Jehova, Yumi ‘Ran i Go Long Em Long Taim Hevi i Kamap’
“Bikpela yet i save kisim bek ol stretpela man. Long taim hevi i kamap long ol, ol i save ran i go long em na em i lukautim ol.”—SONG 37:39.
1, 2. (a) Jisas i tingim ol disaipel bilong em na beten askim God long wanem samting? (b) God i laik bai ol manmeri bilong em i mekim wanem?
JEHOVA i gat olgeta strong. Em i gat strong long mekim olgeta samting em i laikim bilong lukautim ol manmeri i lotu long em na stap gut long em. Em inap tekewe lain bilong em i stap namel long ol manmeri bilong graun na putim ol long wanpela ples we i seif na ol i stap bel isi. Tasol Jisas i beten long Papa bilong em long heven na askim Papa long ol disaipel bilong em olsem: “Mi no askim yu long kisim ol i go aut long dispela graun. Nogat. Mi beten long yu long yu ken lukautim ol, na man nogut i no ken bagarapim ol.”—Jon 17:15.
2 Jehova i no laik kisim yumi “i go aut long dispela graun.” Em i laik bai yumi stap namel long ol lain manmeri bilong graun na bai yumi inap autim tok bilong em i mekim gut bel na helpim ol long bilip na wetim gutpela samting bilong bihain. (Rom 10:13-15) Tasol olsem beten bilong Jisas i kamapim, yumi stap long dispela graun, olsem na yu stap long hap bilong “man nogut.” Ol man bilong sakim tok na ol spirit nogut i as bilong planti pen na hevi, na ol Kristen tu i save pilim.—1 Pita 5:9.
3. Wanem samting i save painim ol wokboi bilong Jehova? Tok Bilong God i mekim gut bel bilong yumi olsem wanem?
3 Ol kain hevi olsem i mekim na sampela taim man i pilim olsem bun bilong em i slek. (Sindaun 24:10) Baibel i gat planti stori long ol gutpela bilipman i bin karim hevi. Man bilong raitim song i tok: “Planti hevi i save kamap long stretpela man, tasol Bikpela i save helpim em na ol dispela hevi i no daunim em.” (Song 34:19) Yes, ol samting nogut i save painim ol “stretpela man” tu. Sampela taim ating yumi inap pilim wankain olsem man bilong raitim song, Devit, em i tok: “Mi bagarap tru na mi stap nogut, olsem wanpela samting i krungutim mi strong.” (Song 38:8) Tasol yumi amamas long save olsem “God i save stap klostu long ol manmeri i gat hevi. Na em i save helpim ol manmeri bilip [“bel,” NW ] bilong ol i bagarap.”—Song 34:18; 94:19.
4, 5. (a) Olsem Sindaun 18:10 i kamapim, yumi mas mekim wanem na bai God i ken lukautim yumi? (b) Wanem 3-pela samting yumi inap mekim na bai yumi inap kisim helpim long God?
4 Olsem beten bilong Jisas i kamapim, Jehova i save was long yumi. Yumi ‘save ran i go long em long taim hevi i kamap.’ (Song 37:39) Buk Sindaun i kamapim tok i wankain liklik, em i tok: “Bikpela i olsem wanpela strongpela haus. Ol stretpela man i ken ran i go long en na i stap gut.” (Sindaun 18:10) Dispela skripsa i soim klia wanpela bikpela tok tru olsem Jehova i save tingim tru ol man em i bin wokim. God i laik tru long lukautim ol stretpela man husat i wok strong long painim em, kain olsem yumi ran i go long strongpela haus bilong hait long en.
5 Taim ol hevi i bungim yumi, olsem wanem yumi inap ran i go long Jehova na bai em i ken lukautim yumi? Yumi laik skelim 3-pela samting yumi mas mekim bilong kisim helpim long Jehova. Namba wan, yumi mas beten long Papa bilong yumi long heven. Namba tu, yumi mas mekim ol wok i stret wantaim holi spirit bilong em. Na namba tri, yumi mas mekim olsem Jehova i tok na poroman wantaim ol wanbilip Kristen, em ol inap daunim pasin bilong yumi long wari tumas.
