Jop—Man Bilong Karim Hevi na Stap Gut Long God
“Yu lukim tu wokboi bilong mi, Jop, o nogat? Jop em i gutpela man tru na i no gat asua . . . Em i save lotu na aninit long mi . . . Em i no save mekim wanpela pasin nogut. Long olgeta hap bilong graun i no gat wanpela man i olsem em.”—JOP 1:8.
1, 2. (a) Wanem ol bikpela hevi i painim Jop? (b) Paslain long ol bikpela hevi i painim Jop, em i gat wanem kain sindaun?
I GAT wanpela man i bin stap husat i gat planti gutpela samting—mani kago, namba, gutpela helt, na famili bilong em i stap amamas. Tasol bihain, tripela bikpela hevi i painim em. Wantu olgeta mani kago bilong em i lus. Bihain liklik, narakain bikpela win i kilim i dai olgeta pikinini bilong em. I no longtaim na bikpela sik i kisim em na ol sua nogut i pulap long skin bilong em. Ating yu save pinis olsem dispela man em Jop, na stori bilong em i stap long wanpela buk bilong Baibel i gat nem bilong em.—Jop, sapta 1 na 2.
2 Jop i tok: “Sori tru, mi laikim tumas bai mi stap gut olsem bipo.” (Jop 3:3; 29:2) Taim bikpela hevi i kamap, ating yumi olgeta i laik stap gut olsem bipo yumi bin stap. Jop i bin wokabaut stret na i luk olsem ol hevi i no inap painim em. Ol bikman i rispektim em na askim em long givim gutpela tingting long ol. (Jop 29:5-11) Em i gat planti mani kago, tasol em i gat stretpela tingting long mani. (Jop 31:24, 25, 28) Taim em i lukim ol meri em man bilong ol i dai pinis o pikinini i no gat papamama em ol i sot long ol samting, em i helpim ol. (Jop 29:12-16) Na em i stap gut long poroman marit bilong em.—Jop 31:1, 9, 11.
3. Jehova i gat wanem tingting long Jop?
3 Jop i wokabaut stret, long wanem, em i lotuim God. Jehova i tok: “Jop em i gutpela man tru na i no gat asua . . . Em i save lotu na aninit long mi . . . Em i no save mekim wanpela pasin nogut. Long olgeta hap bilong graun i no gat wanpela man i olsem em.” (Jop 1:1, 8) Tasol maski Jop i save bihainim stretpela pasin, ol bikpela hevi i bagarapim gutpela sindaun bilong em. Olgeta samting em i bin wok strong long kisim ol i pinis, na bikpela pen na bel hevi i traim pasin bilong em, em i wanem kain man tru.
4. Taim yumi skelim ol hevi bilong Jop, olsem wanem dispela inap helpim yumi?
4 Tru, ol bikpela hevi i bin painim planti wokboi bilong God, i no Jop tasol. Planti Kristen long nau inap pilim ol hevi i bin painim Jop. Olsem na i gutpela long yumi skelim tupela askim: Taim yumi tingim ol hevi bilong Jop, olsem wanem dispela inap helpim yumi taim ol hevi i painim yumi? Na olsem wanem stori bilong Jop inap lainim yumi long pilim hevi bilong ol narapela?
Bikpela Tok na Traim Long Pasin Bilong Stap Gut Long God
5. Satan i tok i gat wanem as na Jop i mekim wok bilong God?
5 Stori bilong Jop i narapela kain. Jop i no save olsem Satan i sutim tok long em olsem i gat wanem as tru na em i mekim wok bilong God. Taim ol ensel i bung long heven, Jehova i stori long ol gutpela pasin bilong Jop, na Satan i bekim tok olsem: “Oltaim yu save lukaut gut long em na long famili bilong en na long olgeta samting bilong en.” Olsem na Satan i tok pasin bilong Jop long tingim em yet i kirapim Jop—na ol arapela wokboi bilong God—long mekim wok bilong God. Satan i tokim Jehova: “Sapos yu bagarapim na rausim dispela olgeta samting bilong en, orait bai yu lukim em i tok nogut tru long yu.”—Jop 1:8-11.
