Kisim Save Long Ol Pasin Bilong Jehova
“Yu tokim mi long tingting [“pasin,” NW] bilong yu na bai mi ken save gut long yu.”—KISIM BEK 33:13.
1, 2. (a) Bilong wanem Moses i kilim i dai dispela Isip i mekim nogut long wanpela Hibru? (b) Bilong Jehova i ken yusim em, Moses i mas kisim save long wanem samting?
MOSES i kamap bikpela long haus bilong Fero na em i skul long gutpela save bilong ol lain Isip i gat namba. Tasol Moses i save olsem em i no bilong Isip. Papamama bilong em i bilong lain Hibru. Long taim em i gat 40 krismas, em i go bilong skelim i stap bilong lain bilong em, ol Israel. Taim em i lukim wanpela Isip i mekim nogut long wanpela Hibru, Moses i no lukluk tasol, nogat. Em i kilim i dai dispela man Isip. Moses i laik helpim lain bilong Jehova, na em i ting God i yusim em long helpim ol Israel long i go fri. (Aposel 7:21-25; Hibru 11:24, 25) Taim tok bilong dispela samting i kamap ples klia, ol lain Isip i gat namba ol i tingim Moses olsem wanpela bikhetman, na em i mas ranawe bilong abrusim bagarap. (Kisim Bek 2:11-15) Bilong God i ken yusim em, Moses i mas save gut long ol pasin bilong Jehova. Olsem wanem? Moses bai orait long God i skulim em?—Song 25:9.
2 Kirap long dispela taim na i go inap 40 yia bihain, Moses i sindaun long narapela kantri na em i lukautim ol sipsip. I luk olsem ol wantok Hibru i no amamas long Moses. Tasol em i no tingim tingim dispela samting na bel nogut long ol, nogat. Em i orait long ol samting God i larim i kamap. Maski planti yia i lus na i no gat wanpela i luksave long pasin Moses i bin mekim long em i laik helpim lain bilong God, em i larim Jehova i stretim pasin bilong em. Bihain em i raitim tok holi spirit bilong God i kirapim em long raitim, i no tingting bilong em yet. Em i raitim tok olsem: “Dispela man Moses em i man bilong daunim em yet, na i no gat wanpela man long dispela graun i save daunim em yet inap olsem Moses.” (Namba 12:3) Jehova i yusim Moses long mekim ol gutpela wok. Sapos yumi tu i daunim yumi yet, Jehova bai mekim gut long yumi.—Sefanaia 2:3.
God i Givim Wok Long Moses
3, 4. (a) Jehova i givim wanem wok long Moses? (b) I gat wanem ol samting bilong helpim Moses?
3 Wanpela taim wanpela ensel i bringim tok bilong Jehova i go long Moses klostu long maunten Horep long Poin Bilong Sainai. Ensel i tokim Moses: “Mi lukim pinis ol i wok long mekim nogut long ol manmeri bilong mi long Isip. Na ol manmeri bilong mi i wok long singaut long mi long kisim bek ol long han bilong ol bosman nogut. Mi harim pinis dispela singaut na mi save tru long pen na hevi ol i karim. Olsem na mi kam daun bilong kisim bek ol long han bilong ol Isip na bilong bringim ol i go long wanpela bikpela graun i gat planti gris na ol kaikai i save kamap gutpela tumas.” (Kisim Bek 3:2, 7, 8) God i makim pinis wok Moses bai mekim, tasol Moses i mas bihainim pasin Jehova i bin makim bilong mekim dispela wok.
4 Ensel bilong Jehova i tok moa: “Nau, Moses, bai mi salim yu i go long king bilong Isip bai king i ken larim yu i bringim ol manmeri bilong mi, ol Israel, i lusim Isip na i kam.” Moses i no laik i go. Em i pilim olsem em i no inap long mekim dispela wok. Tasol Jehova i strongim Moses na i tok: “Mi bai mi stap wantaim yu.” (Kisim Bek 3:10-12) Jehova i givim strong long Moses bilong wokim ol mirakel bilong kamapim klia olsem tru tru God i bin salim em i kam. Brata bilong Moses, Aron, em tu bai i go wantaim Moses na em bai stap olsem mausman bilong Moses. Jehova bai skulim tupela long wanem ol tok na pasin ol i mas mekim. (Kisim Bek 4:1-17) Olsem wanem? Moses bai mekim gut dispela wok?
