Ol Kontrak i Insait Long Laik Bilong God Bilong Oltaim
“Kontrak [Jehova] i mekim pinis bai i stap oltaim. Na em i bin mekim promis na tok bilong en bai i stap inap long olgeta lain i kamap bihain.”—SAM 105:7, 8.
1, 2. Olsem wanem i stret yumi ken tok, wanpela kontrak i bin mekim sampela samting long yumi planti man na meri?
I GAT wanpela kontrak ating em i mekim sampela samting long yu long bipo, o long nau, o em bai mekim sampela samting long yu long bihain. Ating yu bai tok, ‘Em wanem kontrak?’ Em kontrak bilong marit. Dispela kontrak i bin mekim sampela samting long yumi, long wanem ating papamama bilong yumi i marit na ol i kamapim yumi, na yumi planti yumi marit pinis. Na ating ol singel i tingting long marit long bihain na i stap amamas.
2 Planti handet yia bipo, wanpela profet Hibru em Malakai, em i toktok long “dispela meri yu maritim taim yu yangpela yet,” na em i tok, dispela meri “em i poroman bilong yu na meri yu bin kontrak wantaim em.” (Malakai 2:14-16, NW) I stret Malakai i tok marit i olsem wanpela kontrak, long wanem, taim man tupela meri i marit, tupela i pasim tok long wok gut wantaim. Tupela wantaim i tok promis long mekim sampela samting. Man i tok promis long kisim meri i stap olsem meri bilong em na em i tok promis long mekim ol wok bilong em long lukautim meri bilong em. Na meri tu i mekim kain tok promis olsem. Na tupela wantaim i tingting long dispela ‘kontrak’ ol i wokim i mas helpim ol longtaim.
3. Olsem wanem na sampela kontrak i bikpela samting moa long yumi, winim kontrak bilong marit?
3 I olsem kontrak bilong marit i nambawan bikpela kontrak i mekim sampela samting long yumi olgeta wan wan. Tasol nogat. Baibel i stori long sampela kontrak i bikpela samting moa long yumi. Wanpela bikpela buk i skelim ol kontrak bilong Baibel wantaim ol kontrak bilong ol lotu i no bihainim Baibel, na dispela buk i tok, ‘Ol kontrak bilong Baibel tasol i kolim stret ol samting God i laik mekim na ol samting lain bilong em i mas mekim, na dispela i bilong kamapim sampela samting long heven na long graun.’ Tru tumas, ol dispela kontrak i insait long laik bilong God bilong oltaim. Nau yumi laik skelim ol dispela kontrak na bai yu save, ol dispela kontrak i samting bilong helpim yu long kisim planti blesing. Tasol nau yu laik save olsem wanem ol inap mekim olsem, a?
4. Wanem kontrak bilong pastaim i kamapim laik bilong God bilong oltaim?
4 Yu save pinis long ol samting nogut i bin kamap taim Adam tupela Iv i bikhet long God na tupela i no laik bai em i bosim moa tupela. Yumi kisim sin long tupela na sik i save painim yumi na yumi dai. (Jenesis 3:1-6, 14-19) Tasol yumi tenkyu tru long Jehova, long wanem maski Adam tupela Iv i bin mekim rong, dispela i no pasim em long kamapim laik bilong em, olsem em i laik bai ol man bilong lotu tru long em ol i ken pulap long graun na ol i ken i stap gutpela na i stap amamas inap oltaim oltaim. Bilong kamapim dispela laik bilong em, Jehova i bin mekim kontrak o tok promis i stap long Jenesis 3:15, olsem: “Bai mi mekim yu birua long meri, na meri i birua long yu. Na bai mi mekim ol lain bilong yu i birua long lain bilong meri. Bai em i krungutim het bilong yu, na bai yu kaikaim lek bilong em.” Tasol dispela tok i sotpela tok na i gat olsem ol tok piksa long en na i no kolim olgeta samting bai kamap. Olsem na yumi laik save, Jehova bai truim dispela kontrak o tok promis olsem wanem?
5, 6. (a) God i wok long kamapim laik bilong em na em i mekim long wanem rot? (b) Bilong wanem yumi mas save long dispela rot?
