Ol Blesing o Ol Samting Nogut—Yumi Inap Makim Rot Yumi Laik Bihainim!
“I gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. . . . Tasol mi laikim yupela i mas bihainim rot bilong i stap gut.”—LO 30:19.
TAIM God Jehova i wokim yumi ol manmeri i gat tingting na save, em inapim yumi long makim wanem rot yumi laik bihainim. Em i no wokim yumi olsem wanpela masin o robot samting i no gat tingting—em i givim rot na wok long yumi long makim wanem rot yumi laik bihainim. (Song 100:3) Namba wan man na meri, em Adam na Iv, ol inap makim wanem rot ol i laik bihainim. Taim ol i makim pinis, orait nau God bai i skelim ol long samting ol i mekim.
2 Man bilong wokim yumi em i bin givim planti samting long ol man bambai ol i ken kisim ol blesing inap oltaim oltaim long wanpela paradais long graun. Orait, olsem wanem na dispela laik bilong God i no kamap yet? Long wanem, Adam i makim rot nogut em i laik bihainim. Jehova i bin putim lo long man olsem: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:16, 17) Sapos Adam i bin makim rot bilong bihainim lo bilong God, orait God bai mekim gut tru long dispela tupela tumbuna bilong yumi bilong pastaim. Tasol Adam i sakim tok bilong God na dispela i kamapim indai. (Stat 3:6, 18, 19) Olsem na sin na dai i kisim olgeta pikinini bilong Adam.—Rom 5:12.
Rot Bilong Kisim Blesing
3 God Jehova i bin wokim rot bambai em inap kamapim tru laik bilong em long mekim gut long ol man. Em yet i bin tok profet long wanpela Pikinini bai kamap; long Iden em i tok profet olsem: “Na bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [olsem pikinini] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Bihain God i tok promis olsem ol man i bihainim tok bilong em ol bai kisim ol blesing long rot bilong dispela Pikinini, em wanpela tumbuna pikinini bilong Abraham.—Stat 22:15-18.
4 Dispela Pikinini God i tok promis long salim i kam, em Krais Jisas. Pol, em wanpela aposel Kristen, em i stori long wok Krais Jisas i holim insait long ol samting Jehova i mekim bilong givim blesing long ol man. Pol i tok: “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.” (Rom 5:8) Ol sinman bilong graun i bihainim tok bilong God na ol i bilip long ofa bilong Krais Jisas bilong kisim bek ol man, ol bai kisim ol blesing. (Aposel 4:12) Orait, yu laik bihainim wanem rot? Bai yu makim rot bilong bihainim tok bilong God na kisim ol blesing? Sapos yu sakim tok bilong God, bai yu kisim samting i narapela kain tru long dispela.
Ol Samting Nogut
5 Ol samting nogut i narapela kain tru long ol blesing. Dispela tok “samting nogut,” as bilong en em wanpela tok Hibru, qela·lahʹ, ol i kisim long wanpela tok, qa·lalʹ, insait bilong en i olsem “no gat hevi long skel.” Tasol taim ol i kolim dispela tok bilong mekim tok piksa, insait bilong en i olsem “God i ken bagarapim yu,” o ‘rabisim man.’—Wok Pris 20:9; 2 Samuel 19:43.
6 Yumi ken tingim wanpela samting nogut i bin kamap kwiktaim. Dispela samting i kamap taim profet bilong God, Elisa, i lusim Jeriko na i wokabaut i go long Betel. Baibel i tok: “Elisa i lusim Jeriko na i wokabaut i go long Betel. Na planti manki bilong taun i stap ausait long taun na ol i lukim em, na ol i tok bilas long Elisa olsem, ‘E, yu hetkela, yu raus. Yu klia long dispela hap.’ Elisa i tanim na i lukluk strong long ol na em i tok, ‘Mi tok tru, Bikpela i ken bagarapim yupela.’ Na kwiktaim tupela bea i lusim bus na i kam kilim i dai 42 bilong ol dispela manki na i brukim nabaut ol bodi bilong ol.” (2 King 2:23, 24) Planti Baibel i no kolim wanem tok Elisa i bin mekim long ol dispela manki, tasol kwiktaim God i mekim wanpela samting, long wanem, Elisa em i wanpela profet bilong God na em i bihainim laik bilong God, na em i mekim dispela tok long nem bilong Jehova.
