Tok Bilong Jehova i Gat Laip
Sampela Bikpela Tok Bilong Buk Jon
JON—“dispela disaipel Jisas i laikim tumas”—em i laspela man i raitim stori long Baibel long i stap na wok bilong Jisas. (Jo. 21:20) Jon i raitim pinis Gutnius bilong em long 98 C.E. samting, na planti stori em i raitim i no stap long tripela narapela Gutnius.
Gutnius aposel Jon i raitim i gat wanpela wok. Jon i stori long tok em i raitim olsem: “Tasol dispela tok mi raitim, em mi raitim bai yupela i ken bilip long Jisas em dispela man God i makim bilong kisim bek ol manmeri bilong en. Em i Pikinini Bilong God. Na sapos yupela i bilip, orait bai yupela i kisim laip long nem bilong em.” (Jo. 20:31) Tok bilong em i gutpela bilong helpim yumi.—Hi. 4:12.
‘LUKIM, EM I PIKININI SIPSIP BILONG GOD’
Taim Jon Bilong Baptais i lukim Jisas, em i tok: “Lukim. Em i Pikinini Sipsip Bilong God. Em i kam bilong rausim sin bilong olgeta manmeri bilong graun.” (Jo. 1:29) Taim Jisas i raun long Samaria, Galili, Judia, na long hap is bilong wara Jordan—em i autim tok na skulim ol man na mekim ol strongpela wok—na ‘planti manmeri i kam long em na i bilip long em.’—Jo. 10:41, 42.
Wanpela bikpela mirakel Jisas i wokim em taim em i kirapim bek Lasarus. Planti i bilip long Jisas taim ol i lukim man husat i bin i dai pinis na stap long matmat inap 4-pela de i kirap bek. Tasol ol hetpris na ol Farisi ol i pasim tok long kilim Jisas i dai. Olsem na Jisas i “lusim dispela ples na em i go i stap klostu long ples i no gat man, long wanpela taun ol i kolim Efraim.”—Jo. 11:53, 54.
Bekim Bilong Ol Askim Bilong Baibel:
1:35, 40—Husat dispela narapela disaipel i sanap i stap wantaim Andru na Jon Bilong Baptais? Man i raitim Buk Jon, em i save kolim Jon Bilong Baptais olsem “Jon” na em i no save kolim nem bilong em yet insait long buk em i raitim. Olsem na dispela disaipel i sanap i stap wantaim Andru, em Jon, man bilong raitim Gutnius.
2:20—Wanem tempel ol i sanapim insait long “46 yia”? Ol Juda i toktok long tempel bilong Serubabel em King Herot bilong Judia i bin wokim. Saveman Josifas i tok ol i kirap wokim dispela tempel long namba 18 yia bilong Herot i stap king, em yia 18 na 17 B.C.E. Haus lotu na sampela arapela hap bilong tempel ol i wokim insait long 8-pela yia. Tasol wok bilong sanapim ol arapela haus samting i stap klostu long tempel i go inap long Pasova 30 C.E. na bihain liklik long en. Olsem na ol Juda i tok inap 46 yia ol i bin mekim wok bilong sanapim dispela tempel.
5:14—Yu ting man i kisim sik long wanem em i bin mekim sin? I no olsem long olgeta taim. Man Jisas i bin oraitim em i bin sik inap 38 yia, long wanem, sin i stap long skin bilong em. (Jo. 5:1-9) Jisas i marimari long dispela man na em i oraitim em, olsem na dispela tok bilong Jisas i makim olsem dispela man i mas mekim ol samting na bai God i ken kisim bek em na long laik bilong em yet em i no ken mekim sin moa, nogut bikpela hevi moa yet i kamap long em. Olsem: Em inap mekim wanpela sin God i no inap lusim tingting long en na em i mas i dai na em bai i no inap kirap bek.—Mt. 12:31, 32; Lu. 12:10; Hi. 10:26, 27.
5:24, 25—Husat ol i ‘lusim dai pinis na nau ol i stap laip’? Jisas i toktok long ol man husat i dai long ol samting bilong spirit tasol taim ol i harim tok bilong em, ol i bilip long em na ol i lusim pasin nogut. Ol i no kalabus moa long dai na i olsem ol i ‘lusim dai na nau ol i stap laip,’ na ol inap kisim laip oltaim, long wanem, ol i bilip long God.—1 Pi. 4:3-6.
