Yu Tingim God Em i Wanpela Man i Stap Tru?

OLSEM WANEM? Taim ol hevi i kamap na i bagarapim bel bilong yu, kwiktaim yu save beten long God? Sapos olsem, orait, yu pilim olsem yu toktok long wanpela man i stap tru?

Krais Jisas i tok long Papa bilong em long heven olsem: “Pasin bilong en i tru.” (Jon 7:​28) Tru tumas, God Jehova em i wanpela man i stap tru, na taim yu beten long em, i olsem yu askim wanpela gutpela pren long helpim yu o givim sampela gutpela tok long yu. Tasol bilong God i ken harim beten bilong yumi na orait long en, beten i mas inapim ol mak em Baibel i kolim. Olsem: Taim yumi beten long Man bilong “harim beten,” yumi mas mekim long pasin daun na long rot bilong Pikinini bilong em, Krais Jisas.​—⁠Song 65:2; 138:6; Jon 14:​6.

Ol man i no inap lukim God long ai, olsem na ating sampela i pilim olsem God i no wanpela man i stap tru. Ol i ting em i wanpela strong nating tasol. Sampela Kristen tu, maski ol i save pinis long ol gutpela pasin bilong God, ating sampela taim ol tu i hatwok long pilim olsem God em i wanpela man i stap tru tru. Sapos sampela taim yu yet yu bin pilim olsem, wanem samting inap mekim na yu tingim Jehova olsem wanpela man i stap tru?

Stadi Long Baibel

Sapos planti taim yu stadi long Baibel na yu stadi gut, bai yu tingim Jehova olsem wanpela man i stap tru. Bilip bilong yu bai kamap strong moa, na dispela bai helpim yu na bai i olsem yu ‘lukim God, em yumi man i no inap lukim long ai.’ (Hibru 11:​6, 27) Tasol pasin bilong stadi wan wan taim tasol long Baibel i no inap helpim tru bilip bilong yu.

Yumi ken tok piksa olsem: Long tingting bilong yu, tingim olsem skin bilong yu i gat kaskas i stap i stap na i no pinis, na nau dokta i tokim yu long putim wanpela kain marasin tupela taim long olgeta de bilong pinisim kaskas. Sapos yu putim marasin wanpela o tupela taim tasol long mun, yu ting kaskas bai pinis? Nogat, a? Olsem dispela dokta, man bilong raitim Song i tokim yumi long “marasin” yumi mas kisim bilong helpim yumi long i stap strong long spirit. Em i tok: Yumi mas kaunim Tok Bilong God “long san na long nait.” (Song 1:​1, 2) Bilong dispela samting olsem marasin i ken helpim yumi, yumi mas kaunim Tok Bilong God long olgeta de na larim ol buk Kristen i helpim yumi.​—⁠Josua 1:⁠8.

Taim yu mekim stadi, yu laik bai bilip bilong yu i ken kamap strong moa? Em hia wanpela samting yu ken mekim: Sampela Baibel, olsem Buk Baibel, i gat ol ves daunbilo long pes i makim narapela hap bilong Baibel i kamapim wankain tok. Olsem na taim yu kaunim pinis wanpela sapta long Baibel, makim wanpela ves yu laikim na lukim ol narapela hap bilong Baibel em ol ves daunbilo i makim bilong helpim stori. Long dispela rot, stadi bilong yu bai kamap gutpela moa, na yu bai pilim tru olsem olgeta tok bilong Baibel i stret wantaim. Na bai yu tingim God Jehova, em As bilong ol tok bilong Baibel, em i wanpela man i stap tru.

Na sapos yu lukim ol narapela hap bilong Baibel em ol ves i stap daunbilo i makim, dispela bai helpim yu long save gut long ol tok profet bilong Baibel na long truim bilong ol dispela tok. Ating yu save pinis long ol bikpela tok profet bilong Baibel, em sampela i tokaut olsem ol Babilon bai bagarapim Jerusalem. Tasol i gat sampela tok profet long Baibel, na truim bilong en, em planti man i no save long en.