5. Bilong wanem pasin bilong ol Israel i putim hevi long Moses?
5 Pastaim, ol hetman bilong Israel i bilipim tok bilong Moses na Aron. (Kisim Bek 4:29-31) Tasol i no longtaim na “ol bosman bilong Israel” i sutim tok long Moses na brata bilong em long tupela i mekim na “king wantaim ol hetman bilong en i ting [ol] i samting nogut tru.” (Kisim Bek 5:19-21; 6:9) Taim ol Israel i lusim Isip na i go, ol i pret taim ol i lukim ol Isip i bihainim ol long ol karis. Ol i lukim solwara Retsi i stap long fran na ol karis i kam long baksait na ol i pilim olsem ol i no gat rot bilong ranawe na ol i sutim tok long Moses. Sapos yu bin i stap long dispela taim, bai yu mekim wanem? Maski ol Israel i no gat ol bot, Jehova i tok na Moses i tokim ol Israel long stretim ol samting bilong ol na redi long lusim dispela hap. Orait nau Jehova i brukim solwara Retsi i go tupela hap, na graun long namel i drai olgeta na bai ol Israel i ken i go.—Kisim Bek 14:1-22.
Samting i Bikpela Moa
6. Jehova i kamapim klia wanem samting taim em i givim wok long Moses?
6 Taim Jehova i givim wok long Moses, em i kamapim klia olsem nem bilong Em i bikpela samting. Ol man i mas soim rispek long dispela nem na long Man i holim dispela nem. Taim Moses i askim long nem bilong Jehova, em i tokim Moses: “Mi bai kamap wanem wanem kain mi laikim.” Na Moses i mas tok olsem long ol Israel: “Jehova, em God bilong ol tumbuna bilong yupela, em God bilong Abraham na God bilong Aisak na God bilong Jekop, em i bin salim mi i kam long yupela.” Jehova i tok moa: “Dispela em i nem bilong mi i go inap oltaim oltaim, na dispela em i nem ol i mas tingim mi long en i go inap long olgeta taim bihain.” (Kisim Bek 3:13-15, NW ) Long nau tu long olgeta hap bilong graun, taim ol wokboi bilong God i tingim em ol i tingim dispela nem Jehova.—Aisaia 12:4, 5; 43:10-12, NW.
7. God i tokim Moses long mekim wanem maski Fero i mekim pasin antap?
7 Moses na Aron i go lukim Fero, na long nem bilong Jehova ol i autim tok bilong ol. Tasol long pasin antap, Fero i tok: “Bikpela [“Jehova,” NW ] em i husat? Bilong wanem mi mas harim tok bilong en na larim yupela Israel i go? Mi no save long Bikpela [“Jehova,” NW ], olsem na mi no ken larim yupela i go.” (Kisim Bek 5:1, 2) Fero i sakim tok na em i mekim pasin giaman, tasol Jehova i tokim Moses long bringim yet ol tok i go long em. (Kisim Bek 7:14-16, 20-23; 8:1, 2, 20) Moses i lukim olsem Fero i kros. Olsem wanem? Gutpela samting inap kamap sapos Moses i go lukim em gen? Lain Israel i laik tru long ol i mas i go fri. Fero i strong tru olsem em i no inap larim ol Israel i go. Sapos yu Moses, bai yu mekim wanem?