6. Satan i kamapim wanem bikpela tok?
6 Dispela em i wanpela bikpela tok. Satan i sutim tok long pasin bilong Jehova long mekim wok bos bilong em. Olsem wanem? Tru tru God inap bosim heven na graun long pasin laikim? O pasin bilong ol man long tingim ol yet bai win, olsem Satan i tok? Jehova i larim Satan i traim Jop, Jehova i bilip olsem wokboi bilong em bai stap gut long em. Olsem na Satan yet i kamapim ol bikpela hevi i painim Jop. Taim namba wan na namba tu hevi Satan i kamapim i no pundaunim Jop, orait Satan i givim bikpela sik long em. Satan i tok: “Sapos wanpela man i laik i stap gut, em inap givim olgeta samting bilong en bilong baim bek laip bilong en.”—Jop 2:4.
7. Wanem kain ol hevi i save painim ol wokboi bilong God long nau em ol i wankain liklik olsem ol hevi bilong Jop?
7 Ating ol Kristen long nau i no karim ol wankain bikpela hevi olsem Jop i bin karim, tasol ol bikpela hevi i save painim ol tu. Planti i gat hevi insait long famili o ol man i birua long ol. Hevi bilong mani o bikpela sik inap bagarapim bel. Sampela i bin dai, long wanem, ol i holimpas bilip bilong ol. Tru, yumi no ken ting Satan i kamapim olgeta wan wan hevi yumi karim. Ating as bilong sampela hevi em ol popaia bilong yumi yet o yumi kisim wanpela sik long rot bilong papamama samting. (Galesia 6:7) Na ol hevi bilong man i go lapun na ol bagarap em strongpela win ren samting i save kamapim i painim yumi olgeta. Baibel i kamapim klia olsem long nau Jehova i no save wokim mirakel na banisim ol wokman bilong em long ol dispela hevi.—Saveman 9:11.
8. Satan inap mekim wanem wok long ol hevi yumi karim?
8 Tasol Satan inap mekim wok long ol hevi yumi karim bilong bagarapim bilip bilong yumi. Aposel Pol i tok ‘wanpela samting olsem nil i sutim skin bilong em, em wokboi bilong Satan’ i wok long “mekim nogut” long em. (2 Korin 12:7) Maski dispela em i wanpela hevi bilong skin, olsem ai bilong em i no inap lukluk gut, o wanpela narapela hevi, Pol i save olsem Satan inap mekim wok long dispela hevi na bel hevi em sik samting i kamapim bilong bagarapim amamas na pasin bilong Pol long stap gut long God. (Sindaun 24:10) Long nau, Satan inap kirapim famili, ol wanskul, o ol gavman dikteta long mekim sampela pasin birua long ol wokboi bilong God.
9. Bilong wanem yumi no ken kirap nogut long ol hevi i painim yumi o ol man i birua long yumi?
9 Yumi ken mekim wanem bilong karim ol dispela hevi? Yumi ken ting ol hevi i opim rot long yumi ken kamapim klia olsem pasin bilong yumi long laikim tru Jehova na daun long wok bos bilong em i no save senis senis nating. (Jems 1:2-4) Maski wanem samting i as bilong hevi bilong yumi, tasol taim yumi kliagut long em i bikpela samting long stap gut long God, dispela bai helpim yumi long stap strong long pasin bilong lotuim Jehova. Aposel Pita i tokim ol Kristen: “Ol brata tru, wanpela traim olsem paia i wok long kamap long yupela. Tasol yupela i no ken kirap nogut na ting em i narakain samting tru i kamap long yupela. Nogat.” (1 Pita 4:12) Na Pol i tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Satan i wok yet long sutim tok long pasin bilong ol Witnes Bilong Jehova long stap gut long God, olsem em i bin mekim long Jop. Na Baibel i tok Satan i wok strong moa long bagarapim lain bilong God nau long dispela taim bilong las de.—KTH 12:9, 17.