5:26; 6:53—Wanem mining bilong dispela tok ‘i gat laip long em yet’? Long Jisas Krais dispela i makim olsem em i kisim strong long God bilong mekim tupela samting—em inap opim rot bilong ol man long kisim gutpela nem long ai bilong Jehova na em i kisim strong bilong givim laip long rot bilong kirapim bek ol man i dai pinis. Taim dispela ves i toktok long ol disaipel bilong Jisas olsem ol i gat ‘laip long ol yet’ dispela i makim olsem ol i kisim laip tru, olsem laip i stap oltaim. Ol Kristen God i bin makim, ol i kisim dispela laip taim ol i dai na kirap bek na i go long heven. Ol man i kisim laip long graun ol bai i kisim laip tru taim ol i winim laspela traim em bai kamap bihain long Taim Bilong Wan Tausen Yia Bilong Krais i Stap King.—1 Ko. 15:52, 53; KTH 20:5, 7-10.
6:64—Yu ting Jisas i bin save olsem Judas Iskariot bai putim em long han bilong ol birua taim em i makim em long kamap aposel bilong em? Nogat. Tasol long 32 C.E., Jisas i tokim ol aposel bilong em: “Wanpela namel long yupela em i olsem wanpela spirit nogut.” Ating long dispela taim Jisas i luksave olsem Judas Iskariot i kirap long bihainim rot nogut.—Jo. 6:66-71.
Skul Yumi Kisim:
2:4. Jisas i laik helpim Maria long save olsem em i Pikinini Bilong God husat i baptais pinis, na em i mas harim tok bilong Papa bilong em long heven. Tru, Jisas i kirap nupela long mekim wok bilong em, tasol em i save long wok em i mas mekim, na indai bilong em olsem ofa i insait long dispela tu. Em i no inap larim Maria o narapela wanblut i pasim em long mekim laik bilong God, nogat. Yumi tu i mas i gat wankain strongpela laik long mekim wok bilong Jehova.
3:1-9. Pasin bilong Nikodemus, em wanpela hetman bilong ol Juda, i skulim yumi long tupela samting. Namba wan samting, taim Nikodemus i luksave olsem pikinini bilong wanpela kapenta em i wanpela tisa em God i bin salim i kam, Nikodemus i mekim pasin daun, skelim gut na kliagut long samting, na em i luksave olsem em i sot long save bilong God. Ol Kristen tru long nau, i mas mekim pasin daun. Namba tu samting, Nikodemus i no kamap disaipel taim Jisas i stap yet long graun. Ating em i pret long ol man, o em i laik holim yet namba bilong em insait long kaunsil bilong ol Juda, o ating em i laikim mani kago. Dispela i skulim yumi long wanpela bikpela samting: Yumi no ken larim ol kain samting olsem i pasim yumi long ‘karim diwai bilong yumi long olgeta de na bihainim em.’—Lu. 9:23.
4:23, 24. Bilong God i ken orait long lotu bilong yumi, lotu i mas i stret wantaim tok i tru i stap long Baibel na larim holi spirit i stiaim yumi.
6:27. Bilong “kisim kaikai i save stap oltaim” dispela i makim olsem yumi mas wok strong long inapim laik bilong yumi long kisim save long God. Taim yumi mekim olsem bai yumi amamas tru.—Mt. 5:3.
6:44. Jehova i save tingim yumi wan wan. Long rot bilong wok autim tok na holi spirit, Jehova i bringim yumi i go klostu long Pikinini bilong em na em i helpim yumi long kliagut na bihainim tok i tru bilong Baibel.
11:33-36. Taim yumi kamapim bel bilong yumi dispela i no makim olsem yumi no gat strong, nogat.
