Oltaim Jehova i Save Bihainim Stretpela Pasin Tasol
“God i save bihainim stretpela pasin . . . long olgeta samting em i mekim.”—SONG 145:17.
1. Yu save pilim olsem wanem taim narapela i kisim tingting kranki long yu? Dispela inap lainim yumi long wanem samting?
OLSEM WANEM? I gat wanpela taim em wanpela man o meri i bin kisim tingting kranki long yu—ating em i bin sutim tok long samting yu bin mekim o long samting i bin kirapim yu long mekim—tasol em i no save gut long ol samting tru i bin kamap? Sapos olsem, orait ating dispela i mekim na yu bel hevi, a? Dispela inap lainim yumi long wanpela bikpela samting: No ken skelim hariap samting yumi no save gut long en.
2, 3. Sampela i mekim wanem taim ol i ritim ol stori long Baibel i no tokaut long olgeta liklik liklik samting i bin kamap bilong bekim ol askim bilong ol? Tasol Baibel i tok wanem long Jehova?
2 Yumi mas tingim dispela samting yumi bin lainim long taim yumi skelim ol samting God Jehova i bin mekim. Bilong wanem? Long wanem, i gat sampela stori long Baibel em taim yumi ritim ating yumi tingting planti long ol. Ol dispela stori—ol samting sampela man i lotu long God ol i bin mekim o strafe God i bin givim long ol man—ating ol i no tokaut long olgeta liklik liklik samting i bin kamap bilong bekim olgeta askim bilong yumi. Sori tru, sampela i bel nogut long ol kain stori olsem, na sampela i sutim tok long God na tok em i no mekim stretpela pasin. Tasol Baibel i tok, “God i save bihainim stretpela pasin . . . long olgeta samting em i mekim.” (Song 145:17) Na Tok Bilong God i tokim yumi olsem em “i no inap rongim wanpela man.” (Jop 34:12; Song 37:28) Olsem na taim ol man i kisim tingting kranki long em, yumi ken ting olsem dispela i save mekim em i bel hevi, a?
3 Nau bai yumi skelim 5-pela as na i stret yumi orait long ol strafe bilong Jehova. Bihain long dispela bai yumi skelim tupela stori long Baibel em sampela i hatwok long kliagut long en.
Sampela As na i Stret Yumi Orait Long Ol Strafe Bilong Jehova
4. Bilong wanem yumi mas daunim tingting bilong yumi yet taim yumi skelim ol samting God i bin mekim? Mekim tok piksa long dispela.
4 Namba wan as: Jehova i save pinis long olgeta samting i bin kamap—yumi no save long olgeta dispela samting—olsem na yumi mas daunim tingting bilong yumi yet taim yumi skelim ol samting God i bin mekim. Tingim wanpela jas i gat nem olsem em i man bilong mekim stretpela kot tasol, na nau wanpela kot i kamap na jas i kolim strafe. Bai yu ting olsem wanem long wanpela man em i no save gut long olgeta samting tru i bin kamap na em i sutim tok long disisen bilong jas? Em longlong pasin sapos man i sutim tok long samting em i no save gut long en, a? (Sindaun 18:13) Tasol em longlong pasin moa yet sapos ol man nating bilong graun i sutim tok long “Jas bilong olgeta graun”!—Stat 18:25.
5. Taim yumi ritim ol stori long Baibel long strafe God i bin givim long sampela man, yumi no ken lusim tingting long wanem samting?
5 Namba tu as na yumi mas orait long strafe bilong God: God inap lukim bel bilong man. Yumi ol man bilong graun i no inap mekim olsem. (1 Samuel 16:7) Baibel i tok: “Mi Bikpela, mi save glasim tingting na bel bilong olgeta man. Na mi save skelim pasin bilong olgeta wan wan man, na mi bekim pe long ol inap long pasin ol i bin mekim.” (Jeremaia 17:10) Olsem na taim yumi ritim ol stori long Baibel i toktok long strafe God i bin givim long sampela man, nogut yumi lusim tingting olsem em inap lukim olgeta samting, olsem na taim em i bin skelim ol dispela man, em i bin lukim ol laik na tingting i stap hait insait long bel bilong ol, em ol laik na tingting Baibel i no tokaut long en.—1 Stori 28:9.
6, 7. (a) Jehova i bin mekim wanem bilong soim olsem em i save bihainim ol stretpela lo bilong em, maski em i mas lusim wanpela bikpela samting tru bilong em yet? (b) Sapos yumi ritim wanpela samting long Baibel i kirapim yumi long tingting planti long God i bin mekim stretpela pasin o nogat, yumi mas tingim wanem samting?