7 Dispela tok nogut ol manki i mekim long Elisa, ating as bilong en, em Elisa i bin pasim klos bilong Elaija i makim olsem em i gat namba olsem profet, na ol man i save long dispela klos, tasol ol dispela manki i no laikim wanpela senis bilong Elaija i kam long hap bilong ol. (2 King 2:13) Elisa i laik kamapim klia long ol olsem i stret em i kisim wok bilong Elaija, na tu, em i laik skulim ol dispela manki wantaim papamama bilong ol long daun long profet bilong Jehova. Olsem na Elisa i kolim nem bilong God bilong Elaija na singaut long em long mekim samting nogut long dispela lain i tok bilas long em. Jehova i laik kamapim long ples klia olsem em i orait long Elisa i stap profet bilong em, olsem na em i mekim na tupela bea i lusim bus na ol i kam kilim i dai 42 bikhetmanki i bin singaut na tok bilas long Elisa na brukim nabaut bodi bilong ol. Jehova i mekim dispela samting long ol, long wanem, ol i no daun liklik long man i olsem rot bilong Jehova long givim tok long ol man bilong graun long dispela taim bipo.
8 Planti yia paslain long dispela taim, ol Israel i mekim wankain pasin—ol i no daun long pasin Jehova i bin putim bilong bosim ol. Dispela samting i kamap olsem: Long yia 1513 B.C.E., Jehova i bin mekim gut long ol Israel na em i kisim bek ol long kalabus long Isip, “olsem tarangau i karim nupela pikinini long wing bilong en.” Bihain liklik, ol i tok promis long ol bai bihainim tok bilong God. Em nau, bilong God i ken orait long ol, ol i mas bihainim tok bilong em. Long maus bilong Moses Jehova i tok: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret.” Orait, ol manmeri i bekim tok olsem: “Mipela bai mekim olgeta samting olsem Bikpela i bin tok.” (Kisim Bek 19:4, 5, 8; 24:3) Ol Israel i tok ol i laikim tru Jehova, na ol i dediket long em, na ol i tok promis long ol bai bihainim tok bilong em. Sapos ol i mekim olsem, ol bai kisim planti blesing.
9 Tasol taim God i no raitim yet ol bikpela tok bilong dispela kontrak long ston, God i mas mekim samting nogut long ol. (Kisim Bek 31:18) I gat wanem as na em i mas mekim olsem? Ol i tok pinis long ol bai bihainim olgeta tok bilong Jehova, a? Tru, long maus i olsem ol i laik kisim ol blesing, tasol long pasin bilong ol, ol i kamapim klia olsem ol i laik bihainim wanpela rot i stret ol i mas kisim ol samting nogut long en.
10 Taim Moses i stap 40 de long maunten Sainai na em i kisim Tenpela Lo, long dispela taim ol Israel i brukim tok promis ol i bin mekim long i stap gut long Jehova. Baibel i tok: “Moses i stap longpela taim long maunten na em i no kam daun kwik. Olsem na ol manmeri i go bung long Aron na tokim em olsem, ‘Mipela i no save wanem samting i bin kamap long Moses, dispela man i bin kisim yumi long Isip na bringim yumi i kam. Olsem na yu mas wokim wanpela god bai i go paslain long mipela na bringim mipela long rot.’ ” (Kisim Bek 32:1) Em nau, long dispela taim tu ol i bikhet long man Jehova i bin makim bilong go pas na soim rot long lain bilong em. Sampela namel long ol Israel i pulim ol na ol i kirap bihainim pasin bilong ol Isip long lotuim god giaman, na samting nogut tru i painim ol long dispela—insait long wanpela de tasol, 3,000 man ol i kisim bagarap long bainat.—Kisim Bek 32:2-6, 25-29.
Toksave Long Ol Blesing na Ol Samting Nogut
11 Klostu long pinis bilong 40 yia ol Israel i bin wokabaut long ples wesan nating, Moses i kolim ol blesing ol bai kisim sapos ol i bihainim tok bilong God. Na Moses i kolim ol samting nogut bai painim ol sapos ol i laik sakim tok bilong Jehova. (Lo 27:11–28:10) Taim ol Israel i go insait pinis long Graun Bilong Promis, bihain liklik Josua i mekim ol samting olsem Moses i tokim em long mekim long ol blesing na ol samting nogut. Sikspela lain bilong Israel ol i sanap long as bilong maunten Ebal, na narapela 6-pela lain i sanap klostu long maunten Gerisim. Lain Livai i sanap long ples daun namel long ol. Josua i lukluk i go long ol lain i sanap klostu long maunten Ebal na em i kaunim tok bilong ol samting nogut, na ol i tok “Tru tumas, God i ken mekim olsem.” Na taim ol Livai i kaunim tok bilong ol blesing long ol manmeri i sanap klostu long maunten Gerisim, ol tu i tok olsem.—Josua 8:30-35.
