Sapta 39
Soldia-King i Winim Pait Bilong Armagedon
Driman 13—Kamapim Tok Hait 19:11-21
Stori: Jisas i kisim ol ami bilong heven bilong bagarapim ol samting bilong Satan long graun
Taim bilong truim: Bihain long taim Bikpela Babilon i bagarap
1. Armagedon em i wanem samting? Wanem ol samting i kamap paslain, na nau Armagedon i kirap?
ARMAGEDON—planti man i pret long dispela tok! Tasol man i laikim stretpela pasin, taim em i harim tok bilong Armagedon em i tingim samting longtaim em i bin wetim—em i tingim taim Jehova bai givim strafe long ol lain bilong dispela graun. Ol man i no ken insait long pait bilong Armagedon, nogat; em pait bilong “dispela bikpela de bilong God I Gat Olgeta Strong,” na em bai bekim nogut long ol hetman bilong graun. (KTH 16:14, 16; Esekiel 25:17) Taim ol gavman i bagarapim Bikpela Babilon, taim bilong ‘bikpela hevi tru’ i kirap pinis na i stap. Orait, Satan bai kirapim retpela wel animal na 10-pela kom bilong en long pait wantaim lain bilong Jehova. Satan bai moa belhat long oganaisesen bilong God, olsem “meri” bilong God, na em bai kirapim lain bilong em long bagarapim lain bilong God, em hap lain bilong dispela “meri” ol i stap yet long graun. (KTH 12:17) Em laspela taim bilong Satan long traim bagarapim ol!
2. Husat dispela Gok bilong Magok? Jehova bai mekim wanem long em na bai em i laik bagarapim lain bilong Jehova?
2 Esekiel sapta 38 i stori long Satan i laik bagarapim lain bilong Jehova, na i kolim Satan olsem “Gok, bilong graun Magok.” Esekiel i tok piksa na i tok, Jehova i putim huk long maus bilong Gok na pulim em wantaim planti ami bilong em i kam long pait. Jehova i mekim olsem wanem? Olsem: Gok i lukim ol Witnes Bilong Jehova i stap olsem ples klia na i olsem ol i no gat samting bilong helpim o lukautim ol; ol “i bin lusim ol arapela kantri . . . na ol i gat planti bulmakau na sipsip na ol kain kain samting. Na kantri bilong ol i stap namel tru long olgeta kantri bilong graun.” I olsem olgeta lain bilong graun i lukluk long ol. Dispela lain tasol i no bin lotuim wel animal na piksa bilong en. Ol i stap strong na ol i gat planti gutpela samting bilong spirit, na ol i stap amamas, na dispela samting i mekim na Gok i belhat. Olsem na Gok wantaim bikpela lain bilong em, ol i bung na i kam bilong bagarapim lain bilong Jehova; wel animal i kamap long solwara em i gat 10-pela kom, em i insait long dispela lain bilong Gok. Taim Bikpela Babilon i kisim bagarap i no gat sampela lain i bin helpim em, tasol Jehova bai helpim na lukautim gutpela lain Witnes bilong em!—Esekiel 38:1, 2, 4, 11, 12, 15; KTH 13:1.
3. Jehova bai mekim wanem bilong pinisim Gok wantaim lain ami bilong em?
3 Jehova bai mekim wanem bilong pinisim Gok wantaim lain bilong em? Harim! “Na mi God, Bikpela, mi tok, bai mi mekim bikpela pait i kamap long ples maunten bilong Israel, bilong bagarapim King Gok. Ol soldia bilong en bai i pait long ol yet na kilim ol yet i dai.” Ol nupela kain bom nogut o gan samting i no inap helpim ol dispela birua. Jehova i tok moa: “Na mi bai mekim olkain sik i kamap long em na mekim pait i kamap long em bilong mekim save long em. Bai mi kapsaitim bikpela ren na ren ais na ol hatpela ston i gat paia, na ol dispela samting bai i pundaun antap long em na long ol soldia i bin kam wantaim em. Long dispela pasin bai mi soim olgeta lain manmeri olsem, mi gat bikpela strong na pasin bilong mi i gutpela na stretpela olgeta. Na bai ol i save tru long mi. Na bai ol i save gut olsem, mi yet mi [Jehova].”—Esekiel 38:21-23; 39:11; skelim wantaim Josua 10:8-14; Hetman 7:19-22; 2 Stori 20:15, 22-24; Jop 38:22, 23.