Olsem: Kaunim tok profet i stori long strafe ol man i wokim gen Jeriko ol bai kisim, na tingim truim bilong en. Josua 6:​26 i tok: “Josua i givim strongpela tok long ol manmeri olsem, ‘Sapos wanpela man i wokim gen dispela taun Jeriko, bai Bikpela i bagarapim em. Taim em i kirapim wok long dispela taun, bai namba wan pikinini man bilong en i dai. Na taim em i wokim ol bikpela dua bilong taun, bai las pikinini man bilong en i dai.’ ” Truim bilong dispela tok i kamap 500 yia bihain. Wan King 16:34 i tok: “Long taim Ahap i stap king, Hiel bilong taun Betel i wokim taun Jeriko gen. Taim Hiel i kirapim wok, orait Abiram, namba wan pikinini man bilong en, i dai. Na taim em i wokim ol bikpela dua bilong taun, orait Segup, las pikinini man bilong en, i dai. Dispela samting i kamap long Hiel, em inapim dispela tok bipo Bikpela i bin mekim long maus bilong Josua, pikinini man bilong Nun.”a Wanpela God i stap tru, em tasol inap kamapim kain tok profet olsem na mekim dispela tok i kamap tru.

Taim yu kaunim Baibel, ating i gat sampela samting yu laik save long en. Olsem: Ating yu laik save, kirap long taim wanpela tok profet i kamap na i go inap long truim bilong en, em hamas yia. Tru, yu ken askim narapela long tokim yu, tasol gutpela sapos yu yet yu mekim wok na kisim save long dispela samting, a? Long rot bilong ol sat na ol buk i gat ol tok bilong Baibel long en, wok strong long painim bekim bilong dispela samting yu laik save long en, wankain olsem man i save wok strong long skelim gut mep i tokaut long mani ol i bin haitim i stap we. (Sindaun 2:​4, 5) Taim yu kisim bekim bilong ol samting yu laik save long en, dispela bai strongim bilip bilong yu na yu bai tingim God Jehova olsem wanpela man i stap tru.

Beten Oltaim na Beten Strong

Beten na bilip em bikpela samting. Ol disaipel bilong Jisas i tokim em: “Yu mas mekim bilip bilong mipela i kamap bikpela moa.” (Luk 17:⁠5) Sapos yu no pilim olsem Jehova em i wanpela man i stap tru, gutpela sapos yu beten na tokim em long helpim bilip bilong yu i kamap bikpela moa. Bilip strong long Papa bilong yu long heven na askim em long helpim yu na bai yu pilim tru olsem God em i wanpela man i stap tru.

Sapos i gat wanpela samting yu tingting planti long en, orait makim hap taim na givim bel long kamapim dispela long Pren bilong yu i stap long heven. Klostu long taim Jisas i dai, em i beten strong. Tru, em i krosim ol man i bihainim pasin bilong lotu na mekim ol longpela beten bilong ol man i ken lukim, tasol taim em i laik makim ol 12-pela aposel bilong em, em wanpela tasol i stap na em i beten long nait olgeta. (Mak 12:​38-​40; Luk 6:​12-​16) Na pasin bilong Hana inap skulim yumi​—⁠em dispela meri i kamap mama bilong profet Samuel. Em i laik tru long kisim wanpela pikinini man, olsem na “em i beten longpela taim” long Jehova.​—⁠1 Samuel 1:​12.

Ol dispela samting i skulim yumi long wanem samting? Bilong God i ken harim beten bilong yu, yu mas beten strong, na beten oltaim, na beten long ol samting i stret wantaim laik bilong God. (Luk 22:44; Rom 12:12; 1 Tesalonaika 5:​17; 1 Jon 5:​13-​15) Sapos yu mekim olsem, bai yu tingim God olsem wanpela man i stap tru.

Lukim Ol Samting God i Bin Wokim

Ol man bilong malenim piksa, pasin bilong ol i kamap ples klia long ol piksa ol i wokim. Na olsem tasol, “sampela pasin” bilong Jehova, em Man bilong wokim olgeta samting long heven na graun, ol i kamap ples klia long ol samting em i bin wokim. (Rom 1:​20) Taim yumi glasim gut ol samting Jehova i bin wokim, dispela i helpim yumi long save gut long ol pasin bilong em, na long dispela rot yumi tingim em olsem wanpela man i stap tru.

Sapos yu glasim gut ol samting God i bin wokim, ating bai yu pilim moa yet ol pasin bilong em. Olsem: Taim yumi kisim save olsem ol pisin i save bihainim rot stret i bringim ol long ples ol i laik kamap long en, dispela inap helpim yumi long pilim moa yet gutpela save na tingting bilong Jehova. Taim yu kaunim stori bilong ol samting i stap antap, ating bai yu kisim save olsem wanpela bikpela lain sta ol i kolim Milkiwe, braitpela bilong en i olsem 100,000 lait-yia, em i wanpela lain tasol bilong planti bilion bikpela lain sta. Ating dispela i mekim na yu pilim tru olsem Man bilong wokim ol samting em i gat bikpela save na gutpela tingting, a?