Pawa Bilong Beten
6. Ol Kristen tru i gat wanem tingting long beten?
6 Sampela helt lain i tok beten i gutpela samting bilong daunim bel hevi na helpim man i stap bel isi. I tru pasin bilong tingim gut ol samting na beten inap helpim man long kisim bel isi, kain olsem pasin bilong harim krai bilong pisin samting long bikbus o pasin bilong bengim skin, olsem masas inap mekim long yu. Ol Kristen tru i no mekim olsem beten em i samting nating, olsem samting bilong mekim man i pilim gutpela tasol. Nogat. Yumi tingim beten olsem rot bilong daunim yumi yet na toktok wantaim Man Bilong Wokim olgeta samting. Beten i bikpela samting long pasin bilong yumi long givim bel na bilip long God. Yes, beten em i hap lotu bilong yumi.
7. Beten wantaim pasin bilong trastim Jehova i makim wanem samting? Olsem wanem kain beten olsem i helpim yumi long stap bel isi?
7 Yumi mas beten long pasin i kamapim olsem yumi trastim Jehova. Aposel Jon i tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi. Olsem na yumi no save pret long God. Nogat. Yumi save go klostu long em.” (1 Jon 5:14) Jehova em i Nambawan Bikpela, em wanpela tasol i God tru na God i Gat Olgeta Strong, na em i save amamas long putim yau long beten bilong ol lain bilong em. Taim yumi save olsem God bilong pasin laikim i putim yau long yumi long taim yumi kamapim ol wari na hevi bilong yumi, dispela i mekim gut bel bilong yumi.—Filipai 4:6.
8. Bilong wanem ol Kristen i stap gut long God i no ken sem o pilim olsem ol i no gutpela long taim ol i laik beten long Jehova?
8 Ol Kristen i stap gut long God i no ken sem, o pilim olsem ol i no gutpela, o pilim pret long taim ol i laik beten long Jehova. Tru, taim yumi no amamas long yumi yet o pilim olsem ol hevi i daunim yumi tru, ating yumi no pilim gutpela long go long Jehova long rot bilong beten. Long kain taim olsem i gutpela long tingim pasin bilong Jehova long ‘marimari long ol manmeri bilong em i karim planti hevi’ na “mekim isi bel bilong ol manmeri i stap bel hevi.” (Aisaia 49:13; 2 Korin 7:6) Moa yet long taim yumi karim pen na hevi yumi mas trastim Papa bilong yumi long heven na go long em olsem yumi bai ran i go long wanpela strongpela haus.
9. Olsem wanem bilip em i bikpela samting long pasin bilong yumi long beten long God?
9 Long beten i ken helpim gut yumi, yumi mas bilip tru long God. Baibel i tok “man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Bilip i no makim olsem man i bilip tasol olsem “God i stap.” Pasin bilong bilip tru long God i makim olsem yumi bilip strong olsem God inap na em i gat laik long praisim pasin bilong yumi long bihainim tok bilong em. “Bikpela i save lukautim ol stretpela manmeri, na em i save putim yau long ol beten bilong ol.” (1 Pita 3:12) Sapos oltaim yumi pilim pasin bilong Jehova long tingim tru yumi, yumi bai tingim beten olsem samting i dia tumas.