‘Man Bilong Lukautim Gut Wok na Mekim Pasin i Tru’
4. Jon i tok wanem long Krais Jisas i redi long pait?
4 Jehova i mekim bikpela pait i kamap. Husat i bosim dispela pait? Orait, yumi lukim gen Kamapim Tok Hait, em i stori long narapela driman bilong Jon. Jon i lukim heven i op na em i lukim wanpela bikpela samting—em Krais Jisas i redi bilong pait! Jon i tok: “Mi lukim heven i op, na wanpela waitpela hos i stap. Na nem bilong man i sindaun long dispela hos, em i olsem, ‘Man i lukautim gut wok bilong en,’ na ‘Man i save mekim pasin i tru tasol.’ Taim em i skelim pasin bilong ol manmeri long kot, na taim em i kirapim pait, em i save bihainim stretpela pasin tasol na mekim. Ai bilong en i olsem paia i lait, na em i gat planti hat king i stap long het bilong en.”—KTH 19:11, 12a.
5, 6. (a) “Waitpela hos” i makim wanem samting? (b) Dispela nem ‘Man bilong lukautim gut wok na mekim pasin i tru,’ dispela i makim wanem samting? (c) Ai i “olsem paia i lait” i makim wanem samting? (d) “Planti hat king” i makim wanem samting?
5 Olsem long 4-pela hos bilong narapela driman bipo, dispela “waitpela hos” i makim stretpela pait. (KTH 6:2) Na man i sindaun long hos em i bihainim stretpela pasin na em i strongpela Man Bilong Pait, winim ol narapela pikinini bilong God. Ol i kolim em ‘Man bilong lukautim gut wok na mekim pasin i tru,’ olsem na yumi save em i dispela man i “save autim stret olgeta tok bilong God” na “autim tok tru tasol,” em Krais Jisas tasol. (KTH 3:14) Em i save mekim pait bilong givim strafe long ol man, olsem stretpela kot bilong Jehova i bin makim, long wanem, em i holim wok Jas na em i “God i gat bikpela strong.” (Aisaia 9:6) Ai bilong em i mekim man i pret, na i “olsem paia i lait” na i lukluk i go long ol birua em i laik bagarapim ol.
6 Planti hat king i stap long het bilong dispela King-Soldia. Wel animal Jon i lukim i kamap long solwara, em i gat 10-pela hat king, na dispela i makim wok king em i holim long graun inap sotpela taim. (KTH 13:1) Tasol Jisas “i gat planti hat king.” Em i winim ol narapela king long bosim graun, long wanem, “em i King bilong olgeta king, na Bikpela bilong olgeta bikman.”—1 Timoti 6:15.
7. Wanem dispela nem bilong Jisas ol i bin raitim?
7 Jon i tok moa olsem: “Long skin bilong en ol i bin raitim wanpela nem, na em wanpela tasol i save long dispela nem. Ol arapela man nogat.” (KTH 19:12b) Baibel i kolim Pikinini bilong God olsem Jisas, na Emanuel, na Maikel, tasol nau Baibel i toktok long narapela “nem,” na Baibel i no kolim dispela nem. Tasol dispela “nem” i makim biknem na namba na ol bikpela wok Jisas i holim long de bilong Bikpela. (Lukim Kamapim Tok Hait 2:17.) Aisaia i stori long sampela nem Jisas i kisim kirap long 1914, na em i tok, Jisas “bai i gat ol dispela nem, ‘Man bilong givim gutpela tingting tru’ na ‘God i gat bikpela strong’ na ‘Papa bilong i stap oltaim oltaim’ na ‘King bilong kamapim gutpela sindaun na bel isi.’ ” (Aisaia 9:6) Aposel Pol i tingim nem bilong Jisas taim em i stori long ol bikpela namba na wok bilong Jisas, na Pol i tok: “Long dispela as tasol God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem. Em i givim dispela nem long Jisas, bai olgeta ensel na olgeta man na ol arapela samting i stap long heven na long graun na aninit long graun ol i ken brukim skru long ai bilong Jisas na i stap aninit long em.”—Filipai 2:9, 10.
8. Olsem wanem na Jisas tasol i save long dispela nem ol i bin raitim? Jisas i larim husat i holim sampela hap wok bilong em?