Tingting Kranki na Sampela Tok Kranki
10. Jop i no save long wanem samting?
10 Jop i no save long as bilong ol hevi i painim em, tasol yumi no gat dispela hevi. Jop i popaia na ting olsem “Bikpela yet i bin givim mi olgeta samting, na nau em i rausim pinis ol dispela samting.” (Jop 1:21) Ating Satan i laik kirapim Jop long ting olsem God i as bilong ol hevi bilong em.
11. Jop i kisim wanem kain tingting taim ol hevi i painim em?
11 Jop i bel hevi tru, tasol em i no laik toknogutim God olsem meri bilong em i tokim em long mekim. (Jop 2:9, 10) Em i tok, ‘I luk olsem ol man nogut i stap gut, winim mi.’ (Jop 21:7-9) Ating em i tingting, ‘Bilong wanem God i givim strafe long mi?’ Sampela taim em i laik i dai tasol. Em i tok: “God, i gutpela sapos yu haitim mi long ples bilong ol man i dai pinis, inap belhat bilong yu i slek olgeta.”—Jop 14:13.
12, 13. Toktok bilong tripela pren bilong Jop i mekim wanem long em?
12 Jop i gat tripela pren i kam lukim em, i olsem ol i kam “bilong sori long em na bilong strongim bel bilong en.” (Jop 2:11) Tasol ol i no ‘helpim em liklik. Nogat.’ (Jop 16:2) Sapos Jop i gat ol pren em inap kamapim ol hevi bilong em long ol, ating dispela bai helpim em. Tasol dispela tripela pren i mekim na tingting bilong Jop i paul moa yet na bel hevi bilong em i go bikpela.—Jop 19:2; 26:2.
13 Ating Jop i askim em yet olsem: ‘Bilong wanem ol dispela samting i painim mi? Mi bin mekim wanem rong na ol dispela bikpela hevi i mas kamap long mi?’ Ol pren bilong em i stori long as bilong ol hevi bilong em, tasol tok bilong ol i no stret liklik. Ol i ting Jop i bin mekim bikpela rong na long dispela as em i kisim ol dispela hevi. Elifas i tok: “Jop, yu inap tingim wanpela man i bin bihainim stretpela pasin na i no gat rong, em i bin bagarap na i dai? Ating nogat. Tasol mi bin lukim ol man i save mekim planti pasin nogut, na bihain planti hevi na trabel i kamap long ol.”—Jop 4:7, 8.
14. Bilong wanem yumi no ken hariap na ting olsem as bilong hevi bilong man em pasin nogut em i bin mekim?
14 Tru, ol hevi inap painim yumi sapos yumi bihainim laik bilong olpela bel na yumi no bihainim ol pasin em holi spirit i save kamapim. (Galesia 6:7, 8) Tasol nau long dispela taim, ol hevi inap kamap maski yumi bihainim wanem kain pasin. Na ol man i no gat asua, sampela bikpela hevi i save painim ol tu. Jisas Krais ‘i no gat wanpela rong i stap long em na em i klin olgeta,’ tasol em i karim bikpela pen na em i dai long diwai pos, na ol man i kilim i dai aposel Jems. (Hibru 7:26; Aposel 12:1, 2) Tok kranki bilong Elifas na tupela pren bilong em i kirapim Jop long sambai long gutnem bilong em na long tok olsem em i no gat asua. Tasol ol i tokaut yet olsem pasin nogut bilong Jop i as bilong ol hevi bilong em, na ating dispela i mekim Jop i kisim tingting kranki long stretpela pasin bilong God.—Jop 34:5; 35:2.
