Yumi Mas Daun na Pret Long Jehova
“Yu mas aninit long Bikpela na givim baksait long pasin nogut.”—SINDAUN 3:7.
LONG Baibel long hap bilong Sindaun i gat planti gutpela tok bilong strongim yumi long ol samting bilong spirit. Bipo Jehova i bin givim dispela tok long lain bilong em, em ol Israel, na nau ol gutpela tok bilong en i bilong strongim lain Kristen, “bilong givim tingting long yumi ol man i stap long dispela taim nau, em taim dispela graun klostu i laik pinis.”—1 Korin 10:11; Sindaun 1:1-5; 1 Pita 2:9.
2 Sindaun 3:7 i tok: “Nogut yu ting, save bilong yu yet em i samting tru. Nogat. Yu mas aninit long Bikpela na givim baksait long pasin nogut.” Snek i bin giamanim Iv long “kisim save long wanem samting i gutpela, na wanem samting i nogut,” na long dispela taim na i kam inap long nau save bilong ol man i no bin helpim ol long painim gutpela sindaun. (Stat 3:4, 5; 1 Korin 3:19, 20) Nau em “taim bilong las de,” na ol man i sot tru long gutpela save. Ol i bin bilip long ol samting i giaman na ol i bihainim tingting bilong ol man i tok i no gat God, na nau ol i kisim nogut long dispela, olsem narapela lain i birua long narapela lain, na i gat planti pait na kain kain pasin nogut i gat sem. (2 Timoti 3:1-5, 13; 2 Pita 3:3, 4) Em samting ol yet i bin kamapim, na Yunaitet Nesen o ol lotu bilong dispela graun i no inap stretim.
3 Baibel i tok profet olsem: “Ol spirit nogut i bringim ol king i kam bung long dispela hap, long tok Hibru ol i kolim Armagedon.” (KTH 16:14, 16) Liklik taim Jehova bai givim bikpela hevi long ol dispela “king” o bikman, na ol bai pret nogut tru olsem ol Kenan i bin mekim long taim Josua na ol Israel i kam bilong givim strafe long ol. (Josua 2:9-11) Josua i makim Krais Jisas, em “King bilong olgeta king, na Bikpela bilong olgeta bikman.” Em yet bai “daunim ol manmeri bilong olgeta lain,” na “holim stik ain na bosim strong” ol dispela lain, na “bikpela belhat bilong God” bai painim ol.—KTH 19:15, 16.
4 Husat bai abrusim bagarap long dispela taim? Em ol man i no pret long ol samting i kamap; ol i aninit long Jehova na pret long em tasol. Ol i no ting, save bilong ol yet i samting tru, nogat. Ol i “givim baksait long pasin nogut,” na long pasin daun ol i lain long ol gutpela pasin, na dispela gutpela tingting i rausim ol tingting nogut i stap long bel bilong ol. Ol i daun long Bikpela King Jehova, em “Jas bilong olgeta graun.” Em bai bagarapim ol man nogut olsem em i bin mekim long ol man nogut bilong Sodom. (Stat 18:25) Tasol long lain bilong Jehova, “pasin bilong aninit long Bikpela i olsem wara bilong givim laip. Dispela pasin em inap long helpim man long abrusim ol samting i laik bagarapim em.”—Sindaun 14:27.
5 Nau em taim bilong God i givim strafe long ol man nogut, tasol ol man i givim bel long Jehova na daun long em, na ol i pret long mekim ol samting em i no laikim, gutpela samting bai painim ol, olsem Sindaun 3:8 i tok: “Sapos yu mekim olsem, dispela pasin bai i helpim yu tru, olsem marasin i save helpim bodi bilong yu, na mekim yu i stap gut.”