5 God i mekim dispela kontrak long Iden na em i mekim 6-pela moa, em inap olsem 7-pela olgeta. Sapos yumi laik kisim ol blesing bilong oltaim, yumi olgeta wan wan i mas save gut long ol dispela kontrak. Yumi mas save wanem taim God i bin mekim kontrak, na em i mekim olsem wanem, na husat i insait long en, na wanem wok bilong en, na olsem wanem narapela kontrak i wok wantaim narapela long kamapim laik bilong God, olsem em i laik givim laip i stap oltaim long ol manmeri i bihainim tok. Nau em i gutpela taim bilong kisim save long ol dispela kontrak, long wanem long Epril 10, 1990 bai ol kongrigesen i bung bilong mekim Kaikai Bilong Bikpela, na dispela samting em i bikpela samting tru long ol dispela kontrak.
6 Tru, sampela man i les long harim stori bilong ol kontrak; ol i ting ol tok bilong kontrak em samting bilong lo tasol, na i no ken kirapim bel bilong ol. Tasol tingim ol tok wanpela buk (Theological Dictionary of the Old Testament) i mekim long ol kontrak. Dispela buk i tok, ‘Long bipo, long hap bilong Teki na ol kantri klostu long en, na long ol hap em Grik na Rom i bosim, dispela tok “kontrak” i gat tupela insait bilong en. Em i makim tok tru antap na tok promis long mekim sampela samting na i makim tu pasin sori na gutpela pasin pren. Dispela tupela samting, olsem tok tru antap na gutpela pasin pren, i as bilong ol kontrak bilong Jehova.
Kontrak God i Mekim long Ebraham—As Bilong Kisim Ol Blesing Bilong Oltaim
7, 8. Jehova i mekim wanem kain kontrak wantaim Ebraham? (1 Kronikel 16:15, 16)
7 Ebraham, em “namba wan tumbuna bilong olgeta man i . . . bilip long God,” na em i “pren” bilong God. (Rom 4:11; Jems 2:21-23) God i mekim tok tru antap long Ebraham na mekim kontrak wantaim em, na dispela kontrak i olsem as bilong helpim yumi long kisim ol blesing bilong oltaim.—Hibru 6:13-18.
8 Taim Ebraham i stap long Ur, Jehova i tokim em long lusim Ur na i go sindaun long narapela hap, em hap bilong Kenan. Long dispela taim, Jehova i mekim tok promis long Ebraham na em i tok: “Bai mi mekim lain tumbuna bilong yu i kamap bikpela lain tru. Bai mi givim blesing long yu na mekim nem bilong yu i kamap bikpela. . . . Na bai olgeta lain pipel long graun ol i kisim blesing long lain bilong yu.”a (Jenesis 12:1-3) Bihain long dispela taim, God i wok long skruim sampela tok moa long dispela kontrak, yumi ken kolim kontrak bilong Ebraham. Em i tok, lain bilong Ebraham bai kisim Graun Bilong Promis; ol tumbuna pikinini bilong Ebraham bai kamap planti tru; long lain bilong Ebraham tupela Sera bai ol king i kamap.—Jenesis 13:14-17; 15:4-6; 17:1-8, 16; Sam 105:8-10.
9. Olsem wanem yumi save, yumi tu inap kisim blesing long rot bilong kontrak God i bin mekim wantaim Ebraham?
9 God i tokim Ebraham, “mi mekim kontrak wantaim yu.” (Jenesis 17:2) Tasol dispela kontrak em i samting bilong yumi tu, long wanem bihain God i stori moa long dispela kontrak na em i tok: “Mi promis olsem: Bai mi mekim ol lain tumbuna pikinini bilong yu ol i kamap planti olsem sta long skai na wesan long nambis. Na bai ol lain tumbuna pikinini bilong yu ol i daunim ol birua bilong ol.” Na em i tok, long rot bilong lain bilong Ebraham bai “olgeta lain pipel long graun” i kisim blesing long ol yet. (Jenesis 22:17, 18) Yumi hap bilong dispela “olgeta lain pipel long graun,” olsem na yumi inap long kisim blesing.
