God Bai Kisim Bek Ol Man i Go Long Stretpela Nupela Taim
“Bai ol i sindaun gutpela tumas na amamas i stap.”—SONG 37:11.
JEHOVA em i God bilong kisim bek ol man. Long bipo, planti taim em i kisim bek lain bilong em. Taim em i kisim bek lain bilong em long bipo, em i bilong sotpela taim tasol, long wanem, long ol dispela taim bipo em i no bin givim strafe yet long olgeta lain bilong Satan. Tasol long taim bilong yumi, klostu nau Jehova bai mekim bikpela samting tru bilong kisim bek ol wokboi bilong em, samting olsem em i no bin mekim bipo. Long dispela taim em bai bagarapim olgeta samting bilong lain bilong Satan, na em bai kisim ol wokboi bilong em i go long stretpela nupela taim.—2 Pita 2:9; 3:10-13.
2 Jehova i tok promis olsem: “I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:10, 11) Ol bai stap olsem inap hamas yia? “Ol stretpela man bai i kisim graun God i givim ol, na bai ol i stap oltaim long en.” (Song 37:29; Matyu 5:5) Tasol paslain long taim dispela samting i kamap, ol bikpela hevi tru bai kamap long graun, kain hevi olsem i no bin kamap bipo.
“Bikpela Hevi Tru”
3 Long 1914 “taim bilong las de” i kirap. (2 Timoti 3:1-5, 13) Nau yumi stap 83 yia pinis long dispela taim na klostu nau em bai pinis, na olsem Jisas i bin tok profet dispela samting bai kamap: “Bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21) Tru tumas, dispela hevi bai bikpela tru, winim hevi bilong Namba 2 Pait taim 50 milion manmeri i dai. Em bikpela samting tru klostu nau bai i kamap!
4 Wantu dispela “bikpela hevi tru” bai kamap, “long wanpela aua tasol.” (KTH 18:10) Em bai kirap taim God i givim strafe long ol lotu giaman, em Baibel i kolim ‘Bikpela Babilon.’ (KTH 17:1-6, 15) Nambawan bikpela samting i olsem mak bilong Babilon bilong bipo em lotu giaman. Babilon bilong nau i wankain olsem Babilon bilong bipo na i makim olgeta lotu giaman bilong graun. Em i mekim pasin olsem wanpela pamukmeri taim em i insait long ol wok politik. Em i bin helpim ol pait na givim blesing long ol ami, olsem na maski ol birua i wanlotu bilong ol, narapela i kilim i dai narapela. (Matyu 26:51, 52; 1 Jon 4:20, 21) Em i no gat tok long ol pasin nogut lain bilong em i mekim na em i mekim nogut long ol Kristen tru.—KTH 18:5, 24.
5 “Bikpela hevi tru” bai kirap taim ol lain politik i kirapim pait long ‘Bikpela Babilon.’ Ol bai “birua long pamukmeri. Ol bai i bagarapim em tru na rausim olgeta klos samting bilong en. Na ol bai i kaikai mit bilong bodi bilong en, na kukim em olgeta long paia.” (KTH 17:16) Bihain, ol manmeri i bin helpim em long bipo “ol bai i krai sori na i stap bel hevi.” (KTH 18:9-19) Tasol longtaim pinis ol wokboi bilong Jehova i wetim dispela samting i kamap, na ol bai tok: “Litimapim nem bilong God! . . . Dispela bikpela pamukmeri em i bin bagarapim olgeta manmeri bilong graun long pasin pamuk bilong en. Olsem na God i bekim pe nogut long em. Dispela meri em i gat asua bilong kilim i dai ol wokman bilong God, na God i bekim pinis dispela asua bilong em.”—KTH 19:1, 2.
Kirapim Pait Long Ol Wokboi Bilong God
6 Ol lain politik i bagarapim pinis olgeta lotu giaman, orait nau ol i laik kirapim pait long ol wokboi bilong Jehova. Long tok profet, Satan, em “Gok, bilong graun Magok” em i tok: “Ol taun bilong ol i no gat banis i raunim ol.” Em i ting i no hatwok long bagarapim ol, olsem na em i kirapim pait long ol wantaim “bikpela lain ami . . . i karamapim graun olsem bikpela klaut.” (Esekiel 38:2, 10-16) Ol lain bilong Jehova i save Satan i no inap bagarapim ol, long wanem, ol i bilip long Jehova na wet long em.
