Tingim Man Bilong Mekim Ol Strongpela Wok!
“Stap isi na putim yau gut na kisim tingting long ol kain kain strongpela wok God i save mekim.”—JOP 37:14.
1, 2. Long 1922, ol i painim wanem gutpela samting? Ol man i ting olsem wanem long dispela samting?
INAP planti yia wanpela saveman bilong painim ol samting bilong bipo na wanpela bikman bilong Inglan, ol i bin wok wantaim bilong painim wanpela gutpela samting tru. Bihain, long Novemba 26, 1922, long ples matmat bilong ol king bilong Isip long Ples Daun Bilong Ol King, saveman Howard Carter na Bikman Carnarvon ol i painim dispela gutpela samting—em ples matmat bilong King Tutankamen. Ol i kamap long wanpela dua i pas strong na ol i drilim hul long en. Carter i putim wanpela kandel long hul na lukluk i go insait.
2 Bihain Carter i stori long dispela na i tok: “Bel bilong Bikman Carnarvon i no stap isi na em i no inap wet moa, olsem na em i askim olsem: ‘Yu inap lukim wanpela samting?’ Mi sotwin stret na mi inap mekim dispela tok tasol: ‘Yes, mi lukim ol gutpela gutpela samting tru.’ ” Namel long planti tausen gutpela gutpela samting, i gat wanpela bokis bilong daiman ol i wokim olgeta long gol. Ating yu bin lukim piksa bilong sampela bilong ol dispela gutpela samting o yu lukim long wanpela haus tumbuna. Ol dispela samting i stap long ol haus tumbuna ol i gutpela samting tru, tasol ating ol i no mekim wanpela samting long i stap bilong yu. Olsem na gutpela sapos yumi kirap skelim ol strongpela wok i bikpela samting long i stap bilong yu na ol inap helpim yu.
3. Yumi ken painim we sampela save long ol strongpela wok em ol inap helpim yumi?
3 Yumi ken tingim wanpela man i bin stap inap planti tausen yia i go pinis—em wanpela man yumi ken tingim em tru, winim ol man bilong piksa wokabaut, o bilong pilai spot, o bilong wanpela lain king. Em i gat biknem tru, winim biknem bilong ol narapela man long ol kantri bilong hap sankamap. Ating yu save long nem bilong em—Jop. Wanpela buk olgeta bilong Baibel i stori long em. Tasol wanpela yangpela man i bin stap long taim bilong Jop, nem bilong em Elihu, em i ting em i mas stretim Jop. Elihu i tok, Jop i bin tingting tumas long em yet na long ol man i stap klostu long em. Long Jop sapta 37, yumi lukim sampela gutpela savetok moa, em ol dispela tok bai helpim tru yumi olgeta.—Jop 1:1-3; 32:1–33:12.
4. Wanem samting i kamap na bihain Elihu i mekim dispela tok i stap long Jop 37:14?
4 Tripela pren giaman bilong Jop i mekim longpela tok bilong kamapim ol popaia ol i ting Jop i bin mekim long tingting na pasin bilong em. (Jop 15:1-6, 16; 22:5-10) Elihu i stap isi na wet long ol narapela i pinisim tok bilong ol. Bihain em i toktok na dispela tok i kamapim gutpela tingting na save bilong em. Em i mekim planti gutpela tok, tasol lukim dispela bikpela tok: “Jop, yu mas stap isi na putim yau gut na kisim tingting long ol kain kain strongpela wok God i save mekim.”—Jop 37:14.
Man i Mekim Ol Wok
5. “Ol kain kain strongpela wok God i save mekim” em Elihu i tok long en i kamapim klia wanem ol samting?
5 Elihu i no tokim Jop long tingim Jop, o Elihu, o ol narapela man. Elihu i tokim Jop—na yumi tu—long tingim ol strongpela wok bilong God Jehova. Yu ting dispela tok, “ol kain kain strongpela wok God i save mekim,” i makim wanem ol samting? Ating yu save tingting planti long ol sik inap painim yu, na ol samting bilong mani, na ol samting bai kamap bihain, na tu, long famili bilong yu, ol wanwok, na ol man i stap klostu long yu. Olsem na i gat wanem as na yu mas tingim ol strongpela wok bilong God? Tru tumas, ol strongpela wok God i save mekim i kamapim klia gutpela save bilong em na namba bilong em long bosim ol samting em i bin wokim long graun. (Nehemia 9:6; Song 24:1; 104:24; 136:5, 6) Bilong save gut long ol dispela samting, yumi ken lukim wanpela tok long Buk Josua.
