Long laspela beten em i mekim long nait bilong Nisan 14, 33 C.E., Jisas i tok: “Mi laik bai dispela olgeta man i ken i stap wanbel, olsem yu Papa, yu stap long mi na mi stap long yu. Olsem tasol mi laik bai ol i ken i stap long mitupela, na bai ol manmeri bilong graun i ken bilip olsem yu bin salim mi na mi kam.” (Jon 17:20, 21) God i laikim tru ol manmeri, olsem na em i salim Pikinini bilong em i kam bambai em i ken i dai bilong kisim bek ol man God i bin makim, wantaim olgeta narapela manmeri i bihainim tok. (1 Jon 2:2) “Spirit bilong tok tru” i bin helpim ol brata bilong Krais na ol arapela sipsip long i stap wanbel. Long nait bilong Mas 28, taim san i go daun pinis, tupela lain bai bung wantaim bilong tingim i dai bilong Krais na tingim olgeta samting Jehova i bin helpim ol long en long rot bilong ofa bilong gutpela Pikinini bilong em, Krais Jisas. Mipela i laik bai taim ol i bung long dispela bikpela miting, dispela i ken strongim pasin wanbel i stap namel long ol na strongim tingting bilong ol long mekim yet laik bilong God, na long dispela rot ol i ken kamapim long ples klia olsem ol i amamas long stap insait long dispela lain Jehova i laikim tru.
Sampela Askim
• Wanem taim “Spirit bilong tok tru” i bin go long ol Kristen bilong pastaim? Em i “helpim” ol olsem wanem?
• Ol Kristen God i makim, olsem wanem ol i save em i bin singautim ol bilong i go long heven?
• Spirit bilong God i helpim ol arapela sipsip long wanem ol rot?
• Olsem wanem ol arapela sipsip i bin mekim gut long ol brata bilong Krais? I gat wanem as na ol i ‘no ken kamap gutpela tru paslain’ long ol Kristen God i bin makim?
[Piksa long pes 21]
“Spirit bilong tok tru” i kapsait long ol disaipel long Pentikos 33 C.E.
[Ol Piksa long pes 23]
Ol arapela sipsip i bin helpim ol brata bilong Krais long mekim wok bilong autim tok God i bin givim long ol, na long dispela rot ol i bin mekim gut long ol