Jesus’ triumphal ride into Jerusalem on a donkey

Yu Ting Ol Tok Profet Bilong Mesaia i Soim Olsem Jisas Em i Mesaia?

Bekim bilong Baibel

Yes. Taim Jisas i stap long graun, em i truim planti tok profet bilong “Mesaia em dispela Lida,” na man husat bai stap “seivia bilong ol manmeri.” (Daniel 9:25; 1 Jon 4:14) Na bihain long indai bilong em tu, Jisas i wok yet long truim ol tok profet bilong Mesaia.—Buk Song 110:1; Aposel 2:34-36.

Wanem mining bilong dispela tok “Mesaia”?

Tok Hibru Ma·shiʹach (Mesaia) na tok Grik Khri·stos (Krais), mining bilong dispela tupela tok wantaim em, “Man God i Anointim.” Olsem na mining bilong dispela nem, “Jisas Krais” i makim “Jisas Man God i Anointim” o “Jisas em dispela Mesaia.”

Long taim bilong ol man bilong raitim Baibel, ol i save kapsaitim oil long het bilong man bilong makim em long mekim wanpela wok i gat bikpela wok i gat bikpela namba. (Wok Pris 8:12; 1 Samuel 16:13) God i makim Jisas long kamap Mesaia, em wok i gat bikpela namba. (Aposel 2:36) Tasol God i no kapsaitim oil long Jisas bilong anointim em, nogat. Em i anointim em long holi spirit.—Matyu 3:16.

Yu ting i mas i gat planti man bilong truim ol tok profet bilong Mesaia?

Nogat. Ol pinga prin bilong wanpela man i bilong dispela man tasol, olsem tasol truim bilong ol tok bilong Baibel i makim wanpela Mesaia tasol, o Krais. Tasol Baibel i givim tok lukaut olsem “ol giaman Krais na ol giaman profet bai kamap na ol bai wokim ol bikpela mirakel na ol narakain narakain samting bilong giamanim ol manmeri, na sapos ol inap, ol bai giamanim tu ol manmeri God i bin makim.”—Matyu 24:24.

Yu ting Mesaia bai kamap long bihain?

Nogat. Baibel i tok profet olsem Mesaia bai kamap long lain tumbuna pikinini bilong King Devit bilong Israel. (Buk Song 89:3, 4) Tasol lista i gat nem bilong ol lain tumbuna bilong ol Juda i go bek inap long Devit i lus, ating dispela lista i lus long taim ol Rom i kam bagarapim Jerusalem long 70 C.E.a Kirap long dispela taim na i kam, i no gat wanpela inap pruvim olsem em i bilong famili bilong king Devit. Tasol ol dispela lista i bin stap long taim bilong Jisas, na ol birua bilong em tu ol i save olsem em i bilong lain tumbuna bilong Devit.—Matyu 22:41-46.

Hamas tok profet bilong Mesaia i stap long Baibel?

I hatwok long kolim hamas namba stret bilong ol tok profet i stori long Mesaia. Olsem, pasin bilong kaunim namba bilong ol tok profet i stori long Mesaia i no wankain. Tok bilong Aisaia 53:2-7 i kolim sampela hap bilong ol tok profet bilong Mesaia. Sampela bai kolim ol tok profet i stap long ol dispela ves olsem wanpela tok profet tasol, na ol narapela bai kaunim olsem narapela narapela tok profet.

