Maski Yumi Olsem Das, Wok Strong i Go!
“Em i save olsem em i bin kisim graun na wokim yumi na em i tingim yumi i olsem das tasol.”—SONG 103:14.
SKIN bilong yumi i olsem das tasol. “Bikpela i kisim graun na em i wokim man long en. Na em i winim win bilong laip i go insait long nus bilong man, na man i kisim laip.” (Stat 2:7) Dispela stori i olsem God i no mekim planti samting bilong wokim man, tasol samting em i mekim i stret wantaim stretpela save ol man bilong saiens i kisim pinis. God i wokim yumi long das bilong graun na ol 90 narapela narapela marasin i stap insait long graun ol i stap long skin bilong yumi. Wanpela saveman i tok, long skin bilong man i bikpela pinis, win oksijen em inap 65 pesen; kabon, 18 pesen; haidrojen, 10 pesen; naitrojen, 3 pesen; kalsium, 1.5 pesen; fosferus, 1 pesen; na ol narapela samting em inap olsem 1.5 pesen. Dispela i stret olgeta o nogat, i no bikpela samting. Yumi save tru: “Yumi i olsem das tasol”!
2 God Jehova tasol inap kisim das nating na wokim skin bilong yumi i gutpela tru na i narakain, a? Olgeta wok bilong God i gutpela olgeta na i no gat popaia long en, olsem na i no gat tok long em i wokim yumi olsem. Yumi tingim dispela narakain wok em i bin mekim em i nambawan tru, na yumi pilim moa yet olsem God i gat olgeta strong, na save, na gutpela tingting inap long mekim olgeta kain samting.—Lo 32:4; Song 139:14.
Senis i Kamap
3 God i wokim yumi long das na i gat sampela samting yumi no inap mekim. God i no laik bai dispela i putim hevi long yumi o pasim yumi tumas, na bai yumi bel hevi na i no amamas. Tasol sampela taim dispela i mekim na yumi inap bel hevi na i no amamas, olsem ol tok klostu long tok bilong Devit long Song 103:14 i makim. Bilong wanem i olsem? Long wanem Adam tupela Iv i bikhet long God na long dispela rot senis i kamap long ol pikinini tupela i kamapim bihain. Long ol, dispela tok olsem ol i “das tasol” em i makim narapela samting.a
4 God i wokim ol man long das na i gat sampela samting ol i no inap mekim, maski ol i gutpela olgeta. Tasol Devit i no toktok long dispela long Song 103:14. Em i toktok long ol samting nogut sin bilong Adam i kamapim long skin bilong yumi. Yumi ken save em i toktok long dispela, long wanem, em i tok: “[Jehova] i save lusim olgeta sin bilong mi, na em i save mekim orait olgeta sik bilong mi. Bikpela i kisim bek mi na mi no i dai. . . . Yumi inap kisim pe nogut bilong sin bilong yumi, tasol em i no save givim dispela pe nogut long yumi.” (Song 103:2-4, 10) Namba wan man na meri i gutpela olgeta, na maski God i wokim ol long das, sapos ol i bin i stap gut long God, bai i no gat wok long lusim sin bilong ol, long wanem, bai ol i no mekim sin; na i no gat wok long oraitim sik, long wanem, bai ol i no gat sik; na i no gat wok long kisim bek ol long i dai, olsem kirapim bek ol, long wanem, ol i no ken i dai.
5 Yumi no gutpela olgeta, na ol dispela samting Devit i toktok long en i save painim yumi olgeta. Oltaim yumi save pilim ol pasin kranki em sin i kamapim long yumi. Yumi save bel hevi long taim pasin kranki bilong yumi i mekim na i olsem yumi no wanbel moa wantaim Jehova o ol brata Kristen. Yumi save bel hevi taim pasin kranki bilong yumi yet o ol hevi bilong dispela graun bilong Satan i mekim na yumi no amamas moa. Wok bos bilong Satan i laik pinis nau na dispela graun bilong em i putim bikpela hevi moa long ol manmeri, na i moa yet long ol Kristen.—KTH 12:12.
