Ol Ofa God i Bin Laikim
“Olgeta hetpris i gat wok bilong bringim ol presen i kam long God na bilong mekim ol ofa long em.”—HIBRU 8:3.
1. Bilong wanem ol man i pilim olsem ol i mas go long God?
WANPELA saveman bilong Baibel, Alfred Edersheim, i tok: “Ol man i gat laik long mekim ofa, wankain olsem ol i gat laik long mekim beten. Pasin bilong mekim ofa i makim em i gat wanem tingting long em yet, na pasin bilong mekim beten i makim em i gat wanem tingting long God.” Kirap long taim sin i kamap long graun, sin i mekim na nau ol man i gat asua, na ol i stap longwe long God, na ol i no gat rot long stretim. I mas i gat samting bilong mekim gut bel bilong ol. Olsem na taim ol man i save ol i stap nogut olsem, ol i pilim olsem ol i mas i go long God bambai em i ken helpim ol.—Rom 5:12.
2. Baibel i stori long wanem ol ofa bilong bipo?
2 Stori bilong ofa bilong Kein na Abel em namba wan taim Baibel i stori long man i mekim ofa long God. Baibel i tok: “Kein i kamautim kaikai long gaden na em i bringim sampela na i mekim ofa long Bikpela. Na Abel i kisim wanpela naispela patpela pikinini sipsip. Dispela sipsip em i namba wan pikinini sipsip mama i bin karim. Na Abel i kilim na i mekim ofa long Bikpela.” (Stat 4:3, 4) Taim God i lukautim Noa na em i no bagarap long Bikpela Tait i bin bagarapim ol man nogut, bel bilong Noa i pilim tru na dispela i kirapim em long “mekim ofa” long Jehova. (Stat 8:20) Gutpela wokboi na pren bilong God, em Abraham, em i tingim ol promis na blesing bilong God, na dispela i kirapim em long ‘wokim alta na kolim nem bilong Bikpela.’ (Stat 12:8; 13:3, 4, 18) Bihain, wanpela bikpela traim tru i kamap bilong traim bilip bilong Abraham—Jehova i tokim em long givim pikinini bilong em, Aisak, olsem ofa em paia i kukim olgeta. (Stat 22:1-14) Ol dispela stori, maski ol i sotpela, ol i helpim yumi long save gut long dispela tok bilong ofa em nau bai yumi stori long en.
3. Ol ofa i save mekim wanem wok insait long lotu?
3 Ol dispela stori na sampela stori moa bilong Baibel ol i kamapim klia olsem pasin bilong mekim ofa i bin i stap olsem wanpela bikpela hap wok bilong lotu paslain tru long taim Jehova i putim ol lo bilong bosim dispela wok. Olsem na wanpela buk i tok, “ofa” em i ‘wanpela pasin bilong lotu—man i givim samting long wanpela god bambai em i ken i stap gut o pas gen wantaim dispela god.’ Tasol dispela em i kamapim sampela bikpela askim em yumi mas tingim gut. Olsem: Bilong wanem i mas i gat ofa insait long lotu? God i laikim wanem kain ofa? Ol ofa bilong bipo inap givim wanem tingting long yumi long nau?
Bilong Wanem i Mas i Gat Ofa?
4. Adam tupela Iv i mekim sin na wanem samting i kamap long dispela?
4 Taim Adam i mekim sin, em i mekim long laik bilong em yet. Em i sakim tok na kisim pikinini bilong diwai bilong givim save long samting i gutpela na samting i nogut, na em i kaikai. Pe bilong dispela pasin bikhet, em dai, olsem God i bin tokaut klia: “Sapos yu kaikai, wantu bai yu dai.” (Stat 2:17) Bihain Adam na Iv i kisim pe bilong sin—tupela i dai.—Stat 3:19; 5:3-5.
5. Bilong wanem Jehova i kirap na mekim wok bilong helpim ol pikinini bilong Adam? Em i mekim wanem bilong helpim ol?
5 Tasol olsem wanem long ol pikinini bilong Adam? Ol i kisim sin long Adam, olsem na ol hevi i bin painim namba wan man na meri em i save painim ol tu—ol i stap longwe long God, na ol i no gat rot, na ol i dai. (Rom 5:14) Tru, Jehova em i God bilong mekim stretpela pasin na em i gat strong, tasol em i God bilong pasin sori tu. (1 Jon 4:8, 16) Olsem na em i kirap na wokim rot bilong helpim ol man long kamap wanbel gen wantaim em. Baibel i tok, “Sin i save givim pe long ol wokboi bilong en. Dispela pe em dai tasol.” Orait bihain long dispela, Baibel i tok: “Tasol God i save givim nating presen long yumi, em laip i stap oltaim. Dispela laip yumi kisim long wok bilong Jisas Krais, Bikpela bilong yumi.”—Rom 6:23.