Ol Helpim Yu Inap Kisim Long Taim Bilong Hevi
15. Wanem kain tingting bai helpim yumi long taim bilong hevi?
15 Olsem wanem? Stori bilong Jop inap lainim yumi long sampela samting? Yumi inap ting i no stret long yumi kisim bagarap, o sik, o ol man i birua long yumi. I luk olsem ol narapela i abrusim planti bilong ol dispela hevi. (Song 73:3-12) Ating sampela taim yumi mas askim yumi yet ol dispela bikpela askim: ‘Pasin bilong mi long laikim tru God i kirapim mi long mekim wok bilong em maski wanem samting i kamap? Mi gat bikpela laik long mekim ol samting na bai Jehova inap “bekim tok long man i sutim tok long Em?” ’ (Sindaun 27:11; Matyu 22:37) Yumi no ken larim ol tok kranki bilong ol narapela i mekim na yumi kisim tupela tingting long Papa bilong yumi long heven. Wanpela Kristen husat i bin karim hevi bilong bikpela sik inap planti yia, em i tok: “Mi save olsem olgeta hevi em Jehova i larim i kamap, mi inap long karim. Mi save em bai strongim mi long karim. Oltaim em i bin mekim olsem.”
16. Olsem wanem Baibel i helpim ol man i karim bikpela hevi?
16 Jop i no bin save long ol trik bilong Satan, tasol yumi save. “Yumi save pinis long tingting na pasin bilong em,” o ol samting nogut em i tingting long mekim. (2 Korin 2:11) Na tu, i gat planti gutpela tok yumi inap kisim helpim long en. Long Baibel i gat stori bilong ol gutpela man na meri husat i bin karim kain kain hevi. Aposel Pol i bin karim planti bikpela hevi tru, em i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Rom 15:4) Wanpela Witnes long Yurop husat i bin kalabus long taim bilong Wol Woa 2, long wanem, em i holimpas bilip bilong em, em i senisim kaikai bilong tripela de bilong kisim wanpela Baibel. Em i tok: “Planti gutpela samting i kamap long dispela! Maski mi hangre, mi kisim kaikai bilong spirit i strongim mi na ol narapela long karim ol traim i painim mipela long dispela taim nogut. Mi holim yet dispela Baibel i kam inap long nau.”
17. God i givim yumi wanem samting bilong helpim yumi long karim hevi?
17 Ol tok bilong Baibel i mekim gut bel bilong yumi, na tu, yumi gat planti buk i helpim yumi long stadi long Baibel na i gat ol gutpela tok bilong helpim yumi long karim ol hevi. Sapos yu skelim buk Watch Tower Publications Index, ating bai yu painim ekspiriens bilong wanpela Kristen husat i bin karim wankain hevi olsem yu. (1 Pita 5:9) Yu inap kisim helpim tu sapos yu toktok long hevi bilong yu wantaim wanpela elda o narapela strongpela Kristen husat inap pilim hevi bilong yu. Na bikpela samting tru, yu inap bilip olsem long rot bilong beten, Jehova na holi spirit bilong em bai helpim yu. Olsem wanem Pol i karim hevi taim Satan i “mekim nogut” long em? Em i lain long bilip na wet long strong bilong God bai helpim em. (2 Korin 12:9, 10) Em i tok, God “i save strongim mi, na long strong bilong em mi inap mekim olgeta samting.”—Filipai 4:13.