6 Yu ting nau i hatwok moa long bihainim pasin Kristen? Sampela Kristen i tok, maski ol i stap longpela taim long tok i tru, i olsem ol i kamap kranki moa yet. Tasol nogat. Ating nau ol i pilim moa yet ol pasin kranki bilong ol na ol i pilim olsem ol i no inap bihainim gut ol stretpela lo bilong Jehova olsem ol i laik mekim. Tasol Kristen bai pilim olsem taim em i lain gut na save moa long ol dispela lo. Tasol bikpela samting em olsem: Maski yumi pilim olsem, yumi no ken larim dispela i mekim yumi i bel hevi na yumi pundaun olsem Satan i laik bai yumi mekim. Inap planti handet yia pinis, em i save mekim wok long dispela kain bel hevi bilong pundaunim ol wokboi bilong Jehova na bai ol i lusim lotu i tru. Tasol planti ol i givim bel tru long God, na ol i “no laikim tru” Satan, na ol i no pundaun olsem.—Song 139:21, 22; Sindaun 27:11.
7 Tasol i gat sampela samting inap mekim na bai ol wokboi bilong Jehova i bel hevi. Sapos yumi no amamas long ol wok yumi mekim, o yumi gat sik, o kros i kamap wantaim famili o ol pren o wanwok, dispela tu inap mekim na bai yumi bel hevi. Gutpela man Jop em i bel hevi tru na em i beten olsem: “God, i gutpela sapos yu haitim mi long ples bilong ol man i dai pinis, inap belhat bilong yu i slek olgeta. Na yu ken makim wanpela taim bilong tingim mi gen.” Jop em i “gutpela man tru na i no gat asua,” na em i save aninit long God na “bihainim olgeta tok” bilong em, tasol ol hevi i mekim na Jop i bel hevi, olsem na yumi no ken kirap nogut sapos kain samting olsem i painim yumi.—Jop 1:8, 13-19; 2:7-9, 11-13; 14:13.
8 Tasol yumi save, Jehova i save lukim bel bilong man na tingim ol gutpela laik bilong em, na dispela i mekim gut bel bilong yumi. Jehova i no sakim ol man i laik tru long mekim pasin em i laikim na ol i wok strong long mekim. Na sapos sampela taim yumi bel hevi, dispela inap makim gutpela samting olsem: Yumi no tingim wok bilong Jehova i samting nating; yumi laik mekim gut dispela wok. Sapos olsem, orait man i no save bel hevi long sampela taim, ating em i ting em i stap strong long spirit, na em i no pilim ol samting em i no strong long en olsem ol narapela i save pilim. Tasol Baibel i tok: “Sapos wanpela man i ting em i sanap strong, orait em i mas lukaut gut. Nogut em i pundaun.”—1 Korin 10:12; 1 Samuel 16:7; 1 King 8:39; 1 Stori 28:9.
Ol Tu i Olsem Das Tasol
9 Hibru sapta 11 i kolim nem bilong sampela witnes bilong Jehova paslain long Krais em ol i bilip strong. Ol Kristen bilong pastaim na long nau ol i bilip strong. Pasin bilong ol inap skulim gut yumi. (Lukim Hibru 13:7.) Olsem: Gutpela tru sapos ol Kristen i bihainim pasin bilong bilip bilong Moses. Moses i kisim wok bilong autim tok long king bilong Isip, em nambawan strongpela hetman long taim bilong Moses, na em i mas tokim em God bai mekim save long em. Ol Witnes Bilong Jehova long nau i gat wankain wok—ol i mas autim kain tok olsem long ol lotu giaman na ol narapela lain i birua long Kingdom bilong Krais i kamap pinis.—KTH 16:1-15.
10 I hatwok long mekim dispela wok, olsem Moses i makim. Em i tokim God: “Mi wanem kain man na bai mi inap i go long king bilong Isip na kisim ol Israel . . . i kam lusim Isip?” Em i ting em i no inap mekim na yumi inap pilim hevi bilong em, a? Na em i tingting planti long ol wanlain bai ting olsem wanem long em. Em i tok: “Ol Israel i no inap bilipim tok bilong mi na ol i no inap harim tok mi autim.” God i tokim em long ol samting em i mas mekim na bai ol i bilip. Tasol Moses i tingting planti long narapela samting tu. Em i tok: “Tasol Bikpela, bipo mi no man bilong toktok gut long ai bilong planti man. . . . Maus bilong mi i hevi tumas, na mi no inap toktok gut.”—Kisim Bek 3:11; 4:1, 10.