Sampela tok profet bilong Mesaia em Jisas i truim

Tok profet	I stap long	Truim
Tumbuna pikinini bilong Abraham	Stat 22:17, 18	Matyu 1:1
Lain tumbuna pikinini bilong Aisak, em pikinini bilong Abraham	Stat 17:19	Matyu 1:2
Bon long traib bilong Juda bilong Israel	Stat 49:10	Matyu 1:1, 3
Em bilong lain bilong King Devit	Aisaia 9:7	Matyu 1:1
Wanpela yangpela meri i no bin slip wantaim man i karim em	Aisaia 7:14	Matyu 1:18, 22, 23
Bon long Betlehem	Maika 5:2	Matyu 2:1, 5, 6
Mama i kolim nem bilong em Emanuelb	Aisaia 7:14	Matyu 1:21-23
Em i kamap insait long famili i no gat nem	Aisaia 53:2	Luk 2:7
Bihain long em i bon, ol i kilim i dai ol liklik pikinini	Jeremaia 31:15	Matyu 2:16-18
Singautim em long lusim Isip na kam	Hosea 11:1	Matyu 2:13-15
Ol i kolim em man Nasarinc	Aisaia 11:1	Matyu 2:23
Wanpela man bilong bringim tok i go pas long em	Malakai 3:1	Matyu 11:7-10
God i makim em olsem Mesaia long 29 C.E.d	Daniel 9:25	Matyu 3:13-17
God i tokaut olsem Jisas em i pikinini Man bilong Em	Buk Song 2:7	Aposel 13:33, 34
Laikim tumas haus bilong God	Buk Song 69:9	Jon 2:13-17
Man bilong autim gutnius	Aisaia 61:1	Luk 4:16-21
Wok autim tok long Galili i olsem bikpela lait	Aisaia 9:1, 2	Matyu 4:13-16
Man bilong wokim ol mirakel olsem Moses	Lo 18:15	Aposel 2:22
Olsem Moses, em i kamapim tingting bilong God	Lo 18:18, 19	Jon 12:49
Oraitim sik bilong planti man	Aisaia 53:4	Matyu 8:16, 17
Em i no litimapim nem bilong em yet	Aisaia 42:2	Matyu 12:17, 19
Mekim pasin sori long ol man i karim hevi	Aisaia 42:3	Matyu 12:9-20; Mak 6:34
Kamapim klia stretpela pasin bilong God	Aisaia 42:1, 4	Matyu 12:17-20
Man Bilong Givim Gutpela Tingting Tru	Aisaia 9:6, 7	Jon 6:68
Tokaut long nem bilong Jehova	Buk Song 22:22	Jon 17:6
Mekim ol tok piksa	Buk Song 78:2	Matyu 13:34, 35
Wanpela Lida	Daniel 9:25	Matyu 23:10
Planti man i no bilip long em	Aisaia 53:1	Jon 12:37, 38
Ston bilong mekim man i pundaun	Aisaia 8:14, 15	Matyu 21:42-44
Ol man i no laikim em	Buk Song 118:22, 23	Aposel 4:10, 11
Ol man i heitim em nating	Buk Song 69:4	Jon 15:24, 25
Sindaun long donki na i go insait long Jerusalem olsem wanpela king	Sekaraia 9:9	Matyu 21:4-9
Ol pikinini bai litimapim nem bilong em	Buk Song 8:2	Matyu 21:15, 16
Em i kam long nem bilong Jehova	Buk Song 118:26	Jon 12:12, 13
Wanpela gutpela pren i putim em long han bilong ol birua	Buk Song 41:9	Jon 13:18
Wanpela pren i kisim 30 silva koin na putim em long han bilong ol biruae	Sekaraia 11:12, 13	Matyu 26:14-16; 27:3-10
Ol pren i lusim em	Sekaraia 13:7	Matyu 26:31, 56
Ol witnes giaman i sutim tok long em	Buk Song 35:11	Matyu 26:59-61
Em i pasim maus taim ol birua i sutim tok long em	Aisaia 53:7	Matyu 27:12-14
Ol i spet long em	Aisaia 50:6	Matyu 26:67; 27:27, 30
Ol i paitim het bilong em	Maika 5:1	Mak 15:19
Ol i wipim em	Aisaia 50:6	Jon 19:1
Em i no sakim ol man i paitim em	Aisaia 50:6	Jon 18:22, 23
Ol lida bilong gavman i pasim tok long kilim em	Buk Song 2:2	Luk 23:10-12
Ol i nilim em long tupela han na tupela lek bilong em long diwai	Buk Song 22:16	Matyu 27:35; Jon 20:25
Ol man i pilai satu bilong kisim klos bilong em	Buk Song 22:18	Jon 19:23, 24
Ol man i tingim em olsem wanpela man bilong mekim sin	Aisaia 53:12	Matyu 27:38
Ol i tok bilas long em	Buk Song 22:7, 8	Matyu 27:39-43
Em i karim pen na hevi bilong ol sinman	Aisaia 53:5, 6	1 Pita 2:23-25
I luk olsem God i lusim em	Buk Song 22:1	Mak 15:34
Ol i givim wain i pait na wain ol i miksim wantaim marasin i gat pait long em i dring	Buk Song 69:21	Matyu 27:34
Nek bilong em i drai paslain long em i dai	Buk Song 22:15	Jon 19:28, 29
Em i putim strong bilong laip bilong em long han bilong God	Buk Song 31:5	Luk 23:46
Em i givim laip bilong em na dai	Aisaia 53:12	Mak 15:37
Em i givim laip bilong em olsem ofa bilong rausim sin	Aisaia 53:12	Matyu 20:28
Ol bun bilong em i no bruk	Buk Song 34:20	Jon 19:31-33, 36
Ol i sutim em	Sekaraia 12:10	Jon 19:33-35, 37
Ol i planim em wantaim ol maniman	Aisaia 53:9	Matyu 27:57-60
Em i kirap bek	Buk Song 16:10	Aposel 2:29-31
Narapela man i kisim ples bilong man i putim em long han bilong ol birua	Buk Song 109:8	Aposel 1:15-20
Em i sindaun long rait han bilong God	Buk Song 110:1	Aposel 2:34-36

a Dispela nem Hibru Emanuel, mining bilong en em, “God i Stap Wantaim Mipela,” dispela i makim wok Jisas bai mekim olsem Mesaia. I stap bilong em long graun na ol wok em i mekim i kamapim klia olsem God i stap wantaim ol manmeri i lotuim em.—Luk 2:27-32; 7:12-16.

b McClintock na Strong’s Cyclopedia i tok: “Yumi ken save tru olsem ol buk i gat nem bilong ol lain Juda wantaim famili bilong ol i bin bagarap wantaim Jerusalem na i no paslain long dispela.”

c Dispela tok “Nasarin” i kam long wanpela tok Hibru neʹtser, mining bilong en “nupela kru.”

d Bilong kisim sampela save moa long ol yia em Baibel i stori long en long ol samting i kamap we i makim 29 C.E. olsem yia em Mesaia i kam, lukim apendiks “Tok Profet Bilong Daniel i Makim Taim Mesaia i Kam.”

e Dispela tok profet i stap long Buk Sekaraia, tasol Matyu em man bilong raitim Baibel, em i tok olsem dispela tok em i “tok bilong profet Jeremaia.” (Matyu 27:9) I luk olsem sampela taim ol i putim Buk Jeremaia i stap namba 1 buk bilong ol buk ol i kolim “ol Profet.” (Luk 24:44) Taim Matyu i kolim “Jeremaia,” em i tok long wanpela hap olgeta bilong ol dispela buk we Buk Sekaraia tu i insait long en.