Klia Long Lotu Giaman!
“Yupela i mas lusim ol, na i go i stap long narapela hap. Na yupela i mas lukaut gut, nogut yupela i pas long ol samting i no klin long ai bilong God.”—2 KORIN 6:17.
1. Planti man i gat gutpela bel ol i stap olsem wanem long ol samting bilong spirit?
PLANTI man i gat gutpela bel ol i no save long God em i husat tru na wanem samting bai painim ol man long bihain. Ol i no bin painim bekim bilong ol dispela askim, olsem na tingting bilong ol i paul. Planti milion manmeri i kalabus long ol pasin tumbuna na ol bung bilong amamas em Man Bilong Wokim yumi i no orait long en. Ating yu gat sampela neiba na wanblut ol i bilip long helpaia, God triwan, man i gat tewel, o long sampela narapela tok giaman.
2. Ol hetman bilong lotu i bin mekim wanem? Wanem samting i bin kamap long dispela?
2 Wanem samting i mekim na planti man i no gat stretpela save long God? Dispela samting em lotu—o yumi ken tok, ol oganaisesen na ol hetman bilong lotu em ol i bin autim ol tok i narapela kain long tingting bilong God. (Mak 7:7, 8) Samting i bin kamap long dispela i olsem: Planti man i ting ol i lotu long trupela God, tasol nogat, ol i save bihainim ol pasin em God i no amamas long en. Lotu giaman i as bilong dispela samting.
3. Husat i go pas long kirapim ol man long bihainim lotu giaman, na Baibel i mekim wanem tok long em?
3 I gat wanpela man yumi no inap lukim na em i helpim lotu giaman. Aposel Pol i tok long em olsem: “Giaman god bilong dispela graun, em i bin pasim tingting bilong ol dispela man i no bilip, na lait bilong gutnius bilong marimari na sori bilong Krais, em i no inap i go insait long bel bilong ol.” (2 Korin 4:4) Dispela “giaman god,” em Satan. Em i go pas long kirapim ol man long bihainim lotu giaman. Pol i tok: “Satan yet i save senisim pasin bilong en na kamap olsem ensel bilong lait. Olsem na sapos ol wokman bilong Satan tu i senisim pasin bilong ol na i mekim olsem ol wokman bilong stretpela pasin, yumi no ken kirap nogut long dispela.” (2 Korin 11:14, 15) Satan i save mekim ol samting nogut i kamap olsem samting i gutpela na em i giamanim ol man long bilip long ol tok giaman.
4. Lo God i givim long ol Israel long bipo i tok wanem long ol profet giaman?
4 Olsem na i gat as na Baibel i no orait liklik long lotu giaman! Lo Bilong Moses i bin tokim lain manmeri bilong God long ol i mas lukaut long ol profet giaman. Man i lainim ol narapela long ol tok giaman na kirapim ol long lotu long ol god giaman, ol i mas ‘kilim i dai dispela kain man i save tokim ol narapela long sakim tok bilong Bikpela.’ God i tokim ol Israel long ol i mas “pinisim dispela pasin nogut.” (Lo 13:1-5) Yes, long ai bilong Jehova, lotu giaman em i samting i nogut tru.—Esekiel 13:3.
5. Long nau, yumi mas bihainim wanem ol tok lukaut?
5 Jisas Krais na ol aposel i bin tokaut long tingting bilong Jehova long lotu giaman. Jisas i tokim ol disaipel: “Yupela lukaut long ol giaman profet. Ol i save mekim gutpela tok bilong grisim yupela, tasol tingting tru bilong ol em i bilong paulim yupela na bagarapim yupela. Ol i olsem ol weldok i pasim skin bilong sipsip, bai ol i ken i go klostu long ol sipsip na holimpas ol.” (Matyu 7:15; Mak 13:22, 23) Pol i tok, “God i stap long heven na em i kamapim ples klia belhat bilong en. Em i bekim pe nogut long olgeta man i givim baksait long em na i mekim pasin nogut. Long dispela pasin nogut bilong ol, ol i wok long daunim tok i tru.” (Rom 1:18) Em i bikpela samting ol Kristen tru i mas bihainim ol dispela tok lukaut na klia long ol man i autim ol tok giaman o i daunim tok i tru bilong Baibel!—1 Jon 4:1.
Lusim ‘Bikpela Babilon’
6. Baibel i mekim wanem tok long ‘Bikpela Babilon’?
6 Tingim ol tok Buk Kamapim Tok Hait i mekim long lotu giaman. Lotu giaman i kain olsem wanpela pamukmeri i dring longlong na i gat strong long bosim planti gavman na ol pipel bilong en. Dispela meri i save mekim pasin pamuk wantaim planti king na em i spak long blut bilong ol man i lotu tru long God. (KTH 17:1, 2, 6, 18) Long pes bilong dispela meri ol i bin raitim wanpela nem i stret long ol pasin doti bilong em. Dispela nem em “Bikpela taun Babilon, em mama tru bilong olgeta pamukmeri na bilong olgeta pasin nogut tru i stap long graun.”—KTH 17:5.