6, 7. (a) Jehova i mekim wanem ol bikpela wok long taim bilong Moses na Josua? (b) Sapos yu bin lukim wanpela bilong ol dispela bikpela wok i bin kamap long taim bilong Moses na Josua, bai yu ting olsem wanem?
6 Jehova i bin kamapim ol hevi long Isip bilong bipo, na brukim solwara Retsi i go tupela hap bambai Moses inap kisim lain Israel i go lusim kalabus. (Kisim Bek 7:1–14:31; Song 106:7, 21, 22) Wankain samting i bin kamap em Josua sapta 3 i stori long en. Man i kisim ples bilong Moses, em Josua, em i mas kisim lain bilong God i go brukim wanpela wara na go insait long Graun Bilong Promis. Josua i tok: “Yupela i mas bihainim pasin bilong kamap klin long ai bilong God, long wanem, tumora Bikpela bai i mekim ol bikpela mirakel namel long yupela.” (Josua 3:5) Wanem ol bikpela mirakel?
7 Stori i kamapim olsem Jehova i brukim wara Jordan i go tupela hap bambai planti handet tausen man, meri, na pikinini inap wokabaut long graun i drai. (Josua 3:7-17) Sapos yumi bin i stap na lukim wara i bruk i go tupela hap na ol manmeri i brukim na wokabaut i go kamap long hapsait bilong en, bai yumi tok em i wanpela bikpela samting tru Jehova i mekim, a? Em i kamapim strong bilong God long bosim ol samting em i bin wokim. Tasol nau long taim bilong yumi tu, ol gutpela samting tru i wok long kamap. Bilong luksave long sampela, na bilong save olsem i gat wanem as na yumi mas tingim ol dispela samting, skelim Jop 37:5-7.
8, 9. Jop 37:5-7 i tok long wanem ol bikpela wok? Bilong wanem yumi mas tingting long ol dispela samting?
8 Elihu i tok: “Maus bilong God i pairap narakain tru na i gutpela moa. Na em i save mekim olkain samting, i winim tingting bilong yumi.” Elihu i laik tok wanem long pasin bilong God long mekim ol samting “i gutpela moa”? Em i toktok long ais na bikpela ren. Dispela samting i save pasim rot bilong fama long mekim wok gaden, na nau em i gat taim na as bilong tingim ol gutpela wok bilong God. Ating yumi no mekim wok fama, tasol ren na ais inap mekim sampela samting long i stap bilong yumi. Sapos yumi stap long ples kol o long ples i hat, ais o ren inap pasim yumi tu long mekim wok bilong yumi. Olsem wanem? Yumi save lusim hap taim bilong tingim man i as bilong ol dispela gutpela samting? Yu bin mekim olsem?
9 Olsem yumi ken ritim long Jop sapta 38, God Jehova yet i toktok long wankain samting taim em i givim sampela bikpela askim long Jop. Tru, Man bilong wokim yumi em i givim ol dispela askim long Jop, tasol ol dispela askim i helpim yumi long skelim tingting na i stap bilong yumi tu, na ol samting bai kamap bihain. Olsem na yumi ken skelim ol askim bilong God na tingting long insait bilong ol dispela askim. Em nau, bai yumi mekim olsem Jop 37:14 i tokim yumi long mekim.
