Stap Gut Long Mekim Wok Bilong King, Krais Jisas

“Man bilong bipo bipo yet i mekim em i kamap king na i givim em strong na biknem. . . . Na olgeta manmeri bilong olgeta kantri na olgeta lain na olgeta tok ples bai i stap aninit long en.”​—⁠DANIEL 7:⁠14.

1, 2. Olsem wanem yumi save Krais i no bin kisim olgeta strong bilong bosim Kingdom long 33 C.E.?

WANEM bikman inap lusim laip bilong em bilong helpim ol man i stap aninit long em na bihain kisim laip gen na stap king bilong ol? Wanem king inap stap laip long graun na kirapim ol man long bilip na stap gut long em na bihain em i stap king long heven na bosim ol? I gat wanpela man tasol inap mekim ol dispela samting​—⁠na planti samting moa​—⁠em Jisas Krais. (Luk 1:​32, 33) Long Pentikos 33 C.E., bihain long Krais i dai, kirap bek, na i go long heven, God i putim em olsem “het bilong sios.” (Efesus 1:​20-22; Aposel 2:​32-36) Olsem na Krais i kirap mekim hap wok bilong em long bosim ol samting. Pastaim em i bosim ol Kristen God i bin makim, em ol Israel bilong spirit, olsem “Israel tru bilong God.”​—⁠Galesia 6:16; Kolosi 1:⁠13.

² Klostu 30 yia bihain long Pentikos 33 C.E., tok bilong aposel Pol i kamapim klia olsem Krais i no kisim yet olgeta strong bilong bosim Kingdom. Em i tok Krais “i sindaun long han sut bilong God na em i wetim taim bilong God i putim ol birua bilong en i stap aninit long en.” (Hibru 10:​12, 13) Orait, klostu long 96 C.E., long rot bilong driman, lapun aposel Jon i lukim samting bai kamap bihain. Em i lukim King Bilong Heven na Graun, Jehova, i putim Krais Jisas i stap King bilong nupela Kingdom long heven. (KTH 11:15; 12:​1-5) Long nau yumi inap lukim ol samting i bin kamap bipo, na yumi inap lukim planti samting i makim olsem Krais i kamap King Mesaia na em i kirap mekim wok king long heven long 1914.a

 3. (a) Kirap long 1914, i gat wanem nupela samting i gutpela tru i kamap long gutnius bilong Kingdom? (b) Yumi ken givim wanem ol askim long yumi yet?

³ Yes, kirap long 1914 i gat nupela samting i gutpela tru i kamap long gutnius bilong Kingdom. Kirap long 1914, Krais i wok long mekim wok bos olsem King bilong Kingdom Bilong God long heven, na em i mekim “namel long ol birua bilong [em].” (Song 110:​1, 2, NW; Matyu 24:14; KTH 12:​7-12) Na tu, long olgeta hap, ol man husat i stap aninit long em, ol i amamas tru long daun long em long rot bilong insait long wanpela bikpela wok bilong skulim ol man long Baibel, em kain bikpela wok olsem i no bin kamap bipo. (Daniel 7:​13, 14; Matyu 28:18) Ol Kristen God i bin makim, “ol pikinini bilong kingdom,” ol i stap olsem “ol ambasedo long nem bilong Krais.” Lain “arapela sipsip” bilong Krais i go bikpela tru na ol i stap gut long wok bilong sapotim ol Kristen God i bin makim. Na ol i stap olsem ol helpim bilong ol ambasedo bilong Kingdom Bilong God. (Matyu 13:​38, NW; 2 Korin 5:​20, NW; Jon 10:16) Tasol maski i olsem, yumi wan wan i mas skelim gut, yumi daun tru long wok bos bilong Krais o nogat? Yumi strong tru long bihainim em? Yumi ken mekim wanem bilong soim olsem yumi stap gut long wanpela King i stap long heven na i bosim graun? Pastaim yumi laik stori long ol as na yumi stap gut long Krais.