8 Jisas tasol i holim dispela kain wok, na Jehova na Jisas tasol i save long pasin bilong holim na mekim kain bikpela wok olsem, na i no gat narapela i save. (Lukim Matyu 11:27.) Olgeta narapela man o ensel i no inap pilim insait bilong dispela nem—Jisas wanpela tasol inap. Tasol em i larim “meri” bilong em i holim sampela hap wok bilong em, olsem em i tok promis: “Sapos man i winim pait, . . . mi bai raitim . . . long em, . . . nupela nem bilong mi.”—KTH 3:12.
9. (a) Klos bilong Jisas i gat blut long en, dispela i makim wanem samting? (b) Dispela nem “Tok bilong God” i makim wanem samting?
9 Jon i tok: “Blut i karamapim longpela klos em i putim. Na ol i kolim nem bilong en olsem, ‘Tok bilong God.’ ” (KTH 19:13) Em “blut” bilong husat? Inap em i makim blut bilong Jisas yet, em i bin kapsaitim bilong helpim ol man. (KTH 1:5) Tasol ating dispela “blut” i makim blut bilong ol birua bilong em i bin kapsait taim Jehova i givim strafe long ol. Yumi tingim narapela driman bilong Jon, em ol i kisim ol pikinini bilong diwai wain bilong graun na ol i krungutim long tang wain bilong belhat bilong God na bikpela blut i kamap “inap long mak bilong hap ain i stap long maus bilong ol hos.” Dispela i makim ol i winim bikpela pait long daunim ol birua bilong God. (KTH 14:18-20) Olsem tasol, blut i stap long klos bilong Jisas i makim olsem em bai winim tru pait bilong em long Armagedon na daunim na pinisim tru ol birua. (Lukim Aisaia 63:1-6.) Na Jon i tok ol i kolim narapela nem long Jisas, olsem “Tok bilong God.” Dispela i makim Jisas em i Nambawan Maus bilong Jehova na Man bilong tok tru tasol.—Jon 1:1; KTH 1:1.
Ol Wanlain Paitman Bilong Jisas
10, 11. (a) Jon i tok wanem na yumi save i gat sampela moa bilong helpim Jisas long pait? (b) Ol hos na klos bilong ol ami i waitpela, na dispela i makim wanem samting? (c) Dispela “ol ami” ol i husat?
10 Na i no Jisas tasol i mekim dispela pait. Jon i tok: “Ol ami bilong heven ol i sindaun long ol waitpela hos bilong ol, na ol i bihainim em i go. Ol i bin putim ol naispela waitpela klos samting i klin tru.” (KTH 19:14) Ol hos i “waitpela,” na dispela i makim pait bilong ol em stretpela pait. “Waitpela klos” bilong ol “i klin tru,” na i stret lain bilong King i pasim klos olsem, na waitpela klos i makim ol i gat gutpela nem long ai bilong Jehova. Dispela “ol ami” ol i husat? Ol ensel holi i insait long dispela lain ami. Taim de bilong Bikpela i kirap pinis, Maikel wantaim ol ensel bilong em ol i rausim Satan wantaim ol spirit nogut bilong em long heven na tromoi ol i go daun long graun. (KTH 12:7-9) Na “olgeta ensel” bai stap wantaim Jisas taim em i sindaun long gutpela sia king bilong em na em i skelim pasin bilong ol lain man long graun. (Matyu 25:31, 32) Olsem na long bikpela pait Armagedon God bai strafim tru ol man, na ol ensel bilong Jisas bai wok gen wantaim em long dispela taim.
11 Na i gat sampela moa tu i insait long dispela pait. Jisas i bin tok promis long kongrigesen Taiataira olsem: “Sapos man i winim pait, na em i bihainim pasin bilong mi i go inap taim bilong olgeta samting i pinis, orait mi bai givim em namba bilong i stap hetman bilong ol lain manmeri. Na em bai i bosim ol strong tru na brukim ol liklik liklik, olsem man i brukim wanpela sospen graun.” (KTH 2:26, 27) Tru tumas, ol brata bilong Krais em ol i stap pinis long heven long taim bilong Armagedon, ol tu bai insait long dispela wok bilong “bosim ol [lain man] strong tru na brukim ol liklik liklik.”