Tru tumas, gutpela save na tingting bilong Jehova em samting tru tru! Tasol dispela i mekim wanem long yu yet? Orait, ol hevi yumi kamapim long em, em i no save tingting planti long en olsem em i no inap stretim, nogat. Yes, maski yumi gat liklik save tasol long ol samting em i bin wokim, dispela inap mekim na yu tingim em olsem wanpela man i stap tru.

Wokabaut Wantaim Jehova

Olsem wanem? Long rot bilong ol samting i painim yu, yu inap pilim olsem Jehova em i wanpela man i stap tru? Yu inap sapos yu wankain olsem gutpela man Noa. Oltaim em i bihainim tok bilong Jehova, olsem na Baibel i tok: “Wokabaut bilong en i stret long ai bilong God.” (Stat 6:⁠9) Wokabaut bilong Noa i olsem Jehova yet i wokabaut wantaim em. Yu tu yu inap tingim God olsem wanpela man i stap tru na yu inap wokabaut wantaim em.

Sapos yu wokabaut wantaim God, bai yu bilip long ol tok promis i stap long Baibel na mekim wok i stret wantaim ol dispela tok promis. Olsem: Yu save bilip long dispela tok bilong Jisas: “Yupela i mas larim God i stap king bilong yupela, na kisim stretpela pasin bilong em, na bai em i givim dispela olgeta arapela samting tu [bilong skin yu mas kisim] long yupela.” (Matyu 6:​25-​33) Tru, Jehova i helpim yumi, tasol sampela taim i no long rot yumi ting em bai helpim yumi. Tasol taim yu beten na yu pilim olsem God i helpim yu, long tingting bilong yu em bai stap tru tru olsem wanpela man i wokabaut wantaim yu.

Taim yumi wok strong long wokabaut wantaim God, dispela bai helpim yumi long go klostu long Jehova. Tingim Manuela, em planti hevi i bin painim em. Em i tok: “Taim mi gat hevi o mi sot long wanpela samting, mi save bihainim tok bilong Sindaun 18:10. Mi ran i go long Jehova. Olgeta taim em i bin i stap olsem ‘wanpela strongpela haus’ bilong helpim mi.” Manuela inap mekim dispela tok, long wanem, inap olsem 36 yia em i save wetim Jehova i helpim em na Jehova i bin sambai long em.

Olsem wanem? Nau tasol yu kirap long bilip tru long Jehova? Yu no ken bel hevi sapos yu no pas gut wantaim em inap long mak yu laikim. Long olgeta wan wan de, wokabaut olsem yu wokabaut tru tru wantaim God. Taim yu stap gut long God i go i go na yu bihainim yet dispela pasin, dispela bai helpim yu long go klostu moa long Jehova na pas gut wantaim em.​—⁠Song 25:14; Sindaun 3:​26, 32.

Narapela samting yu ken mekim bilong wokabaut wantaim God, em yu mas givim bel tru long mekim wok bilong em. Taim yu autim tok bilong Kingdom, yu kamap wanwok bilong Jehova. (1 Korin 3:⁠9) Sapos yu pilim tru dispela samting, dispela bai helpim yu long pilim moa yet olsem God em i wanpela man i stap tru.

Song 37:5 i tok: “Yu mas putim laip bilong yu long han bilong Bikpela. Bilip strong long em, na em bai i helpim yu.” Wanem wanem samting i givim hevi long yu o yu tingting planti long en, oltaim putim long han bilong God. Oltaim wetim em long helpim na stiaim yu. Sapos yu beten na wet long God Jehova i helpim yu na oltaim yu bilip tru long em, bai yu pilim olsem yu stap gut, long wanem, yu save em bai no ken les long helpim yu oltaim. Olsem wanem? Taim yu beten long Jehova na kamapim hevi bilong yu, yu bilip tru olsem Jehova bai helpim yu? Bai yu bilip tru long dispela samting sapos yu tingim God em wanpela man i stap tru.

[Futnot]

[Piksa long pes 21]

Taim yu stadi, mekim ol samting bilong strongim bilip bilong yu

[Piksa long pes 22]

Makim hap taim bilong beten strong oltaim

[Ol Piksa long pes 23]

Lukim ol samting God i bin wokim na tingim olsem wanem ol dispela samting i kamapim ol pasin bilong em

[Ol Kredit Lain]

Pisin hamingbet: U.S. Fish and Wildlife Service, Washington, D.C./Dean Biggins; ol sta: Piksa: Copyright IAC/RGO 1991, Dr. D. Malin et al, Isaac Newton Telescope, Roque de los Muchachos Observatory, La Palma, Canary Islands