Jehova i Mekim Gut Long Yumi na Yumi Gat Planti Samting
1 Planti man i ting pe man i save kisim long olgeta fotnait i makim i stap bilong em i gutpela o nogat. Dispela i mekim na planti manmeri i ting ol man i gat planti mani ol i save stap belgut na amamas tru. Tasol sori tru, ol man i ting mani inap givim amamas long ol, ol i popaia stret. (Sav 5:12) Ol “man i laikim tumas long kisim planti mani samting” ol bai no kisim amamas bilong stap oltaim oltaim. (1 Ti 6:9) Tasol ol wokman bilong Jehova ol i save stap amamas tru na ol i gat planti gutpela samting. (Snd 10:22; KTH 2:9) Bilong wanem em i olsem?
2 Planti Gutpela Samting Bilong Yumi: Yumi gat gutpela tingting na save long ol samting bilong spirit na yumi save gut long Tok bilong God, em Baibel. Long rot bilong oganaisesen bilong em hia long graun, oltaim Jehova i save skulim yumi long em yet na long Pikinini bilong em, na dispela bai helpim yumi inap oltaim. Stretpela save i mekim na yumi inap go klostu long Jehova na pas gut wantaim em. (Je 4:8) Taim yumi skelim wanem samting i gutpela na wanem samting i nogut na yumi bihainim ol lo bilong God, dispela i lukautim yumi na yumi inap abrusim sampela sik na bagarap. Yumi bilip olsem Jehova bai lukautim yumi long ol samting bilong skin, olsem na yumi kisim bel isi em God i save givim long yumi.—Mt 6:33.
3 Yumi stap bel isi na stap wanbel wantaim ol brata spirit bilong yumi, long wanem, yumi save mekim ol pasin em spirit bilong God i save kamapim. Pasin bilong laikim tru narapela i pasim yumi wantaim, olsem na yumi no ken ting taim hevi i painim yumi, God na ol brata bilong yumi bai lusim yumi.—Ga 6:10.
4 I stap bilong yumi i gat as tru bilong en. Yumi ting wok bilong autim gutnius long olgeta hap bilong graun em i wanpela gutpela wok tru yumi bin kisim. Taim yumi helpim ol narapela long pas gut wantaim God na stap wanbel wantaim yumi long mekim lotu i tru, bai yumi kisim bikpela amamas tru oltaim oltaim. Gutpela wok bilong yumi long autim tok i givim biknem long Jehova, na long dispela rot yumi ken stap belgut, long wanem, yumi mekim nem bilong Jehova i stap holi. Yumi bihainim yet stretpela tingting, na yumi save olsem liklik taim bihain ol samting yumi wet long en bai kamap tru.
5 Soim Olsem Yumi Amamas Long Dispela Samting: Yumi mas amamas long Jehova i mekim gut long yumi, em dispela samting i mekim na yumi gat planti gutpela samting, winim olgeta narapela man. (Snd 22:4) Pasin bilong lusim hap taim long olgeta de long tingim tingim ol samting yumi bin kisim, dispela bai kirapim yumi long tok tenkyu long Jehova long em i laikim tru yumi, na i kirapim yumi long wok yet long lotu long em wanpela tasol.