18. Olsem wanem ol wanlotu Kristen inap strongim bel bilong narapela narapela?
18 Olsem na helpim i stap, na yu no ken surik long kisim. Buk Sindaun i tok: “Sapos taim nogut i painim yu na bun bilong yu i slek, orait yu no gat strong tru.” (Sindaun 24:10) Ol waitanis inap mekim na haus man i wokim long diwai i pundaun, na olsem tasol bel hevi inap mekim na pasin bilong Kristen long stap gut long God i no strong moa. Bilong dispela samting i no ken kamap, Jehova i save helpim yumi long rot bilong ol wanlotu bilong yumi. Wanpela ensel i kam long Jisas na i strongim em long dispela nait ol birua i holim em. (Luk 22:43) Taim Pol i go long Rom olsem wanpela kalabusman, em i “tenkyu long God, na bel bilong en i kisim strong” taim em i bungim ol brata long Maket Bilong Apius na long Tripela Haus Pasindia. (Aposel 28:15) Wanpela Witnes long Jemani i tingim yet helpim em i bin kisim taim em i kamap long banis kalabus bilong Ravensbrück taim em i yangpela meri yet. Em i tok: “Wanpela wanlotu Kristen i bungim mi hariap na i mekim gut long mi. Narapela gutpela sista i kirap lukautim mi olsem mama bilong mi.”
“Yu Mas Holim Bilip”
19. Wanem samting i helpim Jop long sakim Satan?
19 Jehova i tok Jop em i man ‘bilong bihainim tru God.’ (Jop 2:3) Maski em i bel hevi na em i no save long as bilong ol hevi bilong em, Jop i stap gut long God. Jop i no laik tru long givim baksait long samting i nambawan bikpela samting long em. Em i tok: “I go inap long taim mi dai mi no ken lusim stretpela pasin bilong mi!”—Jop 27:5, NW.
20. Bilong wanem yumi mas sanap strong na karim hevi?
20 Sapos yumi gat wankain strongpela tingting, dispela bai helpim yumi long stap gut long God long olgeta kain taim—long taim ol samting i laik pulim yumi, ol man i birua long yumi, o bikpela hevi i painim yumi. Jisas i tokim kongrigesen long Smerna: “Harim. Satan bai i mekim, na ol bai i kalabusim sampela man namel long yupela, bilong traim yupela. Na bai yupela i karim hevi na pen inap long 10-pela de. Tasol yu mas holim bilip, i go inap long taim yu dai, na bai mi givim yu laip olsem prais.”—KTH 2:10.
21, 22. Yumi save long wanem samting na dispela inap mekim gut bel bilong yumi taim yumi karim hevi?
21 Long dispela graun em Satan i bosim, ol samting bai traim pasin bilong yumi long sanap strong na stap gut long God. Tasol Jisas i tokim yumi olsem taim yumi wetim gutpela taim bai kamap bihain, i no gat as na yumi mas pret. Bikpela samting em yumi mas bihainim tru God. Pol i tok, ‘ol hevi na pen bai i stap sotpela taim tasol,’ na “gutpela sindaun tru,” olsem pe Jehova i promis long givim yumi, ‘i winim tru olgeta arapela samting na em bai i stap oltaim oltaim.’ (2 Korin 4:17, 18) Ol bikpela hevi bilong Jop tu i stap sotpela taim tasol, taim yumi skelim wantaim planti yia em i bin stap amamas paslain na bihain long traim i painim em.—Jop 42:16.
22 Tasol sampela taim yumi inap pilim olsem ol traim bilong yumi i no gat pinis bilong en na pen na hevi bilong yumi i bikpela tumas na yumi no inap karim. Long stadi i kamap bihain long dispela, bai yumi skelim olsem wanem stori bilong Jop inap lainim yumi long sampela narapela samting long pasin bilong sanap strong. Na bai yumi skelim tu olsem wanem yumi ken strongim ol arapela husat i karim hevi.
Bai Yu Bekim Olsem Wanem?
• Satan i kamapim wanem bikpela tok long pasin bilong Jop long stap gut long God?
• Bilong wanem yumi no ken kirap nogut taim hevi i painim yumi?
• Olsem wanem Jehova i save helpim yumi long sanap strong?
[Ol Piksa long pes 23]
Pasin bilong mekim wok painimaut, toktok wantaim ol strongpela Kristen, na kamapim tru bel bilong yumi long beten inap helpim yumi long sanap strong