Provep
11 Pasin bilong yusim skel long giamanim* ol man, dispela i stingpela samting long ai bilong Jehova,
Tasol pasin bilong yusim stretpela skel i save givim amamas long em.+
2 Taim pasin hambak i kam, pasin bilong kisim nem nogut bai kam bihain,+
Tasol savetingting i stap wantaim ol man i gat pasin daun.+
3 Pasin bilong ol stretpela man long givim bel long wokabaut stret, dispela i save stiaim ol,+
Tasol pasin trik bilong ol man bilong giaman bai bagarapim ol.+
4 Mani kago* bai i no inap helpim man long de bilong bikpela belhat,+
Tasol stretpela pasin bai kisim bek man long dai.+
5 Stretpela pasin bilong man i no gat asua i mekim rot bilong em i kamap stret,
Tasol man nogut bai pundaun bikos long ol pasin nogut bilong em yet.+
6 Stretpela pasin bilong ol stretpela man bai kisim bek ol,+
Tasol ol laik bilong ol man bilong mekim pasin giaman bai trapim ol yet.+
7 Taim wanpela man nogut i dai, ol samting em i hop long en bai pinis;
Na ol samting em i wet long kisim long strong bilong em yet, ol tu bai pinis.+
8 Stretpela man bai kisim helpim long pen na hevi em i karim,
Na man nogut bai kisim ples bilong stretpela man na karim pen na hevi.+
9 Maus bilong apostet* i save bringim bagarap long narapela man,
Tasol long rot bilong save, dispela i save kisim bek stretpela man.+
10 Gutpela pasin bilong ol stretpela man i save mekim ol man bilong taun i amamas,
Na taim ol man nogut i pinis, ol man i save singaut amamas.+
11 Ol blesing em ol stretpela man i kisim i mekim na taun i kisim biknem,+
Tasol maus bilong man nogut i save brukim taun i go daun.+
12 Man husat i sot long gutpela tingting i save luk daun long narapela man,
Tasol man i gat pasin bilong skelim gut ol samting, em i save stap isi na i no mekim wanpela tok.+
13 Man bilong bagarapim gutnem bilong ol arapela i save go nabaut na tokaut long ol tok hait bilong narapela,+
Tasol man em ol arapela i trastim, em i no save tokaut long wanpela tok hait bilong pren.
14 Taim i no gat gutpela tok bilong stiaim man, ol pipol i save kisim hevi,
Tasol long rot bilong planti edvaisa, ol samting i save kamap gutpela.+
15 Man i putim wanpela samting olsem mak bilong bekim dinau bilong wanpela man em no save long em, em bai karim hevi,+
Tasol man i abrusim* pasin bilong givim han bilong sekan bilong insait long wanpela tok promis, em bai stap gut.
16 Meri i gat naispela pasin, em i save kisim glori,+
Tasol ol man nogut i save pulim mani kago bilong ol narapela.
17 Man i gat pasin helpim,* dispela i save helpim em yet,+
Tasol man i save mekim nogut long ol narapela, em i bringim trabel* long em yet.+
18 Pe em man nogut i kisim i no inap helpim em tru,+
Tasol pe em man i save mekim stretpela pasin i kisim inap helpim em tru.+
19 Man i sanap strong long mekim stretpela pasin, em bai kisim laip,+
Tasol man i ron bihainim pasin nogut, em bai i dai.
20 Ol man em pasin i no stret i stap long bel bilong ol, ol i stingpela samting long ai bilong Jehova,+
Tasol ol man em pasin bilong ol i no gat asua long en, ol i givim amamas long em.+
21 Yu ken bilip tru olsem: Man nogut i no inap abrusim panismen,+
Tasol ol pikinini bilong ol stretpela man bai abrusim panismen.
22 Meri i luk nais tumas na i save sakim gutpela tingting,
Em i olsem wanpela gol ring i stap long nus bilong pik.
23 Laik bilong stretpela man i bringim em i go long gutpela rot,+
Tasol samting em man nogut i hop long en i bringim em i go long belhat bilong God.
24 Man i gat pasin bilong givim samting, em bai kisim planti samting moa;+
Na man i holim bek samting em i mas givim, bihain em bai stap rabis.+
25 Man i gat pasin bilong givim, i stap bilong em bai kamap gutpela moa,+
Na man i save givim nupela strong* long ol arapela, em yet bai kisim nupela strong.+
26 Ol manmeri bai mekim tok bilong bagarap i ken painim man i holim bek ol wit samting,
Tasol ol bai mekim tok bilong blesim man i salim ol wit samting.
27 Man i wok strong long mekim gutpela pasin, em i laik bai ol narapela i amamas long em,+
Tasol man i wok strong long mekim pasin nogut—samting nogut bai kamap long em.+
28 Man i trastim ol mani kago bilong em yet, em bai pundaun,+
Tasol ol samting em stretpela man i mekim bai kamap gut olsem ol grinpela lip bilong diwai.+
29 Man i bringim trabel* long ol wanhaus bilong em, em i no inap kisim wanpela samting,+
Na longlong man bai kamap wokboi bilong man i gat savetingting.