12. (a) Olsem wanem? Lain bilong God long graun bai insait long pait bilong Armagedon, o nogat? (b) Tasol olsem wanem na ol i insait long sampela samting bilong Armagedon?
12 Na olsem wanem long lain bilong God long graun? Lain remnan i no ken insait long pait bilong Armagedon, na ol gutpela poroman bilong ol tu, em dispela “planti tumas manmeri” ol i bin lusim ol lain bilong graun na ol i kam insait long “haus” bilong Jehova long lotuim em. Ol i man bilong i stap bel isi na ol i senisim pinis ol samting bilong ol bilong pait na i kamap samting bilong wok gaden. (Aisaia 2:2-4) Tru, ol i no insait long pait, tasol ol i insait long sampela samting bilong Armagedon! Olsem yumi stori pinis, long ai bilong ol man, dispela lain bilong Jehova bai stap olsem wanpela lain i no gat helpim bilong ol bilong lukautim ol, na Gok wantaim lain bilong em i laik bagarapim ol. Orait, long dispela taim stret Soldia-King bilong Jehova wantaim lain ami bilong em long heven bai kirapim pait bilong Armagedon na pinisim ol dispela birua. (Esekiel 39:6, 7, 11; skelim wantaim Daniel 11:44–12:1.) Long dispela taim lain bilong God long graun bai lukluk tasol long ol dispela samting. Armagedon bai opim rot na bai ol i ken kisim laip oltaim, na ol bai i stap olsem wanpela lain i lukim pinis bikpela pait bilong Jehova i kamapim long ples klia olsem Jehova i King tru.
13. Olsem wanem yumi ken tok, ol Witnes Bilong Jehova i no bikhet long ol gavman?
13 Olsem na ating ol Witnes Bilong Jehova i no save laikim olgeta gavman, a? Nogat, i no olsem! Ol i save bihainim tok bilong aposel Pol, em i tok: “Olgeta man i mas i stap aninit long ol gavman.” Ol i save, taim dispela pasin bilong graun i stap yet, God bai larim ol gavman i stap na bai ol i ken bosim ol man na pasin nogut i no ken kamap bikpela tumas. Olsem na ol Witnes Bilong Jehova i save givim stret takis long gavman, na bihainim stret ol lo, na bihainim ol lo bilong rot na bilong rejistaim ol ka samting, na ol kain lo olsem bilong gavman. (Rom 13:1, 6, 7) Na ol i bihainim ol lo bilong Baibel i tok yumi no ken giaman, na yumi mas sori long ol man, na yumi mas strongim pasin wanbel long famili, na lainim gut ol pikinini na bai ol i kamap gutpela man na meri. Olsem na ‘samting bilong Sisar ol i givim long Sisar, na samting bilong God ol i givim long God.’ (Luk 20:25; 1 Pita 2:13-17) Baibel i tok, ol gavman bilong dispela graun i no bilong i stap oltaim, olsem na ol Witnes Bilong Jehova i wok long redi na bai liklik taim ol i ken kisim “laip tru,” olsem gutpela sindaun aninit long Kingdom bilong Krais. (1 Timoti 6:17-19) Ol i no gat wok long rausim ol gavman bilong dispela graun, tasol bel bilong ol i kirap taim ol i kaunim stori bilong Armagedon long Baibel, em i tok, liklik taim Jehova bai kirap na mekim save long ol man nogut.—Aisaia 26:20, 21; Hibru 12:28, 29.
Em i Go Long Laspela Pait!
14. “Bainat i sap tumas” na i stap long maus bilong Jisas, dispela i makim wanem samting?
14 Husat i givim wok long Jisas long mekim dispela pait? Jon i tok: “Wanpela bainat i sap tumas, em i stap long maus bilong dispela man i go pas long ol, na dispela bainat i kam ausait. Na long dispela bainat em bai i daunim ol manmeri bilong olgeta lain. Em bai i holim stik ain na bosim strong olgeta lain manmeri.” (KTH 19:15a) Dispela “bainat i sap tumas” i makim wok o namba Jehova i givim long Jisas bilong tokaut long ol “ami bilong heven” long kirap kilim i dai ol man i bikhet long Kingdom bilong God. (KTH 1:16; 2:16) I gat ol tok piksa olsem bilong Aisaia, em i bin tok: “Na em [Jehova] i redim mi bai mi inap toktok gut na ol tok bilong mi inap sutim tru bel bilong ol manmeri, olsem bainat i sap tru. Em i bin haitim mi gut long han bilong en. Na em i redim mi olsem spia i sap moa na em i putim mi i stap.” (Aisaia 49:2) Long dispela tok profet, Aisaia i makim Jisas, em i man bilong autim ol strongpela tok bilong God long strafe bai painim ol man na nau em i mekim tru ol dispela samting em i bin tokaut long en—i olsem em i sutim spia i go stret na i no abrus liklik.