11 Ating sampela taim yumi kisim tingting olsem Moses. Yumi save long wok bilong God yumi mas mekim, tasol yumi pilim olsem yumi no inap mekim. Yumi ting olsem: ‘Mi wanem kain man na bai mi inap i go toktok wantaim ol man, em sampela i gat bikpela nem, o bikpela mani, o bikpela save, na mi laik skulim ol long pasin bilong God? Ol brata spirit bilong mi bai ting olsem wanem long tok mi bekim long miting o mi mekim long pletfom long Skul Bilong Wok Autim Tok? Ating ol bai lukim olsem mi sot long sampela save samting?’ Tasol yu mas save, Jehova i bin helpim Moses na inapim em long mekim wok, long wanem, Moses i bilip. (Kisim Bek 3:12; 4:2-5, 11, 12) Sapos yumi bihainim pasin bilong bilip bilong Moses, Jehova bai helpim yumi tu na inapim yumi long mekim wok.
12 Man i les o bel hevi, long wanem, em i bin mekim rong o pasin kranki, em inap pilim tru tok bilong Devit: “Mi save mi mekim rong pinis. Mi no inap lusim tingting long sin bilong mi.” Devit i krai long Jehova na em i tok: “Mi laik yu tekewe olgeta rong bilong mi.” Tasol maski em i bel hevi, em i no larim dispela i pinisim laik bilong em long mekim wok bilong Jehova. Em i tok: “Nogut yu rausim mi na . . . yu no ken tekewe [spirit bilong yu] long mi.” Tru tumas, Devit em i olsem “das tasol,” tasol Jehova i no givim baksait long em, long wanem, Devit i bilip tru long tok promis bilong Jehova olsem em i no ken givim baksait long man “i pilim hevi long sin na i daunim em yet.”—Song 38:1-9; 51:3, 9, 11, 17.
13 Yumi mas tingim “ol dispela manmeri bilong bipo” bambai yumi inap “ran strong long dispela resis God i bin makim bilong yumi,” tasol Baibel i no tok, yumi mas bihainim ol. Baibel i tok yumi mas bihainim lek bilong Jisas, em i Man bilong “inapim tru bilip bilong yumi”; yumi no ken bihainim ol man bilong graun, maski ol i gutpela aposel bilong pastaim.—Hibru 12:1, 2; 1 Pita 2:21.
14 Pol na Pita i strongpela Kristen, tasol sampela taim ol i pundaun. Pol i tok: “Gutpela pasin mi laik mekim, em mi no save mekim. Na pasin nogut mi no laik mekim, em mi save mekim.” “O sori, dispela hevi i bagarapim tru tingting bilong mi!” (Rom 7:19, 24) Na Pita i hambak na tokim Jisas: “Maski sapos ol arapela i lukim samting i kamap long yu na bilip bilong olgeta i pundaun na ol i lusim yu, mi bai i no inap lusim yu.” Jisas i toksave long Pita olsem tripela taim bai em i tok em i no save long Jisas, tasol Pita i hambak na tokim Bikman bilong em: “Maski sapos mi mas i dai wantaim yu, mi no inap tok olsem mi no save long yu. Nogat tru.” Tasol em i mekim. Em i popaia, olsem na em i krai nogut tru. Tru tumas, Pol na Pita i olsem das tasol.—Matyu 26:33-35.
15 Moses, na Devit, na Pol, na Pita, na ol narapela olsem ol i bin popaia na mekim pasin kranki, tasol ol i bin winim pait. Ol i mekim olsem wanem? Ol i bilip strong long Jehova na wetim em i helpim ol, na maski hevi i painim ol, ol i no lusim em. Ol i wetim em i givim “bikpela strong” long ol, “em i strong bilong God.” Na em i mekim; em i no larim ol i lus olgeta. Sapos yumi bilip strong, orait taim God i skelim pasin bilong yumi, yumi ken save em bai mekim stret olsem: “God em i no man nogut, na bai em i lusim tingting long ol gutpela wok yupela i bin mekim.” Dispela samting i kirapim yumi long wok strong i go, maski yumi i olsem das tasol!—2 Korin 4:7; Hibru 6:10.