10. Jop sapta 38 i mas kirapim yumi long pilim wanem samting? Dispela sapta i kamapim wanem ol askim?
10 Kirap bilong sapta 38 i tok: “Bikpela i stap insait long bikpela win na ren na i bekim tok bilong Jop olsem, ‘Jop, yu no gat gutpela tingting na save. Yu wanem kain man tru na yu mekim planti toktok nabaut, na yu laik paulim ol samting mi laik mekim? Nau yu mas sanap olsem man tru. Na bai mi askim yu long olkain samting na yu mas bekim ol askim bilong mi.’ ” (Jop 38:1-3) Em nau, dispela tok God i mekim i kirapim yumi long pilim gut tok bilong ol ves i kamap bihain long en. Dispela tok i helpim Jop long stretim tingting bilong em na bai em i save olsem em i sanap long ai bilong Man bilong wokim heven na graun—em dispela Man bai skelim pasin bilong Jop. Dispela samting inap lainim yumi tu na ol man bilong taim bilong yumi. Nau God i toktok long ol samting Elihu i bin toktok long en. Em i tok: “Taim mi wokim na strongim as bilong dispela graun, yu stap we? Sapos yu save gut long ol dispela samting, yu mas tokim mi. Husat i bin tingim na putim ol mak bilong dispela graun? Ating yu save, a? Na husat i bin pulim ol lain bilong metaim ol hap bilong graun? Ol pos bilong strongim graun i sanap long wanem hap? Na husat i bin putim bikpela ston bilong wokim graun antap long en?”—Jop 38:4-6.
11. Jop 38:4-6 i mas helpim yumi long tingim wanem ol samting?
11 Jop—o yumi yet—i stap we taim God i wokim graun? Olsem wanem? Yumi bin stap olsem man bilong wokim piksa bilong graun na long dispela piksa yumi bin metaim ol hap bilong graun? Nogat tru! Ol manmeri i no stap yet taim ol dispela samting i bin kamap. God i tok graun i olsem wanpela traipela haus, na em i askim olsem: “Husat i bin putim bikpela ston bilong wokim graun antap long en?” Yumi save olsem graun i stap longwe long san long mak stret, olsem na yumi inap i stap gut long graun. Na bikpela bilong graun tu i stret. Sapos graun bilong yumi i bikpela moa, ges haidrojen i no inap lusim graun, na ol samting i gat laip i no inap i stap gut long en. Tru tumas, wanpela man i bin “putim bikpela ston bilong wokim graun” long ples stret bilong en. Olsem wanem? Jop i bin mekim dispela samting? O yumi? O God Jehova i bin mekim?—Sindaun 3:19; Jeremaia 10:12.
Husat Man Inap Bekim?
12. Askim i stap long Jop 38:6 i kirapim yumi long tingim wanem samting?
12 God i mekim dispela askim tu: “Ol pos bilong strongim graun i sanap long wanem hap?” Em i wanpela gutpela askim, a? Ating yumi save long wanpela samting em Jop i no bin save long en—em wanpela strong i save pulim ol samting i kam daun, ol i kolim graviti. Planti bilong yumi i save olsem strong bilong graviti i kam long bikpela san, i save helpim graun bilong yumi long stap long ples stret bilong en, olsem ol pos bilong strongim graun. Tasol husat i save gut long graviti em i wanem samting?
13, 14. (a) Yumi mas tok wanem long graviti? (b) Yumi mas ting olsem wanem long ol samting Jop 38:6 i tok long en?
13 Man bilong raitim buk The Universe Explained, em i tok ‘planti man i save long dispela tok graviti, tasol em i wanpela strong bilong graun ol man i gat liklik save tasol long en.’ Dispela buk i tok moa: “I luk olsem strong bilong graviti i save raun hariap tru long ples antap, na i olsem i no gat wanpela samting i helpim em long mekim olsem. . . . Tasol i no gat wanpela man i save tru long ol samting bilong graviti.” Tingim insait bilong dispela tok bilong ol.
14 Ol saveman i bin kisim bikpela save moa insait long 3,000 yia i go pinis, em long dispela taim Jehova i bin kamapim ol dispela askim long Jop. Tasol yumi o ol saveman i no inap stori gut long graviti em i wanem samting, em strong bilong dispela samting i mekim na graun bilong yumi i save tanim tanim long rot stret bilong en bambai yumi ken i stap gut hia long graun. (Jop 26:7; Aisaia 45:18) Dispela tok i no makim olsem yumi olgeta i mas wok strong long skelim ol samting bilong graviti, nogat. Tasol taim yu tingim dispela wanpela strongpela wok bilong God, dispela i mas stiaim tingting bilong yumi, olsem yumi gat wanem tingting long em. Olsem wanem? Yu kirap nogut moa yet long gutpela tingting na save bilong em? Na yu inap pilim olsem i gat wanem as na yumi mas kisim sampela save moa long laik bilong em?