7, 8. Lotu giaman i bin mekim pasin pamuk long wanem rot? Wanem samting i bin kamap long dispela?
7 Tok Baibel i mekim long Bikpela Babilon i stret long olgeta lotu giaman. Maski ol i no wok wantaim olsem wanpela lain, ol i save mekim wankain wok. Lotu giaman, em Buk Kamapim Tok Hait i tok piksa long en olsem wanpela pamukmeri, em i holim bikpela strong long bosim ol gavman. Kain olsem wanpela meri i no bin stap gut long marit bilong em na i go prenim ol man nabaut, lotu giaman i bin prenim ol gavman bilong graun. Disaipel Jems i tok: “Yupela i lusim God, olsem meri i lusim man bilong en na i go pamuk nabaut. Harim. Sapos man i laikim pasin bilong graun, em i mekim pasin birua long God. Ating yupela i no save long dispela, a? Olsem na sapos man i laik pren wantaim ol pasin bilong graun, em bai i kamap birua bilong God.”—Jems 4:4.
8 Lotu giaman i save pren wantaim ol gavman na dispela i bin kamapim planti hevi. Wanpela saveman bilong Afrika bilong skelim ol samting bilong politik, Xolela Mangcu, i tok: “Long bipo yet i kam inap nau, i gat planti taim we wanpela lain i bin kirap kilim i dai planti man wantaim, na as bilong dispela em lotu i wok bung wantaim politik.” I no longtaim i go pinis, wanpela nius i tok: “As bilong ol pait nogut tru i save kamap long nau . . . em lotu.” Planti milion manmeri i bin lusim laip bilong ol long ol pait em ol lotu i bin sapotim. Bikpela Babilon i bin mekim nogut tu long ol wokman bilong God na kilim ol i dai. I olsem em i spak long blut bilong ol.—KTH 18:24.
9. Buk Kamapim Tok Hait i tok wanem bilong kamapim klia olsem Jehova i nolaik tru long lotu giaman?
9 Jehova i nolaik tru long lotu giaman na dispela i kamap ples klia long samting Baibel i tok bai painim Bikpela Babilon. Kamapim Tok Hait 17:16 i tok: “Ol dispela 10-pela kom yu bin lukim, ol dispela kom wantaim dispela wel animal ol bai i birua long pamukmeri. Ol bai i bagarapim em tru na rausim olgeta klos samting bilong en. Na ol bai i kaikai mit bilong bodi bilong en, na kukim em olgeta long paia.” Pastaim, wanpela traipela animal bai bagarapim tru dispela meri na kaikai mit bilong bodi bilong en. Mekim pinis, orait hap bodi i stap yet, paia bai kukim olgeta. Na olsem tasol, klostu nau, ol gavman bai kirap na mekim wankain samting long lotu giaman. God bai kirapim ol long mekim olsem. (KTH 17:17) Bikpela Babilon, em olgeta lotu giaman, bai bagarap. “Ol man bai i no inap lukim em moa.”—KTH 18:21.
10. Yumi mas i gat wanem tingting long lotu giaman?
10 Ol man i lotu tru long God, ol i mas i gat wanem tingting long Bikpela Babilon? Baibel i tok klia: “Yupela ol manmeri bilong mi, yupela i mas lusim dispela ples na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin.” (KTH 18:4) Ol manmeri i no laik kisim bagarap, ol i mas lusim lotu giaman taim rot i op i stap yet. Taim Jisas Krais i stap long graun, em i tok profet olsem long taim bilong las de, planti man bai tok ol i lain bilong em. (Matyu 24:3-5) Tasol em bai tokim ol: “Mi no save liklik long yupela. Yupela ol man bilong mekim pasin nogut, yupela klia long mi.” (Matyu 7:23) Jisas Krais i kamap King pinis em i sakim pinis lotu giaman.
Klia—Long Wanem Rot?
11. Yumi mas mekim wanem na bai yumi inap klia long lotu giaman?
11 Ol Kristen tru i save klia long ol lotu giaman na ol tok em bilip giaman i as bilong en. Olsem na yumi no save putim yau long ol program bilong lotu long redio na televisen o ritim ol buk bilong lotu i mekim planti tok giaman long God na long Baibel. (Song 119:37) Na yumi no save go long ol bung bilong amamas em ol lain bilong lotu giaman i kamapim. Yumi no save insait liklik long ol samting bilong lotu giaman. (1 Korin 10:21) Taim yumi stap longwe long ol dispela samting, dispela bai lukautim yumi na yumi no bihainim tingting bilong ol “man i autim olkain giaman save na toktok nating . . . Ol dispela kain man i save kisim tingting bilong ol tumbuna . . . Ol i no save bihainim tingting bilong Krais.”—Kolosi 2:8.