Givim Biknem Long Jehova
6 Sapos yumi daun long Jehova na pret long em, na yumi laikim em tru, dispela bai kirapim yumi long givim ol gutpela samting bilong yumi long em “olsem ofa, na dispela bai i givim biknem long em.” (Sindaun 3:9) Jehova i no subim yumi long mekim, nogat. Yumi mas laik long givim samting long em olsem ofa, olsem yumi lukim 12-pela taim samting long Kisim Bek 35:29 i go inap Lo 23:23, i toktok long pasin bilong ol Israel long givim ofa. Yumi mas ofaim ol gutpela samting tasol long Jehova, bilong tok tenkyu long em i bin mekim gut long yumi. (Song 23:6) Dispela i mas kirapim yumi na bai yumi strong long tingim Kingdom na stretpela pasin bilong Jehova i “namba wan samting.” (Matyu 6:33) Sapos yumi givim gutpela ofa long Jehova, wanem gutpela samting bai kamap long en? “Sapos yu mekim olsem, orait Bikpela bai i mekim gaden bilong yu i karim planti kaikai moa. Na bai yu inap pulapim tru haus kaikai bilong yu, na bai tang wain bilong yu i pulap tru na hap wain i kapsait.”—Sindaun 3:10.
7 Jehova i save mekim gut long yumi long ol samting bilong spirit, em namba wan rot bilong em long mekim gut long yumi. (Malakai 3:10) Olsem na yumi mas ofaim samting bilong spirit long em olsem namba wan gutpela samting bilong yumi, olsem taim na strong bilong yumi bilong mekim wok bilong em. Dispela bai strongim yumi olsem “kaikai,” olsem Jisas i tok. (Jon 4:34) Bai yumi gat planti samting bilong spirit, na gutpela amamas, olsem “wain.” Na taim yumi beten askim Jehova long kaikai inap long nau, yumi ken putim kontribusen bilong helpim wok bilong autim tok bilong Kingdom. (Matyu 6:11) Olgeta samting bilong yumi em Jehova yet i bin givim long yumi. Em bai givim yet long yumi sapos yumi mekim wok long en bilong litimapim nem bilong em.—Sindaun 11:4; 1 Korin 4:7.
Tok Bilong Stretim Yumi
8 Sindaun 3:11, 12 i stori long ol famili i aninit long Jehova, olsem papa i save givim gutpela tok long pikinini bilong em na ol i pas gut wantaim na i stap amamas, olsem Jehova i save mekim long ol pikinini bilong em hia long graun. “Pikinini, sapos Bikpela i mekim wanpela samting long yu bilong stretim yu, yu no ken kros na bel nogut. Long wanem, Bikpela i save stretim ol man em i laikim tumas, olsem ol papa i save stretim ol pikinini ol i laikim tumas.” Ol man bilong graun i no laik bai sampela i stretim ol, tasol lain bilong Jehova i mas amamas long dispela. Pol i kolim dispela tok bilong Sindaun, olsem: “Pikinini bilong mi, sapos Bikpela i mekim wanpela samting long yu bilong stretim yu, yu no ken ting dispela em i samting nating, na tu, yu no ken bel hevi tumas. Long wanem, Bikpela i save stretim ol man em i laikim tumas. . . . Taim em i stretim yumi pinis, yumi bai kisim gutpela pasin tru. Yumi bai mekim ol stretpela pasin, na bel bilong yumi bai i stap isi.”—Hibru 12:5, 6, 11.
9 Ol tok bilong stretim yumi em i bilong skulim yumi, maski yumi kisim long papamama, o long kongrigesen, o long Baibel long taim yumi stadi. Em bai helpim yumi long abrusim dai na bai yumi ken i stap laip, olsem Sindaun 4:1, 13 i tok: “Yupela i mas harim gut tok bilong mi, papa bilong yupela, na bai yupela i kisim gutpela tingting. . . . Oltaim yu mas holimpas dispela gutpela tok bilong mi. Em i olsem as bilong laip bilong yu.”
Nambawan Amamas
10 Nau Sindaun i kolim ol gutpela gutpela tok “i swit long yau bilong ol man”! (Saveman 12:10) Ol dispela tok God i bin kirapim Solomon long raitim, ol i stori long amamas tru. Yumi mas putim ol dispela tok i go daun long bel bilong yumi. Solomon i tok:
11 “Man i kisim gutpela tingting na save, em i ken amamas tru, long wanem, gutpela na stretpela tingting i winim tru silva na gol na . . . olgeta arapela samting yu laikim tumas. Gutpela tingting bai i helpim yu na yu inap i stap longpela taim long graun. Na em bai i givim biknem na planti samting long yu. Gutpela tingting bai i mekim yu belgut oltaim na mekim sindaun bilong yu i kamap gutpela. Gutpela tingting i olsem diwai bilong givim laip. Olsem na ol man i holimpas . . . ol i gat laip i gutpela tru na ol i amamas.”—Sindaun 3:13-18.