King i Save Kirapim Ol Man Long Bihainim Em

 4. Jisas i bin mekim wanem wok taim em i stap hia long graun olsem Man God i Makim Bilong Kamap King?

⁴ As na yumi i stap gut long Krais em yumi pilim tru ol gutpela pasin bilong em na ol samting em i bin mekim. (1 Pita 1:⁠8) Taim Jisas i stap long graun olsem Man God i Makim Bilong Kamap King, ol samting em i bin mekim i kamapim klia ol bikpela wok em bai mekim long olgeta hap bilong graun taim em i wok King long taim God i makim. Em i givim kaikai long ol man i hangre. Em i oraitim ol sikman, ol aipas, ol hanlek i bagarap, ol yaupas, na ol mauspas. Na tu, em i bin kirapim bek sampela man i dai pinis. (Matyu 15:​30, 31; Luk 7:​11-16; Jon 6:​5-13) Na tu, taim yumi save long laip bilong Jisas hia long graun, dispela i save helpim yumi save long ol pasin em bai mekim taim em i stap King bilong graun long bihain​—⁠nambawan pasin bilong em, em pasin bilong laikim tru ol arapela na daunim laik bilong em yet. (Mak 1:​40-45) Napoléon Bonaparte i bin tok long dispela samting, olsem: “Aleksander, Sisar, Charlemagne, na mi yet, mipela i bin kamapim ol bikpela kingdom. Tasol mipela i kamapim olsem wanem? Long rot bilong pait. Jisas Krais tasol i bin kamapim kingdom bilong em long rot bilong pasin laikim, na long nau tu, planti milion man i redi long i dai bilong bihainim em.”

 5. Bilong wanem ol man i laikim Jisas?

⁵ Jisas i save mekim pasin isi na i save daunim em yet, olsem na ol man i karim ol bikpela hevi i save kisim nupela strong long ol tok em i lainim ol long en na long pasin helpim bilong em. (Matyu 11:​28-30) Ol pikinini i no pret long stap wantaim em. Ol man i gat pasin daun na gutpela tingting ol i laik tru long kamap disaipel bilong em. (Matyu 4:​18-22; Mak 10:​13-16) Pasin bilong em long tingim gut ol narapela na givim rispek long ol i mekim na planti meri, em ol i pret long God, ol i givim taim, strong, na mani samting bilong lukautim em taim em i mekim wok bilong em.​—⁠Luk 8:​1-3.

 6. Taim Lasarus i dai Jisas i bin pilim olsem wanem?

⁶ Taim gutpela poroman bilong em Lasarus i dai, Jisas i bin kamapim ol samting em i pilim long bel. Maria na Marta i bel hevi tru na dispela i mekim na Jisas tu i bel hevi na em “i krai.” Bel bilong em i “sori tru”​—⁠em i pilim bikpela bel hevi na bel sori tru​—⁠maski em i save olsem liklik taim em bai kirapim bek Lasarus. Orait nau pasin laikim na pasin sori i kirapim em long yusim namba God i givim em long kirapim bek Lasarus.​—⁠Jon 11:​11-15, 33-35, 38-44.

 7. Bilong wanem i stret yumi stap gut long Jisas? (Lukim tu blok long pes 31.)

⁷ Yumi pilim tru pasin bilong Jisas long laikim tru stretpela pasin na pasin bilong em long no laikim tru pasin bilong tupela maus na pasin nogut. Tupela taim em i mekim strongpela wok long rausim long tempel ol bisnisman i gat pasin mangal. (Matyu 21:​12, 13; Jon 2:​14-17) Na tu, taim em i stap man hia long graun, kain kain hevi i painim em, na dispela i helpim em long pilim tru ol hevi i save painim yumi. (Hibru 5:​7-9) Na tu, Jisas i save man i pilim olsem wanem taim ol narapela i birua long em na i mekim pasin i no stret long em. (Jon 5:​15-18; 11:​53, 54; 18:38–19:16) Bihain, em i larim ol man i givim bikpela pen long em na em i dai bilong inapim laik bilong Papa bilong em na bilong givim laip oltaim long ol man i stap aninit long em. (Jon 3:16) Ol kain gutpela pasin bilong Krais i kirapim yu long bihainim em tru, a? (Hibru 13:8; KTH 5:​6-10) Tasol man i mas mekim wanem bilong stap aninit long King, Krais Jisas?