8. Pasin Jehova i mekim long Fero i kamapim wanem gutpela samting? Ol dispela samting i mas mekim wanem long yumi?
8 Moses i bringim narapela tok gen i go long Fero, olsem: “God, Bikpela [“Jehova,” NW ] bilong mipela Hibru i tok, ‘Larim ol manmeri bilong mi i go bai ol i ken lotu long mi.’ ” God i tok tu olsem: “Ating sapos mi bin mekim save long yu wantaim ol manmeri bilong yu na bagarapim yupela long bikpela sik, bai yupela olgeta i pinis. Tasol mi bin larim yupela i stap olsem bai mi ken soim bikpela strong bilong mi long yupela, na bai ol manmeri i ken tokaut long biknem bilong mi long olgeta hap bilong graun.” (Kisim Bek 9:13-16) Long rot bilong ol samting Jehova bai mekim long Fero, Jehova bai kamapim strong bilong em na dispela bai i stap olsem wanpela tok lukaut long olgeta man i laik sakim em. Wanpela bilong ol em Satan, em bihain Jisas Krais i kolim em olsem “hetman i save bosim dispela graun.” (Jon 14:30; Rom 9:17-24) Olsem tok profet i makim, ol manmeri i tokaut long biknem bilong Jehova long olgeta hap bilong graun. Pasin bilong em long i no les kwik i opim rot long ol man long abrusim bagarap. Em ol Israel na planti arapela lain manmeri, husat i bung wantaim ol Israel long lotuim Jehova. (Kisim Bek 9:20, 21; 12:37, 38) Kirap long dispela taim, wok bilong autim biknem bilong Jehova i bin helpim planti milion man long bihainim lotu i tru.
Wanpela Lain i Hatwok Long Bosim
9. Olsem wanem lain bilong Moses yet i soim olsem ol i no rispektim Jehova?
9 Lain Hibru i save long nem bilong God. Moses i bin yusim dispela nem taim em i toktok long ol, tasol i no olgeta taim ol i rispektim Man i holim dispela nem. Bihain liklik long taim Jehova i bin wokim mirakel na kisim bek ol Israel long han bilong ol Isip, wanem samting i kamap taim ol i no painim kwik gutpela wara bilong dring? Ol i toktok planti long Moses. Bihain ol i toktok planti long kaikai. Moses i tokim ol olsem ol i no toktok planti long em na Aron tasol, nogat, ol i toktok planti long Jehova. (Kisim Bek 15:22-24; 16:2-12) Long maunten Sainai, Jehova i givim Lo long ol Israel, na em i kamapim ol narapela kain samting. Tasol ol manmeri i sakim tok na ol i wokim wanpela bulmakau gol bilong lotuim na ol i tok dispela em i “bikpela kaikai bilong givim biknem long Bikpela.”—Kisim Bek 32:1-9.
10. Bilong wanem ol wasman Kristen long nau i mas tingim gut tok bilong Moses long Kisim Bek 33:13?
10 Moses bai mekim wanem long dispela lain em Jehova yet i tok ol i manmeri bilong bikhet? Moses i tokim Jehova: “Sapos yu laikim mi, orait mi laik yu tokim mi long tingting bilong yu na bai mi ken save gut long yu na oltaim mi ken mekim pasin yu save laikim.” (Kisim Bek 33:13) Ol Witnes Bilong Jehova long nau em ol wasman Kristen i lukautim ol, ol i gat pasin daun winim lain Israel. Tasol maski i olsem, ol wasman Kristen tu i beten olsem: “God, yu mas skulim mi long gutpela pasin bilong yu, na soim mi long rot bilong yu.” (Song 25:4) Taim ol wasman i kisim save long ol pasin bilong Jehova, orait taim ol i stretim ol hevi ol bai mekim pasin i stret wantaim ol tok bilong God long Baibel na ol pasin bilong em.
Lain Bilong Jehova i Mas Mekim Wanem?