6. Wanem laik bilong Jehova long samting nogut i bin kamap long sin bilong Adam?
6 Bilong ol i ken kisim dispela presen, God Jehova i wokim rot bilong inapim dispela samting i bin lus long sin bilong Adam. Long tok Hibru, tok ka·phar ʹ i olsem “karamapim” o “rausim,” na sampela taim ol i tanim olsem “tekewe sin.”a Olsem na yumi ken tok: Jehova i wokim wanpela rot bilong karamapim sin ol man i bin kisim long Adam, na long rausim tu ol samting nogut i bin kamap long dispela sin, na ol man ol inapim mak bilong kisim dispela presen, bai ol inap lusim kalabus bilong sin na i dai.—Rom 8:21.
7. (a) Taim God i kolim strafe bilong Satan, dispela i makim wanem gutpela samting ol man i ken wetim? (b) Wanem dispela pe bilong kisim bek ol man i kalabus long sin na dai?
7 Bihain stret long taim namba wan man na meri i mekim sin, God i mekim wanpela tok i makim olsem em bai pinisim kalabus bilong sin na dai. Taim em i kolim strafe bilong Satan em snek i makim, Jehova i tok: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long [pikinini] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Dispela tok profet i makim olsem i gat gutpela samting em ol man i bilip long dispela tok promis ol inap wetim i kamap. Tasol wanpela man i mas givim samting olsem pe bambai ol man i ken lusim kalabus bilong sin na i dai. Dispela Pikinini God i bin tok promis long kamapim, em i no ken i kam bilong bagarapim Satan na em tasol, nogat; snek i mas kaikaim lek bilong em, olsem em i mas i dai, tasol i no bilong olgeta taim.
8. (a) Olsem wanem yumi save Kein i no winim mak? (b) Wanem samting i mekim na God i orait long ofa bilong Abel?
8 Ating Adam na Iv i wok long tingim dispela Pikinini bilong promis em i husat. Taim Iv i karim namba wan pikinini bilong em, Kein, em i tok: “Bikpela i helpim mi na mi kisim pikinini man.” (Stat 4:1) Olsem wanem? Em i ting pikinini man bilong em bai kamap dispela Pikinini God i bin tok promis long en? Maski em i gat dispela tingting o nogat, Kein, na ofa bilong em tu, i no winim mak. Tasol brata bilong em, Abel, em i bilip long dispela tok promis bilong God na bel i kirapim em long kisim sampela namba wan sipsip mama i bin karim na em i mekim ofa long Jehova. Baibel i tok: “Abel i bilip long God, na i mekim ofa long em. Na God i laikim ofa bilong Abel, tasol em i no laikim ofa bilong Kein. Abel i bilip, na long dispela as . . . God i kolim em stretpela man.”—Hibru 11:4.
9. (a) Abel i bilip long wanem samting? Em i mekim wanem bilong kamapim bilip bilong em? (b) Ofa bilong Abel i mekim wanem wok?
9 Abel i bilip olsem i gat wanpela God i stap, na Kein tu i bilip olsem—tasol Abel i no bilip long dispela samting tasol. Em i bilip tu long tok promis bilong God long kamapim wanpela Pikinini bilong kisim bek ol man i stap gut long Em. God i no tokim Abel long rot bilong mekim olsem, tasol dispela tok promis bilong God i bin helpim Abel long save i mas i gat wanpela man em snek bai kaikaim lek bilong em. Em nau, em i save blut i mas kapsait—olsem i mas i gat ofa. Abel i kisim samting i gat laip na blut na em i givim olsem presen long As bilong laip—ating bilong makim olsem em i gat bikpela laik long dispela tok promis bilong Jehova i mas kamap tru na em i wetim dispela samting i kamap. Dispela bilip bilong Abel i mekim na Jehova i amamas long ofa bilong em, na i kamapim klia wok tru bilong ol ofa, olsem: em rot bilong ol sinman i ken i go klostu long God na bai em i ken orait long ol.—Stat 4:4; Hibru 11:1, 6.
10. Taim Jehova i tokim Abraham long givim Aisak olsem ofa, olsem wanem dispela i kamapim klia bikpela samting ol ofa i makim?