6 Namba 3 as na yumi mas orait long strafe bilong Jehova: Em i save bihainim ol stretpela lo bilong em, maski em i mas lusim wanpela bikpela samting bilong em yet. Tingim: Taim Jehova i givim Pikinini bilong em bilong baim bek ol man i bihainim tok na bai ol i ken lusim sin na dai, Jehova inapim ol stretpela lo bilong em. (Rom 5:18, 19) Tasol tingim, taim Jehova i lukim gutpela Pikinini bilong em i kisim bikpela pen na em i dai long pos diwai, dispela i givim bikpela pen tru long Em. Dispela i givim wanem save long yumi long God? Baibel i tok, long wok “Krais Jisas i mekim bilong baim bek yumi, . . . God i soim yumi olsem em yet i stretpela olgeta.” (Rom 3:24-26) Baibel New Century Version i kamapim tok bilong Rom 3:25 olsem: “Oltaim God i save bihainim stretpela pasin tasol.” Yes, Jehova i bin redi long givim Pikinini bilong em bilong baim bek yumi, na dispela i soim olsem em i tingim “stretpela pasin” i bikpela samting tru.
7 Olsem na sapos yumi ritim wanpela stori long Baibel em i kirapim sampela long tingting planti long God i bin mekim stretpela pasin o nogat, yumi mas tingim dispela samting: Bilong stap gut long ol stretpela lo bilong em, Jehova i no bin pasim Pikinini bilong em yet—em i larim em i kisim bikpela pen na em i dai. Yu ting em bai kalapim ol dispela lo long ol arapela samting? Nogat! Olsem na yumi ken save, i no gat wanpela taim na Jehova i kalapim ol stretpela lo bilong em. Em nau, i gat as tru na yumi ken bilip olsem oltaim em i save mekim stretpela pasin tasol.—Jop 37:23.
8. Bilong wanem i no stret long ol man i ting olsem Jehova i sot long stretpela pasin?
8 Namba 4 as na yumi mas orait long ol strafe bilong Jehova: Jehova i bin wokim man i kamap olsem Em yet. (Stat 1:27) Olsem na ol man i gat ol pasin i kain olsem bilong God yet, wanpela em pasin bilong laikim tru stretpela pasin. Em i no stret sapos pasin bilong yumi long laikim pasin i stret i kirapim yumi long ting olsem Jehova yet i sot long dispela pasin. Sapos i gat wanpela taim i kamap we yumi tingting planti long wanpela stori long Baibel, orait yumi mas tingim, yumi bin kisim sin long papamama, olsem na pasin bilong yumi long skelim wanem ol samting i stretpela, dispela i no save wok gut long olgeta taim. God Jehova i bin wokim yumi i kain olsem em yet, na oltaim pasin bilong em i stretpela tasol. (Lo 32:4) I no stret sapos yumi tingim stretpela pasin bilong ol man bilong graun i winim stretpela pasin bilong God yet!—Rom 3:4, 5; 9:14.
9, 10. Bilong wanem Jehova i no gat wok long tokim ol man long ol samting em i mekim?
9 Namba 5 as na yumi mas orait long ol strafe bilong Jehova: Em i “God Antap Tru, na [em i] save bosim olgeta hap bilong graun.” (Song 83:18) Olsem na em i no gat wok long tokim ol man long as na em i mekim ol samting. Em i Bikpela Man Bilong Wokim Sospen Graun, na yumi i olsem hap graun em God i bin mekim i kamap sospen, bilong em i ken mekim wanem wanem wok long yumi em i laik mekim. (Rom 9:19-21) Yumi olsem sospen graun em i bin wokim, olsem na yumi husat na yumi ken sutim tok long ol samting em i bin mekim? Taim bilipman Jop i kisim tingting kranki long samting God i bin mekim long ol man, Jehova i stretim tingting bilong em. Em i askim Jop: “Yu bin tok strong olsem, ol pasin bilong yu i stret. Tasol bilong wanem yu bin kotim mi, na tok mi save mekim pasin i no stret?” Jop i save em i no bin kliagut long ol samting, na bihain em i tanim bel. (Jop 40:8; 42:6) Nogut yumi tu i kisim tingting kranki long God, a?
10 Em nau, i gat as na yumi ken bilip tru olsem oltaim Jehova i save bihainim stretpela pasin tasol. Orait nau yumi ken tingim dispela samting na skelim tupela stori long Baibel em ating sampela i tingting planti long en. Namba wan i stori long samting em wanpela man i lotu long God i bin mekim, na namba tu i stori long strafe em God yet i bin givim long wanpela man.