11. Jehova i mekim wanem ol samting bilong stiaim Moses? Bilong wanem yumi tingim ol dispela samting?
11 Long maunten Sainai Jehova i bin tokim lain bilong em long ol samting em i laik bai ol i mekim. Bihain God i givim tupela hap ston i gat Tenpela Lo long en long Moses. Taim Moses i lusim maunten na i kam daun, em i lukim ol Israel i lotuim bulmakau gol na em i kros na tromoi dispela tupela hap ston i go daun na ol i bruk nabaut. Bihain, Jehova i raitim gen ol Tenpela Lo long ol hap ston em Moses i bin katim. (Kisim Bek 32:19; 34:1) Ol dispela lo i wankain long ol lo Jehova i bin givim long pastaim. Moses i mas bihainim ol dispela lo. Na tu, God i kamapim klia ol pasin bilong em long Moses, na long dispela rot em i soim Moses long pasin em i mas bihainim taim em i stap olsem mausman bilong Jehova. Ol Kristen i no stap aninit long Lo Bilong Moses, tasol ol samting Jehova i tokim Moses long en i gat planti stiatok i stret long olgeta manmeri i lotuim Jehova. (Rom 6:14; 13:8-10) Orait nau yumi ken skelim sampela bilong ol dispela stiatok.
12. Jehova i laik bai ol man i mas lotuim em wanpela tasol na dispela i mas mekim wanem long ol Israel?
12 Lotuim Jehova wanpela tasol. Lain Israel i bin stap taim Jehova i tokaut olsem em i laik bai ol i mas lotuim em wanpela tasol. (Kisim Bek 20:2-5) Ol Israel i bin lukim planti samting i kamapim klia olsem Jehova em i God tru. (Lo 4:33-35) Jehova i kamapim klia olsem maski ol man bilong ol narapela kantri i mekim wanem, em i no inap orait long lain bilong em long lotuim ol imis o mekim wok bilong ol spirit nogut. I no long skin tasol ol i mas soim olsem ol i lotuim em, nogat. Ol i mas laikim Jehova long bel olgeta, na tingting olgeta, na strong olgeta bilong ol. (Lo 6:5, 6) Toktok na pasin bilong ol—yes, olgeta samting long i stap bilong ol—i insait long pasin bilong lotuim em wanpela tasol. (Wok Pris 20:27; 24:15, 16; 26:1) Jisas Krais i kamapim klia olsem ol man i mas lotuim Jehova wanpela tasol.—Mak 12:28-30; Luk 4:8.
13. Bilong wanem ol Israel i mas bihainim gut olgeta lo bilong God? Wanem samting i mas kirapim yumi long bihainim tok bilong em? (Saveman 12:13)
13 Bihainim gut olgeta lo bilong Jehova. Lain Israel i mas kisim tok bilong kirapim ol long tingim gen olsem taim Jehova i mekim kontrak wantaim ol, ol i bin tok promis long bihainim gut olgeta tok bilong em. Ol i stap fri long makim samting ol i laik mekim, tasol long ol samting em Jehova i bin putim lo long en, ol i mas bihainim gut dispela lo. Taim ol i mekim olsem, dispela bai kamapim klia olsem ol i laikim tru God na dispela bai helpim ol na ol lain tumbuna bilong ol i kamap bihain, long wanem, olgeta samting Jehova i tok ol i mas mekim em i bilong helpim ol.—Kisim Bek 19:5-8; Lo 5:27-33; 11:22, 23.
14. God i mekim wanem bilong kamapim klia long ol Israel olsem em i bikpela samting long putim ol samting bilong spirit i stap namba wan?
14 Ol samting bilong spirit i mas i stap namba wan. Lain Israel i no ken larim wok bilong lukautim ol yet long ol samting bilong skin i pasim ol long tingim ol wok bilong spirit. Ol i no ken lusim taim na strong bilong ol long mekim ol samting bilong skin tasol, nogat. Jehova i makim haptaim long olgeta wik olsem holi, na dispela taim i bilong mekim ol wok bilong lotuim God tru. (Kisim Bek 35:1-3; Namba 15:32-36) Long olgeta yia, ol i mas makim haptaim bilong mekim ol kibung holi. (Wok Pris 23:4-44) Long ol dispela kibung ol inap stori long ol strongpela wok Jehova i bin mekim, harim ol tok i kirapim ol long tingim gen ol pasin bilong em, na kamapim olsem ol i tenkyu tru long olgeta gutpela samting em i bin mekim bilong helpim ol. Taim ol manmeri i givim bel tru long Jehova, pasin bilong ol long pret long God na laikim em tru bai kamap strong moa na dispela bai helpim ol long bihainim ol pasin bilong em. (Lo 10:12, 13) Ol gutpela stiatok i stap long ol dispela tok i helpim ol wokboi bilong Jehova long nau.—Hibru 10:24, 25.