7 Taim king bilong Isip na ami bilong em i ting ol i kalabusim pinis ol wokboi bilong God long solwara Retsi na ol i no inap ranawe, Jehova i wokim mirakel na kisim bek ol na em i bagarapim ol ami bilong Isip. (Kisim Bek 14:26-28) Long taim bilong “bikpela hevi tru,” taim ol lain bilong graun i ting ol i kalabusim pinis lain bilong Jehova na ol i no inap ranawe, Jehova bai wokim gen mirakel na em bai kisim bek ol: “Belhat bilong mi bai i kamap bikpela tru . . . [na] bai mi yet mi kam long graun bilong [ol], na bai dispela graun i guria moa yet.” (Esekiel 38:18, 19) Nau pinis bilong “bikpela hevi tru” i stap klostu!
8 Bihain long taim “bikpela hevi tru” i kirap pinis, paslain long taim Jehova i givim strafe long ol narapela lain Satan i bosim, ol narapela kain samting bai kamap. Tingim ol samting dispela bai mekim. “Long dispela taim mak bilong Pikinini Bilong Man [Krais] bai i kamap long skai na olgeta lain manmeri bilong graun bai i krai. Na ol bai i lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en.” (Matyu 24:29, 30) “Ol kain kain mak bai i kamap long san na long mun na long ol sta. . . . Planti manmeri bai i tingting long ol samting i laik kamap long graun, na ol bai i pret tru na ai bilong ol bai i raun, long wanem, ol strongpela samting bilong skai bai i guria.”—Luk 21:25, 26.
‘Taim Bilong God i Kisim Bek Yupela i Kam Klostu’
9 Long dispela taim, tok profet bilong Luk 21:28 bai kamap tru. Jisas i tok: “Taim ol dispela samting i stat long kamap, orait yupela i mas sanap na litimapim het bilong yupela, long wanem, taim bilong God i kisim bek yupela em i kam klostu pinis.” Ol birua bilong God bai pret nogut tru, long wanem, ol i save Jehova i as bilong ol dispela narapela kain samting i kamap. Tasol ol wokboi bilong Jehova bai amamas, long wanem, ol bai save klostu nau God i laik kisim bek ol.
10 Nau Jehova bai pinisim olgeta samting bilong dispela graun em Satan i bosim: “Mi bai mekim olkain sik i kamap long em [Gok] na mekim pait i kamap long em bilong mekim save long em. Bai mi kapsaitim bikpela ren na ren ais na ol hatpela ston i gat paia, na ol dispela samting bai i pundaun antap long em na long ol soldia i bin kam wantaim em. . . . Na bai ol i save tru long mi. Na bai ol i save gut olsem, mi yet mi Bikpela.” (Esekiel 38:22, 23) Olgeta samting nogut bilong dispela graun bilong Satan bai pinis. Olgeta manmeri i no tingim God bai bagarap. Dispela em i laspela samting bilong Armagedon long taim bilong “bikpela hevi tru.”—Jeremaia 25:31-33; 2 Tesalonaika 1:6-8; KTH 16:14, 16; 19:11-21.
11 Tasol Jehova bai kisim bek planti milion manmeri bilong olgeta hap em ol i lotuim em, na ol bai abrusim bagarap long taim bilong “bikpela hevi tru.” Ol i dispela ‘bikpela lain’ i kam long “olgeta lain man na bilong olgeta kantri na bilong olgeta kain skin na bilong olgeta tok ples.” Bilong wanem God bai kisim bek ol long dispela narapela kain rot? Long wanem, ol i mekim wok holi bilong Jehova “long san na long nait.” Olsem na ol bai abrusim bagarap long pinis bilong dispela taim nogut bilong nau na em i bringim ol i go long stretpela nupela taim. (KTH 7:9-15) Olsem na ol i lukim truim bilong tok promis bilong Jehova olsem: “Yu mas bilip long Bikpela na prea long em na bihainim pasin bilong em. Sapos yu mekim olsem, bai em i givim biknem long yu, na yu ken holim dispela graun em i givim yu. Na bai yu lukim em i bagarapim ol man nogut.”—Song 37:34.
