‘Tupela i Kalap Long Sip i Go Long Saiprus’
LONG dispela tok Buk Aposel i kirapim stori bilong ol samting i bin painim ol misineri Kristen, em Pol, Barnabas, na Jon Mak taim ol i go long Saiprus long yia 47 C.E. samting. (Aposel 13:4) Long dispela taim bipo, olsem long nau, dispela ples em Saiprus i stap long en long isten Mediterenian em i bikpela samting tru.
Ol Rom i mangalim tru dispela ailan, na ol i kisim long 58 B.C.E na bosim. Paslain long dispela taim, planti bikpela samting i bin kamap long Saiprus. Planti kantri i bin kisim na bosim dispela ailan, olsem ol Fonisia, Grik, Asiria, Persia, na Isip. Sampela handet yia bihain, ol Kruseda, ol Frank, na ol Venisia i kisim na bosim, na bihain ol Otoman i kisim. Long 1914, Inglan i kisim na bosim Saiprus i go inap long taim em i kisim independens long 1960.
Long nau, namba wan rot bilong Saiprus long kisim mani, em ol turis, tasol long taim bilong Pol, dispela ailan i gat planti kopa samting na long dispela rot gavman Rom i bin kisim bikpela mani tru. Long bipo yet ol i bin painim kopa, na ol i tok ol Rom i bin kisim kopa inap olsem 250,000 ton. Tasol dispela wok i pinisim bikpela hap tru bilong bikbus em ol i katim bilong kukim kopa. Taim Pol i kamap long dispela ailan, klostu olgeta bikbus i pinis.
Saiprus Aninit Long Gavman Rom
Encyclopædia Britannica i tok, Julius Sisar i bin givim Saiprus long Isip, na bihain Mak Antoni i givim gen. Tasol long taim bilong Ogastus, gavman Rom i kisim bek Saiprus na namba wan gavman aninit long Rom, em Sergius Paulus, em i bosim Saiprus, olsem man bilong raitim Buk Aposel, em Luk, i tok, na tok bilong em i stret tru. Sergius Paulus i stap namba wan gavman taim Pol i autim tok long dispela hap.—Aposel 13:7.
Wanpela lo Rom i bin putim long olgeta hap em i bosim, ol i kolim Gutaim Bilong Ol Rom (Pax Romana), em i givim rot long ol bikpela bisnis olsem kopa main samting na ol narapela bisnis i ken kamap long Saiprus, na dispela i mekim na planti wok bisnis i kamap. Na ol Saiprus i kisim mani tu long rot bilong ol ami bilong Rom i stap long dispela hap na ol bikpela lain i save kam bilong mekim lotu long Afrodaiti, em god bilong dispela ailan. Olsem na ol i wokim ol nupela rot, na bris long ol pasis, na ol naispela haus bung samting. Tok Grik i stap yet olsem tok ples bilong dispela ailan, na planti man i save lotuim Afrodaiti, Apolo, Sus, na king bilong Rom tu. Ol manmeri i gat planti mani na gutpela sindaun na planti kain skul na amamas samting.
Em dispela kain pasin i stap taim Pol i raun long Saiprus na skulim ol man long Krais. Tasol taim Pol i no kam yet long dispela ailan, lotu Kristen i kamap pinis long en. Stori bilong Buk Aposel i soim yumi, taim ol i kilim i dai disaipel Kristen, Stiven, sampela Kristen bilong pastaim ol i ranawe i go long Saiprus. (Aposel 11:19) Poroman bilong Pol, em Barnabas, em i man bilong Saiprus na em i save gut long dispela ailan, olsem na yumi ken save em i bin soim gut rot long Pol taim em i mekim raun bilong em long autim tok.—Aposel 4:36; 13:2.
Bihainim Wokabaut Bilong Pol
I hatwok liklik long save gut long ol rot Pol i bin wokabaut long en taim em i raun long Saiprus. Tasol ol saveman bilong digim graun na painim ol samting bilong bipo ol i save, long taim bilong ol Rom i gat planti gutpela rot ol i bin wokim. Ol maunten na wara samting bilong ailan i mekim na ol bikrot bilong nau i save bihainim ol wankain rot ol dispela misineri bilong pastaim i bin wokabaut long en.