12 Orait, long tingting yu ken ting olsem yu harim ol Livai i tok: “Sapos wanpela man i wokim giaman god long ston o long diwai o long ain samting na em i hait na i lotu long en, orait God i ken bagarapim dispela man. Ol dispela samting, ol i samting ol man yet i wokim, na God i no save laikim tru ol manmeri i lotu long ol giaman god. . . . Sapos wanpela man i bagarapim nem bilong papamama bilong en, orait God i ken bagarapim dispela man. . . . Sapos wanpela man i surikim mak bilong graun bilong wantok bilong en, orait God i ken bagarapim dispela man. . . . Sapos wanpela man i paulim aipas na wanpela aipas i no inap bihainim rot em i laik i go long en, orait God i ken bagarapim dispela man. . . . Sapos wanpela man i mekim rong long ol manmeri bilong arapela lain na long ol pikinini, papa bilong ol i dai pinis, na long ol meri, man bilong ol i dai pinis, orait God i ken bagarapim dispela man. . . . Sapos wanpela man i mekim trabel long meri bilong papa bilong en, orait God i ken bagarapim dispela man. . . . Sapos wanpela man i goapim wanpela animal, orait God i ken bagarapim dispela man. . . . Sapos wanpela man i mekim trabel long susa bilong em, orait God i ken bagarapim dispela man. . . . Sapos wanpela man i mekim trabel long tambu mama bilong em, orait God i ken bagarapim dispela man. . . . Sapos wanpela man i hait na kilim nating wanpela man i dai, orait God i ken bagarapim dispela man. . . . Sapos wanpela man i kisim mani bilong kilim i dai wanpela man i no gat rong, orait God i ken bagarapim dispela man.” Taim ol i kolim ol dispela tok long God i ken bagarapim ol, ol lain i sanap klostu long maunten Ebal ol i tok, “Tru tumas, God i ken mekim olsem.”—Lo 27:15-26.
13 Orait nau yu ken ting olsem yu harim ol manmeri i sanap klostu long maunten Gerisim ol i tok “Tru tumas” taim ol Livai i singaut olsem: “God bai i mekim gut long ol taun na gaden bilong yupela. God bai i givim yupela planti pikinini na mekim planti kaikai moa i kamap long gaden bilong yupela na givim yupela planti bulmakau na sipsip. God bai i mekim gut long ol gaden rais samting bilong yupela na long ol samting yupela i save kukim bilong kaikai. God bai i mekim olgeta wok bilong yupela i kamap gutpela.”—Lo 28:3-6.
14 Ol i mas mekim wanem bilong kisim ol dispela blesing? Baibel i tok: “Sapos yupela i bihainim tok bilong God, Bikpela bilong yumi, na bihainim gut olgeta lo bilong en nau mi givim long yupela, orait em bai i givim biknem long yupela na bai yupela i winim olgeta arapela pipel long graun. Yupela i mas bihainim tok bilong God, Bikpela bilong yumi, na bai em i givim yupela olgeta dispela gutpela samting.” (Lo 28:1, 2) Em nau, bilong kisim ol dispela gutpela blesing long God, ol i mas bihainim tok bilong em. Tasol olsem wanem long yumi ol man bilong nau? Bai yumi wan wan i wok yet long ‘bihainim tok bilong Jehova’ na bai yumi ken kisim ol blesing na kisim laip?—Lo 30:19, 20.