12 Dispela tok “gutpela tingting” i stap 46 taim long hap bilong Sindaun. “Sapos yu laik kisim gutpela tingting, orait pastaim yu mas aninit long Bikpela.” Yumi ken kisim dispela gutpela tingting long Baibel, na i ken helpim yumi long abrusim ol samting bilong Satan em inap pundaunim yumi. (Sindaun 9:10) Na narapela tok, “gutpela save,” em i kamap 19 taim long hap bilong Sindaun, na i kain olsem gutpela tingting, na em tu i helpim yumi long abrusim ol trik na pasin hait bilong Satan, em bikpela birua bilong yumi. Em i gat save long mekim ol dispela pasin, long wanem, em i bin mekim inap planti tausen yia pinis. Tasol God i givim gutpela save na tingting long yumi na bai yumi ken skelim samting i stret o nogat, na nau yumi ken bihainim pasin i stret. Jehova i lainim yumi olsem long rot bilong Baibel.—Sindaun 2:10-13; Efesus 6:11.
13 Ol wok bilong mani i go nogut, na klostu nau truim bilong Esekiel 7:19 bai kamap: “Ol bai i tromoi ol gol na silva bilong ol long ol rot olsem pipia, long wanem, gol na silva i no inap helpim ol long taim Bikpela i belhat long ol.” Bikpela mani i no inap helpim yumi olsem gutpela tingting. King Solomon i tok: “Gutpela tingting i olsem mani, na i save helpim yumi long taim nogut. Tasol gutpela tingting na save i winim mani, na i helpim yumi moa yet.” (Saveman 7:12) Ol man i bihainim pasin bilong Jehova ol i stap amamas na ol i laik “i stap longpela taim long graun,” em presen God i givim long ol man i bilip long ofa em Jisas i bin mekim.—Sindaun 3:16; Jon 3:16; 17:3.
Kisim Gutpela Tingting na Save
14 God i wokim yumi i kain olsem em, olsem na yumi mas bihainim gutpela tingting na save, olsem God i bin mekim long taim em i wokim olgeta samting. “Long gutpela tingting na save bilong Bikpela yet . . . em i bin wokim graun na skai.” (Sindaun 3:19, 20) Em i kirap long wokim ol samting i gat laip, tasol em i no mekim long rot bilong evolusen, nogat. Em “i kamapim ol kain kain” animal samting, na “olgeta dispela samting i gutpela, na em i amamas.” (Stat 1:25) Na taim em i wokim man i gat tingting na save i winim ol animal, ol ensel i amamas moa yet na singaut. (Lukim Jop 38:1, 4, 7.) Ol dispela gutpela samting Jehova i bin wokim i kamapim long ples klia gutpela tingting na save na pasin sori bilong em.—Song 104:24.
15 Yumi mas wok long kisim gutpela tingting na save bilong Jehova, na yumi mas holimpas na no ken lusim. Yumi mas stadi long Baibel oltaim, em tok bilong em, na no ken les long mekim. Em i tokim yumi: “Pikinini, yu mas was gut na holim strong gutpela tingting na save bilong yu. Nogut yu lusim. Gutpela tingting na save bai i givim laip long yu na em bai i stap olsem gutpela bilas bilong yu.” (Sindaun 3:21, 22) Olsem bai yumi ken i stap strong na i stap bel isi, na yumi no ken tingting planti long dispela taim bilong bagarap i kam klostu, na “wantu tasol” ol samting bilong Satan bai kisim bagarap. (1 Tesalonaika 5:2, 3) Klostu nau bikpela hevi tru bai kamap long graun, tasol “bai yu no inap pret. . . . Yu mas bilip strong long Bikpela na em bai i banisim yu na lukautim yu na ol birua bai i no inap holimpas yu . . . Olsem na sapos taim nogut i kamap long ol man nogut na ol i bagarap, yu no ken pret.”—Sindaun 3:23-26.