10 Bikpela samting ol ofa i makim i bin kamap ples klia taim Jehova i tokim Abraham long givim pikinini bilong em, Aisak, olsem ofa em paia i kukim olgeta. Maski Abraham i no mekim tru tru, tasol dispela ofa i stap olsem piksa bilong samting Jehova yet bai mekim long bihain—em bai givim Pikinini bilong em olsem ofa i winim tru olgeta narapela ofa bambai em inap kamapim laik bilong Em long ol man. (Jon 3:16) Long rot bilong ol ofa bilong Lo Bilong Moses, Jehova i kamapim ol piksa bilong skulim lain bilong em long ol samting ol i mas mekim bilong em i ken lusim ol rong bilong ol, na bilong strongim bilip bilong ol olsem em bai kisim bek ol. Dispela inap lainim yumi long wanem samting?
Ol Ofa Jehova i Save Orait Long En
11. I gat wanem tupela kain ofa em hetpris bilong Israel i bin mekim? I gat wanem as na em i mekim?
11 Aposel Pol i tok: “Olgeta hetpris i gat wok bilong bringim ol presen i kam long God na bilong mekim ol ofa long em.” (Hibru 8:3) Taim Pol i toktok long ol ofa em hetpris bilong Israel i bin mekim, Pol i brukim ol dispela ofa i go olsem tupela kain, olsem “presen” na “ofa,” o “ofa bilong tekewe sin.” (Hibru 5:1) Taim ol man i givim presen long narapela, ol i save givim bilong soim olsem ol i laikim em na pilim tru gutpela samting em i bin mekim long ol, na bilong helpim ol long kamap pren bilong narapela na bai em i ken laikim ol na orait long ol. (Stat 32:20; Sindaun 18:16) Olsem tasol, planti ofa em Lo i tok ol man i mas mekim, ol i olsem “presen” ol i givim long God na bai God i ken laikim ol na orait long ol. Taim ol i brukim Lo, ol i mas mekim “ofa bilong tekewe sin” bilong stretim rong ol i mekim. Kisim Bek, Wok Pris, Namba, na ol narapela buk bilong Pentatuk, ol i stori long kain kain ofa. Ating i hatwok long tingim olgeta liklik liklik samting bilong ol ofa, tasol i gat sampela bikpela samting bilong ol em i gutpela long yumi tingim.
12. Wanem hap long Baibel i stori gut long ol ofa ol i mas mekim aninit long Lo?
12 Wok Pris sapta 1 i go 7 i stori long 5-pela kain ofa—ofa em paia i kukim olgeta, ofa bilong kukim wit, ofa bilong kamap wanbel wantaim God, ofa bilong tekewe sin, na ofa bilong mekim i dai asua—ol dispela sapta i stori long olgeta ofa wan wan, maski i gat sampela ofa ol i save mekim wantaim. Ol i stori tupela taim long ol dispela ofa, na i gat narapela narapela as na ol i stori long ol: namba wan taim, long Wok Pris 1:2 i go 6:7, ol i stori long ol samting ol i mas ofaim long alta, na namba tu taim, long Wok Pris 6:8 i go 7:36, ol i stori long wanem ol hap i bilong ol pris na wanem ol hap i bilong man i mekim ofa. Sapta 28 na 29 bilong Buk Namba i olsem wanpela lista, em i kolim ol samting ol i mas ofaim long olgeta de, na wik, na mun, na long ol bikpela bung i kamap long olgeta yia.
13. Stori long ol ofa ol man i givim olsem presen long God long laik bilong ol yet.
13 Sampela ofa ol i ofaim long laik bilong ol yet olsem presen o rot bilong i go klostu long God bambai em i ken orait long ol, na ol i olsem: ofa em paia i kukim olgeta, ofa bilong kukim wit, na ofa bilong kamap wanbel wantaim God. Sampela saveman i tok, hap tok Hibru yumi tanim olsem “ofa em paia i kukim olgeta,” em i makim “ofa i go antap.” Dispela i stret, long wanem, taim ol i mekim ofa em paia i kukim olgeta, ol i kukim animal antap long alta na gutpela smel bilong ofa i wok long go antap long God. Wanpela bikpela samting bilong ofa em paia i kukim olgeta, i olsem: Taim ol i tromoi pinis blut long alta, orait nau ol i givim dispela animal olgeta long God. Ol pris i larim “paia i kukim olgeta inap sit bilong paia tasol i stap. Na bai Bikpela i smelim smel bilong dispela ofa bilong abus na bai em i laikim na i belgut long en.”—Wok Pris 1:3, 4, 9; Stat 8:21.