15. Taim Armagedon i no yet, rong bilong husat i kamap ples klia na ol i kot pinis? Na bihain long dispela, wanem samting bai kamap?
15 Paslain long taim ol dispela samting i kamap, Jisas bai mekim ol samting Pol i tok long en, olsem: “Na long dispela taim dispela man bilong sakim lo em bai i kamap ples klia. Na Bikpela Jisas bai i kilim em i dai long win bilong maus bilong em yet. Bikpela bai i kamap ples klia wantaim bikpela lait bilong en, na long dispela lait yet em bai i bagarapim tru dispela man bilong sakim lo.” Long 1914 na i kam inap nau, ol samting i kamapim long ples klia olsem Jisas i kam pinis na i stap (tok Grik, pa·rou·siʹa), na yumi save olsem, long wanem, rong bilong ol bikman bilong ol misin i kamap ples klia, em ol i olsem “dispela man bilong sakim lo,” na ol i kot pinis. Tenpela kom bilong retpela wel animal bai kirap na bagarapim ol dispela misin wantaim ol narapela lotu giaman bilong Bikpela Babilon olsem kot bilong Jehova i makim pinis. Taim dispela samting i kamap, em tu bai kamapim klia olsem Jisas i kam pinis na i stap. (2 Tesalonaika 2:1-3, 8) Olsem na long dispela taim stret, taim bilong ‘bikpela hevi tru’ bai kirap! Na bihain moa Jisas bai bagarapim ol narapela hap bilong oganaisesen bilong Satan, olsem Baibel i tok: “Em [Jisas] i tok, na ol manmeri i gat asua bai i karim pen, na ol man nogut bilong bikhet bai i dai.”—Aisaia 11:4.
16. Buk Song na Jeremaia i tok wanem long wok bilong Soldia-King em Jehova i bin makim?
16 Jehova i bin makim dispela Soldia-King bilong mekim wok, na em bai skelim ol man—husat i ken stap na husat i mas dai. Jehova i tok profet long dispela Pikinini bilong em olsem: “Bai yu bosim ol [ol bos bilong graun] long strongpela han bilong yu. Na bai yu brukim ol liklik liklik, olsem man i brukim sospen graun.” Na Jeremaia i tokim ol dispela hetman nogut wantaim lain bilong ol: “Yupela ol hetman na ol wasman bilong ol manmeri, yupela mas krai na sori nogut tru. Na yupela i mas pundaun long graun na tanim tanim nabaut. Long wanem, nau em i taim bilong ol birua i kam na kilim yupela i dai na rausim nabaut ol manmeri i stap yet. Bai yupela i pundaun na bagarap olsem gutpela sospen graun i pundaun na bagarap.” Maski ol man nogut bilong dispela graun ol i ting ol dispela bikman i gutpela man, taim King Jisas i paitim ol long stik ain bilong em, ol bai bagarap olsem em i paitim na brukim sospen graun. Samting bai kamap olsem Devit i tok taim em i stori long ol samting Bikpela Jisas bai mekim, em i tok: “Bikpela i stap long Saion, na bai em i mekim yu i bosim planti ples, na em i tok, ‘Yu bosim ol birua bilong yu.’ Bikpela i sanap wantaim yu bilong strongim yu. Taim em i belhat bai em i pait long ol king nabaut na bai em i winim pait na daunim ol tru. Em bai i bekim rong bilong ol lain manmeri, na long ples bilong pait bai em i kilim i dai planti man.”—Song 2:9, 12; 83:17, 18; 110:1, 2, 5, 6; Jeremaia 25:34.
17. (a) Jon i tok wanem long Soldia-King i bagarapim ol man? (b) Stori long sampela tok bilong ol profet ol i toktok long taim God i belhat na i mekim save long ol lain man.