Yumi Mas Tingim Gut
15 Yumi ken tingim ol gutpela blesing wanpela Israel inap kisim sapos em i bihainim tok bilong Jehova. Lo 28:3 i tok: “God bai i mekim gut long ol taun na gaden bilong yupela.” Maski yumi sindaun long wanem hap o yumi kisim wanem wok, God inap mekim gut long yumi. Ating sampela i pilim ol i kalabus stret, long wanem, ol i sindaun long wanpela ples i bagarap tru o ol i sindaun long wanpela kantri i gat bikpela pait i stap. Na ating sampela i laik tru bai ol i ken i go long narapela hap na mekim wok bilong Jehova. Na ating sampela man Kristen i bel hevi, long wanem, ol i no bin makim ol long kamap wokman o elda insait long kongrigesen. Sampela meri Kristen i bel hevi, long wanem, ol i no gat rot long mekim wok bilong autim tok long olgeta de olsem painia o misineri. Tasol olgeta manmeri i ‘bihainim tok bilong Jehova’ na mekim olgeta samting em i laik bai ol i mas mekim, em bai mekim gut long ol long nau na i go inap oltaim oltaim bihain.
16 Lo 28:4 i tok: “God bai i givim yupela planti pikinini na mekim planti kaikai moa i kamap long gaden bilong yupela na givim yupela planti bulmakau na sipsip.” Long tok Hibru ol i no bin raitim olsem “yupela”; ol i raitim olsem “yu” bilong makim wanpela man tasol, na dispela i makim olsem Jehova bai mekim gut long ol wan wan Israel i bihainim tok bilong em. Orait, olsem wanem long ol wokman bilong Jehova long nau? Insait long oganaisesen bilong ol Witnes Bilong Jehova, lain bilong Jehova i wok long i go bikpela bikpela long olgeta hap, na ol wok bilong oganaisesen tu i go bikpela tru. Dispela samting i kamap, long wanem, God i mekim gut long wok bilong ol manmeri i autim gutnius bilong Kingdom, em ol i winim 5,000,000. (Mak 13:10) Na yumi ken ting olsem dispela lain inap i go bikpela moa, long wanem, long 1995 i gat bikpela lain moa yet, winim 13,000,000, ol i kam long bung bilong tingim indai bilong Bikpela bilong yumi. Olsem wanem long yu? Yu kisim sampela gutpela blesing long wok bilong Kingdom yu mekim?
Rot Ol Israel i Laik Bihainim
17 Sapos wanpela Israel i bihainim tok bilong God, orait God bai mekim gut long em. Moses i tok olsem: “Bai em i givim yupela olgeta dispela gutpela samting.” (Lo 28:2) Na Moses i tok tu long ol samting nogut, em i tok: “Bai ol dispela samting nogut i kamap long yupela.” (Lo 28:15) Sapos yu wanpela Israel bilong bipo, bai yu kisim ol blesing o bai yu kisim ol samting nogut? Samting yu mekim, olsem yu bihainim tok bilong God o yu sakim tok bilong em, dispela bai makim olsem yu bai kisim ol gutpela blesing o ol samting nogut.
18 Lo 28:15-68 i kolim ol hevi, olsem ol samting nogut, bai painim ol man i sakim tok bilong God. Sampela i narapela kain stret long ol gutpela blesing ol man i bihainim tok bilong God ol bai kisim, olsem i stap long Lo 28:3-14. Planti taim ol samting nogut tru i painim ol Israel, long wanem, ol i lotuim ol god giaman, em rot ol yet i laik bihainim. (Esra 9:7; Jeremaia 6:6-8; 44:2-6) Sori tru! Ol inap abrusim ol dispela samting nogut tru sapos ol i bihainim rot i stret—olsem ol i bihainim ol stretpela lo bilong Jehova i kamapim klia wanem pasin i gutpela na wanem pasin i nogut. Long nau planti manmeri ol i save kisim bikpela pen na hevi, long wanem, long laik bilong ol yet ol i sakim ol lo bilong Baibel na ol i bihainim ol lotu giaman, na mekim olkain pasin pamuk, na kisim ol drak nogut, na dring planti, na mekim ol narapela pasin olsem. Olsem long Israel na Juda long bipo, taim ol man i bihainim rot nogut em ol yet i makim, God i no orait long ol, na ol i stap bel hevi.—Aisaia 65:12-14.
19 Taim ol Israel i bihainim tok bilong Jehova, ol i kisim planti gutpela blesing tru, na ol i stap bel isi. Baibel i stori long taim bilong King Solomon, olsem: “Ol manmeri bilong Juda na Israel i bikpela lain tumas, inap olsem wesan bilong nambis. Ol i sindaun gut na ol i gat kaikai na dring na ol i amamas. . . . Taim Solomon i stap king, olgeta manmeri long olgeta hap bilong Juda na Israel, ol i sindaun gut klostu long gaden wain na diwai fik bilong ol, na i no gat wanpela samting nogut i kamap long ol.” (1 King 4:20-25) Long taim bilong King Devit tu, maski ol lain birua bilong God i mekim pasin birua long ol Israel, Jehova i sambai long ol na helpim ol na em i mekim gut long ol taim ol i bihainim tok bilong God bilong tok tru.—2 Samuel 7:28, 29; 8:1-15.
