God Em i Husat?

Kirap long bipo yet ol man i lotuim planti god na ol god meri. Maski i olsem, Baibel i stori long wanpela God i “winim olgeta arapela god.” (2 Stori 2:5) Em i husat? Na bilong wanem em i winim olgeta arapela god ol man i lotuim? Long dispela lesen, bai yu kisim skul long tok God i mekim long em i husat.

1. Wanem nem bilong God, na hau yumi save olsem em i laik bai yumi mas save long dispela nem?

Long Baibel, God i tokim yumi long em yet. Em i tok: “Mi Jehova. Dispela em nem bilong mi.” (Ritim Aisaia 42:5, 8.) “Jehova” em nem ol i tanim long wanpela tok Hibru mining bilong en, “Em i Mekim i Kamap.” Jehova i laik bai yumi save long nem bilong em. (Kisim Bek 3:15) Olsem wanem yumi save long dispela? Long Baibel em i putim nem bilong em winim 7,000 taim!a Nem Jehova em nem bilong “God tru, long heven na long graun.”—Lo 4:39.

2. Baibel i tok wanem long Jehova?

Baibel i tok namel long olgeta god ol man i lotuim, Jehova wanpela tasol em God tru. Bilong wanem? I gat planti risen. Jehova em nambawan bos, na em wanpela tasol i “God Antap Tru na [em i] bosim olgeta hap bilong graun.” (Ritim Buk Song 83:18.) Em “God i Gat Olgeta Strong,” na dispela i makim olsem em i gat strong long mekim wanem wanem samting em i laik mekim. Em i “wokim olgeta samting”—dispela yunives na olgeta samting i gat laip long graun. (Revelesen 4:8, 11) Jehova wanpela tasol i stap oltaim oltaim.—Buk Song 90:2.

3. God i gat planti biknem, tasol wanpela nem

Lukim hau ol biknem bilong wanpela man i no wankain long nem tru bilong em. Pilaim VIDIO, na stori long dispela askim.

VIDIO: Planti Biknem, Tasol Wanpela Nem (0:41)

• Olsem wanem wanpela biknem, olsem “Bikpela,” i no wankain long nem?

Baibel i tok ol man i save lotuim planti god na planti bikpela. Ritim Buk Song 136:1-3, na stori long dispela askim:

• Husat em ‘God antap tru winim olgeta arapela god’ na “Bikpela bilong olgeta bikpela”?

4. Jehova i laik bai yu save long nem bilong em na kolim

VIDIO: Yu Ting God i Gat Nem?—Hap Bilong En (3:11)

• Yu ting Jehova i laik bai ol man i mas save long nem bilong em? Bilong wanem?

Jehova i laik bai ol man i mas kolim nem bilong em. Ritim Rom 10:13, na stori long ol dispela askim:

• Bilong wanem em i bikpela samting long kolim nem bilong God, Jehova?

• Yu save pilim olsem wanem taim wanpela i tingim nem bilong yu na kolim?

• Yu ting Jehova i pilim olsem wanem taim yu kolim nem bilong em?

5. Jehova i laik bai yu go klostu long em

VIDIO: Mi Wok Long Painim God Tru (8:18)

• Long vidio, Soten i kisim save long nem bilong God na dispela i helpim em olsem wanem?

Bilong kamap pren bilong wanpela, pastaim yu mas save long nem bilong em. Ritim Jems 4:8a, na stori long ol dispela askim:

• Jehova i laik bai yu mekim wanem?

• Olsem wanem pasin bilong save na kolim nem bilong God inap helpim yu go klostu long em?

OL BIKPELA POIN

Jehova em nem bilong dispela God tru. Em i laik bai yumi save na kolim dispela nem na bai yumi inap go klostu long em.

Riviu

• Olsem wanem Jehova i narapela kain long ol narapela god ol man i save lotuim?

• Bilong wanem yumi mas kolim nem bilong God?

• Wanem samting i soim olsem Jehova i laik bai yu go klostu long em?

MEKIM WOK PAINIMAUT

Skelim 5-pela risen na yumi ken bilip tru olsem God i stap.

“Yu Ting God i Stap Tru?” (Atikol long websait)

Stori long wai na i stret yumi bilip olsem God i no gat kirap bilong en.

“Husat i Wokim God?” (Wastaua, Ogas 1, 2014)

Kisim save long risen na yumi mas kolim nem bilong God, maski yumi no save pastaim ol i kolim dispela nem olsem wanem.

“Jehova Em i Husat?” (Atikol long websait)

Yu ting wanem nem yumi kolim God long en, dispela i bikpela samting? Lukim risen na yumi tok olsem em i gat nem tru bilong em.

“God i Gat Hamas Nem?” (Atikol long websait)