10. Ol beten bilong yumi i mas wanem kain sapos yumi laik bai Jehova i strongim yumi long samting bilong spirit?
10 Jehova i save harim beten bilong yumi taim yumi givim bel olgeta long mekim. Man bilong raitim song i tok: “Bikpela, mi prea strong tru long yu. Harim beten bilong mi.” (Song 119:145) Long planti lotu ol man i save kolim ol wankain tok taim ol i beten, tasol ol beten bilong yumi i no olsem samting yumi mekim nating o givim hap bel tasol long mekim. Taim yumi “prea strong” long Jehova, ol tok yumi mekim i gat as tru bilong en. Bihain long yumi beten olsem, yumi save pilim bel isi man i kisim taim em i ‘putim olgeta hevi long han bilong Bikpela.’ Na olsem Baibel i tok promis, ‘bai em i karim na strongim’ yumi.—Song 55:22; 1 Pita 5:6, 7.
Spirit Bilong God i Helpim Bilong Yumi
11. Wanem wanpela samting Jehova i save mekim taim yumi wok long “prea na askim” em long helpim yumi?
11 Jehova em i Man bilong harim beten bilong yumi. (Song 65:2) Devit i tok: “Yu save helpim mi long taim mi singaut long yu. Olsem na olgeta taim mi karim hevi mi save beten long yu.” (Song 86:7) Em long dispela as na Jisas i bin kirapim ol disaipel bilong em long wok long “prea na askim” Jehova long helpim ol, long wanem, ‘Papa i stap long heven’ em bai “givim Holi Spirit long ol man i askim em.” (Luk 11:9-13) Yes, holi spirit bilong God i stap olsem helpim bilong lain bilong em, na i save mekim gut bel bilong ol.—Jon 14:16.
12. Olsem wanem spirit bilong God inap helpim yumi long taim i luk olsem ol hevi i bikpela tumas long karim?
12 Taim yumi gat ol bikpela traim, spirit bilong God inap givim “bikpela strong” long yumi. (2 Korin 4:7) Aposel Pol i bin bungim planti hevi, em i tok: “Em i givim pawa long mi, na long dispela as mi gat strong long mekim olgeta samting.” (Filipai 4:13, NW ) Planti Kristen long nau tu i bin kisim bek strong long samting bilong spirit na long bel taim God i harim beten bilong ol. Planti taim ol hevi i no bikpela tumas long karim taim spirit bilong God i helpim yumi. Strong God i givim i as na yumi ken mekim wankain tok olsem Pol: “Ol kain kain hevi i save kamap long mipela, tasol ol i no pinisim tru strong bilong mipela. Planti samting i save paulim tingting bilong mipela, tasol tingting bilong mipela i no bagarap olgeta. Ol man i save mekim nogut long mipela, tasol God i no save lusim mipela. Ol i save paitim mipela na mekim mipela i pundaun, tasol ol i no bagarapim [mipela].”—2 Korin 4:8, 9.
13, 14. (a) Olsem wanem Baibel em i wanpela rot bilong Jehova long lukautim yumi? (b) Olsem wanem ol stiatok bilong Baibel i bin helpim yu yet?
13 Na tu, holi spirit i bin stiaim ol man long raitim Baibel na em i bin lukautim na bai yumi inap kisim helpim long en. Olsem wanem Baibel em i rot bilong Jehova long lukautim yumi long taim bilong hevi? Wanpela samting em Baibel i givim savetingting long yumi na i helpim yumi long yusim gut tingting. (Sindaun 3:21-24) Baibel i save skulim tingting na i helpim yumi long skelim gut ol samting. Taim yumi ritim na stadi oltaim long Tok Bilong God na bihainim, dispela inap lainim yumi long “skelim wanem ol pasin i gutpela na wanem ol pasin i nogut.” (Hibru 5:14) Ating yu luksave pinis long olsem wanem ol stiatok bilong Baibel i bin helpim yu long bihainim savetingting taim yu gat sampela hevi. Baibel i givim gutpela tingting long yumi na yumi inap save long ol gutpela rot bilong stretim ol hevi.—Sindaun 1:4.