15-17. (a) Jop 38:8-11 i toktok long wanem bikpela samting? Wanem ol askim i kamap long dispela? (b) Yumi mas tok wanem long save bilong ol man long solwara na ol hap ol dispela solwara i stap long en long graun?
15 Man bilong wokim olgeta samting i mekim sampela askim moa, olsem: “Long taim solwara i bin sut i kam ausait long bel bilong graun, husat i bin pasim ol dua, na solwara i stap insait long mak bilong en? Long taim solwara i kamap nupela, mi bin karamapim em long ol klaut, olsem klos bilong en. Na mi bin pasim ol blakpela klaut long en olsem mama i save pasim laplap long nupela pikinini. Na mi bin makim arere bilong solwara i stap olsem banis i raunim em. Na mi tokim solwara olsem, ‘Biksi bilong yu i ken bruk i kam inap long dispela mak tasol. I tambu tru long kalapim dispela mak.’ ”—Jop 38:8-11.
16 Ol banis i raunim solwara, em ol bikpela hap graun, na ol solwara, na haiwara na draiwara. Inap hamas yia ol man i bin lukim na skelim ol dispela samting? Inap planti tausen yia, na insait long wan handet yia i go pinis ol i bin wok strong moa long skelim ol dispela samting. Yu inap ting ol man i kisim pinis olgeta save ol inap kisim long ol dispela samting. Tasol long dispela yia 2001, sapos yu skelim gut dispela samting na mekim wok long ol bikpela laibreri o Intenet bilong kisim ol nupela save, bai yu kisim save long wanem samting?
17 Long wanpela buk i gat nem, bai yu lukim dispela tok: “Inap longtaim pinis ol saveman i wok long skelim skelim ol bikpela hap graun, na ol solwara, na ol maunten samting i kamap long en, na ol i kamapim kain kain tingting bilong ol long dispela samting.” Taim buk i kamapim pinis dispela tok, em i stori long 4-pela rot ol i ting ol dispela samting i bin kamap, tasol buk i tok ol dispela tok em sampela “bilong planti tok ol i no bin truim.” Na ating yu save olsem ‘tok ol i no bin truim i makim olsem ol i no bin painim ol samting bilong truim tok bilong ol.’
18. Jop 38:8-11 i kirapim yu long kisim wanem ol tingting?
18 Em nau, dispela i kamapim klia olsem ol askim i stap long Jop 38:8-11 ol i stret bilong tingim long nau, a? Yumi no inap tok yumi yet i bin stretim ol dispela samting i stap long graun na ol i wok gut olsem. Yumi no bin putim mun long ples stret bilong en bambai strong bilong en inap kamapim haiwara na draiwara, em ol samting i no save nogutim ol nambis bilong yumi o yumi yet. Yu save long man i bin wokim ol dispela samting, em Man bilong mekim ol strongpela wok.—Song 33:7; 89:9; Sindaun 8:29; Aposel 4:24; KTH 14:7.
Litimapim Nem Bilong Jehova
19. Ol gutpela tok i stap long Jop 38:12-14 i kirapim yumi long tingim wanem ol samting bilong graun?
19 Ol man i no bin stretim wokabaut bilong graun, olsem Jop 38:12-14 i tok long en. Wokabaut bilong graun i mekim na tulait i bruk long moningtaim, na planti taim em i luk naispela tru. Taim san i go antap, mak bilong ol maunten samting i kamap ples klia. Taim yumi tingting liklik long wokabaut bilong graun, yumi kirap nogut long graun i no save raun hariap tumas, em dispela samting bai bagarapim ol samting long graun. Na tu, graun i no save raun isi isi tumas na bai san na nait i winim planti aua, na graun i kamap hat tumas o kol tumas na ol man i no inap i stap long en. Tru tumas, yumi mas amamas long God i bin stretim wokabaut bilong graun, na ol man yet i no bin mekim.—Song 148:1-5.
20. Ol askim i stap long Jop 38:16, 18, bai yu bekim olsem wanem?
20 Orait nau tingim olsem God i givim sampela askim moa long yu, olsem: “Ating yu bin i go daun long as bilong solwara na lukim ol ples wara i save kamap long en, na yu bin wokabaut long dispela hap, a?” Ol saveman bilong ol samting bilong solwara ol tu i no inap bekim gut dispela askim! “Dispela graun i bikpela tumas. Ating yu save long olgeta hap bilong en, a? Sapos yu save, orait yu mas tokim mi.” (Jop 38:16, 18) Olsem wanem? Yu bin raun na lukim olgeta hap bilong graun, o bikpela hap bilong en? Ating planti yia moa yet bai lus bambai man i ken raun na lukim olgeta gutpela hap bilong graun bilong yumi. Na em bai wanpela gutpela samting tru bilong mekim, a?