Bilong Wanem Lot i Tok Long Givim Tupela Pikinini Meri Long Ol Man Nogut?
11, 12. (a) Stori long samting i bin kamap taim God i salim tupela ensel i go long Sodom. (b) Dispela stori i bin kamapim wanem ol askim long tingting bilong sampela?
11 Stat sapta 19 i stori long samting i bin kamap taim God i salim tupela ensel—ol i bin tanim i kamap man—i go long Sodom. Lot i strong long dispela tupela i mas i go stap long haus bilong em. Tasol long nait, bikpela lain man bilong taun ol i kam banisim haus bilong Lot na ol i tok strong long Lot i mas salim tupela i kam ausait na bai ol i ken mekim pasin sem long tupela. Lot i wok long pasim ol, tasol ol i no harim tok bilong em. Lot i laik lukautim gut dispela tupela man, olsem na em i tok: “Ol pren bilong mi, yupela harim. Yupela i no ken mekim dispela pasin nogut. Mi gat tupela pikinini meri i stap, na tupela i no bin slip yet wantaim man. Mi ken bringim tupela i kam ausait long yupela, na yupela i ken pinisim laik bilong yupela long tupela. Tasol dispela tupela man i kam slip long haus bilong mi, olsem na mi mas was gut long tupela. Olsem na yupela i no ken mekim wanpela samting long tupela.” Tasol ol i no harim tok bilong Lot na ol i laik brukim dua bilong haus. Orait nau tupela ensel i mekim ol i kamap aipas.—Stat 19:1-11.
12 Dispela stori i bin kamapim planti askim long tingting bilong sampela. Ol i laik save: ‘Olsem wanem Lot i wok long lukautim dispela tupela man long rot bilong givim tupela pikinini meri bilong em long dispela lain nogut? Ating pasin em i mekim i no stret na i makim olsem em i no gat bun, a?’ Dispela stori i kirapim yumi long tingim askim olsem: I gat wanem as na God i kirapim Pita long kolim Lot “stretpela man”? Samting Lot i mekim, God i orait long dispela? (2 Pita 2:7, 8) Orait i gutpela sapos yumi skelim gut dispela stori na bai yumi no kisim tingting kranki long en.
13, 14. (a) Baibel i tok wanem long samting Lot i bin mekim na em samting yumi mas tingim? (b) Wanem samting i soim olsem Lot i no olsem man i no gat bun?
13 Orait pastaim yumi mas save olsem Baibel i no tok samting Lot i bin mekim i orait o i no orait—Baibel i tokaut long samting i bin kamap, em tasol. Na tu, Baibel i no tokim yumi long tingting bilong Lot o long samting i bin kirapim em long mekim dispela samting. Taim God “i kirapim bek . . . ol stretpela man” na Lot i kirap bek, ating em bai tokim yumi long ol dispela samting.—Aposel 24:15.
14 Tasol Lot i no olsem man i no gat bun, nogat. Taim em i tok em i mas “was gut” long dispela tupela i bin kam slip long haus bilong em, dispela i makim em i pilim olsem em i gat wok long lukautim ol. Tasol bai i hatwok long mekim olsem. Josifas, em wanpela Juda i raitim stori bilong ol samting i bin kamap bipo, em i tok ol Sodom “i save mekim pasin i no stret long ol man, na ol i no save tingim God . . . Ol i nolaik tru long ol man bilong narapela kantri, na ol i save mekim kain kain pasin sodom.” Tasol Lot i no pret na surik bek long ol dispela man nogut. Nogat. Em i go ausait na toktok wantaim ol dispela man ol i belhat nogut tru. Na taim em i go ausait, em i bin “pasim gut dua.”—Stat 19:6.
15. Olsem wanem na ating bilip bilong Lot i bin kirapim em long mekim samting em i bin mekim?
15 Tasol ating sampela i laik save, ‘bilong wanem Lot i tok long givim tupela pikinini meri bilong em long ol dispela man nogut?’ Orait, tingim sampela samting olsem: Namba wan, ating bilip bilong Lot i bin kirapim em. Lot i save pinis Jehova i bin lukautim Sarai, meri bilong Abraham, em ankol bilong Lot. Skin bilong Sarai i naispela tru, olsem na Abraham i tokim em long em i mas tokim ol Isip olsem Abraham i brata bilong em, nogut ol i kilim Abraham i dai bambai ol inap kisim meri bilong em.a Orait nau ol i kisim Sarai i go long haus bilong king bilong Isip. Tasol Jehova i pasim rot na bai king i no ken bagarapim Sarai. (Stat 12:11-20) Ating Lot i bilip olsem Jehova inap lukautim tupela pikinini meri bilong em olsem em i bin lukautim Sarai. Na tru tumas, long rot bilong tupela ensel, Jehova i lukautim dispela tupela meri. Ol man nogut i no bagarapim ol.