Pilim Tru Ol Pasin Bilong Jehova
15. (a) Bilong wanem pasin bilong pilim tru ol pasin bilong Jehova i helpim Moses? (b) Wanem ol askim inap helpim yumi long tingim gut olgeta wan wan pasin bilong Jehova?
15 Pasin bilong pilim tru ol pasin bilong Jehova bai helpim Moses long stretim hevi bilong ol manmeri. Kisim Bek 34:5-7 (NW ), i stori olsem God i go klostu long Moses na em i tok: “Jehova, Jehova, em i God bilong marimari na tingim man, em i no save belhat kwik na gutpela-pasin-sori bilong em i bikpela tru na em i save tok tru oltaim, na em i save mekim gutpela-pasin-sori long planti tausen manmeri, na lusim rong na asua na sin bilong ol, tasol em i no ken larim man i abrusim strafe. Em bai givim strafe long ol pikinini man na ol tumbuna pikinini long rong papa bilong ol i bin mekim, na long namba 3 na namba 4 lain tumbuna pikinini i kamap bihain long em.” Lusim haptaim long skelim gut ol dispela tok long bel. Askim yu yet: ‘Olgeta wan wan pasin i makim wanem samting? Olsem wanem Jehova i kamapim dispela pasin? Olsem wanem ol wasman Kristen i ken kamapim dispela pasin? Olsem wanem dispela pasin i mas stiaim ol samting yumi olgeta wan wan i mekim?’ Orait yumi ken skelim sampela pasin bilong em.
16. Yumi ken mekim wanem na bai yumi ken pilim tru pasin marimari bilong God? Bilong wanem em i bikpela samting long mekim olsem?
16 Jehova em i “God bilong marimari na tingim man.”a Pasin marimari bilong Jehova i save kirapim em long daunim strafe em i givim long ol man, na mekim bikpela pasin sori. Dispela pasin i save kirapim God long mekim samting bilong helpim lain bilong em. Wanpela samting i kamapim klia dispela em olsem: God i bin lukautim ol Israel long ol samting bilong skin na long ol samting bilong spirit taim ol i wokabaut i go long Graun Bilong Promis. (Lo 1:30-33; 8:4) Jehova i mekim pasin marimari na em i lusim rong bilong ol. Em i bin mekim pasin marimari long lain bilong em long bipo. Olsem na em i bikpela samting moa yet long ol wokboi bilong God long nau i mas mekim pasin sori long narapela narapela!—Matyu 9:13; 18:21-35.
17. Taim yumi kliagut long pasin bilong Jehova long tingim man, olsem wanem dispela inap helpim lotu i tru?
17 Pasin bilong tingim man i poroman wantaim pasin marimari bilong Jehova. Bai yu stori olsem wanem long mining bilong dispela tok ‘tingim man’ na ‘pasin bilong tingim man’? Skelim dispela wantaim ol skripsa i stori long pasin bilong Jehova long tingim ol man. Baibel i soim olsem dispela pasin bilong Jehova i save kirapim em long tingim gut ol man long lain bilong em ol i sot long helpim. (Kisim Bek 22:26, 27) Long olgeta kantri, ol man bilong ol narapela lain na ol narapela man tu, ating ol inap i stap rabis. Taim Jehova i skulim lain bilong em long mekim gutpela pasin long ol kain man olsem, em i kirapim ol long tingim gen olsem bipo ol tu i bin stap olsem ol tripman—long Isip. (Lo 24:17-22) Olsem wanem long yumi ol manmeri bilong God long nau? Pasin bilong yumi long tingim ol narapela i helpim yumi long i stap wanbel, na tu, dispela pasin i pulim ol narapela i kam lotuim Jehova.—Aposel 10:34, 35; KTH 7:9, 10.