20 Orait, bai yu bihainim tok bilong God o bai yu sakim tok bilong em? Ol Israel inap makim wanem rot ol i laik bihainim. Maski yumi olgeta i bin kisim sin long Adam, yumi tu inap makim wanem rot yumi laik bihainim. Maski Satan i stap, na yumi stap namel long ol man nogut bilong dispela graun, na sin i stap long skin bilong yumi, yumi inap makim gutpela rot bilong bihainim. Na Man bilong wokim yumi em i bilip olsem maski i gat planti hevi na traim i painim yumi, bai i gat sampela man i makim gutpela rot bilong bihainim, na ol i no tok tasol long mekim—pasin ol i mekim i kamapim klia wanem rot ol i laik bihainim. (1 Pita 5:8-10) Olsem wanem long yu? Bai yu insait long dispela lain?
21 Long stori i kamap bihain long dispela, bai yumi inap skelim tingting na pasin bilong yumi wantaim tingting na pasin bilong sampela man bilong bipo. I gutpela sapos yumi olgeta wan wan i pilim tru na bihainim tok God i mekim long maus bilong Moses, em i tok: “I gat rot bilong i stap gut na rot bilong i dai. Long wanpela rot God bai i mekim gut long yupela, na long narapela rot bai yupela i painim bagarap. Orait nau yupela i mas makim wanem rot yupela i laik bihainim. . . . Tasol mi laikim yupela i mas bihainim rot bilong i stap gut.”—Lo 30:19.
Bai Yu Bekim Olsem Wanem?
◻ Olsem wanem Jehova i bin wokim rot bambai ol sinman inap kisim ol blesing?
◻ Wanem as bilong dispela tok “ol samting nogut”?
◻ Olsem wanem ol Israel inap kisim ol blesing na ol i no ken kisim ol samting nogut?
◻ Taim ol Israel i bihainim tok bilong God, ol i kisim wanem ol blesing?
[Askim Bilong Stadi]
1. God em inapim ol man long mekim wanem?
2. Adam i makim wanem rot em i laik bihainim? Wanem samting i kamap long dispela?
3. God i mekim wanem na yumi ken save tru olsem laik bilong em long ol man bai kamap tru?
4. Jehova i wokim wanem rot bilong mekim gut long ol man?
5. Wanem as bilong dispela tok, “ol samting nogut”?
6. Wanem samting i kamap long Elisa klostu long taun Betel bilong bipo?
7. Wanem samting i painim ol manki i singaut na tok bilas long Elisa? Bilong wanem dispela samting i painim ol?
8. Ol Israel i tok ol bai mekim wanem? Sapos ol i mekim olsem, wanem gutpela samting bai painim ol?
9, 10. Taim Moses i stap long maunten Sainai, ol Israel i mekim wanem? Olsem na wanem samting i painim ol?
11. Wanem tok bilong ol blesing na ol samting nogut ol i kolim long ol Israel olsem Moses i bin tokim Josua long mekim?
12. Ol Livai i kolim wanem ol samting nogut?
13. Long tok bilong yu yet, stori long sampela blesing ol Livai i bin kolim.
14. Ol Israel i mas mekim wanem na bai ol i ken kisim ol blesing?
15. Wanem bikpela samting bilong dispela blesing i stap long Lo 28:3? Dispela inap helpim yumi olsem wanem?
16. Olsem wanem tok bilong Lo 28:4 i painim oganaisesen bilong Jehova long nau?
17. Wanem samting bai makim olsem ol bai kisim ol blesing o ol samting nogut?
18. Olsem wanem ol Israel inap abrusim ol samting nogut?
19. Stori long sindaun bilong ol Juda na Israel taim ol i bihainim tok bilong Jehova.
20. God i bilip olsem wanem long ol man?
21. Long stori i kamap bihain long dispela, bai yumi skelim wanem samting?
[Piksa long pes 15]
Ol Israel i bung klostu long maunten Gerisim na maunten Ebal
[Kredit Lain]
Pictorial Archive (Near Eastern History) Est.