14. Ol i mekim ofa bilong kukim wit olsem wanem?
14 Wok Pris sapta 2 i stori long ofa bilong kukim wit. Em wanpela ofa ol man i givim long laik bilong ol yet. Ol i wokim plaua i gutpela tru na ol i kapsaitim wel long en na sanda ol i kolim frankinsens, bilong kamapim smok i gat gutpela smel. “Wanpela pris i mas putim wanpela han long dispela plaua na kisim liklik hap na kukim long alta. Dispela liklik hap plaua i makim tru olgeta hap plaua dispela man i ofaim long Bikpela. Na bai Bikpela i smelim dispela ofa bilong kukim wit, na em bai i laikim na i belgut long en.” (Wok Pris 2:2) Ol i save tanim sanda frankinsens wantaim ol narapela paura samting bilong kukim long alta bilong smok i gat gutpela smel—em i stap long haus lotu sel na tempel. (Kisim Bek 30:34-36) Ating King Devit i tingim dispela samting taim em i tok: “Mi laik yu kisim prea bilong mi olsem smok i gat gutpela smel i go long yu, na olsem ofa mi mekim long nait.”—Song 141:2.
15. Ofa bilong kamap wanbel wantaim God i gat wanem wok bilong en?
15 Nem bilong narapela ofa ol i mekim long laik bilong ol yet, em ofa bilong kamap wanbel wantaim God, em Wok Pris sapta 3 i stori long en. Dispela nem yumi ken tanim tu olsem “ofa bilong stap bel isi.” Long tok Hibru, dispela tok “bel isi” i makim olsem i no gat pait, tasol i no dispela samting tasol. “Long Baibel, bel isi i makim dispela samting, na i makim tu pasin bilong i stap wanbel wantaim God, na gutpela sindaun, na amamas.” (Buk Studies in the Mosaic Institutions) Olsem na taim ol i mekim ofa bilong kamap wanbel wantaim God, i no bilong helpim ol long i stap bel isi wantaim em, olsem bilong mekim gut bel bilong em na em i no ken kros long ol, nogat. Ol i mekim dispela ofa bilong kamapim tenkyu bilong ol olsem God i orait long ol na ol i stap bel isi wantaim em. Taim ol i ofaim pinis blut na gris long Jehova, ol pris na man i mekim ofa ol i save kisim hap bilong dispela ofa na kaikai. (Wok Pris 3:17; 7:16-21; 19:5-8) Man i mekim ofa, na ol pris, na God Jehova, i olsem ol i kaikai wantaim, bilong makim olsem bel isi i stap namel long ol.
16. (a) Ofa bilong tekewe sin na ofa bilong mekim i dai asua ol i gat wanem wok? (b) Olsem wanem ol i narapela kain long ofa em paia i kukim olgeta?
16 Sampela ofa ol man i mekim bilong God i ken lusim rong bilong ol o karamapim rong ol i mekim long Lo, em ofa bilong tekewe sin na ofa bilong mekim i dai asua. Ol dispela ofa tu ol i save kukim long paia long alta, tasol ol i narapela kain long ofa em paia i kukim olgeta—ol i no ofaim animal olgeta long God—ol i ofaim gris na sampela hap bilong en tasol. Ol narapela hap bilong animal ol i kisim i go ausait long kem na paia i kukim, o sampela taim ol pris i kaikai. Dispela ofa i narapela kain long ofa em paia i kukim olgeta na dispela i gat bikpela insait bilong en. Ofa em paia i kukim olgeta ol i givim olsem presen long God na bai ol i ken i go klostu long em, olsem na ol i ofaim long God wanpela tasol na ol i givim animal olgeta long em. Paslain long ol i mekim ofa em paia i kukim olgeta, ol i mekim ofa bilong tekewe sin o ofa bilong mekim i dai asua. Dispela i makim olsem: Bilong God i ken orait long presen bilong ol sinman, pastaim em i mas lusim sin bilong ol.—Wok Pris 8:14, 18; 9:2, 3; 16:3, 5.
17, 18. Ofa bilong tekewe sin em i bilong helpim husat? Wanem wok bilong ol ofa bilong mekim i dai asua?