17 Na long driman Jon i lukim dispela strongpela Soldia-King i mekim narapela wok. Jon i tok: “Na em bai i krungutim ol pikinini wain long bikpela tang ston i makim bikpela belhat bilong God I Gat Olgeta Strong.” (KTH 19:15b) Long narapela driman Jon i bin lukim ol i krungutim pikinini wain “insait long bikpela tang ston bilong krungutim ol pikinini wain. Dispela em i makim belhat bilong God.” (KTH 14:18-20) Na Aisaia tu i stori long wanpela tang ston bilong krungutim pikinini bilong wain, na dispela i makim olsem ol man i kisim bagarap. Na sampela profet moa i stori long taim nogut bai painim ol man taim God i kamapim belhat bilong em.—Aisaia 24:1-6; 63:1-4; Jeremaia 25:30-33; Daniel 2:44; Sefanaia 3:8; Sekaraia 14:3, 12, 13; KTH 6:15-17.
18. Joel i tok wanem long Jehova i skelim olgeta lain man long kot?
18 Taim profet Joel i toktok long tang ston bilong krungutim wain, dispela i makim taim Jehova bai kam na skelim pasin bilong ol man, olsem “olgeta lain . . . bilong ol kantri i stap” nabaut. Jehova bai tokim Jas em i bin makim, em Jisas, na ol ami bilong em long heven, olsem: “Ol dispela lain i manmeri nogut tru. Olsem na yupela i mas katim ol olsem man i save katim kaikai i mau pinis. Na krungutim ol strong, olsem man i save krungutim pikinini bilong wain long tang ston na wain i pulap tru na i kapsait. Olsem na bai ol dispela lain i bagarap tru. Planti tausen manmeri bai i bung long ples daun bilong mekim kot. Liklik taim tasol na De bilong [Jehova] bai i kamap long dispela ples. Na bai san na mun i kamap tudak, na ol sta bai i no lait moa. Bikpela i stap long maunten Saion long Jerusalem na em i bikmaus moa yet. Singaut bilong en i pairap olsem klaut i pairap, na graun wantaim skai i guria. Tasol Bikpela bai i lukautim olgeta manmeri bilong en na ol i no inap bagarap. Em i tok olsem, ‘Long dispela taim bai yupela Israel i ken save, mi tasol mi God, Bikpela bilong yupela.’ ”—Joel 3:12-17.
19. (a) Wanem samting bai kamap na yumi inap save long bekim bilong askim i stap long 1 Pita 4:17? (b) Wanem dispela nem i stap long klos bilong Jisas? Olsem wanem dispela nem i stret long Jisas?
19 Long dispela taim ol lain man i bin bikhet long Jehova bai kisim nogut, tasol ol man i bin kam aninit long Jehova wantaim Soldia-King bilong em ol bai amamas! (2 Tesalonaika 1:6-9) Jehova i bin kirap long skelim pasin na wok bilong lain bilong em long 1918, na em bai pinisim wok bilong skelim olgeta narapela man, na nau bai yumi inap save long bekim bilong askim i stap long 1 Pita 4:17: “Sapos kot i stat long yumi pastaim, orait bai em i pinis olsem wanem long ol man i save sakim gutnius bilong God?” Jisas em i Man Bilong Winim Pait, na em bai krungutim ol pikinini bilong wain, na dispela bai kamapim klia olsem em i dispela Bikpela Man Jon i tok long em: “Long longpela klos bilong en na long lek bilong en ol i bin raitim dispela nem, ‘King bilong olgeta king, na Bikpela bilong olgeta bikman.’ ” (KTH 19:16) Jisas em i bikpela man tru, winim ol narapela king na bikpela man i bin stap long graun. Namba bilong em i gutpela moa. Em i “pait bai ol man i no inap daunim tok tru. Na [em i] pait bilong helpim ol man bai ol i ken wokabaut stret.” Pait em i winim i no ken kamap moa! (Song 45:4) Dispela nem i stap long klos bilong em i gat blut long en. Bikpela King Jehova i bin givim dispela nem long em, em i Man bilong kamapim long ples klia olsem i stret Jehova i stap King!
Bikpela Kaikai Bilong God
20. Jon i tok wanem long “bikpela kaikai bilong God”? Wanem narapela tok bilong wanpela profet bilong bipo i wankain olsem bilong Jon?
