Yumi Inap Kisim Bek Pasin Bilong Bilip Long Narapela!
TRU, pasin i kamap long nau olsem narapela i no bilip long narapela em i wanpela mak bilong “taim bilong las de,” tasol dispela pasin i bin kamap tu planti tausen yia i go pinis. (2 Timoti 3:1) Em i bin kamap pastaim long wanpela ples yumi bai ting em i no inap kamap long en—long wanpela paradais. Baibel i stori long dispela ples olsem: “God, Bikpela i wokim wanpela gaden i stap long Iden, long hap bilong sankamap. Na long dispela gaden God i putim dispela man em i bin wokim. Na God i mekim graun i kamapim ol kain kain diwai, pikinini bilong ol i gutpela long kaikai. Olgeta dispela diwai i naispela tru. Namel long dispela gaden i gat wanpela diwai i stap, em diwai bilong givim laip. Na i gat narapela diwai tu i stap, em diwai bilong givim gutpela save long wanem samting i gutpela na wanem samting i nogut.”—Stat 2:8, 9.
Ol ves i kam bihain long dispela tok i helpim yumi long save olsem wanem dispela samting yumi stori pinis long en i mekim na planti man long nau ol i no bilip long ol narapela. Baibel i tok: “God i tokim man olsem, ‘Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.’ ” (Stat 2:16, 17) Yu ting i gat as na Adam i no inap bilip long dispela tok Jehova i mekim?
Baibel i tok moa: “God, Bikpela i bin wokim olgeta animal, tasol i no gat wanpela bilong ol inap winim snek long tok gris. Na snek i askim meri olsem, ‘Ating God i tambuim yutupela long kaikai pikinini bilong olgeta diwai bilong gaden, a?’ Na meri i bekim tok olsem, ‘Mitupela i ken kaikai pikinini bilong olgeta diwai bilong dispela gaden. Tasol wanpela diwai i sanap namel tru, em God i tambuim mitupela long kaikai pikinini bilong en. God i bin tokim mitupela olsem, “Yutupela i no ken kaikai pikinini bilong dispela diwai, na tu yutupela i no ken holim, nogut yutupela i dai.” ’ Orait na snek i tokim meri olsem, ‘Nogat. Yutupela i no inap i dai. Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God. God i save long dispela, olsem na em i tambuim yutupela long kaikai pikinini bilong dispela diwai.’ Meri i lukim dispela diwai i naispela tru na i gat ol gutpela pikinini tru bilong kaikai i stap long en. Na meri i tingting olsem ‘I gutpela long mi kaikai pikinini bilong dispela diwai na mi kisim olkain gutpela save.’ Olsem na meri i kisim pikinini bilong dispela diwai na i kaikai. Na em i givim sampela long man bilong em, na man tu i kaikai.”—Stat 3:1-6.
Taim Adam na Iv i sakim dispela tok lukaut i klia tru em God i bin givim long ol, tupela i kamapim klia olsem ol i no bilip tru long Jehova. Ol i bihainim pasin bilong Satan, em dispela birua bilong God i bin toktok wantaim Iv long maus bilong wanpela snek tru. Satan i no bilip olsem pasin bilong Jehova long mekim wok bos em i gutpela. Em i hambak na i laik kisim bikpela namba tu, na dispela tupela samting i mekim na em i bikhet long God na giamanim Adam tupela Iv long mekim olsem. Em i pulim tupela long kisim tingting olsem God i no inap long ol i ken bilip tru long em.
Ol i No Pren Gut Wantaim
Ating yu bin lukim olsem, sapos man i no bilip tru long ol narapela, bai em i hatwok long stap pren bilong wanpela man. Inap olsem 100 yia paslain long Krais, Publilius Sairus bilong Itali, em man bilong raitim buk, em i raitim tok olsem: “Pasin bilong bilip long narapela em tasol i mekim na narapela inap stap pren wantaim narapela.” Adam tupela Iv i bikhet long God, na dispela i kamapim klia olsem ol i no bilip long God. Olsem na i no gat as na God i ken bilip long tupela. Pasin bilong bilip long narapela em pastaim i stap namel long ol, nau em i bagarap, olsem na God i no stap pren moa wantaim dispela namba wan man na meri. I no gat samting i makim olsem Jehova i toktok gen wantaim tupela bihain long taim em i kolim strafe bilong pasin bikhet em tupela i bin mekim.
Pasin wanbel i stap namel long Adam tupela Iv em tu i bagarap. Jehova i toksave long Iv: “Bai yu gat bikpela pen long taim yu karim pikinini. Tasol bai yu gat bikpela laik yet long man bilong yu, na bai em i bosim yu.” (Stat 3:16) Adam i no bosim moa meri bilong em long pasin sori olsem God i laik bai em i mas mekim, nogat; nau em i kamap bikman bilong em na daunim em.