10. Kontrak God i bin mekim wantaim Ebraham i givim wanem save long yumi?
10 Em nau, yumi kisim save pinis long dispela kontrak o tok promis God i bin mekim long Ebraham na nau yumi inap save long wanem samting? Dispela kontrak, olsem kontrak long Iden bipo, i makim olsem bai i gat wanpela ‘pikinini’ i kamap, na em i mas kamap long lain bilong ol man. (Jenesis 3:15) Em bai kamap long lain bilong Siem, na Ebraham, na long pikinini bilong Ebraham, em Aisak. Na i gat wok king bai kamap insait long dispela lain, na dispela wok king bai mekim na bai olgeta lain long olgeta hap bilong graun ol inap kisim blesing, i no wanpela lain tasol. Orait, olsem wanem ol samting i bin kamap olsem God i tok promis pinis long Ebraham?
11. Olsem wanem ol samting i bin painim lain pikinini bilong Ebraham long skin, olsem God i tok promis pinis long Ebraham?
11 Ol tumbuna pikinini bilong Ebraham i kamap long lain bilong Jekop o Isrel, ol i kamap planti tru na ol i kamap wanpela bikpela lain. Yumi no save dispela lain pikinini bilong Ebraham ol inap hamas, tasol ol i dediket o givim ol yet long mekim lotu i tru; ol i lotuim God bilong Ebraham na Aisak na Jekop. (Jenesis 28:13; Eksodas 3:6, 15; 6:3; Aposel 3:13) Planti taim ol Isrel i lusim lotu i tru, tasol “Jehova i mekim gut long ol na marimari long ol . . . long wanem em i tingim kontrak em i bin mekim long Ebraham na Aisak na Jekop; em i no laik bagarapim ol.” (2 King 13:23, NW; Eksodas 2:24; Levitikas 26:42-45) Na taim God i kisim pinis lain Kristen i stap lain bilong em, em i bin marimari yet long lain Isrel, long wanem ol i lain pikinini tru bilong Ebraham long skin.—Danyel 9:27.
Lain Pikinini Bilong Ebraham long Spirit
12, 13. Olsem wanem Jisas i kamap namba wan pikinini long lain pikinini bilong Ebraham long bikpela truim bilong kontrak bilong Ebraham?
12 Tasol i gat narapela truim bilong kontrak bilong Ebraham, em truim bilong spirit. Ol man long taim bilong Jisas ol i no save gut long dispela bikpela truim, tasol nau long taim bilong yumi, truim bilong en i kamap ples klia na yumi ken amamas long dispela. Baibel yet i kamapim truim bilong en. Pol i tok: “Dispela promis God i givim long Ebraham wantaim pikinini bilong en. Em i no tok olsem: ‘Long ol pikinini.’ Em i no tok long planti pikinini. Nogat. Em i tok long wanpela tasol, na i spik, ‘Long pikinini bilong yu.’ Dispela pikinini em Krais.”—Galesia 3:16.
13 Dispela pikinini em i mas kamap long wanpela lain o famili tasol, na tru tumas Jisas i kamap olsem; em i kamap long lain Juda—em i wanpela tumbuna pikinini tru bilong Ebraham long skin. (Matyu 1:1-16; Luk 3:23-34) Na tu em i wanpela pikinini bilong Man I Winim Ebraham, em i stap long heven. Yu tingim strongpela bilip bilong Ebraham? Em i redi long kilim i dai pikinini bilong em Aisak, olsem ofa, sapos God i laik bai em i mekim olsem. (Jenesis 22:1-18; Hibru 11:17-19) Na olsem tasol Jehova i salim dispela wanpela Pikinini em yet i bin kamapim na dispela Pikinini i kam long graun na i dai olsem ofa bilong baim bek ol man i bilip. (Rom 5:8; 8:32) Ating Pol i tingim ol dispela samting, olsem na em i tok, Jisas em i namba wan pikinini bilong Ebraham, olsem dispela kontrak i tok pinis long em.
14. Husat ol i olsem ol namba tu pikinini long lain pikinini bilong Ebraham? Olsem na nau yumi mas save long wanem samting?