14 Tok Bilong God i kamapim narapela samting i save strongim yumi—pasin bilong bilip na wetim God i kisim bek yumi. (Rom 15:4) Baibel i tokim yumi olsem ol samting nogut bai i no inap stap oltaim oltaim. Ol pen na hevi yumi karim em bilong sotpela taim. (2 Korin 4:16-18) Yumi “wetim God i givim laip bilong i stap oltaim long [yumi]. Bipo tru, taim God i no mekim wanpela samting i kamap yet, em i tok pinis long em bai i givim dispela laip long yumi. Na em i no save giaman.” (Taitus 1:2) Sapos yumi amamas long dispela samting, na oltaim tingim ol gutpela samting Jehova i tok promis long kamapim long bihain, yumi inap sanap strong na karim ol hevi.—Rom 12:12; 1 Tesalonaika 1:3.
Kongrigesen —Soim Olsem God i Laikim Yumi
15. Olsem wanem ol Kristen inap helpim ol arapela Kristen?
15 Narapela samting Jehova i givim bilong helpim yumi long taim bilong hevi em ol gutpela poroman bilong yumi long kongrigesen Kristen. Baibel i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.” (Sindaun 17:17) Tok Bilong God i save kirapim olgeta long kongrigesen long soim ona na laikim tru ol arapela. (Rom 12:10) Aposel Pol i tok: “Yumi no ken ting long helpim yumi yet. Nogat. Yumi mas ting long helpim ol arapela.” (1 Korin 10:24) Kain tingting olsem inap helpim yumi long tingim hevi bilong ol arapela na no ken tingim tumas ol hevi bilong yumi yet. Taim yumi givim yumi yet long helpim ol arapela, ol i kisim helpim na yumi tu i kisim amamas na stap belgut, dispela i mekim ol hevi bilong yumi i isi moa long karim.—Aposel 20:35.
16. Olsem wanem ol wan wan Kristen i ken strongim bel bilong ol arapela?
16 Ol man na meri i strong long ol samting bilong spirit ol inap mekim bikpela wok long strongim ol arapela. Bilong ol inap mekim olsem, ol i redi long helpim man na ol i kamapim pasin we ol man i no pret long toktok wantaim ol. (2 Korin 6:11-13) Kongrigesen i kisim gutpela helpim taim olgeta i tok amamas long ol yangpela, helpim ol nupela i kamap strong, na strongim ol man i bel hevi. (Rom 15:7) Pasin laikim namel long ol brata bai helpim yumi long sakim pasin bilong tingting nogut long ol arapela. Yumi no ken hariap na ting sampela hevi bilong brata o sista i makim olsem ol i no strong long samting bilong spirit. Pol i kirapim ol Kristen long “strongim bel bilong ol man i save pret [“bel hevi,” NW ].” (1 Tesalonaika 5:14) Baibel i soim olsem ol Kristen i stap gut long God, ol tu i save kisim pen na hevi.—Aposel 14:15.
17. I gat wanem ol rot bilong strongim pasin pren namel long ol brata Kristen?
17 Ol miting Kristen i opim rot long yumi long mekim gut bel na strongim ol arapela. (Hibru 10:24, 25) Pasin laikim i kamap namel long ol i no long taim bilong ol miting tasol. Ol lain bilong God i save painim rot long poroman wantaim long taim nating tu. Taim ol hevi i kamap yumi redi long helpim ol arapela, long wanem, yumi bin strongim pinis pasin pren i stap namel long yumi. Aposel Pol i tok: “Bodi i no ken bruk hap hap. Nogat. Olgeta hap wan wan ol i ken lukautim ol arapela hap long wankain pasin. Olsem na sapos wanpela hap bodi i pilim pen, olgeta hap i save pilim pen wantaim. Na sapos wanpela hap i kisim biknem, olgeta hap i save amamas wantaim em.”—1 Korin 12:25, 26.