‘WOK OLTAIM LONG BIHAINIM EM’
Taim Pasova bilong 33 C.E. i kam klostu, Jisas i go bek long Betani. Long Nisan 9, em i sindaun antap long wanpela yangpela donki na i go insait long Jerusalem. Long Nisan 10, Jisas i go insait long tempel gen. Em i beten olsem ol man i mas givim biknem long nem bilong Papa bilong em, na wanpela nek long heven i tok: “Mi mekim nem bilong mi i kamap bikpela pinis, na bai mi mekim olsem gen.”—Jo. 12:28.
Taim ol i mekim Pasova i stap, Jisas i givim tok long ol disaipel bilong em na i beten long ol, long wanem, em bai lusim ol. Ol i arestim em, kotim em, na hangamapim em long diwai na kilim em i dai, na bihain em i kirap bek.
Bekim Bilong Ol Askim Bilong Baibel:
14:2—Olsem wanem Jisas i “redim ples” bilong ol gutpela disaipel bilong em long heven? Bilong mekim olsem Jisas i strongim nupela kontrak taim em i kamap long ai bilong God na i givim pe bilong blut bilong em long God. Wok king em Krais i kisim, dispela tu i insait long dispela wok bilong redim ples. Bihain long dispela, kirap bek bilong ol man God i bin makim bilong i go long heven i stat long kamap.—1 Te. 4:14-17; Hi. 9:12, 24-28; 1 Pi. 1:19; KTH 11:15.
19:11—Taim Jisas i stori long Pailat long man i bin givim Em long ol birua, yu ting em i toktok long Judas Iskariot? Jisas i no kolim stret nem bilong Judas o ol arapela, i luk olsem Jisas i tingim olgeta man husat i gat asua long kilim em i dai. Dispela i makim Judas, “ol bikpris wantaim olgeta kaunsil,” na “ol manmeri” em ol bikpris na ol hetman i kirapim bel bilong ol long singaut long Pailat i mas rausim Barabas long kalabus.—Mt. 26:59-65; 27:1, 2, 20-22.
20:17—Bilong wanem Jisas i tokim Maria bilong Makdala long no ken holim em? Maria i holim Jisas, long wanem, em i ting olsem Jisas bai i go long heven na em bai i no inap lukim Jisas gen. Bilong mekim gut bel bilong Maria olsem em i no inap i go yet, Jisas i tokim em long no ken holim em, tasol em i mas i go na tokim ol disaipel olsem Jisas i kirap bek pinis.
Skul Yumi Kisim:
12:36. Bilong i stap olsem “pikinini bilong lait,” yumi mas kisim stretpela save long Tok Bilong God, em Baibel. Orait yumi mas mekim wok long dispela save bilong helpim ol arapela long lusim tudak bilong spirit na kam insait long lait bilong God.
14:6. Long rot bilong Jisas tasol bai God i orait long yumi, i no gat narapela rot. Long rot bilong bilip long Jisas na bihainim pasin bilong em bai yumi inap go klostu long Jehova.—1 Pi. 2:21.
14:15, 21, 23, 24; 15:10. Pasin bilong bihainim laik bilong God bai helpim yumi long i stap long laikim bilong God na Pikinini bilong em.—1 Jo. 5:3.
14:26; 16:13. Holi spirit bilong Jehova i stap olsem tisa na em i save helpim yumi long tingim bek ol samting yumi bin lainim long bipo. Na tu, em i save kamapim tok i tru. Olsem na em inap helpim yumi long kisim gutpela tingting na save, pasin bilong skelim gut ol samting, na pasin bilong tingting gut. Olsem na yumi mas beten oltaim na askim God long givim yumi holi spirit.—Luk 11:5-13.
21:15, 19. Jisas i askim Pita olsem em i laikim em moa winim “ol arapela samting” [ futnot long John sapta 21 ves 15]. Dispela “ol arapela samting” i makim ol pis em nau tasol ol i kisim. Jisas i mekim dispela tok, long wanem, em i laik strongim Pita long bihainim em na i no long mekim wok bilong kisim ol pis. Taim yumi skelim pinis ol Gutnius, yumi mas tingting strong long laikim Jisas moa winim ol arapela samting i laik pulim yumi. Yes, yumi mas givim bel olgeta long bihainim em.
[Piksa long pes 31]
Yumi inap lainim wanem samting long pasin bilong Nikodemus?