14 Pol i mekim sampela tok moa na yumi ken save, long truim bilong spirit tu bai God i ‘mekim ol pikinini bilong Ebraham i kamap planti.’ Pol i tok: “Sapos yupela i stap man bilong Krais, orait yupela i stap pikinini bilong Ebraham tu. Yupela i man bilong kisim ol dispela samting bipo God i makim long Ebraham.” (Jenesis 22:17; Galesia 3:29) Ol dispela pikinini bilong Ebraham em ol 144,000 Kristen, em God i bin makim ol long spirit bilong em. Ol i olsem ol namba tu pikinini long lain bilong Ebraham. Ol i no birua long namba wan Pikinini; nogat; ol i “man bilong Krais.” (1 Korin 1:2; 15:23) Planti ol i no bilong lain bilong Ebraham long skin; ol i no bilong lain Juda; ol i bilong ol narapela lain. Na bikpela samting moa em olsem: Long truim bilong spirit ol i no bilong lain bilong Man I Winim Ebraham, em Jehova. Ol i kamap long lain bilong sinman Adam. Olsem na yumi mas save olsem wanem ol inap kamap “pikinini bilong Ebraham.” Sampela kontrak i bin kamap bihain long dispela kontrak bai helpim yumi long save long dispela samting.
Em i Skruim Kontrak Bilong Lo i Kam Bilong Liklik Taim
15-17. (a) Bilong wanem God i skruim kontrak bilong Lo long kontrak bilong Ebraham? (b) Olsem wanem Lo i bin mekim dispela wok bilong en?
15 God i mekim pinis kontrak wantaim Ebraham, olsem wanpela namba wan samting bilong kamapim laik bilong em, na bihain em i mekim wanem bilong lukautim lain tumbuna bilong dispela Pikinini bambai i no ken kamap nogut o bagarap i go inap long taim dispela Pikinini bai i kamap long graun? Na taim dispela Pikinini i kamap pinis, olsem wanem ol man bilong lotu tru long God inap save long em? Pol i bekim ol dispela askim. Em i stori long gutpela tingting bilong God, olsem God i bin skruim kontrak bilong Lo i kam bilong liklik taim, na Pol i tok:
16 “Orait, bilong wanem lo i stap? Em i olsem: God i laik bai as bilong sin em i kamap ples klia, olsem na em i skruim lo i kam bihain. Na lo em i bilong i stap inap long dispela pikinini bai i kamap, bipo God i givim promis long em. Dispela lo em i kamap long maus bilong ol ensel na long han bilong wanpela namelman. Lo em i olsem waspapa bilong yumi, bilong bringim yumi i kam long Krais bai yumi ken bilip long gutnius na God i ken kolim yumi stretpela man.”—Galesia 3:19, 24.
17 Long Maunten Sainai, Jehova i mekim kontrak wantaim lain Isrel—em i no mekim kain kontrak olsem wantaim narapela lain.b Dispela kontrak em kontrak bilong Lo na Moses em i namelman bilong en. (Galesia 4:24, 25) Ol Isrel i orait long dispela kontrak, na ol i bin strongim long blut bilong ol bulmakau man na ol meme. (Eksodas 24:3-8; Hibru 9:19, 20) Dispela kontrak i kolim ol lo bilong God ol Isrel i mas bihainim, na i makim rot bilong mekim stretpela wok gavman. Dispela kontrak i tambuim ol long maritim ol haiden, na ol i no ken mekim ol pasin nogut i gat sem o ol pasin bilong lotu giaman. Dispela samting i lukautim ol Isrel na bai lain tumbuna bilong dispela Pikinini i no kamap nogut. (Eksodas 20:4-6; 34:12-16) Tasol ol Isrel ol i sinman na i no gat wanpela em inap bihainim tru dispela kontrak na olgeta lo bilong en, olsem na dispela kontrak i kamapim long ples klia olsem ol i sinman. (Galesia 3:19) Na kontrak i makim olsem i mas i gat wanpela pris em i gutpela olgeta na em i no inap i dai; na i mas i gat gutpela ofa, em ol i no ken mekim mekim long olgeta yia. Lo i olsem wanpela waspapa i bringim pikinini i go long man bilong skulim em, em Krais Jisas. (Hibru 7:26-28; 9:9, 16-22; 10:1-4, 11) Taim dispela kontrak bilong Lo i mekim pinis wok bilong en, em i mas pinis.—Galesia 3:24, 25; Rom 7:6; lukim “Askim” long pes 31.