18. Yumi mas sakim wanem tingting taim bel hevi i daunim yumi?
18 Sampela taim bel hevi i daunim yumi na yumi no pilim amamas long bung wantaim ol wanbilip Kristen. Yumi mas sakim kain tingting olsem na bai yumi no lus long gutpela helpim ol wanbilip inap givim long yumi. Baibel i givim tok lukaut olsem: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.” (Sindaun 18:1) God i tingim yumi, olsem na em i givim yumi ol brata na sista. Sapos yumi luksave long dispela gutpela samting God i givim, orait yumi bai kisim helpim long taim bilong hevi.
Holimpas Gutpela Tingting
19, 20. Baibel i helpim yumi olsem wanem long sakim ol tingting bilong daunim yumi?
19 Taim yumi bel hevi i stap, em isi long tingting tasol long ol samting bilong daunim yumi. Olsem: Long taim i gat hevi, ating sampela i kisim tupela tingting long ol i stap olsem wanem long sait bilong spirit, ol i ting hevi bilong ol i makim olsem God i no amamas long ol. Tasol tingim, Jehova i no save givim traim long man na bai em i “mekim sin.” (Jems 1:13) Baibel i tok: “[God] i no amamas long givim hevi na pen long ol.” (Krai 3:33) Jehova i bel sori tru long taim ol wokboi bilong em i karim pen na hevi.—Aisaia 63:8, 9; Sekaraia 2:8.
20 Jehova em i “Papa bilong yumi, na em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi.” (2 Korin 1:3) Em i tingim yumi na long taim em yet i makim em bai litimapim yumi. (1 Pita 5:6, 7) Sapos oltaim yumi tingim olsem God i laikim yumi, dispela bai helpim yumi long holimpas gutpela tingting na long amamas. Jems i tok: “Ol brata bilong mi, sapos ol kain kain traim i kamap long yupela, orait yupela i ken ting olsem, em i samting bilong amamas tasol.” (Jems 1:2) Bilong wanem i olsem? Jems i tok moa: “Sapos em i winim pinis olgeta traim, orait God bai i givim em laip bilong i stap gut oltaim, olsem prais bilong en. God i tok pinis long givim dispela prais long olgeta man i save laikim em tru.”—Jems 1:12.
21. Maski yumi karim wanem wanem hevi, God i givim wanem tok promis long ol man husat i stap gut long em?
21 Jisas i tokaut pinis olsem long graun ol hevi bai kamap long yumi. (Jon 16:33) Tasol Baibel i tok promis olsem “sapos hevi i kamap long yumi, o sapos yumi karim pen, o sapos ol man i mekim nogut long yumi, o sapos yumi hangre, o sot long klos, o sapos samting nogut i laik bagarapim yumi,” ol dispela samting i no inap pasim rot bilong pasin laikim bilong Jehova na Pikinini bilong em. (Rom 8:35, 39) Olgeta hevi yumi karim em bilong sotpela taim, dispela save i mekim gut bel bilong yumi. Tasol insait long dispela haptaim we yumi wetim ol pen na hevi long pinis, gutpela Papa bilong yumi, Jehova, em i save was long yumi. Sapos yumi ran i go long em long lukautim yumi, em bai “i stap olsem wanpela strongpela haus. Ol man i kisim hevi long ol birua, ol i ken i go i stap long en. Long taim bilong hevi ol i ken i go long em na hait.”—Song 9:9.
Yumi Lainim Wanem Samting?
• Wanem ol samting bai painim ol Kristen long taim ol i stap long dispela graun em pasin nogut i pulap long en?
• Olsem wanem ol beten bilong yumi i ken strongim yumi long taim bilong hevi?
• Olsem wanem spirit bilong God i save helpim yumi?
• Yumi ken mekim wanem bilong helpim ol arapela?
[Piksa long pes 18]
Yumi mas go long Jehova olsem yumi save ran i go hait long strongpela haus
[Ol Piksa long pes 20]
Ol lain i strong long samting bilong spirit i save painim rot bilong tok amamas na strongim bel bilong ol arapela long olgeta taim rot i op