Nupela Taim
12 Man! Ol bikpela samting tru bai kamap—ol pasin nogut bai pinis na gutpela taim tru bai kirap, winim olgeta taim bipo! (KTH 20:1-4) Ol man i abrusim bagarap long taim bilong Armagedon bai tenkyu tru long Jehova, long wanem, em i bringim ol i go insait long gutpela klinpela taim em i kamapim, em nupela taim long graun i kamap ples paradais! (Luk 23:43, NW) Na ol i no ken i dai moa! (Jon 11:26) Kirap long dispela taim, ol inap wetim wanpela gutpela samting tru, ol bai inap i stap oltaim wankain olsem Jehova!
13 Jisas, Jehova i bin makim em olsem King long heven, em bai bosim ol gutpela blesing ol man God i kisim bek ol bai kisim. Taim em i stap long graun, em i bin opim ai bilong ol aipas na yau bilong ol yaupas na em i oraitim “olgeta kain sik i stap long bodi bilong ol [man].” (Matyu 9:35; 15:30, 31) Long nupela taim em bai kirap gen long oraitim ol man, tasol em bai mekim long olgeta hap. Olsem Man God i makim, em bai truim tok promis olsem: “[God] bai i mekim drai wara i stap long ai bilong . . . ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:4) Inap long olgeta taim bihain i no gat wok moa long ol dokta samting na ol man i gat bisnis long planim man i dai pinis!—Aisaia 25:8; 33:24.
14 Na God bai kisim bek ol gutpela wokboi bilong em ol i bin dai bipo. Long nupela taim, em bai kisim bek ol long matmat. Jehova i tok: “[Em] bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Ating ol “stretpela man” bai kirap bek pastaim na helpim wok bilong mekim Paradais i kamap bikpela. Ol man i abrusim bagarap bilong Armagedon bai amamas tru long harim ol stori bilong ol gutpela man i bin dai long bipo yet, na nau ol i kirap bek!—Jon 5:28, 29.
15 Olgeta manmeri i stap long dispela taim bai kisim ol gutpela samting olsem man bilong raitim Song i bin toktok long Jehova, em i tok: “Em i save givim kaikai samting long olgeta inap long ol i stap gut.” (Song 145:16) I no gat hangre moa: Ol samting bilong graun bai wok gut gen na graun bai kamapim planti kaikai. (Song 72:16) Ol i gat haus: “Ol manmeri bilong mi bai i wokim ol haus na stap long ol,” na olgeta man wan wan “bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.” (Aisaia 65:21, 22; Maika 4:4) Ol i no pret moa: Bai i no gat moa ol bikpela pait, na pasin pait na bagarapim man, na pasin raskol. (Song 46:8, 9; Sindaun 2:22) “Olgeta hap graun i ken i stap bel isi gen, na olgeta manmeri i ken singaut amamas.”—Aisaia 14:7.
16 Long nupela taim, ol samting bilong Satan long grisim ol man bai i no stap moa. Ol manmeri bai skul “long stretpela pasin.” (Aisaia 26:9; 54:13) Taim ol i wok long kisim gutpela kaikai bilong spirit long olgeta yia, “dispela save bai inapim olgeta hap graun olsem solwara i inapim mak bilong en olgeta.” (Aisaia 11:9) Olgeta manmeri bai kisim gutpela tingting i strongim ol man na ol bai mekim ol gutpela pasin. (Filipai 4:8) Tingim wanpela lain manmeri long olgeta hap na i no gat wanpela bilong ol i mekim pasin raskol, na tingim em yet tasol, na bel nogut long narapela—em wanpela bikpela lain brata na olgeta i kamapim ol pasin em spirit bilong God i save kamapim. Na long nau tu, ‘bikpela lain’ i wok long kamapim ol dispela pasin.—Galesia 5:22, 23.
Bilong Wanem Jehova i Wet Longtaim?