Taim tupela i mekim rong pinis, Adam i laik putim asua i go long meri bilong em. Em i ting samting meri i mekim em i as na God i rausim tupela long gutpela gaden na tupela i mas i stap long ples bus, na nau ol i mas hatwok i go inap long taim ol i go bek long graun. (Stat 3:17-19) Yumi ken ting olsem dispela samting i mekim na kros i stap namel long tupela. Ating Adam i kros na em i tokaut olsem em i no ken harim gen tok bilong Iv. Ating em i pilim olsem i stret em i tokim Iv: ‘Harim! Kirap long dispela taim na i go, mi stap bos!’ Tasol ating Iv i lukim olsem Adam i no bin mekim gut wok bos bilong em, olsem na Iv i no bilip moa long em. Tasol maski wanem samting i bin kamap namel long tupela, yumi ken save, taim tupela i mekim tok i makim olsem ol i no bilip long God, dispela i mekim na tupela i no stap pren moa wantaim God, na pasin wanbel i stap namel long tupela i bagarap.
Yumi Ken Bilip Tru Long Husat?
Samting Adam tupela Iv i mekim i kamapim klia olsem i no olgeta man ol inap tru long yumi ken bilip long ol. Olsem wanem yumi ken save, husat yumi inap bilip long em na husat yumi no inap bilip long em?
Song 146:3 i tokim yumi: “Ol king na ol man bilong graun i no inap kisim bek yu. Olsem na nogut yu bilip long ol.” Na Jeremaia 17:5-7 i tok: “Sapos man i givim baksait long mi na i ting, ol man tasol i gat strong na ol inap helpim em long stap gut, orait dispela man bai i bagarap. Tasol sapos man i bilip strong long mi, Bikpela, na i save mi tasol mi inap helpim em, orait bai mi mekim gut tru long dispela man.”
Tru, i no olsem long olgeta taim i gat rong long bilip long ol man, nogat. Dispela tupela skripsa i makim olsem pasin bilong bilip long God i no save lus nating, tasol pasin bilong bilip long ol man, sampela taim dispela i kamapim hevi. Olsem: Sapos yumi bilip long ol man na wetim ol i kamapim samting em God tasol inap mekim—olsem kisim bek ol man na kamapim bel isi tru na bai yumi ken stap gut—bai yumi wet nating, long wanem, ol man i no inap tru long kamapim dispela samting.—Song 46:9; 1 Tesalonaika 5:3.
Yumi ken bilip long ol man na long ol oganaisesen bilong dispela graun sapos ol i mekim ol samting i stret wantaim laik bilong God na bihainim ol lo bilong em. Olsem na sapos yumi laik kirapim ol narapela long ol i ken bilip long yumi, yumi mas tok tru tasol, na mekim stretpela pasin, na bihainim ol tok yumi mekim. (Sindaun 12:19; Efesus 4:25; Hibru 13:18) Sapos yumi bihainim ol lo bilong Baibel long wokabaut bilong yumi, long dispela rot tasol bai yumi inap tru long ol narapela i ken bilip long yumi na dispela samting bai strongim bel bilong ol narapela na yumi tu.
Kisim Bek Pasin Bilong Bilip Long God
I gat as tru na ol Witnes Bilong Jehova i bilip long God na ol i save strongim ol narapela long mekim olsem. Jehova i save stap gut long yumi, na oltaim yumi ken bilip na wetim em i mekim ol samting em i bin tok long mekim, long wanem, “God i no inap tru long giaman.” Pasin bilong yumi long bilip long gutpela God bilong pasin sori em i no inap lus nating—samting yumi wetim em i kamapim, em bai kamapim tru.—Hibru 6:18; Song 94:14; Aisaia 46:9-11; 1 Jon 4:8.
Ol man i wanbel long bilip tru long Jehova na ol i bihainim ol lo bilong em, bel bilong ol i kirapim ol na narapela i bilip tru long narapela. Yumi stap namel long ol man i no bilip long ol narapela, olsem na yumi ken amamas tru taim yumi painim ol man yumi inap bilip tru long ol! Sapos yumi inap bilip tru long ol samting olgeta narapela i mekim o toktok long en, orait sindaun bilong yumi bai i narapela kain tru! Dispela samting bai kamap tru tru long nupela taim klostu nau God bai kamapim. Bai i no gat wanpela taim i kamap gen na ol man i no bilip long ol narapela, nogat tru!
Olsem wanem? Yu laik stap laip taim dispela samting i kamap? Sapos olsem, orait ol Witnes Bilong Jehova i laik singautim yu long kisim sampela save moa long ol samting God i laik bai yumi mas mekim bilong kisim laip, na long dispela rot bai yu strongim bilip bilong yu long God na long ol tok promis bilong em. Long rot bilong stadi long Baibel bai yu kisim save olsem God i stap, na em i tingim i stap bilong yumi ol man, na liklik taim em bai kirap na mekim wok bilong stretim ol hevi bilong dispela graun long rot bilong Kingdom bilong em. Planti milion manmeri i bin kisim save long pasin bilong bilip long God na long Tok bilong em, em Baibel. Ol Witnes Bilong Jehova bai amamas long soim yu long pasin bilong ol long mekim stadi Baibel long ol man, na dispela stadi i no gat pe. O yu ken raitim pas i go long ol lain bilong wokim dispela nius sapos yu laik kisim sampela save moa.
[Rait long pes 5]
Ol man i no bilip long God na dispela samting i save bagarapim pasin pren i stap namel long ol
[Rait long pes 6]
Yumi ken bilip long ol man sapos ol i mekim ol samting i stret wantaim ol lo bilong God