16, 17. (a) Ating Lot i gat wanem tingting na em inap ting olsem samting em i mekim bai longlongim ol man bilong Sodom? (b) Maski Lot i gat wanem tingting, yumi ken bilip tru long wanem samting?
16 Orait nau tingim narapela samting. Ating Lot i laik mekim ol dispela man i kirap nogut o longlongim ol. Em inap ting olsem dispela lain i no inap laikim tupela pikinini meri bilong em, long wanem, bel bilong ol Sodom i save kirap long ol man tasol. (Jut 7) Na tu, tupela man bilong dispela taun i bin makim dispela tupela meri bilong maritim ol, olsem na ating sampela wanblut o ol pren bilong dispela tupela man o ol man em tupela i wok bisnis wantaim ol, ol i stap namel long dispela lain. (Stat 19:14) Olsem na ating Lot i ting olsem sampela bai kirap na mekim sampela tok bilong helpim dispela tupela meri. Sapos dispela lain i bruk, bai ol i no gat bikpela strong.b
17 Tasol maski Lot i gat wanem tingting, yumi ken bilip tru olsem: Long olgeta samting Jehova i mekim, em i save bihainim stretpela pasin tasol, olsem na yumi ken ting olsem i gat as tru na em i kolim Lot “stretpela man.” Na taim yumi skelim pasin bilong ol dispela man nogut bilong Sodom, yumi ken save olsem i stret Jehova i bin givim strafe long ol man bilong dispela taun nogut, a?—Stat 19:23-25.
Bilong Wanem Jehova i Kilim i Dai Usa?
18. (a) Wanem samting i kamap taim Devit i laik bringim Bokis i go long Jerusalem? (b) Dispela stori i kamapim wanem askim?
18 Narapela stori ating sampela i tingting planti long en, em stori bilong Devit i laik bringim Bokis Kontrak i go long Jerusalem. Ol i putim Bokis long wanpela karis, em Usa na brata bilong em i stiaim. Baibel i tok: “Ol i kamap long hap graun bilong wanpela man, nem bilong en Nakon, em hap we ol i save kisim kaikai bilong wit, na rausim ol lip samting bilong wit. Na long dispela hap ol bulmakau i mekim na Bokis Kontrak bilong God i laik pundaun. Olsem na Usa i putim han i go na holim Bokis Kontrak. Na Bikpela i kros tru long Usa, long wanem, Usa i ting Bokis Kontrak i samting nating na em i holim. Na God i kilim em na em i dai stret long dispela hap klostu long Bokis Kontrak bilong God.” Sampela mun bihain, ol i kirap gen na kisim Bokis i go, tasol long dispela namba 2 taim, ol i bihainim tok God i makim bilong karim Bokis na ol Kohat bilong lain Livai i karim Bokis long sol bilong ol. (2 Samuel 6:6, 7; Namba 4:15; 7:9; 1 Stori 15:1-14) Ating sampela i laik save: ‘Bilong wanem Jehova i kilim i dai Usa? Usa i laik helpim Bokis, em tasol.’ Orait, nogut yumi kisim tingting kranki. I gutpela sapos yumi tingim sampela samting moa bilong dispela stori.
19. Bilong wanem Jehova i no inap mekim pasin i no stret?
19 Yumi mas tingim, Jehova i no inap tru long mekim pasin i no stret. (Jop 34:10) Pasin i no stret i no gat pasin laikim long en, tasol long stadi yumi bin mekim long Baibel, yumi save “God em i pasin laikim.” (1 Jon 4:8, NW ) Na tu, Baibel i tok: “Yu stap king na yu bosim ol manmeri long stretpela pasin tasol. Na yu save mekim stretpela kot tasol.” (Song 89:14) Olsem na Jehova i no inap mekim pasin i no stret. Sapos em i mekim olsem, nau bai i gat as na ol man i ken sutim tok long wok king bilong em.