Yumi Olsem Das Tasol na Dispela i Mekim Wanem Long Yumi Wan Wan?
16 Ol papamama na tisa i save, ol i mas skelim pasin bilong ol pikinini wan wan, na ol i no ken skelim wantaim pasin bilong ol brata susa o ol wanskul bilong em. Dispela i stret wantaim lo bilong Baibel ol Kristen i mas bihainim, olsem: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no mas skelim pasin bilong en wantaim pasin bilong narapela man.”—Galesia 6:4.
17 Jehova i gat lain bilong em, tasol em i save bihainim dispela lo na skelim pasin bilong olgeta wan wan. Rom 14:12 i tok: “Yumi olgeta wan wan bai yumi mas tokim God long as bilong olgeta pasin yumi bin mekim.” Jehova i save gut long olgeta wan wan wokboi bilong em. Em i save long ol pasin ol i bin kisim long papamama, na long skin na tingting na save bilong ol, na long ol gutpela pasin na pasin kranki i stap long skin bilong ol, na long ol samting ol inap mekim, na long wok ol i mekim long dispela bilong kamapim gutpela wok Kristen. Tok bilong Jisas long meri wanpis i tromoi tupela liklik mani long bokis mani long tempel, na tok piksa bilong em long pikinini wit i pundaun long gutpela graun, dispela inap strongim bel bilong ol Kristen i no bihainim gutpela tingting na ol i bel hevi, long wanem, ol i bin skelim pasin bilong ol yet wantaim pasin bilong narapela.—Mak 4:20; 12:42-44.
18 Tru, yumi olgeta i olsem das, tasol yumi mas skelim yumi yet na ting olsem: ‘Dispela i mekim wanem long mi yet?’ Olsem bai yumi wok strong inap tru long skel bilong yumi. (Sindaun 10:4; 12:24; 18:9; Rom 12:1) Yumi mas save gut long ol liklik pasin kranki bilong yumi bambai yumi ken wok strong long stretim. Taim yumi skelim yumi yet, yumi no ken lusim tingting olsem spirit holi i gat strong inap long helpim yumi long stretim pasin bilong yumi. Long rot bilong spirit holi, God i bin mekim ol strongpela wok olsem: Em i bin wokim olgeta samting long heven na long graun, na raitim Baibel, na maski nau em i taim nogut em i kamapim wanpela gutpela lain bilong nupela taim. Olsem na spirit holi bilong God em inap tru long givim gutpela tingting na strong long ol man i askim God long givim spirit holi long ol, na bai ol inap i stap gut long God.—Maika 3:8; Rom 15:13; Efesus 3:16.
19 Yumi amamas long save, Jehova i tingim yumi i olsem das tasol! Tasol nogut yumi ting, long dispela as yumi ken slek long wok o mekim rong. Nogat! Dispela i olsem pasin marimari bilong Jehova. Nogut yumi “givim baksait long God,” na “senisim tok bilong marimari bilong God, na mekim em i kamap tok bilong ol kain kain pasin nogut,” na yumi givim baksait long Hetman Krais Jisas. (Jut 4) Tru, yumi olsem das tasol, tasol nogut yu ting olsem: ‘Mi das tasol, olsem na mi ken mekim pasin nogut.’ Kristen i mas wok strong long daunim ol laik na tingting nogut; em i mas paitim bodi bilong em na mekim em i bihainim laik bilong em, bambai em i no ken “givim bel hevi long Holi Spirit.”—Efesus 4:30; 1 Korin 9:27.