17 Ofa bilong tekewe sin, dispela kain ofa i bilong man i no tingting gut na em i mekim rong long Lo, olsem em i pundaun tasol na mekim rong. “Sapos wanpela man o meri i no tingting gut na i brukim wanpela lo bilong Bikpela, orait em i mekim sin,” na nau dispela man i mas mekim ofa bilong tekewe sin, na ofa i mas stret wantaim wok o namba bilong em. (Wok Pris 4:2, 3, 22, 27) Tasol sapos man o meri i mekim sin na em i no tanim bel, orait ol i mas kilim em i dai—i no gat ofa bilong tekewe sin bilong dispela kain man.—Kisim Bek 21:12-15; Wok Pris 17:10; 20:2, 6, 10; Namba 15:30; Hibru 2:2.
18 Wok Pris sapta 5 na 6 i kamapim klia wok bilong ofa bilong mekim i dai asua. Maski man i no tingting gut na em i mekim sin, sapos dispela samting i bin rongim ol narapela o God Jehova, orait em i gat asua na em i mas stretim dispela rong. Sampela kain sin i olsem: man i mekim rong na em wanpela tasol i save long en (5:2-6); em i no givim “samting long Bikpela olsem em i mas givim” (5:14-16); ating man i save em i mekim rong, tasol em i mekim, long wanem, skin na ol laik nogut i stap long bel i kirapim em long mekim (6:1-3). Man i mas autim ol dispela sin, na tu, sapos em i bin kisim samting long pasin stil o giaman, orait em i mas bekim bek dispela samting na givim ofa long Jehova bilong mekim i dai asua.—Wok Pris 6:4-7.
Samting i Gutpela Moa
19. Maski ol Israel i gat Lo na ol ofa bilong en, bilong wanem God i no orait moa long ol?
19 Lo Bilong Moses wantaim ol planti ofa bilong en, God i givim long ol Israel bilong helpim ol long i go klostu long em na bai em i ken orait long ol na mekim gut long ol i go inap long Pikinini bilong promis i kamap. Aposel Pol, em wanpela Juda long skin, em i tok: “Lo i stap olsem waspapa bilong yumi, bilong bringim yumi i kam long Krais, bai yumi ken bilip long gutnius na God i ken kolim yumi ol stretpela manmeri.” (Galesia 3:24) Sori tru, lain Israel i no larim Lo i bringim ol i kam long Krais—ol i mekim wok nogut long en. Olsem na ol dispela planti planti ofa ol i mekim ol i kamap samting nogut tru long ai bilong Jehova. Em i tok: “Mi les pinis long ol sipsip yupela i save bringim olsem ofa bilong paia i kukim olgeta, na mi no laikim moa ol gris bilong ol gutpela patpela abus bilong yupela. Mi inap pinis long blut bilong ol bulmakau man na bilong ol pikinini sipsip na bilong ol meme man.”—Aisaia 1:11.
20. Wanem samting i kamap long Lo na ol ofa bilong en long 70 C.E.?
20 Long yia 70 C.E., pasin na lo ol Juda i stap aninit long en, na tempel na lain pris bilong ol, ol i pinis. Orait nau ol i no inap mekim moa ol ofa long pasin olsem Lo i makim. Tasol olsem wanem? Dispela i makim olsem ol ofa bilong Lo i no bikpela samting long ol man bilong nau ol i save lotuim God? Bai yumi skelim dispela samting long stori i kamap bihain long dispela.
[Futnot]
a Buk Insight on the Scriptures, em Sosaiti Wastaua Bilong Nu Yok i wokim, i tok: “Long Baibel, dispela tok ‘tekewe sin’ i olsem ‘karamapim’ o ‘senisim,’ na samting ol i givim olsem senis o bilong ‘karamapim’ wanpela samting, em i mas wankain stret long en. . . . Bilong karamapim samting Adam i lusim, i mas i gat wanpela ofa bilong tekewe sin i wankain stret olsem laip bilong wanpela man i gutpela olgeta.”
Yu Inap Stori Long Dispela?
• Wanem samting i kirapim ol bilipman bilong bipo long mekim ol ofa long Jehova?
• I gat wanem as na ol i mas mekim ol ofa?
• I gat wanem ol kain bikpela ofa aninit long Lo? Ol i mekim wanem ol wok?
• Olsem Pol i tok, i gat wanem bikpela wok bilong Lo na ol ofa bilong en?
[Piksa long pes 14]
Jehova i laikim ofa bilong Abel, long wanem, ofa bilong em i soim olsem em i bilip long promis bilong Jehova
[Piksa long pes 15]
Yu pilim tru samting dispela piksa i makim?