20. Olsem wanem na Usa i mas save long ol lo bilong Bokis?
20 Na tingim, Usa i save pinis long Lo. Dispela Bokis i makim olsem Jehova i stap wantaim lain bilong em. Lo i tok ol man i no gat namba long holim Bokis, ol i no ken holim. Lo i tok ol man i mekim olsem, ol i mas i dai. (Namba 4:18-20; 7:89) Olsem na wok bilong kisim dispela Bokis holi i go long narapela hap, i no wanpela liklik samting, nogat. Usa i wanpela Livai, olsem na maski em i no wanpela pris, em i mas save long Lo. Na tu, sampela yia paslain, ol i bin kisim Bokis na putim long haus bilong papa bilong em bambai Bokis i ken i stap gut. (1 Samuel 6:20–7:1) Bokis i bin stap long dispela hap inap 70 yia, i go inap long taim Devit i tingting long kisim i go long narapela hap. Olsem na kirap long taim Usa i liklik yet, em i save long ol lo bilong ol samting bilong dispela Bokis.
21. Taim yumi tingim stori bilong Usa, bilong wanem yumi mas tingim olsem, Jehova inap lukim ol laik bilong bel bilong man?
21 Olsem yumi stori pastaim, Jehova inap lukim bel na tingting bilong man. Baibel i tok, Usa i ting Bokis Kontrak “i samting nating,” olsem na ating Jehova i bin lukim samting long bel bilong Usa em Baibel i no tokaut stret long en. Olsem: Ating Usa i man bilong litimapim nem bilong em yet na i save mekim ol samting em i no gat namba long mekim. (Sindaun 11:2) O taim em i wokabaut i go pas long Bokis em famili bilong em i bin lukautim, ating dispela i mekim na em i hambak. (Sindaun 8:13) Olsem wanem? Usa i no bilip olsem Jehova inap lukautim dispela Bokis holi i makim olsem em i stap namel long lain bilong em? Maski wanem samting i bin kirapim Usa long holim bokis, yumi ken bilip tru olsem Jehova i bin mekim pasin i stret. Ating Jehova i lukim samting long bel bilong Usa, em samting i bin kirapim Em long kirap kwik na mekim save long Usa.—Sindaun 21:2.
As na Yumi Ken Bilip Tru
22. Sampela stori long Baibel ol i no kamapim olgeta liklik liklik samting i bin kamap, na olsem wanem dispela i kamapim savetingting bilong Jehova?
22 Sampela stori long Baibel i no kamapim olgeta liklik liklik samting i bin kamap, na dispela i kamapim gutpela savetingting bilong Jehova. Long dispela rot, Jehova i givim rot long yumi long kamapim olsem yumi bilip long em. Long ol samting yumi skelim pinis, i klia tru olsem i gat as na yumi ken wanbel long ol strafe bilong Jehova, a? Yes, taim yumi amamas long stadi long Tok Bilong God na yumi gat gutpela bel, yumi kisim planti save long Jehova bilong yumi ken bilip tru olsem, long olgeta samting Jehova i mekim, em i save bihainim stretpela pasin tasol. Olsem na sapos yumi ritim wanpela stori long Baibel na yumi gat sampela askim em yumi no inap kisim kwik bekim bilong ol, orait yumi mas bilip tru olsem Jehova i bin bihainim stretpela pasin long samting em i bin mekim.
23. Long ol samting Jehova bai mekim long bihain, yumi ken bilip tru long wanem samting?
23 Yumi ken kisim wankain bilip tu long ol samting Jehova bai mekim long bihain. Olsem na yumi ken bilip tru olsem, long taim bilong bikpela hevi i wok long kam klostu, bai em i no “bagarapim ol gutpela man wantaim ol man nogut.” (Stat 18:23) Pasin bilong em long laikim tumas stretpela pasin i no ken larim em i mekim olsem. Na yumi ken bilip tru olsem long nupela taim i kamap bihain, em bai inapim tru olgeta laik bilong yumi.—Song 145:16.
[Ol Futnot]
a Yumi ken save i gat as na Abraham i pret, long wanem, wanpela olpela rait i stori long wanpela king bilong Isip i bin tokim ol ofisa bilong em long holim wanpela naispela meri na kilim i dai man bilong em.
b Bilong kisim sampela save moa, lukim Wastaua, Me 1, 1982, pes 32.
Yu Inap Tingim?
• I gat wanem ol as na yumi mas orait long ol strafe bilong Jehova?
• Wanem ol samting i ken helpim yumi na bai yumi no kisim tingting kranki long Lot i laik givim tupela pikinini meri bilong em long ol man nogut?
• Wanem sampela samting inap helpim yumi long save long as na Jehova i kilim i dai Usa?
• Long ol samting Jehova bai mekim long bihain, yumi ken bilip tru long wanem samting?