Pol, Barnabas, na Jon Mak ol i kisim sip long Selusia na i go long Salamis. Tasol Pafos em nambawan biktaun bilong en i gat bikpela pasis, olsem na bilong wanem ol i go long Salamis? Wanpela as i olsem, Salamis i stap long hap bilong is, klostu tasol long Selusia inap olsem 200 kilomita. Pastaim Salamis em i nambawan biktaun, tasol ol Rom i senisim na makim Pafos, tasol Salamis i stap yet olsem ples i gat ol bikpela skul na kain samting olsem, na ples bilong ol bikpela bisnis. I gat planti Juda i sindaun long Salamis, na ol misineri “i go long ol haus lotu bilong ol Juda na autim tok bilong God.”—Aposel 13:5.
Long nau ol hip pipia ston tasol bilong Salamis i stap. Tasol ol samting ol saveman i bin painim i kamapim klia olsem bipo dispela taun i gat biknem na planti bisnis na mani samting. Ples maket, em ol lain i save bung long en na toktok long ol samting bilong politik na lotu, ol i ting em i nambawan bikpela ples maket bilong ol Rom ol man bilong digim graun ol i bin painim long hap bilong Mediterenian. Ol pipia ston bilong en ol i bin painim i bilong taim bilong Sisar Ogastus, na ol i gat ol naispela plua ol i bin wokim ol gutpela piksa long en long ol liklik ston, na ol bikpela haus bilong mekim olkain spot, na planti haus waswas i gutpela tru, na wanpela stediam na traipela ples bilong sindaun na lukim ol spot, ol naispela matmat, na wanpela bikpela haus bung em 15,000 manmeri ol i ken sindaun long en. Klostu long en i gat ol pipia ston bilong wanpela bikpela haus lotu bilong Sus.
Tasol Sus i no inap pasim ol bikpela guria long bagarapim Salamis. Long 15 B.C.E. wanpela traipela guria i kamap na i bagarapim tru Salamis, tasol bihain Ogastus i wokim gen. Bihain narapela guria i bagarapim gen taun long yia 77 C.E. na ol i wokim gen. Inap 300 yia samting bihain long Krais, sampela guria i bagarapim tru Salamis na bihain em i no kamap moa olsem biktaun i gat planti mani samting na biknem. Sampela handet yia bihain, wesan i pulap long pasis bilong en na ol i no mekim wok moa long en.
Ol lain bilong Salamis i bin bilipim tok bilong Pol o nogat, em Baibel i no tok. Tasol Pol i mas autim tok long ol narapela lain tu. Ol dispela misineri i lusim Salamis na ol inap bihainim 3-pela rot: wanpela i bihainim nambis i go long hap not na ol i mas brukim kil bilong maunten Kyrenia; narapela rot i go long hap wes na i brukim stretpela ples bilong Mesaoria na i go brukim bikpela hap bilong ailan; na namba 3 rot i bihainim nambis long hap saut.
Sampela stori bilong bipo i tok Pol i bin bihainim namba 3 rot. Dispela rot i brukim wanpela hap graun i gat gutpela gris na graun i retpela. Inap 50 kilomita moa i go long hap saut-wes, rot i go klostu long taun Larnaca na nau em i baut i go not na i go insait long ailan.
“Long Olgeta Hap Bilong Ailan”
I no longtaim na rot i go kamap long olpela taun Ledra. Long nau ol i wokim taun Nicosia long dispela hap, em nambawan biktaun bilong ailan. Nau i no gat sampela samting i stap bilong makim dispela olpela taun bilong bipo. Tasol insait long banis bilong taun em ol i bin wokim long yia 1500 samting na i raunim taun Nicosia, i gat wanpela liklik rot i stap em planti man i save go i kam long en, nem bilong en Ledra Strit. Pol i bin go long Ledra o nogat, em yumi no save. Baibel i tok tasol olsem ol i go “long olgeta hap bilong ailan.” (Aposel 13:6) Buk The Wycliffe Historical Geography of Bible Lands i tok “dispela tok i makim olsem Pol i raun long olgeta ples ol Juda i sindaun long en long Saiprus.”
Pol i gat laik tru long bungim planti manmeri long Saiprus. Olsem na ating em i bin bihainim wanpela rot i go long hap saut, kirap long Ledra na i go long Amathus na Kourion—em tupela traipela biktaun i gat planti manmeri long en.