17 Tasol bilong wanem Jehova i wet inap longtaim bilong pinisim pasin nogut na kisim bek lain bilong em i go long nupela taim? Tingim ol samting i mas kamap pastaim. Nambawan bikpela samting em olsem: I stret Jehova i stap Nambawan Bos bilong heven na graun na i bosim olgeta samting. Em i larim bikpela hap taim i lus, na dispela i kamapim ples klia tru olsem wok bos bilong ol man i no aninit long Jehova i pundaun tru na i no kamapim wanpela gutpela samting. (Jeremaia 10:23) Olsem na nau i stret tru Jehova i pinisim ol gavman bilong graun na kamapim Kingdom bilong em long heven aninit long Krais.—Daniel 2:44; Matyu 6:9, 10.
18 Ol samting i kamap long ol dispela planti handet yia i go pinis i wankain long ol samting i bin kamap long taim bilong Abraham. Jehova i bin tokim Abraham olsem ol tumbuna pikinini bilong em bai kisim graun Kenan—tasol ol i mas wet inap 400 yia pastaim, long wanem, “ol lain Amor i no mekim planti pasin nogut yet.” (Stat 12:1-5; 15:13-16) Long dispela skripsa ating dispela tok “ol lain Amor” (em nambawan bikpela lain) i makim olgeta manmeri bilong Kenan. Inap 400 yia bai lus pastaim na Jehova bai helpim lain bilong em long kisim graun Kenan. Insait long dispela hap taim Jehova i larim ol manmeri bilong Kenan i kamapim ol lain bilong ol yet. Wanem samting i kamap long dispela?
19 Wanpela buk (Bible Handbook) bilong Henry H. Halley i tok, long hap bilong Megido ol saveman bilong painim ol samting bilong bipo insait long graun, ol i painim wanpela brukpela haus lotu bilong Astarte, em god meri bilong Bal. Em i tok: “Klostu long dispela haus lotu i gat wanpela ples matmat, na ol i painim planti sospen graun i gat sampela bun samting bilong ol pikinini i stap insait long en, em ol pikinini ol i bin givim olsem ofa long dispela haus lotu . . . Ol profet bilong Bal na Astarte i bin kilim i dai ol liklik pikinini na ol i no gat kot long en. Narapela pasin nogut tru ol i bin mekim ol i bin kolim ‘ofa bilong as bilong haus.’ Taim ol i laik wokim wanpela haus, ol i givim wanpela pikinini olsem ofa, na ol i putim bodi bilong pikinini i go insait long banis bilong haus.”
20 Halley i tok: “Bilong lotuim Bal, na Astarte, na ol narapela god bilong ol Kenan, ol Kenan i save mekim pasin sem nogut tru; ol haus lotu bilong ol i as ples bilong pasin pamuk. . . . Ol Kenan i save mekim pasin pamuk, olsem pasin bilong lotu, . . . na ol i kilim i dai ol namba wan pikinini bilong ol olsem ofa bilong ol dispela god. Ples Kenan i kamap olsem ples Sodom na Gomora. . . . Ol Kenan i bin mekim pasin doti na pasin bilong bagarapim man i nogut nogut tru, olsem na yu ting i stret ol i stap? . . . Sampela saveman i wok long painim ol samting long ol taun bilong ol Kenan bilong bipo, em ol taun i bagarap pinis, ol i ting: Bilong wanem God i no bin kirap kwik na bagarapim ol Kenan long bipo yet?”—Skelim wantaim 1 King 21:25, 26.
21 Ol lain Amor i bin mekim “planti pasin nogut.” Olsem na i stret tru Jehova i bagarapim ol. Wankain samting i kamap long nau. Dispela graun i pulap long ol pasin pait na bagarapim man, na pamuk, na ol man i sakim ol lo bilong God. Bel bilong yumi i bagarap stret long ol ofa bilong ol pikinini ol Kenan i bin mekim, tasol olsem wanem long ol ofa bilong ol planti milion yangpela em ol i save dai long ol bikpela pait bilong dispela graun, em samting nogut moa, winim Kenan? Long nau i stret tru Jehova bai pinisim ol pasin nogut bilong dispela graun.