20 Long driman bilong Esekiel em i lukim lain bilong Gok i bagarap pinis long pait, na nau ensel i singautim ol pisin na animal bilong bus i kam kaikai! Ol i kaikai skin bilong ol birua bilong Jehova ol i dai pinis na bai ol dispela samting i no ken slip nabaut long graun. (Esekiel 39:11, 17-20) Narapela tok Jon i mekim i strongim dispela tok bilong Esekiel. Jon i tok: “Orait mi lukim wanpela ensel i sanap antap long san. Em i singaut strong long olgeta pisin i flai i stap namel long skai olsem, ‘Yupela kam bung na wetim dispela bikpela kaikai bilong God. Bai yupela i kaikai ol bodi bilong ol king na ol bodi bilong ol kepten bilong ol soldia na ol bodi bilong ol strongpela man na ol bodi bilong ol hos wantaim ol man i sindaun long ol hos. Bai yupela i kaikai mit bilong bodi bilong olgeta man, em ol man i stap fri wantaim ol wokboi nating na ol man nating wantaim ol man i gat nem.’ ”—KTH 19:17, 18.
21. (a) Ensel “i sanap antap long san,” dispela i makim wanem samting? (b) Skin bilong ol man i slip nabaut long graun, dispela i makim wanem samting? (c) Jon i kolim lista bilong ol man em skin bilong ol i slip nabaut long graun, na dispela i makim wanem samting? (d) Dispela tok, “bikpela kaikai bilong God” em i makim wanem samting?
21 Ensel hia “i sanap antap long san,” olsem na em inap singautim ol pisin i save flai antap. Em i tokim ol long redi long kaikai skin bilong ol dispela man em Soldia-King na lain bilong em long heven bai kilim ol i dai. Skin bilong ol bai slip nabaut long graun na i no gat man bai planim skin bilong ol na haitim, nogat—dispela i makim olsem skin bilong ol bai stap ples klia long ai bilong ol man na dispela bai semim ol. Olsem Jesebel bilong bipo, ol man i no ken planim gut ol long matmat olsem ol i save mekim long gutpela man. (2 King 9:36, 37) Na Jon i kolim lista bilong ol man em skin bilong ol i slip nabaut, na dispela i makim olsem ol dispela man bai kisim wankain strafe tasol, maski ol i gat biknem olsem king o kepten bilong ami o ol strongpela man o ol man i stap fri o ol wokboi nating. Olsem bai olgeta man i bin birua long Jehova ol bai pinis na i no gat wanpela bai stap; na bai dispela “solwara i no i stap moa,” em ol man i paul nabaut na i no stap insait long lain bilong Jehova. (KTH 21:1) Na ensel i kolim dispela “kaikai” olsem “bikpela kaikai bilong God,” long wanem, Jehova yet bai singautim ol pisin samting long i kam kaikai.
22. Jon i tok wanem long dispela laspela pait Armagedon?
22 Jon i stori long dispela laspela pait Armagedon na em i tok: “Na mi lukim dispela wel animal na ol king bilong graun, wantaim ol ami bilong ol, ol i kam bung pinis. Ol i laik pait long dispela man i sindaun long hos na long ol ami bilong em. Tasol em i kalabusim dispela wel animal wantaim giaman profet, em dispela giaman profet i bin wokim planti mirakel long ai bilong wel animal, na long dispela pasin em i bin giamanim ol man i bin kisim mak bilong wel animal na i save lotu long piksa bilong en. Wel animal wantaim giaman profet, tupela i stap laip yet, na ol i tromoi tupela i go daun long dispela bikpela raunpela hul ol ston salfa i pulap long en na ol i paia i stap. Na dispela man i sindaun long hos, em i kilim i dai ol ami bilong ol long dispela bainat i stap long maus bilong en. Na olgeta pisin i kaikai bodi bilong ol dispela ami, na bel bilong ol i pulap tru.”—KTH 19:19-21.
23. (a) Olsem wanem dispela ‘pait bilong bikpela de bilong God’ bai kamap ‘long Armagedon’? (b) Wanem toksave “ol king bilong graun” i no bin bihainim? Olsem na wanem samting bai painim ol?