Taun Kourion i stap antap tru long wanpela maunten ston i go daun stret long nambis daunbilo. Dispela naispela taun bilong ol Grik na Rom em i bin kisim bagarap long dispela guria i bin bagarapim Salamis long 77 C.E. I gat ol pipia ston bilong wanpela haus lotu ol i bin dediketim long god Apolo, em ol i wokim long yia 100 C.E. samting. Stediam bilong en i bikpela, inap long 6,000 man i ken sindaun long en. Planti manmeri long Kourion i gat gutpela sindaun tru na planti samting, na dispela i kamap klia long ol naispela piksa samting ol i wokim long ol liklik ston long plua bilong haus bilong ol man yet na ol narapela haus tu.
I Go Long Pafos
Lusim Kourion na i go moa, rot i go yet long hap wes na i brukim ol naispela hap ol i save planim rop wain long en, na isi isi rot i wok long go antap, na wantu rot i sut i go daun long maunten i go long hap bilong nambis em ol liklik ston i pulap long en. Ol stori nating bilong ol Grik i tok, long dispela hap stret, solwara i kamapim god meri Afrodaiti.
Ol Saiprus i laikim tumas Afrodaiti, winim ol narapela god bilong ol Grik, na ol i givim bel tru long lotuim em i go inap olsem wan handet yia samting bihain long Krais. Nambawan taun bilong lotuim Afrodaiti, em Pafos. Long olgeta yia, long taim bilong kol i pinis, ol i save wokim wanpela bikpela bung long dispela taun bilong litimapim nem bilong em. Ol manmeri long Esia Maina, Isip, Grik, na ol longwe ples olsem Persia, ol i save kam long Pafos bilong mekim dispela bung. Taim ol king bilong lain bilong Tolemi i bosim Saiprus, ol Saiprus i lain long pasin bilong lotuim ol king bilong Isip.
Pafos em nambawan biktaun bilong ol Rom long Saiprus, na namba wan gavman i sindaun long dispela ples na bosim ailan, na long dispela taun yet ol i save wokim ol mani bras. Pafos tu i kisim bagarap long bikpela guria i bin kamap long 15 B.C.E., na Ogastus i givim mani bilong wokim gen dispela taun, olsem em i bin mekim long Salamis. Ol samting ol saveman bilong digim graun i bin painim i kamapim klia gutpela sindaun tru bilong ol maniman bilong Pafos long taim bilong ol aposel—i gat ol bikpela rot bilong taun, na ol haus bilong ol man yet ol i gat planti gutpela bilas, na i gat ol skul bilong lain long musik, na ol haus bilong pilai spot insait long en, na wanpela bikpela ples olsem stediam bilong sindaun na lukim ol spot samting.
Taun Pafos i bin stap olsem long taim Pol, Barnabas na Jon Mak i kam raun long en, na long dispela hap yet, namba wan gavman Sergius Paulus—“em i man i gat gutpela tingting na save”—“em i laik harim tok bilong God,” maski Elimas, man bilong wokim marila posin, em i belhat nogut tru na i laik pasim em. Tingting bilong namba wan gavman “i kirap tru long tok bilong Bikpela.”—Aposel 13:6-12.
Ol dispela misineri i pinisim gut wok bilong ol long autim tok long Saiprus na ol i go mekim dispela wok long Esia Maina. Dispela namba wan raun bilong Pol long wok misineri em i bikpela samting tru long wok bilong bringim lotu Kristen tru i go long ol narapela hap. Buk St. Paul’s Journeys in the Greek Orient i tok “dispela em i kirap tru bilong wok Kristen na . . . bilong wok misineri bilong Pol.” Na buk i tok moa: “Saiprus i stap klostu long rot bilong ol sip i save go long Siria, Esia Maina, na Grik, olsem na yumi ken save long as na Pol i kirapim namba wan raun bilong wok misineri bilong em long dispela hap.” Tasol dispela em i kirap tasol bilong dispela wok. Inap olsem 2,000 yia bihain, wok misineri Kristen i stap yet, na yumi ken tok tru olsem gutnius bilong Kingdom Bilong Jehova i bin go kamap “long olgeta hap bilong graun.”—Aposel 1:8.
[Ol Mep long pes 20]
(Bilong save ol dispela rait i stap we long pes, lukim buk o magasin)
SAIPRUS
NICOSIA (Ledra)
Salamis
Pafos
Kourion
Amathus
Larnaca
OL MAUNTEN KYRENIA
STRETPELA PLES MESAORIA
OL MAUNTEN TROODOS
[Piksa long pes 21]
Holi spirit i pulap long Pol na long Pafos em i mekim na posinman Elimas i kamap aipas