12. Man i ken mekim wanem na bai em i no insait moa long wanpela lotu giaman?
12 Olsem wanem sapos wanpela man i laik kamap wanpela Witnes Bilong Jehova tasol nem bilong em i stap long rejista bilong wanpela lotu giaman? Em i ken salim pas long dispela lotu bilong ol i ken rausim nem bilong em long rejista na long dispela rot em i ken kamapim klia olsem em i no laik bai ol arapela i tingim em moa olsem memba bilong wanpela lotu giaman. Em bikpela samting em i kirap mekim sampela samting na bai em i no ken kamap doti long rot bilong lotu giaman. Ol samting em i mekim i mas soim ol lain bilong lotu na ol arapela man, olsem em i no stap memba moa bilong dispela lotu.
13. Baibel i tok wanem long pasin bilong klia long lotu giaman?
13 Aposel Pol i tok: “Ol haiden ol i narakain, olsem na yupela i no ken pas wantaim ol na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak? Ating Krais i save stap wanbel wantaim Satan, a? Man i bilip long Krais na man i no bilip, tupela i ken holim wanpela kain tingting, a? Olsem wanem, bai yumi bungim haus bilong God wantaim haus lotu bilong ol giaman god? . . . Bikpela i tok moa olsem, ‘Yupela i mas lusim ol, na i go i stap long narapela hap. Na yupela i mas lukaut gut, nogut yupela i pas long ol samting i no klin long ai bilong God.’” (2 Korin 6:14-17) Yumi save bihainim dispela tok long rot bilong stap klia long lotu giaman. Tasol olsem wanem? Tok bilong Pol i makim olsem yumi mas klia tu long ol man bilong lotu giaman?
“Bihainim Gutpela Tingting”
14. Yumi mas klia olgeta long ol man bilong lotu giaman o olsem wanem?
14 Olsem wanem? Ol man i lotu tru long God ol i no ken toktok liklik wantaim ol man i insait long lotu giaman? Yu ting yumi mas givim baksait olgeta long ol man i no wanlotu bilong yumi? Nogat, i no olsem. Namba 2 bikpela lo i tok: “Yu mas laikim ol wantok olsem yu laikim yu yet.” (Matyu 22:39) Yumi soim olsem yumi laikim ol arapela taim yumi autim gutnius bilong Kingdom long ol. Na yumi soim olsem yumi laikim ol taim yumi stadi wantaim ol long Baibel na helpim ol long save olsem ol i mas klia long lotu giaman.
15. Wanem insait bilong dispela tok yumi “no bilong dispela graun”?
15 Tru, yumi ol disaipel bilong Jisas i save autim gutnius long ol arapela, tasol yumi “no man bilong dispela graun.” (Jon 15:19) Tok “graun” long dispela ves i makim ol man i stap longwe long God. (Efesus 4:17-19; 1 Jon 5:19) Yumi no bilong dispela graun, olsem: Yumi save givim baksait long ol pasin na tingting na toktok em Jehova i no laikim. (1 Jon 2:15-17) Na yumi tingim dispela stiatok, “sapos yumi poroman wantaim ol man nogut, bai ol i bagarapim gutpela pasin bilong yumi,” olsem na yumi no save pren wantaim ol man i no bihainim ol lo Kristen. (1 Korin 15:33) Yumi no bilong dispela graun i makim olsem yumi no larim pasin bilong dispela graun i mekim na “yumi i kamap doti long ai bilong God.” (Jems 1:27) Olsem na dispela tok yumi no bilong dispela graun i no makim olsem yumi no ken toktok liklik wantaim ol arapela, nogat.—Jon 17:15, 16; 1 Korin 5:9, 10.
16, 17. Ol Kristen i mas mekim wanem kain pasin long ol man i no save long ol tok i tru bilong Baibel?
16 Olsem na yumi mas mekim wanem kain pasin long ol man i no save long ol tok i tru bilong Baibel? Pol i tokim kongrigesen long Kolosi olsem: “Taim yupela i stap wantaim ol man i stap ausait long sios, yupela i mas bihainim gutpela tingting na mekim ol stretpela pasin. Oltaim yupela i mas redi long soim pasin bilong Krais long ol. Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.” (Kolosi 4:5, 6) Aposel Pita i tok: “Long bel bilong yupela, yupela i mas putim Krais wanpela em i stap Bikpela bilong yupela. Na sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol. Tasol yupela i mas bekim tok bilong ol long tok isi na long gutpela pasin.” (1 Pita 3:15, 16) Pol i tokim ol Kristen long ol i “no ken tok nogut long wanpela man, na ol i no ken tok pait. Oltaim ol i mas stap isi tasol na mekim gutpela pasin long olgeta manmeri.”—Taitus 3:2.