Winim Mak Bilong Stap Aninit Long Krais

 8. Man i mas winim wanem ol mak bilong i stap aninit long Krais?

⁸ Skelim dispela tupela samting: Taim man i laik kamap man bilong narapela kantri olsem sitisen, i gat sampela mak em i mas winim pastaim. Ol man i laik kamap sitisen i mas bihainim stretpela pasin na no gat sik samting. Na olsem tasol, ol man i laik i stap aninit long Krais ol i mas strong long bihainim ol stretpela pasin na stap strong long ol samting bilong lotu.​—⁠1 Korin 6:​9-11; Galesia 5:​19-23.

 9. Yumi ken mekim wanem bilong kamapim olsem yumi stap gut long Krais?

⁹ Jisas Krais i laik bai ol man i stap aninit long em ol i mas stap gut long em na long Kingdom bilong em. Ol i kamapim dispela pasin taim ol i bihainim ol tok em i bin skulim ol man long en taim em i stap hia long graun olsem Man God i Makim Bilong Kamap King. Olsem: Ol i tingim ol samting bilong Kingdom na laik bilong God paslain long mani kago samting. (Matyu 6:​31-34) Na ol i wok hat long bihainim pasin bilong Krais, maski sampela taim em i hatwok tru long mekim olsem. (1 Pita 2:​21-23) Na tu, ol man i aninit long Krais i bihainim pasin bilong em taim ol i go pas long mekim gut long ol narapela.​—⁠Matyu 7:12; Jon 13:​3-17.

10. Olsem wanem yumi ken kamapim pasin bilong stap gut long Krais insait long (a)  famili na (b) long kongrigesen?

¹⁰ Ol disaipel bilong Jisas i kamapim pasin bilong i stap gut long em taim ol i kamapim ol pasin bilong em insait long famili. Olsem: Ol man marit i kamapim pasin bilong i stap gut long King bilong ol taim ol i bihainim pasin bilong Krais long ol samting ol i mekim long meri pikinini bilong ol. (Efesus 5:​25, 28-30; 6:4; 1 Pita 3:⁠7) Ol meri marit i kamapim pasin bilong stap gut long Krais taim ol i bihainim klinpela pasin na ‘i stap belgut na bel isi.’ (1 Pita 3:​1-4; Efesus 5:​22-24) Ol pikinini i stap gut long Krais taim ol i bihainim pasin bilong em long harim tok. Taim Jisas i pikinini em i stap daun long papamama, maski ol i no gutpela olgeta. (Luk 2:​51, 52; Efesus 6:⁠1) Ol man i aninit long Krais i wok long bihainim em taim ol i “sori long olgeta man” na “laikim tru ol arapela manmeri bilong God.” Ol i wok strong long bihainim pasin bilong Krais, ol i ‘lusim pasin bikhet, na ol i no bekim pasin nogut na tok nogut ol narapela i mekim long ol.’​—⁠1 Pita 3:​8, 9; 1 Korin 11:⁠1.

Bihainim Ol Lo Bilong Em

11. Ol man i aninit long Krais i mas daun long wanem ol lo?

¹¹ Ol man i laik kamap sitisen bilong wanpela kantri i mas bihainim ol lo bilong dispela kantri, olsem tasol ol man i aninit long Krais i mas daun long “lo bilong Krais” long rot bilong bihainim ol tok Jisas i bin skulim ol man long en. (Galesia 6:⁠2) Na wanpela bikpela lo ol i mas bihainim tru em lo bilong “laikim tru ol arapela man.” (Jems 2:⁠8) Wanem samting i insait long ol dispela lo?

12, 13. Olsem wanem yumi save bihainim tru “lo bilong Krais”?

¹² Ol man i aninit long Krais ol i no gutpela olgeta. (Rom 3:23) Olsem na ol i mas wok long kamapim pasin bilong “laikim tru ol arapela manmeri bilong God” na bai ol i ken ‘laikim ol na givim bel bilong ol olgeta long ol.’ (1 Pita 1:22) Na “sapos wanpela . . . i gat tok long narapela brata,” orait ol Kristen i save bihainim lo bilong Krais na ol i “karim dispela hevi na lusim sin bilong dispela brata.” Pasin bilong bihainim dispela lo i save helpim ol na ol i no wok long tingim ol popaia bilong ol narapela, nogat, ol bai tingim ol samting i kirapim ol long laikim tru narapela narapela. Yumi save amamas tru long stap wantaim ol man husat i bihainim tru pasin bilong daun long gutpela King bilong yumi, na ol i putim pasin laikim olsem klos, em dispela pasin i save “mekim ol man i stap wanbel.”​—⁠Kolosi 3:​13, 14; NW.