20 Dispela graun bilong Satan i laik pinis, olsem na i no taim bilong slek—yumi no ken slek long autim tok bilong Kingdom na long kamapim moa yet ol gutpela pasin bilong spirit holi. Yumi mas “wok strong” long mekim. Yumi mas wok strong i go, long wanem, yumi save “hatwok [yumi] i save mekim long Bikpela, em bai i no inap lus nating.” (1 Korin 15:58) Jehova bai strongim yumi, olsem Devit i tok: “Bai em i no larim wanpela samting i bagarapim ol stretpela man.” (Song 55:22) Yumi amamas tru long Jehova i orait long yumi yet i ken insait long nambawan gutpela wok em i bin givim long yumi ol man bilong graun—maski yumi i olsem das tasol!
[Ol Futnot]
a Wanpela buk bilong kamapim as bilong ol tok bilong Baibel (Herders Bibelkommentar) em i stori long tok bilong Song 103:14 olsem: ‘Em i save olsem em i bin kisim das bilong graun na wokim ol man, na em i save ol i gat ol pasin kranki na ol i save stap sotpela taim tasol, em dispela i bin putim hevi long ol kirap long taim namba wan man i mekim sin.’
Yu Inap Stori Long Dispela?
◻ Olsem wanem tok bilong Song 103:14 long yumi i olsem das tasol i narapela kain long tok bilong Stat 2:7?
◻ Olsem wanem tok bilong Hibru sapta 11 inap strongim ol Kristen long nau?
◻ Sapos yumi bihainim lo bilong Galesia 6:4, olsem wanem yumi bihainim gutpela tingting?
◻ Olsem wanem tok bilong Hibru 6:10 na 1 Korin 15:58 inap strongim bel bilong yumi na bai yumi no bel hevi?
[Askim Bilong Stadi]
1. Tok bilong Baibel long God i wokim yumi long das bilong graun, dispela tok i stret wantaim saiens o nogat? Stori long dispela.
2. Taim yu tingim pasin bilong God long wokim yumi, yu pilim olsem wanem? I gat wanem as na yu pilim olsem?
3, 4. (a) God i wokim man long das, tasol em i no laik bai wanem samting i kamap? (b) Devit i toktok long wanem samting long Song 103:14? Olsem wanem ol tok klostu i helpim yumi long kisim dispela save?
5. Olsem wanem na i no hatwok long kisim gut tok bilong Devit?
6. Wanem samting inap mekim sampela Kristen i bel hevi? Satan inap mekim wanem wok long rot bilong dispela kain bel hevi?
7. Wanem samting inap painim yumi long sampela taim olsem i bin painim Jop?
8. Sapos sampela taim yu bel hevi, dispela inap makim wanem gutpela samting?
9, 10. (a) Gutpela sapos ol Kristen i bihainim pasin bilong bilip bilong husat? (b) Moses i ting olsem wanem long wok em i kisim?
11. Olsem Moses yumi inap kisim wanem tingting? Tasol sapos yumi bilip, yumi ken save wanem samting bai kamap?
12. Sapos yumi bel hevi, long wanem, yumi bin mekim rong o pasin kranki, olsem wanem pasin bilong bilip bilong Devit inap strongim bel bilong yumi?
13, 14. (a) Bilong wanem yumi no ken bihainim ol man? (b) Pol na Pita i mekim wanem na dispela i makim olsem ol tu i olsem das tasol?
15. Tru yumi olsem das tasol, tasol wanem samting i kirapim yumi long wok strong i go?
16, 17. Taim Jehova i skelim pasin bilong ol man, olsem wanem em i bihainim lo em Galesia 6:4 i kamapim?
18. (a) Yumi i olsem das tasol, tasol bilong wanem yumi mas skelim ol samting dispela i mekim long yumi yet? (b) Taim yumi skelim yumi yet, olsem wanem na yumi no ken bel hevi na ting yumi lus olgeta?
19. Tru, yumi i olsem das tasol, tasol nogut yumi ting olsem wanem?
20. (a) Yumi mas “wok strong” long mekim wanem tupela samting i olsem “wok bilong Bikpela”? (b) I gat wanem as na yumi ken bilip olsem yumi no ken lus?
[Ol Piksa long pes 10]
Tru ol Kristen i bihainim pasin bilong bilip bilong ol wanlotu, tasol ol i bihainim lek bilong Jisas, em Man bilong inapim tru bilip bilong yumi