18. Kontrak bilong Lo i opim wanem rot? Tasol bilong wanem i hatwok long yumi save long dispela?
18 Taim God i mekim dispela kontrak bilong liklik taim, em i kolim tu bikpela wok dispela kontrak bai kamapim, olsem: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain pipel bilong mi. . . . Na bai yupela i stap lain pipel [o kingdom] i save mekim wok bilong mi olsem pris. Na bai yupela i stap ol manmeri tru bilong mi.” (Eksodas 19:5, 6) Em gutpela samting tru! Ol inap kamap lain bilong mekim wok king na wok pris. Tasol dispela samting bai kamap olsem wanem? Bihain Lo i makim stret olsem lain bilong mekim wok king (em lain Juda) na lain bilong mekim wok pris (em lain Livai) ol i gat narapela narapela wok. (Jenesis 49:10; Eksodas 28:43; Nambas 3:5-13) No gat wanpela Isrel inap holim wok king na wok pris wantaim. Tasol tok bilong God long Eksodas 19:5, 6 i makim olsem bihain bai i gat rot, tasol em i no kolim dispela rot, na ol manmeri insait long kontrak bilong Lo ol inap kamap wanpela ‘kingdom i mekim wok olsem pris,’ na bai ol i kamap “manmeri tru” bilong God.
Kontrak Bilong Kingdom Bilong Devit
19. Olsem wanem ol kontrak i makim wok king?
19 Bihain Jehova i skruim narapela kontrak i kam na dispela kontrak i kamapim long ples klia ol samting Jehova bai mekim bilong kamapim laik bilong em na givim blesing long yumi bilong oltaim. Yumi kisim save pinis olsem kontrak bilong Ebraham i makim wok king bai stap long lain bilong Ebraham long skin. (Jenesis 17:6) Kontrak bilong Lo tu i makim olsem bai i gat ol king i kamap insait long lain bilong God, long wanem Moses i tokim lain Isrel: “Bihain, taim yu kamap pinis [long Graun Bilong Promis] bai yu tok, ‘Mi mas putim wanpela king bilong bosim mi olsem olgeta narapela lain klostu i save mekim’; orait, yu mas putim wanpela king bilong bosim yu em Jehova, em God bilong yu, i makim. . . . Em i no ken larim yu i putim wanpela man bilong narapela lain em i stap king bilong yu.” (Diuteronomi 17:14, 15, NW ) God bai wokim rot olsem wanem bilong kamapim dispela wok king? Na olsem wanem dispela i wok wantaim kontrak bilong Ebraham?
20. Olsem wanem Devit wantaim lain bilong em i insait long dispela?
20 Sol bilong lain Bensamin em i namba wan king bilong ol Isrel. Tasol bihain long em, Devit bilong lain Juda em i kamap king. Devit i gat strongpela bel na em i stap gut long Jehova. (1 Samuel 8:5; 9:1, 2; 10:1; 16:1, 13) Devit i kirap pinis long mekim wok king, na sampela yia bihain Jehova i laik mekim kontrak wantaim Devit. Pastaim Jehova i tok: “Taim yu dai na ol i planim yu, orait bai mi mekim wanpela pikinini man bilong yu i kamap king, na bai em i kamap strongpela king na bai mi no larim wanpela samting i daunim em. Em dispela king tasol bai i wokim haus bilong mi, bilong ol manmeri i ken kam klostu long mi long en. Na bai mi mekim ol man long lain bilong em tasol i kamap king oltaim oltaim.” (2 Samuel 7:12, 13) Olsem dispela tok i makim, taim Devit i dai, pikinini man bilong em Solomon i kamap king, na Solomon i wokim haus lotu bilong God long Jerusalem. Tasol Jehova i mekim sampela tok moa long Devit.
21. Kontrak bilong kingdom bilong Devit i makim wanem samting i mas kamap?
21 Nau Jehova i mekim dispela kontrak wantaim Devit, olsem: “Lain bilong yu bai i no inap pinis. Na bai mi mekim ol man long lain bilong yu i kamap king oltaim.” (2 Samuel 7:16) Em nau Jehova i laik kamapim wanpela lain king bilong Isrel long famili bilong Devit. Tasol i no olsem narapela king long lain bilong Devit i dai na narapela king bilong dispela lain i senisim em, na ol i mekim olsem i go i go. Nogat. Bihain bihain bai wanpela man long lain bilong Devit i mas kamap king na bai em i “bosim ol manmeri longtaim tru inap olsem san i stap.”—Sam 89:20, 29, 34-36; Aisaia 55:3, 4.