¹³ Jisas i bin stori gut olsem dispela pasin laikim em i kamapim em i bikpela samting, winim pasin laikim ol man i save kamapim long ol narapela. (Jon 13:​34, 35) Sapos yumi laikim tasol ol man i laikim yumi, orait pasin laikim bilong yumi i no “winim” pasin laikim bilong ol arapela man. Sapos yumi mekim olsem, pasin laikim bilong yumi i sot. Jisas i kirapim yumi long bihainim pasin laikim bilong Papa bilong em na laikim ol birua husat i no laikim yumi na ol i mekim nogut long yumi. (Matyu 5:​46-48) Dispela kain pasin laikim i save kirapim ol man i aninit long Kingdom long stap gut long nambawan wok bilong ol. Em wanem wok?

Ol Bai Stap Gut Long Em o Nogat?

14. Bilong wanem wok bilong autim tok em i bikpela samting tru?

¹⁴ Ol man i stap aninit long Kingdom Bilong God i gat bikpela wok long autim gut tru “tok bilong kingdom bilong God.” (Aposel 28:23) Dispela em i bikpela samting, long wanem, Kingdom Bilong Mesaia bai kamapim klia olsem i stret Jehova i bosim heven na graun. (1 Korin 15:​24-28) Taim yumi autim gutnius, ol man i harim i gat rot long kamap man i aninit long Kingdom Bilong God. Na tu, pasin ol man i mekim taim ol i harim gutnius i as bilong kot King, Krais Jisas bai mekim. (Matyu 24:14; 2 Tesalonaika 1:​6-10) Olsem na wanpela bikpela rot we yumi kamapim olsem yumi stap gut long Krais em long pasin bilong bihainim tok bilong em long tokim ol narapela man long Kingdom.​—⁠Matyu 28:​18-20.

15. Bilong wanem traim i save kamap long pasin bilong ol Kristen long i stap gut long God?

¹⁵ Tasol long kain kain rot Satan i save birua long wok bilong autim tok, na ol bikman bilong ol gavman ol i no daun long namba God i givim long Krais. (Song 2:​1-3, 6-8) Olsem na Jisas i bin tok lukaut long ol disaipel olsem: “Wokboi i no winim bikman bilong en. Sapos ol i bin mekim nogut long mi, orait ol bai i mekim nogut long yupela tu.” (Jon 15:20) Olsem na ol disaipel bilong Krais ol i insait long wanpela pait wantaim ol ensel nogut na dispela i save traim pasin bilong ol long i stap gut long God.​—⁠2 Korin 10:​3-5; Efesus 6:​10-12.

16. Olsem wanem ol man i stap aninit long Kingdom i save givim ‘samting bilong God i go long God’?

¹⁶ Tasol maski i olsem, ol man i stap aninit long Kingdom Bilong God ol i save stap gut long King bilong ol na long seim taim ol i soim rispek long ol gavman bilong graun. (Taitus 3:​1, 2) Jisas i tok: “Samting bilong Sisar, . . . givim long Sisar. Na samting bilong God, . . . givim long God.” (Mak 12:​13-17) Olsem na ol man i aninit long Krais i save bihainim ol lo bilong gavman i no pait wantaim ol lo bilong God. (Rom 13:​1-7) Tasol taim bikpela kot bilong ol Juda i sakim lo bilong God na i tambuim ol disaipel bilong Jisas long autim tok, orait long pasin rispek ol disaipel i tokaut strong olsem ol i ‘mas bihainim tok bilong God tasol, tok bilong ol man, nogat.’​—⁠Aposel 1:8; 5:​27-32.