21. (a) Wanem ol askim i stap long Jop 38:19? (b) Save yumi kisim long lait i mas kirapim yumi long mekim wanem?
21 Lukim tu ol bikpela askim i stap long Jop 38:19: “Yu save long rot i go long as ples bilong lait, a? Na as ples bilong tudak i stap we?” Lait bilong san i save hatim graun na skin bilong yumi, maski i no gat wanpela man inap stori gut long dispela wok bilong God. Yumi inap kisim kaikai na win oksijen, long wanem, ol plaua na diwai samting i save kisim lait bilong san. Yumi inap ritim buk, lukim pes bilong ol famili bilong yumi, lukim san i go daun, na planti narapela gutpela samting olsem. Taim yumi mekim olsem, yumi mas tingim ol gutpela wok bilong God, a?—Song 104:1, 2; 145:5; Aisaia 45:7; Jeremaia 31:35.
22. Devit bilong bipo i tingting olsem wanem long ol gutpela wok bilong God?
22 Olsem wanem? Yumi tingim tingim ol gutpela wok bilong Jehova bambai yumi ken pilim tru na kirap nogut long en, na em tasol? Ating nogat. Man bilong raitim Song i tok, yumi no inap save gut na stori long olgeta gutpela wok bilong God. Devit i tok: “God, Bikpela bilong mi, yu bin mekim planti gutpela wok . . . Sapos mi autim tok long ol man na tokim ol long wok na tingting bilong yu, olaman! Dispela i moa moa yet! Mi no inap kaunim ol samting yu bin mekim bilong helpim mipela.” (Song 40:5) Devit i no laik tok olsem em bai i no ken stori long ol dispela gutpela wok, nogat. Em i kamapim klia olsem em bai toktok long ol dispela samting. Long Song 9:1, em i tok: “God, long bel bilong mi, mi laik tenkyu tru long yu. Mi laik tokim ol manmeri long olgeta gutpela wok yu bin mekim.”
23. Yu ting olsem wanem long ol gutpela wok bilong God? Yu ken helpim ol narapela olsem wanem?
23 Bel bilong yumi tu i mas kirapim yumi long pilim ol gutpela wok bilong God, a? Yumi kirap nogut long ol gutpela wok bilong God na ating dispela i kirapim yumi long toktok long em, na long ol samting em i bin mekim, na long ol samting em bai mekim bihain, a? Yumi save pinis long ol samting yumi mas mekim—yumi mas “tokim olgeta lain manmeri long biknem bilong em na long ol gutpela gutpela wok em i bin mekim.” (Song 96:3-5) Em nau, yumi ken kamapim pasin bilong yumi long tingim tru ol gutpela wok bilong God long rot bilong tokim ol narapela man long ol save yumi bin kisim long em. Maski ol i bin go bikpela namel long ol man i no save tingim Man bilong wokim olgeta samting, yumi ken mekim ol gutpela tok i gat as bilong en bilong kirapim ol long tingim God. Na i no dispela samting tasol, nogat; tok bilong yumi inap kirapim laik bilong ol long kisim save na lotuim dispela man i bin “mekim olgeta samting i kamap,” em Man bilong mekim ol strongpela wok, em Jehova.—KTH 4:11.
Bai Yu Bekim Olsem Wanem?
• Tok i stap long Jop 37:14 i kirapim yu long tingim wanem ol wok bilong God?
• Wanem sampela bikpela tok i stap long Jop sapta 37 na 38 em ol man bilong saiens i no inap stori gut long en?
• Yu ting olsem wanem long ol gutpela wok bilong God, na dispela i kirapim yu long mekim wanem?
[Piksa long pes 7]
Husat i wokim banis bilong solwara na em i stap long ples stret bilong en?
[Piksa long pes 7]
Husat i bin raun na lukim olgeta gutpela hap bilong graun em God i bin wokim?