23 Taim namba 6 ensel i bin kapsaitim belhat bilong Jehova i stap insait long dis bilong em, Jon i tok, nau ol spirit nogut i bungim “ol king bilong olgeta kantri” i kam long “pait long dispela bikpela de bilong God I Gat Olgeta Strong.” Dispela pait bai kamap long Armagedon, tasol Armagedon em i no nem bilong wanpela hap, nogat; em i wanpela hap taim, olsem taim bilong Jehova i mas givim strafe long ol man. (KTH 16:12, 14, 16) Orait, nau Jon i lukim ol i redi bilong pait. “Ol king bilong graun, wantaim ol ami bilong ol, ol i kam bung pinis” bilong pait wantaim God. Ol i no laik daun liklik long King em Jehova i bin makim. Jehova i toksave pinis long ol, em i bin tok: “Yupela i mas aninit long pikinini bilong [Jehova] na givim kis long em. Nogut em i kros long yupela na yupela i dai.” Tasol ol i no bin mekim, olsem na ol i mas kisim bagarap.—Song 2:12.
24. (a) Wanem samting bai painim wel animal wantaim profet giaman? Olsem wanem “tupela i stap laip yet” taim ol i kisim dispela strafe? (b) Olsem wanem yumi save ‘raunpela hul i gat paia’ em i tok piksa tasol?
24 Dispela wel animal i bin kamap long solwara na i gat 7-pela het na 10-pela kom, em i makim ol wok politik bilong Satan, na em bai pinis wantaim profet giaman, em namba 7 bikpela gavman. (KTH 13:1, 11-13; 16:13) Taim “tupela i stap laip yet,” olsem taim tupela i stap wanbel yet long biruaim lain bilong God long graun, God i tromoi tupela i go insait long ‘raunpela hul i gat paia i stap’ long en. Tasol dispela tok, ‘raunpela hul i gat paia i stap’ em i no paia tru, nogat; em i tok piksa tasol, olsem “wel animal” na “giaman profet” tu i no animal tru—em tu i tok piksa. “Paia” hia i makim olsem tupela i bagarap na lus olgeta na i no inap kirap gen—tupela i pinis olgeta. Dai na matmat na Satan tu bai go insait long dispela “paia,” olsem bagarap na pinis olgeta. (KTH 20:10, 14) Dispela “paia” i no samting ol man nogut i mas go long en na kisim bikpela pen inap oltaim oltaim, nogat tru; Jehova i no laik tru long kain samting olsem.—Jeremaia 19:5; 32:35; 1 Jon 4:8, 16.
25. (a) Husat ol dispela lain em “man i sindaun long hos” bai kilim ol i dai “long dispela bainat i stap long maus bilong en”? (b) Ol dispela lain em man i sindaun long hos ‘em i kilim ol i dai,’ ol bai kirap bek o nogat?
25 Na i gat ol narapela man tu ol i no insait tru long ol wok gavman, tasol ol tu i bikhet na ol i bihainim pasin nogut bilong dispela graun. “Dispela man i sindaun long hos” em i mas kilim i dai ol dispela man tu “long dispela bainat i stap long maus bilong en.” Jisas bai tok, ol tu i gat asua na ol i mas i dai. Jon i no tok, ol bai go long dispela “paia.” Orait, yumi ken ting ol bai kirap bek o nogat? Baibel i no tok, ol man em Jas bilong Jehova i kilim ol i dai long dispela taim ol bai kirap bek. Tasol Jisas i bin tok, ol man i no gat pasin olsem sipsip ol bai “go long paia i no save dai, em dispela paia ol i redim pinis bilong Satan wantaim ol ensel bilong en,” em “pe nogut” bilong ol “i save stap oltaim.” (Matyu 25:33, 41, 46) Dispela em i laspela wok bilong “de bilong bikpela kot . . . na ol man i bin givim baksait long God, ol bai i bagarap olgeta.”—2 Pita 3:7; Nahum 1:2, 7-9; Malakai 4:1.
26. Armagedon bai mekim wanem?
26 Em nau, olgeta hap bilong oganaisesen bilong Satan long graun i pinis. “Namba wan skai” bilong bipo em i pinis, em ol wok politik. Na “graun” tu, em dispela pasin bilong graun ol man i save bihainim na Satan i bin kamapim, dispela tu i pinis olgeta. Na dispela “solwara” tu, em ol man nogut i bin bikhet long Jehova, dispela tu i no stap moa. (KTH 21:1; 2 Pita 3:10) Tasol Jehova bai mekim wanem long Satan? Yumi harim Jon i stori long dispela samting.