Laikim Tumas Gutpela Pasin
16 Nau em taim bilong givim bel long wok bilong autim gutpela tok bilong Kingdom long ol man. Na yumi mas mekim sampela wok moa bilong ol Kristen, olsem Sindaun 3:27, 28 i tok: “Sapos wanpela man i sot long samting na . . . yu inap, yu mas givim em. . . . Yu no ken tokim em olsem, ‘Wet pastaim. Tumora yu kam bek.’ ” (Lukim Jems 2:14-17.) Nau long dispela taim planti man i stap rabis na ol i no gat kaikai, tasol yumi mas orait long helpim ol sapos yumi inap; na yumi mas helpim ol brata Kristen bilong yumi. Olsem wanem? Ol Witnes Bilong Jehova i save mekim olsem?
17 Long yia i go pinis, bikpela kol i kamap long kantri bipo ol i kolim Yugoslavia, na ol i singaut long klos. Ol brata bilong ol kantri klostu ol i salim planti klos long ol. I gat pait i stap, tasol sampela lain trak i go insait na bringim ol buk na magasin samting na klos na kaikai na marasin samting long ol Witnes. Wanpela taim ol i bin toksave long gavman long ol i laik bringim ol samting inap 15 ton, tasol taim ol i kisim pepa long gavman, ol i lukim olsem gavman i makim 30 ton kago ol i ken karim i go! Olsem na kwiktaim ol Witnes Bilong Jehova long Ostria i salim 3-pela trak moa, na ol samting inap 25 ton i go long ol. Ol brata bilong yumi long Yugoslavia ol i kisim planti samting bilong spirit na bilong skin na ol i amamas tru!
18 Ol i kisim ol dispela samting, na bihain wanpela elda bilong ol i salim pas na i tok: “Ol brata sista hia long taun Sarayevo ol i stap orait. Mipela i strong long ol samting bilong spirit inap long winim ol hevi bilong dispela pait ol i mekim. Mipela i bin sot tru long kaikai, tasol yupela i helpim mipela na nau mipela i orait, na mipela laik bai Jehova i ken mekim gut long yupela. Ol Witnes Bilong Jehova long hia i gat gutnem long ai bilong ol bikman, long wanem, ol Witnes i bihainim gutpela pasin na ol i daun long gavman. Na mipela i amamas tu long ol buk samting yupela bin salim i kam.”—Lukim Song 145:18.
19 Ol dispela brata i stap long ples nogut, tasol ol i strong long autim gutpela tok long ol man. Planti man i laik stadi long Baibel wantaim ol. Ol brata long taun Tusla i bin kisim 5 ton kaikai, na i gat 40 pablisa i stap, na ol wan wan i bin autim tok inap 25 aua (averes) long dispela mun, na i gat 9-pela painia tu i stap. Inap 243 i bin kam long Memorial bilong tingim i dai bilong Jisas. “Maski wanem kain samting i kamap long [ol], oltaim [Krais] i save mekim [ol] i win tru.”—Rom 8:37.
20 Na ol brata i bin salim ol kaikai na klos i go long ol brata long hap bilong Rasia tu, na dispela i strongim ol. Long biktaun Mosko 7,549 i bung long Memorial, tasol long yia i go pinis inap 3,500 tasol i bin bung. Bipo i gat 12-pela kongrigesen tasol long Mosko na nau i gat 16. Long olgeta kantri long dispela hap (tasol i no long ol kantri Boltik) ol kongrigesen i kamap planti inap 14 pesen, na ol pablisa inap 25 pesen, na ol painia inap 74 pesen. Ol i daunim laik bilong ol yet na ol i givim bel long wok bilong Kingdom! I olsem tu long ol Kristen bilong bipo—sapos sampela i gat planti samting bilong spirit na skin ol i helpim ol narapela i sot long dispela samting, olsem 2 Korin 8:14 i tok long “mekim wankain pasin na yupela olgeta bai i stap gut.” Na ol brata i bin givim ol samting, ol i kisim strong long pasin bilong ol brata i bin kisim ol samting, em ol i strong tru long mekim wok bilong God, maski taim nogut i painim ol.
Nolaik Tru Long Pasin Nogut!