17. Bilong wanem yumi inap strongim bel na winim ol samting i traim pasin bilong yumi long i stap gut long God?

¹⁷ Ol man i stap aninit long Krais i mas i gat strongpela bel na bai ol i ken stap gut long King bilong ol taim ol man i biruaim ol. Jisas i tok: ‘Sapos ol i lukim yupela i stap long lain bilong mi, na ol i tok nogut long yupela na mekim nogut long yupela na sutim kain kain tok giaman long yupela, orait yupela i ken amamas, na belgut tru, long wanem, bikpela pe i wetim yupela long heven.’ (Matyu 5:​11, 12) Dispela samting i bin painim ol disaipel bilong Krais bilong pastaim. Maski ol birua i wipim ol bikos ol mekim yet wok bilong autim tok bilong Kingdom, ‘ol i amamas long God i ting ol inap long kisim sem long nem bilong Jisas. Na long olgeta de, ol i save go long tempel na long ol haus bilong ol man, na ol i wok long skulim ol man. Ol i no lusim dispela wok. Ol i tokaut klia olsem, Jisas em i man God i bin promis long salim bilong kisim bek ol man.’ (Aposel 5:​41, 42) Mipela i laik tok amamas long yupela olsem yupela i save kamapim wankain pasin bilong i stap gut long God taim yupela karim ol hevi, sik, bel hevi taim wanpela i dai, o taim ol man i birua long yupela.​—⁠Rom 5:​3-5; Hibru 13:⁠6.

18. Tok Jisas i mekim long Pontius Pailat i kamapim klia wanem samting?

¹⁸ Taim Jisas i stap yet long graun olsem Man God i Makim Bilong Kamap King, em i tokim Gavena Pontius Pailat: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait inap ol wokman bilong mi i pait, na i no gat wanpela man inap putim mi long han bilong ol Juda. Tasol kingdom bilong mi em i no bilong dispela graun.” (Jon 18:36) Olsem na ol man i stap aninit long Kingdom bilong heven i no save insait long ol pait na ol i no save sapotim wanpela lain i insait long pait. Ol i stap gut long “King bilong kamapim gutpela sindaun na bel isi,” olsem na ol i no insait liklik long ol pait bilong dispela graun.​—⁠Aisaia 2:​2-4; 9:​6, 7.

Gutpela Pe Bilong Ol Man i Stap Gut Long Krais

19. Bilong wanem ol man i aninit long Krais i ken save olsem ol gutpela samting bai kamap bihain?

¹⁹ Ol man i aninit long Krais, em “King bilong olgeta king,” ol i save gutpela samting bai kamap bihain. Ol i gat laik tru long lukim Krais i soim bikpela pawa bilong em, em samting klostu nau bai kamap. (KTH 19:11–20:3; Matyu 24:30) Ol liklik hap lain bilong ol “pikinini bilong kingdom” God i bin makim, em ol i bin stap gut long God, ol i tingim dispela gutpela wok tru ol bai kisim long i stap ol king wantaim Krais long heven. (Matyu 13:​38, NW; Luk 12:32) Ol “arapela sipsip” bilong Krais, ol tu ol i bin stap gut long God, ol i wetim King bilong ol long tokaut olsem: “Yupela i gat blesing bilong Papa bilong mi. . . . Yupela kam kisim [Paradais hia long graun aninit long] kingdom Papa i bin redim na makim bilong yupela pinis, long taim graun i kamap nupela yet.” (Jon 10:16; Matyu 25:34) Yumi laik bai olgeta man husat i stap aninit long Kingdom i mas strong long stap gut long mekim wok bilong King, Krais Jisas.

[Futnot]

Yu Inap Stori Long Dispela?

• Bilong wanem i stret yumi stap gut long Krais?

• Olsem wanem ol man i aninit long Krais i save kamapim pasin bilong ol long stap gut long em?

• Bilong wanem yumi laik i stap gut long King, Krais Jisas?

[Blok long pes 31]

SAMPELA GUTPELA PASIN BILONG KRAIS

Mekim wankain pasin long olgeta​—⁠Jon 4:​7-30.

Pasin sori​—⁠Matyu 9:​35-38; 12:​18-21; Mak 6:​30-34.

Daunim laik bilong em yet​—⁠Jon 13:1; 15:​12-15.

Pasin bilong stap gut long narapela​—⁠Matyu 4:​1-11; 28:20; Mak 11:​15-18.

Pilim hevi bilong narapela​—⁠Mak 7:​32-35; Luk 7:​11-15; Hibru 4:​15, 16.

Isi long ol man​—⁠Matyu 15:​21-28.

[Piksa long pes 29]

Taim yumi laikim ol narapela, long dispela rot yumi daun long “lo bilong Krais”

[Ol Piksa long pes 31]

Olsem wanem? Ol pasin bilong Krais i save kirapim yu long stap gut long mekim wok bilong em?