17 Yumi ol Witnes Bilong Jehova i no save mekim tok i sutim bel bilong ol arapela o mekim tok i daunim ol. Na yumi no givim nem nogut long ol man bilong narapela lotu. Yumi mas mekim gutpela tok long ol, maski man yumi autim long en, o neiba, o wanwok i kros na i tok nogut long yumi.—Kolosi 4:6; 2 Timoti 2:24.
“Tingim Gut Ol Dispela Gutpela Tok”
18. Wanem samting nogut i save painim ol man i pas gen long lotu giaman?
18 Taim man i kisim save pinis long ol tok i tru bilong Baibel, nogut em i kirap pas gen wantaim lotu giaman. Baibel i stori long samting nogut i kamap long dispela, olsem: “Tru, ol i bin kisim save long Jisas Krais, em i Bikpela bilong yumi na Man bilong kisim bek yumi. Na dispela save i bin helpim ol long abrusim olgeta pasin doti i stap long graun. Tasol sapos ol i pas gen long dispela kain pasin na em i kalabusim ol, orait ol bai i stap nogut tru. Pastaim ol i bin i stap nogut, tasol sapos ol dispela pasin doti i kalabusim ol gen, orait ol bai i stap nogut moa moa yet. . . . Dispela samting i kamap long ol, em i olsem wanpela trupela tok i tok olsem, ‘Dok i traut pinis na i go bek na kaikai traut bilong en.’ Na narapela tok tu i olsem, ‘Pik i waswas pinis long wara, tasol em i go tantanim nabaut long graun malumalum.’ ”—2 Pita 2:20-22.
19. Bilong wanem yumi mas was gut na tingim ol samting em inap bagarapim yumi long ol samting bilong spirit?
19 Yumi mas was gut na tingim ol samting em inap bagarapim yumi long ol samting bilong spirit! Aposel Pol i tok: “Holi Spirit i tok klia olsem, long dispela taim i laik kamap bihain sampela man bai i lusim bilip bilong ol, long wanem, ol bai i putim yau long tok bilong ol spirit bilong giaman na ol spirit nogut na bihainim tok bilong ol.” (1 Timoti 4:1) Yumi stap pinis long dispela “taim i laik kamap.” Sapos ol man i no klia long lotu giaman, ol “tok bilong ol grisman i save tumas long olgeta pasin bilong trik na giaman, em bai . . . sakim [ol] nabaut olsem win na si i save sakim kanu long solwara, na kanu i trip nabaut na i no i go stret long ples em i makim.”—Efesus 4:13, 14.
20. Yumi ken mekim wanem na bai lotu giaman i no ken nogutim yumi?
20 Yumi ken mekim wanem na bai lotu giaman i no ken nogutim yumi? Tingim olgeta samting Jehova i bin givim long yumi. Yumi gat Tok Bilong God, em Baibel. (2 Timoti 3:16, 17) Na Jehova i bin givim yumi planti kaikai bilong spirit long rot bilong “wokboi i gat gutpela tingting.” (Matyu 24:45) Taim yumi kamap strong long tok i tru, yumi mas kisim laik long kisim ‘strongpela kaikai i bilong ol man i kamap bikpela pinis,’ na kisim laik long kam long ol miting we yumi inap kisim save long ol tok i tru bilong Baibel. (Hibru 5:13, 14; Song 26:8) Yumi mas tingting strong long larim olgeta samting Jehova i bin givim long yumi i helpim yumi long “tingim gut ol dispela gutpela tok” yumi bin harim. (2 Timoti 1:13) Long dispela rot yumi inap stap klia long lotu giaman.
Yu Lainim Wanem Samting?
• ‘Bikpela Babilon’ i makim wanem samting?
• Yumi mas mekim wanem na bai yumi inap stap klia long lotu giaman?
• Yumi mas abrusim wanem ol samting em ol inap nogutim yumi long ol samting bilong spirit?
[Piksa long pes 28]
Yu save long as na ‘Bikpela Babilon’ i kain olsem wanpela meri pamuk?
[Piksa long pes 29]
‘Bikpela Babilon’ bai bagarap
[Piksa long pes 31]
Taim yumi toktok wantaim ol man bilong narapela lotu, yumi mas mekim long “tok isi na long gutpela pasin”