21 Sindaun sapta 3 i toktok long ol samting i narapela narapela kain, na laspela tok i tok: “No ken kirap long bihainim pasin bilong ol man bilong pait, na yu no ken wokabaut long rot bilong ol. . . . Bikpela yet i no laik tru long kain man olsem. Tasol Bikpela i stap wanbel tru wantaim ol man i save wokabaut stret. Ol man nogut bai i bagarap wantaim ol famili bilong ol. Tasol Bikpela i save mekim gut long ol stretpela man wantaim ol famili bilong ol, na em i lukautim ol. . . . Em i save mekim gut long ol man i daunim ol yet. Ol manmeri bai i givim biknem long ol man i gat gutpela tingting. Tasol ol man i no gat gutpela tingting i save bagarapim nem bilong ol yet.”—Sindaun 3:29-35.
22 Olsem wanem yumi ken holim gutpela tingting? Yumi mas nolaik tru long samting Jehova i nolaik long en, olsem giaman bilong ol man bilong dispela graun em ol i save pait na kapsaitim blut bilong ol man. (Lukim Sindaun 6:16-19.) Yumi mas wok long kisim ol gutpela pasin, olsem pasin i stret na pasin daun; olsem bai yumi daun long Jehova na pret long em, na bai yumi kisim “biknem, na bai [yumi] stap gut.” (Sindaun 22:4) Yumi olgeta bai kisim dispela gutpela samting sapos yumi “bilip strong long Bikpela.”
Wanem Bekim Bilong Yu?
◻ Olsem wanem tok bilong Sindaun 3:7 i stret long yumi long nau?
◻ Yumi givim biknem long Jehova olsem wanem?
◻ Bilong wanem yumi no ken sakim tok bilong stretim yumi?
◻ Wanem wok i ken givim bikpela amamas long yumi?
◻ Olsem wanem yumi ken laikim gutpela samting na nolaik tru long samting nogut?
[Askim Bilong Stadi]
1. Sindaun i gat ol tok bilong helpim husat?
2. Bilong wanem yumi lain bilong nau i mas tingim gut tok bilong Sindaun 3:7?
3. Baibel i tok profet long wanem ol samting i mas kamap long taim bilong yumi?
4, 5. Husat bai abrusim bagarap? Bilong wanem?
6. Wanem samting i mas kirapim yumi long bihainim tok bilong Sindaun 3:9?
7. Wanem kain ofa yumi mas givim long Jehova? Sapos yumi mekim olsem, bai yumi kisim wanem gutpela samting?
8, 9. Yumi mas ting olsem wanem long ol tok bilong stretim yumi?
10, 11. Wanem sampela gutpela hap tok bilong Sindaun 3:13-18?
12. Olsem wanem gutpela tingting na save inap helpim yumi?
13. Wanem samting inap helpim yumi long taim bilong hevi?
14. Jehova i mekim wanem na em i kamapim klia gutpela tingting na save bilong em?
15. (a) Yumi mas kisim gutpela tingting na save, tasol bilong wanem yumi mas mekim sampela samting moa tu? (b) Tok bilong Sindaun 3:25, 26 i mas kirapim yumi long bilip long wanem samting?
16. Kristen i mas givim bel long autim tok, na wanem wok moa em i mas mekim?
17-19. (a) Long 1993 husat ol i sot long ol samting? Ol brata i helpim ol olsem wanem? (b) Olsem wanem yumi save ol brata long kantri ol i bin kolim Yugoslavia ol “i win tru,” maski taim nogut i painim ol?
20. Ol i mekim wanem long ol brata long Rasia na “olgeta bai i stap gut”?
21. Olsem wanem long ol man i gat gutpela tingting na ol man i no gat gutpela tingting, olsem yumi lukim long Sindaun sapta 3?
22. (a) Yumi mas mekim wanem na bai yumi no ken bagarap wantaim ol man i no gat gutpela tingting? (b) Ol man i gat gutpela tingting ol i nolaik tru long wanem samting? Ol i wok long kisim wanem pasin? Bai ol i kisim wanem gutpela samting?
[Piksa long pes 18]
Ol man i givim bel tru long Jehova bai kisim planti gutpela samting