18. Yumi kisim wanem save long ol samting Jehova i tambuim ol Israel long mekim taim ol i stap wantaim ol manmeri bilong ol narapela kantri?
18 Tru ol Israel i mas tingim gut ol manmeri bilong ol narapela kantri, tasol dispela i no ken daunim pasin bilong ol long laikim Jehova na ol stretpela lo bilong em. God i skulim ol Israel olsem ol i no ken bihainim pasin bilong ol manmeri bilong ol narapela kantri i stap klostu—ol i no ken bihainim pasin bilong ol long mekim lotu na pasin pamuk bilong ol. (Kisim Bek 34:11-16; Lo 7:1-4) Dispela i stret long yumi tu long nau. Yumi mas i stap holi, olsem God bilong yumi, Jehova, em i stap holi.—1 Pita 1:15, 16.
19. Taim ol manmeri bilong Jehova i kliagut long tingting bilong em long ol pasin nogut, olsem wanem dispela inap lukautim ol?
19 Bilong helpim Moses long kliagut long ol pasin bilong Em, Jehova i kamapim klia olsem maski em i no orait long pasin bilong mekim sin, em i no save belhat kwik. Em i save givim haptaim bilong ol man i ken kisim save long ol samting em i laik ol i mas mekim na bihainim. Taim ol man i tanim bel, Jehova i save lusim sin bilong ol, tasol taim ol man i mekim ol bikpela rong na i stret ol i mas kisim strafe, Jehova i no save larim ol i abrusim strafe. Em i tokim Moses olsem pasin ol Israel i mekim bai helpim o nogutim ol lain tumbuna bilong ol i kamap bihain. Taim ol manmeri bilong God i pilim tru ol pasin bilong Jehova, dispela bai helpim ol na ol i no ken sutim tok long God long ol hevi ol yet i kamapim o kisim tingting olsem em i wok isi isi.
20. Wanem ol samting inap helpim yumi long mekim ol pasin i stret long ol wanbilip bilong yumi na ol man yumi bungim ol long wok autim tok? (Song 86:11)
20 Sapos yu laik kisim sampela save moa long Jehova na ol pasin bilong em, wok yet long skelim ol narapela buk na nius samting bilong kisim sampela save moa na skelim skelim ol tok long bel taim yu ritim Baibel. Skelim gut ol narapela narapela samting long ol pasin bilong Jehova. Beten na skelim olsem wanem yu inap bihainim ol pasin bilong God na mekim i stap bilong yu i stret moa long ol samting God i tingting pinis long mekim. Dispela bai helpim yu long abrusim ol hevi, na bai yu mekim ol pasin i stret long ol wanbilip, na helpim ol narapela long kisim save long gutpela God bilong yumi na laikim em tru.
[Futnot]
a Sapos yu gat buk Insight on the Scriptures, i gutpela yu ken ritim ol tok i stap aninit long het tok “Mercy.” O yu ken skelim buk Watch Tower Publications Index o program bilong kompiuta, Watchtower Library (CD-ROM) bilong kisim sampela save moa. Yusim wanpela buk i gat lista bilong olgeta wan wan tok bilong Baibel bilong painim ol skripsa i stori long pasin marimari. Ol Witnes Bilong Jehova i wokim olgeta dispela buk samting.
Yu Lainim Wanem Samting?
• Bilong wanem em i bikpela samting long Moses i mas i gat pasin daun? Bilong wanem yumi tu i mas i gat pasin daun?
• Wanem gutpela samting i kamap long pasin bilong bringim ol tok bilong Jehova i go planti taim long Fero?
• Wanem sampela gutpela stiatok em Moses i bin lainim na i stret long yumi tu?
• Yumi ken mekim wanem bilong kliagut long ol pasin bilong Jehova?
[Piksa long pes 21]
Moses i bringim ol tok bilong Jehova i go long Fero
[Piksa long pes 23]
Jehova i tokim Moses long ol samting em i laik ol i mas mekim
[Piksa long pes 24, 25]
Skelim skelim long bel ol pasin bilong Jehova