22. Olsem wanem kontrak bilong Devit i makim lain dispela Pikinini i mas kamap long en? Na wanem samting i kamap?
22 Dispela kontrak God i mekim wantaim Devit i helpim yumi long save long lain dispela Pikinini i mas kamap long en. Ol Juda long taim bilong ol aposel, ol tu i save Krais i mas kamap long lain bilong Devit. (Jon 7:41, 42) Krais Jisas em i namba wan pikinini long lain pikinini bilong Ebraham, olsem kontrak bilong Ebraham i makim. Em inap tru long kamap King oltaim long dispela kingdom bilong Devit, olsem ensel i tok. (Luk 1:31-33) Olsem na Jisas i kisim namba long bosim Graun Bilong Promis, em dispela hap bilong graun tumbuna bilong em Devit i bin bosim. Olsem na yumi ken bilip tru long Jisas. Em i no kisim nating namba bilong mekim wok king; i stret em i ken kisim dispela wok, long wanem God i mekim kontrak na givim dispela wok long em.
23. I gat wanem ol askim i stap yet?
23 Em, yumi stori pinis long 4-pela kontrak God i bin mekim bilong kamapim laik bilong em long givim blesing long ol manmeri inap oltaim. Tasol i gat sampela askim i stap yet, a? Olsem: Ol manmeri i stap sinman yet, olsem na i gat wanem pris na wanem ofa inap tekewe sin bilong ol olgeta? Ol i mas mekim wanem na bai ol inap kamap ol pikinini bilong Ebraham? Olsem wanem? I gat as na yumi ken bilip olsem ol man i kisim wok king ol i no ken bosim graun tasol? Olsem wanem lain pikinini bilong Ebraham, em namba wan pikinini na ol namba tu pikinini, ol inap givim blesing long “olgeta lain pipel long graun,” em yumi olgeta i insait long ol dispela lain? Orait, yumi ken stori long ol dispela samting.
[Ol Futnot]
a Long dispela kain kontrak wanpela tasol (em God) i tok promis long mekim ol samting, na narapela insait long kontrak i no tok promis long mekim sampela samting.
b “Dispela pasin bilong wokim kontrak em wanpela pasin bilong lotu bilong Isrel. Dispela lotu tasol i strong long ol man i mas lotuim God wanpela tasol, na ol i no ken lotuim planti god olsem ol narapela lotu i save mekim.”—Buk Theological Dictionary of the Old Testament, Volyum II, pes 278.
Bai Yu Bekim Wanem Tok?
◻ Olsem wanem kontrak bilong Ebraham i as bilong helpim yumi long kisim ol blesing bilong oltaim?
◻ Husat ol i lain pikinini bilong Ebraham long skin? Husat i pikinini bilong em long spirit?
◻ Bilong wanem God i skruim kontrak bilong Lo long kontrak bilong Ebraham?
◻ Olsem wanem kontrak bilong kingdom bilong Devit i helpim laik bilong God i kamap?
[Sat long pes 15]
(Bilong save ol dispela rait i stap we long pes, lukim buk o magasin)
Kontrak long Iden Jenesis 3:15
Kontrak Bilong Ebraham
Namba Wan Pikinini
Ol Namba Tu Pikinini
Ol Blesing Bilong Oltaim
[Sat long pes 16]
(Bilong save ol dispela rait i stap we long pes, lukim buk o magasin)
Kontrak long Iden Jenesis 3:15
Kontrak Bilong Ebraham
Kontrak Bilong Lo
Kontrak Bilong Kingdom Bilong Devit
Namba Wan Pikinini
Ol Namba Tu Pikinini
Ol Blesing Bilong Oltaim
[Piksa long pes 10]
God i bin mekim kontrak wantaim bilipman Ebraham bambai God inap kamapim laik bilong em long helpim ol man