Kamapim Narapela Samting
22 Nau long taim bilong las de pasin bilong Jehova long wet i save kamapim narapela samting. Em i larim hap taim i lus bilong bungim na skulim wanpela bikpela lain manmeri, nau namba bilong ol i winim pinis 5 milion. Jehova i stiaim ol, na ol i kamap wanpela oganaisesen i wok strong i go. Ol man, na meri, na ol yangpela, ol i skul long lainim ol narapela man long tok tru bilong Baibel. Long rot bilong ol miting bilong ol na ol buk i kamapim ol tok bilong Baibel, ol i kisim save long ol gutpela pasin bilong God. (Jon 13:34, 35; Kolosi 3:14; Hibru 10:24, 25) Na ol i lain long wokim ol haus, na wok long kompyuta samting, na prinim ol buk, na ol narapela samting bilong helpim wok bilong autim “gutnius.” (Matyu 24:14) Ating long nupela taim bai ol i mekim gutpela wok long save bilong ol long skulim ol man na wokim ol haus.
23 Tru tumas, long nau Jehova i redim ol wokboi bilong em long abrusim bagarap long taim bilong “bikpela hevi tru,” na ol i ken stap long stretpela nupela taim. Long dispela taim bai i no gat moa Satan na ol pasin nogut em i bosim, no gat sik moa, na bel hevi, na indai. Lain bilong God bai amamas na givim bel tru long mekim wok bilong kamapim gen Paradais, na long olgeta de bai ol i “sindaun gutpela tumas.” Gutpela tru yumi stap nau long dispela taim bilong pinis, na yumi save long Jehova na yumi mekim wok bilong em, na yumi save olsem klostu nau yumi inap ‘litimapim het bilong yumi, long wanem, taim bilong God i kisim bek yumi em i kam klostu pinis’!—Luk 21:28; Song 146:5.
Ol Askim Bilong Tingim Gen
◻ “Bikpela hevi tru” em wanem samting? Na em bai kirap olsem wanem?
◻ Bilong wanem Gok i no inap winim pait em i mekim long ol wokboi bilong Jehova?
◻ “Bikpela hevi tru” bai pinis olsem wanem?
◻ Wanem ol gutpela gutpela samting bai kamap long nupela taim?
◻ Bilong wanem Jehova i bin wet inap longtaim bilong pinisim pasin bilong dispela graun?
[Askim Bilong Stadi]
1, 2. (a) Jehova bai kisim bek lain bilong em long nau, na em i bin kisim bek lain bilong em long bipo, olsem wanem dispela i narapela narapela kain? (b) Jehova bai kisim lain bilong em i go long wanem kain taim?
3. Jisas i stori olsem wanem long “bikpela hevi tru”?
4. Bilong wanem God i givim strafe long ‘Bikpela Babilon’?
5. “Bikpela hevi tru” i kirap olsem wanem?
6, 7. Bilong wanem ol wokboi bilong Jehova i no pret taim Satan i laik kirapim pait long ol long taim bilong “bikpela hevi tru”?
8. Paslain long taim Jehova i givim strafe long ol manmeri nogut, wanem ol narapela kain samting bai kamap na em bai mekim wanem long ol manmeri?
9. Bilong wanem ol wokboi bilong Jehova inap ‘litimapim het bilong ol’ taim ol dispela narapela kain samting i kamap?
10. Olsem wanem Baibel i stori long ol laspela samting bilong “bikpela hevi tru”?
11. Bilong wanem ol wokboi bilong Jehova i abrusim bagarap long taim bilong “bikpela hevi tru”?
12. Ol man i abrusim bagarap long Armagedon inap wetim wanem gutpela samting?
13. Olsem wanem Jisas bai kirap gen long mekim wok bilong oraitim ol man olsem em i bin mekim long graun?
14. Olsem wanem Jehova bai kisim bek ol wokboi bilong em ol i dai pinis?
15. Stori long sampela gutpela samting bai kamap long nupela taim.
16. Bilong wanem ol stretpela pasin bai stap long nupela taim?
17. Bilong wanem Jehova i bin wet inap longtaim bilong pinisim pasin nogut?
18. Long wanem taim ol tumbuna pikinini bilong Abraham bai kisim graun Kenan?
19, 20. Ol Kenan i kamapim wanem kain ol lain man?
21. Ol samting i bin painim ol Kenan na i painim ol man long nau, olsem wanem em i wankain?
22. Long taim bilong yumi wanem gutpela samting i kamap long pasin bilong Jehova long wet?
23. Bilong wanem i gutpela tru yumi stap long dispela taim?
[Piksa long pes 16]
Graun olgeta bai kamap wanpela paradais